ᠡᠬᠢᠯᠡᠯ ᠬᠣᠶᠠᠷ
1 ᠲᠩᠷᠢ ᠭᠠᠵᠠᠷ᠂ ᠲᠦᠮᠡᠨ ᠪᠣᠳᠠᠰ ᠨᠢ ᠡᠢᠨ ᠬᠦ ᠪᠦᠷᠢᠳᠴᠡᠢ᠃ 2 ᠳᠣᠯᠣᠳᠠᠬᠢ ᠡᠳᠦᠷ ᠪᠣᠯᠬᠤ ᠳᠤ᠂ ᠪᠤᠷᠬᠠᠨ ᠠᠵᠢᠯ ᠢᠶᠠᠨ ᠬᠢᠵᠦ ᠳᠠᠭᠤᠰᠬᠠᠭᠰᠠᠨ ᠪᠠ ᠳᠣᠯᠣᠳᠠᠬᠢ ᠡᠳᠦᠷ ᠪᠦᠬᠦ ᠠᠵᠢᠯ ᠠᠴᠠ ᠪᠠᠨ ᠠᠮᠠᠷᠠᠵᠠᠢ᠃ 3 ᠪᠤᠷᠬᠠᠨ ᠳᠣᠯᠣᠳᠠᠬᠢ ᠡᠳᠦᠷ ᠢ ᠢᠷᠥᠭᠡᠵᠦ᠂ ᠠᠷᠢᠭᠤᠰᠬᠠᠪᠠ᠃ ᠤᠴᠢᠷ ᠨᠢ ᠡᠨᠡ ᠡᠳᠦᠷ ᠪᠤᠷᠬᠠᠨ ᠪᠦᠲᠦᠭᠡᠬᠦ ᠵᠣᠬᠢᠶᠠᠬᠤ ᠪᠦᠬᠦ ᠠᠵᠢᠯ ᠠᠴᠠ ᠪᠠᠨ ᠠᠮᠠᠷᠠᠭᠰᠠᠨ ᠶᠤᠮ᠃
ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ ᠡᠭᠦᠰᠦᠯ
4 ᠲᠩᠷᠢ ᠭᠠᠵᠠᠷ ᠤᠨ ᠪᠦᠲᠦᠭᠰᠡᠨ ᠲᠡᠦᠬᠡ ᠡᠢᠮᠦ ᠪᠢᠯᠡ᠃
5 ᠶᠣᠬᠣᠸᠠ ᠪᠤᠷᠬᠠᠨ ᠭᠠᠵᠠᠷ ᠳᠡᠭᠡᠷᠡ ᠬᠤᠷᠠ ᠪᠣᠷᠣᠭᠠᠨ ᠣᠷᠣᠭᠤᠯᠤᠭᠠ ᠦᠭᠡᠢ ᠤᠴᠢᠷ ᠭᠠᠵᠠᠷ ᠳᠡᠭᠡᠷᠡ ᠮᠣᠳᠣ ᠪᠤᠲᠠ ᠬᠠᠷᠠᠬᠠᠨ ᠪᠠᠢᠬᠤ ᠦᠭᠡᠢ᠂ ᠬᠡᠭᠡᠷᠡ ᠲᠠᠯᠠ ᠳᠤ ᠡᠪᠡᠰᠦ ᠨᠣᠭᠣᠭᠠ ᠴᠤ ᠤᠷᠭᠤᠭᠠ ᠦᠭᠡᠢ᠃ ᠠᠲᠠᠷ ᠬᠠᠭᠠᠯᠬᠤ ᠬᠥᠮᠦᠨ ᠴᠤ ᠪᠠᠢᠭᠠ ᠦᠭᠡᠢ᠃ 6 ᠠᠭᠤᠷ ᠮᠠᠨᠠᠨ ᠭᠠᠵᠠᠷ ᠠᠴᠠ ᠬᠥᠭᠡᠷᠴᠦ᠂ ᠪᠦᠬᠦ ᠭᠠᠵᠠᠷ ᠤᠨ ᠭᠠᠳᠠᠷᠭᠤ ᠶᠢ ᠤᠮᠳᠠᠯᠠᠵᠤ ᠪᠠᠢᠯᠠ᠃ 7 ᠲᠡᠷᠡ ᠦᠶᠡ ᠳᠦ᠂ ᠶᠣᠬᠣᠸᠠ ᠪᠤᠷᠬᠠᠨ ᠰᠢᠷᠣᠢ ᠶᠢᠨ ᠲᠣᠭᠣᠰᠣ ᠪᠠᠷ ᠬᠥᠮᠦᠨ ᠢ ᠬᠢᠵᠦ᠂ ᠠᠮᠢ ᠶᠢᠨ ᠠᠮᠢᠰᠬᠤᠯ ᠢ ᠬᠠᠮᠠᠷ ᠢᠶᠠᠷ ᠨᠢ ᠦᠯᠢᠶᠡᠵᠦ ᠣᠷᠣᠭᠤᠯᠬᠤ ᠳᠤ᠂ ᠬᠥᠮᠦᠨ ᠠᠮᠢᠳᠤ ᠴᠣᠭᠴᠠ ᠪᠣᠯᠵᠠᠢ᠃ 8 ᠶᠣᠬᠣᠸᠠ ᠪᠤᠷᠬᠠᠨ ᠳᠣᠷᠣᠨᠠ ᠵᠦᠭ ᠦᠨ ᠡᠳᠧᠨ 1 ᠳᠤ ᠴᠡᠴᠡᠷᠯᠢᠭ ᠪᠠᠢᠭᠤᠯᠤᠭᠠᠳ ᠥᠪᠡᠷ ᠦᠨ ᠢᠶᠠᠨ ᠬᠢᠭᠰᠡᠨ ᠬᠥᠮᠦᠨ ᠢ ᠲᠡᠨᠳᠡ ᠪᠠᠢᠯᠭᠠᠵᠠᠢ᠃ 9 ᠶᠣᠬᠣᠸᠠ ᠪᠤᠷᠬᠠᠨ ᠲᠡᠨᠳᠡ ᠬᠥᠷᠥᠰᠥᠨ ᠡᠴᠡ ᠶᠠᠩᠵᠤ ᠪᠦᠷᠢ ᠶᠢᠨ ᠮᠣᠳᠣᠳ ᠢ ᠤᠷᠭᠤᠭᠤᠯᠪᠠ᠃ ᠲᠡᠳᠡᠭᠡᠷ ᠨᠢ ᠬᠠᠷᠠᠬᠤ ᠳᠤ ᠲᠠᠭᠠᠲᠠᠢ᠂ ᠬᠦᠨᠡᠰᠦ ᠪᠣᠯᠭᠠᠬᠤ ᠳᠤ ᠰᠠᠢᠨ ᠪᠠᠢᠯᠠ᠃
10 ᠡᠳᠧᠨ ᠡᠴᠡ ᠡᠬᠢ ᠠᠪᠤᠭᠰᠠᠨ ᠨᠢᠭᠡᠨ ᠮᠥᠷᠡᠨ ᠲᠡᠷᠡ ᠴᠡᠴᠡᠷᠯᠢᠭ ᠢ ᠤᠰᠤᠯᠠᠳᠠᠭ ᠪᠥᠭᠡᠳ ᠲᠡᠨᠳᠡ ᠡᠴᠡ ᠳᠥᠷᠪᠡ ᠰᠠᠯᠪᠤᠷᠢᠯᠠᠵᠠᠢ᠃ 11 ᠡᠬᠢᠨ ᠤ ᠬᠢᠨᠢ ᠫᠢᠱᠣᠨ ᠭᠡᠳᠡᠭ ᠨᠡᠷᠡ ᠲᠠᠢ ᠪᠥᠭᠡᠳ ᠬᠠᠸᠢᠯᠠ ᠶᠢᠨ ᠪᠦᠬᠦ ᠨᠤᠲᠤᠭ ᠢ ᠲᠣᠭᠣᠷᠢᠨ ᠥᠩᠭᠡᠷᠡᠳᠡᠭ᠃ ᠲᠡᠨᠳᠡ ᠠᠯᠲᠠ ᠪᠠᠢᠳᠠᠭ᠃ 12 ᠲᠡᠷᠡ ᠨᠤᠲᠤᠭ ᠤᠨ ᠠᠯᠲᠠ ᠨᠢ ᠰᠠᠢᠨ᠂ ᠠᠩᠬᠢᠯᠤᠭᠤᠨ ᠳᠠᠪᠠᠷᠬᠠᠢ 2 ᠂ ᠰᠤᠳᠠᠯᠲᠤ ᠮᠠᠨᠤᠬᠤ ᠴᠤ ᠲᠡᠨᠳᠡ ᠪᠠᠢᠭᠰᠠᠨ᠃ 13 ᠬᠣᠶᠠᠳᠠᠬᠢ ᠮᠥᠷᠡᠨ ᠨᠢ ᠭᠢᠬᠣᠨ ᠭᠡᠳᠡᠭ ᠨᠡᠷᠡ ᠲᠠᠢ ᠪᠥᠭᠡᠳ ᠺᠦᠱ ᠤᠨ ᠪᠦᠬᠦ ᠨᠤᠲᠤᠭ ᠢ ᠲᠣᠭᠣᠷᠢᠨ ᠥᠩᠭᠡᠷᠡᠳᠡᠭ᠃ 14 ᠭᠤᠷᠪᠠᠳᠠᠬᠢ ᠮᠥᠷᠡᠨ ᠨᠢ ᠲᠢᠭᠷᠢᠰ ᠭᠡᠳᠡᠭ ᠨᠡᠷᠡ ᠲᠡᠢ ᠪᠥᠭᠡᠳ ᠠᠱᠦ᠋ᠷ ᠤᠨ ᠵᠡᠭᠦᠨ ᠲᠠᠯᠠ ᠪᠠᠷ ᠤᠷᠤᠰᠳᠠᠭ᠃ ᠳᠥᠷᠪᠡᠳᠡᠬᠢ ᠮᠥᠷᠡᠨ ᠨᠢ ᠡᠶᠦ᠋ᠹᠷᠠᠲ᠋ᠧᠰ ᠶᠤᠮ᠃
15 ᠶᠣᠬᠣᠸᠠ ᠪᠤᠷᠬᠠᠨ ᠬᠥᠮᠦᠨ ᠢ ᠡᠳᠧᠨ ᠴᠡᠴᠡᠷᠯᠢᠭ ᠲᠤ ᠠᠪᠠᠴᠢᠵᠤ ᠲᠠᠯᠪᠢᠭᠠᠳ ᠲᠡᠷᠡ ᠭᠠᠵᠠᠷ ᠢ ᠠᠷᠠᠴᠢᠯᠠᠭᠤᠯᠤᠨ ᠰᠠᠬᠢᠭᠤᠯᠵᠠᠢ᠃ 16 ᠶᠣᠬᠣᠸᠠ ᠪᠤᠷᠬᠠᠨ ᠲᠡᠷᠡ ᠬᠥᠮᠦᠨ ᠳᠦ ᠲᠤᠰᠢᠶᠠᠨ᠄ 《ᠴᠡᠴᠡᠷᠯᠢᠭ ᠤᠨ ᠠᠯᠢ ᠴᠤ ᠮᠣᠳᠣᠨ ᠠᠴᠠ ᠴᠢ ᠳᠤᠷᠠ ᠪᠠᠷ ᠢᠶᠠᠨ ᠢᠳᠡᠵᠦ ᠪᠣᠯᠣᠨᠠ᠃ 17 ᠭᠡᠪᠡᠴᠦ ᠰᠠᠢᠨ ᠮᠠᠭᠤ ᠶᠢ ᠮᠡᠳᠡᠭᠦᠯᠦᠭᠴᠢ ᠮᠣᠳᠣᠨ ᠠᠴᠠ ᠢᠳᠡᠵᠦ ᠪᠣᠯᠬᠤ ᠦᠭᠡᠢ᠃ ᠲᠡᠭᠦᠨ ᠡᠴᠡ ᠢᠳᠡᠭᠰᠡᠨ ᠲᠡᠷᠡ ᠡᠳᠦᠷ ᠲᠡᠭᠡᠨ ᠯᠠ ᠴᠢ ᠯᠠᠪᠲᠠᠢ ᠦᠬᠦᠨᠡ︕》 ᠭᠡᠪᠡ᠃
18 ᠶᠣᠬᠣᠸᠠ ᠪᠤᠷᠬᠠᠨ᠄ 《ᠬᠥᠮᠦᠨ ᠭᠠᠭᠴᠠᠭᠠᠷ ᠢᠶᠠᠨ ᠪᠠᠢᠬᠤ ᠨᠢ ᠰᠠᠢᠨ ᠪᠢᠰᠢ᠂ ᠲᠡᠭᠦᠨ ᠳᠦ ᠲᠣᠬᠢᠷᠠᠬᠤ ᠲᠤᠰᠠᠯᠠᠭᠴᠢ ᠶᠢ ᠪᠢ ᠵᠣᠬᠢᠶᠠᠶᠠ》 ᠬᠡᠮᠡᠨ ᠠᠢᠯᠠᠳᠴᠠᠢ᠃ 19 ᠶᠣᠬᠣᠸᠠ ᠪᠤᠷᠬᠠᠨ ᠰᠢᠷᠣᠢ ᠪᠠᠷ ᠬᠡᠭᠡᠷᠡ ᠶᠢᠨ ᠠᠯᠢᠪᠠ ᠠᠮᠢᠲᠠᠨ᠂ ᠣᠭᠲᠠᠷᠭᠤᠢ ᠶᠢᠨ ᠠᠯᠢᠪᠠ ᠰᠢᠪᠠᠭᠤ ᠶᠢ ᠬᠢᠵᠦ᠂ ᠠᠳᠠᠮ ᠳᠤ ᠠᠪᠴᠢᠷᠠᠨ᠂ ᠲᠡᠳᠡᠭᠡᠷ ᠢ ᠬᠡᠷᠬᠢᠨ ᠨᠡᠷᠡᠯᠡᠬᠦ ᠶᠢ ᠨᠢ ᠦᠵᠡᠯᠡ᠃ ᠠᠳᠠᠮ ᠠᠮᠢ ᠲᠠᠢ ᠪᠣᠯᠭᠠᠨ ᠢ ᠶᠠᠭᠤ ᠭᠡᠵᠦ ᠳᠠᠭᠤᠳᠠᠭᠰᠠᠨ ᠪᠣᠯ᠂ ᠲᠡᠷᠡ ᠨᠢ ᠲᠡᠭᠦᠨ ᠦ ᠨᠡᠷᠡ ᠪᠣᠯᠵᠠᠢ᠃ 20 ᠡᠢᠨ ᠬᠦ ᠠᠳᠠᠮ ᠠᠯᠢᠪᠠ ᠮᠠᠯ ᠠᠳᠤᠭᠤᠰᠤ᠂ ᠣᠭᠲᠠᠷᠭᠤᠢ ᠶᠢᠨ ᠰᠢᠪᠠᠭᠤᠳ᠂ ᠬᠡᠭᠡᠷᠡ ᠶᠢᠨ ᠠᠯᠢᠪᠠ ᠠᠮᠢᠲᠠᠨ ᠳᠤ ᠨᠡᠷᠡ ᠥᠭᠴᠡᠢ᠃ ᠬᠠᠷᠢᠨ ᠠᠳᠠᠮ ᠳᠤ ᠲᠣᠬᠢᠷᠠᠬᠤ ᠲᠤᠰᠠᠯᠠᠭᠴᠢ ᠣᠯᠳᠠᠭᠰᠠᠨ ᠦᠭᠡᠢ᠃ 21 ᠲᠡᠭᠡᠭᠡᠳ ᠶᠣᠬᠣᠸᠠ ᠪᠤᠷᠬᠠᠨ ᠠᠳᠠᠮ ᠢ ᠭᠦᠨ ᠨᠣᠢᠷ ᠲᠤ ᠣᠷᠣᠭᠤᠯᠪᠠ᠃ ᠲᠡᠭᠦᠨ ᠢ ᠤᠨᠲᠠᠵᠤ ᠪᠠᠢᠬᠤ ᠳᠤ ᠬᠠᠪᠢᠷᠭᠠ ᠠᠴᠠ ᠨᠢ ᠨᠢᠭᠡ ᠶᠢ ᠠᠪᠤᠭᠠᠳ᠂ ᠥᠨᠥᠬᠢ ᠬᠡᠰᠡᠭ ᠢ ᠨᠢ ᠮᠢᠬᠠ ᠪᠠᠷ ᠪᠥᠭᠯᠡᠵᠡᠢ᠃ 22 ᠶᠣᠬᠣᠸᠠ ᠪᠤᠷᠬᠠᠨ ᠠᠳᠠᠮ 3 ᠠᠴᠠ ᠠᠪᠤᠭᠰᠠᠨ ᠲᠡᠷᠡ ᠬᠠᠪᠢᠷᠭᠠ ᠪᠠᠷ ᠡᠮᠡᠭᠲᠡᠢ ᠬᠥᠮᠦᠨ ᠢ ᠪᠦᠲᠦᠭᠡᠵᠦ᠂ ᠲᠡᠭᠦᠨ ᠢ ᠠᠳᠠᠮ ᠳᠤ ᠠᠪᠴᠢᠷᠠᠪᠠ᠃ 23 ᠠᠳᠠᠮ᠄ 《ᠡᠨᠡ ᠪᠣᠯ ᠶᠠᠰᠤᠨ ᠠᠴᠠ ᠮᠢᠨᠢ ᠭᠠᠷᠤᠭᠰᠠᠨ ᠶᠠᠰᠤ ᠮᠢᠬᠠᠨ ᠠᠴᠠ ᠮᠢᠨᠢ ᠭᠠᠷᠤᠭᠰᠠᠨ ᠮᠢᠬᠠ ᠪᠠᠢᠨᠠ᠂ ᠲᠡᠷᠡ ᠪᠡᠷ ᠡᠷᠡ ᠬᠥᠮᠦᠨ ᠡᠴᠡ ᠠᠪᠤᠭᠳᠠᠭᠰᠠᠨ ᠲᠤᠯᠠ ᠡᠮᠡ ᠬᠥᠮᠦᠨ ᠭᠡᠭᠳᠡᠨᠡ 4 》
ᠭᠡᠵᠦ ᠬᠡᠯᠡᠵᠡᠢ᠃ 24 ᠡᠢᠮᠦ ᠡᠴᠡ ᠡᠷᠡ ᠬᠥᠮᠦᠨ ᠡᠴᠢᠭᠡ ᠡᠬᠡ ᠪᠡᠨ ᠣᠷᠬᠢᠭᠠᠳ ᠡᠬᠡᠨᠡᠷ ᠲᠡᠢ ᠪᠡᠨ ᠨᠡᠢᠯᠡᠨ᠂ ᠬᠣᠶᠠᠭᠤᠯᠠ ᠪᠠᠨ ᠨᠢᠭᠡ ᠮᠢᠬᠠᠨ ᠪᠡᠶᠡ ᠪᠣᠯᠣᠨᠠ᠃ 25 ᠡᠷᠡ ᠬᠥᠮᠦᠨ ᠡᠬᠡᠨᠡᠷ ᠲᠡᠢ ᠪᠡᠨ ᠬᠣᠶᠠᠭᠤᠯᠠ ᠨᠢᠴᠦᠭᠦᠨ ᠪᠠᠢᠭᠰᠠᠨ ᠪᠥᠭᠡᠳ ᠲᠡᠳᠡ ᠢᠴᠢᠭᠰᠡᠨ ᠦᠭᠡᠢ᠃