ᠭᠡᠲᠦᠯᠦᠯ ᠠᠷᠪᠠᠨ ᠵᠢᠷᠭᠤᠭᠠ
ᠮᠠᠨᠨᠠ ᠬᠢᠭᠡᠳ ᠪᠥᠳᠥᠨᠡ ᠰᠢᠪᠠᠭᠤ
1 ᠪᠦᠬᠦ ᠢᠰᠷᠧᠯ ᠤᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠡᠯᠢᠮ ᠡᠴᠡ ᠬᠥᠳᠡᠯᠵᠦ᠂ ᠡᠯᠢᠮ ᠪᠣᠯᠣᠨ ᠰᠢᠨᠠᠢ ᠠᠭᠤᠯᠠ ᠶᠢᠨ ᠬᠣᠭᠣᠷᠣᠨᠳᠣᠬᠢ ᠽᠢᠨ ᠴᠥᠯ ᠳᠤ ᠬᠦᠷᠪᠡ᠃ ᠡᠨᠡ ᠨᠢ ᠶᠧᠵᠢᠫᠲ ᠡᠴᠡ ᠭᠠᠷᠤᠭᠰᠠᠨ ᠠᠴᠠ ᠬᠣᠢᠰᠢᠬᠢ ᠬᠣᠶᠠᠳᠠᠬᠢ ᠰᠠᠷᠠ ᠶᠢᠨ ᠠᠷᠪᠠᠨ ᠲᠠᠪᠤᠳᠠᠬᠢ ᠡᠳᠦᠷ ᠪᠠᠢᠪᠠ᠃ 2 ᠢᠰᠷᠧᠯ ᠤᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠪᠦᠭᠦᠳᠡᠭᠡᠷ ᠡᠵᠡᠭᠦᠢ ᠵᠡᠯᠢᠭᠦᠳ ᠲᠡᠷᠡ ᠭᠠᠵᠠᠷ ᠲᠤ ᠮᠣᠰᠧ᠂ ᠠᠷᠣᠨ ᠬᠣᠶᠠᠷ ᠲᠤ ᠭᠣᠮᠣᠳᠠᠯᠯᠠᠭᠰᠠᠨ ᠪᠠᠢᠨᠠ᠃ 3 ᠢᠰᠷᠧᠯᠴᠦᠳ ᠲᠡᠳᠡᠨ ᠳᠦ᠄ 《ᠮᠠᠨ ᠤ ᠬᠢᠨ ᠶᠧᠵᠢᠫᠲ ᠲᠤ ᠮᠢᠬᠠ ᠲᠠᠢ ᠲᠣᠭᠣᠭᠠ ᠶᠢᠨ ᠬᠠᠵᠠᠭᠤ ᠳᠤ ᠰᠠᠭᠤᠵᠤ᠂ ᠴᠠᠳᠲᠠᠯᠠ ᠪᠠᠨ ᠪᠣᠣᠪᠣ ᠢᠳᠡᠳᠡᠭ ᠪᠠᠢᠬᠤ ᠳᠠᠭᠠᠨ ᠶᠣᠬᠣᠸᠠ ᠶᠢᠨ ᠮᠤᠲᠤᠷ ᠲᠤ ᠠᠯᠠᠭᠳᠠᠭᠰᠠᠨ ᠪᠣᠯ ᠳᠡᠭᠡᠷᠡ ᠪᠠᠢᠵᠠᠢ᠃ ᠲᠠ ᠨᠠᠷ ᠪᠢᠳᠡᠨ ᠢ ᠲᠡᠨᠳᠡ ᠡᠴᠡ ᠭᠠᠷᠭᠠᠵᠤ᠂ ᠡᠨᠡ ᠴᠥᠯ ᠳᠤ ᠠᠪᠴᠢᠷᠠᠭᠰᠠᠨ ᠢᠶᠠᠷ ᠡᠨᠡ ᠠᠷᠠᠳ ᠣᠯᠠᠨ ᠪᠦᠭᠦᠳᠡᠭᠡᠷ ᠢᠶᠡᠨ ᠥᠯᠥᠰᠬᠥᠯᠡᠩ ᠢᠶᠡᠷ ᠦᠬᠦᠬᠦ ᠪᠣᠯᠵᠤ ᠪᠠᠢᠨᠠ》 ᠭᠡᠪᠡ᠃
4 ᠶᠣᠬᠣᠸᠠ ᠮᠣᠰᠧ ᠳᠤ᠄ 《ᠬᠠᠷᠠ᠂ ᠪᠢ ᠲᠠ ᠨᠠᠷ ᠲᠤ ᠲᠩᠷᠢ ᠡᠴᠡ ᠪᠣᠷᠣᠭᠠ ᠮᠡᠲᠦ ᠪᠡᠷ ᠪᠣᠣᠪᠣ ᠣᠷᠣᠭᠤᠯᠤᠨᠠ︕ ᠠᠷᠠᠳ ᠲᠦᠮᠡᠨ ᠭᠠᠷᠴᠤ᠂ ᠡᠳᠦᠷ ᠪᠦᠷᠢ ᠥᠪᠡᠷ ᠦᠨ ᠬᠡᠷᠡᠭᠴᠡᠭᠡ ᠪᠡᠷ ᠢᠶᠠᠨ ᠴᠤᠭᠯᠠᠭᠤᠯᠤᠨᠠ᠃ ᠲᠡᠢᠨ ᠬᠦ ᠪᠢ ᠲᠡᠳᠡᠨ ᠢ ᠰᠣᠷᠢᠵᠤ᠂ ᠮᠢᠨᠦ ᠵᠢᠭᠠᠪᠤᠷᠢ ᠶᠢ ᠮᠥᠷᠳᠡᠬᠦ ᠡᠰᠡᠬᠦ ᠶᠢ ᠨᠢ ᠦᠵᠡᠨᠡ᠃ 5 ᠲᠡᠳᠡ ᠵᠢᠷᠭᠤᠳᠠᠬᠢ ᠡᠳᠦᠷ ᠦᠨ ᠬᠤᠷᠢᠶᠠᠭᠰᠠᠨ ᠢᠶᠠᠷ ᠢᠶᠠᠨ ᠬᠣᠭᠣᠯᠠ ᠪᠠᠵᠠᠭᠠᠬᠤ ᠳᠤ᠂ ᠲᠡᠷᠡ ᠨᠢ ᠪᠤᠰᠤᠳ ᠡᠳᠦᠷ ᠦᠨ ᠬᠤᠷᠢᠶᠠᠳᠠᠭ ᠠᠴᠠ ᠪᠠᠨ ᠬᠣᠶᠠᠷ ᠳᠠᠬᠢᠨ ᠪᠣᠯᠣᠨᠠ》 ᠭᠡᠪᠡ᠃ 6 ᠮᠣᠰᠧ᠂ ᠠᠷᠣᠨ ᠬᠣᠶᠠᠷ ᠢᠰᠷᠧᠯᠴᠦᠳ ᠲᠦ᠄ 《ᠦᠳᠡᠰᠢ ᠪᠣᠯᠬᠤ ᠳᠤ ᠲᠠ ᠨᠠᠷ ᠥᠪᠡᠷᠰᠡᠳ ᠢ ᠴᠢᠨᠢ ᠶᠧᠵᠢᠫᠲ ᠡᠴᠡ ᠭᠠᠷᠭᠠᠭᠰᠠᠨ ᠨᠢ ᠶᠣᠬᠣᠸᠠ ᠮᠥᠨ ᠭᠡᠳᠡᠭ ᠢ ᠮᠡᠳᠡᠬᠦ ᠪᠥᠭᠡᠳ 7 ᠥᠷᠯᠥᠭᠡ ᠨᠢ ᠶᠣᠬᠣᠸᠠ ᠶᠢᠨ ᠴᠣᠭ ᠵᠢᠪᠬᠤᠯᠠᠩ ᠢ ᠬᠠᠷᠠᠬᠤ ᠪᠣᠯᠣᠨᠠ᠃ ᠶᠣᠬᠣᠸᠠ ᠥᠪᠡᠷ ᠦᠨ ᠬᠢᠨᠢ ᠡᠰᠡᠷᠭᠦ ᠭᠠᠷᠭᠠᠳᠠᠭ ᠭᠣᠮᠣᠳᠠᠯ ᠢ ᠴᠢᠨᠢ ᠰᠣᠨᠣᠰᠣᠭᠰᠠᠨ ᠶᠤᠮ᠃ ᠬᠠᠷᠢᠨ ᠲᠠ ᠨᠠᠷ ᠪᠢᠳᠡ ᠬᠣᠶᠠᠷ ᠢ ᠬᠡᠨ ᠭᠡᠵᠦ ᠦᠵᠡᠭᠡᠳ ᠪᠢᠳᠡᠨ ᠳᠦ ᠭᠣᠮᠣᠳᠠᠯ ᠲᠣᠭᠠᠴᠢᠭᠠᠳ ᠪᠠᠢᠭᠠ ᠶᠤᠮ ᠪᠤᠢ︖》 ᠭᠡᠪᠡ᠃ 8 ᠮᠣᠰᠧ᠄ 《ᠲᠠ ᠨᠠᠷ ᠲᠤ ᠣᠷᠣᠢ ᠨᠢ ᠢᠳᠡᠬᠦ ᠮᠢᠬᠠ ᠥᠭᠴᠦ᠂ ᠥᠷᠯᠥᠭᠡ ᠨᠢ ᠴᠠᠳᠲᠠᠯᠠ ᠪᠣᠣᠪᠣ ᠥᠭᠭᠥᠭᠴᠢ ᠨᠢ ᠶᠣᠬᠣᠸᠠ᠂ ᠮᠥᠨ ᠥᠪᠡᠷ ᠦᠨ ᠬᠢᠨᠢ ᠡᠰᠡᠷᠭᠦ ᠭᠠᠷᠭᠠᠭᠰᠠᠨ ᠭᠣᠮᠣᠳᠠᠯ ᠢ ᠴᠢᠨᠢ ᠰᠣᠨᠣᠰᠣᠭᠴᠢ ᠨᠢ ᠴᠤ ᠶᠣᠬᠣᠸᠠ ᠶᠤᠮ᠃ ᠪᠢᠳᠡ ᠬᠣᠶᠠᠷ ᠬᠡᠨ ᠪᠣᠯᠣᠯᠠ ᠭᠡᠵᠢ︖ ᠭᠣᠮᠣᠳᠠᠯ ᠴᠢᠨᠢ ᠪᠢᠳᠡᠨ ᠦ ᠡᠰᠡᠷᠭᠦ ᠪᠢᠰᠢ᠂ ᠬᠠᠷᠢᠨ ᠶᠣᠬᠣᠸᠠ ᠶᠢᠨ ᠡᠰᠡᠷᠭᠦ ᠶᠤᠮ》 ᠭᠡᠪᠡ᠃
9 ᠮᠣᠰᠧ ᠠᠷᠣᠨ ᠳᠤ᠄ 《ᠪᠦᠬᠦ ᠢᠰᠷᠧᠯ ᠤᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠳᠤ᠄ 〈ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠣᠢᠷᠠᠲᠤᠨ ᠢᠷᠡ〉 ᠭᠡᠵᠦ ᠬᠡᠯᠡ᠃ ᠲᠡᠷᠡ ᠲᠡᠳᠡᠨ ᠦ ᠭᠣᠮᠣᠳᠠᠯ ᠢ ᠰᠣᠨᠣᠰᠣᠭᠰᠠᠨ ᠶᠤᠮ》 ᠭᠡᠪᠡ᠃ 10 ᠠᠷᠣᠨ ᠪᠦᠬᠦ ᠢᠰᠷᠧᠯ ᠤᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠳᠤ ᠬᠡᠯᠡᠬᠦ ᠳᠦ᠂ ᠲᠡᠳᠡ ᠴᠥᠯ ᠤᠷᠤᠭᠤ ᠬᠠᠷᠠᠪᠠ᠃ ᠲᠡᠨᠳᠡ ᠶᠣᠬᠣᠸᠠ ᠶᠢᠨ ᠴᠣᠭ ᠵᠢᠪᠬᠤᠯᠠᠩ ᠡᠭᠦᠯᠡᠨ ᠳᠤᠮᠳᠠ ᠦᠵᠡᠭᠳᠡᠪᠡ︕ 11 ᠶᠣᠬᠣᠸᠠ ᠮᠣᠰᠧ ᠳᠤ᠄ 12 《ᠢᠰᠷᠧᠯᠴᠦᠳ ᠦᠨ ᠭᠣᠮᠣᠳᠠᠯ ᠢ ᠪᠢ ᠰᠣᠨᠣᠰᠣᠭᠰᠠᠨ᠃ ᠲᠡᠳᠡᠨ ᠳᠦ᠄ 〈ᠨᠠᠷᠠ ᠰᠢᠩᠭᠡᠬᠦ ᠡᠴᠡ ᠡᠮᠦᠨᠡ 12 ᠲᠠ ᠨᠠᠷ ᠮᠢᠬᠠ ᠢᠳᠡᠵᠦ᠂ ᠥᠷᠯᠥᠭᠡ ᠪᠣᠣᠪᠣ ᠪᠠᠷ ᠴᠠᠳᠬᠤ ᠪᠣᠯᠣᠨᠠ᠃ ᠲᠡᠢᠨ ᠬᠦ ᠲᠠ ᠨᠠᠷ ᠥᠪᠡᠷᠰᠡᠳ ᠦᠨ ᠴᠢᠨᠢ ᠪᠤᠷᠬᠠᠨ ᠪᠣᠯ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ〉 ᠭᠡᠵᠦ ᠬᠡᠯᠡ》 ᠭᠡᠪᠡ᠃
13 ᠣᠷᠣᠢ ᠪᠣᠯᠬᠤ ᠳᠤ ᠪᠥᠳᠥᠨᠡ ᠰᠢᠪᠠᠭᠤᠳ ᠨᠢᠰᠴᠦ ᠢᠷᠡᠭᠡᠳ ᠬᠤᠸᠠᠷᠠᠨ ᠢ ᠪᠦᠷᠬᠦᠪᠡ᠃ ᠥᠷᠯᠥᠭᠡ ᠨᠢ ᠬᠤᠸᠠᠷᠠᠨ ᠤ ᠡᠷᠭᠢᠨ ᠲᠣᠭᠣᠷᠢᠨ ᠳᠤ ᠰᠢᠭᠦᠳᠡᠷᠢ ᠪᠠᠭᠤᠭᠰᠠᠨ ᠪᠠᠢᠯᠠ᠃ 14 ᠰᠢᠭᠦᠳᠡᠷᠢ ᠡᠭᠰᠢᠬᠦ ᠳᠦ ᠴᠥᠯ ᠦᠨ ᠭᠠᠳᠠᠷᠭᠤ ᠳᠡᠭᠡᠷᠡ ᠪᠥᠭᠡᠷᠡᠩᠬᠡᠢ ᠵᠢᠵᠢᠭ ᠶᠠᠭᠤᠮᠠ᠂ ᠬᠢᠷᠠᠭᠤ ᠮᠡᠲᠦ ᠵᠢᠵᠢᠭᠬᠡᠨ ᠶᠠᠭᠤᠮᠠ ᠭᠠᠵᠠᠷ ᠤᠨ ᠳᠡᠭᠡᠷᠡ ᠦᠯᠡᠳᠡᠭᠰᠡᠨ ᠪᠠᠢᠯᠠ︕ 15 ᠢᠰᠷᠧᠯᠴᠦᠳ ᠦᠵᠡᠭᠡᠳ ᠶᠠᠭᠤ ᠪᠣᠯᠬᠤ ᠶᠢ ᠨᠢ ᠮᠡᠳᠡᠬᠦ ᠦᠭᠡᠢ ᠤᠴᠢᠷ ᠨᠢᠭᠡ ᠨᠢᠭᠡᠨ ᠡᠴᠡ ᠪᠡᠨ᠄ 《ᠡᠨᠡ ᠶᠠᠭᠤ ᠪᠤᠢ︖》 ᠭᠡᠵᠦ ᠠᠰᠠᠭᠤᠵᠠᠭᠠᠪᠠ᠃ ᠮᠣᠰᠧ ᠲᠡᠳᠡᠨ ᠳᠦ᠄ 《ᠡᠨᠡ ᠪᠣᠯ ᠶᠣᠬᠣᠸᠠ ᠶᠢᠨ ᠲᠠ ᠨᠠᠷ ᠲᠤ ᠢᠳᠡᠭᠦᠯᠬᠦ ᠪᠡᠷ ᠰᠣᠶᠣᠷᠬᠠᠭᠰᠠᠨ ᠬᠦᠨᠡᠰᠦ ᠶᠤᠮ᠃ 16 〈ᠬᠥᠮᠦᠨ ᠪᠦᠷᠢ ᠢᠳᠡᠬᠦ ᠬᠡᠮᠵᠢᠶᠡ ᠪᠡᠷ ᠢᠶᠠᠨ ᠴᠤᠭᠯᠠᠭᠤᠯᠵᠤ᠂ ᠪᠠᠰᠠ ᠮᠠᠢᠬᠠᠨ ᠳᠠᠭᠠᠨ ᠪᠠᠢᠭᠠ ᠬᠥᠮᠦᠨ ᠦ ᠲᠣᠭᠠ ᠪᠠᠷ᠂ ᠨᠢᠭᠡ ᠬᠥᠮᠦᠨ ᠳᠦ ᠨᠢᠭᠡ ᠣᠮᠧᠷ ᠤᠨ ᠬᠡᠮᠵᠢᠶᠡ ᠪᠡᠷ ᠠᠪᠤᠭᠠᠷᠠᠢ〉 ᠭᠡᠵᠦ ᠶᠣᠬᠣᠸᠠ ᠲᠤᠰᠢᠶᠠᠭᠰᠠᠨ》 ᠭᠡᠪᠡ᠃ 17 ᠢᠰᠷᠧᠯᠴᠦᠳ ᠲᠡᠢᠨ ᠬᠦ ᠦᠢᠯᠡᠳᠪᠡ᠃ ᠵᠠᠷᠢᠮ ᠨᠢ ᠶᠡᠬᠡ᠂ ᠵᠠᠷᠢᠮ ᠨᠢ ᠪᠠᠭᠠ ᠬᠤᠷᠢᠶᠠᠪᠠ᠃ 18 ᠭᠡᠪᠡᠴᠦ ᠲᠡᠭᠦᠨ ᠢ ᠪᠠᠨ ᠬᠡᠮᠵᠢᠭᠦᠷ ᠢᠶᠡᠷ ᠬᠡᠮᠵᠢᠬᠦ ᠳᠦ᠂ ᠶᠡᠬᠡ ᠬᠤᠷᠢᠶᠠᠭᠰᠠᠨ ᠨᠢ ᠴᠤ ᠢᠯᠡᠭᠦᠳᠡᠭᠰᠡᠨ ᠦᠭᠡᠢ᠂ ᠪᠠᠭᠠ ᠬᠤᠷᠢᠶᠠᠭᠰᠠᠨ ᠨᠢ ᠴᠤ ᠳᠤᠲᠠᠭᠰᠠᠨ ᠦᠭᠡᠢ᠃ ᠬᠥᠮᠦᠨ ᠪᠦᠷᠢ ᠢᠳᠡᠬᠦ ᠬᠡᠮᠵᠢᠶᠡ ᠪᠡᠷ ᠢᠶᠠᠨ ᠬᠤᠷᠢᠶᠠᠵᠠᠢ᠃ 19 ᠮᠣᠰᠧ ᠲᠡᠳᠡᠨ ᠳᠦ᠄ 《ᠬᠡᠨ ᠴᠤ ᠡᠭᠦᠨ ᠢ ᠥᠷᠯᠥᠭᠡ ᠪᠣᠯᠲᠠᠯᠠ ᠦᠯᠡᠳᠡᠭᠡᠵᠦ ᠪᠣᠯᠬᠤ ᠦᠭᠡᠢ》 ᠭᠡᠪᠡ᠃ 20 ᠭᠡᠪᠡᠴᠦ ᠲᠡᠳᠡ ᠮᠣᠰᠧ ᠶᠢᠨ ᠬᠢ ᠶᠢ ᠣᠢᠰᠢᠶᠠᠭᠰᠠᠨ ᠦᠭᠡᠢ᠃ ᠵᠠᠷᠢᠮ ᠨᠢ ᠡᠭᠦᠨ ᠡᠴᠡ ᠬᠡᠰᠡᠭ ᠢ ᠥᠷᠯᠥᠭᠡ ᠬᠦᠷᠲᠡᠯᠡ ᠦᠯᠡᠳᠡᠭᠡᠭᠰᠡᠨ ᠳᠦ ᠥᠲᠥᠵᠦ ᠥᠮᠡᠬᠡᠢᠷᠡᠵᠡᠢ᠃ ᠮᠣᠰᠧ ᠲᠡᠳᠡᠨ ᠳᠦ ᠠᠭᠤᠷᠯᠠᠪᠠ᠃ 21 ᠢᠩᠭᠢᠵᠦ ᠬᠥᠮᠦᠨ ᠪᠦᠬᠦᠨ ᠥᠷᠯᠥᠭᠡ ᠪᠣᠯᠭᠠᠨ ᠢᠳᠡᠬᠦ ᠬᠡᠮᠵᠢᠶᠡ ᠪᠡᠷ ᠢᠶᠠᠨ ᠬᠤᠷᠢᠶᠠᠳᠠᠭ᠂ ᠨᠠᠷᠠ ᠬᠠᠯᠠᠪᠠᠯ ᠬᠠᠢᠯᠴᠢᠬᠠᠳᠠᠭ ᠪᠠᠢᠯᠠ᠃
22 ᠲᠡᠳᠡ ᠵᠢᠷᠭᠤᠳᠠᠬᠢ ᠡᠳᠦᠷ ᠬᠤᠷᠢᠶᠠᠬᠤ ᠳᠤ᠂ ᠬᠣᠶᠠᠷ ᠳᠠᠬᠢᠨ ᠶᠡᠬᠡ ᠬᠣᠭᠣᠯᠠ᠂ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠨᠢᠭᠡ ᠬᠥᠮᠦᠨ ᠳᠦ ᠬᠣᠶᠠᠷ ᠣᠮᠧᠷ ᠪᠣᠯᠣᠭᠰᠠᠨ ᠪᠠᠢᠨᠠ᠃ ᠡᠢᠮᠦ ᠡᠴᠡ ᠨᠡᠢᠲᠡ ᠴᠢᠭᠤᠯᠭᠠᠨ ᠤ ᠤᠳᠤᠷᠢᠳᠤᠭᠴᠢᠳ ᠪᠦᠭᠦᠳᠡᠭᠡᠷ ᠢᠶᠡᠨ ᠢᠷᠡᠵᠦ ᠳᠤᠭᠤᠯᠭᠠᠭᠰᠠᠨ ᠳᠤ᠂ ᠮᠣᠰᠧ ᠲᠡᠳᠡᠨ ᠳᠦ᠄ 23 《ᠶᠣᠬᠣᠸᠠ ᠠᠢᠯᠠᠳᠬᠤ ᠳᠠᠭᠠᠨ᠄ 〈ᠮᠠᠷᠭᠠᠰᠢ ᠪᠣᠯ ᠠᠮᠠᠷᠠᠯ ᠤᠨ ᠡᠳᠦᠷ᠂ ᠶᠣᠬᠣᠸᠠ ᠳᠤ ᠵᠣᠷᠢᠭᠤᠯᠤᠭᠰᠠᠨ ᠪᠦᠷᠢᠨ ᠠᠮᠠᠷᠠᠯ ᠤᠨ ᠡᠳᠦᠷ ᠶᠤᠮ᠃ ᠥᠨᠥᠳᠥᠷ ᠲᠠ ᠨᠠᠷ ᠰᠢᠷᠠᠬᠤ ᠪᠠᠨ ᠰᠢᠷᠠᠵᠤ᠂ ᠴᠢᠨᠠᠬᠤ ᠪᠠᠨ ᠴᠢᠨᠠ᠃ ᠢᠯᠡᠭᠦᠦ ᠪᠦᠬᠦᠨ ᠢᠶᠡᠨ ᠬᠤᠷᠢᠶᠠᠵᠤ ᠥᠷᠯᠥᠭᠡ ᠬᠦᠷᠲᠡᠯᠡ ᠬᠠᠳᠠᠭᠠᠯᠠ〉 ᠭᠡᠰᠡᠨ》 ᠭᠡᠪᠡ᠃ 24 ᠲᠡᠳᠡ ᠮᠣᠰᠧ ᠶᠢᠨ ᠵᠢᠭᠠᠪᠤᠷᠢᠯᠠᠭᠰᠠᠨ ᠶᠣᠰᠣᠭᠠᠷ ᠥᠷᠯᠥᠭᠡ ᠪᠣᠯᠲᠠᠯᠠ ᠬᠠᠳᠠᠭᠠᠯᠠᠭᠰᠠᠨ ᠳᠤ᠂ ᠲᠡᠷᠡ ᠨᠢ ᠥᠮᠡᠬᠡᠢᠷᠡᠭᠰᠡᠨ ᠴᠤ ᠦᠭᠡᠢ᠂ ᠥᠲᠥᠭᠰᠡᠨ ᠴᠤ ᠦᠭᠡᠢ᠃ 25 ᠲᠡᠭᠡᠬᠦ ᠳᠦ ᠮᠣᠰᠧ᠄ 《ᠥᠨᠥᠳᠥᠷ ᠡᠭᠦᠨ ᠡᠴᠡ ᠢᠳᠡ᠃ ᠶᠣᠬᠣᠸᠠ ᠳᠤ ᠵᠣᠷᠢᠭᠤᠯᠤᠭᠰᠠᠨ ᠠᠷᠢᠭᠤᠨ ᠡᠳᠦᠷ ᠪᠣᠯᠬᠣᠷ ᠲᠠ ᠨᠠᠷ ᠥᠨᠥᠳᠥᠷ ᠡᠭᠦᠨ ᠢ ᠭᠠᠵᠠᠷ ᠠᠴᠠ ᠣᠯᠬᠤ ᠦᠭᠡᠢ᠃ 26 ᠲᠠ ᠨᠠᠷ ᠡᠭᠦᠨ ᠢ ᠵᠢᠷᠭᠤᠭᠠᠨ ᠡᠳᠦᠷ ᠬᠤᠷᠢᠶᠠᠨ ᠠᠪᠬᠤ ᠪᠣᠯᠪᠠᠴᠤ ᠳᠣᠯᠣᠳᠠᠬᠢ ᠡᠳᠦᠷ ᠨᠢ ᠠᠮᠠᠷᠠᠯ ᠤᠨ ᠡᠳᠦᠷ ᠲᠤᠯᠠ ᠶᠠᠭᠤ ᠴᠤ ᠣᠯᠳᠠᠬᠤ ᠦᠭᠡᠢ ᠶᠤᠮ》 ᠭᠡᠪᠡ᠃
27 ᠳᠣᠯᠣᠳᠠᠬᠢ ᠡᠳᠦᠷ ᠵᠠᠷᠢᠮ ᠬᠥᠮᠦᠰ ᠬᠤᠷᠢᠶᠠᠵᠤ ᠠᠪᠬᠤ ᠪᠠᠷ ᠭᠠᠷᠤᠭᠠᠳ ᠶᠠᠭᠤ ᠴᠤ ᠣᠯᠣᠭᠰᠠᠨ ᠦᠭᠡᠢ᠃ 28 ᠶᠣᠬᠣᠸᠠ ᠮᠣᠰᠧ ᠳᠤ᠄ 《ᠲᠠ ᠨᠠᠷ ᠬᠡᠳᠦᠢ ᠪᠣᠯᠲᠠᠯᠠ ᠮᠢᠨᠦ ᠲᠤᠰᠢᠶᠠᠯ᠂ ᠮᠢᠨᠦ ᠵᠢᠭᠠᠪᠤᠷᠢ ᠨᠤᠭᠤᠳ ᠢ ᠰᠠᠬᠢᠬᠤ ᠦᠭᠡᠢ ᠪᠠᠢᠬᠤ ᠶᠤᠮ ᠪᠤᠢ︖ 29 ᠠᠩ᠋ᠬᠠᠷᠤᠭᠲᠤᠨ᠂ ᠶᠣᠬᠣᠸᠠ ᠲᠠ ᠨᠠᠷ ᠲᠤ ᠠᠮᠠᠷᠠᠯ ᠤᠨ ᠡᠳᠦᠷ ᠢ ᠥᠭᠭᠥᠭᠰᠡᠨ᠃ ᠵᠢᠷᠭᠤᠳᠠᠬᠢ ᠡᠳᠦᠷ ᠲᠦ ᠬᠣᠶᠠᠷ ᠡᠳᠦᠷ ᠦᠨ ᠬᠦᠨᠡᠰᠦ ᠶᠢ ᠰᠣᠶᠣᠷᠬᠠᠭᠰᠠᠨ ᠤ ᠤᠴᠢᠷ ᠨᠢ ᠡᠨᠡ ᠶᠤᠮ᠃ ᠳᠣᠯᠣᠳᠠᠬᠢ ᠡᠳᠦᠷ ᠬᠥᠮᠦᠨ ᠪᠦᠷᠢ ᠪᠠᠢᠭᠠ ᠭᠠᠵᠠᠷ ᠲᠠᠭᠠᠨ ᠪᠠᠢᠵᠤ᠂ ᠲᠡᠨᠳᠡ ᠡᠴᠡ ᠪᠡᠨ ᠪᠦᠦ ᠭᠠᠷ》 ᠭᠡᠪᠡ᠃ 30 ᠲᠡᠢᠨ ᠬᠦ ᠳᠣᠯᠣᠳᠠᠬᠢ ᠡᠳᠦᠷ ᠠᠷᠠᠳ ᠲᠦᠮᠡᠨ ᠠᠮᠠᠷᠠᠪᠠ᠃
31 ᠢᠰᠷᠧᠯ ᠤᠨ ᠭᠡᠷ ᠦᠨ ᠬᠢᠨ ᠲᠡᠷᠡ ᠬᠦᠨᠡᠰᠦ ᠶᠢ ᠮᠠᠨᠨᠠ 13 ᠭᠡᠵᠦ ᠨᠡᠷᠡᠯᠡᠵᠡᠢ᠃ ᠲᠡᠷᠡ ᠨᠢ ᠦᠨᠦᠷᠲᠦ ᠨᠣᠭᠣᠭᠠ ᠶᠢᠨ ᠦᠷᠡ ᠮᠡᠲᠦ ᠴᠠᠭᠠᠨ ᠪᠥᠭᠡᠳ ᠠᠮᠲᠠ ᠨᠢ ᠵᠥᠭᠡᠢ ᠶᠢᠨ ᠪᠠᠯ ᠲᠠᠢ ᠪᠣᠣᠪᠣ ᠮᠡᠲᠦ ᠪᠠᠢᠪᠠ᠃ 32 ᠮᠣᠰᠧ᠄ 《ᠶᠣᠬᠣᠸᠠ ᠲᠤᠰᠢᠶᠠᠬᠤ ᠳᠠᠭᠠᠨ᠄ 〈ᠡᠭᠦᠨ ᠡᠴᠡ ᠨᠢᠭᠡ ᠪᠦᠲᠦᠨ ᠣᠮᠧᠷ 14 ᠠᠪᠴᠤ᠂ ᠳᠠᠷᠠᠭᠠᠬᠢ ᠦᠶᠡ ᠶᠢᠨ ᠬᠢᠨ ᠳᠤ ᠳᠤᠷᠠᠰᠬᠠᠯ ᠪᠣᠯᠭᠠᠨ ᠬᠠᠳᠠᠭᠠᠯᠠ᠃ ᠢᠩᠭᠢᠭᠰᠡᠨ ᠢᠶᠡᠷ ᠲᠠ ᠨᠠᠷ ᠢ ᠶᠧᠵᠢᠫᠲ ᠡᠴᠡ ᠭᠠᠷᠭᠠᠭᠰᠠᠨ ᠤ ᠳᠠᠷᠠᠭᠠ ᠴᠥᠯ ᠳᠤ ᠶᠠᠮᠠᠷ ᠬᠦᠨᠡᠰᠦ ᠪᠡᠷ ᠲᠡᠵᠢᠭᠡᠵᠦ ᠪᠠᠢᠭᠰᠠᠨ ᠢ ᠮᠢᠨᠢ ᠲᠡᠳᠡ ᠬᠠᠷᠠᠬᠤ ᠪᠣᠯᠣᠨᠠ〉 ᠭᠡᠰᠡᠨ》 ᠬᠡᠮᠡᠭᠡᠳ 33 ᠠᠷᠣᠨ ᠳᠤ᠄ 《ᠸᠠᠭᠠᠷ ᠠᠪᠴᠤ᠂ ᠳᠣᠲᠣᠷᠠ ᠨᠢ ᠨᠢᠭᠡ ᠪᠦᠲᠦᠨ ᠣᠮᠧᠷ ᠮᠠᠨᠨᠠ ᠬᠢ᠃ ᠡᠭᠦᠨ ᠢ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠲᠠᠯᠪᠢᠵᠤ᠂ ᠦᠶᠡ ᠶᠢᠨ ᠦᠶᠡ ᠳᠦ ᠬᠠᠳᠠᠭᠠᠯᠠᠭᠤᠯᠤᠯ》 ᠭᠡᠪᠡ᠃ 34 ᠶᠣᠬᠣᠸᠠ ᠶᠢᠨ ᠮᠣᠰᠧ ᠳᠤ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠠᠷᠣᠨ ᠡᠭᠦᠨ ᠢ ᠭᠡᠷᠡᠴᠢᠯᠡᠯ ᠦᠨ ᠬᠠᠪᠲᠠᠰᠤᠨ ᠤ ᠡᠮᠦᠨᠡ ᠲᠠᠯᠪᠢᠵᠤ ᠬᠠᠳᠠᠭᠠᠯᠠᠭᠤᠯᠪᠠ᠃ 35 ᠢᠰᠷᠧᠯᠴᠦᠳ ᠬᠥᠮᠦᠨ ᠦ ᠣᠷᠣᠰᠢᠨ ᠰᠠᠭᠤᠳᠠᠭ ᠭᠠᠵᠠᠷ ᠲᠤ ᠣᠴᠢᠬᠤ ᠬᠦᠷᠲᠡᠯᠡ ᠳᠥᠴᠢᠨ ᠵᠢᠯ ᠮᠠᠨᠨᠠ ᠢᠳᠡᠵᠡᠢ᠃ ᠺᠠᠨᠠᠨ ᠨᠤᠲᠤᠭ ᠤᠨ ᠬᠢᠵᠠᠭᠠᠷ ᠲᠤ ᠣᠴᠢᠬᠤ ᠬᠦᠷᠲᠡᠯᠡ ᠲᠡᠳᠡ ᠮᠠᠨᠨᠠ ᠢᠳᠡᠭᠰᠡᠨ ᠪᠢᠯᠡ᠃ 36 ᠨᠢᠭᠡ ᠣᠮᠧᠷ ᠨᠢ ᠡᠹᠠ 15 ᠶᠢᠨ ᠠᠷᠪᠠᠨ ᠤ ᠨᠢᠭᠡ ᠶᠤᠮ᠃