ᠭᠡᠲᠦᠯᠦᠯ ᠬᠣᠷᠢᠨ ᠬᠣᠶᠠᠷ
ᠡᠳ᠋ ᠬᠥᠷᠥᠩᠭᠡ ᠶᠢᠨ ᠲᠤᠬᠠᠢ ᠵᠢᠷᠤᠮ
1 ᠦᠬᠡᠷ᠂ ᠡᠰᠡᠪᠡᠯ ᠬᠣᠨᠢ ᠬᠤᠯᠠᠭᠠᠢᠯᠠᠵᠤ᠂ ᠨᠢᠲᠤᠯᠬᠤ ᠪᠤᠶᠤ ᠬᠤᠳᠠᠯᠳᠤᠭᠰᠠᠨ ᠪᠣᠯ᠂ ᠲᠡᠷᠡ ᠬᠥᠮᠦᠨ ᠨᠢᠭᠡ ᠦᠬᠡᠷ ᠢ ᠲᠠᠪᠤᠨ ᠦᠬᠡᠷ ᠢᠶᠡᠷ᠂ ᠨᠢᠭᠡ ᠬᠣᠨᠢ ᠶᠢ ᠳᠥᠷᠪᠡᠨ ᠬᠣᠨᠢ ᠪᠠᠷ ᠲᠥᠯᠥᠬᠦ ᠶᠣᠰᠣᠲᠠᠢ᠃
2 ᠬᠡᠷᠪᠡ ᠬᠤᠯᠠᠭᠠᠢᠴᠢ ᠡᠪᠳᠡᠯᠡᠵᠦ ᠣᠷᠣᠬᠤ ᠭᠡᠳ ᠪᠠᠷᠢᠭᠳᠠᠨ᠂ ᠴᠣᠬᠢᠭᠳᠠᠵᠤ ᠠᠯᠠᠭᠳᠠᠪᠠᠯ ᠬᠥᠮᠦᠨ ᠦ ᠠᠮᠢᠨ ᠬᠡᠷᠡᠭ ᠲᠦ ᠲᠣᠭᠠᠴᠠᠭᠳᠠᠬᠤ ᠦᠭᠡᠢ᠃ 3 ᠬᠠᠷᠢᠨ ᠨᠠᠷᠠ ᠭᠠᠷᠤᠭᠰᠠᠨ ᠤ ᠳᠠᠷᠠᠭᠠ ᠦᠬᠦᠭᠰᠡᠨ ᠪᠣᠯ ᠬᠥᠮᠦᠨ ᠦ ᠠᠮᠢᠨ ᠬᠡᠷᠡᠭ ᠲᠦ ᠲᠣᠭᠠᠴᠠᠭᠳᠠᠨᠠ᠃
4 ᠦᠬᠡᠷ᠂ ᠡᠯᠵᠢᠭᠡ᠂ ᠡᠰᠡᠪᠡᠯ ᠬᠣᠨᠢᠨ ᠤ ᠠᠯᠢ ᠨᠢ ᠴᠤ ᠪᠠᠢ᠂ ᠬᠡᠷᠪᠡ ᠬᠤᠯᠠᠭᠠᠢᠯᠠᠭᠰᠠᠨ ᠶᠠᠭᠤᠮᠠ ᠨᠢ ᠲᠡᠭᠦᠨ ᠦ ᠬᠢ ᠡᠴᠡ ᠠᠮᠢᠳᠤ ᠪᠠᠷ ᠣᠯᠳᠠᠪᠠᠯ ᠬᠤᠯᠠᠭᠠᠢᠴᠢ ᠬᠣᠶᠠᠷ ᠨᠤᠭᠤᠯᠵᠤ ᠲᠥᠯᠥᠬᠦ ᠶᠣᠰᠣᠲᠠᠢ᠃
5 ᠬᠡᠷᠪᠡ ᠬᠥᠮᠦᠨ ᠲᠠᠷᠢᠶᠠᠯᠠᠩ ᠤᠨ ᠲᠠᠯᠠᠪᠠᠢ᠂ ᠡᠰᠡᠪᠡᠯ ᠦᠵᠦᠮ ᠦᠨ ᠴᠡᠴᠡᠷᠯᠢᠭ ᠲᠤ ᠮᠠᠯ ᠢᠶᠠᠨ ᠪᠡᠯᠴᠢᠭᠡᠷᠯᠡᠭᠦᠯᠵᠦ ᠪᠠᠢᠭᠠᠳ ᠰᠤᠯᠠ ᠲᠠᠯᠪᠢᠭᠰᠠᠨ ᠠᠴᠠ ᠪᠣᠯᠵᠤ ᠮᠠᠯ ᠨᠢ ᠥᠭᠡᠷᠡ ᠬᠥᠮᠦᠨ ᠦ ᠲᠠᠷᠢᠶᠠᠯᠠᠩ ᠤᠨ ᠲᠠᠯᠠᠪᠠᠢ ᠳᠤ ᠪᠡᠯᠴᠢᠪᠡᠯ ᠮᠠᠯ ᠤᠨ ᠡᠵᠡᠨ ᠲᠠᠷᠢᠶᠠᠯᠠᠩ ᠤᠨ ᠲᠠᠯᠠᠪᠠᠢ ᠶᠢᠨ ᠢᠶᠠᠨ ᠬᠠᠮᠤᠭ ᠤᠨ ᠰᠠᠢᠨ᠂ ᠡᠰᠡᠪᠡᠯ ᠦᠵᠦᠮ ᠦᠨ ᠴᠡᠴᠡᠷᠯᠢᠭ ᠤᠨ ᠢᠶᠠᠨ ᠬᠠᠮᠤᠭ ᠤᠨ ᠰᠠᠢᠨ ᠢᠶᠠᠷ ᠨᠥᠬᠥᠨ ᠲᠥᠯᠥᠬᠦ ᠶᠣᠰᠣᠲᠠᠢ᠃
6 ᠬᠡᠷᠪᠡ ᠭᠠᠯ ᠭᠠᠷᠴᠤ᠂ ᠦᠭᠦᠷᠭᠡᠨᠡ ᠶᠢᠨ ᠪᠤᠲᠠᠨ ᠳᠤ ᠠᠪᠤᠯᠴᠠᠵᠤ᠂ ᠬᠤᠷᠢᠶᠠᠭᠰᠠᠨ ᠲᠠᠷᠢᠶᠠ᠂ ᠡᠰᠡᠪᠡᠯ ᠬᠠᠳᠤᠭᠠ ᠦᠭᠡᠢ ᠲᠠᠷᠢᠶᠠ᠂ ᠡᠰᠡᠪᠡᠯ ᠲᠠᠷᠢᠶᠠᠯᠠᠩ ᠤᠨ ᠲᠠᠯᠠᠪᠠᠢ ᠶᠢ ᠰᠢᠲᠠᠭᠠᠪᠠᠯ ᠲᠡᠷᠡ ᠲᠦᠢᠮᠡᠷ ᠢ ᠲᠠᠯᠪᠢᠭᠴᠢ ᠨᠢ ᠵᠠᠪᠠᠯ ᠲᠥᠯᠥᠬᠦ ᠶᠣᠰᠣᠲᠠᠢ᠃
7 ᠬᠥᠮᠦᠨ ᠮᠥᠩᠭᠥ᠂ ᠡᠰᠡᠪᠡᠯ ᠡᠳ᠋ ᠵᠦᠢᠯᠡᠰ ᠢᠶᠡᠨ ᠬᠥᠷᠰᠢ ᠳᠡᠭᠡᠨ ᠥᠭᠴᠦ ᠬᠠᠳᠠᠭᠠᠯᠠᠭᠤᠯᠬᠤ ᠳᠤ᠂ ᠲᠡᠷᠡ ᠨᠢ ᠬᠥᠷᠰᠢ ᠶᠢᠨ ᠬᠢᠨᠢ ᠭᠡᠷ ᠡᠴᠡ ᠬᠤᠯᠠᠭᠠᠢᠯᠠᠭᠳᠠᠭᠰᠠᠨ ᠲᠣᠬᠢᠶᠠᠯᠳᠤᠯ ᠳᠤ᠂ ᠬᠤᠯᠠᠭᠠᠢᠴᠢ ᠪᠠᠷᠢᠭᠳᠠᠪᠠᠯ ᠡᠵᠡᠨ ᠳᠦᠨᠢ ᠬᠣᠶᠠᠷ ᠨᠤᠭᠤᠯᠵᠤ ᠲᠥᠯᠥᠬᠦ ᠶᠣᠰᠣᠲᠠᠢ᠃ 8 ᠬᠤᠯᠠᠭᠠᠢᠴᠢ ᠪᠠᠷᠢᠭᠳᠠᠬᠤ ᠦᠭᠡᠢ ᠪᠣᠯ ᠭᠡᠷ ᠦᠨ ᠡᠵᠡᠨ ᠰᠢᠭᠦᠭᠴᠢᠳ ᠳᠡᠭᠡᠷᠡ ᠣᠴᠢᠵᠤ᠂ ᠬᠥᠷᠰᠢ ᠶᠢᠨ ᠢᠶᠠᠨ ᠡᠳ᠋ ᠬᠥᠷᠥᠩᠭᠡ ᠳᠦ ᠭᠠᠷ ᠬᠦᠷᠦᠭᠰᠡᠨ ᠡᠰᠡᠬᠦ ᠪᠡᠨ ᠰᠢᠭᠦᠯᠭᠡᠬᠦ ᠶᠣᠰᠣᠲᠠᠢ᠃
9 ᠠᠯᠳᠠᠭᠳᠠᠭᠰᠠᠨ ᠦᠬᠡᠷ᠂ ᠡᠯᠵᠢᠭᠡ᠂ ᠬᠣᠨᠢ᠂ ᠬᠤᠪᠴᠠᠰᠤ ᠬᠤᠨᠠᠷ᠂ ᠡᠰᠡᠪᠡᠯ ᠶᠠᠮᠠᠷ ᠥᠭᠡᠷᠡ ᠨᠢᠭᠡ ᠠᠯᠳᠠᠭᠤᠯ ᠶᠠᠭᠤᠮᠠᠨ ᠤ ᠲᠤᠬᠠᠢ ᠵᠥᠷᠢᠴᠡᠯ ᠭᠠᠷᠴᠤ 〈ᠡᠨᠡ ᠨᠢ ᠮᠢᠨᠦᠬᠢ〉 ᠭᠡᠬᠦ ᠲᠣᠬᠢᠶᠠᠯᠳᠤᠯ ᠳᠤ᠂ ᠬᠣᠶᠠᠷ ᠲᠠᠯᠠ ᠰᠢᠭᠦᠭᠴᠢᠳ ᠳᠡᠭᠡᠷᠡ ᠣᠴᠢᠬᠤ ᠶᠣᠰᠣᠲᠠᠢ ᠪᠥᠭᠡᠳ ᠰᠢᠭᠦᠭᠴᠢᠳ ᠤᠨ ᠪᠤᠷᠤᠭᠤᠳᠬᠠᠭᠰᠠᠨ ᠬᠥᠮᠦᠨ ᠨᠢ ᠬᠥᠷᠰᠢ ᠳᠡᠭᠡᠨ ᠬᠣᠶᠠᠷ ᠨᠤᠭᠤᠯᠵᠤ ᠲᠥᠯᠥᠬᠦ ᠶᠣᠰᠣᠲᠠᠢ᠃
10 ᠬᠡᠷᠪᠡ ᠬᠥᠮᠦᠨ ᠡᠯᠵᠢᠭᠡ᠂ ᠦᠬᠡᠷ᠂ ᠬᠣᠨᠢ᠂ ᠡᠰᠡᠪᠡᠯ ᠥᠭᠡᠷᠡ ᠮᠠᠯ ᠢᠶᠠᠨ ᠬᠥᠷᠰᠢ ᠳᠡᠭᠡᠨ ᠥᠭᠴᠦ ᠠᠷᠠᠴᠢᠯᠠᠭᠤᠯᠤᠭᠤᠯᠬᠤ ᠳᠤ ᠲᠡᠷᠡ ᠨᠢ ᠦᠬᠦᠬᠦ᠂ ᠭᠡᠮᠲᠦᠬᠦ᠂ ᠡᠰᠡᠪᠡᠯ ᠬᠡᠨ ᠴᠤ ᠬᠠᠷᠠᠭᠠ ᠦᠭᠡᠢ ᠪᠠᠢᠬᠤ ᠳᠤ ᠠᠯᠠᠭᠠ ᠪᠣᠯᠪᠠᠯ᠂ 11 ᠲᠡᠷᠡ ᠬᠣᠶᠠᠷ ᠤᠨ ᠬᠣᠭᠣᠷᠣᠨᠳᠣ ᠬᠥᠷᠰᠢ ᠶᠢᠨ ᠢᠶᠠᠨ ᠥᠮᠴᠢ ᠳᠤ ᠭᠠᠷ ᠬᠦᠷᠦᠭᠡ ᠦᠭᠡᠢ ᠭᠡᠰᠡᠨ ᠦ ᠲᠠᠩ᠋ᠭᠠᠷᠢᠭ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠪᠠᠢᠬᠤ ᠶᠣᠰᠣᠲᠠᠢ᠃ ᠮᠠᠯ ᠤᠨ ᠡᠵᠡᠨ ᠲᠡᠷᠡ ᠲᠠᠩ᠋ᠭᠠᠷᠢᠭ ᠢ ᠬᠦᠯᠢᠶᠡᠨ ᠠᠪᠴᠤ᠂ ᠨᠥᠭᠥᠭᠡ ᠬᠥᠮᠦᠨ ᠨᠥᠬᠥᠨ ᠲᠥᠯᠥᠬᠦ ᠶᠣᠰᠣ ᠦᠭᠡᠢ᠃ 12 ᠭᠡᠪᠡᠴᠦ ᠨᠥᠭᠥᠭᠡ ᠮᠠᠯ ᠬᠥᠷᠰᠢ ᠡᠴᠡ ᠨᠢ ᠪᠣᠯᠵᠤ ᠬᠤᠯᠠᠭᠠᠢᠯᠠᠭᠳᠠᠭᠰᠠᠨ ᠨᠢ ᠲᠣᠳᠣᠷᠬᠠᠢ ᠪᠣᠯ᠂ ᠲᠡᠷᠡ ᠪᠡᠷ ᠡᠵᠡᠨ ᠳᠦᠨᠢ ᠨᠥᠬᠥᠨ ᠲᠥᠯᠥᠬᠦ ᠶᠣᠰᠣᠲᠠᠢ᠃ 13 ᠬᠡᠷᠪᠡ ᠨᠥᠭᠥᠭᠡ ᠮᠠᠯ ᠨᠢ ᠠᠷᠢᠶᠠᠲᠠᠨ ᠳᠤ ᠲᠠᠰᠤᠳᠠᠭᠳᠠᠭᠰᠠᠨ ᠪᠣᠯ ᠲᠡᠭᠦᠨ ᠦ ᠭᠡᠷᠡᠴᠢ ᠶᠢ ᠠᠪᠴᠢᠷᠠᠬᠤ ᠶᠣᠰᠣᠲᠠᠢ᠃ ᠲᠡᠭᠡᠪᠡᠯ ᠲᠡᠷᠡ ᠪᠡᠷ ᠲᠠᠰᠤᠳᠠᠭᠳᠠᠭᠰᠠᠨ ᠮᠠᠯ ᠤᠨ ᠲᠥᠯᠥᠭᠡ ᠲᠥᠯᠥᠬᠦ ᠶᠣᠰᠣ ᠦᠭᠡᠢ᠃
14 ᠬᠡᠷᠪᠡ ᠬᠥᠮᠦᠨ ᠬᠥᠷᠰᠢ ᠡᠴᠡ ᠪᠡᠨ ᠮᠠᠯ ᠵᠢᠭᠡᠯᠡᠵᠦ ᠠᠪᠤᠭᠠᠳ ᠡᠵᠡᠨ ᠨᠢ ᠦᠭᠡᠢ ᠳᠦ ᠲᠡᠷᠡ ᠮᠠᠯ ᠭᠡᠮᠲᠦᠬᠦ᠂ ᠡᠰᠡᠪᠡᠯ ᠦᠬᠦᠪᠡᠯ ᠵᠢᠭᠡᠯᠡᠭᠰᠡᠨ ᠬᠥᠮᠦᠨ ᠵᠠᠪᠠᠯ ᠨᠥᠬᠥᠨ ᠲᠥᠯᠥᠬᠦ ᠶᠣᠰᠣᠲᠠᠢ᠃ 15 ᠬᠡᠷᠪᠡ ᠡᠵᠡᠨ ᠨᠢ ᠬᠠᠮᠲᠤ ᠪᠠᠢᠭᠰᠠᠨ ᠪᠣᠯ᠂ ᠲᠥᠯᠥᠬᠦ ᠶᠣᠰᠣ ᠦᠭᠡᠢ᠂ ᠬᠥᠯᠥᠰᠥᠯᠡᠵᠦ ᠠᠪᠤᠭᠰᠠᠨ ᠪᠠᠢᠪᠠᠯ ᠲᠡᠷᠡ ᠬᠦ ᠬᠥᠯᠥᠰᠥ ᠨᠢ ᠲᠡᠭᠦᠨ ᠦ ᠦᠨᠡ ᠪᠣᠯᠣᠨᠠ᠃
ᠨᠡᠢᠭᠡᠮ ᠦᠨ ᠬᠠᠷᠢᠭᠤᠴᠠᠯᠭᠠ ᠶᠢᠨ ᠲᠤᠬᠠᠢ
16 ᠬᠡᠷᠪᠡ ᠨᠢᠭᠡ ᠡᠷᠡ ᠬᠥᠮᠦᠨ ᠰᠦᠢ ᠲᠠᠯᠪᠢᠭᠠ ᠦᠭᠡᠢ ᠣᠩ᠋ᠭᠣᠨ ᠥᠬᠢᠨ ᠢ ᠤᠷᠤᠭᠤ ᠲᠠᠲᠠᠵᠤ᠂ ᠲᠡᠭᠦᠨ ᠲᠡᠢ ᠤᠨᠲᠠᠪᠠᠯ ᠵᠠᠪᠠᠯ ᠰᠠᠭᠠᠯᠢ 21 ᠥᠭᠴᠦ᠂ ᠲᠡᠭᠦᠨ ᠢ ᠡᠬᠡᠨᠡᠷ ᠢᠶᠡᠨ ᠪᠣᠯᠭᠠᠨ ᠠᠪᠬᠤ ᠶᠣᠰᠣᠲᠠᠢ᠃ 17 ᠬᠡᠳᠦᠢᠪᠡᠷ ᠥᠬᠢᠨ ᠤ ᠡᠴᠢᠭᠡ ᠥᠬᠢᠨ ᠢᠶᠠᠨ ᠲᠡᠭᠦᠨ ᠳᠦ ᠥᠭᠬᠦ ᠦᠭᠡᠢ ᠪᠠᠢᠭᠰᠠᠨ ᠴᠤ ᠲᠡᠷᠡ ᠣᠩ᠋ᠭᠣᠨ ᠥᠬᠢᠨ ᠤ ᠰᠠᠭᠠᠯᠢ ᠲᠠᠢ ᠲᠡᠩᠴᠡᠬᠦ ᠮᠥᠩᠭᠥ ᠶᠢ ᠲᠥᠯᠥᠬᠦ ᠶᠣᠰᠣᠲᠠᠢ᠃
18 ᠢᠳᠤᠭᠠᠨ ᠢ ᠪᠦᠦ ᠠᠮᠢᠳᠤ ᠪᠠᠢᠯᠭᠠ᠃
19 ᠮᠠᠯ ᠠᠮᠢᠲᠠᠨ ᠲᠠᠢ ᠬᠤᠷᠢᠴᠠᠭᠴᠢ ᠪᠣᠯᠭᠠᠨ ᠵᠠᠪᠠᠯ ᠦᠬᠦᠬᠦ ᠶᠣᠰᠣᠲᠠᠢ᠃
20 ᠶᠣᠬᠣᠸᠠ ᠠᠴᠠ ᠥᠭᠡᠷᠡ ᠪᠤᠷᠬᠠᠳ ᠲᠤ ᠲᠠᠬᠢᠯ ᠡᠷᠭᠦᠭᠴᠢ ᠨᠢ ᠪᠦᠷᠢᠮᠦᠰᠦᠨ ᠤᠰᠠᠳᠬᠠᠭᠳᠠᠬᠤ ᠶᠣᠰᠣᠲᠠᠢ᠃
21 ᠴᠢ ᠬᠠᠷᠢ ᠶᠢᠨ ᠬᠥᠮᠦᠨ ᠢ ᠪᠦᠦ ᠭᠣᠮᠣᠳᠠᠭᠠ᠂ ᠪᠦᠦ ᠳᠠᠷᠤᠯᠠ᠃ ᠲᠠ ᠨᠠᠷ ᠴᠤ ᠶᠧᠵᠢᠫᠲ ᠤᠨ ᠨᠤᠲᠤᠭ ᠲᠤ ᠬᠠᠷᠢ ᠬᠥᠮᠦᠰ ᠪᠠᠢᠭᠰᠠᠨ᠃ 22 ᠲᠠ ᠨᠠᠷ ᠠᠯᠢᠪᠠ ᠪᠡᠯᠪᠡᠰᠦᠨ ᠡᠮᠡᠭᠲᠡᠢ᠂ ᠡᠰᠡᠪᠡᠯ ᠥᠨᠥᠴᠢᠨ ᠬᠡᠦᠬᠡᠳ ᠢ ᠪᠦᠦ ᠵᠣᠪᠠᠭᠠ᠃ 23 ᠬᠡᠷᠪᠡ ᠴᠢ ᠲᠡᠭᠦᠨ ᠢ ᠦᠨᠡᠬᠡᠷ ᠵᠣᠪᠠᠭᠠᠵᠤ᠂ ᠲᠡᠷᠡ ᠨᠠᠳᠠ ᠤᠷᠤᠭᠤ ᠬᠠᠰᠬᠢᠷᠪᠠᠯ ᠪᠢ ᠲᠡᠭᠦᠨ ᠦ ᠤᠢ ᠭᠠᠰᠢᠭᠤ ᠶᠢ ᠯᠠᠪᠲᠠᠢ ᠰᠣᠨᠣᠰᠣᠨᠠ᠃ 24 ᠮᠢᠨᠦ ᠠᠭᠤᠷ ᠬᠢᠯᠢᠩ ᠳᠦᠷᠡᠯᠵᠡᠵᠦ᠂ ᠪᠢ ᠲᠠ ᠨᠠᠷ ᠢ ᠢᠯᠳᠦ ᠪᠡᠷ ᠰᠥᠨᠥᠭᠡᠬᠦ ᠪᠥᠭᠡᠳ ᠡᠬᠡᠨᠡᠷ ᠤᠳ ᠴᠢᠨᠢ ᠪᠡᠯᠪᠡᠰᠦᠷᠡᠵᠦ᠂ ᠬᠡᠦᠬᠡᠳ ᠤᠳ ᠴᠢᠨᠢ ᠥᠨᠥᠴᠢᠷᠡᠬᠦ ᠪᠣᠯᠣᠨᠠ᠃
25 ᠬᠡᠷᠪᠡ ᠴᠢ ᠮᠢᠨᠦ ᠠᠷᠠᠳ ᠲᠦᠮᠡᠨ ᠳᠦ ᠪᠤᠶᠤ ᠴᠢᠨᠦ ᠳᠡᠷᠭᠡᠳᠡ ᠰᠠᠭᠤᠳᠠᠭ ᠶᠠᠳᠠᠭᠤ ᠬᠥᠮᠦᠨ ᠳᠦ ᠮᠥᠩᠭᠥ ᠵᠢᠭᠡᠯᠡᠭᠦᠯᠪᠡᠯ᠂ ᠲᠡᠭᠦᠨ ᠳᠦ ᠵᠢᠭᠡᠯᠡᠯᠭᠡ ᠣᠯᠭᠣᠭᠴᠢ ᠬᠥᠮᠦᠨ ᠰᠢᠭ ᠬᠠᠨᠳᠤᠵᠤ ᠪᠣᠯᠬᠤ ᠦᠭᠡᠢ᠃ ᠲᠡᠭᠦᠨ ᠡᠴᠡ ᠵᠢᠭᠡᠯᠡᠯᠭᠡ ᠶᠢᠨ ᠬᠦᠦ ᠶᠢ ᠪᠦᠦ ᠱᠠᠭᠠᠷᠳᠠ᠃ 26 ᠬᠡᠷᠪᠡ ᠴᠢ ᠬᠥᠷᠰᠢ ᠶᠢᠨ ᠢᠶᠠᠨ ᠬᠤᠪᠴᠠᠰᠤ ᠶᠢ ᠪᠠᠷᠢᠴᠠᠭᠠᠨ ᠳᠤ ᠠᠪᠤᠭᠰᠠᠨ ᠪᠣᠯ᠂ ᠨᠠᠷᠠ ᠰᠢᠩᠭᠡᠬᠦ ᠡᠴᠡ ᠡᠮᠦᠨᠡ ᠲᠡᠭᠦᠨ ᠳᠦ ᠪᠤᠴᠠᠭᠠ᠃ 27 ᠤᠴᠢᠷ ᠨᠢ ᠪᠡᠶᠡ ᠪᠡᠨ ᠪᠦᠲᠡᠭᠡᠬᠦ ᠴᠣᠷ ᠤᠨ ᠭᠠᠭᠴᠠ ᠬᠤᠪᠴᠠᠰᠤ ᠨᠢ ᠲᠡᠷᠡ ᠶᠤᠮ᠃ ᠲᠡᠷᠡ ᠬᠥᠮᠦᠨ ᠥᠭᠡᠷᠡ ᠶᠠᠭᠤ ᠨᠥᠮᠥᠷᠴᠦ ᠤᠨᠲᠠᠬᠤ ᠪᠤᠢ︖ ᠬᠡᠷᠪᠡ ᠲᠡᠷᠡ ᠨᠠᠳᠠ ᠤᠷᠤᠭᠤ ᠬᠠᠰᠬᠢᠷᠪᠠᠯ ᠪᠢ ᠰᠣᠨᠣᠰᠣᠨᠠ᠂ ᠪᠢ ᠨᠢᠭᠦᠯᠡᠰᠦᠩᠭᠦᠢ ᠪᠢᠯᠡ᠃
28 ᠴᠢ ᠪᠤᠷᠬᠠᠨ ᠢ ᠪᠦᠦ ᠪᠠᠰᠤᠮᠵᠢᠯᠠ᠂ ᠠᠷᠠᠳ ᠲᠦᠮᠡᠨ ᠦ ᠪᠠᠨ ᠤᠳᠤᠷᠢᠳᠤᠭᠴᠢ ᠶᠢ ᠪᠦᠦ ᠮᠠᠭᠤᠯᠠ᠃
29 ᠴᠢ ᠥᠪᠡᠷ ᠦᠨ ᠢᠶᠠᠨ ᠤᠷᠭᠤᠴᠠ᠂ ᠡᠰᠡᠪᠡᠯ ᠳᠠᠷᠠᠰᠤᠨ ᠤ ᠪᠠᠨ ᠳᠡᠭᠡᠵᠢ ᠶᠢ ᠡᠷᠭᠦᠬᠦ ᠪᠡᠨ ᠪᠦᠦ ᠬᠣᠢᠰᠢᠯᠠᠭᠤᠯ᠃
30 ᠦᠬᠡᠷ᠂ ᠬᠣᠨᠢᠳ ᠢᠶᠠᠨ ᠴᠤ ᠲᠡᠭᠡ᠂ ᠳᠣᠯᠣᠭᠠᠨ ᠡᠳᠦᠷ ᠲᠡᠳᠡᠨ ᠢ ᠡᠬᠡ ᠲᠠᠢ ᠨᠢ ᠬᠠᠮᠲᠤ ᠪᠠᠢᠯᠭᠠᠵᠤ᠂ ᠨᠠᠢ᠌ᠮᠠᠳᠠᠬᠢ ᠡᠳᠦᠷ ᠲᠤᠨᠢ ᠨᠠᠳᠠ ᠳᠤ ᠥᠭ᠃
31 ᠲᠠ ᠨᠠᠷ ᠨᠠᠳᠠ ᠳᠤ ᠵᠣᠷᠢᠭᠤᠯᠤᠭᠳᠠᠭᠰᠠᠨ ᠠᠷᠢᠭᠤᠨ ᠬᠥᠮᠦᠰ ᠪᠠᠢᠬᠤ ᠶᠣᠰᠣᠲᠠᠢ᠃ ᠬᠡᠭᠡᠷᠡ ᠲᠠᠯᠠ ᠳᠤ ᠠᠷᠢᠶᠠᠲᠠᠨ ᠳᠤ ᠲᠠᠰᠤᠳᠠᠭᠤᠯᠤᠭᠰᠠᠨ ᠠᠮᠢᠲᠠᠨ ᠤ ᠮᠢᠬᠠ ᠶᠢ ᠲᠠ ᠨᠠᠷ ᠪᠦᠦ ᠢᠳᠡ᠃ ᠲᠡᠳᠡᠭᠡᠷ ᠢ ᠨᠣᠬᠠᠳ ᠲᠤ ᠬᠠᠶᠠᠵᠤ ᠥᠭ᠃