ᠡᠬᠢᠯᠡᠯ ᠭᠤᠴᠢ ᠶᠢᠰᠦ
ᠶᠣᠰᠧᠹ ᠭᠦᠳᠬᠡᠭᠳᠡᠪᠡ
1 ᠶᠣᠰᠧᠹ ᠶᠧᠵᠢᠫᠲ ᠤᠷᠤᠭᠤ ᠬᠦᠷᠭᠡᠭᠳᠡᠪᠡ᠃ ᠢᠱᠮᠠᠶᠧᠯᠴᠤᠳ ᠲᠡᠭᠦᠨ ᠢ ᠲᠡᠨᠳᠡ ᠠᠪᠴᠢᠷᠠᠭᠰᠠᠨ ᠳᠤ᠂ ᠹᠠᠷᠠᠣ᠋ ᠶᠢᠨ ᠲᠦᠰᠢᠮᠡᠯ᠂ ᠰᠢᠳᠠᠷ ᠬᠠᠮᠠᠭᠠᠯᠠᠭᠴᠢᠳ ᠤᠨ ᠵᠠᠬᠢᠷᠤᠭᠴᠢ ᠫᠣᠲ᠋ᠢᠹᠠᠷ ᠭᠡᠳᠡᠭ ᠶᠧᠵᠢᠫᠲ ᠬᠥᠮᠦᠨ ᠲᠡᠭᠦᠨ ᠢ ᠲᠡᠳᠡᠨ ᠦ ᠭᠠᠷ ᠠᠴᠠ ᠬᠤᠳᠠᠯᠳᠤᠨ ᠠᠪᠴᠠᠢ᠃ 2 ᠬᠠᠷᠢᠨ ᠶᠣᠬᠣᠸᠠ ᠬᠠᠮᠲᠤ ᠪᠠᠢᠭᠰᠠᠨ ᠢᠶᠠᠷ ᠶᠣᠰᠧᠹ ᠤᠨ ᠪᠦᠬᠦ ᠵᠦᠢᠯ ᠪᠦᠲᠦᠮᠵᠢ ᠲᠠᠢ ᠪᠣᠯᠵᠤ᠂ ᠥᠪᠡᠷ ᠦᠨ ᠡᠵᠡᠨ ᠶᠧᠵᠢᠫᠲ ᠬᠥᠮᠦᠨ ᠦ ᠭᠡᠷ ᠲᠦ ᠰᠠᠭᠤᠵᠤ ᠪᠠᠢᠯᠠ᠃ 3 ᠡᠵᠡᠨ ᠨᠢ ᠶᠣᠬᠣᠸᠠ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠢᠭᠠ ᠶᠢ᠂ ᠮᠥᠨ ᠶᠣᠬᠣᠸᠠ ᠠᠵᠢᠯ ᠪᠦᠷᠢ ᠶᠢ ᠨᠢ ᠲᠡᠭᠦᠨ ᠦ ᠭᠠᠷ ᠢᠶᠠᠷ ᠪᠦᠲᠦᠮᠵᠢ ᠲᠠᠢ ᠪᠣᠯᠭᠠᠵᠤ ᠪᠠᠢᠭᠠ ᠶᠢ ᠦᠵᠡᠪᠡ᠃ 4 ᠶᠣᠰᠧᠹ ᠡᠵᠡᠨ ᠳᠡᠭᠡᠨ ᠦᠢᠯᠡᠴᠢᠯᠡᠬᠦ ᠳᠡᠭᠡᠨ ᠲᠡᠭᠦᠨ ᠦ ᠲᠠᠭᠠᠯᠠᠯ ᠢ ᠣᠯᠵᠠᠢ᠃ ᠫᠣᠲ᠋ᠢᠹᠠᠷ ᠲᠡᠭᠦᠨ ᠢ ᠭᠡᠷ ᠦᠨ ᠢᠶᠠᠨ ᠳᠠᠭᠠᠭᠠᠮᠠᠯ ᠪᠣᠯᠭᠠᠨ᠂ ᠡᠵᠡᠮᠰᠢᠵᠦ ᠪᠠᠢᠭᠠ ᠪᠦᠬᠦᠨ ᠢᠶᠡᠨ ᠲᠡᠭᠦᠨ ᠦ ᠭᠠᠷ ᠲᠤ ᠬᠠᠷᠢᠭᠤᠴᠠᠭᠤᠯᠤᠭᠰᠠᠨ ᠪᠠᠢᠨᠠ᠃ 5 ᠲᠡᠷᠡ ᠶᠣᠰᠧᠹ ᠢ ᠭᠡᠷ ᠪᠣᠯᠣᠨ ᠬᠠᠮᠤᠭ ᠡᠳ᠋ ᠬᠥᠷᠥᠩᠭᠡ ᠶᠢᠨ ᠢᠶᠠᠨ ᠳᠠᠭᠠᠭᠠᠮᠠᠯ ᠪᠣᠯᠭᠠᠭᠰᠠᠨ ᠠᠴᠠ ᠬᠣᠢᠰᠢ ᠶᠣᠬᠣᠸᠠ ᠶᠣᠰᠧᠹ ᠤᠨ ᠰᠢᠯᠲᠠᠭᠠᠨ ᠢᠶᠠᠷ ᠶᠧᠵᠢᠫᠲ ᠬᠥᠮᠦᠨ ᠦ ᠭᠡᠷ ᠣᠷᠣᠨ ᠢ ᠢᠪᠡᠭᠡᠭᠰᠡᠨ ᠳᠦ᠂ ᠶᠣᠬᠣᠸᠠ ᠶᠢᠨ ᠢᠪᠡᠭᠡᠯ ᠲᠡᠭᠦᠨ ᠦ ᠭᠡᠷ ᠪᠣᠯᠣᠨ ᠲᠠᠷᠢᠶᠠᠯᠠᠩ ᠤᠨ ᠲᠠᠯᠠᠪᠠᠢ᠂ ᠲᠡᠭᠦᠨ ᠳᠦ ᠪᠠᠢᠭᠠ ᠪᠦᠬᠦᠨ ᠳᠦ ᠪᠠᠭᠤᠪᠠ᠃ 6 ᠲᠡᠷᠡ ᠪᠡᠷ ᠪᠠᠢᠭᠠ ᠪᠦᠬᠦᠨ ᠢᠶᠡᠨ ᠶᠣᠰᠧᠹ ᠤᠨ ᠭᠠᠷ ᠲᠤ ᠳᠠᠭᠠᠭᠠᠯᠭᠠᠵᠤ᠂ ᠥᠪᠡᠷ ᠦᠨ ᠢᠳᠡᠬᠦ ᠬᠣᠭᠣᠯᠠ ᠠᠴᠠ ᠪᠤᠰᠤᠳ ᠶᠠᠭᠤᠮᠠᠨ ᠳᠤ ᠰᠠᠨᠠᠭᠠ ᠲᠠᠯᠪᠢᠬᠤ ᠪᠠᠨ ᠪᠣᠯᠢᠵᠠᠢ᠃
7 ᠡᠳᠡᠭᠡᠷ ᠶᠠᠪᠤᠳᠠᠯ ᠤᠨ ᠳᠠᠷᠠᠭᠠ ᠡᠵᠡᠨ ᠦ ᠬᠢᠨᠢ ᠡᠬᠡᠨᠡᠷ ᠶᠣᠰᠧᠹ ᠤᠷᠤᠭᠤ ᠬᠠᠷᠠᠴᠠ ᠭᠦᠶᠦᠯᠭᠡᠵᠦ᠄ 《ᠨᠠᠳᠠ ᠲᠠᠢ ᠤᠨᠲᠠᠭᠠᠴᠢ》 ᠭᠡᠵᠦ ᠬᠡᠯᠡᠪᠡ᠃ 8 ᠬᠠᠷᠢᠨ ᠶᠣᠰᠧᠹ ᠦᠯᠦ ᠵᠥᠪᠰᠢᠶᠡᠷᠡᠨ᠂ ᠡᠵᠡᠨ ᠦ ᠪᠠᠨ ᠡᠬᠡᠨᠡᠷ ᠲᠦ᠄ 《ᠬᠠᠷᠠ᠂ ᠮᠢᠨᠦ ᠡᠵᠡᠨ ᠪᠠᠢᠭᠠ ᠪᠦᠬᠦᠨ ᠢᠶᠡᠨ ᠮᠢᠨᠦ ᠭᠠᠷ ᠲᠤ ᠲᠤᠰᠢᠶᠠᠵᠤ᠂ ᠭᠡᠷ ᠦᠨ ᠢᠶᠠᠨ ᠳᠣᠲᠣᠷᠠᠬᠢ ᠶᠠᠭᠤᠨ ᠳᠤ ᠴᠤ ᠰᠠᠨᠠᠭᠠ ᠵᠣᠪᠠᠳᠠᠭ ᠦᠭᠡᠢ ᠲᠤᠯᠠ 9 ᠡᠨᠡ ᠭᠡᠷ ᠲᠦ ᠨᠠᠳᠠ ᠠᠴᠠ ᠢᠯᠡᠭᠦᠦ ᠲᠣᠮᠣ ᠬᠥᠮᠦᠨ ᠪᠠᠢᠬᠤ ᠦᠭᠡᠢ ᠪᠠᠢᠨᠠ᠃ ᠲᠡᠷᠡ ᠲᠠᠨ ᠠᠴᠠ ᠥᠭᠡᠷᠡ ᠶᠠᠭᠤᠨ ᠤ ᠲᠠᠯᠠ ᠪᠠᠷ ᠴᠤ ᠨᠠᠮᠠᠶᠢ ᠬᠢᠵᠠᠭᠠᠷᠯᠠᠭᠠ ᠦᠭᠡᠢ᠂ ᠤᠴᠢᠷ ᠨᠢ ᠲᠠ ᠪᠣᠯ ᠲᠡᠭᠦᠨ ᠦ ᠡᠬᠡᠨᠡᠷ ᠶᠤᠮ᠃ ᠪᠢ ᠶᠠᠭᠤᠨ ᠳᠤ ᠡᠢᠮᠦ ᠠᠳᠠᠭ ᠤᠨ ᠮᠠᠭᠤ ᠬᠡᠷᠡᠭ ᠬᠢᠵᠦ᠂ ᠪᠤᠷᠬᠠᠨ ᠳᠠᠭᠠᠨ ᠨᠢᠭᠦᠯ ᠦᠢᠯᠡᠳᠬᠦ ᠪᠢᠯᠡ︖》 ᠭᠡᠪᠡ᠃ 10 ᠲᠡᠷᠡ ᠡᠮᠡᠭᠲᠡᠢ ᠶᠣᠰᠧᠹ ᠢ ᠡᠳᠦᠷ ᠡᠳᠦᠷ ᠱᠠᠯᠠᠭᠰᠠᠭᠠᠷ ᠪᠠᠢᠯᠠ᠃ ᠬᠠᠷᠢᠨ ᠲᠡᠷᠡ ᠲᠡᠭᠦᠨ ᠦ ᠦᠭᠡ ᠶᠢ ᠰᠣᠨᠣᠰᠣᠭᠰᠠᠨ ᠦᠭᠡᠢ ᠪᠥᠭᠡᠳ ᠲᠡᠭᠦᠨ ᠲᠡᠢ ᠤᠨᠲᠠᠭᠰᠠᠨ ᠴᠤ ᠦᠭᠡᠢ᠂ ᠬᠠᠮᠲᠤ ᠪᠠᠢᠭᠰᠠᠨ ᠴᠤ ᠦᠭᠡᠢ᠃ 11 ᠨᠢᠭᠡᠨ ᠡᠳᠦᠷ ᠶᠣᠰᠧᠹ ᠠᠵᠢᠯ ᠢᠶᠠᠨ ᠬᠢᠬᠦ ᠪᠡᠷ ᠭᠡᠷ ᠲᠤᠨᠢ ᠣᠷᠣᠬᠤ ᠳᠤ᠂ ᠭᠡᠷ ᠦᠨ ᠬᠢᠨ ᠡᠴᠡ ᠨᠢᠭᠡ ᠴᠤ ᠬᠥᠮᠦᠨ ᠲᠡᠨᠳᠡ ᠪᠠᠢᠭᠰᠠᠨ ᠦᠭᠡᠢ᠃ 12 ᠨᠥᠭᠥᠭᠡ ᠡᠮᠡᠭᠲᠡᠢ ᠲᠡᠭᠦᠨ ᠦ ᠬᠤᠪᠴᠠᠰᠤᠨ ᠠᠴᠠ ᠴᠢᠩ᠋ᠭᠠᠭᠠᠵᠤ᠂ 《ᠨᠠᠳᠠ ᠲᠠᠢ ᠤᠨᠲᠠᠭᠠᠴᠢ》 ᠭᠡᠰᠡᠨ ᠳᠦ᠂ ᠶᠣᠰᠧᠹ ᠲᠡᠭᠦᠨ ᠦ ᠭᠠᠷ ᠲᠤ ᠬᠤᠪᠴᠠᠰᠤ ᠪᠠᠨ ᠣᠷᠬᠢᠭᠠᠳ ᠭᠠᠳᠠᠭᠰᠢ ᠵᠢᠭᠤᠲᠠᠨ ᠭᠠᠷᠪᠠ᠃ 13 ᠶᠣᠰᠧᠹ ᠲᠡᠭᠦᠨ ᠦ ᠭᠠᠷ ᠲᠤ ᠬᠤᠪᠴᠠᠰᠤ ᠪᠠᠨ ᠣᠷᠬᠢᠭᠠᠳ ᠵᠢᠭᠤᠲᠠᠨ ᠭᠠᠷᠬᠤ ᠶᠢ ᠲᠡᠷᠡ ᠡᠮᠡᠭᠲᠡᠢ ᠬᠠᠷᠠᠭᠠᠳ᠂ 14 ᠭᠡᠷ ᠦᠨ ᠬᠥᠮᠦᠰ ᠢᠶᠡᠨ ᠳᠠᠭᠤᠳᠠᠵᠤ᠄ 《ᠨᠥᠬᠥᠷ ᠮᠠᠨᠢ ᠡᠨᠡ ᠢᠪᠷᠠᠢ ᠪᠣᠭᠣᠯ ᠢ ᠠᠪᠴᠢᠷᠠᠭᠠᠳ᠂ ᠪᠢᠳᠡ ᠨᠠᠷ ᠢ ᠲᠣᠭᠯᠠᠭᠠᠮ ᠨᠠᠭᠠᠳᠤᠮ ᠪᠣᠯᠭᠠᠵᠠᠢ᠃ ᠲᠡᠷᠡ ᠨᠠᠳᠠ ᠳᠡᠭᠡᠷᠡ ᠢᠷᠡᠵᠦ ᠨᠠᠮᠠᠶᠢ ᠬᠦᠴᠦᠷᠬᠡᠭᠯᠡᠬᠦ ᠭᠡᠬᠦ ᠳᠦ᠂ ᠪᠢ ᠴᠢᠩᠭ᠍ᠠ ᠪᠠᠷ ᠬᠠᠰᠬᠢᠷᠤᠭᠰᠠᠨ᠃ 15 ᠲᠡᠷᠡ ᠴᠢᠩᠭ᠍ᠠ ᠳᠠᠭᠤ ᠪᠠᠷ ᠬᠠᠰᠬᠢᠷᠬᠤ ᠶᠢ ᠮᠢᠨᠢ ᠰᠣᠨᠣᠰᠣᠭᠠᠳ ᠬᠤᠪᠴᠠᠰᠤ ᠪᠠᠨ ᠮᠢᠨᠦ ᠳᠡᠷᠭᠡᠳᠡ ᠣᠷᠬᠢᠵᠤ ᠭᠠᠳᠠᠭᠰᠢ ᠵᠢᠭᠤᠲᠠᠨ ᠭᠠᠷᠤᠯᠠ》 ᠭᠡᠪᠡ᠃ 16 ᠲᠡᠷᠡ ᠡᠮᠡᠭᠲᠡᠢ ᠨᠥᠭᠥᠭᠡ ᠬᠤᠪᠴᠠᠰᠤ ᠶᠢ ᠳᠡᠷᠭᠡᠳᠡ ᠪᠡᠨ ᠲᠠᠯᠪᠢᠵᠤ ᠡᠵᠡᠨ ᠢᠶᠡᠨ ᠢᠷᠡᠬᠦ ᠶᠢ ᠬᠦᠯᠢᠶᠡᠵᠡᠢ᠃ ᠡᠵᠡᠨ ᠨᠢ ᠭᠡᠷ ᠲᠡᠭᠡᠨ ᠢᠷᠡᠬᠦ ᠳᠦ᠂ 17 ᠨᠥᠭᠥᠭᠡ ᠡᠮᠡᠭᠲᠡᠢ ᠲᠡᠭᠦᠨ ᠳᠦ ᠮᠥᠨ ᠯᠠ ᠨᠥᠭᠥᠭᠡ ᠦᠭᠡ ᠪᠡᠨ ᠬᠡᠯᠡᠵᠦ᠄ 《ᠲᠠᠨ ᠤ ᠪᠢᠳᠡᠨ ᠳᠦ ᠠᠪᠴᠢᠷᠠᠭᠰᠠᠨ ᠢᠪᠷᠠᠢ ᠪᠣᠭᠣᠯ ᠨᠠᠳᠠ ᠳᠡᠭᠡᠷᠡ ᠢᠷᠡᠭᠡᠳ ᠨᠠᠮᠠᠶᠢ ᠲᠣᠭᠯᠠᠭᠠᠮ ᠲᠣᠬᠣᠭᠤ ᠪᠣᠯᠭᠠᠬᠤ ᠭᠡᠯᠡ᠃ 18 ᠪᠢ ᠴᠢᠩᠭ᠍ᠠ ᠳᠠᠭᠤ ᠪᠠᠷ ᠬᠠᠰᠬᠢᠷᠤᠩ᠋ᠭᠤᠲᠠ ᠲᠡᠷᠡ ᠬᠤᠪᠴᠠᠰᠤ ᠪᠠᠨ ᠮᠢᠨᠦ ᠳᠡᠷᠭᠡᠳᠡ ᠣᠷᠬᠢᠭᠠᠳ᠂ ᠭᠠᠳᠠᠭᠰᠢ ᠵᠢᠭᠤᠲᠠᠨ ᠭᠠᠷᠤᠭᠰᠠᠨ》 ᠭᠡᠪᠡ᠃
19 ᠡᠵᠡᠨ ᠨᠢ 《ᠴᠢᠨᠦ ᠪᠣᠭᠣᠯ ᠨᠠᠳᠠ ᠳᠤ ᠡᠳᠡᠭᠡᠷ ᠢ ᠬᠢᠯᠡ》 ᠭᠡᠵᠦ ᠥᠪᠡᠷ ᠲᠤᠨᠢ ᠬᠡᠯᠡᠭᠰᠡᠨ ᠡᠬᠡᠨᠡᠷ ᠦᠨ ᠢᠶᠠᠨ ᠦᠭᠡ ᠶᠢ ᠰᠣᠨᠣᠰᠣᠭᠠᠳ ᠠᠭᠤᠷ ᠲᠠᠭᠠᠨ ᠰᠢᠲᠠᠵᠠᠢ᠃ 20 ᠶᠣᠰᠧᠹ ᠤᠨ ᠡᠵᠡᠨ ᠲᠡᠭᠦᠨ ᠢ ᠪᠠᠷᠢᠵᠤ ᠬᠠᠭᠠᠨ ᠤ ᠬᠣᠷᠢᠭᠳᠠᠯ ᠤᠳ ᠢ ᠬᠣᠷᠢᠳᠠᠭ ᠱᠣᠷᠣᠩ ᠳᠤ ᠬᠢᠪᠡ᠃ ᠡᠢᠨ ᠬᠦ ᠶᠣᠰᠧᠹ ᠱᠣᠷᠣᠩ ᠳᠤ ᠪᠠᠢᠯᠠ᠃ 21 ᠬᠠᠷᠢᠨ ᠶᠣᠬᠣᠸᠠ ᠶᠣᠰᠧᠹ ᠲᠠᠢ ᠬᠠᠮᠲᠤ ᠪᠠᠢᠭᠰᠠᠭᠠᠷ ᠲᠡᠭᠦᠨ ᠳᠦ ᠬᠠᠢᠷᠠ ᠶᠢᠨ ᠮᠤᠲᠤᠷ ᠢᠶᠠᠨ ᠰᠤᠩ᠋ᠭᠠᠵᠤ᠂ ᠱᠣᠷᠣᠩ ᠤᠨ ᠬᠠᠷᠠᠭᠠᠯᠵᠠᠭᠴᠢ ᠶᠢᠨ ᠨᠢᠳᠦᠨ ᠳᠦ ᠲᠠᠭᠠᠯᠠᠯ ᠢ ᠣᠯᠣᠭᠤᠯᠤᠭᠰᠠᠨ ᠪᠠᠢᠨᠠ᠃ 22 ᠱᠣᠷᠣᠩ ᠤᠨ ᠬᠠᠷᠠᠭᠠᠯᠵᠠᠭᠴᠢ ᠨᠢ ᠱᠣᠷᠣᠩ ᠳᠤ ᠪᠠᠢᠭᠠ ᠪᠦᠬᠦ ᠬᠣᠷᠢᠭᠳᠠᠯ ᠢ ᠶᠣᠰᠧᠹ ᠤᠨ ᠭᠠᠷ ᠲᠤ ᠲᠤᠰᠢᠶᠠᠭᠰᠠᠨ ᠢᠶᠠᠷ ᠶᠣᠰᠧᠹ ᠲᠡᠳᠡᠨ ᠦ ᠦᠢᠯᠡ ᠶᠠᠪᠤᠳᠠᠯ ᠪᠣᠯᠭᠠᠨ ᠢ ᠬᠠᠷᠢᠭᠤᠴᠠᠳᠠᠭ ᠪᠣᠯᠪᠠ᠃ 23 ᠶᠣᠰᠧᠹ ᠤᠨ ᠭᠠᠷ ᠲᠤ ᠥᠭᠭᠥᠭᠰᠡᠨ ᠠᠵᠢᠯ ᠤᠨ ᠢᠶᠠᠨ ᠲᠤᠬᠠᠢ ᠳᠤ ᠱᠣᠷᠣᠩ ᠤᠨ ᠬᠠᠷᠠᠭᠠᠯᠵᠠᠭᠴᠢ ᠶᠠᠭᠤᠨ ᠳᠤ ᠴᠤ ᠰᠠᠨᠠᠭᠠ ᠵᠣᠪᠠᠳᠠᠭ ᠦᠭᠡᠢ ᠪᠠᠢᠯᠠ᠃ ᠤᠴᠢᠷ ᠨᠢ ᠶᠣᠬᠣᠸᠠ ᠶᠣᠰᠧᠹ ᠲᠠᠢ ᠬᠠᠮᠲᠤ ᠪᠠᠢᠭᠰᠠᠭᠠᠷ᠂ ᠲᠡᠭᠦᠨ ᠦ ᠠᠵᠢᠯ ᠪᠦᠷᠢ ᠶᠢ ᠪᠦᠲᠦᠮᠵᠢ ᠲᠠᠢ ᠪᠣᠯᠭᠠᠵᠠᠢ᠃