ᠭᠡᠲᠦᠯᠦᠯ ᠳᠥᠴᠢ
ᠴᠠᠴᠠᠷ ᠢ ᠪᠠᠷᠢᠵᠤ ᠳᠠᠭᠤᠰᠬᠠᠪᠠ
1 ᠶᠣᠬᠣᠸᠠ ᠮᠣᠰᠧ ᠳᠤ ᠠᠢᠯᠠᠳᠤᠨ᠄ 2 《ᠡᠬᠢᠨ ᠤ ᠰᠠᠷᠠ ᠶᠢᠨ ᠡᠬᠢᠨ ᠤ ᠡᠳᠦᠷ ᠲᠦ ᠴᠢ ᠠᠭᠤᠯᠵᠠᠯᠲᠠ ᠶᠢᠨ ᠮᠠᠢᠬᠠᠨ ᠪᠣᠯᠬᠤ ᠣᠷᠣᠰᠢᠬᠤᠢ ᠶᠢᠨ ᠮᠠᠢᠬᠠᠨ ᠢ ᠪᠣᠰᠬᠠᠵᠤ᠂ 3 ᠲᠡᠨᠳᠡ ᠭᠡᠷᠡᠴᠢᠯᠡᠯ ᠦᠨ ᠠᠪᠳᠠᠷᠠ ᠶᠢ ᠲᠠᠯᠪᠢᠵᠤ᠂ ᠠᠪᠳᠠᠷᠠ ᠶᠢ ᠬᠥᠰᠢᠭᠡ ᠪᠡᠷ ᠬᠠᠯᠬᠠᠯᠠ᠃ 4 ᠲᠡᠭᠡᠭᠡᠳ ᠰᠢᠷᠡᠭᠡ ᠶᠢ ᠣᠷᠣᠭᠤᠯᠤᠭᠠᠳ᠂ ᠡᠭᠦᠨ ᠦ ᠳᠡᠭᠡᠷᠡᠬᠢ ᠬᠡᠷᠡᠭᠰᠡᠯ ᠤᠳ ᠢ ᠪᠠᠢᠷᠢᠯᠠᠭᠤᠯᠵᠤ᠂ ᠳ᠋ᠧᠩ ᠤᠨ ᠲᠠᠯᠪᠢᠭᠤᠷ ᠢ ᠣᠷᠣᠭᠤᠯᠤᠨ᠂ ᠳ᠋ᠧᠩ ᠤᠳ ᠢ ᠳᠡᠭᠡᠷᠡ ᠨᠢ ᠲᠠᠯᠪᠢ᠂ 5 ᠤᠲᠤᠯᠭᠠ ᠶᠢᠨ ᠠᠯᠲᠠᠨ ᠲᠠᠬᠢᠯ ᠤᠨ ᠰᠢᠷᠡᠭᠡ ᠶᠢ ᠭᠡᠷᠡᠴᠢᠯᠡᠯ ᠦᠨ ᠠᠪᠳᠠᠷᠠ ᠶᠢᠨ ᠡᠮᠦᠨᠡ ᠲᠠᠯᠪᠢᠵᠤ᠂ ᠣᠷᠣᠰᠢᠬᠤᠢ ᠶᠢᠨ ᠴᠠᠴᠠᠷ ᠤᠨ ᠬᠥᠰᠢᠭᠡᠨ ᠡᠭᠦᠳᠡ ᠶᠢ ᠲᠠᠲᠠ᠂ 6 ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠤᠨ ᠰᠢᠷᠡᠭᠡ ᠶᠢ ᠠᠭᠤᠯᠵᠠᠯᠲᠠ ᠶᠢᠨ ᠮᠠᠢᠬᠠᠨ ᠪᠣᠯᠬᠤ ᠴᠠᠴᠠᠷ ᠤᠨ ᠡᠭᠦᠳᠡᠨ ᠦ ᠡᠮᠦᠨᠡ ᠲᠠᠯᠪᠢᠵᠤ᠂ 7 ᠤᠬᠢᠶᠠᠯᠭᠠ ᠶᠢᠨ ᠰᠠᠪᠠ ᠶᠢ ᠠᠭᠤᠯᠵᠠᠯᠲᠠ ᠶᠢᠨ ᠮᠠᠢᠬᠠᠨ ᠪᠠ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠬᠣᠭᠣᠷᠣᠨᠳᠣ ᠲᠠᠯᠪᠢᠭᠠᠳ᠂ ᠳᠣᠲᠣᠷᠠ ᠨᠢ ᠤᠰᠤ ᠬᠢ᠂ 8 ᠴᠠᠴᠠᠷ ᠢ ᠲᠣᠭᠣᠷᠢᠭᠤᠯᠤᠨ ᠬᠦᠷᠢᠶᠡ ᠪᠠᠷᠢᠵᠤ᠂ ᠬᠦᠷᠢᠶᠡᠨ ᠳᠦ ᠬᠥᠰᠢᠭᠡᠨ ᠡᠭᠦᠳᠡ ᠡᠯᠭᠦ᠃ 9 ᠲᠡᠭᠡᠭᠡᠳ ᠴᠢ ᠲᠣᠰᠣᠯᠠᠯᠭᠠ ᠶᠢᠨ ᠲᠣᠰᠣ ᠠᠪᠴᠤ᠂ ᠴᠠᠴᠠᠷ ᠪᠣᠯᠣᠨ ᠲᠡᠭᠦᠨ ᠦ ᠳᠣᠲᠣᠷᠠᠬᠢ ᠪᠦᠬᠦ ᠵᠦᠢᠯ ᠢ ᠲᠣᠰᠣᠯᠠᠭᠠᠳ᠂ ᠴᠠᠴᠠᠷ ᠪᠣᠯᠣᠨ ᠪᠦᠬᠦ ᠬᠡᠷᠡᠭᠰᠡᠯ ᠢ ᠨᠢ ᠠᠷᠢᠭᠤᠰᠬᠠ᠃ ᠲᠡᠭᠡᠪᠡᠯ ᠴᠠᠴᠠᠷ ᠨᠢ ᠠᠷᠢᠭᠤᠨ ᠪᠣᠯᠣᠨᠠ᠃ 10 ᠮᠥᠨ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠤᠨ ᠰᠢᠷᠡᠭᠡ ᠪᠣᠯᠣᠨ ᠪᠦᠬᠦ ᠬᠡᠷᠡᠭᠰᠡᠯ ᠢ ᠨᠢ ᠲᠣᠰᠣᠯᠠᠵᠤ᠂ ᠰᠢᠷᠡᠭᠡ ᠶᠢ ᠠᠷᠢᠭᠤᠰᠬᠠ᠃ ᠲᠡᠭᠡᠪᠡᠯ ᠰᠢᠷᠡᠭᠡ ᠨᠢ ᠠᠷᠢᠭᠤᠨ ᠠᠴᠠ ᠠᠷᠢᠭᠤᠨ ᠪᠣᠯᠣᠨᠠ᠃ 11 ᠪᠠᠰᠠ ᠤᠬᠢᠶᠠᠯᠭᠠ ᠶᠢᠨ ᠰᠠᠪᠠ ᠪᠣᠯᠣᠨ ᠰᠠᠭᠤᠷᠢ ᠶᠢ ᠨᠢ ᠲᠣᠰᠣᠯᠠᠵᠤ ᠠᠷᠢᠭᠤᠰᠬᠠ᠃ 12 ᠴᠢ ᠠᠷᠣᠨ ᠪᠣᠯᠣᠨ ᠲᠡᠭᠦᠨ ᠦ ᠬᠥᠪᠡᠭᠦᠳ ᠢ ᠠᠭᠤᠯᠵᠠᠯᠲᠠ ᠶᠢᠨ ᠮᠠᠢᠬᠠᠨ ᠤ ᠡᠭᠦᠳᠡᠨ ᠳᠦ ᠠᠪᠴᠢᠷᠠᠨ᠂ ᠤᠰᠤ ᠪᠠᠷ ᠤᠬᠢᠶᠠ᠃ 13 ᠠᠷᠣᠨ ᠳᠤ ᠠᠷᠢᠭᠤᠨ ᠬᠤᠪᠴᠠᠰᠤ ᠡᠮᠦᠰᠬᠡᠭᠡᠳ᠂ ᠲᠣᠰᠣᠯᠠᠨ ᠠᠷᠢᠭᠤᠰᠬᠠᠵᠤ᠂ ᠨᠠᠳᠠ ᠳᠤ ᠦᠢᠯᠡᠴᠢᠯᠡᠬᠦ ᠲᠠᠬᠢᠯᠴᠢ ᠪᠣᠯᠭᠠ᠂ 14 ᠪᠠᠰᠠ ᠲᠡᠭᠦᠨ ᠦ ᠬᠥᠪᠡᠭᠦᠳ ᠢ ᠣᠷᠣᠭᠤᠯᠵᠤ᠂ ᠲᠡᠳᠡᠨ ᠳᠦ ᠳᠣᠲᠣᠷ ᠴᠠᠮᠴᠠ ᠡᠮᠦᠰᠬᠡᠨ 15 ᠡᠴᠢᠭᠡ ᠶᠢ ᠨᠢ ᠲᠣᠰᠣᠯᠠᠭᠰᠠᠨ ᠰᠢᠭ᠋ ᠢᠶᠠᠨ ᠲᠡᠳᠡᠨ ᠢ ᠲᠣᠰᠣᠯᠠᠵᠤ᠂ ᠨᠠᠳᠠ ᠳᠤ ᠦᠢᠯᠡᠴᠢᠯᠡᠬᠦ ᠲᠠᠬᠢᠯᠴᠢ ᠪᠣᠯᠭᠠ᠃ ᠡᠨᠡ ᠲᠣᠰᠣᠯᠠᠯᠭᠠ ᠪᠠᠷ ᠮᠥᠩᠬᠡ ᠶᠢᠨ ᠲᠠᠬᠢᠯᠴᠢ ᠶᠢᠨ ᠲᠤᠰᠢᠶᠠᠯ ᠨᠢ ᠦᠶᠡ ᠶᠢᠨ ᠦᠶᠡ ᠳᠦ ᠲᠡᠳᠡᠨ ᠦ ᠬᠢ ᠪᠠᠢᠬᠤ ᠪᠣᠯᠣᠨᠠ》 ᠭᠡᠰᠡᠨ ᠳᠦ᠂ 16 ᠮᠣᠰᠧ ᠡᠢᠨ ᠬᠦ ᠭᠦᠢᠴᠡᠳᠬᠡᠪᠡ᠃ ᠮᠣᠰᠧ ᠪᠦᠬᠦᠨ ᠢ ᠶᠠᠭ ᠶᠣᠬᠣᠸᠠ ᠶᠢᠨ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠦᠢᠯᠡᠳᠪᠡ᠃
17 ᠬᠣᠶᠠᠳᠠᠬᠢ ᠵᠢᠯ ᠤᠨ ᠡᠬᠢᠨ ᠤ ᠰᠠᠷᠠ ᠶᠢᠨ ᠠᠩ᠋ᠬᠠᠨ ᠤ ᠡᠳᠦᠷ ᠴᠠᠴᠠᠷ ᠪᠣᠰᠬᠠᠭᠳᠠᠵᠠᠢ᠃ 18 ᠮᠣᠰᠧ ᠣᠷᠣᠰᠢᠬᠤᠢ ᠶᠢᠨ ᠮᠠᠢᠬᠠᠨ ᠢ ᠪᠠᠷᠢᠬᠤ ᠳᠠᠭᠠᠨ᠂ ᠰᠠᠭᠤᠷᠢ ᠨᠤᠭᠤᠳ ᠢ ᠨᠢ ᠰᠠᠭᠤᠯᠭᠠᠵᠤ᠂ ᠬᠠᠪᠲᠠᠰᠤ ᠨᠤᠭᠤᠳ ᠢ ᠨᠢ ᠪᠣᠰᠬᠠᠨ᠂ ᠬᠥᠨᠳᠡᠯᠡᠪᠴᠢ ᠮᠣᠳᠣᠳ ᠢ ᠨᠢ ᠰᠢᠷᠭᠤᠭᠤᠯᠵᠤ᠂ ᠪᠠᠭᠠᠨᠠ ᠨᠤᠭᠤᠳ ᠢ ᠨᠢ ᠪᠣᠰᠬᠠᠭᠠᠳ 19 ᠣᠷᠣᠰᠢᠬᠤᠢ ᠶᠢᠨ ᠮᠠᠢᠬᠠᠨ ᠤ ᠮᠠᠢᠬᠠᠨ ᠢ ᠨᠢ ᠪᠦᠷᠬᠦᠵᠦ᠂ ᠮᠠᠢᠬᠠᠨ ᠤ ᠳᠡᠭᠡᠭᠦᠷ ᠪᠦᠷᠢᠶᠡᠰᠦ ᠶᠢ ᠨᠢ ᠲᠠᠯᠪᠢᠭᠰᠠᠨ ᠳᠤ᠂ ᠡᠨᠡ ᠨᠢ ᠶᠣᠬᠣᠸᠠ ᠶᠢᠨ ᠮᠣᠰᠧ ᠳᠤ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠪᠣᠯᠵᠠᠢ᠃
20 ᠳᠠᠷᠠᠭᠠ ᠨᠢ ᠲᠡᠷᠡ ᠭᠡᠷᠡᠴᠢᠯᠡᠯ ᠦᠨ ᠬᠠᠪᠲᠠᠰᠤ ᠶᠢ ᠠᠪᠴᠢᠷᠠᠵᠤ ᠠᠪᠳᠠᠷᠠ ᠳᠤ ᠬᠢᠭᠡᠳ ᠳᠠᠮᠨᠠᠭᠤᠷᠭᠠ ᠨᠤᠭᠤᠳ ᠢ ᠨᠢ ᠠᠪᠳᠠᠷᠠ ᠳᠤ ᠰᠢᠷᠭᠤᠭᠤᠯᠵᠤ᠂ ᠠᠪᠳᠠᠷᠠ ᠶᠢᠨ ᠳᠡᠭᠡᠷᠡ ᠬᠡᠯᠲᠦᠷᠢᠭᠦᠯᠦᠯᠭᠡ ᠶᠢᠨ ᠬᠠᠪᠬᠠᠭ ᠢ ᠲᠠᠯᠪᠢᠨ᠂ 21 ᠠᠪᠳᠠᠷᠠ ᠶᠢ ᠣᠷᠣᠰᠢᠬᠤᠢ ᠶᠢᠨ ᠮᠠᠢᠬᠠᠨ ᠳᠣᠲᠣᠷᠠ ᠣᠷᠣᠭᠤᠯᠵᠤ᠂ ᠬᠠᠯᠬᠠᠪᠴᠢ ᠡᠯᠭᠦᠭᠡᠳ ᠭᠡᠷᠡᠴᠢᠯᠡᠯ ᠦᠨ ᠠᠪᠳᠠᠷᠠ ᠶᠢ ᠬᠠᠯᠬᠠᠯᠠᠭᠰᠠᠨ ᠳᠤ᠂ ᠡᠨᠡ ᠨᠢ ᠶᠣᠬᠣᠸᠠ ᠶᠢᠨ ᠮᠣᠰᠧ ᠳᠤ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠪᠣᠯᠵᠠᠢ᠃
22 ᠳᠠᠷᠠᠭᠠ ᠨᠢ ᠰᠢᠷᠡᠭᠡ ᠶᠢ ᠠᠭᠤᠯᠵᠠᠯᠲᠠ ᠶᠢᠨ ᠮᠠᠢᠬᠠᠨ ᠳᠤ ᠣᠷᠣᠭᠤᠯᠤᠨ ᠴᠠᠴᠠᠷ ᠤᠨ ᠬᠣᠢᠲᠤ ᠲᠠᠯᠠ᠂ ᠬᠥᠰᠢᠭᠡᠨ ᠦ ᠭᠠᠳᠠᠨᠠ ᠲᠠᠯᠪᠢᠵᠤ᠂
23 ᠰᠢᠷᠡᠭᠡᠨ ᠳᠡᠭᠡᠷᠡ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠪᠣᠣᠪᠣ ᠶᠢ ᠲᠠᠯᠪᠢᠭᠰᠠᠨ ᠳᠤ᠂ ᠡᠨᠡ ᠨᠢ ᠶᠣᠬᠣᠸᠠ ᠶᠢᠨ ᠮᠣᠰᠧ ᠳᠤ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠪᠣᠯᠵᠠᠢ᠃
24 ᠲᠡᠭᠡᠭᠡᠳ ᠳ᠋ᠧᠩ ᠤᠨ ᠲᠠᠯᠪᠢᠭᠤᠷ ᠢ ᠠᠭᠤᠯᠵᠠᠯᠲᠠ ᠶᠢᠨ ᠮᠠᠢᠬᠠᠨ ᠤ ᠳᠣᠲᠣᠷᠠᠬᠢ ᠰᠢᠷᠡᠭᠡᠨ ᠦ ᠬᠠᠷᠠᠯᠳᠤᠭᠠ᠂ ᠴᠠᠴᠠᠷ ᠤᠨ ᠡᠮᠦᠨᠡ ᠲᠠᠯᠠ ᠳᠤ ᠲᠠᠯᠪᠢᠵᠤ᠂ 25 ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠳ᠋ᠧᠩ ᠤᠳ ᠢ ᠲᠠᠯᠪᠢᠭᠰᠠᠨ ᠳᠤ᠂ ᠡᠨᠡ ᠨᠢ ᠶᠣᠬᠣᠸᠠ ᠶᠢᠨ ᠮᠣᠰᠧ ᠳᠤ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠪᠣᠯᠵᠠᠢ᠃
26 ᠳᠠᠷᠠᠭᠠ ᠨᠢ ᠠᠯᠲᠠᠨ ᠲᠠᠬᠢᠯ ᠤᠨ ᠰᠢᠷᠡᠭᠡ ᠶᠢ ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠳᠣᠲᠣᠷᠠ ᠬᠥᠰᠢᠭᠡᠨ ᠦ ᠡᠮᠦᠨᠡ ᠲᠠᠯᠪᠢᠵᠤ᠂ 27 ᠠᠩᠬᠢᠯᠤᠭᠤᠨ ᠤᠲᠤᠯᠭᠠ ᠶᠢ ᠲᠡᠭᠦᠨ ᠳᠡᠭᠡᠷᠡ ᠤᠭᠤᠭᠢᠭᠤᠯᠤᠭᠰᠠᠨ ᠳᠤ᠂ ᠡᠨᠡ ᠨᠢ ᠶᠣᠬᠣᠸᠠ ᠶᠢᠨ ᠮᠣᠰᠧ ᠳᠤ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠪᠣᠯᠵᠠᠢ᠃
28 ᠲᠡᠭᠡᠭᠡᠳ ᠣᠷᠣᠰᠢᠬᠤᠢ ᠶᠢᠨ ᠮᠠᠢᠬᠠᠨ ᠤ ᠪᠦᠷᠬᠦᠭᠦᠯ ᠡᠭᠦᠳᠡ ᠶᠢ ᠡᠯᠭᠦᠭᠡᠳ 29 ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠤᠨ ᠰᠢᠷᠡᠭᠡ ᠶᠢ ᠠᠭᠤᠯᠵᠠᠯᠲᠠ ᠶᠢᠨ ᠮᠠᠢᠬᠠᠨ ᠪᠣᠯᠬᠤ ᠴᠠᠴᠠᠷ ᠤᠨ ᠡᠭᠦᠳᠡᠨ ᠦ ᠡᠮᠦᠨᠡ ᠲᠠᠯᠪᠢᠵᠤ᠂ ᠲᠡᠭᠦᠨ ᠳᠡᠭᠡᠷᠡ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠪᠣᠯᠣᠨ ᠢᠳᠡᠭᠡᠨ ᠡᠷᠭᠦᠯ ᠢ ᠡᠷᠭᠦᠭᠰᠡᠨ ᠳᠦ᠂ ᠡᠨᠡ ᠨᠢ ᠶᠣᠬᠣᠸᠠ ᠶᠢᠨ ᠮᠣᠰᠧ ᠳᠤ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠪᠣᠯᠵᠠᠢ᠃
30 ᠲᠡᠭᠡᠭᠡᠳ ᠤᠬᠢᠶᠠᠯᠭᠠ ᠶᠢᠨ ᠰᠠᠪᠠ ᠶᠢ ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠪᠠ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠬᠣᠭᠣᠷᠣᠨᠳᠣ ᠲᠠᠯᠪᠢᠵᠤ᠂ ᠲᠡᠭᠦᠨ ᠳᠣᠲᠣᠷᠠ ᠤᠬᠢᠶᠠᠬᠤ ᠤᠰᠤ ᠬᠢᠭᠰᠡᠨ ᠳᠦ 31 ᠮᠣᠰᠧ᠂ ᠠᠷᠣᠨ ᠪᠣᠯᠣᠨ ᠲᠡᠭᠦᠨ ᠦ ᠬᠥᠪᠡᠭᠦᠳ ᠲᠡᠷᠡ ᠤᠰᠤ ᠪᠠᠷ ᠭᠠᠷ᠂ ᠬᠥᠯ ᠢᠶᠡᠨ ᠤᠬᠢᠶᠠᠨ 32 ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠲᠤ ᠣᠷᠣᠬᠤ ᠳᠠᠭᠠᠨ ᠴᠤ᠂ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠳᠦ ᠣᠢᠷᠠᠲᠤᠬᠤ ᠳᠠᠭᠠᠨ ᠴᠤ ᠤᠬᠢᠶᠠᠳᠠᠭ ᠪᠣᠯᠣᠭᠰᠠᠨ ᠨᠢ ᠶᠣᠬᠣᠸᠠ ᠶᠢᠨ ᠮᠣᠰᠧ ᠳᠤ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠪᠣᠯᠵᠠᠢ᠃
33 ᠲᠡᠭᠡᠭᠡᠳ ᠴᠠᠴᠠᠷ ᠪᠠ ᠲᠠᠬᠢᠯ ᠤᠨ ᠰᠢᠷᠡᠭᠡ ᠶᠢ ᠲᠣᠭᠣᠷᠢᠭᠤᠯᠤᠨ ᠬᠦᠷᠢᠶᠡ ᠪᠣᠰᠬᠠᠵᠤ᠂ ᠬᠦᠷᠢᠶᠡᠨ ᠳᠦ ᠪᠦᠷᠬᠦᠭᠦᠯ ᠡᠭᠦᠳᠡ ᠡᠯᠭᠦᠭᠰᠡᠨ ᠢᠶᠡᠷ ᠮᠣᠰᠧ ᠠᠵᠢᠯ ᠢᠶᠠᠨ ᠳᠠᠭᠤᠰᠬᠠᠯᠠ᠃
ᠴᠠᠴᠠᠷ ᠤᠨ ᠳᠡᠭᠡᠷᠡᠬᠢ ᠴᠣᠭ ᠵᠢᠪᠬᠤᠯᠠᠩ
34 ᠲᠡᠭᠡᠲᠡᠯᠡ ᠠᠭᠤᠯᠵᠠᠯᠲᠠ ᠶᠢᠨ ᠮᠠᠢᠬᠠᠨ ᠢ ᠡᠭᠦᠯᠡ ᠪᠦᠷᠬᠦᠪᠡ᠂ ᠴᠠᠴᠠᠷ ᠢ ᠶᠣᠬᠣᠸᠠ ᠶᠢᠨ ᠴᠣᠭ ᠵᠢᠪᠬᠤᠯᠠᠩ ᠳᠦᠭᠦᠷᠭᠡᠯᠡ᠃ 35 ᠮᠣᠰᠧ ᠠᠭᠤᠯᠵᠠᠯᠲᠠ ᠶᠢᠨ ᠮᠠᠢᠬᠠᠨ ᠳᠤ ᠣᠷᠣᠵᠤ ᠴᠢᠳᠠᠭᠰᠠᠨ ᠦᠭᠡᠢ᠂ ᠴᠠᠴᠠᠷ ᠤᠨ ᠳᠡᠭᠡᠷᠡ ᠡᠭᠦᠯᠡ ᠲᠣᠭᠲᠠᠵᠤ ᠶᠣᠬᠣᠸᠠ ᠶᠢᠨ ᠴᠣᠭ ᠵᠢᠪᠬᠤᠯᠠᠩ ᠴᠠᠴᠠᠷ ᠢ ᠳᠦᠭᠦᠷᠭᠡᠭᠰᠡᠨ ᠪᠠᠢᠯᠠ᠃ 36 ᠪᠦᠬᠦ ᠠᠶᠠᠨ ᠵᠠᠮ ᠳᠠᠭᠠᠨ ᠡᠭᠦᠯᠡ ᠴᠠᠴᠠᠷ ᠤᠨ ᠳᠡᠭᠡᠷᠡ ᠡᠴᠡ ᠳᠡᠭᠡᠭᠰᠢ ᠡᠷᠭᠦᠭᠳᠡᠪᠡᠯ ᠢᠰᠷᠧᠯᠴᠦᠳ ᠬᠥᠳᠡᠯᠵᠦ᠂ 37 ᠡᠭᠦᠯᠡ ᠡᠷᠭᠦᠭᠳᠡᠬᠦ ᠦᠭᠡᠢ ᠪᠣᠯ ᠳᠡᠭᠡᠭᠰᠢ ᠡᠷᠭᠦᠭᠳᠡᠬᠦ ᠡᠳᠦᠷ ᠪᠣᠯᠲᠠᠯᠠ ᠬᠥᠳᠡᠯᠳᠡᠭ ᠦᠭᠡᠢ ᠪᠠᠢᠯᠠ᠃ 38 ᠡᠢᠨ ᠬᠦ ᠡᠳᠦᠷ ᠨᠢ ᠶᠣᠬᠣᠸᠠ ᠶᠢᠨ ᠡᠭᠦᠯᠡ ᠴᠠᠴᠠᠷ ᠤᠨ ᠳᠡᠭᠡᠷᠡ ᠪᠠᠢᠭᠠ ᠨᠢ᠂ ᠰᠥᠨᠢ ᠨᠢ ᠲᠡᠷᠡ ᠡᠭᠦᠯᠡᠨ ᠦ ᠳᠣᠲᠣᠷᠠ ᠭᠠᠯ ᠪᠠᠢᠭᠠ ᠨᠢ ᠢᠰᠷᠧᠯ ᠤᠨ ᠪᠦᠬᠦ ᠭᠡᠷ ᠦᠨ ᠬᠢᠨ ᠤ ᠨᠢᠳᠦᠨ ᠡᠮᠦᠨᠡ ᠠᠶᠠᠨ ᠤ ᠲᠤᠷᠰᠢ ᠦᠵᠡᠭᠳᠡᠵᠦ ᠪᠠᠢᠭᠰᠠᠨ ᠶᠤᠮ᠃