ᠭᠡᠲᠦᠯᠦᠯ ᠭᠤᠴᠢᠨ ᠭᠤᠷᠪᠠ
1 ᠶᠣᠬᠣᠸᠠ ᠮᠣᠰᠧ ᠳᠤ ᠠᠢᠯᠠᠳᠤᠨ᠄ 《ᠴᠢ ᠶᠧᠵᠢᠫᠲ ᠡᠴᠡ ᠭᠠᠷᠭᠠᠭᠰᠠᠨ ᠠᠷᠠᠳ ᠲᠦᠮᠡᠨ ᠦ ᠪᠠᠨ ᠬᠠᠮᠲᠤ ᠡ᠊ᠨᠳᠡ ᠡᠴᠡ ᠬᠥᠳᠡᠯᠦᠨ ᠶᠠᠪᠤᠵᠤ᠂ ᠮᠢᠨᠦ ᠠᠪᠷᠠᠬᠠᠮ᠂ ᠢᠰᠠᠺ᠂ ᠶᠠᠺᠣᠪ ᠤᠨ ᠦᠷᠡ ᠤᠳᠤᠮ ᠳᠤ ᠥᠭᠭᠥᠨᠡ ᠭᠡᠵᠦ ᠠᠮᠠᠯᠠᠭᠰᠠᠨ ᠨᠤᠲᠤᠭ ᠤᠷᠤᠭᠤ ᠣᠴᠢ᠃ 2 ᠪᠢ ᠴᠢᠨᠦ ᠡᠮᠦᠨᠡ ᠡᠯᠴᠢ ᠪᠠᠨ ᠶᠠᠪᠤᠭᠤᠯᠵᠤ᠂ ᠺᠠᠨᠠᠨᠴᠤᠳ᠂ ᠠᠮᠣᠷᠢᠴᠤᠳ᠂ ᠾᠢᠲ᠋ᠴᠦᠳ᠂ ᠫᠧᠷᠢᠽᠴᠦᠳ᠂ ᠾᠢᠸᠢᠴᠦᠳ᠂ ᠶᠧᠪᠦ᠋ᠰᠴᠦᠳ ᠢ ᠬᠥᠭᠡᠭᠡᠬᠦ ᠪᠥᠭᠡᠳ 3 ᠲᠠ ᠨᠠᠷ ᠰᠦ᠋᠂ ᠪᠠᠯ ᠤᠷᠤᠰᠤᠭᠰᠠᠨ ᠨᠤᠲᠤᠭ ᠲᠤ ᠬᠦᠷᠬᠦ ᠪᠣᠯᠣᠨᠠ᠃ ᠭᠡᠪᠡᠴᠦ ᠪᠢ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠶᠠᠪᠤᠬᠤ ᠦᠭᠡᠢ᠃ ᠲᠠ ᠨᠠᠷ ᠵᠥᠷᠢᠭᠦᠳ ᠠᠷᠠᠳ ᠲᠦᠮᠡᠨ ᠪᠣᠯᠬᠣᠷ ᠵᠠᠮ ᠳᠤ ᠴᠢᠨᠢ ᠪᠢ ᠲᠠ ᠨᠠᠷ ᠢ ᠬᠥᠨᠥᠭᠡᠴᠢᠬᠡᠬᠦ ᠪᠤᠢ》 ᠭᠡᠪᠡ᠃
4 ᠠᠷᠠᠳ ᠲᠦᠮᠡᠨ ᠡᠨᠡ ᠬᠠᠲᠠᠭᠤ ᠦᠭᠡ ᠶᠢ ᠰᠣᠨᠣᠰᠣᠭᠠᠳ ᠬᠠᠷᠠᠮᠰᠠᠨ ᠭᠠᠰᠢᠭᠤᠳᠠᠵᠤ᠂ ᠬᠡᠨ ᠨᠢ ᠴᠤ ᠭᠣᠶᠣᠯᠠᠯ ᠴᠢᠮᠡᠭᠯᠡᠯ ᠢᠶᠡᠨ ᠵᠡᠭᠦᠭᠰᠡᠨ ᠦᠭᠡᠢ᠃ 5 ᠤᠴᠢᠷ ᠨᠢ ᠶᠣᠬᠣᠸᠠ ᠮᠣᠰᠧ ᠳᠤ᠄ 《ᠢᠰᠷᠧᠯᠴᠦᠳ ᠲᠦ᠄ 〈ᠲᠠ ᠨᠠᠷ ᠵᠥᠷᠢᠭᠦᠳ ᠠᠷᠠᠳ ᠲᠦᠮᠡᠨ ᠶᠤᠮ᠃ ᠪᠢ ᠭᠠᠭᠴᠠ ᠬᠣᠷᠣᠮ ᠤᠨ ᠲᠡᠳᠦᠢ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠶᠠᠪᠤᠪᠠᠯ᠂ ᠲᠠ ᠨᠠᠷ ᠢ ᠤᠰᠠᠳᠬᠠᠬᠤ ᠪᠤᠢ᠃ ᠣᠳᠣ ᠲᠠ ᠨᠠᠷ ᠭᠣᠶᠣᠯᠠᠯ ᠴᠢᠮᠡᠭᠯᠡᠯ ᠢᠶᠡᠨ ᠲᠠᠢᠯ᠃ ᠪᠢ ᠲᠠ ᠨᠠᠷ ᠢ ᠶᠠᠭᠠᠬᠢᠬᠤ ᠪᠠᠨ ᠰᠢᠢᠳᠦᠨᠡ〉 ᠭᠡᠵᠦ ᠬᠡᠯᠡ》 ᠬᠡᠮᠡᠨ ᠠᠢᠯᠠᠳᠤᠭᠰᠠᠨ ᠶᠤᠮ᠃ 6 ᠡᠢᠮᠦ ᠡᠴᠡ ᠢᠰᠷᠧᠯᠴᠦᠳ ᠬᠣᠷᠧᠪ ᠠᠭᠤᠯᠠᠨ ᠳᠤ ᠭᠣᠶᠣᠯᠠᠯ ᠴᠢᠮᠡᠭᠯᠡᠯ ᠢᠶᠡᠨ ᠲᠠᠢᠯᠤᠭᠰᠠᠨ ᠪᠠᠢᠨᠠ᠃
ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ
7 ᠮᠣᠰᠧ ᠮᠠᠢᠬᠠᠨ ᠢᠶᠠᠨ ᠠᠪᠴᠤ᠂ ᠬᠤᠸᠠᠷᠠᠨ ᠤ ᠭᠠᠳᠠᠨᠠ᠂ ᠬᠤᠸᠠᠷᠠᠨ ᠠᠴᠠ ᠵᠠᠢᠳᠠᠭᠤ ᠪᠠᠷᠢᠵᠤ᠂ ᠲᠡᠭᠦᠨ ᠢ ᠪᠠᠨ ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠭᠡᠪᠡ᠃ ᠶᠣᠬᠣᠸᠠ ᠶᠢ ᠬᠠᠢᠳᠠᠭ ᠬᠥᠮᠦᠨ ᠪᠦᠷᠢ ᠬᠤᠸᠠᠷᠠᠨ ᠤ ᠭᠠᠳᠠᠨᠠ ᠪᠠᠢᠭᠠ ᠡᠨᠡ ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠲᠤ ᠣᠴᠢᠳᠠᠭ ᠪᠣᠯᠪᠠ᠃ 8 ᠮᠣᠰᠧ ᠬᠤᠸᠠᠷᠠᠨ ᠠᠴᠠ ᠭᠠᠷᠴᠤ ᠴᠠᠴᠠᠷ ᠤᠷᠤᠭᠤ ᠶᠠᠪᠤᠪᠠᠯ᠂ ᠠᠷᠠᠳ ᠲᠦᠮᠡᠨ ᠪᠦᠭᠦᠳᠡᠭᠡᠷ ᠢᠶᠡᠨ ᠪᠣᠰᠣᠨ ᠬᠥᠮᠦᠨ ᠪᠦᠷᠢ ᠮᠠᠢᠬᠠᠨ ᠤ ᠪᠠᠨ ᠡᠭᠦᠳᠡᠨ ᠳᠦ ᠵᠣᠭᠰᠣᠵᠤ᠂ ᠮᠣᠰᠧ ᠶᠢ ᠴᠠᠴᠠᠷ ᠲᠤ ᠣᠷᠣᠲᠠᠯᠠ ᠠᠷᠤ ᠠᠴᠠ ᠨᠢ ᠬᠠᠷᠠᠭᠰᠠᠭᠠᠷ ᠪᠠᠢᠳᠠᠭ᠃ 9 ᠮᠣᠰᠧ ᠴᠠᠴᠠᠷ ᠲᠤ ᠣᠷᠣᠪᠠᠯ ᠡᠭᠦᠯᠡᠨ ᠪᠠᠭᠠᠨᠠ ᠪᠠᠭᠤᠨ ᠢᠷᠡᠵᠦ᠂ ᠠᠰᠠᠷ ᠤᠨ ᠡᠭᠦᠳᠡᠨ ᠳᠦ ᠲᠣᠭᠲᠠᠭᠠᠳ ᠶᠣᠬᠣᠸᠠ ᠮᠣᠰᠧ ᠲᠠᠢ ᠶᠠᠷᠢᠳᠠᠭ᠃ 10 ᠴᠠᠴᠠᠷ ᠤᠨ ᠡᠭᠦᠳᠡᠨ ᠳᠦ ᠡᠭᠦᠯᠡᠨ ᠪᠠᠭᠠᠨᠠ ᠲᠣᠭᠲᠠᠬᠤ ᠶᠢ ᠬᠠᠷᠠᠪᠠᠯ ᠠᠷᠠᠳ ᠲᠦᠮᠡᠨ ᠪᠦᠭᠦᠳᠡᠭᠡᠷ ᠢᠶᠡᠨ ᠪᠣᠰᠴᠤ᠂ ᠬᠥᠮᠦᠨ ᠪᠦᠷᠢ ᠮᠠᠢᠬᠠᠨ ᠤ ᠪᠠᠨ ᠡᠭᠦᠳᠡᠨ ᠳᠦ ᠮᠥᠷᠭᠥᠳᠡᠭ ᠪᠠᠢᠪᠠ᠃ 11 ᠶᠣᠬᠣᠸᠠ ᠮᠣᠰᠧ ᠲᠠᠢ ᠨᠢᠭᠤᠷ ᠨᠢᠭᠤᠷ ᠢᠶᠠᠷ ᠢᠶᠠᠨ ᠲᠤᠯᠤᠨ ᠶᠠᠷᠢᠳᠠᠭ ᠨᠢ ᠬᠥᠮᠦᠨ ᠠᠨᠳᠠ ᠨᠥᠬᠥᠷ ᠲᠡᠢ ᠪᠡᠨ ᠶᠠᠷᠢᠵᠤ ᠪᠠᠢᠳᠠᠭ ᠲᠠᠢ ᠠᠳᠠᠯᠢ ᠪᠠᠢᠯᠠ᠃ ᠮᠣᠰᠧ ᠬᠤᠸᠠᠷᠠᠨ ᠤᠷᠤᠭᠤ ᠪᠤᠴᠠᠳᠠᠭ᠂ ᠬᠠᠷᠢᠨ ᠲᠡᠭᠦᠨ ᠦ ᠵᠠᠯᠠᠭᠤ ᠲᠤᠰᠠᠯᠠᠭᠴᠢ᠂ ᠨᠦᠨ ᠦ ᠬᠦᠦ ᠶᠣᠱᠦ᠋ᠶᠠ ᠮᠠᠢᠬᠠᠨ ᠠᠴᠠ ᠰᠠᠯᠳᠠᠭ ᠦᠭᠡᠢ ᠪᠠᠢᠪᠠ᠃
ᠡᠵᠡᠨ ᠦ ᠴᠣᠭ ᠵᠢᠪᠬᠤᠯᠠᠩ ᠮᠣᠰᠧ ᠳᠤ ᠬᠠᠷᠠᠭᠳᠠᠪᠠ
12 ᠮᠣᠰᠧ ᠶᠣᠬᠣᠸᠠ ᠳᠤ᠄ 《ᠬᠠᠷᠠᠭᠠᠴᠢ᠂ ᠲᠠ ᠨᠠᠳᠠ ᠳᠤ 〈ᠡᠨᠡ ᠠᠷᠠᠳ ᠲᠦᠮᠡᠨ ᠢ ᠤᠳᠤᠷᠢᠳ〉 ᠭᠡᠵᠦ ᠠᠢᠯᠠᠳᠳᠠᠭ ᠠᠲᠠᠯᠠ ᠪᠠᠨ ᠨᠠᠳᠠ ᠲᠠᠢ ᠬᠠᠮᠲᠤ ᠬᠡᠨ ᠢ ᠶᠠᠪᠤᠭᠤᠯᠬᠤ ᠪᠠᠨ ᠨᠠᠳᠠ ᠳᠤ ᠮᠡᠳᠡᠭᠦᠯᠦᠭᠡ ᠦᠭᠡᠢ᠃ ᠬᠠᠷᠢᠨ ᠲᠠ᠄ 〈ᠪᠢ ᠴᠢᠮᠠᠶᠢ ᠨᠡᠷᠡ ᠪᠡᠷ ᠴᠢᠨᠢ ᠮᠡᠳᠡᠨᠡ᠃ ᠴᠢ ᠮᠢᠨᠦ ᠮᠡᠯᠮᠡᠢ ᠳᠦ ᠲᠠᠭᠠᠯᠠᠯ ᠢ ᠣᠯᠣᠭᠰᠠᠨ〉 ᠭᠡᠵᠦ ᠠᠢᠯᠠᠳᠤᠭᠰᠠᠨ ᠤᠴᠢᠷ 13 ᠣᠳᠣ ᠲᠠᠨ ᠠᠴᠠ ᠭᠤᠶᠤᠶᠠ᠃ ᠬᠡᠷᠪᠡ ᠪᠢ ᠲᠠᠨ ᠤ ᠮᠡᠯᠮᠡᠢ ᠳᠦ ᠲᠠᠭᠠᠯᠠᠯ ᠢ ᠣᠯᠣᠭᠰᠠᠨ ᠪᠣᠯ᠂ ᠥᠪᠡᠷ ᠦᠨ ᠢᠶᠠᠨ ᠰᠠᠨᠠᠭᠠ ᠶᠢ ᠨᠠᠳᠠ ᠳᠤ ᠮᠡᠳᠡᠭᠦᠯᠦᠭᠡᠴᠢ᠂ ᠪᠢ ᠲᠠᠨ ᠢ ᠮᠡᠳᠡᠵᠦ᠂ ᠲᠠᠨ ᠤ ᠮᠡᠯᠮᠡᠢ ᠳᠦ ᠲᠠᠭᠠᠯᠠᠯ ᠢ ᠣᠯᠬᠤ ᠳᠤᠷᠠᠲᠠᠢ᠃ ᠡᠨᠡ ᠦᠨᠳᠦᠰᠦᠲᠡᠨ ᠲᠠᠨ ᠤ ᠠᠷᠠᠳ ᠲᠦᠮᠡᠨ ᠭᠡᠳᠡᠭ ᠢ ᠴᠤ ᠰᠠᠨᠠᠭᠠᠴᠢ》 ᠭᠡᠪᠡ᠃ 14 ᠶᠣᠬᠣᠸᠠ ᠬᠠᠷᠢᠭᠤ ᠳᠤᠨᠢ᠄ 《ᠮᠢᠨᠦ ᠣᠷᠣᠰᠢᠬᠤᠢ ᠴᠢᠮᠠ ᠲᠠᠢ ᠬᠠᠮᠲᠤ ᠶᠠᠪᠤᠨᠠ᠂ ᠴᠢ ᠰᠠᠨᠠᠭᠠ ᠠᠮᠤᠷ ᠪᠠᠢᠭᠠᠷᠠᠢ》 ᠭᠡᠬᠦ ᠳᠦ᠂ 15 ᠮᠣᠰᠧ᠄ 《ᠬᠡᠷᠪᠡ ᠲᠠᠨ ᠤ ᠣᠷᠣᠰᠢᠬᠤᠢ ᠪᠢᠳᠡᠨ ᠲᠡᠢ ᠬᠠᠮᠲᠤ ᠶᠠᠪᠤᠬᠤ ᠦᠭᠡᠢ ᠪᠣᠯ᠂ ᠪᠢᠳᠡᠨ ᠢ ᠡ᠊ᠨᠳᠡ ᠡᠴᠡ ᠪᠦᠦ ᠶᠠᠪᠤᠭᠤᠯᠤᠭᠠᠴᠢ᠃ 16 ᠲᠠ ᠬᠠᠮᠲᠤ ᠶᠠᠪᠤᠬᠤ ᠦᠭᠡᠢ ᠪᠣᠯ᠂ ᠪᠢ ᠪᠣᠯᠣᠨ ᠲᠠᠨ ᠤ ᠠᠷᠠᠳ ᠲᠦᠮᠡᠨ ᠲᠠᠨ ᠤ ᠮᠡᠯᠮᠡᠢ ᠳᠦ ᠲᠠᠭᠠᠯᠠᠯ ᠣᠯᠣᠭᠰᠠᠨ ᠭᠡᠳᠡᠭ ᠢ ᠬᠥᠮᠦᠰ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠤᠢ︖ ᠲᠠ ᠪᠢᠳᠡᠨ ᠲᠡᠢ ᠬᠠᠮᠲᠤ ᠶᠠᠪᠤᠬᠤ ᠪᠠᠷ ᠯᠠ ᠪᠢ ᠪᠣᠯᠣᠨ ᠲᠠᠨ ᠤ ᠠᠷᠠᠳ ᠲᠦᠮᠡᠨ ᠭᠠᠵᠠᠷ ᠤᠨ ᠬᠥᠷᠥᠰᠥᠨ ᠳᠡᠭᠡᠷᠡᠬᠢ ᠪᠦᠬᠦ ᠠᠷᠠᠳ ᠲᠦᠮᠡᠨ ᠡᠴᠡ ᠢᠯᠭᠠᠭᠳᠠᠬᠤ ᠪᠢᠰᠢ ᠤᠤ︖》 ᠭᠡᠪᠡ᠃
17 ᠶᠣᠬᠣᠸᠠ ᠮᠣᠰᠧ ᠳᠤ᠄ 《ᠶᠠᠭ ᠴᠢᠨᠦ ᠭᠤᠶᠤᠭᠰᠠᠨ ᠶᠣᠰᠣᠭᠠᠷ ᠪᠢ ᠦᠢᠯᠡᠳᠦᠨᠡ᠃ ᠤᠴᠢᠷ ᠨᠢ ᠴᠢ ᠮᠢᠨᠦ ᠮᠡᠯᠮᠡᠢ ᠳᠦ ᠲᠠᠭᠠᠯᠠᠯ ᠢ ᠣᠯᠣᠭᠰᠠᠨ᠂ ᠪᠢ ᠴᠢᠮᠠᠶᠢ ᠨᠡᠷᠡ ᠪᠡᠷ ᠴᠢᠨᠢ ᠲᠠᠨᠢᠳᠠᠭ》 ᠭᠡᠵᠦ ᠠᠢᠯᠠᠳᠪᠠ᠃ 18 ᠮᠣᠰᠧ᠄ 《ᠴᠣᠭ ᠵᠢᠪᠬᠤᠯᠠᠩ ᠢᠶᠠᠨ ᠨᠠᠳᠠ ᠳᠤ ᠦᠵᠡᠭᠦᠯᠦᠭᠡᠴᠢ》 ᠭᠡᠵᠦ ᠭᠤᠶᠤᠬᠤ ᠳᠤ᠂ 19 ᠶᠣᠬᠣᠸᠠ᠄ 《ᠪᠢ ᠥᠪᠡᠷ ᠦᠨ ᠢᠶᠠᠨ ᠪᠦᠬᠦ ᠰᠠᠢᠨ ᠰᠠᠢᠬᠠᠨ ᠢ ᠴᠢᠨᠦ ᠡᠮᠦᠨᠡᠭᠦᠷ ᠥᠩᠭᠡᠷᠡᠭᠦᠯᠵᠦ᠂ ᠶᠣᠬᠣᠸᠠ ᠭᠡᠳᠡᠭ ᠨᠡᠷᠡ ᠪᠡᠨ ᠴᠢᠨᠦ ᠡᠮᠦᠨᠡ ᠲᠤᠩ᠋ᠬᠠᠭᠯᠠᠨᠠ᠃ ᠪᠢ ᠡᠨᠡᠷᠢᠬᠦ ᠬᠥᠮᠦᠨ ᠢᠶᠡᠨ ᠡᠨᠡᠷᠢᠵᠦ᠂ ᠥᠷᠥ ᠡᠪᠡᠳᠬᠦ ᠬᠥᠮᠦᠨ ᠢᠶᠡᠨ ᠥᠷᠥ ᠡᠪᠡᠳᠦᠨᠡ᠃ 20 ᠬᠠᠷᠢᠨ ᠴᠢ ᠮᠢᠨᠦ ᠨᠢᠭᠤᠷ ᠢ ᠬᠠᠷᠠᠵᠤ ᠪᠣᠯᠬᠤ ᠦᠭᠡᠢ᠃ ᠨᠠᠮᠠᠶᠢ ᠬᠠᠷᠠᠭᠠᠳ ᠠᠮᠢᠳᠤ ᠦᠯᠡᠳᠡᠬᠦ ᠬᠥᠮᠦᠨ ᠪᠠᠢᠬᠤ ᠦᠭᠡᠢ》 ᠭᠡᠵᠦ ᠠᠢᠯᠠᠳᠪᠠ᠃ 21 ᠶᠣᠬᠣᠸᠠ ᠴᠠᠰᠢ ᠨᠢ᠄ 《ᠬᠠᠷᠠ᠂ ᠴᠢ ᠮᠢᠨᠦ ᠳᠡᠷᠭᠡᠳᠡ ᠪᠠᠢᠭᠠ ᠭᠠᠵᠠᠷ ᠲᠤ᠂ ᠡᠨᠡ ᠬᠠᠳᠠᠨ ᠳᠡᠭᠡᠷᠡ ᠵᠣᠭᠰᠣ᠃ 22 ᠮᠢᠨᠦ ᠴᠣᠭ ᠵᠢᠪᠬᠤᠯᠠᠩ ᠥᠩᠭᠡᠷᠡᠬᠦ ᠵᠠᠭᠤᠷᠠ ᠪᠢ ᠴᠢᠮᠠᠶᠢ ᠬᠠᠳᠠᠨ ᠤ ᠬᠥᠨᠳᠡᠢ ᠳᠦ ᠣᠷᠣᠭᠤᠯᠵᠤ᠂ ᠥᠩᠭᠡᠷᠡᠨ ᠭᠠᠷᠲᠠᠯᠠ ᠪᠠᠨ ᠴᠢᠮᠠᠶᠢ ᠮᠤᠲᠤᠷ ᠢᠶᠠᠷ ᠢᠶᠠᠨ ᠬᠠᠯᠬᠠᠯᠠᠨᠠ᠃ 23 ᠳᠠᠷᠠᠭᠠ ᠨᠢ ᠪᠢ ᠮᠤᠲᠤᠷ ᠢᠶᠠᠨ ᠠᠪᠬᠤ ᠪᠥᠭᠡᠳ ᠴᠢ ᠮᠢᠨᠦ ᠠᠷᠤ ᠲᠠᠯᠠ ᠶᠢ ᠬᠠᠷᠠᠨᠠ᠃ ᠬᠠᠷᠢᠨ ᠮᠢᠨᠦ ᠨᠢᠭᠤᠷ ᠬᠠᠷᠠᠭᠳᠠᠬᠤ ᠦᠭᠡᠢ》 ᠭᠡᠪᠡ᠃