ᠭᠡᠲᠦᠯᠦᠯ ᠬᠣᠷᠢᠨ ᠳᠥᠷᠪᠡ
ᠭᠡᠷᠡ ᠪᠠᠲᠤᠯᠠᠭᠳᠠᠭᠰᠠᠨ ᠨᠢ
1 ᠶᠣᠬᠣᠸᠠ ᠮᠣᠰᠧ ᠳᠤ᠄ 《ᠴᠢ ᠠᠷᠣᠨ᠂ ᠨᠠᠳᠠᠪ᠂ ᠠᠪᠢᠾᠦ᠋ ᠬᠢᠭᠡᠳ ᠢᠰᠷᠧᠯ ᠤᠨ ᠠᠬᠠᠮᠠᠳ ᠠᠴᠠ ᠳᠠᠯᠠᠨ ᠬᠥᠮᠦᠨ ᠦ ᠬᠠᠮᠲᠤ ᠨᠠᠳᠠ ᠥᠭᠡᠳᠡ ᠢᠷᠡᠵᠦ᠂ ᠠᠯᠤᠰ ᠠᠴᠠ ᠮᠥᠷᠭᠥ᠃ 2 ᠵᠥᠪᠬᠡᠨ ᠮᠣᠰᠧ ᠴᠢ ᠯᠠ ᠨᠠᠳᠠ ᠳᠤ ᠣᠢᠷᠠᠲᠤ᠃ ᠪᠤᠰᠤᠳ ᠨᠢ ᠣᠢᠷᠠᠲᠤᠵᠤ ᠪᠣᠯᠬᠤ ᠦᠭᠡᠢ᠃ ᠠᠷᠠᠳ ᠲᠦᠮᠡᠨ ᠴᠢᠮᠠ ᠲᠠᠢ ᠬᠠᠮᠲᠤ ᠥᠭᠰᠥᠨ ᠢᠷᠡᠵᠦ ᠪᠣᠯᠬᠤ ᠦᠭᠡᠢ》 ᠭᠡᠵᠦ ᠠᠢᠯᠠᠳᠪᠠ᠃
3 ᠮᠣᠰᠧ ᠶᠠᠪᠤᠵᠤ᠂ ᠶᠣᠬᠣᠸᠠ ᠶᠢᠨ ᠪᠦᠬᠦ ᠦᠭᠡ᠂ ᠪᠦᠬᠦ ᠬᠠᠤᠯᠢ ᠶᠣᠰᠣ ᠶᠢ ᠠᠷᠠᠳ ᠲᠦᠮᠡᠨ ᠳᠦ ᠲᠠᠢᠯᠪᠤᠷᠢᠯᠠᠭᠰᠠᠨ ᠳᠤ᠂ ᠲᠡᠳᠡ ᠪᠦᠭᠦᠳᠡᠭᠡᠷ ᠢᠶᠡᠨ ᠨᠢᠭᠡ ᠳᠠᠭᠤ ᠪᠠᠷ᠄ 《ᠪᠢᠳᠡ ᠶᠣᠬᠣᠸᠠ ᠶᠢᠨ ᠠᠢᠯᠠᠳᠤᠭᠰᠠᠨ ᠪᠦᠬᠦ ᠦᠭᠡ ᠶᠢ ᠪᠡᠶᠡᠯᠡᠭᠦᠯᠦᠨᠡ》 ᠭᠡᠵᠦ ᠬᠠᠷᠢᠭᠤᠯᠵᠠᠭᠠᠪᠠ᠃ 4 ᠮᠣᠰᠧ ᠶᠣᠬᠣᠸᠠ ᠶᠢᠨ ᠪᠦᠬᠦ ᠦᠭᠡ ᠶᠢ ᠪᠢᠴᠢᠨ ᠠᠪᠤᠭᠰᠠᠨ ᠪᠠᠢᠨᠠ᠃ ᠲᠡᠷᠡ ᠥᠷᠯᠥᠭᠡ ᠡᠷᠲᠡ ᠪᠣᠰᠣᠭᠠᠳ ᠠᠭᠤᠯᠠ ᠶᠢᠨ ᠪᠡᠯ ᠳᠦ ᠲᠠᠬᠢᠯ ᠤᠨ ᠰᠢᠷᠡᠭᠡ ᠪᠠᠷᠢᠵᠤ᠂ ᠢᠰᠷᠧᠯ ᠤᠨ ᠠᠷᠪᠠᠨ ᠬᠣᠶᠠᠷ ᠣᠪᠣᠭ ᠤᠨ ᠳᠠᠭᠠᠤ ᠠᠷᠪᠠᠨ ᠬᠣᠶᠠᠷ ᠴᠢᠯᠠᠭᠤᠨ ᠪᠠᠭᠠᠨᠠ ᠪᠣᠰᠬᠠᠯᠠ᠃ 5 ᠲᠡᠭᠡᠭᠡᠳ ᠲᠡᠷᠡ ᠢᠰᠷᠧᠯᠴᠦᠳ ᠦᠨ ᠳᠤᠮᠳᠠ ᠠᠴᠠ ᠵᠠᠯᠠᠭᠤᠰ ᠢ ᠶᠠᠪᠤᠭᠤᠯᠤᠭᠰᠠᠨ ᠳᠤ᠂ ᠲᠡᠳᠡ ᠶᠣᠬᠣᠸᠠ ᠳᠤ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠡᠷᠭᠦᠨ᠂ ᠪᠠᠰᠠ ᠵᠠᠯᠠᠭᠤ ᠪᠤᠬᠠ ᠨᠤᠭᠤᠳ ᠢᠶᠠᠷ ᠡᠪ ᠦᠨ ᠲᠠᠬᠢᠯ ᠡᠷᠭᠦᠵᠡᠢ᠃ 6 ᠮᠣᠰᠧ ᠴᠢᠰᠤᠨ ᠤ ᠬᠠᠭᠠᠰ ᠢ ᠨᠢ ᠠᠪᠤᠨ ᠰᠠᠪᠠ ᠨᠤᠭᠤᠳ ᠲᠤ ᠬᠢᠵᠦ᠂ ᠬᠠᠭᠠᠰ ᠢ ᠨᠢ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠳᠡᠭᠡᠭᠦᠷ ᠰᠠᠴᠤᠪᠠ᠃ 7 ᠲᠡᠭᠡᠭᠡᠳ ᠲᠡᠷᠡ ᠭᠡᠷᠡ ᠶᠢᠨ ᠪᠢᠴᠢᠭ ᠢ ᠠᠪᠴᠤ᠂ ᠠᠷᠠᠳ ᠲᠦᠮᠡᠨ ᠳᠦ ᠤᠩ᠋ᠰᠢᠵᠤ ᠰᠣᠨᠣᠰᠬᠠᠭᠰᠠᠨ ᠳᠤ᠂ ᠲᠡᠳᠡ᠄ 《ᠪᠢᠳᠡ ᠶᠣᠬᠣᠸᠠ ᠶᠢᠨ ᠠᠢᠯᠠᠳᠤᠭᠰᠠᠨ ᠪᠦᠭᠦᠳᠡ ᠶᠢ ᠪᠡᠶᠡᠯᠡᠭᠦᠯᠵᠦ᠂ ᠳᠠᠭᠠᠨᠠ》 ᠭᠡᠵᠡᠭᠡᠪᠡ᠃ 8 ᠮᠣᠰᠧ ᠴᠢᠰᠤ ᠶᠢ ᠠᠪᠴᠤ᠂ ᠠᠷᠠᠳ ᠲᠦᠮᠡᠨ ᠦ ᠳᠡᠭᠡᠭᠦᠷ ᠰᠠᠴᠤᠨ᠄ 《ᠡᠨᠡ ᠴᠢᠰᠤ ᠪᠣᠯ ᠡᠳᠡᠭᠡᠷ ᠪᠦᠬᠦ ᠦᠭᠡ ᠶᠢᠨ ᠳᠠᠭᠠᠤ ᠶᠣᠬᠣᠸᠠ ᠶᠢᠨ ᠲᠠ ᠨᠠᠷ ᠲᠠᠢ ᠪᠠᠢᠭᠤᠯᠤᠭᠰᠠᠨ ᠭᠡᠷᠡ ᠶᠢᠨ ᠪᠠᠲᠤᠯᠠᠭᠠ ᠶᠤᠮ》 ᠭᠡᠪᠡ᠃
9 ᠮᠣᠰᠧ ᠠᠷᠣᠨ ᠬᠣᠶᠠᠷ᠂ ᠨᠠᠳᠠᠪ ᠠᠪᠢᠾᠦ᠋ ᠬᠣᠶᠠᠷ ᠬᠢᠭᠡᠳ ᠢᠰᠷᠧᠯ ᠤᠨ ᠳᠠᠯᠠᠨ ᠠᠬᠠᠯᠠᠭᠴᠢ ᠳᠡᠭᠡᠭᠰᠢ ᠪᠠᠨ ᠭᠠᠷᠴᠤ᠂ 10 ᠢᠰᠷᠧᠯ ᠤᠨ ᠪᠤᠷᠬᠠᠨ ᠢ ᠦᠵᠡᠪᠡ᠃ ᠬᠥᠯ ᠦᠨ ᠬᠢᠨᠢ ᠳᠣᠣᠷᠠᠬᠢ ᠨᠢ ᠢᠨᠳᠠᠷᠨᠢᠯᠠ ᠪᠠᠷ ᠳᠡᠪᠢᠰᠦᠭᠰᠡᠨ ᠰᠢᠭ᠂ ᠲᠩᠷᠢ ᠰᠢᠭ ᠴᠡᠯᠮᠡᠭ ᠪᠠᠢᠯᠠ᠃ 11 ᠪᠤᠷᠬᠠᠨ ᠤ ᠮᠤᠲᠤᠷ ᠢᠰᠷᠧᠯᠴᠦᠳ ᠦᠨ ᠤᠳᠤᠷᠢᠳᠤᠭᠴᠢᠳ ᠢ ᠴᠣᠬᠢᠭᠰᠠᠨ ᠦᠭᠡᠢ᠂ ᠲᠡᠳᠡ ᠪᠤᠷᠬᠠᠨ ᠢ ᠬᠠᠷᠠᠵᠠᠭᠠᠵᠤ᠂ ᠪᠠᠰᠠ ᠢᠳᠡᠵᠦ ᠤᠤᠭᠤᠵᠠᠭᠠᠭᠰᠠᠨ ᠪᠠᠢᠯᠠ᠃
12 ᠶᠣᠬᠣᠸᠠ ᠮᠣᠰᠧ ᠳᠤ᠄ 《ᠴᠢ ᠠᠭᠤᠯᠠᠨ ᠳᠤ ᠭᠠᠷᠴᠤ ᠨᠠᠳᠠ ᠤᠷᠤᠭᠤ ᠢᠷᠡᠭᠡᠳ᠂ ᠡ᠊ᠨᠳᠡ ᠪᠠᠢ᠃ ᠲᠡᠳᠡᠨ ᠢ ᠰᠤᠷᠭᠠᠬᠤ ᠬᠠᠤᠯᠢ᠂ ᠲᠤᠰᠢᠶᠠᠯ ᠢ ᠪᠢᠴᠢᠭᠰᠡᠨ ᠴᠢᠯᠠᠭᠤᠨ ᠬᠠᠪᠲᠠᠰᠤ ᠪᠠᠨ ᠪᠢ ᠴᠢᠮᠠ ᠳᠤ ᠥᠭᠭᠥᠶᠡ》 ᠭᠡᠵᠦ ᠠᠢᠯᠠᠳᠤᠭᠰᠠᠨ ᠳᠤ᠂ 13 ᠮᠣᠰᠧ ᠲᠤᠰᠠᠯᠠᠭᠴᠢ ᠶᠣᠱᠦ᠋ᠶᠠ ᠲᠠᠢ ᠪᠠᠨ ᠬᠠᠮᠲᠤ ᠬᠥᠳᠡᠯᠵᠦ᠂ ᠪᠤᠷᠬᠠᠨ ᠤ ᠠᠭᠤᠯᠠᠨ ᠳᠤ ᠭᠠᠷᠤᠯᠠ᠃ 14 ᠲᠡᠷᠡ ᠠᠬᠠᠯᠠᠭᠴᠢᠳ ᠲᠤ᠄ 《ᠪᠢᠳᠡ ᠬᠣᠶᠠᠷ ᠪᠤᠴᠠᠵᠤ ᠢᠷᠡᠲᠡᠯᠡ ᠲᠠ ᠨᠠᠷ ᠡ᠊ᠨᠳᠡ ᠪᠠᠢᠵᠤ ᠪᠠᠢᠭᠠᠷᠠᠢ᠃ ᠬᠠᠷᠠ᠂ ᠠᠷᠣᠨ᠂ ᠾᠦᠷ ᠨᠠᠷ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠪᠠᠢᠨᠠ︕ ᠬᠡᠷᠡᠭ ᠵᠠᠷᠭᠤ ᠲᠠᠢ ᠬᠥᠮᠦᠨ ᠲᠡᠳᠡᠨ ᠳᠦ ᠣᠴᠢᠭᠠᠷᠠᠢ》 ᠭᠡᠪᠡ᠃
15 ᠮᠣᠰᠧ ᠠᠭᠤᠯᠠᠨ ᠳᠤ ᠭᠠᠷᠤᠭᠰᠠᠨ ᠳᠤ᠂ ᠠᠭᠤᠯᠠ ᠶᠢ ᠡᠭᠦᠯᠡ ᠪᠦᠷᠬᠦᠵᠦ᠂ 16 ᠶᠣᠬᠣᠸᠠ ᠶᠢᠨ ᠴᠣᠭ ᠵᠢᠪᠬᠤᠯᠠᠩ ᠰᠢᠨᠠᠢ ᠠᠭᠤᠯᠠᠨ ᠳᠡᠭᠡᠷᠡ ᠲᠣᠭᠲᠠᠭᠰᠠᠨ ᠪᠠᠢᠯᠠ᠃ ᠠᠭᠤᠯᠠ ᠶᠢ ᠵᠢᠷᠭᠤᠭᠠᠨ ᠡᠳᠦᠷ ᠦᠨ ᠲᠤᠷᠰᠢ ᠡᠭᠦᠯᠡ ᠪᠦᠷᠬᠦᠵᠦ᠂ ᠳᠣᠯᠣᠳᠠᠬᠢ ᠡᠳᠦᠷ ᠶᠣᠬᠣᠸᠠ ᠡᠭᠦᠯᠡᠨ ᠳᠤᠮᠳᠠ ᠠᠴᠠ ᠮᠣᠰᠧ ᠶᠢ ᠳᠠᠭᠤᠳᠠᠪᠠ᠃ 17 ᠢᠰᠷᠧᠯᠴᠦᠳ ᠦᠨ ᠨᠢᠳᠦᠨ ᠳᠦ ᠶᠣᠬᠣᠸᠠ ᠶᠢᠨ ᠴᠣᠭ ᠵᠢᠪᠬᠤᠯᠠᠩ ᠨᠢ ᠠᠭᠤᠯᠠ ᠶᠢᠨ ᠣᠷᠣᠢ ᠳᠡᠭᠡᠷᠡ ᠳᠦᠷᠡᠯᠵᠡᠨ ᠪᠤᠢ ᠭᠠᠯ ᠮᠡᠲᠦ ᠬᠠᠷᠠᠭᠳᠠᠪᠠ᠃ 18 ᠮᠣᠰᠧ ᠡᠭᠦᠯᠡᠨ ᠳᠤᠮᠳᠠ ᠣᠷᠣᠭᠠᠳ ᠠᠭᠤᠯᠠᠨ ᠳᠤ ᠭᠠᠷᠴᠤ᠂ ᠠᠭᠤᠯᠠᠨ ᠳᠡᠭᠡᠷᠡ ᠳᠥᠴᠢᠨ ᠡᠳᠦᠷ ᠳᠥᠴᠢᠨ ᠰᠥᠨᠢ ᠪᠠᠢᠯᠠ᠃