ᠭᠡᠲᠦᠯᠦᠯ ᠭᠤᠴᠢᠨ ᠳᠥᠷᠪᠡ
ᠬᠠᠤᠯᠢ ᠶᠢᠨ ᠰᠢᠨᠡ ᠬᠠᠪᠲᠠᠰᠤ
1 ᠶᠣᠬᠣᠸᠠ ᠮᠣᠰᠧ ᠳᠤ ᠠᠢᠯᠠᠳᠤᠨ᠄ 《ᠤᠷᠢᠳᠤ ᠶᠢᠨ ᠠᠳᠠᠯᠢ ᠬᠣᠶᠠᠷ ᠴᠢᠯᠠᠭᠤᠨ ᠬᠠᠪᠲᠠᠰᠤ ᠬᠢ᠃ ᠴᠢᠨᠦ ᠪᠤᠲᠠᠯᠤᠭᠰᠠᠨ ᠲᠦᠷᠦᠭᠦᠴᠢ ᠶᠢᠨ ᠬᠠᠪᠲᠠᠰᠤ ᠨᠤᠭᠤᠳ ᠳᠡᠭᠡᠷᠡ ᠪᠠᠢᠭᠰᠠᠨ ᠦᠭᠡᠰ ᠢ ᠪᠢ ᠡᠳᠡᠭᠡᠷ ᠬᠠᠪᠲᠠᠰᠤᠨ ᠳᠡᠭᠡᠷᠡ ᠪᠢᠴᠢᠶᠡ᠃ 2 ᠥᠷᠯᠥᠭᠡ ᠪᠣᠯᠬᠤ ᠳᠤ ᠴᠢ ᠡᠭᠦᠨ ᠢ ᠪᠡᠯᠡᠨ ᠪᠣᠯᠭᠠᠭᠠᠳ ᠰᠢᠨᠠᠢ ᠠᠭᠤᠯᠠ ᠥᠭᠡᠳᠡ ᠭᠠᠷᠴᠤ᠂ ᠠᠭᠤᠯᠠ ᠶᠢᠨ ᠣᠷᠣᠢ ᠳᠤ ᠢᠷᠡᠭᠡᠳ ᠮᠢᠨᠦ ᠡᠮᠦᠨᠡ ᠵᠣᠭᠰᠣ᠃ 3 ᠴᠢᠮᠠ ᠲᠠᠢ ᠬᠠᠮᠲᠤ ᠬᠡᠨ ᠴᠤ ᠭᠠᠷᠴᠤ ᠢᠷᠡᠵᠦ ᠪᠣᠯᠬᠤ ᠦᠭᠡᠢ᠂ ᠠᠭᠤᠯᠠ ᠶᠢᠨ ᠬᠠᠮᠢᠭᠠ ᠴᠤ ᠬᠥᠮᠦᠨ ᠦᠵᠡᠭᠳᠡᠵᠦ ᠪᠣᠯᠬᠤ ᠦᠭᠡᠢ᠃ ᠬᠣᠨᠢᠨ ᠰᠦᠷᠦᠭ᠂ ᠦᠬᠡᠷ ᠦᠨ ᠰᠦᠷᠦᠭ ᠴᠤ ᠠᠭᠤᠯᠠ ᠶᠢᠨ ᠪᠡᠯ ᠳᠦ ᠪᠡᠯᠴᠢᠵᠦ ᠪᠣᠯᠬᠤ ᠦᠭᠡᠢ》 ᠭᠡᠪᠡ᠃ 4 ᠡᠢᠨ ᠬᠦ ᠮᠣᠰᠧ ᠲᠦᠷᠦᠭᠦᠴᠢ ᠶᠢᠨ ᠬᠢ ᠲᠠᠢ ᠪᠠᠨ ᠠᠳᠠᠯᠢᠬᠠᠨ ᠬᠣᠶᠠᠷ ᠴᠢᠯᠠᠭᠤᠨ ᠬᠠᠪᠲᠠᠰᠤ ᠬᠢᠵᠦ᠂ ᠥᠷᠯᠥᠭᠡ ᠡᠷᠲᠡ ᠪᠣᠰᠣᠭᠠᠳ ᠭᠠᠷ ᠲᠠᠭᠠᠨ ᠬᠣᠶᠠᠷ ᠴᠢᠯᠠᠭᠤᠨ ᠬᠠᠪᠲᠠᠰᠤ ᠶᠢ ᠪᠠᠷᠢᠨ ᠶᠣᠬᠣᠸᠠ ᠶᠢᠨ ᠵᠠᠬᠢᠭᠰᠠᠨ ᠶᠣᠰᠣᠭᠠᠷ ᠰᠢᠨᠠᠢ ᠠᠭᠤᠯᠠ ᠥᠭᠡᠳᠡ ᠭᠠᠷᠤᠭᠰᠠᠨ ᠪᠠᠢᠯᠠ᠃ 5 ᠶᠣᠬᠣᠸᠠ ᠡᠭᠦᠯᠡᠨ ᠳᠣᠲᠣᠷᠠ ᠪᠠᠭᠤᠨ ᠢᠷᠡᠵᠦ᠂ ᠲᠡᠨᠳᠡ ᠮᠣᠰᠧ ᠲᠠᠢ ᠬᠠᠮᠲᠤ ᠵᠣᠭᠰᠣᠭᠠᠳ ᠶᠣᠬᠣᠸᠠ ᠭᠡᠳᠡᠭ ᠨᠡᠷᠡ ᠪᠡᠨ ᠲᠤᠩ᠋ᠬᠠᠭᠯᠠᠵᠠᠢ᠃ 6 ᠲᠡᠷᠡ ᠪᠡᠷ ᠮᠣᠰᠧ ᠤᠨ ᠤᠷᠢᠳᠤᠭᠤᠷ ᠥᠩᠭᠡᠷᠡᠵᠦ ᠲᠤᠩ᠋ᠬᠠᠭᠯᠠᠬᠤ ᠳᠠᠭᠠᠨ᠄ 《ᠶᠣᠬᠣᠸᠠ᠂ ᠶᠣᠬᠣᠸᠠ᠂ ᠥᠷᠥᠪᠴᠢ᠂ ᠨᠢᠭᠦᠯᠡᠰᠦᠩᠭᠦᠢ ᠪᠤᠷᠬᠠᠨ ᠠᠭᠤᠷᠯᠠᠬᠤ ᠳᠠᠭᠠᠨ ᠤᠳᠠᠭᠠᠨ᠂ ᠡᠨᠡᠷᠢᠯ ᠪᠠ ᠦᠨᠡᠨ ᠢᠶᠡᠷ ᠪᠢᠯᠬᠠᠮᠠ᠂
7 ᠡᠨᠡᠷᠢᠯ ᠬᠠᠢᠷᠠ ᠶᠢ ᠮᠢᠩ᠋ᠭᠠ ᠮᠢᠩ᠋ᠭᠠ ᠳᠤ ᠣᠯᠭᠣᠨ ᠭᠡᠮ᠂ ᠪᠤᠷᠤᠭᠤ ᠪᠣᠯᠣᠨ ᠨᠢᠭᠦᠯ ᠢ ᠠᠭᠤᠴᠢᠯᠠᠳᠠᠭ ᠪᠣᠯᠪᠠᠴᠤ ᠶᠡᠷᠦ ᠰᠢᠳᠬᠡᠯ ᠦᠭᠡᠢ ᠣᠷᠬᠢᠬᠤ ᠦᠭᠡᠢ ᠬᠠᠷᠢᠨ ᠡᠴᠢᠭᠡ ᠤᠨ ᠬᠢᠨᠢ ᠭᠡᠮ ᠪᠤᠷᠤᠭᠤ ᠶᠢᠨ ᠦᠷᠡ ᠳᠠᠭᠠᠪᠤᠷᠢ ᠶᠢ ᠭᠤᠷᠪᠠ᠂ ᠳᠥᠷᠪᠡᠳᠡᠬᠢ ᠦᠶᠡ ᠶᠢᠨ ᠬᠡᠦᠬᠡᠳ᠂ ᠠᠴᠢ ᠨᠠᠷ ᠲᠤᠨᠢ ᠬᠦᠷᠲᠡᠯᠡ ᠬᠦᠷᠭᠡᠬᠦ ᠪᠣᠯᠣᠨᠠ》 ᠭᠡᠪᠡ᠃
8 ᠮᠣᠰᠧ ᠪᠤᠰᠢᠭᠤᠬᠠᠨ ᠨᠢᠭᠤᠷ ᠢᠶᠠᠨ ᠭᠠᠵᠠᠷ ᠲᠤ ᠨᠠᠭᠠᠨ ᠮᠥᠷᠭᠥᠵᠦ᠂ 9 ᠲᠡᠭᠦᠨ ᠳᠦ᠄ 《ᠬᠡᠷᠪᠡ ᠪᠢ ᠲᠠᠨ ᠤ ᠮᠡᠯᠮᠡᠢ ᠳᠦ ᠲᠠᠭᠠᠯᠠᠯ ᠢ ᠣᠯᠣᠭᠰᠠᠨ ᠪᠣᠯ ᠲᠠᠨ ᠠᠴᠠ ᠭᠤᠶᠤᠶᠠ᠂ ᠡᠵᠡᠨ ᠮᠢᠨᠢ᠂ ᠲᠠ ᠪᠢᠳᠡᠨ ᠲᠡᠢ ᠬᠠᠮᠲᠤ ᠶᠠᠪᠤᠭᠠᠴᠢ᠃ ᠮᠠᠨ ᠤ ᠠᠷᠠᠳ ᠲᠦᠮᠡᠨ ᠦᠨᠡᠬᠡᠷ ᠵᠥᠷᠢᠭᠦᠳ᠂ ᠬᠠᠷᠢᠨ ᠪᠢᠳᠡᠨ ᠦ ᠭᠡᠮ ᠨᠢᠭᠦᠯ ᠢ ᠠᠭᠤᠴᠢᠯᠠᠵᠤ᠂ ᠪᠢᠳᠡᠨ ᠢ ᠥᠪᠡᠷ ᠦᠨ ᠢᠶᠠᠨ ᠡᠵᠡᠮᠰᠢᠯ ᠪᠣᠯᠭᠠᠨ ᠬᠦᠯᠢᠶᠡᠨ ᠠᠪᠤᠨᠠ ᠤᠤ︖》 ᠭᠡᠵᠦ ᠬᠡᠯᠡᠪᠡ᠃
10 ᠶᠣᠬᠣᠸᠠ᠄ 《ᠪᠢ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠭᠡᠷᠡ ᠪᠠᠢᠭᠤᠯᠬᠤ ᠭᠡᠵᠦ ᠪᠠᠢᠨᠠ᠃ ᠪᠦᠬᠦ ᠠᠷᠠᠳ ᠲᠦᠮᠡᠨ ᠦ ᠴᠢᠨᠢ ᠡᠮᠦᠨᠡ ᠪᠢ ᠳᠠᠶᠠᠩ ᠳᠡᠯᠡᠬᠡᠢ ᠶᠢᠨ ᠠᠯᠢ ᠴᠤ ᠤᠯᠤᠰ ᠣᠷᠣᠨ ᠳᠤ ᠲᠣᠬᠢᠶᠠᠯᠳᠤᠭᠠ ᠦᠭᠡᠢ ᠭᠠᠢᠬᠠᠮᠰᠢᠭᠲᠤ ᠦᠢᠯᠡᠰ ᠢ ᠦᠢᠯᠡᠳᠬᠦ ᠪᠣᠯᠣᠨᠠ᠃ ᠡᠷᠭᠢᠨ ᠲᠣᠭᠣᠷᠢᠨ ᠳᠤ ᠴᠢᠨᠢ ᠪᠠᠢᠭᠠ ᠦᠨᠳᠦᠰᠦᠲᠡᠨ ᠪᠦᠭᠦᠳᠡ ᠲᠠ ᠨᠠᠷ ᠤᠨ ᠲᠥᠯᠥᠭᠡ ᠦᠢᠯᠡᠳᠳᠡᠭ ᠦᠢᠯᠡᠰ ᠦᠨ ᠮᠢᠨᠢ ᠠᠶᠤᠮᠰᠢᠭ ᠢ ᠬᠠᠷᠠᠬᠤ ᠪᠣᠯᠣᠨᠠ᠃
11 ᠥᠨᠥᠳᠥᠷ ᠴᠢᠮᠠ ᠳᠤ ᠥᠭᠬᠦ ᠲᠤᠰᠢᠶᠠᠯ ᠢ ᠮᠠᠨᠢ ᠪᠡᠶᠡᠯᠡᠭᠦᠯ᠃ ᠪᠢ ᠴᠢᠨᠦ ᠡᠮᠦᠨᠡ ᠡᠴᠡ ᠠᠮᠣᠷᠢᠴᠤᠳ᠂ ᠺᠠᠨᠠᠨᠴᠤᠳ᠂ ᠾᠢᠲ᠋ᠴᠦᠳ᠂ ᠫᠧᠷᠢᠽᠴᠦᠳ᠂ ᠾᠢᠸᠢᠴᠦᠳ᠂ ᠶᠧᠪᠦ᠋ᠰᠴᠦᠳ ᠢ ᠬᠥᠭᠡᠭᠡᠵᠦ ᠭᠠᠷᠭᠠᠨᠠ᠃ 12 ᠬᠠᠷᠢᠨ ᠴᠢ ᠣᠴᠢᠵᠤ ᠪᠠᠢᠭᠠ ᠭᠠᠵᠠᠷ ᠤᠨ ᠢᠶᠠᠨ ᠰᠠᠭᠤᠭᠠᠯᠢᠴᠢᠳ ᠲᠠᠢ ᠭᠡᠷᠡ ᠦᠯᠦ ᠪᠠᠢᠭᠤᠯᠤᠨ᠂ ᠪᠣᠯᠭᠣᠮᠵᠢᠲᠠᠢ ᠪᠠᠢᠭᠠᠷᠠᠢ᠃ ᠡᠰᠡ ᠲᠡᠭᠡᠪᠡᠯ ᠲᠡᠳᠡ ᠲᠠ ᠨᠠᠷ ᠤᠨ ᠳᠤᠮᠳᠠᠬᠢ ᠤᠷᠠᠬᠠ ᠪᠣᠯᠣᠨᠠ᠃ 13 ᠴᠢ ᠲᠡᠳᠡᠨ ᠦ ᠲᠠᠬᠢᠯ ᠤᠨ ᠰᠢᠷᠡᠭᠡ ᠨᠦᠭᠦᠳ ᠢ ᠨᠤᠷᠠᠭᠠᠨ᠂ ᠴᠢᠯᠠᠭᠤᠨ ᠪᠠᠭᠠᠨᠠ ᠨᠤᠭᠤᠳ ᠢ ᠨᠢ ᠪᠤᠲᠠᠯᠵᠤ᠂ ᠠᠱᠧᠷᠠ ᠤᠨ ᠱᠣᠩ ᠤᠳ ᠢ ᠨᠢ ᠴᠠᠪᠴᠢᠬᠤ ᠶᠣᠰᠣᠲᠠᠢ᠃ 14 ᠴᠢ ᠥᠭᠡᠷᠡ ᠪᠤᠷᠬᠠᠳ ᠲᠤ ᠮᠥᠷᠭᠥᠵᠦ ᠪᠣᠯᠬᠤ ᠦᠭᠡᠢ᠃ ᠤᠴᠢᠷ ᠨᠢ ᠶᠣᠬᠣᠸᠠ ᠪᠣᠯ ᠵᠢᠲᠥᠭᠡᠴᠢ ᠨᠡᠷᠡ ᠲᠠᠢ ᠪᠥᠭᠡᠳ ᠵᠢᠲᠥᠭᠡ ᠲᠠᠢ ᠪᠤᠷᠬᠠᠨ ᠮᠥᠨ᠃ 15 ᠴᠢ ᠲᠡᠷᠡ ᠭᠠᠵᠠᠷ ᠤᠨ ᠰᠠᠭᠤᠭᠠᠯᠢᠴᠢᠳ ᠲᠠᠢ ᠭᠡᠷᠡ ᠦᠯᠦ ᠪᠠᠢᠭᠤᠯᠤᠨ᠂ ᠪᠣᠯᠭᠣᠮᠵᠢᠲᠠᠢ ᠪᠠᠢᠭᠠᠷᠠᠢ᠃ ᠲᠡᠳᠡ ᠪᠤᠷᠬᠠᠳ ᠢᠶᠠᠨ ᠳᠠᠭᠠᠨ ᠵᠠᠪᠬᠠᠢᠷᠠᠵᠤ᠂ ᠪᠤᠷᠬᠠᠳ ᠲᠠᠭᠠᠨ ᠲᠠᠬᠢᠯ ᠡᠷᠭᠦᠳᠡᠭ ᠪᠣᠯᠬᠣᠷ ᠬᠡᠨ ᠨᠢᠭᠡ ᠨᠢ ᠴᠢᠮᠠᠶᠢ ᠤᠷᠢᠭᠰᠠᠨ ᠢᠶᠠᠷ ᠴᠢ ᠲᠡᠷᠡ ᠲᠠᠬᠢᠯ ᠠᠴᠠ ᠨᠢ ᠢᠳᠡᠭᠦᠵᠡᠢ᠂ 16 ᠮᠥᠨ ᠲᠡᠳᠡᠨ ᠦ ᠥᠬᠢᠳ ᠢ ᠬᠥᠪᠡᠭᠦᠳ ᠲᠡᠢ ᠪᠡᠨ ᠭᠡᠷᠯᠡᠭᠦᠯᠬᠦ ᠪᠣᠯᠣᠭᠤᠵᠠᠢ᠂ ᠪᠠᠰᠠ ᠥᠬᠢᠳ ᠨᠢ ᠪᠤᠷᠬᠠᠳ ᠢᠶᠠᠨ ᠳᠠᠭᠠᠨ ᠵᠠᠪᠬᠠᠢᠷᠠᠳᠠᠭ ᠪᠣᠯᠬᠣᠷ ᠬᠥᠪᠡᠭᠦᠳ ᠢ ᠴᠢᠨᠢ ᠴᠤ ᠪᠤᠷᠬᠠᠳ ᠲᠠᠢ ᠪᠠᠨ ᠵᠠᠪᠬᠠᠢᠷᠠᠭᠤᠯᠬᠤ ᠪᠣᠯᠣᠭᠤᠵᠠᠢ᠃
17 ᠴᠢ ᠴᠢᠳᠬᠤᠮᠠᠯ ᠪᠤᠷᠬᠠᠨ ᠪᠦᠦ ᠪᠦᠲᠦᠭᠡ᠃
18 ᠴᠢ ᠢᠰᠭᠡᠭᠡ ᠦᠭᠡᠢ ᠪᠣᠣᠪᠣ ᠶᠢᠨ ᠪᠠᠶᠠᠷ ᠢ ᠰᠠᠬᠢ᠃ ᠠᠪᠢᠪ ᠰᠠᠷᠠ ᠳᠤ ᠶᠧᠵᠢᠫᠲ ᠡᠴᠡ ᠭᠠᠷᠤᠭᠰᠠᠨ ᠲᠤᠯᠠ ᠴᠢ ᠮᠢᠨᠦ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠲᠤᠰ ᠰᠠᠷᠠ ᠶᠢᠨ ᠲᠣᠪᠯᠠᠭᠰᠠᠨ ᠦᠶᠡ ᠳᠦ ᠳᠣᠯᠣᠭᠠᠨ ᠡᠳᠦᠷ ᠦᠨ ᠲᠤᠷᠰᠢ ᠢᠰᠭᠡᠭᠡ ᠦᠭᠡᠢ ᠪᠣᠣᠪᠣ ᠢᠳᠡ᠃
19 ᠤᠮᠠᠢ ᠶᠢᠨ ᠠᠩ᠋ᠬᠠᠨ ᠤ ᠦᠷᠡ ᠪᠣᠯᠭᠠᠨ ᠮᠢᠨᠦᠬᠢ᠂ ᠮᠠᠯ ᠰᠦᠷᠦᠭ ᠦᠨ ᠴᠢᠨᠢ ᠦᠬᠡᠷ ᠬᠣᠨᠢᠨ ᠤ ᠠᠩ᠋ᠬᠠᠨ ᠤ ᠡᠷᠡ ᠲᠥᠯ ᠴᠤ ᠠᠳᠠᠯᠢ᠃ 20 ᠭᠡᠪᠡᠴᠦ ᠡᠯᠵᠢᠭᠡᠨ ᠦ ᠠᠩ᠋ᠬᠠᠨ ᠤ ᠲᠥᠯ ᠢ ᠬᠤᠷᠠᠭᠠ ᠪᠠᠷ ᠵᠣᠯᠢᠬᠤ ᠶᠣᠰᠣᠲᠠᠢ᠃ ᠬᠡᠷᠪᠡ ᠵᠣᠯᠢᠬᠤ ᠦᠭᠡᠢ ᠭᠡᠪᠡᠯ ᠲᠡᠭᠦᠨ ᠦ ᠬᠦᠵᠦᠭᠦᠦ ᠶᠢ ᠬᠤᠭᠤᠯ᠃ ᠴᠢ ᠬᠥᠪᠡᠭᠦᠳ ᠦᠨ ᠢᠶᠠᠨ ᠤᠤᠭᠠᠨ ᠪᠦᠷᠢ ᠶᠢ ᠴᠤ ᠵᠣᠯᠢᠬᠤ ᠶᠣᠰᠣᠲᠠᠢ᠃
21 ᠴᠢ ᠵᠢᠷᠭᠤᠭᠠᠨ ᠡᠳᠦᠷ ᠠᠵᠢᠯᠯᠠᠵᠤ᠂ ᠳᠣᠯᠣᠳᠠᠬᠢ ᠡᠳᠦᠷ ᠲᠦ ᠠᠮᠠᠷᠠ᠃ ᠭᠠᠵᠠᠷ ᠬᠠᠭᠠᠯᠬᠤ᠂ ᠤᠷᠭᠤᠴᠠ ᠬᠤᠷᠢᠶᠠᠬᠤ ᠦᠶᠡ ᠳᠦ ᠴᠤ ᠠᠮᠠᠷᠠᠬᠤ ᠶᠣᠰᠣᠲᠠᠢ᠃ 22 ᠳᠣᠯᠣᠭᠠᠨ ᠳᠣᠯᠣᠭᠠ ᠬᠣᠨᠣᠭ ᠤᠨ ᠪᠠᠶᠠᠷ ᠢ ᠤᠯᠠᠭᠠᠨ ᠪᠤᠭᠤᠳᠠᠢ ᠶᠢᠨ ᠤᠷᠭᠤᠴᠠ ᠶᠢᠨ ᠠᠩ᠋ᠬᠠᠨ ᠤ ᠦᠷᠡ ᠪᠡᠷ ᠲᠡᠮᠳᠡᠭᠯᠡᠵᠦ᠂ ᠤᠷᠭᠤᠴᠠ ᠬᠤᠷᠢᠶᠠᠯᠲᠠ ᠶᠢᠨ ᠪᠠᠶᠠᠷ ᠢ ᠵᠢᠯ ᠤᠨ ᠡᠴᠦᠰ ᠲᠦ ᠲᠡᠮᠳᠡᠭᠯᠡ᠃ 23 ᠲᠠᠨ ᠤ ᠡᠷᠡᠴᠦᠳ ᠪᠦᠭᠦᠳᠡ ᠵᠢᠯ ᠳᠤ ᠭᠤᠷᠪᠠ ᠤᠳᠠᠭᠠ ᠢᠰᠷᠧᠯ ᠤᠨ ᠪᠤᠷᠬᠠᠨ᠂ ᠡᠵᠡᠨ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠦᠵᠡᠭᠳᠡᠬᠦ ᠤᠴᠢᠷᠲᠠᠢ᠃ 24 ᠪᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠢ ᠴᠢᠨᠦ ᠤᠷᠳᠤ ᠠᠴᠠ ᠬᠥᠭᠡᠭᠡᠵᠦ᠂ ᠬᠢᠯᠢ ᠬᠢᠵᠠᠭᠠᠷ ᠢ ᠴᠢᠨᠢ ᠲᠡᠯᠡᠬᠦ ᠪᠥᠭᠡᠳ ᠵᠢᠯ ᠳᠤ ᠭᠤᠷᠪᠠ ᠤᠳᠠᠭᠠ ᠶᠣᠬᠣᠸᠠ ᠪᠤᠷᠬᠠᠨ ᠤ ᠪᠠᠨ ᠡᠮᠦᠨᠡ ᠦᠵᠡᠭᠳᠡᠬᠦ ᠪᠡᠷ ᠢᠷᠡᠬᠦ ᠦᠶᠡ ᠳᠦ ᠴᠢᠨᠢ ᠬᠡᠨ ᠴᠤ ᠭᠠᠵᠠᠷ ᠨᠤᠲᠤᠭ ᠲᠤ ᠴᠢᠨᠢ ᠰᠢᠨᠤᠬᠠᠢᠷᠠᠬᠤ ᠦᠭᠡᠢ ᠶᠤᠮ᠃
25 ᠴᠢ ᠨᠠᠳᠠ ᠳᠤ ᠲᠠᠬᠢᠯ ᠤᠨ ᠴᠢᠰᠤ ᠶᠢ ᠢᠰᠭᠡᠭᠰᠡᠨ ᠵᠦᠢᠯᠡᠰ ᠲᠡᠢ ᠬᠠᠮᠲᠤ ᠡᠷᠭᠦᠵᠦ ᠪᠣᠯᠬᠤ ᠦᠭᠡᠢ᠂ ᠭᠡᠲᠦᠯᠭᠡᠭᠰᠡᠨ ᠦ ᠪᠠᠶᠠᠷ ᠤᠨ ᠲᠠᠬᠢᠯ ᠢ ᠥᠷᠯᠥᠭᠡ ᠪᠣᠯᠲᠠᠯᠠ ᠪᠦᠦ ᠦᠯᠡᠳᠡᠭᠡ᠃ 26 ᠴᠢ ᠶᠣᠬᠣᠸᠠ ᠪᠤᠷᠬᠠᠨ ᠤ ᠪᠠᠨ ᠥᠷᠭᠥᠭᠡᠨ ᠳᠦ ᠭᠠᠵᠠᠷ ᠤᠨ ᠢᠶᠠᠨ ᠠᠩ᠋ᠬᠠᠨ ᠤ ᠦᠷᠡ ᠵᠢᠮᠢᠰ ᠤᠨ ᠳᠡᠭᠡᠵᠢ ᠶᠢ ᠠᠪᠴᠢᠷᠠ᠃ ᠴᠢ ᠢᠰᠢᠭᠡ ᠶᠢ ᠡᠬᠡ ᠶᠢᠨ ᠬᠢᠨᠢ ᠰᠦ᠋ ᠳᠤ ᠪᠦᠦ ᠴᠢᠨᠠ》 ᠭᠡᠪᠡ᠃
27 ᠶᠣᠬᠣᠸᠠ ᠮᠣᠰᠧ ᠳᠤ᠄ 《ᠴᠢ ᠡᠳᠡᠭᠡᠷ ᠦᠭᠡᠰ ᠢ ᠪᠢᠴᠢᠵᠦ ᠠᠪ᠃ ᠪᠢ ᠡᠳᠡᠭᠡᠷ ᠦᠭᠡᠰ ᠦᠨ ᠦᠨᠳᠦᠰᠦᠨ ᠳᠡᠭᠡᠷᠡ ᠴᠢᠮᠠ ᠲᠠᠢ ᠪᠣᠯᠣᠨ ᠢᠰᠷᠧᠯ ᠲᠠᠢ ᠭᠡᠷᠡ ᠪᠠᠢᠭᠤᠯᠤᠭᠰᠠᠨ ᠶᠤᠮ》 ᠭᠡᠪᠡ᠃ 28 ᠮᠣᠰᠧ ᠲᠡᠨᠳᠡ ᠶᠣᠬᠣᠸᠠ ᠲᠠᠢ ᠬᠠᠮᠲᠤ ᠳᠥᠴᠢᠨ ᠡᠳᠦᠷ ᠳᠥᠴᠢᠨ ᠰᠥᠨᠢ ᠪᠠᠢᠭᠰᠠᠨ ᠪᠥᠭᠡᠳ ᠪᠣᠣᠪᠣ ᠴᠤ ᠢᠳᠡᠭᠰᠡᠨ ᠦᠭᠡᠢ᠂ ᠤᠰᠤ ᠴᠤ ᠤᠤᠭᠤᠭᠰᠠᠨ ᠦᠭᠡᠢ᠃ ᠶᠣᠬᠣᠸᠠ 32 ᠬᠠᠪᠲᠠᠰᠤᠨ ᠳᠡᠭᠡᠷᠡ ᠭᠡᠷᠡ ᠶᠢᠨ ᠦᠭᠡᠰ ᠪᠣᠯᠬᠤ ᠠᠷᠪᠠᠨ ᠬᠠᠤᠯᠢ ᠶᠢ ᠪᠢᠴᠢᠭᠰᠡᠨ ᠪᠠᠢᠯᠠ᠃
ᠮᠣᠰᠧ ᠶᠢᠨ ᠴᠢᠷᠠᠢ ᠭᠡᠷᠡᠯᠲᠦᠪᠡ
29 ᠮᠣᠰᠧ ᠰᠢᠨᠠᠢ ᠠᠭᠤᠯᠠᠨ ᠠᠴᠠ ᠪᠠᠭᠤᠵᠤ ᠢᠷᠡᠯᠡ᠃ ᠲᠡᠷᠡ ᠪᠠᠭᠤᠵᠤ ᠢᠷᠡᠬᠦ ᠳᠦ᠂ ᠭᠠᠷ ᠲᠤᠨᠢ ᠬᠣᠶᠠᠷ ᠭᠡᠷᠡᠴᠢᠯᠡᠯ ᠦᠨ ᠬᠠᠪᠲᠠᠰᠤ ᠪᠠᠢᠪᠠ᠃ ᠶᠣᠬᠣᠸᠠ ᠲᠠᠢ ᠶᠠᠷᠢᠭᠰᠠᠨ ᠠᠴᠠ ᠪᠣᠯᠵᠤ ᠨᠢᠭᠤᠷ ᠨᠢ ᠭᠡᠷᠡᠯᠲᠦᠵᠦ ᠪᠤᠢ ᠶᠢ ᠮᠣᠰᠧ ᠮᠡᠳᠡᠭᠰᠡᠨ ᠦᠭᠡᠢ᠃ 30 ᠠᠷᠣᠨ ᠪᠠ ᠢᠰᠷᠧᠯᠴᠦᠳ ᠪᠦᠭᠦᠳᠡ ᠮᠣᠰᠧ ᠶᠢ ᠬᠠᠷᠠᠬᠤ ᠳᠤ᠂ ᠨᠢᠭᠤᠷ ᠨᠢ ᠭᠡᠷᠡᠯᠲᠦᠵᠦ ᠪᠠᠢᠯᠠ᠂ ᠲᠡᠳᠡ ᠨᠠᠷ ᠲᠡᠭᠦᠨ ᠳᠦ ᠣᠢᠷᠠᠲᠤᠬᠤ ᠠᠴᠠ ᠠᠶᠤᠵᠤ ᠪᠠᠢᠬᠤ ᠳᠤ᠂ 31 ᠮᠣᠰᠧ ᠲᠡᠳᠡᠨ ᠢ ᠳᠠᠭᠤᠳᠠᠪᠠ᠃ ᠠᠷᠣᠨ ᠪᠣᠯᠣᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠤ ᠤᠳᠤᠷᠢᠳᠤᠭᠴᠢᠳ ᠪᠦᠭᠦᠳᠡᠭᠡᠷ ᠢᠶᠡᠨ ᠲᠡᠭᠦᠨ ᠤᠷᠤᠭᠤ ᠢᠷᠡᠭᠰᠡᠨ ᠳᠦ᠂ ᠮᠣᠰᠧ ᠲᠡᠳᠡᠨ ᠲᠡᠢ ᠶᠠᠷᠢᠯᠴᠠᠪᠠ᠃ 32 ᠡᠭᠦᠨ ᠦ ᠳᠠᠷᠠᠭᠠ ᠢᠰᠷᠧᠯᠴᠦᠳ ᠪᠦᠭᠦᠳᠡᠭᠡᠷ ᠢᠶᠡᠨ ᠲᠡᠭᠦᠨ ᠳᠦ ᠣᠢᠷᠠᠲᠤᠨ ᠣᠴᠢᠬᠤ ᠳᠤ᠂ ᠮᠣᠰᠧ ᠰᠢᠨᠠᠢ ᠠᠭᠤᠯᠠᠨ ᠳᠡᠭᠡᠷᠡ ᠶᠣᠬᠣᠸᠠ ᠶᠢᠨ ᠥᠪᠡᠷ ᠲᠤᠨᠢ ᠠᠢᠯᠠᠳᠤᠭᠰᠠᠨ ᠪᠣᠯᠭᠠᠨ ᠢ ᠲᠡᠳᠡᠨ ᠳᠦ ᠵᠠᠷᠯᠢᠭ ᠪᠣᠯᠭᠠᠨ ᠥᠭᠭᠥᠭᠰᠡᠨ ᠪᠠᠢᠯᠠ᠃ 33 ᠮᠣᠰᠧ ᠲᠡᠳᠡᠨ ᠳᠦ ᠶᠠᠷᠢᠵᠤ ᠳᠠᠭᠤᠰᠤᠭᠠᠳ ᠨᠢᠭᠤᠷ ᠢᠶᠠᠨ ᠪᠦᠲᠡᠭᠡᠯᠭᠡ ᠪᠡᠷ ᠪᠦᠲᠡᠭᠡᠪᠡ᠃ 34 ᠬᠠᠷᠢᠨ ᠮᠣᠰᠧ ᠶᠣᠬᠣᠸᠠ ᠲᠠᠢ ᠶᠠᠷᠢᠬᠤ ᠪᠠᠷ ᠡᠮᠦᠨᠡ ᠨᠢ ᠣᠴᠢᠪᠠᠯ᠂ ᠭᠠᠷᠬᠤ ᠬᠦᠷᠲᠡᠯᠡ ᠪᠡᠨ ᠪᠦᠲᠡᠭᠡᠯᠭᠡ ᠪᠡᠨ ᠠᠪᠳᠠᠭ ᠪᠠᠢᠭᠰᠠᠨ᠃ ᠲᠡᠷᠡ ᠭᠠᠷᠴᠤ ᠢᠷᠡᠭᠡᠳ ᠶᠠᠭᠤ ᠲᠤᠰᠢᠶᠠᠭᠰᠠᠨ ᠢ ᠨᠢ ᠢᠰᠷᠧᠯᠴᠦᠳ ᠲᠦ ᠶᠠᠷᠢᠬᠤ ᠳᠤ᠂ 35 ᠲᠡᠭᠦᠨ ᠦ ᠨᠢᠭᠤᠷ ᠭᠡᠷᠡᠯᠲᠦᠵᠦ ᠪᠠᠢᠭᠠ ᠶᠢ ᠢᠰᠷᠧᠯᠴᠦᠳ ᠬᠠᠷᠠᠳᠠᠭ ᠪᠠᠢᠪᠠ᠃ ᠲᠡᠢᠮᠦ ᠡᠴᠡ ᠶᠣᠬᠣᠸᠠ ᠲᠠᠢ ᠶᠠᠷᠢᠯᠴᠠᠬᠤ ᠪᠠᠷ ᠣᠷᠣᠬᠤ ᠪᠣᠯᠲᠠᠯᠠ ᠮᠣᠰᠧ ᠨᠢᠭᠤᠷ ᠢᠶᠠᠨ ᠳᠠᠬᠢᠨ ᠪᠦᠲᠡᠭᠡᠳᠡᠭ ᠠᠵᠢ᠃