ᠡᠬᠢᠯᠡᠯ ᠭᠤᠴᠢᠨ ᠨᠠᠢ᠌ᠮᠠ
ᠶᠦᠳᠠ ᠪᠠ ᠲᠠᠮᠠᠷ
1 ᠲᠡᠷᠡ ᠦᠶᠡ ᠳᠦ ᠶᠦᠳᠠ ᠠᠬᠠ ᠳᠡᠭᠦᠦ ᠨᠠᠷ ᠠᠴᠠ ᠪᠠᠨ ᠰᠠᠯᠵᠤ᠂ ᠠᠳᠦ᠋ᠯᠠᠮ ᠤᠨ ᠾᠢᠷᠠ ᠭᠡᠳᠡᠭ ᠬᠥᠮᠦᠨ ᠦ ᠬᠠᠵᠠᠭᠤ ᠳᠤ ᠰᠠᠭᠤᠷᠢᠰᠢᠪᠠ᠃ 2 ᠶᠦᠳᠠ ᠲᠡᠨᠳᠡ ᠱᠦᠶᠠ ᠭᠡᠳᠡᠭ ᠺᠠᠨᠠᠨ ᠬᠥᠮᠦᠨ ᠦ ᠥᠬᠢᠨ ᠢ ᠣᠯᠵᠤ ᠦᠵᠡᠭᠡᠳ᠂ ᠲᠡᠭᠦᠨ ᠢ ᠠᠪᠴᠤ ᠲᠡᠭᠦᠨ ᠲᠡᠢ ᠳᠡᠷᠡ ᠨᠡᠢᠯᠡᠭᠦᠯᠵᠡᠢ᠃ 3 ᠲᠡᠷᠡ ᠵᠢᠷᠮᠦᠰᠦᠯᠡᠵᠦ ᠬᠦᠦ ᠲᠥᠷᠥᠭᠦᠯᠬᠦ ᠳᠦ᠂ ᠶᠦᠳᠠ ᠲᠡᠭᠦᠨ ᠢ ᠧᠷ ᠭᠡᠵᠦ ᠨᠡᠷᠡᠯᠡᠪᠡ᠃ 4 ᠲᠡᠷᠡ ᠡᠮᠡᠭᠲᠡᠢ ᠳᠠᠬᠢᠨ ᠵᠢᠷᠮᠦᠰᠦᠯᠡᠵᠦ᠂ ᠬᠦᠦ ᠲᠥᠷᠥᠭᠦᠯᠦᠭᠡᠳ ᠲᠡᠭᠦᠨ ᠢ ᠪᠠᠨ ᠣᠨᠠᠨ ᠭᠡᠵᠦ ᠨᠡᠷᠡᠯᠡᠭᠰᠡᠨ ᠪᠥᠭᠡᠳ 5 ᠪᠠᠰᠠ ᠳᠠᠬᠢᠨ ᠬᠦᠦ ᠲᠥᠷᠥᠭᠦᠯᠵᠦ᠂ ᠲᠡᠭᠦᠨ ᠢ ᠪᠠᠨ ᠱᠧᠯᠠ ᠭᠡᠵᠦ ᠨᠡᠷᠡᠯᠡᠵᠡᠢ᠃ ᠱᠧᠯᠠ ᠲᠥᠷᠥᠬᠦ ᠳᠦ᠂ ᠶᠦᠳᠠ ᠺᠧᠽᠢᠪ ᠲᠤ ᠪᠠᠢᠯᠠ᠃ 6 ᠶᠦᠳᠠ ᠤᠤᠭᠠᠨ ᠬᠦᠦ ᠧᠷ ᠲᠡᠭᠡᠨ ᠡᠬᠡᠨᠡᠷ ᠠᠪᠴᠤ ᠥᠭᠴᠡᠢ᠃ ᠲᠡᠭᠦᠨ ᠦ ᠨᠡᠷᠡ ᠶᠢ ᠲᠠᠮᠠᠷ ᠭᠡᠳᠡᠭ ᠪᠠᠢᠪᠠ᠃ 7 ᠬᠠᠷᠢᠨ ᠶᠦᠳᠠ ᠶᠢᠨ ᠤᠤᠭᠠᠨ ᠬᠦᠦ ᠧᠷ ᠨᠢ ᠶᠣᠬᠣᠸᠠ ᠶᠢᠨ ᠮᠡᠯᠮᠡᠢ ᠳᠦ ᠬᠣᠷᠣᠨ ᠮᠠᠭᠤ ᠪᠠᠢᠭᠰᠠᠨ ᠲᠤᠯᠠ ᠶᠣᠬᠣᠸᠠ ᠲᠡᠭᠦᠨ ᠢ ᠠᠯᠠᠵᠠᠢ᠃ 8 ᠶᠦᠳᠠ ᠣᠨᠠᠨ ᠳᠤ᠄ 《ᠴᠢ ᠠᠬᠠ ᠶᠢᠨ ᠢᠶᠠᠨ ᠡᠬᠡᠨᠡᠷ ᠲᠡᠢ ᠬᠠᠮᠲᠤ ᠰᠠᠭᠤᠵᠤ ᠠᠬᠠ ᠶᠢᠨ ᠢᠶᠠᠨ ᠲᠥᠯᠥᠭᠡ ᠡᠭᠦᠷᠭᠡ ᠪᠡᠨ ᠪᠡᠶᠡᠯᠡᠭᠦᠯᠵᠦ᠂ ᠠᠬᠠ ᠶᠢᠨ ᠢᠶᠠᠨ ᠤᠭᠰᠠᠭᠠ ᠶᠢ ᠵᠠᠯᠭᠠᠮᠵᠢᠯᠠᠬᠤ ᠦᠷᠡ ᠬᠡᠦᠬᠡᠳ ᠣᠯᠵᠤ ᠥᠭ》 ᠭᠡᠵᠦ ᠬᠡᠯᠡᠪᠡ᠂ 9 ᠬᠠᠷᠢᠨ ᠣᠨᠠᠨ ᠲᠡᠷᠡ ᠦᠷᠡ ᠨᠢ ᠥᠪᠡᠷ ᠦᠨ ᠬᠢᠨᠢ ᠪᠣᠯᠬᠤ ᠦᠭᠡᠢ ᠶᠢ ᠮᠡᠳᠡᠭᠡᠳ᠂ ᠠᠬᠠ ᠶᠢᠨ ᠢᠶᠠᠨ ᠡᠬᠡᠨᠡᠷ ᠲᠡᠢ ᠤᠨᠲᠠᠬᠤ ᠪᠣᠯᠭᠠᠨ ᠳᠠᠭᠠᠨ ᠠᠬᠠ ᠳᠠᠭᠠᠨ ᠦᠷᠡ ᠬᠡᠦᠬᠡᠳ ᠦᠯᠡᠳᠡᠭᠡᠬᠦ ᠦᠭᠡᠢ ᠶᠢᠨ ᠲᠤᠯᠠᠳᠠ ᠦᠷᠡ ᠪᠡᠨ ᠭᠠᠵᠠᠷ ᠲᠤ ᠠᠰᠬᠠᠳᠠᠭ ᠪᠠᠢᠪᠠ᠃ 10 ᠡᠳᠡᠭᠡᠷ ᠦᠢᠯᠡ ᠶᠠᠪᠤᠳᠠᠯ ᠨᠢ ᠶᠣᠬᠣᠸᠠ ᠶᠢᠨ ᠮᠡᠯᠮᠡᠢ ᠳᠦ ᠬᠣᠷᠣᠨ ᠮᠠᠭᠤ ᠪᠠᠢᠭᠰᠠᠨ ᠤᠴᠢᠷ ᠠᠴᠠ ᠲᠡᠷᠡ ᠲᠡᠭᠦᠨ ᠢ ᠪᠠᠰᠠ ᠠᠯᠠᠭᠰᠠᠨ ᠪᠠᠢᠨᠠ᠃ 11 ᠶᠦᠳᠠ ᠪᠡᠷᠢ ᠲᠠᠮᠠᠷ ᠲᠠᠭᠠᠨ᠄ 《ᠴᠢ ᠪᠡᠯᠪᠡᠰᠦᠨ ᠡᠮᠡᠭᠲᠡᠢ ᠪᠣᠯᠣᠭᠰᠠᠨ ᠲᠤᠯᠠ ᠮᠢᠨᠦ ᠬᠦᠦ ᠱᠧᠯᠠ ᠶᠢ ᠨᠠᠰᠤᠨ ᠳᠤ ᠬᠦᠷᠲᠡᠯᠡ ᠡᠴᠢᠭᠡ ᠶᠢᠨ ᠢᠶᠠᠨ ᠭᠡᠷ ᠲᠦ ᠰᠠᠭᠤᠵᠤ ᠪᠠᠢᠭᠠᠷᠠᠢ》 ᠭᠡᠵᠦ ᠬᠡᠯᠡᠪᠡ᠃ ᠤᠴᠢᠷ ᠨᠢ ᠲᠡᠷᠡ ᠱᠧᠯᠠ ᠪᠠᠰᠠ ᠠᠬᠠ ᠨᠠᠷ ᠲᠠᠢ ᠪᠠᠨ ᠠᠳᠠᠯᠢ ᠪᠠᠷ ᠦᠬᠦᠬᠦ ᠪᠤᠢ ᠭᠡᠵᠦ ᠪᠣᠳᠣᠵᠤ ᠪᠠᠢᠯᠠ᠃ ᠲᠡᠭᠡᠭᠡᠳ ᠲᠠᠮᠠᠷ ᠡᠴᠢᠭᠡ ᠶᠢᠨ ᠢᠶᠠᠨ ᠭᠡᠷ ᠲᠦ ᠣᠴᠢᠵᠤ ᠰᠠᠭᠤᠪᠠ᠃
12 ᠲᠡᠭᠦᠨ ᠡᠴᠡ ᠨᠡᠯᠢᠶᠡᠳ ᠬᠣᠢᠨᠠ ᠶᠦᠳᠠ ᠶᠢᠨ ᠡᠬᠡᠨᠡᠷ᠂ ᠱᠦᠶᠠ ᠶᠢᠨ ᠥᠬᠢᠨ ᠨᠠᠰᠤ ᠪᠠᠷᠠᠪᠠ᠃ ᠶᠦᠳᠠ ᠰᠡᠳᠬᠢᠯ ᠲᠠᠢᠳᠬᠤᠷᠠᠭᠰᠠᠨ ᠤ ᠪᠠᠨ ᠳᠠᠷᠠᠭᠠ ᠥᠪᠡᠷ ᠦᠨ ᠢᠶᠠᠨ ᠨᠠᠢᠵᠠ ᠠᠳᠦ᠋ᠯᠠᠮ ᠬᠥᠮᠦᠨ ᠾᠢᠷᠠ ᠲᠠᠢ ᠬᠠᠮᠲᠤ ᠲᠢᠮᠨᠠ ᠥᠭᠡᠳᠡ ᠶᠠᠪᠤᠵᠤ᠂ ᠬᠣᠨᠢ ᠬᠢᠷᠭᠠᠭᠴᠢᠳ ᠳᠡᠭᠡᠷᠡ ᠪᠡᠨ ᠣᠴᠢᠪᠠ᠃ 13 ᠨᠢᠭᠡ ᠬᠥᠮᠦᠨ ᠲᠠᠮᠠᠷ ᠲᠤ᠄ 《ᠲᠠᠨ ᠤ ᠬᠠᠳᠠᠮ ᠡᠴᠢᠭᠡ ᠬᠣᠨᠢ ᠪᠠᠨ ᠬᠢᠷᠭᠠᠬᠤ ᠪᠠᠷ ᠲᠢᠮᠨᠠ ᠥᠭᠡᠳᠡ ᠭᠠᠷᠴᠠᠢ》 ᠭᠡᠵᠦ ᠳᠤᠭᠤᠯᠭᠠᠬᠤ ᠳᠤ᠂ 14 ᠲᠠᠮᠠᠷ ᠪᠡᠯᠪᠡᠰᠦᠷᠡᠯ ᠦᠨ ᠬᠤᠪᠴᠠᠰᠤ ᠪᠠᠨ ᠲᠠᠢᠯᠵᠤ᠂ ᠪᠡᠶᠡ ᠪᠡᠨ ᠨᠥᠮᠥᠷᠭᠡ ᠪᠡᠷ ᠣᠷᠢᠶᠠᠨ᠂ ᠨᠢᠭᠤᠷ ᠢᠶᠠᠨ ᠪᠦᠲᠡᠭᠡᠭᠡᠳ᠂ ᠲᠢᠮᠨᠠ ᠣᠷᠣᠬᠤ ᠵᠠᠮ ᠳᠡᠭᠡᠷᠡᠬᠢ ᠡᠨᠠᠢᠮ ᠤᠨ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠰᠠᠭᠤᠪᠠ᠃ ᠤᠴᠢᠷ ᠨᠢ ᠱᠧᠯᠠ ᠨᠠᠰᠤᠨ ᠳᠤ ᠬᠦᠷᠦᠭᠰᠡᠨ ᠪᠣᠯᠪᠠᠴᠤ᠂ ᠶᠦᠳᠠ ᠲᠡᠭᠦᠨ ᠢ ᠥᠪᠡᠷ ᠲᠡᠢ ᠨᠢ ᠭᠡᠷᠯᠡᠭᠦᠯᠬᠦ ᠦᠭᠡᠢ ᠪᠠᠢᠬᠤ ᠶᠢ ᠲᠠᠮᠠᠷ ᠬᠠᠷᠠᠭᠰᠠᠨ ᠪᠠᠢᠨᠠ᠃ 15 ᠶᠦᠳᠠ ᠲᠡᠭᠦᠨ ᠢ ᠬᠠᠷᠠᠭᠠᠳ ᠶᠠᠩ᠋ᠬᠠᠨ ᠪᠠᠢᠬᠠ ᠭᠡᠵᠦ ᠪᠣᠳᠣᠪᠠ᠃ ᠤᠴᠢᠷ ᠨᠢ ᠲᠡᠷᠡ ᠪᠡᠷ ᠨᠢᠭᠤᠷ ᠢᠶᠠᠨ ᠪᠦᠲᠡᠭᠡᠵᠦ ᠪᠠᠢᠯᠠ᠃ 16 ᠲᠡᠭᠦᠨ ᠢ ᠪᠡᠷᠢ ᠪᠠᠨ ᠭᠡᠵᠦ ᠣᠭᠲᠣ ᠲᠠᠨᠢᠭᠠ ᠦᠭᠡᠢ ᠪᠣᠯᠬᠣᠷ ᠶᠦᠳᠠ ᠵᠠᠮ ᠤᠨ ᠬᠠᠵᠠᠭᠤ ᠳᠤ ᠣᠴᠢᠵᠤ᠂ ᠲᠡᠭᠦᠨ ᠡᠴᠡ᠄ 《ᠬᠥᠶᠶ᠂ ᠨᠠᠮᠠᠶᠢ ᠥᠪᠡᠷ ᠲᠡᠢ ᠪᠡᠨ ᠬᠠᠮᠲᠤ ᠤᠨᠲᠠᠭᠤᠯᠬᠤ ᠤᠤ︖》 ᠭᠡᠵᠡᠢ᠃ ᠲᠡᠷᠡ᠄ 《ᠲᠠ ᠨᠠᠳᠠ ᠳᠤ ᠶᠠᠭᠤ ᠥᠭᠴᠦ᠂ ᠨᠠᠳᠠ ᠲᠠᠢ ᠬᠠᠮᠲᠤ ᠤᠨᠲᠠᠬᠤ ᠶᠤᠮ ᠪᠤᠢ︖》 ᠭᠡᠯᠡ᠃ 17 ᠲᠡᠷᠡ᠄ 《ᠪᠢ ᠰᠦᠷᠦᠭ ᠡᠴᠡ ᠪᠡᠨ ᠨᠢᠭᠡ ᠢᠰᠢᠭᠡ ᠥᠭᠭᠥᠨᠡ》 ᠭᠡᠰᠡᠨ ᠳᠦ᠂ ᠲᠡᠷᠡ ᠪᠡᠷ᠄ 《ᠲᠡᠭᠦᠨ ᠢ ᠪᠠᠨ ᠥᠭᠬᠦ ᠡᠴᠡ ᠡᠮᠦᠨᠡ ᠪᠠᠷᠢᠴᠠᠭᠠ ᠥᠭᠬᠦ ᠤᠤ︖》 ᠭᠡᠵᠡᠢ᠃ 18 ᠶᠦᠳᠠ᠄ 《ᠶᠠᠮᠠᠷ ᠪᠠᠷᠢᠴᠠᠭᠠ ᠠᠪᠬᠤ ᠪᠤᠢ︖》 ᠭᠡᠰᠡᠨ ᠳᠦ᠂ ᠲᠡᠷᠡ᠄ 《ᠥᠪᠡᠷ ᠦᠨ ᠢᠶᠠᠨ ᠲᠠᠮᠠᠭᠠ᠂ ᠲᠡᠭᠦᠨ ᠦ ᠣᠭᠣᠰᠣᠷ ᠪᠣᠯᠣᠨ ᠭᠠᠷ ᠲᠠᠭᠠᠨ ᠪᠠᠢᠭᠠ ᠲᠠᠶᠠᠭ ᠢᠶᠠᠨ ᠥᠭ》 ᠭᠡᠪᠡ᠃ ᠶᠦᠳᠠ ᠲᠡᠳᠡᠭᠡᠷ ᠢ ᠲᠡᠭᠦᠨ ᠳᠦ ᠥᠭᠭᠥᠭᠡᠳ᠂ ᠬᠠᠮᠲᠤ ᠤᠨᠲᠠᠭᠰᠠᠨ ᠳᠤ ᠲᠠᠮᠠᠷ ᠲᠡᠭᠦᠨ ᠡᠴᠡ ᠵᠢᠷᠮᠦᠰᠦᠯᠡᠵᠡᠢ᠃ 19 ᠲᠡᠷᠡ ᠡᠮᠡᠭᠲᠡᠢ ᠪᠣᠰᠴᠤ ᠶᠠᠪᠤᠭᠠᠳ ᠨᠥᠮᠥᠷᠭᠡ ᠪᠡᠨ ᠲᠠᠢᠯᠵᠤ᠂ ᠪᠡᠯᠪᠡᠰᠦᠷᠡᠯ ᠦᠨ ᠬᠤᠪᠴᠠᠰᠤ ᠪᠠᠨ ᠳᠠᠬᠢᠨ ᠡᠮᠦᠰᠪᠡ᠃
20 ᠶᠦᠳᠠ ᠲᠡᠷᠡ ᠡᠮᠡᠭᠲᠡᠢ ᠶᠢᠨ ᠭᠠᠷ ᠠᠴᠠ ᠪᠠᠷᠢᠴᠠᠭᠠ ᠪᠠᠨ ᠠᠪᠬᠤ ᠪᠠᠷ ᠥᠪᠡᠷ ᠦᠨ ᠨᠠᠢᠵᠠ ᠠᠳᠦ᠋ᠯᠠᠮ ᠬᠥᠮᠦᠨ ᠢᠶᠡᠷ ᠨᠢᠭᠡ ᠢᠰᠢᠭᠡ ᠶᠠᠪᠤᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠲᠡᠷᠡ ᠪᠦᠰᠡᠭᠦᠢ ᠶᠢ ᠣᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ 21 ᠨᠠᠢᠵᠠ ᠨᠢ ᠲᠡᠨᠳᠡᠬᠢ ᠶᠢᠨ ᠬᠥᠮᠦᠰ ᠡᠴᠡ᠄ 《ᠵᠠᠮ ᠤᠨ ᠬᠠᠵᠠᠭᠤ ᠳᠤ ᠡᠨᠠᠢᠮ ᠳᠤ ᠪᠠᠢᠭᠰᠠᠨ ᠶᠠᠩ᠋ᠬᠠᠨ ᠬᠠᠮᠢᠭᠠ ᠪᠠᠢᠨᠠ ᠪᠤᠢ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ ᠲᠡᠳᠡ᠄ 《ᠡ᠊ᠨᠳᠡ ᠶᠠᠩ᠋ᠬᠠᠨ ᠭᠡᠵᠦ ᠠᠯᠠᠭᠠ》 ᠭᠡᠵᠡᠢ᠃ 22 ᠲᠡᠷᠡ ᠪᠡᠷ ᠶᠦᠳᠠ ᠳᠡᠭᠡᠷᠡ ᠡᠷᠭᠢᠵᠦ ᠢᠷᠡᠭᠡᠳ᠄ 《ᠪᠢ ᠲᠡᠷᠡ ᠪᠦᠰᠡᠭᠦᠢ ᠶᠢ ᠣᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠪᠠᠰᠠ ᠲᠡᠨᠳᠡᠬᠢ ᠶᠢᠨ ᠬᠥᠮᠦᠰ ᠲᠡᠨᠳᠡ ᠶᠠᠩ᠋ᠬᠠᠨ ᠪᠠᠢᠳᠠᠭ ᠦᠭᠡᠢ ᠭᠡᠵᠦ ᠪᠠᠢᠨᠠ》 ᠭᠡᠰᠡᠨ ᠳᠦ᠂ 23 ᠶᠦᠳᠠ᠄ 《ᠲᠡᠷᠡ ᠪᠦᠰᠡᠭᠦᠢ ᠲᠡᠳᠡᠭᠡᠷ ᠵᠦᠢᠯ ᠢ ᠠᠪᠤᠪᠠᠯ ᠠᠪᠤᠭ᠃ ᠪᠢᠳᠡ ᠰᠢᠪᠰᠢᠭ ᠪᠣᠯᠬᠤ ᠪᠣᠯᠣᠭᠤᠵᠠᠢ᠂ ᠪᠢ ᠲᠡᠭᠦᠨ ᠳᠦ ᠢᠰᠢᠭᠡ ᠶᠢ ᠶᠠᠪᠤᠭᠤᠯᠤᠭᠰᠠᠨ ᠯᠠ ᠳᠠ᠂ ᠬᠠᠷᠢᠨ ᠴᠢ ᠲᠡᠭᠦᠨ ᠢ ᠣᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ》 ᠭᠡᠪᠡ᠃
24 ᠪᠠᠷᠤᠭ ᠭᠤᠷᠪᠠᠨ ᠰᠠᠷᠠ ᠶᠢᠨ ᠳᠠᠷᠠᠭᠠ ᠨᠢᠭᠡᠨ ᠬᠥᠮᠦᠨ ᠶᠦᠳᠠ ᠳᠤ᠄ 《ᠲᠠᠨ ᠤ ᠪᠡᠷᠢ ᠲᠠᠮᠠᠷ ᠵᠠᠪᠬᠠᠢᠷᠠᠭᠰᠠᠨ ᠰᠢᠦ᠂ ᠵᠠᠪᠬᠠᠢᠷᠠᠭᠠᠳ ᠵᠢᠷᠮᠦᠰᠦᠨ ᠪᠣᠯᠣᠭᠰᠠᠨ ᠪᠠᠢᠨᠠ︕》 ᠭᠡᠰᠡᠨ ᠳᠦ᠂ ᠶᠦᠳᠠ᠄ 《ᠲᠡᠭᠦᠨ ᠢ ᠭᠠᠷᠭᠠᠵᠤ ᠢᠷᠡᠭᠡᠳ ᠰᠢᠲᠠᠭᠠ︕》 ᠭᠡᠪᠡ᠃ 25 ᠲᠡᠷᠡ ᠡᠮᠡᠭᠲᠡᠢ ᠪᠠᠷᠢᠭᠳᠠᠨ ᠭᠠᠷᠬᠤ ᠦᠶᠡ ᠳᠡᠭᠡᠨ ᠬᠠᠳᠠᠮ ᠡᠴᠢᠭᠡ ᠲᠡᠭᠡᠨ ᠬᠡᠯᠡ ᠶᠠᠪᠤᠭᠤᠯᠵᠤ᠄ 《ᠪᠢ ᠡᠳᠡᠭᠡᠷ ᠵᠦᠢᠯ ᠤᠨ ᠡᠵᠡᠨ ᠡᠴᠡ ᠪᠣᠯᠵᠤ ᠵᠢᠷᠮᠦᠰᠦᠨ ᠪᠣᠯᠣᠭᠰᠠᠨ》 ᠭᠡᠳ ᠴᠢᠨᠠᠭᠰᠢ ᠨᠢ 《ᠡᠨᠡ ᠲᠠᠮᠠᠭᠠ᠂ ᠲᠡᠭᠦᠨ ᠦ ᠣᠭᠣᠰᠣᠷ ᠬᠢᠭᠡᠳ ᠲᠠᠶᠠᠭ ᠬᠡᠨ ᠦ ᠬᠢ ᠪᠣᠯᠬᠤ ᠶᠢ ᠲᠠᠨᠢᠵᠤ ᠪᠣᠯᠭᠣᠭᠠᠨᠠ ᠤᠤ︖》 ᠭᠡᠵᠡᠢ᠃ 26 ᠶᠦᠳᠠ ᠲᠡᠳᠡᠭᠡᠷ ᠢ ᠲᠠᠨᠢᠭᠠᠳ᠄ 《ᠲᠡᠷᠡ ᠨᠠᠳᠠ ᠠᠴᠠ ᠢᠯᠡᠭᠦᠦ ᠵᠥᠪᠲᠦ ᠶᠤᠮ ᠪᠠᠢᠨᠠ᠂ ᠪᠢ ᠲᠡᠭᠦᠨ ᠢ ᠬᠦᠦ ᠱᠧᠯᠠ ᠳᠠᠭᠠᠨ ᠥᠭᠬᠦ ᠶᠣᠰᠣᠲᠠᠢ ᠪᠠᠢᠭᠰᠠᠨ》 ᠭᠡᠳ ᠲᠡᠭᠦᠨ ᠲᠡᠢ ᠳᠠᠬᠢᠨ ᠣᠢᠷᠠᠲᠤᠭᠰᠠᠨ ᠦᠭᠡᠢ᠃
27 ᠲᠡᠷᠡ ᠬᠥᠩᠭᠡᠵᠢᠬᠦ ᠪᠣᠯᠵᠠᠢ᠂ ᠬᠡᠪᠡᠯᠢ ᠳᠦᠨᠢ ᠢᠬᠡᠷᠡ ᠬᠡᠦᠬᠡᠳ ᠪᠠᠢᠵᠠᠢ︕ 28 ᠲᠡᠳᠡᠨ ᠢ ᠲᠥᠷᠥᠭᠦᠯᠬᠦ ᠦᠶᠡ ᠳᠦ ᠨᠢᠭᠡ ᠶᠢᠨ ᠬᠢᠨᠢ ᠭᠠᠷ ᠭᠠᠷᠴᠤ ᠢᠷᠡᠭᠰᠡᠨ ᠳᠦ᠂ ᠡᠬᠡ ᠪᠠᠷᠢᠭᠴᠢ ᠨᠢ ᠭᠠᠷ ᠲᠤᠨᠢ ᠤᠯᠠᠭᠠᠨ ᠤᠲᠠᠰᠤ ᠤᠶᠠᠭᠠᠳ᠄ 《ᠲᠦᠷᠦᠭᠦᠨ ᠳᠦ ᠭᠠᠷᠤᠭᠰᠠᠨ ᠨᠢ ᠡᠨᠡ》 ᠭᠡᠪᠡ᠃ 29 ᠭᠡᠲᠡᠯᠡ ᠨᠥᠭᠥᠭᠡ ᠬᠡᠦᠬᠡᠳ ᠭᠠᠷ ᠢᠶᠠᠨ ᠪᠤᠴᠠᠭᠠᠨ ᠲᠠᠲᠠᠬᠤ ᠳᠤ᠂ ᠳᠡᠭᠦᠦ ᠨᠢ ᠭᠠᠷᠴᠤ ᠢᠷᠡᠵᠡᠢ︕ ᠡᠬᠡ ᠪᠠᠷᠢᠭᠴᠢ᠄ 《ᠴᠢ ᠶᠠᠭᠠᠬᠢᠭᠠᠳ ᠤᠷᠠᠵᠤ ᠪᠠᠢᠭᠠᠳ ᠭᠠᠷᠴᠤ ᠢᠷᠡᠪᠡ︖》 ᠭᠡᠵᠦ ᠬᠡᠯᠡᠭᠡᠳ ᠲᠡᠭᠦᠨ ᠢ ᠫᠧᠷᠧᠽ 71 ᠭᠡᠵᠦ ᠨᠡᠷᠡᠯᠡᠪᠡ᠃ 30 ᠳᠠᠷᠠᠭᠠ ᠨᠢ ᠭᠠᠷ ᠲᠤᠨᠢ ᠤᠯᠠᠭᠠᠨ ᠤᠲᠠᠰᠤ ᠤᠶᠠᠭᠠᠰᠤᠲᠠᠢ ᠠᠬᠠ ᠨᠢ ᠭᠠᠷᠴᠤ ᠢᠷᠡᠭᠰᠡᠨ ᠳᠦ᠂ ᠲᠡᠭᠦᠨ ᠢ ᠽᠧᠷᠠ 72 ᠭᠡᠵᠦ ᠨᠡᠷᠡᠯᠡᠪᠡ᠃