ᠭᠡᠲᠦᠯᠦᠯ ᠠᠷᠪᠠᠨ ᠬᠣᠶᠠᠷ
ᠭᠡᠲᠦᠯᠭᠡᠭᠰᠡᠨ ᠦ ᠪᠠᠶᠠᠷ ᠤᠨ ᠶᠣᠰᠣ ᠵᠢᠷᠤᠮ
1 ᠶᠣᠬᠣᠸᠠ ᠶᠧᠵᠢᠫᠲ ᠲᠤ ᠮᠣᠰᠧ᠂ ᠠᠷᠣᠨ ᠬᠣᠶᠠᠷ ᠲᠤ᠄ 2 《ᠲᠠ ᠨᠠᠷ ᠡᠨᠡ ᠰᠠᠷᠠ ᠶᠢ ᠨᠢᠭᠡᠳᠦᠭᠡᠷ ᠰᠠᠷᠠ᠂ ᠵᠢᠯ ᠤᠨ ᠲᠡᠷᠢᠭᠦᠨ ᠰᠠᠷᠠ ᠪᠠᠨ ᠪᠣᠯᠭᠠᠭᠠᠷᠠᠢ᠃ 3 ᠪᠦᠬᠦ ᠢᠰᠷᠧᠯ ᠤᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠳᠤ ᠡᠢᠨ ᠬᠦ ᠬᠡᠯᠡ᠄ 〈ᠡᠨᠡ ᠰᠠᠷᠠ ᠶᠢᠨ ᠠᠷᠪᠠᠨ ᠳᠤ ᠡᠴᠢᠭᠡ ᠶᠢᠨ ᠪᠦᠯᠢ ᠶᠢᠨ ᠢᠶᠠᠨ ᠲᠥᠯᠥᠭᠡ ᠬᠤᠷᠠᠭᠠ ᠶᠢ᠂ ᠭᠡᠷ ᠪᠣᠯᠭᠠᠨ ᠨᠢᠭᠡ ᠬᠤᠷᠠᠭᠠ ᠶᠢ ᠠᠪ᠃ 4 ᠬᠡᠷᠪᠡ ᠠᠮᠠ ᠪᠦᠯᠢ ᠴᠥᠭᠡᠬᠦᠯᠡ᠂ ᠪᠦᠲᠦᠨ ᠬᠤᠷᠠᠭᠠ ᠢᠳᠡᠵᠦ ᠪᠠᠷᠠᠬᠤ ᠦᠭᠡᠢ ᠭᠡᠷ ᠪᠦᠯᠢ ᠪᠣᠯ ᠣᠢᠷᠠ ᠬᠥᠷᠰᠢ ᠲᠠᠢ ᠪᠠᠨ ᠬᠥᠮᠦᠨ ᠦ ᠲᠣᠭᠠ ᠪᠠᠷ᠂ ᠬᠥᠮᠦᠨ ᠪᠦᠷᠢ ᠶᠢᠨ ᠢᠳᠡᠬᠦ ᠬᠡᠮᠵᠢᠶᠡ ᠪᠡᠷ ᠲᠣᠭᠠᠴᠠᠭᠠᠯᠠᠵᠤ ᠬᠤᠷᠠᠭᠠ ᠪᠠᠨ ᠬᠤᠪᠢᠶᠠ᠃ 5 ᠡᠭᠦᠨ ᠦ ᠲᠥᠯᠥᠭᠡ ᠲᠠ ᠨᠠᠷ ᠬᠣᠨᠢ ᠪᠤᠶᠤ ᠢᠮᠠᠭᠠᠨ ᠠᠴᠠ ᠥ ᠰᠡᠪ ᠦᠭᠡᠢ᠂ ᠨᠢᠭᠡ ᠨᠠᠰᠤᠲᠠᠢ ᠡᠷᠡ ᠲᠥᠯ ᠢ ᠰᠣᠩ᠋ᠭᠣᠬᠤ ᠶᠣᠰᠣᠲᠠᠢ᠃ 6 ᠡᠭᠦᠨ ᠢ ᠲᠤᠰ ᠰᠠᠷᠠ ᠶᠢᠨ ᠠᠷᠪᠠᠨ ᠳᠥᠷᠪᠡᠨ ᠬᠦᠷᠲᠡᠯᠡ ᠪᠠᠢᠯᠭᠠᠵᠤ᠂ ᠨᠠᠷᠠ ᠰᠢᠩᠭᠡᠬᠦ ᠡᠴᠡ ᠡᠮᠦᠨᠡ 7 ᠢᠰᠷᠧᠯ ᠤᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠤ ᠬᠢᠨ ᠴᠥᠮ ᠢᠶᠡᠷ ᠢᠶᠠᠨ ᠬᠤᠷᠠᠭᠠ ᠪᠠᠨ ᠨᠢᠲᠤᠯ᠃ 7 ᠲᠡᠳᠡ ᠪᠠᠰᠠ ᠴᠢᠰᠤᠨ ᠠᠴᠠ ᠨᠢ ᠠᠪᠴᠤ᠂ ᠲᠡᠷᠡ ᠬᠦ ᠬᠤᠷᠠᠭᠠ ᠶᠢ ᠢᠳᠡᠬᠦ ᠠᠢᠯ ᠤᠨ ᠬᠠᠭᠠᠯᠭᠠᠨ ᠤ ᠪᠠᠷᠠᠭᠤᠨ ᠵᠡᠭᠦᠨ ᠬᠠᠲᠠᠪᠴᠢ ᠪᠠ ᠲᠣᠲᠣᠭᠣᠨ ᠳᠤ ᠨᠢᠯᠠᠬᠤ ᠶᠣᠰᠣᠲᠠᠢ᠃ 8 ᠲᠡᠷᠡ ᠰᠥᠨᠢ ᠳᠡᠭᠡᠨ ᠲᠡᠳᠡ ᠮᠢᠬᠠ ᠶᠢ ᠨᠢ ᠭᠠᠯ ᠳᠤ ᠰᠢᠷᠠᠵᠤ᠂ ᠢᠰᠭᠡᠭᠡ ᠦᠭᠡᠢ ᠪᠣᠣᠪᠣ ᠪᠠ ᠭᠠᠰᠢᠭᠤᠨ ᠨᠣᠭᠣᠭᠠ ᠲᠠᠢ ᠬᠠᠮᠲᠤ ᠢᠳᠡᠬᠦ ᠶᠣᠰᠣᠲᠠᠢ᠃ 9 ᠮᠢᠬᠠᠨ ᠤ ᠠᠯᠢ ᠴᠤ ᠬᠡᠰᠡᠭ ᠢ ᠲᠦᠭᠦᠬᠡᠢ ᠪᠠᠷ᠂ ᠡᠰᠡᠪᠡᠯ ᠤᠰᠤᠨ ᠳᠤ ᠴᠢᠨᠠᠵᠤ ᠢᠳᠡᠵᠦ ᠪᠣᠯᠬᠤ ᠦᠭᠡᠢ᠃ ᠲᠣᠯᠣᠭᠠᠢ᠂ ᠬᠥᠯ᠂ ᠭᠡᠳᠡᠰᠦ ᠳᠣᠲᠣᠷ ᠢ ᠨᠢ ᠭᠠᠯ ᠳᠤ ᠰᠢᠷᠠᠵᠤ ᠢᠳᠡ᠃ 10 ᠠᠯᠢ ᠴᠤ ᠬᠡᠰᠡᠭ ᠢ ᠨᠢ ᠥᠷᠯᠥᠭᠡ ᠪᠣᠯᠲᠠᠯᠠ ᠪᠦᠦ ᠦᠯᠡᠳᠡᠭᠡ᠃ ᠥᠷᠯᠥᠭᠡ ᠪᠣᠯᠬᠤ ᠳᠤ ᠦᠯᠡᠳᠡᠭᠰᠡᠨ ᠢ ᠨᠢ ᠭᠠᠯ ᠳᠤ ᠰᠢᠲᠠᠭᠠ᠃ 11 ᠲᠠ ᠨᠠᠷ ᠲᠡᠭᠦᠨ ᠢ ᠢᠳᠡᠬᠦ ᠳᠡᠭᠡᠨ ᠡᠢᠨ ᠬᠦ ᠢᠳᠡ᠄ ᠪᠡᠯᠬᠡᠭᠦᠰᠦᠨ ᠳᠡᠭᠡᠨ ᠪᠦᠰᠡ ᠲᠠᠢ᠂ ᠬᠥᠯ ᠳᠡᠭᠡᠨ ᠭᠤᠲᠤᠯ ᠲᠠᠢ᠂ ᠭᠠᠷ ᠲᠠᠭᠠᠨ ᠲᠠᠶᠠᠭ ᠲᠠᠢ ᠪᠠᠢᠵᠤ ᠶᠠᠭᠠᠷᠠᠪᠴᠢᠯᠠᠨ ᠢᠳᠡ᠃ ᠶᠣᠬᠣᠸᠠ ᠶᠢᠨ ᠭᠡᠲᠦᠯᠭᠡᠬᠦ ᠪᠠᠶᠠᠷ ᠨᠢ ᠡᠨᠡ ᠶᠤᠮ᠃ 12 ᠲᠡᠷᠡ ᠰᠥᠨᠢ ᠪᠢ ᠶᠧᠵᠢᠫᠲ ᠣᠷᠣᠨ ᠳᠠᠶᠠᠭᠠᠷ ᠥᠩᠭᠡᠷᠡᠵᠦ᠂ ᠶᠧᠵᠢᠫᠲ ᠤᠨ ᠨᠤᠲᠤᠭ ᠳᠠᠬᠢ ᠤᠤᠭᠠᠨ ᠪᠦᠭᠦᠳᠡ ᠶᠢ ᠬᠥᠮᠦᠨ ᠠᠮᠢᠲᠠᠨ ᠭᠡᠵᠦ ᠢᠯᠭᠠᠯ ᠦᠭᠡᠢ ᠴᠣᠬᠢᠵᠤ᠂ ᠶᠧᠵᠢᠫᠲ ᠤᠨ ᠪᠤᠷᠬᠠᠳ ᠪᠦᠭᠦᠳᠡ ᠳᠦ ᠰᠢᠳᠬᠡᠯ ᠪᠠᠭᠤᠯᠭᠠᠨᠠ᠃ ᠪᠢ ᠪᠣᠯ ᠶᠣᠬᠣᠸᠠ᠃ 13 ᠴᠢᠰᠤ ᠨᠢ ᠭᠡᠷ ᠦᠨ ᠴᠢᠨᠢ ᠳᠡᠭᠡᠷᠡ ᠲᠠ ᠨᠠᠷ ᠲᠤ ᠲᠡᠮᠳᠡᠭ ᠪᠣᠯᠣᠨᠠ᠃ ᠪᠢ ᠲᠡᠷᠡ ᠴᠢᠰᠤ ᠶᠢ ᠬᠠᠷᠠᠭᠠᠳ ᠲᠠ ᠨᠠᠷ ᠤᠨ ᠳᠡᠭᠡᠭᠦᠷ ᠥᠩᠭᠡᠷᠡᠨᠡ᠃ ᠪᠢ ᠶᠧᠵᠢᠫᠲ ᠨᠤᠲᠤᠭ ᠢ ᠴᠣᠬᠢᠬᠤ ᠳᠤ᠂ ᠲᠠ ᠨᠠᠷ ᠰᠦᠢᠷᠡᠯ ᠦᠨ ᠭᠠᠮᠰᠢᠭ ᠲᠤ ᠡᠰᠡ ᠥᠷᠲᠥᠨᠡ᠃
14 ᠡᠨᠡ ᠡᠳᠦᠷ ᠨᠢ ᠲᠠ ᠨᠠᠷ ᠲᠤ ᠳᠤᠷᠠᠰᠬᠠᠯ ᠤᠨ ᠡᠳᠦᠷ ᠶᠤᠮ᠃ ᠲᠠ ᠨᠠᠷ ᠡᠭᠦᠨ ᠢ ᠶᠣᠬᠣᠸᠠ ᠶᠢᠨ ᠪᠠᠶᠠᠷ ᠪᠣᠯᠭᠠᠨ ᠲᠡᠮᠳᠡᠭᠯᠡᠬᠦ ᠤᠴᠢᠷᠲᠠᠢ᠃ ᠡᠭᠦᠨ ᠢ ᠲᠠ ᠨᠠᠷ ᠪᠠᠢᠩ᠋ᠭᠤ ᠶᠢᠨ ᠵᠢᠷᠤᠮ ᠪᠣᠯᠭᠠᠨ ᠦᠶᠡ ᠶᠢᠨ ᠦᠶᠡ ᠳᠦ ᠲᠡᠮᠳᠡᠭᠯᠡᠭᠡᠷᠡᠢ᠃ 15 ᠲᠠ ᠨᠠᠷ ᠳᠣᠯᠣᠭᠠᠨ ᠡᠳᠦᠷ ᠦᠨ ᠲᠤᠷᠰᠢ ᠢᠰᠭᠡᠭᠡ ᠦᠭᠡᠢ ᠪᠣᠣᠪᠣ ᠢᠳᠡᠬᠦ ᠤᠴᠢᠷᠲᠠᠢ᠃ ᠡᠬᠢᠨ ᠤ ᠡᠳᠦᠷ ᠲᠦ ᠢᠰᠭᠡᠭᠦᠷ ᠢ ᠭᠡᠷ ᠡᠴᠡ ᠪᠡᠨ ᠵᠠᠢᠯᠠᠭᠤᠯ᠃ ᠡᠬᠢᠨ ᠤ ᠡᠳᠦᠷ ᠡᠴᠡ ᠳᠣᠯᠣᠳᠠᠬᠢ ᠡᠳᠦᠷ ᠬᠦᠷᠲᠡᠯᠡᠬᠢ ᠬᠤᠭᠤᠴᠠᠭᠠᠨ ᠳᠤ ᠢᠰᠭᠡᠭᠰᠡᠨ ᠵᠦᠢᠯ ᠢ ᠢᠳᠡᠭᠴᠢ ᠨᠢ ᠢᠰᠷᠧᠯ ᠡᠴᠡ ᠲᠠᠰᠤᠯᠤᠭᠳᠠᠬᠤ ᠪᠣᠯᠣᠨᠠ᠃ 16 ᠡᠬᠢᠨ ᠤ ᠡᠳᠦᠷ ᠪᠣᠯᠣᠨ ᠳᠣᠯᠣᠳᠠᠬᠢ ᠡᠳᠦᠷ ᠨᠢ ᠠᠷᠢᠭᠤᠨ ᠴᠤᠭᠯᠠᠭᠠᠨ ᠲᠠᠢ᠃ ᠲᠠ ᠨᠠᠷ ᠡᠨᠡ ᠡᠳᠦᠷ ᠤᠳ ᠲᠤ ᠬᠥᠮᠦᠨ ᠪᠦᠷᠢ ᠶᠢᠨ ᠢᠳᠡᠬᠦ ᠶᠠᠭᠤᠮᠠ ᠶᠢ ᠪᠡᠯᠡᠳᠬᠡᠬᠦ ᠡᠴᠡ ᠥᠭᠡᠷᠡ ᠶᠠᠮᠠᠷ ᠴᠤ ᠠᠵᠢᠯ ᠪᠦᠦ ᠬᠢ᠃ 17 ᠲᠠ ᠨᠠᠷ ᠡᠨᠡ ᠢᠰᠭᠡᠭᠡ ᠦᠭᠡᠢ ᠪᠣᠣᠪᠣ ᠶᠢᠨ ᠪᠠᠶᠠᠷ ᠢ ᠲᠡᠮᠳᠡᠭᠯᠡ᠃ ᠶᠠᠭ ᠡᠨᠡ ᠡᠳᠦᠷ ᠪᠢ ᠲᠠ ᠨᠠᠷ ᠢ ᠠᠩ᠋ᠭᠢ ᠠᠩ᠋ᠭᠢ ᠪᠠᠷ ᠨᠢ ᠶᠧᠵᠢᠫᠲ ᠤᠨ ᠭᠠᠵᠠᠷ ᠠᠴᠠ ᠭᠠᠷᠭᠠᠭᠰᠠᠨ ᠶᠤᠮ᠃ ᠲᠡᠢᠮᠦ ᠡᠴᠡ ᠲᠠ ᠨᠠᠷ ᠡᠨᠡ ᠡᠳᠦᠷ ᠢ ᠪᠠᠢᠩ᠋ᠭᠤ ᠶᠢᠨ ᠵᠢᠷᠤᠮ ᠪᠣᠯᠭᠠᠨ ᠦᠶᠡ ᠶᠢᠨ ᠦᠶᠡ ᠳᠦ ᠲᠡᠮᠳᠡᠭᠯᠡᠭᠡᠷᠡᠢ᠃ 18 ᠲᠠ ᠨᠠᠷ ᠲᠡᠷᠢᠭᠦᠨ ᠰᠠᠷᠠ ᠶᠢᠨ ᠠᠷᠪᠠᠨ ᠳᠥᠷᠪᠡᠨ ᠦ ᠦᠳᠡᠰᠢ ᠡᠴᠡ ᠬᠣᠷᠢᠨ ᠨᠢᠭᠡᠨ ᠦ ᠦᠳᠡᠰᠢ ᠬᠦᠷᠲᠡᠯᠡ ᠢᠰᠭᠡᠭᠡ ᠦᠭᠡᠢ ᠪᠣᠣᠪᠣ ᠢᠳᠡᠬᠦ ᠶᠣᠰᠣᠲᠠᠢ᠃ 19 ᠳᠣᠯᠣᠭᠠᠨ ᠡᠳᠦᠷ ᠦᠨ ᠲᠤᠷᠰᠢ ᠠᠢᠯ ᠭᠡᠷ ᠤᠳ ᠲᠡᠭᠡᠨ ᠶᠠᠮᠠᠷ ᠴᠤ ᠢᠰᠭᠡᠭᠦᠷ ᠪᠦᠦ ᠪᠠᠢᠯᠭᠠ᠃ ᠢᠰᠭᠡᠭᠰᠡᠨ ᠶᠠᠮᠠᠷ ᠨᠢᠭᠡ ᠶᠠᠭᠤᠮᠠ ᠶᠢ ᠢᠳᠡᠭᠰᠡᠨ ᠭᠠᠳᠠᠨᠠ ᠶᠢᠨ ᠬᠥᠮᠦᠨ ᠴᠤ᠂ ᠤᠤᠭᠠᠯ ᠬᠥᠮᠦᠨ ᠴᠤ ᠢᠰᠷᠧᠯ ᠤᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠠᠴᠠ ᠲᠠᠰᠤᠯᠤᠭᠳᠠᠬᠤ ᠪᠣᠯᠣᠨᠠ᠃ 20 ᠡᠨᠡ ᠬᠤᠭᠤᠴᠠᠭᠠᠨ ᠳᠤ ᠲᠠ ᠨᠠᠷ ᠢᠰᠭᠡᠭᠰᠡᠨ ᠶᠠᠮᠠᠷ ᠴᠤ ᠶᠠᠭᠤᠮᠠ ᠶᠢ ᠪᠦᠦ ᠢᠳᠡ᠂ ᠬᠠᠷᠢᠨ ᠣᠷᠣᠰᠢᠨ ᠪᠤᠢ ᠪᠦᠬᠦ ᠭᠠᠵᠠᠷ ᠲᠠᠭᠠᠨ ᠢᠰᠭᠡᠭᠡ ᠦᠭᠡᠢ ᠪᠣᠣᠪᠣ ᠢᠳᠡ〉》 ᠭᠡᠪᠡ᠃
ᠵᠣᠯᠢᠶᠠᠰᠤᠨ ᠬᠤᠷᠠᠭᠠ ᠶᠢᠨ ᠴᠢᠰᠤ
21 ᠮᠣᠰᠧ ᠢᠰᠷᠧᠯ ᠤᠨ ᠪᠦᠬᠦ ᠠᠬᠠᠯᠠᠭᠴᠢ ᠶᠢ ᠳᠠᠭᠤᠳᠠᠨ᠂ ᠲᠡᠳᠡᠨ ᠳᠦ᠄ 《ᠲᠠ ᠨᠠᠷ ᠭᠡᠷ ᠪᠦᠯᠢ ᠪᠣᠯᠭᠠᠨ ᠢᠶᠠᠷ ᠢᠶᠠᠨ ᠬᠤᠷᠠᠭᠠ ᠶᠢ ᠰᠢᠯᠢᠨ ᠠᠪᠤᠭᠠᠳ᠂ ᠲᠡᠷᠡ ᠭᠡᠲᠦᠯᠭᠡᠭᠰᠡᠨ ᠦ ᠪᠠᠶᠠᠷ ᠤᠨ ᠬᠤᠷᠠᠭᠠ ᠶᠢ ᠨᠢᠲᠤᠯ᠃ 22 ᠪᠠᠰᠠ ᠪᠠᠭᠴᠠᠯᠠᠭᠰᠠᠨ ᠾᠢᠰᠣᠫ 8 ᠠᠪᠴᠤ ᠰᠠᠪᠠᠨ ᠳᠣᠲᠣᠷᠠᠬᠢ ᠴᠢᠰᠤᠨ ᠳᠤ ᠳᠦᠷᠦᠭᠡᠳ᠂ ᠲᠡᠷᠡ ᠬᠦ ᠴᠢᠰᠤᠨ ᠠᠴᠠ ᠬᠠᠭᠠᠯᠭᠠᠨ ᠤ ᠲᠣᠲᠣᠭᠣ ᠪᠠ ᠬᠣᠶᠠᠷ ᠬᠠᠲᠠᠪᠴᠢᠨ ᠳᠤ ᠲᠦᠷᠬᠢ᠃ ᠥᠷᠯᠥᠭᠡ ᠪᠣᠯᠲᠠᠯᠠ ᠨᠢᠭᠡ ᠴᠤ ᠬᠥᠮᠦᠨ ᠭᠡᠷ ᠦᠨ ᠢᠶᠠᠨ ᠬᠠᠭᠠᠯᠭᠠᠨ ᠭᠠᠳᠠᠨᠠ ᠪᠦᠦ ᠭᠠᠷ᠃ 23 ᠶᠣᠬᠣᠸᠠ ᠶᠧᠵᠢᠫᠲ᠋ᠴᠦᠳ ᠢ ᠴᠣᠬᠢᠬᠤ ᠪᠠᠷ ᠢᠷᠡᠵᠦ ᠥᠩᠭᠡᠷᠡᠬᠦ ᠪᠣᠯᠣᠨᠠ᠃ ᠬᠠᠭᠠᠯᠭᠠᠨ ᠤ ᠲᠣᠲᠣᠭᠣ ᠪᠠ ᠬᠣᠶᠠᠷ ᠬᠠᠲᠠᠪᠴᠢᠨ ᠳᠠᠬᠢ ᠴᠢᠰᠤ ᠶᠢ ᠬᠠᠷᠠᠪᠠᠯ᠂ ᠲᠡᠷᠡ ᠡᠨᠡ ᠬᠠᠭᠠᠯᠭᠠ ᠶᠢᠨ ᠳᠡᠭᠡᠭᠦᠷ ᠥᠩᠭᠡᠷᠡᠬᠦ ᠪᠥᠭᠡᠳ ᠤᠰᠠᠳᠬᠠᠭᠴᠢᠳ ᠤᠨ ᠲᠠ ᠨᠠᠷ ᠢ ᠴᠣᠬᠢᠬᠤ ᠪᠠᠷ ᠭᠡᠷ ᠲᠦ ᠴᠢᠨᠢ ᠣᠷᠣᠬᠤ ᠶᠢ ᠵᠥᠪᠰᠢᠶᠡᠷᠡᠬᠦ ᠦᠭᠡᠢ᠃ 24 ᠲᠠ ᠨᠠᠷ ᠪᠣᠯᠣᠨ ᠦᠷᠡ ᠤᠳᠤᠮ ᠴᠢᠨᠢ ᠡᠨᠡ ᠦᠢᠯᠡ ᠶᠢ ᠶᠣᠰᠣ ᠵᠢᠷᠤᠮ ᠪᠣᠯᠭᠠᠨ ᠡᠭᠦᠷᠢᠳᠡ ᠮᠥᠩᠬᠡᠳᠡ ᠲᠡᠮᠳᠡᠭᠯᠡᠬᠦ ᠶᠣᠰᠣᠲᠠᠢ᠃ 25 ᠲᠠ ᠨᠠᠷ ᠶᠣᠬᠣᠸᠠ ᠶᠢᠨ ᠠᠮᠠᠯᠠᠭᠰᠠᠨ ᠶᠣᠰᠣᠭᠠᠷ ᠢᠶᠠᠨ ᠥᠭᠬᠦ ᠲᠡᠷᠡ ᠭᠠᠵᠠᠷ ᠤᠷᠤᠭᠤ ᠣᠷᠣᠭᠰᠠᠨ ᠦᠶᠡ ᠳᠦ ᠴᠤ ᠡᠨᠡ ᠶᠣᠰᠣᠯᠠᠯ ᠢ ᠲᠡᠮᠳᠡᠭᠯᠡ᠃ 26 ᠲᠠ ᠨᠠᠷ ᠤᠨ ᠬᠡᠦᠬᠡᠳ ᠤᠳ ᠴᠢᠨᠢ᠄ 〈ᠡᠨᠡ ᠶᠣᠰᠣᠯᠠᠯ ᠶᠠᠮᠠᠷ ᠤᠴᠢᠷ ᠲᠠᠢ ᠶᠤᠮ ᠪᠤᠢ︖〉 ᠭᠡᠵᠦ ᠠᠰᠠᠭᠤᠬᠤ ᠦᠶᠡ ᠳᠦ᠂ 27 ᠲᠠ ᠨᠠᠷ᠄ 〈ᠶᠣᠬᠣᠸᠠ ᠳᠤ ᠡᠷᠭᠦᠬᠦ ᠭᠡᠲᠦᠯᠭᠡᠭᠰᠡᠨ ᠦ ᠪᠠᠶᠠᠷ ᠤᠨ ᠲᠠᠬᠢᠯ ᠶᠤᠮ᠃ ᠲᠡᠷᠡ ᠶᠧᠵᠢᠫᠲ᠋ᠴᠦᠳ ᠢ ᠴᠣᠬᠢᠬᠤ ᠦᠶᠡ ᠳᠡᠭᠡᠨ ᠶᠧᠵᠢᠫᠲ ᠲᠤ ᠪᠠᠢᠭᠠ ᠢᠰᠷᠧᠯᠴᠦᠳ ᠦᠨ ᠭᠡᠷ ᠦᠨ ᠳᠡᠭᠡᠭᠦᠷ ᠥᠩᠭᠡᠷᠡᠵᠦ᠂ ᠮᠠᠨ ᠤ ᠭᠡᠷ ᠢ ᠠᠪᠤᠷᠠᠭᠰᠠᠨ〉 ᠭᠡᠵᠦ ᠬᠡᠯᠡ》 ᠬᠡᠮᠡᠭᠰᠡᠨ ᠳᠦ᠂ ᠠᠷᠠᠳ ᠲᠦᠮᠡᠨ ᠳᠣᠭᠣᠭᠰᠢ ᠮᠡᠬᠦᠢᠨ᠂ ᠬᠦᠨᠳᠦᠳᠬᠡᠨ ᠮᠥᠷᠭᠥᠪᠡ᠃
28 ᠢᠰᠷᠧᠯᠴᠦᠳ ᠬᠠᠷᠢᠵᠤ᠂ ᠶᠣᠬᠣᠸᠠ ᠶᠢᠨ ᠮᠣᠰᠧ᠂ ᠠᠷᠣᠨ ᠬᠣᠶᠠᠷ ᠲᠤ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠦᠢᠯᠡᠳᠪᠡ᠃
29 ᠰᠥᠨᠢ ᠳᠥᠯᠢ ᠪᠠᠷ᠂ ᠶᠣᠬᠣᠸᠠ ᠶᠧᠵᠢᠫᠲ ᠳᠠᠬᠢ ᠤᠤᠭᠠᠨ᠂ ᠲᠤᠬᠠᠢᠯᠠᠪᠠᠯ ᠰᠡᠨᠲᠢ ᠳᠡᠭᠡᠨ ᠵᠠᠯᠠᠷᠠᠭᠴᠢ ᠹᠠᠷᠠᠣ᠋ ᠶᠢᠨ ᠤᠤᠭᠠᠨ ᠬᠦᠦ ᠡᠴᠡ ᠡᠬᠢᠯᠡᠭᠡᠳ᠂ ᠭᠢᠨᠳᠠᠨ ᠳᠤ ᠬᠣᠷᠢᠭᠳᠠᠵᠤ ᠪᠠᠢᠭᠠ ᠬᠥᠮᠦᠨ ᠦ ᠤᠤᠭᠠᠨ ᠬᠦᠦ ᠳᠦ ᠬᠦᠷᠲᠡᠯᠡ᠂ ᠮᠥᠨ ᠮᠠᠯ ᠤᠨ ᠪᠦᠬᠦ ᠠᠩ᠋ᠬᠠᠨ ᠤ ᠲᠥᠯ ᠢ ᠴᠣᠬᠢᠯᠠ᠃ 30 ᠲᠡᠷᠡ ᠰᠥᠨᠢ ᠹᠠᠷᠠᠣ᠋ ᠪᠣᠯᠣᠨ ᠲᠡᠭᠦᠨ ᠦ ᠵᠠᠷᠤᠴᠠ ᠨᠠᠷ᠂ ᠮᠥᠨ ᠶᠧᠵᠢᠫᠲ᠋ᠴᠦᠳ ᠪᠦᠭᠦᠳᠡᠭᠡᠷ ᠢᠶᠡᠨ ᠰᠡᠷᠢᠵᠦ ᠪᠣᠰᠪᠠ᠃ ᠦᠬᠦᠯ ᠬᠠᠭᠠᠴᠠᠯ ᠨᠢᠭᠤᠷᠯᠠᠭᠠ ᠦᠭᠡᠢ ᠠᠢᠯ ᠲᠡᠨᠳᠡ ᠪᠠᠢᠭᠰᠠᠨ ᠦᠭᠡᠢ ᠪᠣᠯᠬᠣᠷ ᠶᠧᠵᠢᠫᠲ ᠲᠤ ᠠᠰᠤᠷᠤ ᠶᠡᠬᠡ ᠤᠬᠢᠯᠠᠭᠠᠨ ᠬᠠᠢᠯᠠᠭᠠᠨ ᠪᠣᠯᠣᠯᠠ᠃
ᠢᠰᠷᠧᠯᠴᠦᠳ ᠶᠧᠵᠢᠫᠲ ᠡᠴᠡ ᠭᠠᠷᠪᠠ
31 ᠹᠠᠷᠠᠣ᠋ ᠮᠣᠰᠧ᠂ ᠠᠷᠣᠨ ᠬᠣᠶᠠᠷ ᠢ ᠰᠥᠨᠢ ᠪᠠᠷ ᠳᠠᠭᠤᠳᠠᠵᠤ᠄ 《ᠬᠥᠳᠡᠯ᠂ ᠲᠠ ᠨᠠᠷ ᠴᠤ᠂ ᠢᠰᠷᠧᠯᠴᠦᠳ ᠴᠤ᠂ ᠮᠢᠨᠦ ᠠᠷᠠᠳ ᠲᠦᠮᠡᠨ ᠦ ᠳᠤᠮᠳᠠ ᠠᠴᠠ ᠭᠠᠷ᠃ ᠲᠠ ᠨᠠᠷ ᠬᠡᠯᠡᠭᠰᠡᠨ ᠢᠶᠡᠷ ᠢᠶᠠᠨ ᠶᠠᠪᠤᠵᠤ᠂ ᠶᠣᠬᠣᠸᠠ ᠳᠤ ᠮᠥᠷᠭᠥ᠃ 32 ᠲᠠ ᠨᠠᠷ ᠬᠡᠯᠡᠭᠰᠡᠨ ᠢᠶᠡᠷ ᠢᠶᠠᠨ ᠬᠣᠨᠢ᠂ ᠦᠬᠡᠷ ᠢᠶᠡᠨ ᠠᠪᠤᠭᠠᠳ ᠶᠠᠪᠤ᠃ ᠨᠠᠮᠠᠶᠢ ᠴᠤ ᠢᠷᠥᠭᠡᠵᠡᠭᠡ》 ᠭᠡᠪᠡ᠃
33 ᠶᠧᠵᠢᠫᠲ᠋ᠴᠦᠳ᠄ 《ᠪᠢᠳᠡ ᠪᠦᠭᠦᠳᠡ ᠦᠬᠦᠬᠦ ᠨᠢ》 ᠭᠡᠳ ᠠᠷᠠᠳ ᠲᠦᠮᠡᠨ ᠢ ᠨᠤᠲᠤᠭ ᠠᠴᠠ ᠪᠠᠨ ᠪᠤᠰᠢᠭᠤᠬᠠᠨ ᠭᠠᠷᠭᠠᠬᠤ ᠪᠠᠷ ᠰᠢᠪᠠᠳᠠᠭᠤᠯᠪᠠ᠃ 34 ᠲᠡᠢᠮᠦ ᠡᠴᠡ ᠠᠷᠠᠳ ᠲᠦᠮᠡᠨ ᠢᠰᠭᠡᠭᠦᠷ ᠦᠭᠡᠢ ᠵᠢᠭᠤᠷᠠᠮᠠᠯ ᠭᠤᠯᠢᠷ ᠢ ᠰᠠᠪᠠᠨ ᠳᠠᠭᠠᠨ ᠬᠢᠵᠦ᠂ ᠬᠤᠪᠴᠠᠰᠤᠨ ᠳᠠᠭᠠᠨ ᠪᠣᠭᠣᠵᠤ ᠮᠥᠷᠥᠯᠡᠪᠡ᠃ 35 ᠢᠰᠷᠧᠯᠴᠦᠳ ᠮᠣᠰᠧ ᠶᠢᠨ ᠦᠭᠡ ᠪᠡᠷ ᠦᠢᠯᠡᠳᠴᠦ᠂ ᠶᠧᠵᠢᠫᠲ᠋ᠴᠦᠳ ᠡᠴᠡ ᠮᠥᠩᠭᠥᠨ ᠡᠳ᠋ᠯᠡᠯ᠂ ᠠᠯᠲᠠᠨ ᠡᠳ᠋ᠯᠡᠯ ᠪᠣᠯᠣᠨ ᠬᠤᠪᠴᠠᠰᠤ ᠬᠤᠨᠠᠷ ᠱᠠᠭᠠᠷᠳᠠᠭᠰᠠᠨ ᠪᠠᠢᠵᠠᠢ᠃ 36 ᠶᠣᠬᠣᠸᠠ ᠠᠷᠠᠳ ᠲᠦᠮᠡᠨ ᠢᠶᠡᠨ ᠶᠧᠵᠢᠫᠲ᠋ᠴᠦᠳ ᠦᠨ ᠨᠢᠳᠦᠨ ᠳᠦ ᠲᠠᠭᠠᠯᠠᠯ ᠢ ᠣᠯᠣᠭᠤᠯᠤᠭᠰᠠᠨ ᠪᠣᠯᠬᠣᠷ ᠲᠡᠳᠡᠨ ᠦ ᠱᠠᠭᠠᠷᠳᠠᠭᠰᠠᠨ ᠢ ᠶᠧᠵᠢᠫᠲ᠋ᠴᠦᠳ ᠥᠭᠪᠡ᠃ ᠲᠡᠢᠨ ᠬᠦ ᠲᠡᠳᠡ ᠶᠧᠵᠢᠫᠲ᠋ᠴᠦᠳ ᠢ ᠲᠣᠨᠣᠭᠰᠠᠨ ᠪᠠᠢᠯᠠ᠃
37 ᠢᠰᠷᠧᠯᠴᠦᠳ ᠷᠠᠮᠧᠰᠧᠰ ᠡᠴᠡ ᠰᠦᠺᠣᠲ ᠤᠷᠤᠭᠤ ᠬᠥᠳᠡᠯᠬᠦ ᠳᠦ᠂ ᠡᠬᠡᠨᠡᠷ ᠬᠡᠦᠬᠡᠳ ᠤᠳ ᠠᠴᠠ ᠭᠠᠳᠠᠨᠠ᠂ ᠪᠠᠷᠤᠭ ᠵᠢᠷᠠᠨ ᠲᠦᠮᠡᠨ ᠶᠠᠪᠠᠭᠠᠨ ᠡᠷᠡ ᠪᠠᠢᠯᠠ᠃ 38 ᠲᠡᠳᠡᠨ ᠲᠡᠢ ᠬᠠᠮᠲᠤ ᠦᠢ ᠣᠯᠠᠨ ᠢᠰᠷᠧᠯ ᠪᠤᠰᠤ ᠬᠥᠮᠦᠰ ᠬᠢᠭᠡᠳ ᠬᠣᠨᠢ ᠦᠬᠡᠷ᠂ ᠠᠰᠤᠷᠤ ᠣᠯᠠᠨ ᠲᠣᠭᠠᠨ ᠤ ᠮᠠᠯ ᠰᠦᠷᠦᠭ ᠵᠠᠮ ᠳᠤ ᠭᠠᠷᠴᠠᠢ᠃ 39 ᠲᠡᠳᠡ ᠶᠧᠵᠢᠫᠲ ᠡᠴᠡ ᠠᠪᠴᠢᠷᠠᠭᠰᠠᠨ ᠵᠢᠭᠤᠷᠠᠮᠠᠯ ᠭᠤᠯᠢᠷ ᠢᠶᠠᠷ ᠢᠶᠠᠨ ᠢᠰᠭᠡᠭᠡ ᠦᠭᠡᠢ ᠪᠣᠭᠣᠷᠰᠣᠭ ᠬᠢᠵᠡᠢ᠃ ᠤᠴᠢᠷ ᠨᠢ ᠲᠡᠳᠡ ᠬᠣᠭᠣᠯᠠ ᠬᠦᠨᠡᠰᠦ ᠪᠡᠯᠡᠳᠬᠡᠬᠦ ᠵᠠᠪ ᠴᠤ ᠦᠭᠡᠢ ᠪᠠᠷ ᠶᠧᠵᠢᠫᠲ ᠡᠴᠡ ᠬᠥᠭᠡᠭᠡᠭᠳᠡᠭᠰᠡᠨ ᠠᠵᠢ᠃
40 ᠢᠰᠷᠧᠯᠴᠦᠳ ᠦᠨ ᠶᠧᠵᠢᠫᠲ ᠲᠤ ᠠᠮᠢᠳᠤᠷᠠᠭᠰᠠᠨ ᠬᠤᠭᠤᠴᠠᠭᠠ ᠨᠢ ᠳᠥᠷᠪᠡᠨ ᠵᠠᠭᠤ ᠭᠤᠴᠢᠨ ᠵᠢᠯ ᠪᠢᠯᠡ᠃ 41 ᠳᠥᠷᠪᠡᠨ ᠵᠠᠭᠤ ᠭᠤᠴᠢᠨ ᠵᠢᠯ ᠤᠨ ᠡᠴᠦᠰ ᠦᠨ ᠶᠠᠭ ᠲᠡᠷᠡ ᠡᠳᠦᠷ ᠶᠣᠬᠣᠸᠠ ᠶᠢᠨ ᠬᠠᠮᠤᠭ ᠴᠡᠷᠢᠭ ᠶᠧᠵᠢᠫᠲ ᠡᠴᠡ ᠭᠠᠷᠪᠠ᠃ 42 ᠲᠡᠷᠡ ᠰᠥᠨᠢ ᠲᠡᠳᠡᠨ ᠢ ᠶᠧᠵᠢᠫᠲ ᠡᠴᠡ ᠭᠠᠷᠭᠠᠬᠤ ᠶᠢᠨ ᠲᠤᠯᠠᠳᠠ ᠶᠣᠬᠣᠸᠠ ᠰᠠᠬᠢᠵᠤ ᠬᠣᠨᠣᠭᠰᠠᠨ ᠶᠤᠮ᠃ ᠲᠡᠷᠡ ᠰᠥᠨᠢ ᠨᠢ ᠶᠣᠬᠣᠸᠠ ᠶᠢᠨ ᠬᠢ ᠪᠣᠯᠬᠣᠷ ᠢᠰᠷᠧᠯᠴᠦᠳ ᠪᠦᠭᠦᠳᠡᠭᠡᠷ ᠦᠶᠡ ᠶᠢᠨ ᠦᠶᠡ ᠳᠦ ᠲᠡᠮᠳᠡᠭᠯᠡᠬᠦ ᠶᠣᠰᠣᠲᠠᠢ ᠪᠢᠯᠡ᠃
ᠭᠡᠲᠦᠯᠭᠡᠭᠰᠡᠨ ᠦ ᠪᠠᠶᠠᠷ ᠤᠨ ᠴᠡᠭᠡᠷ ᠤᠳ
43 ᠶᠣᠬᠣᠸᠠ ᠮᠣᠰᠧ᠂ ᠠᠷᠣᠨ ᠬᠣᠶᠠᠷ ᠲᠤ᠄ 《ᠭᠡᠲᠦᠯᠭᠡᠭᠰᠡᠨ ᠦ ᠪᠠᠶᠠᠷ ᠤᠨ ᠵᠢᠷᠤᠮ ᠭᠡᠪᠡᠯ᠂ ᠬᠠᠷᠢ ᠬᠥᠮᠦᠨ ᠡᠨᠡ ᠬᠣᠭᠣᠯᠠ ᠠᠴᠠ ᠢᠳᠡᠵᠦ ᠪᠣᠯᠬᠤ ᠦᠭᠡᠢ᠃ 44 ᠮᠥᠩᠭᠥ ᠪᠡᠷ ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ ᠪᠣᠭᠣᠯ ᠪᠣᠯᠭᠠᠨ ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠦᠭᠰᠡᠨ ᠪᠣᠯ ᠡᠭᠦᠨ ᠡᠴᠡ ᠢᠳᠡᠵᠦ ᠪᠣᠯᠣᠨᠠ᠂ 45 ᠭᠡᠪᠡᠴᠦ ᠲᠦᠷ ᠰᠠᠭᠤᠭᠴᠢ᠂ ᠡᠰᠡᠪᠡᠯ ᠬᠥᠯᠥᠰᠥᠨ ᠦ ᠠᠵᠢᠯᠴᠢᠨ ᠡᠭᠦᠨ ᠡᠴᠡ ᠢᠳᠡᠵᠦ ᠪᠣᠯᠬᠤ ᠦᠭᠡᠢ᠃ 46 ᠡᠭᠦᠨ ᠢ ᠨᠢᠭᠡ ᠭᠡᠷ ᠳᠣᠲᠣᠷᠠ ᠢᠳᠡᠬᠦ ᠶᠣᠰᠣᠲᠠᠢ᠃ ᠲᠠ ᠨᠠᠷ ᠲᠡᠷᠡ ᠮᠢᠬᠠᠨ ᠠᠴᠠ ᠬᠡᠰᠡᠭ ᠢ ᠴᠤ ᠭᠡᠷ ᠦᠨ ᠭᠠᠳᠠᠨᠠ ᠠᠪᠴᠤ ᠭᠠᠷᠭᠠᠵᠤ ᠪᠣᠯᠬᠤ ᠦᠭᠡᠢ᠂ ᠶᠠᠰᠤ ᠶᠢ ᠨᠢ ᠬᠤᠭᠤᠯᠵᠤ ᠪᠣᠯᠬᠤ ᠦᠭᠡᠢ᠃ 47 ᠢᠰᠷᠧᠯ ᠤᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠪᠦᠭᠦᠳᠡᠭᠡᠷ ᠡᠭᠦᠨ ᠢ ᠦᠢᠯᠡᠳᠬᠦ ᠶᠣᠰᠣᠲᠠᠢ᠃ 48 ᠬᠡᠷᠪᠡ ᠴᠢᠮᠠ ᠲᠠᠢ ᠬᠠᠮᠲᠤ ᠰᠠᠭᠤᠳᠠᠭ ᠭᠠᠳᠠᠨᠠ ᠶᠢᠨ ᠬᠥᠮᠦᠨ ᠶᠣᠬᠣᠸᠠ ᠶᠢᠨ ᠭᠡᠲᠦᠯᠭᠡᠭᠰᠡᠨ ᠦ ᠪᠠᠶᠠᠷ ᠢ ᠲᠡᠮᠳᠡᠭᠯᠡᠬᠦ ᠭᠡᠪᠡᠯ᠂ ᠬᠠᠮᠤᠭ ᠡᠷᠡ ᠬᠦᠢᠰᠦᠲᠡᠨ ᠨᠢ ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠬᠦ ᠶᠣᠰᠣᠲᠠᠢ᠂ ᠡᠭᠦᠨ ᠦ ᠳᠠᠷᠠᠭᠠ ᠯᠠ ᠤᠤᠭᠠᠯ ᠬᠥᠮᠦᠨ ᠲᠡᠢ ᠠᠳᠠᠯᠢ ᠣᠷᠣᠯᠴᠠᠵᠤ ᠪᠣᠯᠣᠨᠠ᠃ ᠭᠡᠪᠡᠴᠦ ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠦᠭᠡ ᠦᠭᠡᠢ ᠬᠥᠮᠦᠨ ᠡᠭᠦᠨ ᠡᠴᠡ ᠢᠳᠡᠵᠦ ᠦᠯᠦ ᠪᠣᠯᠣᠨᠠ᠃ 49 ᠡᠨᠡ ᠬᠠᠤᠯᠢ ᠨᠢ ᠤᠤᠭᠠᠯ ᠬᠥᠮᠦᠨ ᠳᠦ ᠴᠤ᠂ ᠲᠠ ᠨᠠᠷ ᠤᠨ ᠳᠤᠮᠳᠠ ᠰᠠᠭᠤᠭᠴᠢ ᠬᠠᠷᠢ ᠬᠥᠮᠦᠨ ᠳᠦ ᠴᠤ ᠢᠯᠭᠠᠭᠠ ᠦᠭᠡᠢ》 ᠭᠡᠵᠦ ᠠᠢᠯᠠᠳᠪᠠ᠃
50 ᠢᠰᠷᠧᠯᠴᠦᠳ ᠪᠦᠭᠦᠳᠡᠭᠡᠷ ᠢᠶᠡᠨ ᠶᠣᠬᠣᠸᠠ ᠶᠢᠨ ᠮᠣᠰᠧ᠂ ᠠᠷᠣᠨ ᠬᠣᠶᠠᠷ ᠲᠤ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ᠂ ᠶᠠᠭ ᠲᠡᠢᠨ ᠬᠦ ᠦᠢᠯᠡᠳᠪᠡ᠃ 51 ᠶᠠᠭ ᠲᠡᠷᠡ ᠡᠳᠦᠷ ᠶᠣᠬᠣᠸᠠ ᠢᠰᠷᠧᠯᠴᠦᠳ ᠢ ᠠᠩ᠋ᠭᠢ ᠠᠩ᠋ᠭᠢ ᠪᠠᠷ ᠨᠢ ᠶᠧᠵᠢᠫᠲ ᠡᠴᠡ ᠭᠠᠷᠭᠠᠭᠰᠠᠨ ᠶᠤᠮ᠃