ᠡᠬᠢᠯᠡᠯ ᠭᠤᠴᠢᠨ ᠭᠤᠷᠪᠠ
ᠶᠠᠺᠣᠪ ᠡᠰᠠᠦ᠋ ᠲᠠᠢ ᠠᠭᠤᠯᠵᠠᠪᠠ
1 ᠶᠠᠺᠣᠪ ᠨᠢᠳᠦ ᠡᠷᠭᠦᠨ ᠬᠠᠷᠠᠲᠠᠯᠠ᠂ ᠡᠰᠠᠦ᠋ ᠳᠥᠷᠪᠡᠨ ᠵᠠᠭᠤᠨ ᠬᠥᠮᠦᠨ ᠢᠶᠡᠨ ᠳᠠᠭᠠᠭᠤᠯᠤᠨ ᠢᠷᠡᠵᠦ ᠪᠠᠢᠪᠠ︕ ᠡᠢᠮᠦ ᠡᠴᠡ ᠲᠡᠷᠡ ᠪᠡᠷ ᠬᠡᠦᠬᠡᠳ ᠤᠳ ᠢᠶᠠᠨ ᠯᠧᠶᠠ᠂ ᠷᠠᠾᠢᠯ ᠪᠣᠯᠣᠨ ᠬᠣᠶᠠᠷ ᠰᠢᠪᠡᠭᠴᠢᠨ ᠳᠡᠭᠡᠨ ᠬᠤᠪᠢᠶᠠᠵᠤ ᠥᠭᠭᠥᠭᠡᠳ 2 ᠰᠢᠪᠡᠭᠴᠢᠳ ᠢ ᠬᠡᠦᠬᠡᠳ ᠤᠳ ᠲᠠᠢ ᠨᠢ ᠬᠠᠮᠲᠤ ᠲᠦᠷᠦᠭᠦᠨ ᠳᠦᠨᠢ ᠲᠠᠯᠪᠢᠵᠤ᠂ ᠯᠧᠶᠠ ᠶᠢ ᠬᠡᠦᠬᠡᠳ ᠤᠳ ᠲᠠᠢ ᠨᠢ ᠬᠠᠮᠲᠤ ᠳᠠᠷᠠᠭᠠ ᠨᠢ᠂ ᠷᠠᠾᠢᠯ ᠶᠣᠰᠧᠹ ᠬᠣᠶᠠᠷ ᠢ ᠬᠣᠢᠨᠠ ᠨᠢ ᠣᠷᠣᠭᠤᠯᠪᠠ᠃ 3 ᠬᠠᠷᠢᠨ ᠶᠠᠺᠣᠪ ᠥᠪᠡᠷ ᠢᠶᠡᠨ ᠲᠡᠳᠡᠨ ᠦ ᠡᠮᠦᠨᠡ ᠭᠠᠷᠤᠭᠠᠳ᠂ ᠳᠣᠯᠣᠭᠠᠨ ᠤᠳᠠᠭᠠ ᠭᠠᠵᠠᠷ ᠪᠥᠬᠥᠢᠨ ᠮᠥᠷᠭᠥᠵᠦ᠂ ᠠᠬᠠ ᠡᠰᠠᠦ᠋ ᠤᠷᠤᠭᠤ ᠪᠠᠨ ᠳᠥᠭᠥᠭᠰᠡᠭᠡᠷ ᠣᠴᠢᠪᠠ᠃
4 ᠬᠠᠷᠢᠨ ᠡᠰᠠᠦ᠋ ᠭᠦᠶᠦᠵᠦ ᠢᠷᠡᠭᠡᠳ᠂ ᠲᠡᠭᠦᠨ ᠦ ᠬᠦᠵᠦᠭᠦᠦ ᠪᠡᠷ ᠲᠡᠪᠡᠷᠢᠨ ᠦᠨᠦᠰᠪᠡ᠃ ᠢᠩᠭᠢᠭᠡᠳ ᠬᠣᠶᠠᠭᠤᠯᠠ ᠪᠠᠨ ᠤᠬᠢᠯᠠᠯᠳᠤᠭᠰᠠᠨ ᠪᠠᠢᠯᠠ᠃ 5 ᠡᠰᠠᠦ᠋ ᠨᠢᠳᠦ ᠡᠷᠭᠦᠨ᠂ ᠡᠮᠡᠭᠲᠡᠢᠴᠦᠳ ᠪᠣᠯᠣᠨ ᠬᠡᠦᠬᠡᠳ ᠤᠳ ᠢ ᠣᠯᠵᠤ ᠬᠠᠷᠠᠭᠠᠳ᠄ 《ᠴᠢᠮᠠ ᠲᠠᠢ ᠬᠠᠮᠲᠤ ᠶᠠᠪᠤᠭᠠ ᠡᠨᠡ ᠬᠥᠮᠦᠰ ᠶᠠᠭᠤᠨ ᠤ ᠤᠯᠤᠰ ᠪᠤᠢ︖》 ᠭᠡᠰᠡᠨ ᠳᠦ ᠶᠠᠺᠣᠪ᠄ 《ᠲᠠᠨ ᠤ ᠵᠠᠷᠤᠴᠠ ᠨᠠᠳᠠ ᠳᠤ ᠪᠤᠷᠬᠠᠨ ᠤ ᠬᠠᠢᠷᠠᠯᠠᠭᠰᠠᠨ ᠬᠡᠦᠬᠡᠳ ᠤᠳ》 ᠭᠡᠪᠡ᠃ 6 ᠲᠡᠭᠡᠬᠦ ᠳᠦ ᠵᠠᠷᠤᠴᠠ ᠪᠦᠰᠡᠭᠦᠢᠴᠦᠳ ᠨᠢ ᠬᠡᠦᠬᠡᠳ ᠤᠳ ᠤᠨ ᠢᠶᠠᠨ ᠬᠠᠮᠲᠤ ᠬᠦᠷᠴᠦ ᠢᠷᠡᠭᠡᠳ ᠰᠥᠭᠥᠳᠥᠨ ᠮᠥᠷᠭᠥᠪᠡ᠃ 7 ᠯᠧᠶᠠ ᠴᠤ ᠬᠡᠦᠬᠡᠳ ᠤᠳ ᠤᠨ ᠢᠶᠠᠨ ᠬᠠᠮᠲᠤ ᠬᠦᠷᠴᠦ ᠢᠷᠡᠭᠡᠳ ᠰᠥᠭᠥᠳᠥᠨ ᠮᠥᠷᠭᠥᠪᠡ᠃ ᠳᠠᠷᠠᠭᠠ ᠨᠢ ᠶᠣᠰᠧᠹ ᠷᠠᠾᠢᠯ ᠲᠠᠢ ᠬᠠᠮᠲᠤ ᠬᠦᠷᠴᠦ ᠢᠷᠡᠭᠡᠳ ᠰᠥᠭᠥᠳᠥᠨ ᠮᠥᠷᠭᠥᠪᠡ᠃ 8 ᠡᠰᠠᠦ᠋᠄ 《ᠨᠠᠳᠠ ᠲᠠᠢ ᠲᠠᠭᠠᠷᠠᠯᠳᠤᠭᠰᠠᠨ ᠡᠨᠡ ᠡᠩᠨᠡᠭᠡ ᠴᠢᠨᠢ ᠶᠠᠮᠠᠷ ᠤᠴᠢᠷ ᠲᠠᠢ ᠶᠤᠮ ᠪᠤᠢ︖》 ᠭᠡᠰᠡᠨ ᠳᠦ᠂ ᠶᠠᠺᠣᠪ᠄ 《ᠡᠵᠡᠨ ᠲᠠᠨ ᠤ ᠲᠠᠭᠠᠯᠠᠯ ᠢ ᠣᠯᠬᠤ ᠭᠡᠰᠡᠨ ᠪᠢᠯᠡ》 ᠭᠡᠵᠦ ᠬᠡᠯᠡᠪᠡ᠃ 9 ᠡᠰᠠᠦ᠋᠄ 《ᠨᠠᠳᠠ ᠳᠤ ᠴᠤ ᠠᠷᠪᠢᠨ ᠪᠠᠢᠨᠠ᠂ ᠳᠡᠭᠦᠦ ᠮᠢᠨᠢ ᠡ᠂ ᠪᠠᠢᠭᠠ ᠶᠠᠭᠤᠮᠠ ᠪᠠᠨ ᠥᠪᠡᠷ ᠲᠡᠭᠡᠨ ᠦᠯᠡᠳᠡᠭᠡ》 ᠭᠡᠪᠡ᠃ 10 ᠶᠠᠺᠣᠪ᠄ 《ᠦᠭᠡᠢ᠃ ᠬᠡᠷᠪᠡ ᠪᠢ ᠲᠠᠨ ᠤ ᠲᠠᠭᠠᠯᠠᠯ ᠢ ᠣᠯᠣᠭᠰᠠᠨ ᠪᠣᠯ᠂ ᠲᠠ ᠡᠨᠡ ᠪᠡᠯᠡᠭ ᠢ ᠭᠠᠷ ᠠᠴᠠ ᠮᠢᠨᠢ ᠬᠦᠯᠢᠶᠡᠨ ᠠᠪᠤᠨᠠ ᠤᠤ︖ ᠲᠠ ᠨᠠᠮᠠᠶᠢ ᠲᠠᠭᠠᠯᠠᠭᠰᠠᠨ ᠪᠣᠯᠬᠣᠷ ᠲᠠᠨ ᠲᠠᠢ ᠨᠢᠭᠤᠷ ᠤᠴᠠᠷᠠᠬᠤ ᠨᠢ ᠪᠤᠷᠬᠠᠨ ᠯᠤᠭᠠ ᠨᠢᠭᠤᠷ ᠤᠴᠠᠷᠠᠭᠰᠠᠨ ᠲᠠᠢ ᠠᠳᠠᠯᠢ ᠶᠤᠮ᠃ 11 ᠲᠠᠨ ᠳᠤ ᠵᠣᠷᠢᠭᠤᠯᠵᠤ ᠠᠪᠴᠢᠷᠠᠭᠰᠠᠨ ᠪᠡᠯᠡᠭ ᠢ ᠮᠢᠨᠢ ᠬᠦᠯᠢᠶᠡᠨ ᠠᠪᠤᠨᠠ ᠤᠤ︖ ᠪᠤᠷᠬᠠᠨ ᠨᠠᠮᠠᠶᠢ ᠢᠪᠡᠭᠡᠭᠰᠡᠨ ᠲᠤᠯᠠ ᠨᠠᠳᠠ ᠳᠤ ᠪᠦᠬᠦ ᠶᠠᠭᠤᠮᠠ ᠪᠤᠢ》 ᠭᠡᠵᠦ ᠱᠠᠯᠠᠨ ᠭᠤᠶᠤᠭᠰᠠᠨ ᠳᠤ᠂ ᠡᠰᠠᠦ᠋ ᠵᠥᠪᠰᠢᠶᠡᠷᠡᠵᠡᠢ᠃
12 ᠡᠰᠠᠦ᠋᠄ 《ᠵᠠ᠂ ᠵᠠᠮ ᠳᠠᠭᠠᠨ ᠭᠠᠷᠤᠶᠠ︕ ᠪᠢ ᠴᠢᠨᠦ ᠡᠮᠦᠨᠡ ᠶᠠᠪᠤᠶᠠ》 ᠭᠡᠪᠡ᠃ 13 ᠶᠠᠺᠣᠪ ᠲᠡᠭᠦᠨ ᠳᠦ᠄ 《ᠬᠡᠦᠬᠡᠳ ᠤᠳ ᠮᠢᠨᠢ ᠪᠠᠭᠠ ᠪᠠᠯᠴᠢᠷ᠂ ᠮᠠᠯ ᠰᠦᠷᠦᠭ ᠮᠠᠨᠢ ᠨᠢᠯᠬᠠ ᠲᠥᠯ ᠲᠡᠢ ᠶᠢ ᠡᠵᠡᠨ ᠲᠠ ᠮᠡᠳᠡᠯᠡ᠃ ᠬᠡᠷᠪᠡ ᠨᠢᠭᠡ ᠡᠳᠦᠷ ᠰᠢᠷᠦᠭᠦᠨ ᠲᠠᠭᠤᠪᠠᠯ ᠮᠠᠯ ᠰᠦᠷᠦᠭ ᠪᠦᠭᠦᠳᠡᠭᠡᠷ ᠢᠶᠡᠨ ᠦᠬᠦᠨᠡ᠃ 14 ᠡᠵᠡᠨ ᠮᠢᠨᠢ ᠲᠠ ᠵᠠᠷᠤᠴᠠ ᠨᠠᠳᠠ ᠠᠴᠠ ᠲᠦᠷᠦᠭᠦᠯᠡᠭᠡᠳ ᠶᠠᠪᠤᠨᠠ ᠤᠤ︖ ᠪᠢ ᠡᠮᠦᠨᠡ ᠶᠠᠪᠤᠭᠠ ᠮᠠᠯ ᠰᠦᠷᠦᠭ᠂ ᠬᠡᠦᠬᠡᠳ ᠤᠳ ᠤᠨ ᠢᠶᠠᠨ ᠠᠶᠠᠰ ᠢ ᠳᠠᠭᠠᠵᠤ᠂ ᠠᠭᠠᠵᠢᠭᠤᠬᠠᠨ ᠶᠠᠪᠤᠶᠠ᠃ ᠲᠡᠭᠡᠭᠡᠳ ᠪᠢ ᠰᠧᠷ ᠲᠤ ᠣᠴᠢᠭᠠᠳ ᠡᠵᠡᠨ ᠲᠠᠨ ᠲᠠᠢ ᠠᠭᠤᠯᠵᠠᠬᠤ ᠪᠣᠯᠣᠨᠠ》 ᠭᠡᠪᠡ᠃
15 ᠡᠰᠠᠦ᠋᠄ 《ᠲᠡᠭᠡᠪᠡᠯ ᠪᠢ ᠬᠥᠮᠦᠰ ᠦᠨ ᠢᠶᠠᠨ ᠵᠠᠷᠢᠮ ᠢ ᠴᠢᠮᠠ ᠲᠠᠢ ᠦᠯᠡᠳᠡᠭᠡᠶᠡ》 ᠭᠡᠬᠦ ᠳᠦ᠂ ᠶᠠᠺᠣᠪ᠄ 《ᠶᠠᠭᠠᠬᠢᠬᠤ ᠶᠤᠮ ᠪᠤᠢ︖ ᠪᠢ ᠡᠵᠡᠨ ᠲᠠᠨ ᠤ ᠲᠠᠭᠠᠯᠠᠯ ᠳᠤ ᠪᠠᠭᠲᠠᠪᠠᠯ ᠪᠣᠯᠣᠯᠠ》 ᠭᠡᠪᠡ᠃ 16 ᠡᠰᠠᠦ᠋ ᠲᠡᠷᠡ ᠡᠳᠦᠷ ᠲᠡᠭᠡᠨ ᠰᠧᠷ ᠤᠷᠤᠭᠤ ᠪᠤᠴᠠᠬᠤ ᠵᠠᠮ ᠳᠠᠭᠠᠨ ᠭᠠᠷᠪᠠ᠃ 17 ᠬᠠᠷᠢᠨ ᠶᠠᠺᠣᠪ ᠰᠦᠺᠣᠲ ᠲᠤ ᠣᠴᠢᠭᠠᠳ᠂ ᠲᠡᠨᠳᠡ ᠥᠪᠡᠷ ᠲᠡᠭᠡᠨ ᠪᠠᠢᠰᠢᠩ᠂ ᠮᠠᠯ ᠳᠠᠭᠠᠨ ᠰᠠᠷᠠᠪᠴᠢ ᠪᠠᠷᠢᠭᠰᠠᠨ ᠪᠠᠢᠯᠠ᠃ ᠡᠭᠦᠨ ᠦ ᠤᠯᠠᠮ ᠢᠶᠠᠷ ᠲᠡᠷᠡ ᠭᠠᠵᠠᠷ ᠰᠦᠺᠣᠲ 64 ᠭᠡᠵᠦ ᠨᠡᠷᠡᠯᠡᠭᠳᠡᠵᠡᠢ᠃
ᠶᠠᠺᠣᠪ ᠱᠧᠺᠧᠮ ᠳᠤ ᠰᠠᠭᠤᠷᠢᠰᠢᠪᠠ
18 ᠶᠠᠺᠣᠪ ᠫᠠᠳᠠᠨ ᠠᠷᠠᠮ ᠠᠴᠠ ᠪᠤᠴᠠᠬᠤ ᠵᠠᠮ ᠳᠠᠭᠠᠨ ᠺᠠᠨᠠᠨ ᠨᠤᠲᠤᠭ ᠤᠨ ᠱᠧᠺᠧᠮ ᠬᠣᠲᠠ ᠳᠤ ᠠᠮᠤᠷ ᠲᠠᠢᠪᠤᠩ ᠬᠦᠷᠴᠦ ᠢᠷᠡᠭᠡᠳ᠂ ᠬᠣᠲᠠ ᠶᠢᠨ ᠡᠮᠦᠨᠡ ᠲᠠᠯᠠ ᠳᠤ ᠮᠠᠢᠬᠠᠨ ᠢᠶᠠᠨ ᠪᠠᠷᠢᠪᠠ᠃ 19 ᠲᠡᠷᠡ ᠪᠡᠷ ᠮᠠᠢᠬᠠᠨ ᠢᠶᠠᠨ ᠪᠠᠷᠢᠭᠰᠠᠨ ᠲᠡᠷᠡ ᠲᠠᠯᠠᠪᠠᠢ ᠶᠢᠨ ᠬᠡᠰᠡᠭ ᠢ ᠱᠧᠺᠧᠮ ᠢ ᠡᠭᠦᠰᠭᠡᠭᠴᠢ ᠬᠠᠮᠣᠷ ᠤᠨ ᠬᠡᠦᠬᠡᠳ ᠤᠳ ᠠᠴᠠ ᠵᠠᠭᠤᠨ ᠮᠥᠩᠭᠥᠨ ᠵᠣᠭᠣᠰ ᠢᠶᠠᠷ ᠬᠤᠳᠠᠯᠳᠤᠨ ᠠᠪᠤᠭᠠᠳ 20 ᠲᠡᠨᠳᠡ ᠪᠡᠨ ᠲᠠᠬᠢᠯ ᠤᠨ ᠰᠢᠷᠡᠭᠡ ᠪᠣᠰᠬᠠᠵᠤ᠂ ᠲᠡᠭᠦᠨ ᠢ ᠪᠠᠨ ᠡᠯᠧᠯᠣᠾᠧ ᠢᠰᠷᠧᠯ 65 ᠭᠡᠵᠦ ᠨᠡᠷᠡᠯᠡᠭᠰᠡᠨ ᠪᠠᠢᠯᠠ᠃