ᠭᠡᠲᠦᠯᠦᠯ ᠠᠷᠪᠠᠨ ᠨᠢᠭᠡ
ᠤᠤᠭᠠᠨ ᠢ ᠰᠥᠨᠥᠭᠡᠭᠰᠡᠨ ᠭᠠᠮᠰᠢᠭ (10)
1 ᠶᠣᠬᠣᠸᠠ ᠮᠣᠰᠧ ᠳᠤ᠄ 《ᠪᠢ ᠪᠠᠰᠠ ᠨᠢᠭᠡ ᠭᠠᠮᠰᠢᠭ ᠢ ᠹᠠᠷᠠᠣ᠋ ᠬᠢᠭᠡᠳ ᠶᠧᠵᠢᠫᠲ ᠳᠡᠭᠡᠷᠡ ᠪᠠᠭᠤᠯᠭᠠᠨᠠ᠃ ᠡᠭᠦᠨ ᠦ ᠳᠠᠷᠠᠭᠠ ᠯᠠ ᠲᠡᠷᠡ ᠲᠠ ᠨᠠᠷ ᠢ ᠡ᠊ᠨᠳᠡ ᠡᠴᠡ ᠶᠠᠪᠤᠭᠤᠯᠤᠨᠠ᠃ ᠲᠡᠷᠡ ᠲᠠ ᠨᠠᠷ ᠢ ᠶᠠᠪᠤᠭᠤᠯᠬᠤ ᠳᠠᠭᠠᠨ ᠡ᠊ᠨᠳᠡ ᠡᠴᠡ ᠪᠦᠷᠢᠮᠦᠰᠦᠨ ᠦᠯᠳᠡᠨ ᠬᠥᠭᠡᠭᠡᠨᠡ᠃ 2 ᠣᠳᠣ ᠴᠢ ᠠᠷᠠᠳ ᠲᠦᠮᠡᠨ ᠦ ᠰᠣᠨᠣᠷ ᠲᠤ᠄ 〈ᠡᠷᠡᠭᠲᠡᠢ ᠡᠮᠡᠭᠲᠡᠢ ᠬᠥᠮᠦᠨ ᠪᠣᠯᠭᠠᠨ ᠬᠥᠷᠰᠢ ᠡᠴᠡ ᠪᠡᠨ ᠮᠥᠩᠭᠥᠨ ᠡᠳ᠋ᠯᠡᠯ᠂ ᠠᠯᠲᠠᠨ ᠡᠳ᠋ᠯᠡᠯ ᠢ ᠱᠠᠭᠠᠷᠳᠠᠭᠲᠤᠨ〉 ᠭᠡᠵᠦ ᠬᠡᠯᠡ》 ᠭᠡᠪᠡ᠃ 3 ᠶᠣᠬᠣᠸᠠ ᠠᠷᠠᠳ ᠲᠦᠮᠡᠨ ᠢ ᠶᠧᠵᠢᠫᠲ᠋ᠴᠦᠳ ᠦᠨ ᠨᠢᠳᠦᠨ ᠦ ᠡᠮᠦᠨᠡ ᠲᠠᠭᠠᠯᠠᠯ ᠢ ᠣᠯᠣᠭᠤᠯᠤᠭᠰᠠᠨ ᠪᠥᠭᠡᠳ ᠮᠣᠰᠧ ᠶᠢ ᠴᠤ ᠶᠧᠵᠢᠫᠲ ᠲᠤ ᠹᠠᠷᠠᠣ᠋ ᠶᠢᠨ ᠵᠠᠷᠤᠴᠠ ᠨᠠᠷ ᠤᠨ ᠨᠢᠳᠦᠨ ᠦ ᠡᠮᠦᠨᠡ᠂ ᠮᠥᠨ ᠠᠷᠠᠳ ᠲᠦᠮᠡᠨ ᠦ ᠬᠢᠨᠢ ᠨᠢᠳᠦᠨ ᠦ ᠡᠮᠦᠨᠡ ᠦᠯᠡᠮᠵᠢ ᠠᠭᠤᠤ ᠪᠣᠯᠭᠠᠵᠠᠢ᠃
4 ᠮᠣᠰᠧ ᠹᠠᠷᠠᠣ᠋ ᠳᠤ᠄ 《ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠰᠥᠨᠢ ᠳᠤᠮᠳᠠ ᠪᠢ ᠥᠪᠡᠷ ᠢᠶᠡᠨ ᠶᠧᠵᠢᠫᠲ ᠤᠨ ᠳᠤᠮᠳᠠᠭᠤᠷ ᠥᠩᠭᠡᠷᠡᠬᠦ ᠳᠦ᠂ 5 ᠶᠧᠵᠢᠫᠲ ᠭᠠᠵᠠᠷ ᠤᠨ ᠤᠤᠭᠠᠨ ᠪᠦᠭᠦᠳᠡ ᠦᠬᠦᠬᠦ ᠪᠣᠯᠣᠨᠠ᠃ ᠰᠡᠨᠲᠢ ᠳᠡᠭᠡᠨ ᠵᠠᠯᠠᠷᠠᠭᠴᠢ ᠹᠠᠷᠠᠣ᠋ ᠶᠢᠨ ᠤᠤᠭᠠᠨ ᠬᠦᠦ ᠡᠴᠡ ᠡᠬᠢᠯᠡᠨ᠂ ᠲᠡᠭᠡᠷᠮᠡ ᠲᠦᠯᠬᠢᠭ᠍ᠴᠢ ᠪᠣᠭᠣᠯ ᠡᠮᠡᠭᠲᠡᠢ ᠶᠢᠨ ᠤᠤᠭᠠᠨ ᠬᠦᠦ ᠬᠦᠷᠲᠡᠯᠡ᠂ ᠮᠥᠨ ᠪᠦᠬᠦ ᠮᠠᠯ ᠤᠨ ᠠᠩ᠋ᠬᠠᠨ ᠤ ᠲᠥᠯ ᠴᠤ ᠢᠯᠭᠠᠭᠠ ᠦᠭᠡᠢ᠃ 6 ᠶᠧᠵᠢᠫᠲ ᠤᠨ ᠪᠦᠬᠦ ᠨᠤᠲᠤᠭ ᠲᠤ ᠤᠷᠢᠳᠤ ᠡᠮᠦᠨᠡ ᠪᠠᠢᠭᠠ ᠦᠭᠡᠢ᠂ ᠪᠠᠰᠠ ᠬᠣᠢᠰᠢᠳᠠ ᠴᠤ ᠦᠯᠦ ᠭᠠᠷᠬᠤ ᠠᠰᠤᠷᠤ ᠶᠡᠬᠡ ᠤᠬᠢᠯᠠᠭᠠᠨ ᠮᠠᠢᠯᠠᠭᠠᠨ ᠪᠣᠯᠬᠤ ᠪᠣᠯᠣᠨᠠ᠃ 7 ᠭᠡᠪᠡᠴᠦ ᠢᠰᠷᠧᠯᠴᠦᠳ ᠦᠨ ᠳᠤᠮᠳᠠ ᠬᠥᠮᠦᠨ ᠠᠮᠢᠲᠠᠨ ᠤ ᠡᠰᠡᠷᠭᠦ ᠨᠣᠬᠠᠢ ᠬᠦᠷᠲᠡᠯᠡ ᠬᠤᠴᠠᠵᠤ ᠪᠣᠷᠭᠣᠭᠠᠬᠤ ᠦᠭᠡᠢ᠃ ᠢᠩᠭᠢᠭᠰᠡᠨ ᠢᠶᠡᠷ ᠲᠠ ᠨᠠᠷ ᠶᠧᠵᠢᠫᠲ ᠢᠰᠷᠧᠯ ᠬᠣᠶᠠᠷ ᠤᠨ ᠬᠣᠭᠣᠷᠣᠨᠳᠣ ᠶᠣᠬᠣᠸᠠ ᠶᠢᠨ ᠵᠠᠭᠠᠭ ᠲᠠᠯᠪᠢᠭᠰᠠᠨ ᠢ ᠮᠡᠳᠡᠬᠦ ᠪᠣᠯᠣᠨᠠ᠃〉 8 ᠲᠠᠨ ᠤ ᠡᠨᠡ ᠵᠠᠷᠤᠴᠠ ᠨᠠᠷ ᠪᠦᠭᠦᠳᠡᠭᠡᠷ ᠢᠶᠡᠨ ᠨᠠᠳᠠ ᠤᠷᠤᠭᠤ ᠢᠷᠡᠭᠡᠳ ᠮᠢᠨᠦ ᠡᠮᠦᠨᠡ ᠮᠥᠷᠭᠥᠵᠦ᠂ ᠲᠠ ᠴᠤ᠂ ᠲᠠᠨ ᠢ ᠳᠠᠭᠠᠭᠴᠢ ᠠᠷᠠᠳ ᠲᠦᠮᠡᠨ ᠴᠤ ᠪᠦᠭᠦᠳᠡᠭᠡᠷ ᠡ᠊ᠨᠳᠡ ᠡᠴᠡ ᠶᠠᠪᠤᠭᠠᠴᠢ ᠭᠡᠵᠡᠭᠡᠬᠦ ᠪᠣᠯᠣᠨᠠ᠂ ᠡᠭᠦᠨ ᠦ ᠳᠠᠷᠠᠭᠠ ᠯᠠ ᠪᠢ ᠭᠠᠷᠤᠨᠠ》 ᠭᠡᠳ ᠶᠡᠬᠡ ᠠᠭᠤᠷ ᠲᠠᠢ ᠪᠠᠷ ᠹᠠᠷᠠᠣ᠋ ᠶᠢᠨ ᠬᠢ ᠡᠴᠡ ᠭᠠᠷᠴᠠᠢ᠃
9 ᠶᠣᠬᠣᠸᠠ ᠮᠣᠰᠧ ᠳᠤ᠄ 《ᠹᠠᠷᠠᠣ᠋ ᠲᠠ ᠨᠠᠷ ᠤᠨ ᠬᠢ ᠶᠢ ᠰᠣᠨᠣᠰᠬᠤ ᠦᠭᠡᠢ᠃ ᠡᠢᠮᠦ ᠡᠴᠡ ᠭᠠᠢᠬᠠᠮᠰᠢᠭ ᠤᠳ ᠮᠢᠨᠢ ᠶᠧᠵᠢᠫᠲ ᠤᠨ ᠨᠤᠲᠤᠭ ᠲᠤ ᠣᠯᠠᠰᠢᠷᠠᠨᠠ》 ᠭᠡᠵᠦ ᠬᠡᠯᠡᠭᠰᠡᠨ ᠪᠠᠢᠯᠠ᠃ 10 ᠡᠢᠨ ᠬᠦ ᠮᠣᠰᠧ᠂ ᠠᠷᠣᠨ ᠬᠣᠶᠠᠷ ᠡᠳᠡᠭᠡᠷ ᠪᠦᠬᠦ ᠭᠠᠢᠬᠠᠮᠰᠢᠭ ᠢ ᠹᠠᠷᠠᠣ᠋ ᠶᠢᠨ ᠡᠮᠦᠨᠡ ᠦᠢᠯᠡᠳᠪᠡ᠃ ᠶᠣᠬᠣᠸᠠ ᠹᠠᠷᠠᠣ᠋ ᠶᠢᠨ ᠵᠢᠷᠦᠬᠡ ᠶᠢ ᠬᠠᠲᠠᠭᠤᠷᠠᠭᠤᠯᠤᠭᠰᠠᠨ ᠤᠴᠢᠷ ᠠᠴᠠ ᠲᠡᠷᠡ ᠢᠰᠷᠧᠯᠴᠦᠳ ᠢ ᠨᠤᠲᠤᠭ ᠠᠴᠠ ᠪᠠᠨ ᠶᠠᠪᠤᠭᠤᠯᠤᠭᠰᠠᠨ ᠦᠭᠡᠢ᠃