ᠭᠡᠲᠦᠯᠦᠯ ᠲᠠᠪᠤ
ᠹᠠᠷᠠᠣ᠋ ᠢᠰᠷᠧᠯᠴᠦᠳ ᠢ ᠬᠠᠷᠭᠢᠰᠯᠠᠨ ᠳᠠᠷᠤᠮᠲᠠᠯᠠᠪᠠ
1 ᠡᠭᠦᠨ ᠦ ᠳᠠᠷᠠᠭᠠ ᠮᠣᠰᠧ᠂ ᠠᠷᠣᠨ ᠨᠠᠷ ᠹᠠᠷᠠᠣ᠋ ᠳᠤ ᠣᠴᠢᠵᠤ᠄ 《ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ᠄ 〈ᠮᠢᠨᠦ ᠠᠷᠠᠳ ᠲᠦᠮᠡᠨ ᠢ ᠶᠠᠪᠤᠭᠤᠯ᠃ ᠲᠡᠳᠡ ᠴᠥᠯ ᠳᠤ ᠨᠠᠳᠠ ᠳᠤ ᠵᠣᠷᠢᠭᠤᠯᠤᠭᠰᠠᠨ ᠪᠠᠶᠠᠷ ᠢ ᠲᠡᠮᠳᠡᠭᠯᠡᠬᠦ ᠶᠣᠰᠣᠲᠠᠢ〉 ᠭᠡᠵᠦ ᠠᠢᠯᠠᠳᠤᠯᠠ》 ᠭᠡᠪᠡ᠃ 2 ᠹᠠᠷᠠᠣ᠋᠄ 《ᠶᠣᠬᠣᠸᠠ ᠭᠡᠵᠦ ᠬᠡᠨ ᠪᠤᠢ︖ ᠲᠡᠷᠡ ᠢᠰᠷᠧᠯ ᠢ ᠶᠠᠪᠤᠭᠤᠯ ᠭᠡᠪᠡᠯ ᠪᠢ ᠲᠡᠭᠦᠨ ᠦ ᠦᠭᠡ ᠶᠢ ᠳᠠᠭᠠᠬᠤ ᠶᠣᠰᠣᠲᠠᠢ ᠤᠤ︖ ᠪᠢ ᠶᠣᠬᠣᠸᠠ ᠶᠢ ᠲᠠᠨᠢᠬᠤ ᠴᠤ ᠦᠭᠡᠢ᠂ ᠢᠰᠷᠧᠯ ᠢ ᠶᠠᠪᠤᠭᠤᠯᠬᠤ ᠴᠤ ᠦᠭᠡᠢ》 ᠭᠡᠵᠦ ᠬᠡᠯᠡᠪᠡ᠃ 3 ᠲᠡᠳᠡ᠄ 《ᠢᠪᠷᠠᠢᠴᠤᠳ ᠤᠨ ᠪᠤᠷᠬᠠᠨ ᠪᠢᠳᠡᠨ ᠢ ᠳᠠᠭᠤᠳᠠᠭᠰᠠᠨ᠃ ᠴᠥᠯ ᠤᠷᠤᠭᠤ ᠭᠤᠷᠪᠠᠨ ᠡᠳᠦᠷ ᠦᠨ ᠠᠶᠠᠨ ᠳᠤ ᠶᠠᠪᠤᠵᠤ ᠶᠣᠬᠣᠸᠠ ᠪᠤᠷᠬᠠᠨ ᠳᠠᠭᠠᠨ ᠲᠠᠬᠢᠯ ᠡᠷᠭᠦᠬᠦ ᠶᠢ ᠮᠢᠨᠢ ᠵᠥᠪᠰᠢᠶᠡᠷᠡᠭᠡᠴᠢ᠂ ᠡᠰᠡ ᠲᠡᠭᠡᠪᠡᠯ ᠲᠡᠷᠡ ᠲᠠᠬᠤᠯ ᠪᠤᠶᠤ ᠰᠡᠯᠡᠮᠡ ᠪᠡᠷ ᠪᠢᠳᠡᠨ ᠢ ᠴᠣᠬᠢᠬᠤ ᠪᠣᠯᠣᠨᠠ》 ᠭᠡᠬᠦ ᠳᠦ᠂ 4 ᠶᠧᠵᠢᠫᠲ ᠤᠨ ᠬᠠᠭᠠᠨ᠄ 《ᠮᠣᠰᠧ᠂ ᠠᠷᠣᠨ ᠡ︕ ᠲᠠ ᠨᠠᠷ ᠶᠠᠭᠤᠨ ᠳᠤ ᠠᠷᠠᠳ ᠲᠦᠮᠡᠨ ᠢ ᠠᠵᠢᠯ ᠠᠴᠠ ᠨᠢ ᠬᠥᠨᠳᠡᠢᠷᠡᠭᠦᠯᠦᠨᠡ ᠪᠤᠢ︖ ᠪᠤᠴᠠᠵᠤ ᠠᠵᠢᠯ ᠢᠶᠠᠨ ᠬᠢ》 ᠭᠡᠪᠡ᠃ 5 ᠹᠠᠷᠠᠣ᠋ ᠵᠠᠯᠭᠠᠭᠠᠳ᠄ 《ᠲᠠᠨ ᠤ ᠠᠷᠠᠳ ᠲᠦᠮᠡᠨ ᠣᠯᠠᠨ ᠢᠶᠠᠷ ᠢᠶᠠᠨ ᠮᠠᠨ ᠤ ᠭᠠᠵᠠᠷ ᠲᠤ ᠪᠠᠢᠨᠠ︕ ᠬᠠᠷᠢᠨ ᠲᠡᠳᠡᠨ ᠦ ᠠᠵᠢᠯ ᠢ ᠪᠠᠰᠠ ᠵᠣᠭᠰᠣᠭᠠᠬᠤ ᠭᠡᠬᠦ ᠨᠢ ᠤᠤ︖》 ᠭᠡᠪᠡ᠃ 6 ᠢᠩᠭᠢᠭᠡᠳ ᠲᠡᠷᠡ ᠡᠳᠦᠷ ᠹᠠᠷᠠᠣ᠋ ᠠᠷᠠᠳ ᠲᠦᠮᠡᠨ ᠦ ᠳᠡᠭᠡᠷᠡ ᠪᠤᠢ ᠠᠵᠢᠯ ᠬᠢᠨᠠᠭᠴᠢᠳ ᠪᠣᠯᠣᠨ ᠳᠠᠭᠠᠭᠠᠮᠠᠯ ᠨᠠᠷ ᠲᠤ ᠵᠠᠷᠯᠢᠭ ᠪᠠᠭᠤᠯᠭᠠᠵᠤ᠄ 7 《ᠲᠠ ᠨᠠᠷ ᠲᠣᠭᠣᠰᠬᠠ ᠬᠢᠬᠦ ᠳᠦ ᠵᠠᠷᠤᠴᠠᠭᠤᠯᠳᠠᠭ ᠰᠦᠷᠡᠯ ᠢ ᠠᠷᠠᠳ ᠲᠦᠮᠡᠨ ᠳᠦ ᠬᠠᠩ᠋ᠭᠠᠬᠤ ᠪᠠᠨ ᠪᠣᠯᠢ᠂ ᠲᠡᠳᠡ ᠥᠪᠡᠷᠰᠡᠳ ᠢᠶᠡᠨ ᠶᠠᠪᠤᠵᠤ ᠰᠦᠷᠡᠯ ᠬᠤᠷᠢᠶᠠᠭ᠃ 8 ᠭᠡᠪᠡᠴᠦ ᠬᠢᠬᠦ ᠲᠣᠭᠣᠰᠬᠠ ᠶᠢᠨ ᠲᠣᠭᠠ ᠶᠢ ᠤᠷᠢᠳᠤ ᠶᠢᠨ ᠠᠳᠠᠯᠢ ᠪᠠᠢᠯᠭᠠᠬᠤ ᠪᠠᠷ ᠲᠡᠳᠡᠨ ᠳᠦ ᠱᠠᠭᠠᠷᠳᠠ᠂ ᠲᠣᠭᠠ ᠶᠢ ᠨᠢ ᠪᠦᠦ ᠬᠠᠰᠤ᠃ ᠲᠡᠳᠡ ᠵᠠᠯᠬᠠᠭᠤ ᠤᠴᠢᠷ᠄ 〈ᠡ᠊ᠨᠳᠡ ᠡᠴᠡ ᠶᠠᠪᠤᠵᠤ ᠪᠤᠷᠬᠠᠨ ᠳᠠᠭᠠᠨ ᠲᠠᠬᠢᠯ ᠡᠷᠭᠦᠬᠦ ᠶᠢ ᠮᠠᠨᠢ ᠵᠥᠪᠰᠢᠶᠡᠷᠡᠭᠡᠴᠢ〉 ᠭᠡᠵᠦ ᠬᠠᠰᠬᠢᠷᠴᠤ ᠪᠠᠢᠨᠠ᠃ 9 ᠡᠨᠡ ᠬᠥᠮᠦᠰ ᠲᠦ ᠢᠯᠡᠭᠦᠦ ᠬᠦᠨᠳᠦ ᠠᠵᠢᠯ ᠢ ᠥᠭ᠂ ᠲᠡᠭᠡᠪᠡᠯ ᠲᠡᠳᠡ ᠠᠵᠢᠯ ᠢᠶᠠᠨ ᠬᠢᠭᠰᠡᠭᠡᠷ ᠪᠠᠢᠵᠤ ᠬᠤᠳᠠᠯ ᠦᠭᠡᠰ ᠢ ᠠᠩ᠋ᠬᠠᠷᠬᠤ ᠪᠠᠨ ᠪᠣᠯᠢᠨᠠ》 ᠭᠡᠪᠡ᠃
10 ᠢᠩᠭᠢᠭᠡᠳ ᠠᠷᠠᠳ ᠲᠦᠮᠡᠨ ᠦ ᠠᠵᠢᠯ ᠬᠢᠨᠠᠭᠴᠢᠳ ᠪᠠ ᠳᠠᠭᠠᠭᠠᠮᠠᠯ ᠨᠠᠷ ᠭᠠᠷᠴᠤ ᠢᠷᠡᠭᠡᠳ᠂ ᠠᠷᠠᠳ ᠲᠦᠮᠡᠨ ᠳᠦ᠄ 《ᠹᠠᠷᠠᠣ᠋᠄ 〈ᠪᠢ ᠲᠠ ᠨᠠᠷ ᠲᠤ ᠰᠦᠷᠡᠯ ᠬᠠᠩ᠋ᠭᠠᠬᠤ ᠦᠭᠡᠢ᠃ 11 ᠲᠠ ᠨᠠᠷ ᠥᠪᠡᠷᠰᠡᠳ ᠢᠶᠡᠨ ᠶᠠᠪᠤᠵᠤ᠂ ᠣᠯᠳᠠᠬᠤ ᠭᠠᠵᠠᠷ ᠠᠴᠠ ᠪᠠᠨ ᠰᠦᠷᠡᠯ ᠲᠡᠭᠦᠵᠡᠭᠡ᠃ ᠬᠠᠷᠢᠨ ᠠᠵᠢᠯ ᠤᠨ ᠴᠢᠨᠢ ᠬᠡᠮᠵᠢᠶᠡ ᠬᠠᠰᠤᠭᠳᠠᠬᠤ ᠦᠭᠡᠢ〉 ᠭᠡᠰᠡᠨ》 ᠭᠡᠪᠡ᠃ 12 ᠲᠡᠭᠡᠭᠰᠡᠨ ᠢᠶᠡᠷ ᠠᠷᠠᠳ ᠲᠦᠮᠡᠨ ᠶᠧᠵᠢᠫᠲ ᠤᠨ ᠪᠦᠬᠦ ᠭᠠᠵᠠᠷ ᠢᠶᠠᠷ ᠲᠠᠷᠬᠠᠵᠤ ᠰᠦᠷᠡᠯ ᠦᠨ ᠣᠷᠣᠨ ᠳᠤ ᠬᠡᠷᠡᠭᠯᠡᠬᠦ ᠲᠠᠷᠢᠶᠠᠨ ᠤ ᠶᠣᠵᠣᠭᠣᠷ ᠲᠡᠭᠦᠵᠡᠭᠡᠪᠡ᠃ 13 ᠠᠵᠢᠯ ᠬᠢᠨᠠᠭᠴᠢᠳ ᠲᠡᠳᠡᠨ ᠢ ᠰᠢᠪᠠᠳᠠᠭᠤᠯᠵᠤ᠄ 《ᠰᠦᠷᠡᠯ ᠲᠡᠢ ᠪᠠᠢᠭᠰᠠᠨ ᠦᠶᠡ ᠶᠢᠨ ᠬᠢ ᠰᠢᠭ ᠢᠶᠠᠨ ᠡᠳᠦᠷ ᠦᠨ ᠢᠶᠠᠨ ᠠᠵᠢᠯ ᠢ ᠡᠳᠦᠷ ᠲᠤᠨᠢ ᠭᠦᠢᠴᠡᠳᠬᠡ》 ᠭᠡᠳᠡᠭ ᠪᠠᠢᠯᠠ᠃ 14 ᠹᠠᠷᠠᠣ᠋ ᠶᠢᠨ ᠠᠵᠢᠯ ᠬᠢᠨᠠᠭᠴᠢᠳ ᠢᠰᠷᠧᠯᠴᠦᠳ ᠦᠨ ᠳᠤᠮᠳᠠ ᠠᠴᠠ ᠲᠣᠮᠢᠯᠠᠭᠰᠠᠨ ᠳᠠᠭᠠᠭᠠᠮᠠᠯ ᠤᠳ ᠢᠶᠠᠨ ᠵᠣᠳᠣᠵᠤ᠄ 《ᠲᠠ ᠨᠠᠷ ᠥᠴᠥᠭᠡᠳᠦᠷ ᠴᠤ᠂ ᠥᠨᠥᠳᠥᠷ ᠴᠤ ᠶᠠᠭᠠᠬᠢᠭᠠᠳ ᠤᠷᠢᠳᠤ ᠶᠢᠨ ᠠᠳᠠᠯᠢ ᠬᠡᠮᠵᠢᠶᠡ ᠪᠡᠷ ᠲᠣᠭᠣᠰᠬᠠ ᠬᠢᠵᠦ ᠭᠦᠢᠴᠡᠭᠡᠭᠰᠡᠨ ᠦᠭᠡᠢ ᠪᠤᠢ︖》 ᠭᠡᠵᠡᠢ᠃
15 ᠢᠰᠷᠧᠯᠴᠦᠳ ᠦᠨ ᠳᠠᠭᠠᠭᠠᠮᠠᠯ ᠤᠳ ᠹᠠᠷᠠᠣ᠋ ᠳᠤ ᠣᠴᠢᠭᠠᠳ ᠬᠠᠰᠬᠢᠷᠤᠨ ᠭᠤᠶᠤᠵᠤ᠄ 《ᠲᠠ ᠶᠠᠭᠤᠨ ᠳᠤ ᠵᠠᠷᠤᠴᠠ ᠨᠠᠷ ᠲᠠᠭᠠᠨ ᠢᠩᠭᠢᠵᠦ ᠬᠠᠨᠳᠤᠨᠠ ᠪᠤᠢ︖ 16 ᠵᠠᠷᠤᠴᠠ ᠪᠢᠳᠡᠨ ᠳᠦ ᠰᠦᠷᠡᠯ ᠥᠭᠬᠦ ᠦᠭᠡᠢ ᠠᠲᠠᠯᠠ ᠪᠠᠨ ᠲᠡᠳᠡ᠄ 〈ᠲᠣᠭᠣᠰᠬᠠ ᠬᠢ〉 ᠭᠡᠨᠡ᠂ ᠬᠠᠷᠠᠭᠠᠴᠢ︕ ᠲᠠᠨ ᠤ ᠵᠠᠷᠤᠴᠠ ᠨᠠᠷ ᠵᠣᠳᠣᠭᠳᠠᠵᠤ ᠪᠠᠢᠨᠠ᠂ ᠲᠠ ᠠᠷᠠᠳ ᠲᠦᠮᠡᠨ ᠳᠡᠭᠡᠨ ᠪᠤᠷᠤᠭᠤᠳᠠᠵᠤ ᠪᠠᠢᠨᠠ》 ᠭᠡᠵᠦ ᠮᠡᠳᠡᠭᠦᠯᠪᠡ᠃ 17 ᠹᠠᠷᠠᠣ᠋᠄ 《ᠵᠠᠯᠬᠠᠭᠤ᠂ ᠲᠠ ᠨᠠᠷ ᠵᠠᠯᠬᠠᠭᠤ ᠪᠠᠢᠨᠠ᠃ ᠡᠢᠮᠦ ᠡᠴᠡ ᠲᠠ ᠨᠠᠷ᠄ 〈ᠡ᠊ᠨᠳᠡ ᠡᠴᠡ ᠶᠠᠪᠤᠵᠤ ᠶᠣᠬᠣᠸᠠ ᠳᠤ ᠲᠠᠬᠢᠯ ᠡᠷᠭᠦᠬᠦ ᠶᠢ ᠮᠠᠨᠢ ᠵᠥᠪᠰᠢᠶᠡᠷᠡᠭᠡᠴᠢ〉 ᠭᠡᠵᠡᠭᠡᠵᠦ ᠪᠠᠢᠨᠠ᠃ 18 ᠣᠳᠣ ᠶᠠᠪᠤᠵᠤ ᠠᠵᠢᠯᠯᠠᠵᠠᠭᠠ᠃ ᠲᠠ ᠨᠠᠷ ᠲᠤ ᠰᠦᠷᠡᠯ ᠬᠠᠩ᠋ᠭᠠᠬᠤ ᠦᠭᠡᠢ᠂ ᠭᠡᠪᠡᠴᠦ ᠲᠠ ᠨᠠᠷ ᠲᠣᠭᠲᠠᠭᠠᠭᠰᠠᠨ ᠬᠡᠮᠵᠢᠶᠡ ᠪᠡᠷ ᠲᠣᠭᠣᠰᠬᠠ ᠬᠠᠩ᠋ᠭᠠᠬᠤ ᠶᠣᠰᠣᠲᠠᠢ》 ᠭᠡᠵᠦ ᠬᠡᠯᠡᠪᠡ᠃ 19 ᠢᠰᠷᠧᠯᠴᠦᠳ ᠦᠨ ᠳᠠᠭᠠᠭᠠᠮᠠᠯ ᠤᠳ 《ᠡᠳᠦᠷ ᠪᠦᠷᠢ ᠬᠢᠬᠦ ᠲᠣᠭᠣᠰᠬᠠ ᠶᠢᠨ ᠲᠣᠭᠠ ᠬᠠᠰᠤᠭᠳᠠᠬᠤ ᠦᠭᠡᠢ》 ᠭᠡᠰᠡᠨ ᠢ ᠰᠣᠨᠣᠰᠣᠭᠠᠳ ᠥᠪᠡᠷᠰᠡᠳ ᠲᠤᠨᠢ ᠭᠠᠢ ᠢᠷᠡᠭᠰᠡᠨ ᠢ ᠣᠢᠯᠠᠭᠠᠪᠠ᠃ 20 ᠲᠡᠳᠡ ᠹᠠᠷᠠᠣ᠋ ᠶᠢᠨ ᠬᠢ ᠡᠴᠡ ᠭᠠᠷᠴᠤ ᠢᠷᠡᠭᠡᠳ᠂ ᠥᠪᠡᠷᠰᠡᠳ ᠢ ᠨᠢ ᠬᠦᠯᠢᠶᠡᠨ ᠵᠣᠭᠰᠣᠵᠤ ᠪᠠᠢᠭᠠ ᠮᠣᠰᠧ᠂ ᠠᠷᠣᠨ ᠬᠣᠶᠠᠷ ᠲᠠᠢ ᠠᠭᠤᠯᠵᠠᠭᠠᠳ᠂ 21 ᠲᠡᠳᠡᠨ ᠳᠦ᠄ 《ᠶᠣᠬᠣᠸᠠ ᠲᠠ ᠬᠣᠶᠠᠷ ᠢ ᠬᠠᠷᠠᠭᠠᠳ ᠰᠢᠭᠦᠬᠦ ᠪᠣᠯᠲᠤᠭᠠᠢ︕ ᠲᠠ ᠨᠠᠷ ᠹᠠᠷᠠᠣ᠋ ᠪᠣᠯᠣᠨ ᠵᠠᠷᠤᠴᠠ ᠨᠠᠷ ᠤᠨ ᠬᠢᠨᠢ ᠨᠢᠳᠦᠨ ᠳᠦ ᠮᠠᠨ ᠤ ᠬᠢᠨ ᠢ ᠵᠢᠭᠰᠢᠭᠦᠷᠢ ᠪᠣᠯᠭᠠᠵᠤ᠂ ᠲᠡᠳᠡᠨ ᠦ ᠭᠠᠷ ᠲᠤ ᠪᠢᠳᠡᠨ ᠢ ᠨᠢᠲᠤᠯᠬᠤ ᠢᠯᠳᠦ ᠶᠢ ᠥᠭᠴᠦ ᠪᠠᠢᠨᠠ》 ᠭᠡᠵᠦ ᠬᠡᠯᠡᠪᠡ᠃
ᠪᠤᠷᠬᠠᠨ ᠴᠢᠯᠥᠭᠡᠯᠡᠬᠦ ᠪᠡᠷ ᠠᠮᠠᠯᠠᠪᠠ
22 ᠮᠣᠰᠧ ᠶᠣᠬᠣᠸᠠ ᠳᠤ ᠡᠷᠭᠢᠵᠦ᠄ 《ᠡᠵᠡᠨ᠂ ᠲᠠ ᠶᠠᠭᠠᠬᠢᠭᠠᠳ ᠡᠨᠡ ᠠᠷᠠᠳ ᠲᠦᠮᠡᠨ ᠢ ᠭᠠᠢ ᠳᠤ ᠤᠴᠠᠷᠠᠭᠤᠯᠪᠠ︖ ᠲᠠ ᠶᠠᠭᠤᠨ ᠳᠤ ᠨᠠᠮᠠᠶᠢ ᠶᠠᠪᠤᠭᠤᠯᠤᠭᠰᠠᠨ ᠶᠤᠮ ᠪᠤᠢ︖ 23 ᠨᠠᠮᠠᠶᠢ ᠹᠠᠷᠠᠣ᠋ ᠳᠤ ᠣᠴᠢᠵᠤ ᠲᠠᠨ ᠤ ᠨᠡᠷᠡ ᠪᠡᠷ ᠶᠠᠷᠢᠭᠰᠠᠨ ᠠᠴᠠ ᠬᠣᠢᠰᠢ᠂ ᠡᠨᠡ ᠠᠷᠠᠳ ᠲᠦᠮᠡᠨ ᠲᠡᠷᠡ ᠶᠡᠬᠡ ᠭᠠᠢ ᠳᠤ ᠥᠷᠲᠥᠵᠡᠢ᠃ ᠬᠠᠷᠢᠨ ᠲᠠ ᠠᠷᠠᠳ ᠲᠦᠮᠡᠨ ᠢᠶᠡᠨ ᠠᠪᠤᠷᠠᠭᠰᠠᠨ ᠦᠭᠡᠢ》 ᠭᠡᠪᠡ᠃