ᠡᠬᠢᠯᠡᠯ ᠵᠢᠷᠭᠤᠭᠠ
ᠶᠡᠬᠡ ᠦᠶᠡᠷ ᠦᠨ ᠤᠴᠢᠷ
1 ᠭᠠᠵᠠᠷ ᠳᠡᠭᠡᠷᠡ ᠬᠥᠮᠦᠨ ᠣᠯᠠᠰᠢᠷᠠᠵᠤ ᠡᠬᠢᠯᠡᠨ ᠲᠡᠳᠡᠨ ᠳᠦ ᠥᠬᠢᠳ ᠲᠥᠷᠥᠵᠦ ᠪᠠᠢᠬᠤ ᠳᠤ᠂ 2 ᠪᠤᠷᠬᠠᠨ ᠤ ᠬᠥᠪᠡᠭᠦᠳ ᠬᠥᠮᠦᠨ ᠦ ᠥᠬᠢᠳ ᠤᠨ ᠭᠤᠸᠠ ᠦᠵᠡᠰᠬᠦᠯᠡᠩ ᠢ ᠦᠵᠡᠭᠡᠳ᠂ ᠲᠡᠳᠡᠨ ᠡᠴᠡ ᠰᠣᠩ᠋ᠭᠣᠭᠰᠠᠨ ᠪᠣᠯᠭᠠᠨ ᠢᠶᠠᠨ ᠡᠬᠡᠨᠡᠷ ᠪᠣᠯᠭᠠᠪᠠ᠃ 3 ᠲᠡᠭᠡᠬᠦ ᠳᠦ ᠶᠣᠬᠣᠸᠠ᠄ 《ᠮᠢᠨᠦ ᠰᠦᠨᠡᠰᠦ ᠬᠥᠮᠦᠨ ᠲᠡᠢ ᠮᠥᠩᠬᠡᠳᠡ ᠬᠠᠮᠲᠤ ᠪᠠᠢᠬᠤ ᠪᠢᠰᠢ᠂ ᠤᠴᠢᠷ ᠨᠢ ᠲᠡᠳᠡ ᠮᠢᠬᠠᠨ ᠪᠡᠶᠡ ᠶᠤᠮ᠃ ᠲᠡᠳᠡ ᠵᠠᠭᠤ ᠬᠣᠷᠢᠨ ᠵᠢᠯ ᠤᠨ ᠬᠤᠭᠤᠴᠠᠭᠠ ᠲᠠᠢ ᠪᠣᠯᠣᠨᠠ》 ᠭᠡᠵᠡᠢ᠃ 4 ᠪᠤᠷᠬᠠᠨ ᠤ ᠬᠥᠪᠡᠭᠦᠳ ᠬᠥᠮᠦᠨ ᠦ ᠥᠬᠢᠳ ᠢ ᠠᠪᠤᠭᠰᠠᠨ ᠢᠶᠠᠷ ᠬᠡᠦᠬᠡᠳ ᠲᠡᠢ ᠪᠣᠯᠵᠤ ᠪᠠᠢᠭᠰᠠᠨ ᠦᠶᠡ ᠳᠦ ᠨᠧᠹᠢᠯᠢᠮ 12 ᠬᠥᠮᠦᠨ ᠪᠠᠢᠪᠠ᠂ ᠬᠣᠵᠢᠮ ᠨᠢ ᠪᠠᠰᠠ ᠪᠠᠢᠭᠰᠠᠨ᠃ ᠲᠡᠳᠡ ᠪᠣᠯ ᠡᠷᠲᠡ ᠴᠠᠭ ᠤᠨ ᠳᠠᠢᠴᠢᠳ᠂ ᠨᠡᠷᠡ ᠠᠯᠳᠠᠷᠲᠤ ᠬᠥᠮᠦᠰ ᠪᠤᠶᠤ᠃
5 ᠭᠠᠵᠠᠷ ᠳᠡᠯᠡᠬᠡᠢ ᠳᠡᠭᠡᠷᠡᠬᠢ ᠬᠥᠮᠦᠨ ᠦ ᠮᠠᠭᠤ ᠶᠠᠪᠤᠳᠠᠯ ᠦᠯᠡᠮᠵᠢ᠂ ᠵᠢᠷᠦᠬᠡᠨ ᠦ ᠬᠢᠨᠢ ᠪᠣᠳᠣᠯ ᠰᠡᠳᠦᠯ ᠪᠦᠬᠦᠨ ᠢᠮᠠᠭᠲᠠ ᠮᠠᠭᠤ ᠳᠤ ᠯᠠ ᠴᠢᠭᠯᠡᠬᠦ ᠶᠢ ᠶᠣᠬᠣᠸᠠ ᠬᠠᠷᠠᠭᠠᠳ 6 ᠬᠥᠮᠦᠨ ᠢ ᠭᠠᠵᠠᠷ ᠳᠡᠭᠡᠷᠡ ᠵᠣᠬᠢᠶᠠᠭᠰᠠᠨ ᠳᠠᠭᠠᠨ ᠬᠠᠷᠠᠮᠰᠠᠨ᠂ ᠵᠢᠷᠦᠬᠡᠨ ᠳᠡᠭᠡᠨ ᠵᠣᠪᠠᠪᠠ᠃ 7 ᠶᠣᠬᠣᠸᠠ᠄ 《ᠪᠦᠲᠦᠭᠡᠭᠰᠡᠨ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠢᠶᠡᠨ ᠪᠢ ᠭᠠᠵᠠᠷ ᠤᠨ ᠬᠥᠷᠥᠰᠥᠨ ᠡᠴᠡ ᠠᠷᠴᠢᠨ ᠵᠠᠢᠯᠠᠭᠤᠯᠬᠤ ᠪᠣᠯᠣᠨᠠ᠃ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠡᠴᠡ ᠠᠪᠤᠭᠠᠳ ᠮᠠᠯ ᠠᠳᠤᠭᠤᠰᠤ᠂ ᠭᠠᠵᠠᠷ ᠢᠶᠠᠷ ᠮᠥᠯᠬᠥᠭᠴᠢᠳ᠂ ᠣᠭᠲᠠᠷᠭᠤᠢ ᠶᠢᠨ ᠰᠢᠪᠠᠭᠤᠳ ᠢ ᠬᠦᠷᠲᠡᠯᠡ ᠤᠰᠠᠳᠬᠠᠨᠠ᠂ ᠡᠳᠡᠨ ᠢ ᠵᠣᠬᠢᠶᠠᠭᠰᠠᠨ ᠳᠠᠭᠠᠨ ᠪᠢ ᠬᠠᠷᠠᠮᠰᠠᠵᠤ ᠪᠠᠢᠨᠠ》 ᠭᠡᠪᠡ᠃ 8 ᠬᠠᠷᠢᠨ ᠨᠣᠶᠠ ᠶᠣᠬᠣᠸᠠ ᠶᠢᠨ ᠮᠡᠯᠮᠡᠢ ᠳᠦ ᠲᠠᠭᠠᠯᠠᠯ ᠢ ᠣᠯᠵᠠᠢ᠃
ᠪᠤᠷᠬᠠᠨ ᠨᠣᠶᠠ ᠳᠤ ᠮᠡᠳᠡᠭᠳᠡᠪᠡ
9 ᠨᠣᠶᠠ ᠶᠢᠨ ᠲᠡᠦᠬᠡ ᠡᠢᠮᠦ ᠪᠢᠯᠡ᠄ ᠨᠣᠶᠠ ᠦᠶᠡ ᠶᠢᠨ ᠬᠢᠨ ᠤ ᠪᠠᠨ ᠳᠤᠮᠳᠠ ᠵᠥᠪᠲᠦ᠂ ᠴᠢᠭ᠍ᠴᠢ ᠬᠥᠮᠦᠨ ᠪᠠᠢᠪᠠ᠃ ᠨᠣᠶᠠ ᠪᠤᠷᠬᠠᠨ ᠲᠠᠢ ᠬᠠᠮᠲᠤ ᠶᠠᠪᠤᠳᠠᠭ ᠪᠠᠢᠵᠠᠢ᠃ 10 ᠨᠣᠶᠠ ᠳᠤ ᠲᠥᠷᠥᠭᠰᠡᠨ ᠭᠤᠷᠪᠠᠨ ᠬᠦᠦ᠄ ᠱᠧᠮ᠂ ᠾᠠᠮ᠂ ᠶᠠᠹᠧᠲ ᠪᠢᠯᠡ᠃
11 ᠪᠤᠷᠬᠠᠨ ᠤ ᠡᠮᠦᠨᠡ ᠭᠠᠵᠠᠷ ᠳᠡᠯᠡᠬᠡᠢ ᠢᠯᠵᠢᠷᠡᠵᠦ᠂ ᠬᠦᠴᠦᠷᠬᠡᠭᠯᠡᠯ ᠢᠶᠡᠷ ᠳᠦᠭᠦᠷᠪᠡ᠃ 12 ᠪᠤᠷᠬᠠᠨ ᠬᠠᠷᠠᠬᠤ ᠳᠤ᠂ ᠭᠠᠵᠠᠷ ᠳᠡᠯᠡᠬᠡᠢ ᠦᠨᠡᠬᠡᠷ ᠢᠯᠵᠢᠷᠡᠭᠰᠡᠨ ᠪᠠᠢᠪᠠ︕ ᠤᠴᠢᠷ ᠨᠢ ᠮᠢᠬᠠᠨ ᠪᠡᠶᠡᠲᠦ ᠪᠦᠬᠦᠨ ᠦ ᠭᠠᠵᠠᠷ ᠳᠡᠭᠡᠷᠡᠬᠢ ᠦᠢᠯᠡ ᠶᠠᠪᠤᠳᠠᠯ ᠢᠯᠵᠢᠷᠡᠵᠡᠢ᠃ 13 ᠪᠤᠷᠬᠠᠨ ᠨᠣᠶᠠ ᠳᠤ᠄ 《ᠮᠢᠬᠠᠨ ᠪᠡᠶᠡᠲᠦ ᠪᠦᠬᠦᠨ ᠦ ᠡᠴᠦᠰ ᠮᠢᠨᠦ ᠡᠮᠦᠨᠡ ᠬᠦᠷᠴᠦ ᠢᠷᠡᠯᠡ᠃ ᠲᠡᠳᠡᠨ ᠦ ᠤᠯᠠᠮ ᠢᠶᠠᠷ ᠭᠠᠵᠠᠷ ᠳᠡᠯᠡᠬᠡᠢ ᠬᠦᠴᠦᠷᠬᠡᠭᠯᠡᠯ ᠢᠶᠡᠷ ᠳᠦᠭᠦᠷᠦᠭᠰᠡᠨ ᠲᠤᠯᠠ ᠪᠢ ᠥᠪᠡᠷ ᠢᠶᠡᠨ ᠲᠡᠳᠡᠨ ᠢ ᠭᠠᠵᠠᠷ ᠲᠠᠢ ᠬᠠᠮᠲᠤ ᠤᠰᠠᠳᠬᠠᠨᠠ᠃ 14 ᠡᠢᠮᠦ ᠡᠴᠡ ᠴᠢ ᠭᠤᠹᠧᠷ 13 ᠮᠣᠳᠣ ᠪᠠᠷ ᠣᠩ᠋ᠭᠣᠴᠠ ᠬᠢᠭᠲᠦᠨ᠂ ᠲᠡᠭᠦᠨ ᠳᠣᠲᠣᠷᠠ ᠪᠠᠨ ᠲᠠᠰᠤᠯᠭᠠ ᠨᠤᠭᠤᠳ ᠭᠠᠷᠭᠠᠵᠤ ᠳᠣᠲᠣᠷᠠ ᠭᠠᠳᠠᠷ ᠦᠭᠡᠢ ᠳᠠᠪᠠᠷᠬᠠᠢ ᠲᠦᠷᠬᠢ᠃ 15 ᠲᠡᠭᠦᠨ ᠢ ᠡᠢᠨ ᠬᠦ ᠬᠢ᠄ ᠤᠷᠲᠤ ᠨᠢ ᠭᠤᠷᠪᠠᠨ ᠵᠠᠭᠤᠨ ᠲᠣᠬᠣᠢ᠂ ᠥᠷᠭᠡᠨ ᠨᠢ ᠲᠠᠪᠢᠨ ᠲᠣᠬᠣᠢ᠂ ᠥᠨᠳᠥᠷ ᠨᠢ ᠭᠤᠴᠢᠨ ᠲᠣᠬᠣᠢ ᠪᠠᠢᠬᠤ ᠶᠣᠰᠣᠲᠠᠢ᠃ 16 ᠣᠷᠣᠢ ᠠᠴᠠ ᠨᠢ ᠨᠢᠭᠡ ᠲᠣᠬᠣᠢ ᠶᠢᠨ ᠵᠠᠢ ᠳᠤ ᠭᠡᠭᠡᠪᠴᠢ ᠬᠢᠵᠦ᠂ ᠣᠩ᠋ᠭᠣᠴᠠᠨ ᠤ ᠬᠠᠵᠠᠭᠤ ᠲᠠᠯᠠ ᠳᠤ ᠬᠠᠭᠠᠯᠭᠠ ᠭᠠᠷᠭᠠᠨ ᠣᠩ᠋ᠭᠣᠴᠠ ᠶᠢ ᠳᠡᠭᠡᠳᠦ᠂ ᠳᠤᠮᠳᠠ᠂ ᠳᠣᠣᠷᠠᠳᠤ ᠳᠠᠪᠬᠤᠷ ᠲᠠᠢ ᠬᠢ᠃ 17 ᠠᠩ᠋ᠬᠠᠷᠤᠭᠲᠤᠨ᠂ ᠪᠢ ᠤᠳᠠᠯ ᠦᠭᠡᠢ ᠭᠠᠵᠠᠷ ᠳᠡᠯᠡᠬᠡᠢ ᠳᠦ ᠦᠶᠡᠷ ᠪᠠᠭᠤᠯᠭᠠᠵᠤ᠂ ᠲᠩᠷᠢ ᠶᠢᠨ ᠳᠣᠣᠷᠠᠬᠢ ᠠᠮᠢ ᠠᠮᠢᠰᠬᠤᠭᠠ ᠲᠠᠢ ᠮᠢᠬᠠᠨ ᠪᠡᠶᠡᠲᠦ ᠪᠦᠬᠦᠨ ᠢ ᠤᠰᠠᠳᠬᠠᠨᠠ᠃ ᠭᠠᠵᠠᠷ ᠳᠡᠯᠡᠬᠡᠢ ᠳᠦ ᠪᠠᠢᠭᠠ ᠪᠦᠬᠦᠨ ᠰᠥᠨᠥᠨᠡ᠃ 18 ᠬᠠᠷᠢᠨ ᠪᠢ ᠴᠢᠮᠠ ᠲᠠᠢ ᠭᠡᠷᠡ ᠪᠠᠢᠭᠤᠯᠤᠶᠠ᠂ ᠴᠢ ᠥᠪᠡᠷ ᠦᠨ ᠢᠶᠠᠨ ᠬᠥᠪᠡᠭᠦᠳ᠂ ᠡᠬᠡᠨᠡᠷ᠂ ᠪᠡᠷᠢᠶᠡᠳ ᠲᠡᠢ ᠬᠠᠮᠲᠤ ᠲᠡᠷᠡ ᠣᠩ᠋ᠭᠣᠴᠠᠨ ᠳᠤ ᠣᠷᠣ᠃ 19 ᠠᠮᠢᠲᠠᠨ ᠪᠦᠬᠦᠨ ᠡᠴᠡ᠂ ᠮᠢᠬᠠᠨ ᠪᠡᠶᠡᠲᠦ ᠪᠣᠯᠭᠠᠨ ᠠᠴᠠ ᠡᠷᠡ ᠡᠮᠡ ᠬᠣᠣᠰ ᠢ ᠣᠩ᠋ᠭᠣᠴᠠᠨ ᠳᠤ ᠣᠷᠣᠭᠤᠯ᠃ ᠡᠢᠨ ᠬᠦ ᠲᠡᠳᠡᠭᠡᠷ ᠡᠴᠡ ᠲᠥᠷᠥᠯ ᠪᠦᠷᠢ ᠶᠢᠨ ᠡᠷᠡ ᠡᠮᠡ ᠬᠣᠣᠰ ᠪᠦᠷᠢ ᠥᠪᠡᠷ ᠲᠡᠢ ᠴᠢᠨᠢ ᠬᠠᠮᠲᠤ ᠠᠮᠢᠳᠤ ᠦᠯᠡᠳᠡᠬᠦ ᠪᠣᠯᠣᠨᠠ᠃ 20 ᠰᠢᠪᠠᠭᠤᠳ ᠲᠥᠷᠥᠯ ᠲᠥᠷᠥᠯ ᠢᠶᠡᠷ ᠢᠶᠠᠨ᠂ ᠮᠠᠯ ᠠᠳᠤᠭᠤᠰᠤ ᠲᠥᠷᠥᠯ ᠲᠥᠷᠥᠯ ᠢᠶᠡᠷ ᠢᠶᠠᠨ᠂ ᠭᠠᠵᠠᠷ ᠢᠶᠠᠷ ᠮᠥᠯᠬᠥᠭᠴᠢ ᠪᠦᠬᠦᠨ ᠴᠤ ᠲᠥᠷᠥᠯ ᠲᠥᠷᠥᠯ ᠢᠶᠡᠷ ᠢᠶᠠᠨ ᠬᠣᠣᠰ ᠬᠣᠣᠰ ᠢᠶᠠᠷ ᠢᠶᠠᠨ ᠴᠢᠮᠠ ᠤᠷᠤᠭᠤ ᠢᠷᠡᠵᠦ ᠠᠮᠢᠳᠤ ᠦᠯᠡᠳᠡᠬᠦ ᠪᠣᠯᠣᠨᠠ᠃ 21 ᠬᠠᠷᠢᠨ ᠴᠢ ᠲᠥᠷᠥᠯ ᠪᠦᠷᠢ ᠶᠢᠨ ᠬᠣᠭᠣᠯᠠ ᠲᠠᠵᠢᠭᠡᠯ ᠡᠴᠡ ᠠᠪᠴᠤ ᠥᠪᠡᠷ ᠦᠨ ᠢᠶᠠᠨ ᠪᠣᠯᠣᠨ ᠲᠡᠳᠡᠨ ᠦ ᠢᠳᠡᠬᠦ ᠨᠥᠭᠡᠴᠡ ᠪᠣᠯᠭᠠᠨ ᠬᠠᠳᠠᠭᠠᠯᠠ》 ᠭᠡᠵᠡᠢ᠃ 22 ᠨᠣᠶᠠ ᠲᠡᠢᠨ ᠬᠦ ᠦᠢᠯᠡᠳᠴᠦ᠂ ᠪᠤᠷᠬᠠᠨ ᠤ ᠲᠤᠰᠢᠶᠠᠭᠰᠠᠨ ᠪᠦᠬᠦᠨ ᠢ ᠶᠣᠰᠣᠭᠠᠷ ᠨᠢ ᠭᠦᠢᠴᠡᠳᠬᠡᠵᠡᠢ᠃