ᠡᠬᠢᠯᠡᠯ ᠳᠥᠴᠢᠨ ᠭᠤᠷᠪᠠ
ᠶᠣᠰᠧᠹ ᠤᠨ ᠠᠬᠠ ᠨᠠᠷ ᠳᠠᠬᠢᠨ ᠶᠧᠵᠢᠫᠲ ᠲᠤ ᠣᠴᠢᠪᠠ
1 ᠲᠡᠷᠡ ᠭᠠᠵᠠᠷ ᠤᠨ ᠥᠯᠥᠰᠬᠥᠯᠡᠩ ᠬᠦᠨᠳᠦᠷᠡᠵᠡᠢ᠃ 2 ᠲᠡᠳᠡ ᠶᠧᠵᠢᠫᠲ ᠡᠴᠡ ᠠᠪᠴᠢᠷᠠᠭᠰᠠᠨ ᠦᠷᠡ ᠲᠠᠷᠢᠶᠠ ᠪᠠᠨ ᠪᠦᠭᠦᠳᠡ ᠶᠢ ᠢᠳᠡᠵᠦ ᠳᠠᠭᠤᠰᠬᠤ ᠳᠤ᠂ ᠡᠴᠢᠭᠡ ᠨᠢ ᠲᠡᠳᠡᠨ ᠳᠦ᠄ 《ᠲᠠ ᠨᠠᠷ ᠳᠠᠬᠢᠨ ᠣᠴᠢᠵᠤ᠂ ᠪᠢᠳᠡᠨ ᠳᠦ ᠵᠢᠭᠠᠬᠠᠨ ᠠᠮᠤ ᠬᠦᠨᠡᠰᠦ ᠠᠪᠤᠭᠠᠳ ᠢᠷᠡ》 ᠭᠡᠰᠡᠨ ᠳᠦ᠂ 3 ᠶᠦᠳᠠ ᠡᠴᠢᠭᠡ ᠳᠡᠭᠡᠨ᠄ 《ᠲᠡᠷᠡ ᠬᠥᠮᠦᠨ ᠪᠢᠳᠡᠨ ᠳᠦ ᠬᠠᠲᠠᠭᠤ ᠰᠠᠨᠠᠭᠤᠯᠵᠤ᠄ 〈ᠬᠡᠷᠪᠡ ᠲᠠ ᠨᠠᠷ ᠳᠡᠭᠦᠦ ᠲᠠᠢ ᠪᠠᠨ ᠬᠠᠮᠲᠤ ᠢᠷᠡᠬᠦ ᠦᠭᠡᠢ ᠪᠣᠯ᠂ ᠮᠢᠨᠦ ᠨᠢᠭᠤᠷ ᠢ ᠳᠠᠬᠢᠨ ᠬᠠᠷᠠᠬᠤ ᠦᠭᠡᠢ〉 ᠭᠡᠰᠡᠨ ᠪᠢᠯᠡ᠃ 4 ᠬᠡᠷᠪᠡ ᠲᠠ ᠳᠡᠭᠦᠦ ᠶᠢ ᠮᠠᠨᠢ ᠪᠢᠳᠡᠨ ᠲᠡᠢ ᠬᠠᠮᠲᠤ ᠶᠠᠪᠤᠭᠤᠯᠬᠤ ᠶᠢ ᠵᠥᠪᠰᠢᠶᠡᠷᠡᠪᠡᠯ ᠪᠢᠳᠡ ᠶᠠᠪᠤᠵᠤ᠂ ᠠᠮᠤ ᠬᠦᠨᠡᠰᠦ ᠠᠪᠤᠭᠠᠳ ᠢᠷᠡᠨᠡ᠃ 5 ᠬᠠᠷᠢᠨ ᠲᠠ ᠲᠡᠭᠦᠨ ᠢ ᠶᠠᠪᠤᠭᠤᠯᠬᠤ ᠦᠭᠡᠢ ᠪᠣᠯ᠂ ᠪᠢᠳᠡ ᠶᠠᠪᠤᠬᠤ ᠬᠡᠷᠡᠭ ᠦᠭᠡᠢ᠃ ᠤᠴᠢᠷ ᠨᠢ ᠲᠡᠷᠡ ᠬᠥᠮᠦᠨ ᠪᠢᠳᠡᠨ ᠳᠦ᠄ 〈ᠬᠡᠷᠪᠡ ᠲᠠ ᠨᠠᠷ ᠳᠡᠭᠦᠦ ᠲᠠᠢ ᠪᠠᠨ ᠬᠠᠮᠲᠤ ᠢᠷᠡᠬᠦ ᠦᠭᠡᠢ ᠪᠣᠯ᠂ ᠮᠢᠨᠦ ᠨᠢᠭᠤᠷ ᠢ ᠳᠠᠬᠢᠨ ᠬᠠᠷᠠᠬᠤ ᠦᠭᠡᠢ〉 ᠭᠡᠵᠦ ᠬᠡᠯᠡᠭᠰᠡᠨ ᠰᠢᠦ ᠳᠠ》 ᠭᠡᠪᠡ᠃ 6 ᠢᠰᠷᠧᠯ᠄ 《ᠲᠠ ᠨᠠᠷ ᠶᠠᠭᠤᠨ ᠳᠤ ᠲᠡᠷᠡ ᠬᠥᠮᠦᠨ ᠳᠦ ᠥᠭᠡᠷᠡ ᠳᠡᠭᠦᠦ ᠲᠠᠢ ᠭᠡᠳᠡᠭ ᠢᠶᠡᠨ ᠳᠤᠭᠤᠯᠭᠠᠵᠤ᠂ ᠨᠠᠮᠠᠶᠢ ᠵᠣᠪᠠᠭᠠᠨᠠ ᠪᠤᠢ︖》 ᠭᠡᠰᠡᠨ ᠳᠦ᠂ 7 ᠲᠡᠳᠡ᠄ 《ᠲᠡᠷᠡ ᠬᠥᠮᠦᠨ ᠪᠢᠳᠡᠨ ᠦ ᠲᠤᠬᠠᠢ᠂ ᠪᠢᠳᠡᠨ ᠦ ᠲᠥᠷᠥᠯ ᠰᠠᠳᠤᠨ ᠤ ᠲᠤᠬᠠᠢ ᠨᠠᠷᠢᠨ ᠯᠠᠪᠯᠠᠵᠤ᠄ 〈ᠠᠪᠤ ᠴᠢᠨᠢ ᠠᠮᠢᠳᠤ ᠪᠠᠢᠭᠠ ᠤᠤ︖ ᠥᠭᠡᠷᠡ ᠳᠡᠭᠦᠦ ᠪᠤᠢ ᠤᠤ︖〉 ᠭᠡᠵᠦ ᠠᠰᠠᠭᠤᠭᠰᠠᠨ ᠤᠴᠢᠷ ᠠᠴᠠ ᠪᠢᠳᠡ ᠲᠡᠭᠡᠵᠦ ᠬᠠᠷᠢᠭᠤᠯᠤᠭᠰᠠᠨ᠃ ᠲᠡᠭᠦᠨ ᠢ 〈ᠳᠡᠭᠦᠦ ᠪᠡᠨ ᠠᠪᠴᠢᠷᠠ︕〉 ᠭᠡᠵᠦ ᠬᠡᠯᠡᠨᠡ ᠭᠡᠵᠦ ᠪᠢᠳᠡ ᠬᠡᠷᠬᠢᠨ ᠮᠡᠳᠡᠬᠦ ᠪᠢᠯᠡ︖》 ᠭᠡᠵᠡᠭᠡᠪᠡ᠃ 8 ᠶᠦᠳᠠ ᠡᠴᠢᠭᠡ ᠢᠰᠷᠧᠯ ᠳᠡᠭᠡᠨ᠄ 《ᠲᠡᠷᠡ ᠬᠦᠦ ᠶᠢ ᠳᠠᠭᠠᠭᠤᠯᠤᠨ ᠶᠠᠪᠤᠬᠤ ᠶᠢ ᠮᠢᠨᠢ ᠵᠥᠪᠰᠢᠶᠡᠷᠡᠭᠡᠴᠢ︕ ᠪᠢᠳᠡ ᠳᠠᠷᠤᠢᠬᠠᠨ ᠶᠠᠪᠤᠶᠠ᠃ ᠲᠡᠭᠡᠪᠡᠯ ᠪᠢᠳᠡ ᠴᠤ᠂ ᠲᠠ ᠴᠤ᠂ ᠬᠡᠦᠬᠡᠳ ᠤᠳ ᠮᠠᠨᠢ ᠴᠤ ᠴᠥᠮ ᠦᠬᠦᠬᠦ ᠦᠭᠡᠢ ᠠᠮᠢᠳᠤ ᠦᠯᠡᠳᠡᠬᠦ ᠪᠣᠯᠣᠨᠠ᠃ 9 ᠪᠢ ᠥᠪᠡᠷ ᠢᠶᠡᠨ ᠲᠡᠭᠦᠨ ᠢ ᠪᠠᠲᠤᠯᠠᠨ ᠳᠠᠭᠠᠭᠠᠶᠠ᠃ ᠲᠠ ᠮᠢᠨᠦ ᠭᠠᠷ ᠠᠴᠠ ᠲᠡᠭᠦᠨ ᠢ ᠨᠡᠬᠡᠵᠦ ᠪᠣᠯᠣᠨᠠ᠃ ᠲᠡᠭᠦᠨ ᠢ ᠲᠠᠨ ᠤ ᠡᠮᠦᠨᠡ ᠠᠪᠴᠢᠷᠠᠵᠤ ᠥᠭᠬᠦ ᠦᠭᠡᠢ ᠪᠣᠯ᠂ ᠪᠢ ᠨᠠᠰᠤᠨ ᠲᠤᠷᠰᠢ ᠳᠠᠭᠠᠨ ᠲᠠᠨ ᠤ ᠡᠮᠦᠨᠡ ᠭᠡᠮᠲᠡᠨ ᠪᠣᠯᠣᠨᠠ᠃ 10 ᠬᠡᠷᠪᠡ ᠪᠢᠳᠡ ᠲᠡᠭᠡᠨᠡᠭᠡᠯᠵᠡᠭᠡ ᠦᠭᠡᠢ ᠪᠠᠢᠭᠰᠠᠨ ᠪᠣᠯ ᠬᠡᠳᠦᠢᠨᠡᠢ ᠬᠣᠶᠠᠷ ᠴᠤ ᠤᠳᠠᠭᠠ ᠶᠠᠪᠤᠭᠠᠳ ᠢᠷᠡᠬᠦ ᠪᠠᠢᠭᠰᠠᠨ》 ᠭᠡᠪᠡ᠃
11 ᠡᠴᠢᠭᠡ ᠢᠰᠷᠧᠯ ᠨᠢ ᠲᠡᠳᠡᠨ ᠳᠦ᠄ 《ᠵᠠ᠂ ᠲᠡᠭᠡᠬᠦ ᠯᠠ ᠶᠣᠰᠣᠲᠠᠢ ᠪᠣᠯ ᠲᠡᠭᠡᠵᠦ ᠬᠢ᠃ ᠡᠨᠡ ᠨᠤᠲᠤᠭ ᠤᠨ ᠣᠨᠴᠠ ᠭᠠᠷᠤᠯᠲᠠ᠂ ᠬᠡᠰᠡᠭ ᠦᠨᠦᠷᠲᠦ ᠳᠠᠪᠠᠷᠬᠠᠢ᠂ ᠵᠢᠭᠠᠬᠠᠨ ᠵᠥᠭᠡᠢ ᠶᠢᠨ ᠪᠠᠯ᠂ ᠭᠦᠭᠦᠯ᠂ ᠠᠩᠬᠢᠯᠤᠭᠤᠨ ᠦᠨᠦᠷᠲᠦ ᠲᠣᠰᠣ᠂ ᠰᠠᠮᠤᠷ᠂ ᠪᠤᠢᠯᠠᠰᠤ ᠲᠡᠷᠢᠭᠦᠲᠡᠨ ᠢ ᠤᠭᠤᠲᠠᠨ ᠳᠤ ᠬᠢᠵᠦ᠂ ᠲᠡᠷᠡ ᠬᠥᠮᠦᠨ ᠳᠡᠭᠡᠨ ᠪᠡᠯᠡᠭ ᠪᠣᠯᠭᠠᠨ ᠠᠪᠠᠴᠢᠵᠤ ᠥᠭ᠃ 12 ᠡᠨᠡ ᠤᠳᠠᠭᠠ ᠬᠣᠶᠠᠷ ᠳᠠᠬᠢᠨ ᠶᠡᠬᠡ ᠮᠥᠩᠭᠥ ᠠᠪᠤᠭᠠᠳ ᠶᠠᠪᠤᠭᠠᠷᠠᠢ︕ ᠤᠭᠤᠲᠠᠨ ᠤ ᠴᠢᠨᠢ ᠠᠮᠠᠰᠠᠷ ᠲᠤ ᠪᠤᠴᠠᠭᠠᠵᠤ ᠬᠢᠭᠰᠡᠨ ᠮᠥᠩᠭᠥ ᠶᠢ ᠡᠷᠭᠢᠭᠦᠯᠵᠦ ᠥᠭᠬᠦ ᠶᠣᠰᠣᠲᠠᠢ᠂ ᠲᠡᠳᠡ ᠠᠨᠳᠠᠭᠤᠷᠠᠭᠰᠠᠨ ᠪᠠᠢᠬᠠ᠃ 13 ᠳᠡᠭᠦᠦ ᠪᠡᠨ ᠳᠠᠭᠠᠭᠤᠯᠤᠨ᠂ ᠲᠡᠷᠡ ᠬᠥᠮᠦᠨ ᠤᠷᠤᠭᠤ ᠳᠠᠷᠤᠢᠬᠠᠨ ᠡᠷᠭᠢᠵᠦ ᠣᠴᠢ᠃ 14 ᠲᠡᠭᠦᠰ ᠬᠦᠴᠦᠲᠦ ᠪᠤᠷᠬᠠᠨ ᠲᠡᠷᠡ ᠬᠥᠮᠦᠨ ᠦ ᠡᠮᠦᠨᠡ ᠲᠠ ᠨᠠᠷ ᠢ ᠡᠨᠡᠷᠢᠨ ᠥᠷᠥᠪᠳᠥᠵᠦ᠂ ᠲᠡᠷᠡ ᠬᠥᠮᠦᠨ ᠨᠥᠭᠥᠭᠡ ᠠᠬᠠ ᠶᠢ ᠴᠢᠨᠢ ᠪᠣᠯᠣᠨ ᠪᠢᠨᠶᠠᠮᠢᠨ ᠢ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠪᠤᠴᠠᠭᠠᠵᠤ ᠶᠠᠪᠤᠭᠤᠯᠬᠤ ᠪᠣᠯᠲᠤᠭᠠᠢ᠃ ᠬᠠᠷᠢᠨ ᠪᠢ ᠬᠡᠦᠬᠡᠳ ᠤᠳ ᠢᠶᠠᠨ ᠠᠯᠳᠠᠬᠤ ᠶᠣᠰᠣᠲᠠᠢ ᠪᠣᠯ ᠠᠯᠳᠠᠭ》 ᠭᠡᠪᠡ᠃ 15 ᠡᠢᠨ ᠬᠦ ᠲᠡᠳᠡ ᠪᠡᠯᠡᠭ ᠪᠣᠯᠣᠨ ᠬᠣᠶᠠᠷ ᠳᠠᠬᠢᠨ ᠶᠡᠬᠡ ᠮᠥᠩᠭᠥ ᠪᠠᠵᠠᠭᠠᠵᠤ ᠠᠪᠤᠭᠠᠳ ᠪᠢᠨᠶᠠᠮᠢᠨ ᠲᠠᠢ ᠬᠠᠮᠲᠤ ᠬᠥᠳᠡᠯᠦᠨ ᠶᠧᠵᠢᠫᠲ ᠤᠷᠤᠭᠤ ᠶᠠᠪᠤᠪᠠ᠃ ᠲᠡᠢᠨ ᠬᠦ ᠲᠡᠳᠡ ᠶᠣᠰᠧᠹ ᠤᠨ ᠡᠮᠦᠨᠡ ᠬᠦᠷᠦᠯᠴᠡᠨ ᠢᠷᠡᠭᠰᠡᠨ ᠪᠠᠢᠨᠠ᠃
16 ᠶᠣᠰᠧᠹ ᠪᠢᠨᠶᠠᠮᠢᠨ ᠤ ᠲᠡᠳᠡᠨ ᠲᠡᠢ ᠬᠠᠮᠲᠤ ᠪᠠᠢᠬᠤ ᠶᠢ ᠬᠠᠷᠠᠭᠠᠳ᠂ ᠭᠡᠷ ᠦᠨ ᠳᠠᠭᠠᠭᠠᠮᠠᠯ ᠳᠠᠭᠠᠨ᠄ 《ᠡᠨᠡ ᠬᠥᠮᠦᠰ ᠢ ᠭᠡᠷ ᠲᠦ ᠣᠷᠣᠭᠤᠯᠵᠤ᠂ ᠮᠠᠯ ᠨᠢᠳᠤᠯᠤᠭᠠᠳ ᠬᠣᠭᠣᠯᠠ ᠪᠡᠯᠡᠳᠬᠡᠭᠡᠷᠡᠢ᠃ ᠡᠨᠡ ᠬᠥᠮᠦᠰ ᠦᠳᠡ ᠳᠦ ᠨᠠᠳᠠ ᠲᠠᠢ ᠬᠠᠮᠲᠤ ᠬᠣᠭᠣᠯᠠᠯᠠᠨᠠ》 ᠭᠡᠵᠡᠢ᠃ 17 ᠳᠠᠭᠠᠭᠠᠮᠠᠯ ᠶᠣᠰᠧᠹ ᠤᠨ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠲᠡᠳᠡᠨ ᠢ ᠶᠣᠰᠧᠹ ᠤᠨ ᠭᠡᠷ ᠤᠷᠤᠭᠤ ᠬᠦᠷᠭᠡᠪᠡ᠃ 18 ᠲᠡᠳᠡ ᠶᠣᠰᠧᠹ ᠤᠨ ᠭᠡᠷ ᠲᠦ ᠬᠦᠷᠭᠡᠭᠳᠡᠬᠦ ᠳᠡᠭᠡᠨ ᠠᠶᠤᠵᠠᠭᠠᠨ᠂ 《ᠤᠷᠢᠳᠤ ᠪᠢᠳᠡᠨ ᠦ ᠤᠭᠤᠲᠠᠨ ᠳᠤ ᠪᠤᠴᠠᠭᠠᠵᠤ ᠬᠢᠭᠰᠡᠨ ᠲᠡᠷᠡ ᠮᠥᠩᠭᠥᠨ ᠦ ᠰᠢᠯᠲᠠᠭᠠᠨ ᠢᠶᠠᠷ ᠪᠢᠳᠡᠨ ᠢ ᠡ᠊ᠨᠳᠡ ᠬᠦᠷᠭᠡᠭᠰᠡᠨ ᠪᠠᠢᠬᠠ ᠡ᠃ ᠲᠡᠳᠡ ᠡᠭᠦᠨ ᠢᠶᠡᠷ ᠰᠢᠯᠲᠠᠭᠠᠯᠠᠨ ᠪᠢᠳᠡᠨ ᠤᠷᠤᠭᠤ ᠳᠠᠭᠠᠷᠢᠵᠤ᠂ ᠡᠷᠬᠡᠨ ᠳᠡᠭᠡᠨ ᠣᠷᠣᠭᠤᠯᠤᠭᠠᠳ ᠡᠯᠵᠢᠭᠡ ᠶᠢ ᠮᠠᠨᠢ ᠪᠤᠯᠢᠶᠠᠵᠤ᠂ ᠪᠢᠳᠡᠨ ᠢ ᠪᠣᠭᠣᠯ ᠪᠣᠯᠭᠠᠬᠤ ᠪᠤᠢ》 ᠭᠡᠵᠦ ᠪᠣᠳᠣᠵᠠᠢ᠃ 19 ᠲᠡᠳᠡ ᠶᠣᠰᠧᠹ ᠤᠨ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠬᠦᠷᠦᠭᠡᠳ ᠭᠡᠷ ᠦᠨ ᠳᠠᠭᠠᠭᠠᠮᠠᠯ ᠳᠤᠨᠢ ᠣᠢᠷᠠᠲᠤᠨ᠄
20 《ᠡᠵᠡᠨᠲᠡᠨ ᠮᠢᠨᠢ︕ ᠪᠢᠳᠡ ᠳᠡᠭᠡᠷᠡ ᠤᠳᠠᠭᠠ ᠴᠤ ᠬᠦᠨᠡᠰᠦ ᠠᠪᠬᠤ ᠪᠠᠷ ᠡ᠊ᠨᠳᠡ ᠢᠷᠡᠭᠰᠡᠨ ᠶᠤᠮ᠃ 21 ᠬᠠᠷᠢᠨ ᠪᠠᠭᠤᠳᠠᠯᠯᠠᠬᠤ ᠭᠠᠵᠠᠷ ᠢᠶᠠᠨ ᠬᠦᠷᠴᠦ ᠣᠴᠢᠭᠠᠳ᠂ ᠤᠭᠤᠲᠠᠨ ᠤ ᠪᠠᠨ ᠠᠮᠠᠰᠠᠷ ᠢ ᠨᠡᠭᠡᠭᠡᠬᠦ ᠳᠦ᠂ ᠤᠭᠤᠲᠠ ᠪᠣᠯᠭᠠᠨ ᠤ ᠠᠮᠠᠨ ᠳᠡᠭᠡᠷᠡ ᠬᠥᠮᠦᠨ ᠪᠦᠷᠢ ᠶᠢᠨ ᠲᠥᠯᠥᠭᠰᠡᠨ ᠮᠥᠩᠭᠥ ᠬᠡᠪ ᠢᠶᠡᠷ ᠢᠶᠠᠨ ᠪᠠᠢᠵᠤ ᠪᠠᠢᠭᠰᠠᠨ︕ ᠡᠢᠮᠦ ᠡᠴᠡ ᠪᠢᠳᠡ ᠲᠡᠭᠦᠨ ᠢ ᠪᠤᠴᠠᠭᠠᠵᠤ ᠠᠪᠴᠢᠷᠠᠯᠠ᠃ 22 ᠪᠢᠳᠡ ᠪᠠᠰᠠ ᠬᠦᠨᠡᠰᠦ ᠠᠪᠬᠤ ᠪᠠᠷ ᠢᠯᠡᠭᠦᠦ ᠮᠥᠩᠭᠥ ᠴᠤ ᠠᠪᠴᠢᠷᠠᠭᠰᠠᠨ᠃ ᠬᠡᠨ ᠪᠢᠳᠡᠨ ᠦ ᠤᠭᠤᠲᠠᠨ ᠤ ᠠᠮᠠ ᠤᠷᠤᠭᠤ ᠮᠥᠩᠭᠥ ᠶᠢ ᠮᠠᠨᠢ ᠬᠢᠭᠰᠡᠨ ᠢ ᠪᠢᠳᠡ ᠮᠡᠳᠡᠬᠦ ᠦᠭᠡᠢ》 ᠭᠡᠪᠡ᠃ 23 ᠬᠠᠷᠢᠨ ᠲᠡᠷᠡ᠄ 《ᠲᠠᠢᠪᠤᠩ ᠪᠠᠢᠵᠠᠭᠠ᠃ ᠪᠦᠦ ᠰᠠᠨᠳᠤᠷ᠃ ᠲᠠ ᠨᠠᠷ ᠤᠨ ᠪᠤᠷᠬᠠᠨ᠂ ᠡᠴᠢᠭᠡ ᠶᠢᠨ ᠴᠢᠨᠢ ᠪᠤᠷᠬᠠᠨ ᠲᠠ ᠨᠠᠷ ᠤᠨ ᠤᠭᠤᠲᠠᠨ ᠳᠤ ᠡᠷᠳᠡᠨᠢᠰ ᠬᠢᠵᠦ ᠥᠭᠭᠥᠭᠰᠡᠨ ᠶᠤᠮ᠃ ᠲᠠ ᠨᠠᠷ ᠤᠨ ᠨᠥᠭᠥᠭᠡ ᠮᠥᠩᠭᠥ ᠶᠢ ᠪᠢ ᠠᠪᠤᠭᠰᠠᠨ》 ᠭᠡᠵᠦ ᠬᠡᠯᠡᠭᠡᠳ᠂ ᠰᠢᠮᠧᠶᠣᠨ ᠢ ᠲᠡᠳᠡᠨ ᠳᠦ ᠭᠠᠷᠭᠠᠵᠤ ᠥᠭᠪᠡ᠃ 24 ᠳᠠᠭᠠᠭᠠᠮᠠᠯ ᠨᠢ ᠶᠣᠰᠧᠹ ᠤᠨ ᠭᠡᠷ ᠲᠦ ᠲᠡᠳᠡᠨ ᠢ ᠣᠷᠣᠭᠤᠯᠤᠭᠠᠳ᠂ ᠲᠡᠳᠡᠨ ᠳᠦ ᠬᠥᠯ ᠤᠬᠢᠶᠠᠬᠤ ᠤᠰᠤ ᠥᠭᠴᠦ᠂ ᠡᠯᠵᠢᠭᠡᠨ ᠳᠦᠨᠢ ᠲᠡᠵᠢᠭᠡᠯ ᠥᠭᠴᠡᠢ᠃ 25 ᠲᠡᠳᠡ ᠲᠡᠨᠳᠡ ᠬᠣᠭᠣᠯᠠᠯᠠᠬᠤ ᠪᠣᠯᠣᠭᠰᠠᠨ ᠢᠶᠠᠨ ᠰᠣᠨᠣᠰᠣᠭᠠᠳ᠂ ᠶᠣᠰᠧᠹ ᠢ ᠦᠳᠡ ᠳᠦ ᠢᠷᠡᠬᠦ ᠳᠦᠨᠢ ᠥᠭᠬᠦ ᠪᠡᠯᠡᠭ ᠢᠶᠡᠨ ᠪᠡᠯᠡᠳᠬᠡᠪᠡ᠃
26 ᠶᠣᠰᠧᠹ ᠭᠡᠷ ᠲᠡᠭᠡᠨ ᠣᠷᠣᠵᠤ ᠢᠷᠡᠬᠦ ᠳᠦ ᠲᠡᠳᠡ ᠭᠡᠷ ᠲᠤᠨᠢ ᠣᠷᠣᠭᠤᠯᠵᠤ ᠢᠷᠡᠭᠰᠡᠨ ᠪᠡᠯᠡᠭ ᠢᠶᠡᠨ ᠲᠡᠭᠦᠨ ᠳᠦ ᠡᠷᠭᠦᠨ ᠪᠠᠷᠢᠵᠤ᠂ ᠭᠠᠵᠠᠷ ᠲᠤ ᠰᠥᠭᠥᠳᠥᠨ ᠮᠥᠷᠭᠥᠪᠡ᠃ 27 ᠶᠣᠰᠧᠹ ᠲᠡᠳᠡᠨ ᠦ ᠠᠮᠤᠷ ᠮᠡᠨᠳᠦ ᠶᠢ ᠠᠰᠠᠭᠤᠭᠠᠳ᠄ 《ᠲᠠ ᠨᠠᠷ ᠤᠨ ᠶᠠᠷᠢᠵᠤ ᠪᠠᠢᠭᠰᠠᠨ ᠥᠨᠳᠥᠷ ᠨᠠᠰᠤᠲᠠᠢ ᠡᠴᠢᠭᠡ ᠴᠢᠨᠢ ᠠᠮᠤᠷ ᠰᠠᠢᠨ ᠪᠠᠢᠨᠠ ᠤᠤ︖ ᠣᠳᠣ ᠬᠦᠷᠲᠡᠯᠡ ᠠᠮᠢᠳᠤ ᠰᠡᠷᠡᠭᠦᠨ ᠪᠠᠢᠭᠠ ᠤᠤ︖》 ᠭᠡᠰᠡᠨ ᠳᠦ᠂ 28 ᠲᠡᠳᠡ᠄ 《ᠲᠠᠨ ᠤ ᠵᠠᠷᠤᠴᠠ᠂ ᠪᠢᠳᠡᠨ ᠦ ᠡᠴᠢᠭᠡ ᠠᠮᠤᠷ ᠰᠠᠢᠨ ᠪᠠᠢᠨᠠ᠂ ᠣᠳᠣ ᠬᠦᠷᠲᠡᠯᠡ ᠠᠮᠢᠳᠤ ᠰᠡᠷᠡᠭᠦᠨ ᠪᠠᠢᠨᠠ》 ᠭᠡᠵᠦ ᠬᠠᠷᠢᠭᠤᠯᠤᠭᠠᠳ ᠲᠣᠯᠣᠭᠠᠢ ᠪᠥᠬᠥᠢᠨ ᠮᠥᠷᠭᠥᠵᠡᠭᠡᠵᠡᠢ᠃ 29 ᠶᠣᠰᠧᠹ ᠨᠢᠳᠦ ᠡᠷᠭᠦᠨ ᠡᠬᠡ ᠶᠢᠨ ᠢᠶᠠᠨ ᠬᠦᠦ ᠪᠢᠨᠶᠠᠮᠢᠨ ᠳᠡᠭᠦᠦ ᠪᠡᠨ ᠬᠠᠷᠠᠭᠠᠳ᠄ 《ᠡᠨᠡ ᠴᠢᠨᠢ ᠲᠠ ᠨᠠᠷ ᠤᠨ ᠨᠠᠳᠠ ᠳᠤ ᠬᠡᠯᠡᠭᠡᠳ ᠪᠠᠢᠭᠰᠠᠨ ᠨᠥᠭᠥᠭᠡ ᠣᠳᠬᠣᠨ ᠳᠡᠭᠦᠦ ᠴᠢᠨᠢ ᠮᠥᠨ ᠤᠤ︖》 ᠭᠡᠳ᠂ 《ᠬᠦᠦ ᠮᠢᠨᠢ᠂ ᠴᠢᠮᠠᠶᠢ ᠪᠤᠷᠬᠠᠨ ᠢᠪᠡᠭᠡᠬᠦ ᠪᠣᠯᠲᠤᠭᠠᠢ︕》 ᠭᠡᠵᠦ ᠨᠡᠮᠡᠵᠦ ᠬᠡᠯᠡᠪᠡ᠃ 30 ᠶᠣᠰᠧᠹ ᠳᠡᠭᠦᠦ ᠪᠡᠨ ᠬᠠᠷᠠᠭᠠᠳ ᠰᠡᠳᠬᠢᠯ ᠨᠢ ᠶᠡᠬᠡᠳᠡ ᠤᠶᠠᠷᠠᠵᠤ᠂ ᠤᠬᠢᠯᠠᠬᠤ ᠰᠢᠬᠠᠭᠰᠠᠨ ᠢᠶᠠᠷ ᠶᠠᠭᠠᠷᠠᠨ ᠭᠠᠷᠴᠤ᠂ ᠳᠣᠲᠣᠭᠠᠳᠤ ᠥᠷᠥᠭᠡᠨ ᠳᠡᠭᠡᠨ ᠣᠷᠣᠵᠤ ᠤᠬᠢᠯᠠᠭᠰᠠᠨ ᠪᠠᠢᠨᠠ᠃ 31 ᠳᠠᠷᠠᠭᠠ ᠨᠢ ᠲᠡᠷᠡ ᠨᠢᠭᠤᠷ ᠢᠶᠠᠨ ᠤᠬᠢᠶᠠᠵᠤ᠂ ᠭᠠᠷᠴᠤ ᠢᠷᠡᠭᠡᠳ᠂ ᠰᠡᠳᠬᠢᠯ ᠢᠶᠠᠨ ᠪᠠᠷᠢᠨ᠄ 《ᠬᠣᠭᠣᠯᠠ ᠣᠷᠣᠭᠤᠯᠤᠭᠠᠷᠠᠢ》 ᠭᠡᠪᠡ᠃ 32 ᠲᠡᠳᠡ ᠶᠣᠰᠧᠹ ᠲᠤ ᠲᠤᠰ ᠲᠤᠨᠢ᠂ ᠠᠬᠠ ᠳᠡᠭᠦᠦ ᠨᠠᠷ ᠲᠤᠨᠢ ᠲᠤᠰ ᠲᠤᠨᠢ᠂ ᠲᠡᠭᠦᠨ ᠲᠡᠢ ᠬᠠᠮᠲᠤ ᠬᠣᠭᠣᠯᠠᠯᠠᠳᠠᠭ ᠶᠧᠵᠢᠫᠲ ᠬᠥᠮᠦᠰ ᠲᠦ ᠪᠠᠰᠠ ᠲᠤᠰ ᠲᠤᠨᠢ ᠬᠣᠭᠣᠯᠠ ᠠᠪᠴᠢᠷᠠᠵᠤ ᠥᠭᠪᠡ᠃ ᠤᠴᠢᠷ ᠨᠢ ᠶᠧᠵᠢᠫᠲ ᠬᠥᠮᠦᠨ ᠢᠪᠷᠠᠢ ᠬᠥᠮᠦᠨ ᠲᠡᠢ ᠬᠠᠮᠲᠤ ᠬᠣᠭᠣᠯᠠᠯᠠᠬᠤ ᠶᠢ ᠴᠡᠭᠡᠷᠯᠡᠳᠡᠭ ᠠᠵᠢ᠃ 33 ᠶᠣᠰᠧᠹ ᠲᠡᠳᠡᠨ ᠢ ᠲᠣᠮᠣ ᠠᠴᠠ ᠨᠢ ᠠᠪᠤᠭᠠᠳ ᠣᠳᠬᠣᠨ ᠳᠤᠨᠢ ᠬᠦᠷᠲᠡᠯᠡ ᠨᠠᠰᠤᠨ ᠤ ᠬᠢᠨᠢ ᠳᠠᠷᠠᠭᠠᠯᠠᠯ ᠢᠶᠠᠷ ᠥᠪᠡᠷ ᠦᠨ ᠢᠶᠠᠨ ᠡᠮᠦᠨᠡ ᠰᠠᠭᠤᠯᠭᠠᠭᠰᠠᠨ ᠳᠤ᠂ ᠲᠡᠳᠡ ᠪᠡᠶᠡ ᠪᠡᠶᠡ ᠪᠡᠨ ᠭᠠᠢᠬᠠᠨ ᠬᠠᠷᠠᠵᠠᠭᠠᠪᠠ᠃ 34 ᠶᠣᠰᠧᠹ ᠥᠪᠡᠷ ᠦᠨ ᠢᠶᠠᠨ ᠬᠣᠭᠣᠯᠠᠨ ᠠᠴᠠ ᠲᠡᠳᠡᠨ ᠳᠦ ᠪᠠᠷᠢᠭᠰᠠᠨ ᠪᠥᠭᠡᠳ ᠪᠢᠨᠶᠠᠮᠢᠨ ᠳᠤ ᠥᠭᠭᠥᠭᠰᠡᠨ ᠬᠣᠭᠣᠯᠠ ᠨᠢ ᠪᠤᠰᠤᠳ ᠤᠨ ᠬᠢ ᠡᠴᠡ ᠲᠠᠪᠤ ᠳᠠᠬᠢᠨ ᠶᠡᠬᠡ ᠪᠠᠢᠭᠰᠠᠨ᠃ ᠲᠡᠳᠡ ᠶᠣᠰᠧᠹ ᠲᠠᠢ ᠬᠠᠮᠲᠤ ᠬᠠᠨᠲᠠᠯᠠ ᠤᠤᠭᠤᠵᠤ ᠪᠠᠶᠠᠷᠯᠠᠵᠠᠭᠠᠵᠠᠢ᠃