ᠡᠬᠢᠯᠡᠯ ᠳᠥᠴᠢᠨ ᠵᠢᠷᠭᠤᠭᠠ
ᠶᠠᠺᠣᠪ ᠤᠨ ᠬᠢᠨ ᠶᠧᠵᠢᠫᠲ ᠲᠤ ᠨᠡᠭᠦᠳᠡᠯᠯᠡᠪᠡ
1 ᠢᠰᠷᠧᠯ ᠪᠠᠢᠭᠠ ᠪᠦᠬᠦᠨ ᠢᠶᠡᠨ ᠠᠪᠴᠤ ᠵᠠᠮ ᠳᠤ ᠭᠠᠷᠪᠠ᠃ ᠲᠡᠷᠡ ᠪᠧᠷ ᠱᠧᠪᠠ ᠳᠤ ᠢᠷᠡᠭᠡᠳ ᠡᠴᠢᠭᠡ ᠢᠰᠠᠺ ᠤᠨ ᠢᠶᠠᠨ ᠪᠤᠷᠬᠠᠨ ᠳᠤ ᠲᠠᠬᠢᠯ ᠡᠷᠭᠦᠭᠰᠡᠨ ᠪᠠᠢᠨᠠ᠃ 2 ᠰᠥᠨᠢ ᠨᠢ ᠪᠤᠷᠬᠠᠨ ᠢᠰᠷᠧᠯ ᠳᠤ ᠦᠵᠡᠭᠳᠡᠵᠦ᠄ 《ᠶᠠᠺᠣᠪ︕ ᠶᠠᠺᠣᠪ︕》 ᠭᠡᠵᠦ ᠳᠠᠭᠤᠳᠠᠬᠤ ᠳᠤ᠂ ᠶᠠᠺᠣᠪ᠄ 《ᠪᠢ ᠡ᠊ᠨᠳᠡ ᠪᠠᠢᠨᠠ》 ᠭᠡᠵᠦ ᠬᠠᠷᠢᠭᠤᠯᠪᠠ᠃ 3 ᠪᠤᠷᠬᠠᠨ᠄ 《ᠪᠢ ᠪᠣᠯ ᠪᠤᠷᠬᠠᠨ᠂ ᠴᠢᠨᠦ ᠡᠴᠢᠭᠡ ᠶᠢᠨ ᠪᠤᠷᠬᠠᠨ ᠪᠠᠢᠨᠠ᠃ ᠴᠢ ᠶᠧᠵᠢᠫᠲ ᠤᠷᠤᠭᠤ ᠶᠠᠪᠤᠬᠤ ᠠᠴᠠ ᠪᠠᠨ ᠪᠢᠲᠡᠭᠡᠢ ᠠᠶᠤ᠃ ᠪᠢ ᠲᠡᠨᠳᠡ ᠴᠢᠮᠠ ᠠᠴᠠ ᠠᠭᠤᠤ ᠦᠨᠳᠦᠰᠦᠲᠡᠨ ᠢ ᠡᠭᠦᠰᠭᠡᠨᠡ᠃ 4 ᠪᠢ ᠥᠪᠡᠷ ᠢᠶᠡᠨ ᠴᠢᠮᠠ ᠲᠠᠢ ᠬᠠᠮᠲᠤ ᠶᠧᠵᠢᠫᠲ ᠤᠷᠤᠭᠤ ᠣᠴᠢᠭᠠᠳ᠂ ᠪᠢ ᠥᠪᠡᠷ ᠢᠶᠡᠨ ᠵᠠᠪᠠᠯ ᠴᠢᠮᠠᠶᠢ ᠪᠤᠴᠠᠭᠠᠵᠤ ᠠᠪᠴᠢᠷᠠᠨᠠ᠃ ᠡᠭᠦᠨ ᠡᠴᠡ ᠡᠮᠦᠨᠡ ᠶᠣᠰᠧᠹ ᠤᠨ ᠭᠠᠷ ᠴᠢᠨᠦ ᠨᠢᠳᠦ ᠶᠢ ᠠᠨᠢᠭᠤᠯᠤᠨᠠ》 ᠭᠡᠪᠡ᠃
5 ᠶᠠᠺᠣᠪ ᠪᠧᠷ ᠱᠧᠪᠠ ᠠᠴᠠ ᠬᠥᠳᠡᠯᠵᠡᠢ᠃ ᠢᠰᠷᠧᠯ ᠤᠨ ᠬᠥᠪᠡᠭᠦᠳ ᠡᠴᠢᠭᠡ ᠶᠠᠺᠣᠪ ᠢᠶᠠᠨ᠂ ᠡᠬᠡᠨᠡᠷ ᠬᠡᠦᠬᠡᠳ ᠤᠳ ᠢᠶᠠᠨ ᠹᠠᠷᠠᠣ᠋ ᠶᠢᠨ ᠡᠴᠢᠭᠡ ᠶᠢ ᠨᠢ ᠠᠪᠴᠢᠷᠠᠭᠤᠯᠬᠤ ᠪᠠᠷ ᠢᠯᠡᠭᠡᠭᠰᠡᠨ ᠲᠡᠷᠭᠡᠨ ᠳᠦ ᠰᠠᠭᠤᠯᠭᠠᠭᠰᠠᠨ ᠪᠠᠢᠯᠠ᠃ 6 ᠶᠠᠺᠣᠪ ᠪᠣᠯᠣᠨ ᠲᠡᠭᠦᠨ ᠦ ᠦᠷᠡ ᠤᠳᠤᠮ ᠪᠦᠭᠦᠳᠡᠭᠡᠷ ᠢᠶᠡᠨ ᠮᠠᠯ ᠰᠦᠷᠦᠭ᠂ ᠺᠠᠨᠠᠨ ᠨᠤᠲᠤᠭ ᠲᠤ ᠬᠤᠷᠠᠮᠳᠤᠯᠠᠭᠤᠯᠤᠭᠰᠠᠨ ᠡᠳ᠋ ᠬᠥᠷᠥᠩᠭᠡ ᠪᠡᠨ ᠠᠪᠴᠤ ᠶᠧᠵᠢᠫᠲ ᠤᠷᠤᠭᠤ ᠣᠳᠪᠠ᠃ 7 ᠡᠢᠨ ᠬᠦ ᠶᠠᠺᠣᠪ ᠬᠥᠪᠡᠭᠦᠳ᠂ ᠣᠮᠪᠣᠯᠣ ᠬᠥᠪᠡᠭᠦᠳ᠂ ᠥᠬᠢᠳ᠂ ᠣᠮᠪᠣᠯᠣ ᠥᠬᠢᠳ ᠪᠣᠯᠣᠨ ᠪᠦᠬᠦ ᠦᠷᠡ ᠬᠡᠦᠬᠡᠳ ᠢᠶᠡᠨ ᠳᠠᠭᠠᠭᠤᠯᠵᠤ᠂ ᠶᠧᠵᠢᠫᠲ ᠲᠤ ᠠᠪᠴᠢᠷᠠᠵᠠᠢ᠃
8 ᠶᠧᠵᠢᠫᠲ ᠲᠤ ᠣᠴᠢᠭᠰᠠᠨ ᠢᠰᠷᠧᠯᠴᠦᠳ᠂ ᠲᠤᠬᠠᠢᠯᠠᠪᠠᠯ ᠶᠠᠺᠣᠪ ᠪᠣᠯᠣᠨ ᠲᠡᠭᠦᠨ ᠦ ᠦᠷᠡ ᠤᠳᠤᠮ ᠤᠨ ᠬᠢᠨ ᠤ ᠨᠡᠷᠡᠰ᠄ ᠶᠠᠺᠣᠪ ᠤᠨ ᠤᠤᠭᠠᠨ ᠬᠦᠦ ᠷᠧᠣᠪᠧᠨ᠂ 9 ᠷᠧᠣᠪᠧᠨ ᠤ ᠬᠥᠪᠡᠭᠦᠳ᠄ ᠬᠠᠨᠣᠺ᠂ ᠫᠠᠯᠦ᠋᠂ ᠾᠧᠽᠷᠣᠨ᠂ ᠺᠠᠷᠮᠢ᠃ 10 ᠰᠢᠮᠧᠶᠣᠨ ᠤ ᠬᠥᠪᠡᠭᠦᠳ᠄ ᠶᠧᠮᠦ᠋ᠶᠧᠯ᠂ ᠶᠠᠮᠢᠨ᠂ ᠣᠬᠠᠳ᠋᠂ ᠶᠠᠺᠢᠨ᠂ ᠽᠣᠬᠠᠷ᠂ ᠺᠠᠨᠠᠨ ᠡᠮᠡᠭᠲᠡᠢ ᠡᠴᠡ ᠲᠥᠷᠥᠭᠰᠡᠨ ᠱᠠᠦ᠋ᠯ᠃ 11 ᠯᠧᠸᠢ ᠶᠢᠨ ᠬᠥᠪᠡᠭᠦᠳ᠄ ᠭᠧᠷᠱᠣᠨ᠂ ᠺᠣᠬᠠᠲ᠂ ᠮᠧᠷᠠᠷᠢ᠃ 12 ᠶᠦᠳᠠ ᠶᠢᠨ ᠬᠥᠪᠡᠭᠦᠳ᠄ ᠧᠷ᠂ ᠣᠨᠠᠨ᠂ ᠱᠧᠯᠠ᠂ ᠫᠧᠷᠧᠽ᠂ ᠽᠧᠷᠠ᠃ ᠧᠷ᠂ ᠣᠨᠠᠨ ᠬᠣᠶᠠᠷ ᠨᠢ ᠺᠠᠨᠠᠨ ᠤ ᠨᠤᠲᠤᠭ ᠲᠤ ᠦᠬᠦᠪᠡ᠃ ᠫᠧᠷᠧᠽ ᠤᠨ ᠬᠥᠪᠡᠭᠦᠳ᠄ ᠬᠧᠽᠷᠣᠨ ᠪᠠ ᠬᠠᠮᠦ᠋ᠯ᠃ 13 ᠢᠰᠠᠺᠠᠷ ᠤᠨ ᠬᠥᠪᠡᠭᠦᠳ᠄ ᠲᠣᠯᠠ᠂ ᠫᠦᠶᠠ᠂ ᠶᠣᠪ᠂ ᠱᠢᠮᠷᠣᠨ᠃ 14 ᠽᠧᠪᠦ᠋ᠯᠣᠨ ᠤ ᠬᠥᠪᠡᠭᠦᠳ᠄ ᠰᠧᠷᠧᠳ᠋᠂ ᠡᠯᠣᠨ᠂ ᠶᠠᠯᠧᠯ᠃ 15 ᠡᠳᠡᠭᠡᠷ ᠨᠢ ᠫᠠᠳᠠᠨ ᠠᠷᠠᠮ ᠳᠤ ᠯᠧᠶᠠ ᠶᠢᠨ ᠶᠠᠺᠣᠪ ᠲᠤ ᠲᠥᠷᠥᠭᠦᠯᠵᠦ ᠥᠭᠭᠥᠭᠰᠡᠨ ᠬᠥᠪᠡᠭᠦᠳ ᠪᠥᠭᠡᠳ ᠥᠬᠢᠨ ᠳ᠋ᠢᠨᠠ ᠴᠤ ᠪᠤᠢ᠂ ᠲᠡᠭᠦᠨ ᠦ ᠥᠬᠢᠳ᠂ ᠬᠥᠪᠡᠭᠦᠳ ᠪᠦᠭᠦᠳᠡ ᠭᠤᠴᠢᠨ ᠭᠤᠷᠪᠠᠭᠤᠯᠠ ᠶᠤᠮ᠃ 16 ᠭᠠᠳ᠋ ᠤᠨ ᠬᠥᠪᠡᠭᠦᠳ᠄ ᠽᠢᠹᠣᠨ᠂ ᠬᠠᠭᠢ᠂ ᠱᠦᠨᠢ᠂ ᠡᠽᠪᠣᠨ᠂ ᠧᠷᠢ᠂ ᠠᠷᠣᠳᠢ᠂ ᠠᠷᠧᠯᠢ᠃ 17 ᠠᠱᠧᠷ ᠤᠨ ᠬᠥᠪᠡᠭᠦᠳ᠄ ᠢᠮᠨᠠ᠂ ᠢᠱᠸᠠ᠂ ᠢᠱ᠊ᠸᠢ᠂ ᠪᠧᠷᠢᠶᠠ᠃ ᠲᠡᠳᠡᠨ ᠦ ᠥᠬᠢᠨ ᠳᠡᠭᠦᠦ ᠰᠧᠷᠠ ᠴᠤ ᠪᠤᠢ᠃ ᠪᠧᠷᠢᠶᠠ ᠶᠢᠨ ᠬᠥᠪᠡᠭᠦᠳ᠄ ᠾᠧᠪᠧᠷ ᠪᠣᠯᠣᠨ ᠮᠠᠯᠺᠢᠶᠧᠯ᠃ 18 ᠡᠳᠡᠭᠡᠷ ᠨᠢ ᠯᠠᠪᠠᠨ ᠤ ᠥᠬᠢᠨ ᠯᠧᠶᠠ ᠳᠠᠭᠠᠨ ᠥᠭᠭᠥᠭᠰᠡᠨ ᠽᠢᠯᠫᠠ ᠶᠢᠨ ᠶᠠᠺᠣᠪ ᠲᠤ ᠲᠥᠷᠥᠭᠦᠯᠦᠭᠰᠡᠨ ᠦᠷᠡ ᠬᠡᠦᠬᠡᠳ ᠤᠳ ᠪᠢᠯᠡ᠃ ᠲᠡᠳᠡ ᠪᠦᠭᠦᠳᠡ ᠠᠷᠪᠠᠨ ᠵᠢᠷᠭᠤᠭᠤᠯᠠ ᠶᠤᠮ᠃ 19 ᠶᠠᠺᠣᠪ ᠤᠨ ᠡᠬᠡᠨᠡᠷ ᠷᠠᠾᠢᠯ ᠤᠨ ᠬᠡᠦᠬᠡᠳ ᠤᠳ᠄ ᠶᠣᠰᠧᠹ ᠪᠣᠯᠣᠨ ᠪᠢᠨᠶᠠᠮᠢᠨ᠃ 20 ᠶᠣᠰᠧᠹ ᠶᠧᠵᠢᠫᠲ ᠲᠤ ᠪᠠᠢᠬᠤ ᠳᠤ᠂ ᠣᠨ ᠬᠣᠲᠠ ᠶᠢᠨ ᠲᠠᠬᠢᠯᠴᠢ ᠫᠣᠲ᠋ᠢᠹᠠᠷ ᠤᠨ ᠥᠬᠢᠨ ᠠᠰᠧᠨᠠᠲ ᠤᠨ ᠲᠡᠭᠦᠨ ᠳᠦ ᠲᠥᠷᠥᠭᠦᠯᠵᠦ ᠥᠭᠭᠥᠭᠰᠡᠨ ᠬᠥᠪᠡᠭᠦᠳ᠄ ᠮᠠᠨᠠᠰᠧ ᠪᠣᠯᠣᠨ ᠡᠹᠷᠠᠢᠮ᠃ 21 ᠪᠢᠨᠶᠠᠮᠢᠨ ᠤ ᠬᠥᠪᠡᠭᠦᠳ᠄ ᠪᠧᠯᠠ᠂ ᠪᠧᠺᠧᠷ᠂ ᠠᠱᠪᠧᠯ᠂ ᠭᠧᠷᠠ᠂ ᠨᠠᠮᠠᠨ᠂ ᠧᠾᠢ᠂ ᠷᠣᠱ᠂ ᠮᠦᠫᠢᠮ᠂ ᠾᠦᠫᠢᠮ᠂ ᠠᠷᠳ᠋᠃ 22 ᠡᠳᠡᠭᠡᠷ ᠨᠢ ᠶᠠᠺᠣᠪ ᠲᠤ ᠷᠠᠾᠢᠯ ᠤᠨ ᠲᠥᠷᠥᠭᠦᠯᠵᠦ ᠥᠭᠭᠥᠭᠰᠡᠨ ᠦᠷᠡ ᠬᠡᠦᠬᠡᠳ ᠤᠳ ᠪᠢᠯᠡ᠃ ᠲᠡᠳᠡ ᠪᠦᠭᠦᠳᠡ ᠠᠷᠪᠠᠨ ᠳᠥᠷᠪᠡᠭᠦᠯᠡ ᠶᠤᠮ᠃ 23 ᠳ᠋ᠠᠨ ᠤ ᠬᠦᠦ᠄ ᠾᠦᠱᠢᠮ᠃ 24 ᠨᠠᠹᠲ᠋ᠠᠯᠢ ᠶᠢᠨ ᠬᠥᠪᠡᠭᠦᠳ᠄ ᠶᠠᠽᠧᠯ᠂ ᠭᠦᠨᠢ᠂ ᠶᠧᠽᠧᠷ᠂ ᠰᠢᠯᠧᠮ᠃ 25 ᠡᠳᠡᠭᠡᠷ ᠨᠢ ᠯᠠᠪᠠᠨ ᠤ ᠥᠬᠢᠨ ᠷᠠᠾᠢᠯ ᠳᠠᠭᠠᠨ ᠥᠭᠭᠥᠭᠰᠡᠨ ᠪᠢᠯᠾᠠ ᠶᠢᠨ ᠶᠠᠺᠣᠪ ᠲᠤ ᠲᠥᠷᠥᠭᠦᠯᠦᠭᠰᠡᠨ ᠬᠥᠪᠡᠭᠦᠳ ᠪᠥᠭᠡᠳ ᠲᠡᠳᠡ ᠪᠦᠭᠦᠳᠡ ᠳᠣᠯᠣᠭᠤᠯᠠ ᠶᠤᠮ᠃ 26 ᠶᠧᠵᠢᠫᠲ ᠲᠤ ᠶᠠᠺᠣᠪ ᠲᠠᠢ ᠬᠠᠮᠲᠤ ᠢᠷᠡᠭᠰᠡᠨ ᠬᠥᠮᠦᠰ ᠨᠢ ᠲᠡᠭᠦᠨ ᠦ ᠪᠡᠷᠢᠶᠡᠳ ᠡᠴᠡ ᠭᠠᠳᠠᠨᠠ ᠵᠢᠷᠠᠨ ᠵᠢᠷᠭᠤᠭᠠ ᠪᠠᠢᠪᠠ᠃ ᠡᠳᠡᠭᠡᠷ ᠨᠢ ᠪᠦᠭᠦᠳᠡ ᠶᠠᠺᠣᠪ ᠠᠴᠠ ᠭᠠᠷᠤᠭᠰᠠᠨ ᠶᠤᠮ᠃ 27 ᠶᠧᠵᠢᠫᠲ ᠲᠤ ᠲᠥᠷᠥᠭᠰᠡᠨ ᠶᠣᠰᠧᠹ ᠤᠨ ᠬᠣᠶᠠᠷ ᠬᠦᠦ ᠶᠢ ᠣᠷᠣᠭᠤᠯᠪᠠᠯ ᠶᠧᠵᠢᠫᠲ ᠲᠤ ᠢᠷᠡᠭᠰᠡᠨ ᠶᠠᠺᠣᠪ ᠤᠨ ᠭᠡᠷ ᠦᠨ ᠬᠢᠨ ᠪᠦᠭᠦᠳᠡ ᠳᠠᠯᠠᠭᠤᠯᠠ ᠪᠢᠯᠡ᠃
28 ᠶᠠᠺᠣᠪ ᠤᠷᠢᠳᠠᠪᠠᠷ ᠶᠦᠳᠠ ᠶᠢ ᠶᠣᠰᠧᠹ ᠤᠷᠤᠭᠤ ᠢᠯᠡᠭᠡᠵᠦ᠂ ᠭᠣᠱᠧᠨ ᠤᠷᠤᠭᠤ ᠵᠠᠮᠴᠢᠯᠠᠭᠤᠯᠬᠤ ᠪᠠᠷ ᠪᠣᠯᠵᠠᠢ᠂ ᠲᠡᠭᠡᠭᠡᠳ ᠲᠡᠳᠡ ᠭᠣᠱᠧᠨ ᠨᠤᠲᠤᠭ ᠲᠤ ᠬᠦᠷᠪᠡ᠃ 29 ᠶᠣᠰᠧᠹ ᠡᠴᠢᠭᠡ ᠢᠰᠷᠧᠯ ᠲᠠᠢ ᠪᠠᠨ ᠠᠭᠤᠯᠵᠠᠬᠤ ᠪᠠᠷ ᠲᠡᠷᠭᠡ ᠪᠡᠨ ᠬᠥᠯᠯᠡᠵᠦ᠂ ᠭᠣᠱᠧᠨ ᠳᠤ ᠬᠦᠷᠴᠦ ᠢᠷᠡᠭᠡᠳ ᠲᠡᠭᠦᠨ ᠢ ᠦᠵᠡᠮᠡᠭᠴᠡ ᠪᠡᠨ ᠬᠦᠵᠦᠭᠦᠦ ᠪᠡᠷ ᠨᠢ ᠲᠡᠪᠡᠷᠢᠨ ᠤᠳᠠᠲᠠᠯᠠ ᠤᠬᠢᠯᠠᠪᠠ᠃ 30 ᠢᠰᠷᠧᠯ ᠶᠣᠰᠧᠹ ᠲᠤ᠄ 《ᠨᠢᠭᠤᠷ ᠢ ᠴᠢᠨᠢ ᠬᠠᠷᠠᠭᠰᠠᠨ ᠪᠣᠯᠬᠣᠷ ᠪᠢ ᠣᠳᠣ ᠪᠠᠷ ᠢᠶᠠᠨ ᠦᠬᠦᠭᠰᠡᠨ ᠴᠤ ᠪᠣᠯᠣᠨᠠ᠃ ᠴᠢ ᠮᠠᠨᠢ ᠠᠮᠢᠳᠤ ᠰᠡᠷᠡᠭᠦᠨ ᠪᠠᠢᠵᠠᠢ》 ᠭᠡᠪᠡ᠃ 31 ᠶᠣᠰᠧᠹ ᠠᠬᠠ ᠳᠡᠭᠦᠦ ᠨᠠᠷ ᠪᠣᠯᠣᠨ ᠡᠴᠢᠭᠡ ᠶᠢᠨ ᠢᠶᠠᠨ ᠭᠡᠷ ᠦᠨ ᠬᠢᠨ ᠳᠤ᠄
32 ᠲᠡᠳᠡ ᠪᠣᠯ ᠮᠠᠯᠴᠢᠳ᠂ ᠤᠭ ᠠᠴᠠ ᠪᠠᠨ ᠮᠠᠯ ᠮᠠᠯᠵᠢᠳᠠᠭ ᠬᠥᠮᠦᠰ ᠪᠣᠯᠬᠣᠷ ᠮᠠᠯ ᠰᠦᠷᠦᠭ ᠢᠶᠡᠨ᠂ ᠬᠠᠮᠤᠭ ᠡᠳ᠋ ᠬᠥᠷᠥᠩᠭᠡ ᠪᠡᠨ ᠠᠪᠴᠤ ᠢᠷᠡᠭᠰᠡᠨ〉 ᠭᠡᠵᠦ ᠬᠡᠯᠡᠶᠡ᠃ 33 ᠹᠠᠷᠠᠣ᠋ ᠳᠠᠭᠤᠳᠠᠵᠤ᠄ 〈ᠲᠠ ᠨᠠᠷ ᠶᠠᠭᠤ ᠬᠢᠳᠡᠭ ᠤᠯᠤᠰ ᠪᠤᠢ︖〉 ᠭᠡᠵᠦ ᠠᠰᠠᠭᠤᠬᠤ ᠪᠠᠷ ᠨᠢ᠂ 34 〈ᠲᠠᠨ ᠤ ᠵᠠᠷᠤᠴᠠ ᠪᠢᠳᠡ ᠡᠪᠦᠭᠡ ᠳᠡᠭᠡᠳᠦᠰ ᠲᠡᠢ ᠪᠡᠨ ᠠᠳᠠᠯᠢᠬᠠᠨ ᠪᠠᠭᠠ ᠠᠴᠠ ᠪᠠᠨ ᠡᠳᠦᠢ ᠬᠦᠷᠲᠡᠯᠡ ᠮᠠᠯ ᠮᠠᠯᠵᠢᠵᠤ ᠢᠷᠡᠯᠡ〉 ᠭᠡᠵᠦ ᠬᠡᠯᠡᠭᠡᠷᠡᠢ᠃ ᠲᠡᠭᠡᠪᠡᠯ ᠲᠠ ᠨᠠᠷ ᠢ ᠭᠣᠱᠧᠨ ᠨᠤᠲᠤᠭ ᠲᠤ ᠰᠠᠭᠤᠯᠭᠠᠬᠤ ᠶᠤᠮ᠃ ᠤᠴᠢᠷ ᠨᠢ ᠶᠧᠵᠢᠫᠲ᠋ᠴᠦᠳ ᠬᠣᠨᠢᠴᠢᠳ ᠲᠠᠢ ᠣᠢᠷᠠᠲᠤᠬᠤ ᠶᠢ ᠴᠡᠭᠡᠷᠯᠡᠳᠡᠭ》 ᠭᠡᠪᠡ᠃