ᠭᠡᠲᠦᠯᠦᠯ ᠠᠷᠪᠠᠨ ᠳᠣᠯᠣᠭᠠ
ᠬᠠᠳᠠᠨ ᠠᠴᠠ ᠪᠤᠷᠭᠢᠯᠤᠭᠰᠠᠨ ᠤᠰᠤ
1 ᠢᠰᠷᠧᠯᠴᠦᠳ ᠦᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠽᠢᠨ ᠴᠥᠯ ᠡᠴᠡ ᠬᠥᠳᠡᠯᠵᠦ᠂ ᠶᠣᠬᠣᠸᠠ ᠶᠢᠨ ᠲᠤᠰᠢᠶᠠᠯ ᠢᠶᠠᠷ ᠠᠶᠠᠯᠠᠭᠰᠠᠭᠠᠷ ᠷᠧᠹᠢᠳᠢᠮ ᠳᠤ ᠪᠠᠭᠤᠳᠠᠯᠯᠠᠪᠠ᠃ ᠬᠠᠷᠢᠨ ᠲᠡᠨᠳᠡ ᠠᠷᠠᠳ ᠣᠯᠠᠨ ᠳᠤ ᠤᠤᠭᠤᠬᠤ ᠤᠰᠤ ᠪᠠᠢᠭᠰᠠᠨ ᠦᠭᠡᠢ᠃ 2 ᠠᠷᠠᠳ ᠣᠯᠠᠨ ᠮᠣᠰᠧ ᠲᠠᠢ ᠮᠠᠷᠭᠤᠯᠳᠤᠵᠤ᠄ 《ᠪᠢᠳᠡᠨ ᠳᠦ ᠤᠤᠭᠤᠬᠤ ᠤᠰᠤ ᠥᠭ》 ᠭᠡᠰᠡᠨ ᠳᠦ᠂ ᠮᠣᠰᠧ᠄ 《ᠲᠠ ᠨᠠᠷ ᠶᠠᠭᠤᠨ ᠳᠤ ᠨᠠᠳᠠ ᠲᠠᠢ ᠮᠠᠷᠭᠤᠯᠳᠤᠨᠠ ᠪᠤᠢ︖ ᠲᠠ ᠨᠠᠷ ᠶᠠᠭᠠᠬᠢᠭᠠᠳ ᠶᠣᠬᠣᠸᠠ ᠶᠢ ᠲᠡᠩᠰᠡᠨᠡ ᠪᠤᠢ︖》 ᠭᠡᠪᠡ᠃ 3 ᠬᠠᠷᠢᠨ ᠠᠷᠠᠳ ᠣᠯᠠᠨ ᠲᠡᠨᠳᠡ ᠴᠠᠩ᠋ᠭᠠᠵᠤ᠂ ᠤᠰᠤ ᠬᠦᠰᠡᠨ ᠮᠣᠰᠧ ᠳᠤ ᠭᠣᠮᠣᠳᠠᠯᠯᠠᠨ᠄ 《ᠲᠠ ᠶᠠᠭᠤᠨ ᠳᠤ ᠪᠢᠳᠡᠨ ᠢ ᠶᠧᠵᠢᠫᠲ ᠡᠴᠡ ᠠᠪᠴᠢᠷᠠᠭᠠᠳ᠂ ᠪᠢᠳᠡᠨ ᠢ ᠦᠷᠡ ᠬᠡᠦᠬᠡᠳ᠂ ᠮᠠᠯ ᠰᠦᠷᠦᠭ ᠲᠡᠢ ᠮᠢᠨᠢ ᠬᠠᠮᠲᠤ ᠴᠠᠩ᠋ᠭᠠᠭᠠᠵᠤ ᠦᠬᠦᠭᠦᠯᠬᠦ ᠭᠡᠵᠦ ᠪᠠᠢᠨᠠ ᠪᠤᠢ︖》 ᠭᠡᠯᠴᠡᠪᠡ᠃ 4 ᠮᠣᠰᠧ ᠶᠣᠬᠣᠸᠠ ᠳᠤ ᠬᠠᠰᠬᠢᠷᠤᠨ᠄ 《ᠪᠢ ᠡᠨᠡ ᠠᠷᠠᠳ ᠲᠦᠮᠡᠨ ᠢ ᠶᠠᠭᠠᠬᠢᠬᠤ ᠪᠤᠢ︖ ᠲᠡᠳᠡ ᠤᠳᠠᠯ ᠦᠭᠡᠢ ᠨᠠᠳᠠ ᠤᠷᠤᠭᠤ ᠴᠢᠯᠠᠭᠤ ᠰᠢᠳᠡᠬᠦ ᠨᠢ ᠡ》 ᠭᠡᠪᠡ᠃ 5 ᠶᠣᠬᠣᠸᠠ ᠮᠣᠰᠧ ᠳᠤ ᠠᠢᠯᠠᠳᠤᠨ᠄ 《ᠴᠢ ᠠᠷᠠᠳ ᠲᠦᠮᠡᠨ ᠦ ᠡᠮᠦᠨᠡᠭᠦᠷ ᠭᠠᠷ᠂ ᠨᠢᠯ ᠮᠥᠷᠡᠨ ᠢ ᠴᠣᠬᠢᠭᠰᠠᠨ ᠲᠠᠶᠠᠭ ᠢᠶᠠᠨ ᠭᠠᠷ ᠲᠠᠭᠠᠨ ᠪᠠᠷᠢᠵᠤ᠂ ᠢᠰᠷᠧᠯ ᠤᠨ ᠠᠬᠠᠯᠠᠭᠴᠢᠳ ᠤᠨ ᠳᠤᠮᠳᠠ ᠠᠴᠠ ᠵᠠᠷᠢᠮ ᠢ ᠨᠢ ᠳᠠᠭᠠᠭᠤᠯᠤᠨ ᠶᠠᠪᠤ᠃ 6 ᠬᠠᠷᠠ᠂ ᠪᠢ ᠬᠣᠷᠧᠪ ᠤᠨ ᠬᠠᠳᠠᠨ ᠳᠡᠭᠡᠷᠡ ᠴᠢᠨᠦ ᠡᠮᠦᠨᠡ ᠵᠣᠭᠰᠣᠬᠤ ᠪᠣᠯᠣᠨᠠ︕ ᠴᠢ ᠬᠠᠳᠠ ᠶᠢ ᠴᠣᠬᠢᠭᠠᠷᠠᠢ᠃ ᠲᠡᠭᠡᠪᠡᠯ ᠲᠡᠨᠳᠡ ᠡᠴᠡ ᠤᠰᠤ ᠭᠠᠷᠴᠤ᠂ ᠠᠷᠠᠳ ᠲᠦᠮᠡᠨ ᠤᠤᠭᠤᠬᠤ ᠪᠣᠯᠣᠨᠠ》 ᠭᠡᠰᠡᠨ ᠳᠦ᠂ ᠮᠣᠰᠧ ᠢᠰᠷᠧᠯ ᠤᠨ ᠠᠬᠠᠯᠠᠭᠴᠢᠳ ᠤᠨ ᠨᠢᠳᠦᠨ ᠡᠮᠦᠨᠡ ᠲᠡᠷᠡ ᠶᠣᠰᠣᠭᠠᠷ ᠭᠦᠢᠴᠡᠳᠬᠡᠪᠡ᠃ 7 ᠮᠣᠰᠧ ᠲᠡᠷᠡ ᠭᠠᠵᠠᠷ ᠢ ᠮᠠᠰᠠ 16 ᠪᠤᠶᠤ ᠮᠧᠷᠢᠪᠠ 17 ᠭᠡᠵᠦ ᠨᠡᠷᠡᠯᠡᠪᠡ᠃ ᠤᠴᠢᠷ ᠨᠢ ᠢᠰᠷᠧᠯᠴᠦᠳ ᠲᠡᠨᠳᠡ ᠮᠠᠷᠭᠤᠯᠳᠤᠭᠰᠠᠨ ᠪᠥᠭᠡᠳ᠄ 《ᠶᠣᠬᠣᠸᠠ ᠪᠢᠳᠡᠨ ᠦ ᠳᠤᠮᠳᠠ ᠪᠠᠢᠨᠠ ᠤᠤ᠂ ᠦᠭᠡᠢ ᠤᠤ︖》 ᠭᠡᠵᠦ ᠶᠣᠬᠣᠸᠠ ᠶᠢ ᠲᠡᠩᠰᠡᠭᠰᠡᠨ ᠶᠤᠮ᠃
ᠠᠮᠠᠯᠧᠺᠴᠤᠳ ᠢ ᠢᠯᠠᠪᠠ
8 ᠢᠰᠷᠧᠯᠴᠦᠳ ᠷᠧᠹᠢᠳᠢᠮ ᠳᠤ ᠪᠠᠢᠬᠤ ᠳᠤᠨᠢ ᠠᠮᠠᠯᠧᠺᠴᠤᠳ ᠢᠷᠡᠵᠦ ᠳᠣᠪᠲᠣᠯᠪᠠ᠃ 9 ᠮᠣᠰᠧ ᠶᠣᠱᠦ᠋ᠶᠠ ᠳᠤ᠄ 《ᠡᠷᠡᠴᠦᠳ ᠢ ᠰᠢᠯᠢᠵᠦ ᠠᠪᠤᠭᠠᠳ ᠠᠮᠠᠯᠧᠺᠴᠤᠳ ᠤᠨ ᠡᠰᠡᠷᠭᠦ ᠪᠠᠢᠯᠳᠤᠬᠤ ᠪᠠᠷ ᠶᠠᠪᠤ᠃ ᠪᠢ ᠮᠠᠷᠭᠠᠰᠢ ᠭᠠᠷ ᠲᠠᠭᠠᠨ ᠪᠤᠷᠬᠠᠨ ᠤ ᠲᠠᠶᠠᠭ ᠢ ᠪᠠᠷᠢᠨ᠂ ᠲᠣᠯᠣᠭᠠᠳ ᠤᠨ ᠣᠷᠣᠢ ᠳᠡᠭᠡᠷᠡ ᠵᠣᠭᠰᠣᠨᠠ》 ᠭᠡᠪᠡ᠃ 10 ᠶᠣᠱᠦ᠋ᠶᠠ ᠮᠣᠰᠧ ᠶᠢᠨ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠦᠢᠯᠡᠳᠴᠦ᠂ ᠠᠮᠠᠯᠧᠺᠴᠤᠳ ᠤᠨ ᠡᠰᠡᠷᠭᠦ ᠪᠠᠢᠯᠳᠤᠬᠤ ᠳᠤ᠂ ᠮᠣᠰᠧ ᠠᠷᠣᠨ᠂ ᠾᠦᠷ ᠨᠠᠷ ᠲᠠᠢ ᠬᠠᠮᠲᠤ ᠲᠣᠯᠣᠭᠠᠳ ᠤᠨ ᠣᠷᠣᠢ ᠳᠡᠭᠡᠷᠡ ᠭᠠᠷᠤᠯᠠ᠃ 11 ᠮᠣᠰᠧ ᠭᠠᠷ ᠢᠶᠠᠨ ᠡᠷᠭᠦᠪᠡᠯ ᠢᠰᠷᠧᠯᠴᠦᠳ ᠢᠯᠠᠵᠤ᠂ ᠪᠠᠭᠤᠯᠭᠠᠪᠠᠯ ᠠᠮᠠᠯᠧᠺᠴᠤᠳ ᠢᠯᠠᠵᠤ ᠪᠠᠢᠪᠠ᠃ 12 ᠮᠣᠰᠧ ᠶᠢᠨ ᠭᠠᠷ ᠴᠤᠴᠠᠭᠰᠠᠨ ᠳᠤ᠂ ᠬᠥᠮᠦᠰ ᠴᠢᠯᠠᠭᠤ ᠲᠠᠯᠪᠢᠵᠤ ᠥᠭᠴᠡᠢ᠃ ᠮᠣᠰᠧ ᠴᠢᠯᠠᠭᠤᠨ ᠳᠡᠭᠡᠷᠡ ᠰᠠᠭᠤᠪᠠ᠃ ᠠᠷᠣᠨ᠂ ᠾᠦᠷ ᠬᠣᠶᠠᠷ ᠲᠡᠭᠦᠨ ᠦ ᠭᠠᠷ ᠢ ᠨᠢᠭᠡ ᠨᠢ ᠡᠨᠡ ᠲᠠᠯᠠ ᠠᠴᠠ ᠨᠢ᠂ ᠨᠥᠭᠥᠭᠡ ᠨᠢ ᠲᠡᠷᠡ ᠲᠠᠯᠠ ᠠᠴᠠ ᠨᠢ ᠲᠦᠰᠢᠬᠦ ᠳᠦ᠂ ᠨᠠᠷᠠ ᠵᠢᠷᠭᠠᠬᠤ ᠪᠣᠯᠲᠠᠯᠠ ᠲᠣᠭᠲᠠᠪᠤᠷᠢᠲᠠᠢ ᠪᠠᠢᠪᠠ᠃ 13 ᠲᠡᠢᠨ ᠬᠦ ᠶᠣᠱᠦ᠋ᠶᠠ ᠠᠮᠠᠯᠧᠺᠴᠤᠳ ᠤᠨ ᠴᠡᠷᠢᠭ ᠢ ᠢᠯᠳᠦᠨ ᠦ ᠢᠷ ᠢᠶᠠᠷ ᠢᠯᠠᠭᠰᠠᠨ ᠪᠠᠢᠨᠠ᠃
14 ᠶᠣᠬᠣᠸᠠ ᠮᠣᠰᠧ ᠳᠤ᠄ 《ᠪᠢ ᠠᠮᠠᠯᠧᠺ ᠤᠨ ᠳᠤᠷᠠᠰᠤᠮᠵᠢ ᠶᠢ ᠲᠩᠷᠢ ᠶᠢᠨ ᠳᠣᠣᠷᠠ ᠠᠴᠠ ᠪᠦᠷᠢᠮᠦᠰᠦᠨ ᠠᠷᠴᠢᠨᠠ᠃ ᠴᠢ ᠡᠭᠦᠨ ᠢ ᠳᠤᠷᠠᠰᠬᠠᠯ ᠪᠣᠯᠭᠠᠨ ᠨᠣᠮ ᠳᠤ ᠪᠢᠴᠢᠵᠦ᠂ ᠶᠣᠱᠦ᠋ᠶᠠ ᠳᠤ ᠴᠡᠭᠡᠵᠢᠯᠡᠭᠦᠯ》 ᠭᠡᠪᠡ᠃ 15 ᠮᠣᠰᠧ ᠲᠠᠬᠢᠯ ᠤᠨ ᠰᠢᠷᠡᠭᠡ ᠪᠣᠰᠬᠠᠵᠤ᠂ ᠲᠡᠭᠦᠨ ᠢ ᠪᠠᠨ᠄ 《ᠶᠣᠬᠣᠸᠠ ᠪᠣᠯ ᠮᠢᠨᠦ ᠲᠤᠭ》 ᠭᠡᠵᠦ ᠨᠡᠷᠡᠯᠡᠨ᠄ 16 《ᠶᠣᠬᠣᠸᠠ ᠶᠢᠨ ᠲᠤᠭ ᠥᠭᠡᠳᠡ ᠭᠠᠷ ᠢᠶᠠᠨ ᠡᠷᠭᠦ 18 ᠂ ᠶᠣᠬᠣᠸᠠ ᠠᠮᠠᠯᠧᠺ ᠲᠠᠢ ᠦᠶᠡ ᠶᠢᠨ ᠦᠶᠡ ᠳᠦ ᠳᠠᠢᠲᠤᠨᠠ》 ᠭᠡᠪᠡ᠃