ᠭᠡᠲᠦᠯᠦᠯ ᠬᠣᠷᠢ
ᠠᠷᠪᠠᠨ ᠬᠠᠤᠯᠢ
1 ᠪᠤᠷᠬᠠᠨ ᠡᠨᠡ ᠪᠦᠬᠦ ᠦᠭᠡ ᠶᠢ ᠠᠢᠯᠠᠳᠤᠨ ᠬᠡᠯᠡᠵᠡᠢ᠄ 2 《ᠴᠢᠨᠦ ᠪᠤᠷᠬᠠᠨ ᠪᠣᠯ ᠶᠣᠬᠣᠸᠠ ᠪᠢ᠂ ᠴᠢᠮᠠᠶᠢ ᠪᠢ ᠶᠧᠵᠢᠫᠲ ᠤᠨ ᠪᠣᠭᠣᠯᠴᠢᠯᠠᠯ ᠤᠨ ᠭᠡᠷ ᠡᠴᠡ ᠭᠠᠷᠭᠠᠵᠤ ᠠᠪᠴᠢᠷᠠᠭᠰᠠᠨ᠃ 3 ᠴᠢ ᠨᠠᠳᠠ ᠠᠴᠠ ᠥᠭᠡᠷᠡ ᠪᠤᠷᠬᠠᠳ ᠲᠠᠢ ᠪᠠᠢᠵᠤ ᠪᠣᠯᠬᠤ ᠦᠭᠡᠢ᠃
4 ᠴᠢ ᠥᠪᠡᠷ ᠦᠨ ᠢᠶᠠᠨ ᠲᠥᠯᠥᠭᠡ ᠳᠡᠭᠡᠷᠡ ᠲᠩᠷᠢ ᠳᠠᠬᠢ᠂ ᠡᠰᠡᠪᠡᠯ ᠳᠣᠣᠷᠠ ᠭᠠᠵᠠᠷ ᠳᠠᠬᠢ᠂ ᠡᠰᠡᠪᠡᠯ ᠭᠠᠵᠠᠷ ᠳᠣᠣᠷᠠᠬᠢ᠂ ᠤᠰᠤᠨ ᠳᠣᠲᠣᠷᠠᠬᠢ ᠶᠠᠮᠠᠷ ᠨᠢᠭᠡ ᠶᠠᠭᠤᠮᠠᠨ ᠤ ᠳᠦᠷᠰᠦ ᠲᠠᠢ ᠰᠢᠲᠦᠭᠡᠨ ᠢ ᠪᠦᠦ ᠪᠦᠲᠦᠭᠡ᠃ 5 ᠴᠢ ᠲᠡᠳᠡᠭᠡᠷ ᠲᠦ ᠪᠦᠦ ᠮᠥᠷᠭᠥ᠂ ᠪᠦᠦ ᠦᠢᠯᠡᠴᠢᠯᠡ᠃ ᠤᠴᠢᠷ ᠨᠢ ᠴᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠪᠢ ᠪᠣᠯ ᠬᠠᠷᠠᠲᠠᠢ ᠪᠤᠷᠬᠠᠨ ᠪᠣᠯᠬᠣᠷ ᠥᠪᠡᠷ ᠢ ᠮᠢᠨᠢ ᠵᠢᠭ᠍ᠰᠢᠭ᠍ᠴᠢ ᠡᠴᠢᠭᠡ ᠨᠦᠭᠦᠳ ᠦᠨ ᠬᠢᠨᠢ ᠭᠡᠮ ᠨᠢᠭᠦᠯ ᠦᠨ ᠬᠠᠷᠢᠭᠤ ᠶᠢ ᠭᠤᠷᠪᠠ᠂ ᠳᠥᠷᠪᠡᠳᠡᠬᠢ ᠦᠶᠡ ᠶᠢᠨ ᠬᠡᠦᠬᠡᠳ ᠤᠳ ᠲᠤᠨᠢ ᠬᠦᠷᠲᠡᠯᠡ ᠪᠠᠭᠤᠯᠭᠠᠳᠠᠭ᠃ 6 ᠬᠠᠷᠢᠨ ᠨᠠᠮᠠᠶᠢ ᠬᠠᠢᠷᠠᠯᠠᠵᠤ᠂ ᠮᠢᠨᠦ ᠲᠤᠰᠢᠶᠠᠯ ᠢ ᠰᠠᠬᠢᠭᠴᠢᠳ ᠲᠤ ᠮᠢᠩ᠋ᠭᠠᠨ ᠦᠶᠡ ᠳᠦᠨᠢ ᠬᠦᠷᠲᠡᠯᠡ ᠬᠠᠢᠷᠠ ᠡᠨᠡᠷᠢᠯ ᠢᠶᠠᠨ ᠰᠣᠶᠣᠷᠬᠠᠳᠠᠭ᠃
7 ᠴᠢ ᠶᠣᠬᠣᠸᠠ ᠪᠤᠷᠬᠠᠨ ᠤ ᠪᠠᠨ ᠨᠡᠷᠡ ᠶᠢ ᠳᠡᠮᠡᠢ ᠪᠦᠦ ᠳᠠᠭᠤᠳᠠ᠃ ᠥᠪᠡᠷ ᠦᠨ ᠬᠢᠨᠢ ᠨᠡᠷᠡ ᠶᠢ ᠳᠡᠮᠡᠢ ᠳᠠᠭᠤᠳᠠᠭᠴᠢᠳ ᠢ ᠶᠣᠬᠣᠸᠠ ᠶᠠᠯᠠ ᠠᠴᠠ ᠬᠡᠯᠲᠦᠷᠢᠭᠦᠯᠬᠦ ᠦᠭᠡᠢ᠃
8 ᠴᠢ ᠠᠮᠠᠷᠠᠯ ᠤᠨ ᠡᠳᠦᠷ ᠢ ᠠᠷᠢᠭᠤᠨ ᠢᠶᠠᠷ ᠲᠤᠰᠠᠭᠠᠷᠯᠠᠬᠤ ᠶᠢ ᠰᠠᠨᠠ᠃ 9 ᠴᠢ ᠵᠢᠷᠭᠤᠭᠠᠨ ᠡᠳᠦᠷ ᠬᠥᠳᠡᠯᠮᠦᠷᠢᠯᠡᠵᠦ᠂ ᠪᠦᠬᠦ ᠠᠵᠢᠯ ᠢᠶᠠᠨ ᠬᠢ᠃ 10 ᠭᠡᠪᠡᠴᠦ ᠳᠣᠯᠣᠳᠠᠬᠢ ᠡᠳᠦᠷ ᠨᠢ ᠴᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠠᠮᠠᠷᠠᠯ ᠤᠨ ᠡᠳᠦᠷ ᠪᠣᠯᠬᠣᠷ ᠴᠢ ᠶᠠᠮᠠᠷ ᠴᠤ ᠠᠵᠢᠯ ᠪᠦᠦ ᠬᠢ᠂ ᠴᠢ ᠪᠣᠯᠣᠨ ᠴᠢᠨᠦ ᠬᠦᠦ᠂ ᠴᠢᠨᠦ ᠥᠬᠢᠨ᠂ ᠴᠢᠨᠦ ᠵᠠᠷᠤᠴᠠ᠂ ᠴᠢᠨᠦ ᠰᠢᠪᠡᠭᠴᠢᠨ᠂ ᠴᠢᠨᠦ ᠮᠠᠯ ᠰᠦᠷᠦᠭ ᠬᠢᠭᠡᠳ ᠬᠠᠭᠠᠯᠭᠠᠨ ᠤ ᠴᠢᠨᠢ ᠳᠣᠲᠣᠷᠠᠬᠢ ᠴᠠᠭᠠᠴᠢᠨ ᠴᠤ ᠮᠥᠨ ᠠᠳᠠᠯᠢ᠃ 11 ᠤᠴᠢᠷ ᠨᠢ ᠵᠢᠷᠭᠤᠭᠠᠨ ᠡᠳᠦᠷ ᠦᠨ ᠲᠤᠷᠰᠢ ᠶᠣᠬᠣᠸᠠ ᠲᠩᠷᠢ᠂ ᠭᠠᠵᠠᠷ᠂ ᠳᠠᠯᠠᠢ ᠪᠣᠯᠣᠨ ᠲᠡᠳᠡᠭᠡᠷ ᠦᠨ ᠳᠣᠲᠣᠷᠠᠬᠢ ᠪᠦᠭᠦᠳᠡ ᠶᠢ ᠪᠦᠲᠦᠭᠡᠵᠦ᠂ ᠳᠣᠯᠣᠳᠠᠬᠢ ᠡᠳᠦᠷ ᠲᠦ ᠠᠮᠠᠷᠠᠭᠰᠠᠨ ᠶᠤᠮ᠃ ᠡᠢᠮᠦ ᠡᠴᠡ ᠶᠣᠬᠣᠸᠠ ᠠᠮᠠᠷᠠᠯ ᠤᠨ ᠡᠳᠦᠷ ᠢ ᠢᠷᠥᠭᠡᠵᠦ᠂ ᠠᠷᠢᠭᠤᠨ ᠢᠶᠠᠷ ᠲᠤᠰᠠᠭᠠᠷᠯᠠᠵᠠᠢ᠃
12 ᠴᠢ ᠡᠴᠢᠭᠡ᠂ ᠡᠬᠡ ᠪᠡᠨ ᠬᠦᠨᠳᠦᠯᠡ᠃ ᠲᠡᠭᠡᠪᠡᠯ ᠴᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠴᠢᠮᠠ ᠳᠤ ᠰᠣᠶᠣᠷᠬᠠᠬᠤ ᠭᠠᠵᠠᠷ ᠳᠡᠭᠡᠷᠡ ᠡᠳᠦᠷ ᠤᠳ ᠴᠢᠨᠢ ᠤᠷᠲᠤᠰᠬᠤ ᠪᠣᠯᠣᠨᠠ᠃
13 ᠴᠢ ᠬᠥᠮᠦᠨ ᠪᠦᠦ ᠠᠯᠠ᠃
14 ᠴᠢ ᠪᠦᠦ ᠵᠠᠪᠬᠠᠢᠷᠠ᠃
15 ᠴᠢ ᠪᠦᠦ ᠬᠤᠯᠠᠭᠠᠢᠯᠠ᠃
16 ᠴᠢ ᠬᠥᠷᠰᠢ ᠶᠢᠨ ᠢᠶᠠᠨ ᠡᠰᠡᠷᠭᠦ ᠬᠤᠳᠠᠯ ᠢᠶᠠᠷ ᠪᠦᠦ ᠭᠡᠷᠡᠴᠢᠯᠡ᠃
17 ᠴᠢ ᠬᠥᠷᠰᠢ ᠶᠢᠨ ᠢᠶᠠᠨ ᠭᠡᠷ ᠣᠷᠣᠨ ᠳᠤ ᠪᠦᠦ ᠰᠠᠨᠠᠭᠠᠷᠬᠠ᠂ ᠬᠥᠷᠰᠢ ᠶᠢᠨ ᠢᠶᠠᠨ ᠡᠬᠡᠨᠡᠷ᠂ ᠵᠠᠷᠤᠴᠠ ᠰᠢᠪᠡᠭᠴᠢᠨ᠂ ᠦᠬᠡᠷ᠂ ᠡᠯᠵᠢᠭᠡ ᠵᠡᠷᠭᠡ ᠬᠥᠷᠰᠢ ᠶᠢᠨ ᠢᠶᠠᠨ ᠶᠠᠭᠤᠨ ᠳᠤᠨᠢ ᠴᠤ ᠪᠦᠦ ᠰᠠᠨᠠᠭᠠᠷᠬᠠ》 ᠭᠡᠪᠡ᠃
18 ᠪᠦᠬᠦ ᠠᠷᠠᠳ ᠲᠦᠮᠡᠨ ᠠᠶᠤᠩ᠋ᠭᠠ᠂ ᠭᠢᠯᠪᠡᠭᠡᠨ ᠦ ᠭᠢᠯᠪᠠᠭᠠᠨ᠂ ᠪᠦᠷᠢᠶᠡᠨ ᠦ ᠳᠠᠭᠤᠨ ᠪᠠ ᠤᠲᠤᠭᠠᠨ ᠳᠤ ᠪᠦᠷᠬᠦᠭᠳᠡᠭᠰᠡᠨ ᠠᠭᠤᠯᠠ ᠶᠢ ᠬᠠᠷᠠᠵᠤ ᠪᠠᠢᠯᠠ᠃ ᠠᠷᠠᠳ ᠲᠦᠮᠡᠨ ᠡᠳᠡᠭᠡᠷ ᠢ ᠬᠠᠷᠠᠭᠠᠳ ᠳᠠᠭᠵᠢᠨ ᠴᠡᠴᠡᠷᠡᠵᠦ ᠬᠣᠯᠠ ᠵᠣᠭᠰᠣᠪᠠ᠃ 19 ᠲᠡᠳᠡ ᠮᠣᠰᠧ ᠳᠤ᠄ 《ᠲᠠ ᠪᠢᠳᠡᠨ ᠲᠡᠢ ᠶᠠᠷᠢ᠂ ᠪᠢᠳᠡ ᠰᠣᠨᠣᠰᠣᠶᠠ᠃ ᠬᠠᠷᠢᠨ ᠪᠤᠷᠬᠠᠨ ᠪᠢᠳᠡᠨ ᠲᠡᠢ ᠶᠠᠷᠢᠬᠤ ᠦᠭᠡᠢ ᠪᠠᠢᠭ᠂ ᠡᠰᠡ ᠲᠡᠭᠡᠪᠡᠯ ᠪᠢᠳᠡ ᠦᠬᠦᠬᠦ ᠪᠣᠯᠣᠨᠠ》 ᠭᠡᠪᠡ᠃ 20 ᠮᠣᠰᠧ ᠠᠷᠠᠳ ᠲᠦᠮᠡᠨ ᠳᠦ᠄ 《ᠪᠦᠦ ᠠᠶᠤᠵᠠᠭᠠ᠃ ᠪᠤᠷᠬᠠᠨ ᠵᠠᠯᠠᠷᠠᠨ ᠢᠷᠡᠭᠰᠡᠨ ᠨᠢ ᠲᠠ ᠨᠠᠷ ᠢ ᠰᠣᠷᠢᠵᠤ᠂ ᠥᠪᠡᠷ ᠡᠴᠡ ᠨᠢ ᠡᠮᠢᠶᠡᠯᠭᠡᠬᠦ ᠶᠢᠨ ᠲᠤᠯᠠᠳᠠ ᠪᠥᠭᠡᠳ ᠡᠢᠨ ᠬᠦ ᠲᠠ ᠨᠠᠷ ᠢ ᠨᠢᠭᠦᠯ ᠦᠢᠯᠡᠳᠬᠦ ᠦᠭᠡᠢ ᠪᠠᠢᠭᠠᠰᠠᠢ ᠭᠡᠰᠡᠨ ᠳᠡᠭᠡᠨ ᠶᠤᠮ》 ᠭᠡᠪᠡ᠃ 21 ᠠᠷᠠᠳ ᠲᠦᠮᠡᠨ ᠬᠣᠯᠠ ᠵᠣᠭᠰᠣᠬᠤ ᠳᠤ᠂ ᠮᠣᠰᠧ ᠪᠤᠷᠬᠠᠨ ᠤ ᠪᠠᠢᠭᠠ ᠲᠦᠨᠡᠷ ᠬᠠᠷᠠᠩ᠋ᠭᠤᠢ ᠤᠷᠤᠭᠤ ᠣᠢᠷᠠᠲᠤᠨ ᠣᠴᠢᠵᠠᠢ᠃
ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠵᠢᠷᠤᠮ
22 ᠶᠣᠬᠣᠸᠠ ᠮᠣᠰᠧ ᠳᠤ᠄ 《ᠴᠢ ᠢᠰᠷᠧᠯᠴᠦᠳ ᠲᠦ ᠢᠩᠭᠢᠵᠦ ᠬᠡᠯᠡ᠄ 〈ᠲᠩᠷᠢ ᠡᠴᠡ ᠲᠠ ᠨᠠᠷ ᠲᠠᠢ ᠶᠠᠷᠢᠬᠤ ᠶᠢ ᠮᠢᠨᠢ ᠲᠠ ᠨᠠᠷ ᠪᠡᠶᠡ ᠪᠡᠷ ᠢᠶᠠᠨ ᠬᠠᠷᠠᠯᠠ᠃ 23 ᠡᠢᠮᠦ ᠡᠴᠡ ᠲᠠ ᠨᠠᠷ ᠨᠠᠳᠠ ᠲᠠᠢ ᠵᠡᠷᠭᠡᠴᠡᠭᠦᠯᠦᠨ ᠥᠭᠡᠷᠡ ᠪᠤᠷᠬᠠᠳ ᠪᠦᠦ ᠪᠦᠲᠦᠭᠡ᠃ ᠮᠥᠩᠭᠥᠨ ᠪᠤᠷᠬᠠᠳ ᠪᠤᠶᠤ ᠠᠯᠲᠠᠨ ᠪᠤᠷᠬᠠᠳ ᠪᠦᠦ ᠬᠢ᠃ 24 ᠬᠠᠷᠢᠨ ᠴᠢ ᠮᠢᠨᠦ ᠲᠥᠯᠥᠭᠡ ᠰᠢᠷᠣᠢ ᠪᠠᠷ ᠲᠠᠬᠢᠯ ᠤᠨ ᠰᠢᠷᠡᠭᠡ ᠬᠢᠪᠡᠯ ᠪᠣᠯᠣᠨᠠ᠂ ᠡᠭᠦᠨ ᠦ ᠳᠡᠭᠡᠷᠡ ᠴᠢ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ᠂ ᠡᠪ ᠦᠨ ᠲᠠᠬᠢᠯ᠂ ᠬᠣᠨᠢ ᠦᠬᠡᠷ ᠡᠷᠭᠦᠭᠡᠷᠡᠢ᠃ ᠪᠢ ᠨᠡᠷᠡ ᠪᠡᠨ ᠳᠤᠷᠠᠰᠤᠭᠤᠯᠬᠤ ᠭᠠᠵᠠᠷ ᠪᠣᠯᠭᠠᠨ ᠳᠤ ᠴᠢᠮᠠ ᠳᠡᠭᠡᠷᠡ ᠢᠷᠡᠵᠦ᠂ ᠴᠢᠮᠠᠶᠢ ᠢᠷᠥᠭᠡᠨᠡ᠃ 25 ᠬᠡᠷᠪᠡ ᠴᠢ ᠨᠠᠳᠠ ᠳᠤ ᠵᠣᠷᠢᠭᠤᠯᠤᠨ ᠴᠢᠯᠠᠭᠤ ᠪᠠᠷ ᠲᠠᠬᠢᠯ ᠤᠨ ᠰᠢᠷᠡᠭᠡ ᠬᠢᠬᠦ ᠭᠡᠪᠡᠯ ᠴᠠᠪᠴᠢᠨ ᠵᠠᠰᠠᠭᠰᠠᠨ ᠴᠢᠯᠠᠭᠤ ᠪᠠᠷ ᠪᠦᠦ ᠪᠠᠷᠢ᠃ ᠬᠡᠷᠪᠡ ᠴᠢ ᠲᠡᠭᠦᠨ ᠳᠡᠭᠡᠷᠡ ᠪᠠᠭᠠᠵᠢ ᠬᠡᠷᠡᠭᠯᠡᠪᠡᠯ ᠲᠡᠭᠦᠨ ᠢ ᠪᠤᠵᠠᠷᠯᠠᠨᠠ᠃ 26 ᠴᠢ ᠮᠢᠨᠦ ᠲᠠᠬᠢᠯ ᠤᠨ ᠰᠢᠷᠡᠭᠡ ᠥᠭᠡᠳᠡ ᠱᠠᠲᠤ ᠪᠠᠷ ᠭᠠᠷᠴᠤ ᠪᠣᠯᠬᠤ ᠦᠭᠡᠢ᠃ ᠨᠢᠴᠦᠭᠦᠨ ᠪᠡᠶᠡ ᠴᠢᠨᠢ ᠲᠡᠭᠦᠨ ᠳᠡᠭᠡᠷᠡ ᠦᠵᠡᠭᠳᠡᠬᠦ ᠪᠤᠢ᠃〉