ᠡᠬᠢᠯᠡᠯ ᠬᠣᠷᠢᠨ ᠭᠤᠷᠪᠠ
ᠠᠪᠷᠠᠬᠠᠮ ᠣᠷᠣᠰᠢᠭᠤᠯᠭᠠ ᠶᠢᠨ ᠭᠠᠵᠠᠷ ᠬᠤᠳᠠᠯᠳᠤᠨ ᠠᠪᠤᠪᠠ
1 ᠰᠠᠷᠠᠾ ᠵᠠᠭᠤ ᠬᠣᠷᠢᠨ ᠳᠣᠯᠣᠭᠠ ᠨᠠᠰᠤᠯᠠᠪᠠ᠃ ᠰᠠᠷᠠᠾ ᠤᠨ ᠠᠮᠢᠳᠤᠷᠠᠯ ᠤᠨ ᠣᠨ ᠵᠢᠯ ᠤᠳ ᠡᠨᠡ ᠠᠵᠢ᠃ 2 ᠰᠠᠷᠠᠾ ᠺᠠᠨᠠᠨ ᠨᠤᠲᠤᠭ ᠤᠨ ᠠᠷᠪᠠ ᠬᠣᠲᠠ ᠪᠤᠶᠤ ᠾᠧᠪᠷᠣᠨ ᠳᠤ ᠨᠠᠰᠤ ᠪᠠᠷᠠᠭᠰᠠᠨ ᠳᠤ᠂ ᠠᠪᠷᠠᠬᠠᠮ ᠢᠷᠡᠵᠦ ᠰᠠᠷᠠᠾ ᠤᠨ ᠲᠥᠯᠥᠭᠡ ᠭᠠᠰᠢᠭᠤᠳᠠᠨ ᠤᠬᠢᠯᠠᠪᠠ᠃ 3 ᠲᠡᠷᠡ ᠪᠡᠷ ᠰᠠᠷᠠᠾ ᠤᠨ ᠱᠠᠷᠢᠯ ᠤᠨ ᠳᠡᠷᠭᠡᠳᠡ ᠡᠴᠡ ᠪᠣᠰᠴᠤ᠂ ᠾᠢᠲ᠋ᠴᠦᠳ ᠲᠦ᠄ 4 《ᠪᠢ ᠪᠣᠯ ᠲᠠ ᠨᠠᠷ ᠤᠨ ᠳᠤᠮᠳᠠ ᠠᠮᠢᠳᠤᠷᠠᠳᠠᠭ ᠴᠠᠭᠠᠴᠢᠨ᠃ ᠲᠠ ᠨᠠᠷ ᠨᠠᠳᠠ ᠳᠤ ᠬᠤᠪᠢᠳᠠᠭᠤᠯᠵᠤ ᠣᠷᠣᠰᠢᠭᠤᠯᠭᠠ ᠶᠢᠨ ᠭᠠᠵᠠᠷ ᠥᠭᠭᠥᠨᠡ ᠤᠤ︖ ᠪᠢ ᠲᠠᠯᠢᠢᠭᠠᠴᠢ ᠪᠠᠨ ᠲᠡᠨᠳᠡ ᠣᠷᠣᠰᠢᠭᠤᠯᠤᠶᠠ》 ᠭᠡᠵᠡᠢ᠃ 5 ᠾᠢᠲ᠋ᠴᠦᠳ ᠠᠪᠷᠠᠬᠠᠮ ᠳᠤ ᠬᠠᠷᠢᠭᠤᠯᠤᠨ᠄ 6 《ᠡᠵᠡᠨᠲᠡᠨ ᠮᠢᠨᠢ︕ ᠲᠠ ᠪᠢᠳᠡᠨ ᠦ ᠦᠭᠡ ᠶᠢ ᠪᠣᠯᠭᠣᠭᠠᠨᠠ ᠤᠤ︖ ᠲᠠ ᠪᠣᠯ ᠮᠠᠨ ᠤ ᠬᠢᠨ ᠤ ᠳᠤᠮᠳᠠ ᠡᠷᠬᠢᠮ ᠨᠣᠶᠠᠨ ᠰᠢᠦ᠃ ᠲᠠ ᠮᠠᠨ ᠤ ᠣᠷᠣᠰᠢᠭᠤᠯᠭᠠ ᠶᠢᠨ ᠭᠠᠵᠠᠷ ᠠᠴᠠ ᠬᠠᠮᠤᠭ ᠤᠨ ᠰᠠᠢᠨ ᠢ ᠨᠢ ᠰᠢᠯᠢᠵᠦ ᠠᠪᠤᠭᠠᠳ ᠲᠠᠯᠢᠢᠭᠠᠴᠢ ᠪᠠᠨ ᠲᠡᠨᠳᠡ ᠣᠷᠣᠰᠢᠭᠤᠯᠤᠭᠠᠷᠠᠢ᠃ ᠲᠠ ᠲᠠᠯᠢᠢᠭᠠᠴᠢ ᠪᠠᠨ ᠣᠷᠣᠰᠢᠭᠤᠯᠬᠤ ᠭᠡᠪᠡᠯ᠂ ᠮᠠᠨ ᠤ ᠬᠢᠨ ᠤ ᠳᠤᠮᠳᠠ ᠠᠴᠠ ᠥᠪᠡᠷ ᠦᠨ ᠣᠷᠣᠰᠢᠭᠤᠯᠭᠠ ᠶᠢᠨ ᠭᠠᠵᠠᠷ ᠢᠶᠠᠨ ᠥᠭᠬᠦ ᠦᠭᠡᠢ ᠬᠥᠮᠦᠨ ᠪᠠᠢᠬᠤ ᠦᠭᠡᠢ ᠰᠢᠦ》 ᠭᠡᠵᠡᠭᠡᠪᠡ᠃ 7 ᠠᠪᠷᠠᠬᠠᠮ ᠪᠣᠰᠴᠤ᠂ ᠲᠡᠷᠡ ᠨᠤᠲᠤᠭ ᠤᠨ ᠬᠢᠨ ᠪᠤᠶᠤ ᠾᠢᠲ᠋ᠴᠦᠳ ᠲᠦ ᠪᠥᠬᠥᠢᠨ ᠶᠣᠰᠣᠯᠠᠵᠤ᠂ 8 ᠲᠡᠳᠡᠨ ᠳᠦ᠄ 《ᠬᠡᠷᠪᠡ ᠲᠠ ᠨᠠᠷ ᠲᠠᠯᠢᠢᠭᠠᠴᠢ ᠪᠠᠨ ᠨᠤᠲᠤᠭᠯᠠᠭᠤᠯᠬᠤ ᠶᠢ ᠮᠢᠨᠢ ᠵᠥᠪᠰᠢᠶᠡᠷᠡᠬᠦ ᠶᠤᠮ ᠪᠣᠯ᠂ ᠮᠢᠨᠦ ᠦᠭᠡ ᠶᠢ ᠰᠣᠨᠣᠰᠣᠭᠠᠳ ᠮᠢᠨᠦ ᠡᠮᠦᠨᠡ ᠡᠴᠡ ᠽᠣᠬᠠᠷ ᠤᠨ ᠬᠦᠦ ᠡᠹᠷᠣᠨ ᠲᠠᠢ ᠠᠭᠤᠯᠵᠠᠵᠤ᠂ 9 ᠲᠡᠭᠦᠨ ᠳᠦ ᠮᠠᠺᠫᠧᠯᠠ ᠳᠠᠬᠢ ᠠᠭᠤᠢ ᠪᠠᠨ ᠨᠠᠳᠠ ᠳᠤ ᠬᠤᠳᠠᠯᠳᠤᠬᠤ ᠶᠢ ᠢᠳᠬᠠᠭᠠᠴᠢ᠂ ᠲᠡᠷᠡ ᠠᠭᠤᠢ ᠲᠡᠭᠦᠨ ᠦ ᠲᠠᠯᠠᠪᠠᠢ ᠶᠢᠨ ᠵᠠᠬᠠ ᠳᠤ ᠪᠤᠢ᠃ ᠡᠹᠷᠣᠨ ᠡᠭᠦᠨ ᠢ ᠪᠠᠨ ᠮᠠᠨ ᠤ ᠣᠷᠣᠰᠢᠭᠤᠯᠭᠠ ᠶᠢᠨ ᠭᠠᠵᠠᠷ ᠪᠣᠯᠭᠠᠨ ᠲᠠ ᠣᠯᠠᠨ ᠤ ᠡᠮᠦᠨᠡ ᠨᠠᠳᠠ ᠳᠤ ᠪᠦᠲᠦᠨ ᠦᠨᠡ ᠪᠡᠷ ᠨᠢ ᠬᠤᠳᠠᠯᠳᠤᠬᠤ ᠪᠣᠯᠲᠤᠭᠠᠢ》 ᠭᠡᠪᠡ᠃ 10 ᠶᠠᠭ ᠲᠡᠷᠡ ᠦᠶᠡ ᠳᠦ ᠡᠹᠷᠣᠨ ᠾᠢᠲ᠋ᠴᠦᠳ ᠦᠨ ᠳᠤᠮᠳᠠ ᠰᠠᠭᠤᠵᠤ ᠪᠠᠢᠯᠠ᠃ ᠬᠣᠲᠠ ᠶᠢᠨ ᠬᠠᠭᠠᠯᠭᠠ ᠪᠠᠷ ᠣᠷᠣᠵᠤ ᠢᠷᠡᠭᠰᠡᠨ ᠪᠦᠬᠦ ᠾᠢᠲ᠋ᠴᠦᠳ ᠰᠣᠨᠣᠰᠴᠤ ᠪᠠᠢᠬᠤ ᠳᠤ᠂ ᠲᠡᠷᠡ ᠪᠡᠷ ᠠᠪᠷᠠᠬᠠᠮ ᠳᠤ ᠬᠠᠷᠢᠭᠤᠯᠤᠨ᠄ 11 《ᠦᠭᠡᠢ ᠡ᠂ ᠡᠵᠡᠨᠲᠡᠨ ᠮᠢᠨᠢ᠂ ᠮᠢᠨᠦᠬᠢ ᠶᠢ ᠪᠣᠯᠭᠣᠭᠠᠨᠠ ᠤᠤ︖ ᠪᠢ ᠲᠡᠷᠡ ᠲᠠᠯᠠᠪᠠᠢ ᠶᠢ ᠥᠭᠭᠥᠶᠡ᠂ ᠮᠥᠨ ᠲᠡᠨᠳᠡ ᠪᠠᠢᠭᠠ ᠠᠭᠤᠢ ᠶᠢ ᠴᠤ ᠥᠭᠭᠥᠶᠡ᠃ ᠪᠢ ᠨᠤᠲᠤᠭ ᠤᠨ ᠬᠢᠨ ᠤ ᠪᠠᠨ ᠡᠮᠦᠨᠡ ᠡᠭᠦᠨ ᠢ ᠲᠠᠨ ᠳᠤ ᠥᠭᠭᠥᠶᠡ᠃ ᠲᠠ ᠲᠠᠯᠢᠢᠭᠠᠴᠢ ᠪᠠᠨ ᠲᠡᠨᠳᠡ ᠣᠷᠣᠰᠢᠭᠤᠯᠤᠭᠠᠷᠠᠢ》 ᠭᠡᠪᠡ᠃ 12 ᠠᠪᠷᠠᠬᠠᠮ ᠲᠡᠷᠡ ᠨᠤᠲᠤᠭ ᠤᠨ ᠬᠢᠨ ᠳᠤ ᠪᠥᠬᠥᠢᠨ ᠶᠣᠰᠣᠯᠠᠵᠤ᠂ 13 ᠲᠡᠳᠡ ᠰᠣᠨᠣᠰᠴᠤ ᠪᠠᠢᠬᠤ ᠳᠤ᠂ ᠡᠹᠷᠣᠨ ᠳᠤ᠄ 《ᠬᠠᠷᠢᠨ ᠲᠠ ᠮᠢᠨᠦᠬᠢ ᠶᠢ ᠰᠣᠨᠣᠰᠣᠨᠠ ᠤᠤ︖ ᠪᠢ ᠲᠡᠷᠡ ᠲᠠᠯᠠᠪᠠᠢ ᠶᠢᠨ ᠦᠨᠡ ᠶᠢ ᠥᠭᠭᠥᠶᠡ᠃ ᠲᠠ ᠡᠭᠦᠨ ᠢ ᠨᠠᠳᠠ ᠠᠴᠠ ᠠᠪᠤᠭᠠᠷᠠᠢ᠂ ᠲᠡᠭᠡᠬᠦ ᠳᠦ ᠬᠦᠷᠪᠡᠯ ᠪᠢ ᠲᠠᠯᠢᠢᠭᠠᠴᠢ ᠪᠠᠨ ᠲᠡᠨᠳᠡ ᠣᠷᠣᠰᠢᠭᠤᠯᠤᠶᠠ》 ᠭᠡᠪᠡ᠃ 14 ᠡᠹᠷᠣᠨ ᠠᠪᠷᠠᠬᠠᠮ ᠳᠤ ᠬᠠᠷᠢᠭᠤᠯᠤᠨ᠄ 15 《ᠡᠵᠡᠨᠲᠡᠨ ᠮᠢᠨᠢ ᠡ᠂ ᠮᠢᠨᠦᠬᠢ ᠶᠢ ᠰᠣᠨᠣᠰᠣᠭᠠᠴᠢ᠃ ᠲᠡᠷᠡ ᠭᠠᠵᠠᠷ ᠤᠨ ᠦᠨᠡ ᠳᠥᠷᠪᠡᠨ ᠵᠠᠭᠤᠨ ᠱᠧᠺᠧᠯ 38 ᠮᠥᠩᠭᠥ ᠲᠠᠢ ᠲᠡᠩᠴᠡᠨᠡ᠃ ᠭᠡᠪᠡᠴᠦ ᠲᠠ ᠪᠢᠳᠡ ᠬᠣᠶᠠᠷ ᠤᠨ ᠬᠣᠭᠣᠷᠣᠨᠳᠣ ᠡᠨᠡ ᠶᠠᠭᠤ ᠪᠣᠯᠬᠤ ᠪᠢᠯᠡ︖ ᠵᠦᠭᠡᠷ᠂ ᠲᠠᠯᠢᠢᠭᠠᠴᠢ ᠪᠠᠨ ᠣᠷᠣᠰᠢᠭᠤᠯ》 ᠭᠡᠰᠡᠨ ᠳᠦ᠂ 16 ᠠᠪᠷᠠᠬᠠᠮ ᠡᠹᠷᠣᠨ ᠤ ᠦᠭᠡ ᠶᠢ ᠳᠠᠭᠠᠵᠤ᠂ ᠾᠢᠲ᠋ᠴᠦᠳ ᠰᠣᠨᠣᠰᠴᠤ ᠪᠠᠢᠬᠤ ᠳᠤ ᠡᠹᠷᠣᠨ ᠤ ᠬᠡᠯᠡᠭᠰᠡᠨ ᠳᠥᠷᠪᠡᠨ ᠵᠠᠭᠤᠨ ᠱᠧᠺᠧᠯ ᠮᠥᠩᠭᠥ ᠶᠢ ᠬᠤᠳᠠᠯᠳᠤᠭᠠᠴᠢᠳ ᠤᠨ ᠬᠡᠷᠡᠭᠯᠡᠳᠡᠭ ᠵᠢᠩ ᠢᠶᠠᠷ ᠵᠢᠩᠯᠡᠵᠦ ᠡᠹᠷᠣᠨ ᠳᠤ ᠥᠭᠴᠡᠢ᠃
17 ᠡᠢᠨ ᠬᠦ ᠮᠠᠮᠷᠧ ᠶᠢᠨ ᠬᠠᠪᠢ ᠳᠠᠬᠢ ᠮᠠᠺᠫᠧᠯᠠ ᠳᠤ ᠪᠤᠢ ᠡᠹᠷᠣᠨ ᠤ ᠲᠠᠯᠠᠪᠠᠢ᠂ ᠲᠡᠭᠦᠨ ᠦ ᠳᠣᠲᠣᠷᠠᠬᠢ ᠠᠭᠤᠢ᠂ ᠮᠥᠨ ᠲᠡᠷᠡ ᠲᠠᠯᠠᠪᠠᠢ ᠶᠢᠨ ᠡᠷᠭᠢᠨ ᠲᠣᠭᠣᠷᠢᠨ ᠤ ᠣᠢ ᠮᠣᠳᠣ ᠲᠠᠢ ᠬᠠᠮᠲᠤ ᠠᠪᠷᠠᠬᠠᠮ ᠳᠤ ᠰᠢᠯᠵᠢᠵᠦ᠂ 18 ᠬᠣᠲᠠ ᠶᠢᠨ ᠬᠠᠭᠠᠯᠭᠠ ᠪᠠᠷ ᠣᠷᠣᠵᠤ ᠢᠷᠡᠭᠰᠡᠨ ᠪᠦᠬᠦ ᠾᠢᠲ᠋ᠴᠦᠳ ᠦᠨ ᠡᠮᠦᠨᠡ ᠠᠪᠷᠠᠬᠠᠮ ᠤᠨ ᠥᠮᠴᠢ ᠬᠥᠷᠥᠩᠭᠡ ᠪᠣᠯᠪᠠ᠃ 19 ᠡᠭᠦᠨ ᠦ ᠳᠠᠷᠠᠭᠠ ᠠᠪᠷᠠᠬᠠᠮ ᠺᠠᠨᠠᠨ ᠨᠤᠲᠤᠭ ᠤᠨ ᠮᠠᠮᠷᠧ ᠶᠢᠨ ᠬᠠᠪᠢ᠂ ᠲᠤᠬᠠᠢᠯᠠᠪᠠᠯ ᠾᠧᠪᠷᠣᠨ ᠤ ᠮᠠᠺᠫᠧᠯᠠ ᠳᠠᠬᠢ ᠠᠭᠤᠢ ᠳᠤ ᠡᠬᠡᠨᠡᠷ ᠰᠠᠷᠠᠾ ᠢᠶᠠᠨ ᠣᠷᠣᠰᠢᠭᠤᠯᠪᠠ᠃ 20 ᠡᠢᠨ ᠬᠦ ᠲᠡᠷᠡ ᠲᠠᠯᠠᠪᠠᠢ ᠪᠣᠯᠣᠨ ᠳᠣᠲᠣᠷᠠᠬᠢ ᠠᠭᠤᠢ ᠶᠢ ᠨᠢ ᠾᠢᠲ᠋ᠴᠦᠳ ᠠᠪᠷᠠᠬᠠᠮ ᠳᠤ ᠰᠢᠯᠵᠢᠭᠦᠯᠵᠦ᠂ ᠲᠡᠭᠦᠨ ᠦ ᠡᠵᠡᠮᠰᠢᠬᠦ ᠣᠷᠣᠰᠢᠭᠤᠯᠭᠠ ᠶᠢᠨ ᠭᠠᠵᠠᠷ ᠪᠣᠯᠭᠠᠪᠠ᠃