ᠡᠬᠢᠯᠡᠯ ᠳᠥᠴᠢ
ᠬᠣᠶᠠᠷ ᠬᠣᠷᠢᠭᠳᠠᠯ ᠤᠨ ᠵᠡᠭᠦᠳᠦ
1 ᠡᠳᠡᠭᠡᠷ ᠶᠠᠪᠤᠳᠠᠯ ᠤᠨ ᠳᠠᠷᠠᠭᠠ ᠶᠧᠵᠢᠫᠲ ᠤᠨ ᠬᠠᠭᠠᠨ ᠤ ᠰᠥᠩ ᠪᠠᠷᠢᠭᠴᠢ᠂ ᠪᠣᠣᠪᠣᠴᠢᠨ ᠬᠣᠶᠠᠷ ᠥᠪᠡᠷᠰᠡᠳ ᠦᠨ ᠡᠵᠡᠨ ᠶᠧᠵᠢᠫᠲ ᠤᠨ ᠬᠠᠭᠠᠨ ᠳᠤ ᠤᠰᠤᠯᠳᠤᠭᠰᠠᠨ ᠪᠠᠢᠨᠠ᠃ 2 ᠹᠠᠷᠠᠣ᠋ ᠥᠪᠡᠷ ᠦᠨ ᠢᠶᠠᠨ ᠬᠣᠶᠠᠷ ᠠᠯᠪᠠᠲᠤ ᠪᠣᠯᠬᠤ ᠠᠬᠠᠯᠠᠬᠤ ᠰᠥᠩ ᠪᠠᠷᠢᠭᠴᠢ᠂ ᠠᠬᠠᠯᠠᠬᠤ ᠪᠣᠣᠪᠣᠴᠢᠨ ᠬᠣᠶᠠᠷ ᠲᠤ ᠠᠭᠤᠷᠯᠠᠵᠤ᠂ 3 ᠲᠡᠳᠡᠨ ᠢ ᠰᠢᠳᠠᠷ ᠬᠠᠮᠠᠭᠠᠯᠠᠭᠴᠢᠳ ᠤᠨ ᠠᠬᠠᠯᠠᠭᠴᠢ ᠶᠢᠨ ᠪᠠᠢᠰᠢᠩ ᠳᠣᠲᠣᠷᠠᠬᠢ ᠱᠣᠷᠣᠩ᠂ ᠲᠤᠬᠠᠢᠯᠠᠪᠠᠯ ᠶᠣᠰᠧᠹ ᠤᠨ ᠬᠣᠷᠢᠭᠳᠠᠵᠤ ᠪᠠᠢᠭᠠ ᠭᠠᠵᠠᠷ ᠲᠤ ᠬᠣᠷᠢᠪᠠ᠃ 4 ᠰᠢᠳᠠᠷ ᠬᠠᠮᠠᠭᠠᠯᠠᠭᠴᠢᠳ ᠤᠨ ᠠᠬᠠᠯᠠᠭᠴᠢ ᠲᠡᠳᠡᠨ ᠢ ᠶᠣᠰᠧᠹ ᠢᠶᠠᠷ ᠬᠠᠯᠠᠮᠵᠢᠯᠠᠭᠤᠯᠤᠭᠰᠠᠨ ᠳᠤ᠂ ᠬᠣᠷᠢᠭᠳᠠᠵᠤ ᠪᠠᠢᠭᠠ ᠡᠳᠦᠷ ᠤᠳ ᠲᠤᠨᠢ ᠶᠣᠰᠧᠹ ᠲᠡᠳᠡᠨ ᠳᠦ ᠦᠢᠯᠠᠴᠢᠯᠡᠵᠦ ᠪᠠᠢᠪᠠ᠃ 5 ᠱᠣᠷᠣᠩ ᠳᠤ ᠬᠣᠷᠢᠭᠳᠠᠵᠤ ᠪᠠᠢᠭᠰᠠᠨ ᠶᠧᠵᠢᠫᠲ ᠤᠨ ᠬᠠᠭᠠᠨ ᠤ ᠰᠥᠩ ᠪᠠᠷᠢᠭᠴᠢ᠂ ᠪᠣᠣᠪᠣᠴᠢᠨ ᠬᠣᠶᠠᠷ ᠨᠢᠭᠡᠨ ᠰᠥᠨᠢ ᠬᠣᠶᠠᠭᠤᠯᠠ ᠪᠠᠨ ᠵᠡᠭᠦᠳᠦᠯᠡᠭᠰᠡᠨ ᠪᠥᠭᠡᠳ ᠲᠡᠷᠡ ᠬᠣᠶᠠᠷ ᠤᠨ ᠵᠡᠭᠦᠳᠦᠨ ᠦ ᠰᠤᠪᠢᠩ ᠥᠭᠡᠷᠡ ᠥᠭᠡᠷᠡ ᠪᠠᠢᠯᠠ᠃ 6 ᠥᠷᠯᠥᠭᠡᠭᠦᠷ ᠨᠢ ᠶᠣᠰᠧᠹ ᠲᠡᠳᠡᠨ ᠳᠡᠭᠡᠷᠡ ᠢᠷᠡᠭᠡᠳ ᠬᠠᠷᠠᠬᠤ ᠳᠤ᠂ ᠲᠡᠳᠡ ᠶᠡᠬᠡ ᠭᠤᠨᠢᠭ ᠲᠠᠢ ᠪᠠᠢᠪᠠ᠃ 7 ᠶᠣᠰᠧᠹ ᠡᠵᠡᠨ ᠦ ᠬᠢᠨᠢ ᠪᠠᠢᠰᠢᠩ ᠳᠤ ᠥᠪᠡᠷ ᠲᠡᠢ ᠨᠢ ᠬᠠᠮᠲᠤ ᠬᠣᠷᠢᠭᠳᠠᠵᠤ ᠪᠠᠢᠭᠠ ᠹᠠᠷᠠᠣ᠋ ᠶᠢᠨ ᠬᠣᠶᠠᠷ ᠠᠯᠪᠠᠲᠤ ᠠᠴᠠ᠄ 《ᠥᠨᠥᠳᠥᠷ ᠲᠠ ᠬᠣᠶᠠᠷ ᠤᠨ ᠴᠢᠷᠠᠢ ᠶᠠᠭᠠᠬᠢᠭᠠᠳ ᠮᠠᠭᠤ ᠪᠠᠢᠨᠠ ᠪᠤᠢ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ 8 ᠲᠡᠳᠡ᠄ 《ᠪᠢᠳᠡ ᠬᠣᠶᠠᠭᠤᠯᠠ ᠪᠠᠨ ᠵᠡᠭᠦᠳᠦ ᠵᠡᠭᠦᠳᠦᠯᠡᠯᠡ᠂ ᠬᠠᠷᠢᠨ ᠲᠡᠭᠦᠨ ᠢ ᠲᠠᠢᠯᠬᠤ ᠬᠥᠮᠦᠨ ᠠᠯᠠᠭᠠ》 ᠭᠡᠪᠡ᠃ ᠶᠣᠰᠧᠹ ᠲᠡᠳᠡᠨ ᠳᠦ᠄ 《ᠲᠠᠢᠯᠤᠯ ᠨᠢ ᠪᠤᠷᠬᠠᠨ ᠤ ᠬᠢ ᠪᠢᠰᠢ ᠤᠤ︖ ᠨᠠᠳᠠ ᠳᠤ ᠶᠠᠷᠢᠵᠤ ᠥᠭᠭᠥᠨᠡ ᠤᠤ︖》 ᠭᠡᠵᠡᠢ᠃
9 ᠲᠡᠭᠡᠭᠡᠳ ᠠᠬᠠᠯᠠᠬᠤ ᠰᠥᠩ ᠪᠠᠷᠢᠭᠴᠢ ᠵᠡᠭᠦᠳᠦ ᠪᠡᠨ ᠶᠣᠰᠧᠹ ᠲᠤ ᠶᠠᠷᠢᠵᠤ᠄ 《ᠪᠢ ᠵᠡᠭᠦᠳᠦᠨ ᠳᠡᠭᠡᠨ ᠮᠢᠨᠦ ᠡᠮᠦᠨᠡ ᠨᠢᠭᠡ ᠦᠵᠦᠮ ᠦᠨ ᠮᠣᠳᠣ ᠪᠠᠢᠭᠠ ᠶᠢ ᠬᠠᠷᠠᠯᠠ︕ 10 ᠲᠡᠷᠡ ᠦᠵᠦᠮ ᠦᠨ ᠮᠣᠳᠣ ᠭᠤᠷᠪᠠᠨ ᠮᠥᠴᠢᠷ ᠲᠠᠢ ᠪᠥᠭᠡᠳ ᠤᠷᠭᠤᠵᠤ ᠳᠡᠯᠭᠡᠷᠡᠭᠡᠳ ᠦᠵᠦᠮ ᠪᠣᠯᠪᠠᠰᠤᠷᠠᠵᠠᠢ᠃ 11 ᠮᠢᠨᠦ ᠭᠠᠷ ᠲᠤ ᠹᠠᠷᠠᠣ᠋ ᠶᠢᠨ ᠬᠤᠨᠳᠠᠭᠠ ᠪᠠᠢᠨᠠ᠂ ᠪᠢ ᠦᠵᠦᠮ ᠲᠡᠭᠦᠵᠦ᠂ ᠹᠠᠷᠠᠣ᠋ ᠶᠢᠨ ᠬᠤᠨᠳᠠᠭᠠᠨ ᠳᠤ ᠰᠢᠭᠦᠰᠦ ᠶᠢ ᠨᠢ ᠰᠢᠬᠠᠵᠤ ᠬᠢᠭᠡᠳ ᠲᠡᠷᠡ ᠬᠤᠨᠳᠠᠭᠠ ᠪᠠᠨ ᠹᠠᠷᠠᠣ᠋ ᠶᠢᠨ ᠭᠠᠷ ᠲᠤ ᠥᠭᠭᠥᠭᠰᠡᠨ ᠪᠠᠢᠪᠠ》 ᠭᠡᠰᠡᠨ ᠪᠠᠢᠯᠠ᠃ 12 ᠶᠣᠰᠧᠹ ᠲᠡᠭᠦᠨ ᠳᠦ᠄ 《ᠲᠡᠭᠦᠨ ᠦ ᠲᠠᠢᠯᠤᠯ ᠭᠡᠪᠡᠯ᠂ ᠭᠤᠷᠪᠠᠨ ᠮᠥᠴᠢᠷ ᠨᠢ ᠭᠤᠷᠪᠠᠨ ᠡᠳᠦᠷ ᠶᠤᠮ᠃ 13 ᠹᠠᠷᠠᠣ᠋ ᠭᠤᠷᠪᠠᠨ ᠡᠳᠦᠷ ᠦᠨ ᠳᠣᠲᠣᠷᠠ ᠲᠠᠨ ᠤ ᠲᠣᠯᠣᠭᠠᠢ ᠶᠢ ᠥᠨᠳᠡᠢᠯᠭᠡᠵᠦ᠂ ᠬᠠᠭᠤᠴᠢᠨ ᠠᠯᠪᠠᠨ ᠳᠤ ᠴᠢᠨᠢ ᠳᠠᠬᠢᠨ ᠣᠷᠣᠭᠤᠯᠤᠨᠠ᠃ ᠲᠡᠭᠡᠭᠡᠳ ᠲᠠ ᠤᠷᠢᠳᠤ ᠨᠢ ᠲᠡᠭᠦᠨ ᠦ ᠰᠥᠩ ᠪᠠᠷᠢᠭᠴᠢ ᠪᠠᠢᠬᠤ ᠦᠶᠡ ᠳᠡᠭᠡᠨ ᠬᠢᠳᠡᠭ ᠪᠠᠢᠭᠰᠠᠨ ᠶᠣᠰᠣᠭᠠᠷ ᠢᠶᠠᠨ ᠹᠠᠷᠠᠣ᠋ ᠶᠢᠨ ᠬᠤᠨᠳᠠᠭᠠ ᠶᠢ ᠳᠠᠬᠢᠨ ᠭᠠᠷ ᠲᠤᠨᠢ ᠪᠠᠷᠢᠭᠤᠯᠬᠤ ᠪᠣᠯᠣᠨᠠ᠃ 14 ᠬᠠᠷᠢᠨ ᠪᠦᠬᠦ ᠶᠠᠭᠤᠮᠠ ᠴᠢᠨᠢ ᠰᠠᠢᠨ ᠪᠣᠯᠬᠤ ᠳᠤ᠂ ᠨᠠᠮᠠᠶᠢ ᠰᠠᠨᠠᠵᠤ ᠬᠠᠢᠷᠠ ᠡᠨᠡᠷᠢᠯ ᠢᠶᠠᠨ ᠦᠵᠡᠭᠦᠯᠦᠨᠡ ᠤᠤ︖ ᠹᠠᠷᠠᠣ᠋ ᠳᠤ ᠮᠢᠨᠦ ᠲᠤᠬᠠᠢ ᠶᠠᠷᠢᠵᠤ᠂ ᠨᠠᠮᠠᠶᠢ ᠡᠨᠡ ᠪᠠᠢᠰᠢᠩ ᠠᠴᠠ ᠭᠠᠷᠭᠠᠵᠤ ᠥᠭᠭᠥᠨᠡ ᠤᠤ︖ 15 ᠦᠨᠡᠨ ᠢ ᠬᠡᠯᠡᠬᠦ ᠳᠦ᠂ ᠪᠢ ᠢᠪᠷᠠᠢᠴᠤᠳ ᠤᠨ ᠨᠤᠲᠤᠭ ᠠᠴᠠ ᠤᠤᠯᠭᠠᠯᠠᠭᠳᠠᠭᠰᠠᠨ ᠬᠥᠮᠦᠨ᠂ ᠡ᠊ᠨᠳᠡ ᠴᠤ ᠪᠢ ᠭᠢᠨᠳᠠᠨ ᠳᠤ ᠣᠷᠣᠬᠤ ᠶᠠᠮᠠᠷ ᠨᠢᠭᠡᠨ ᠬᠡᠷᠡᠭ ᠬᠢᠭᠡ ᠦᠭᠡᠢ ᠪᠢᠯᠡ》 ᠭᠡᠵᠡᠢ᠃
16 ᠲᠡᠭᠦᠨ ᠦ ᠲᠠᠢᠯᠤᠯ ᠰᠠᠢᠨ ᠪᠠᠢᠬᠤ ᠶᠢ ᠠᠬᠠᠯᠠᠬᠤ ᠪᠣᠣᠪᠣᠴᠢᠨ ᠦᠵᠡᠭᠡᠳ᠂ ᠶᠣᠰᠧᠹ ᠲᠤ᠄ 《ᠬᠠᠷᠢᠨ ᠪᠢ ᠵᠡᠭᠦᠳᠦᠨ ᠳᠡᠭᠡᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠮᠢᠨᠢ ᠴᠠᠭᠠᠨ ᠪᠣᠣᠪᠣ ᠲᠠᠢ ᠭᠤᠷᠪᠠᠨ ᠰᠠᠭᠰᠤ ᠪᠠᠢᠭᠠ ᠶᠢ ᠬᠠᠷᠠᠯᠠ︕ 17 ᠳᠡᠭᠡᠳᠦ ᠲᠠᠯᠠ ᠶᠢᠨ ᠰᠠᠭᠰᠤᠨ ᠳᠤᠨᠢ ᠹᠠᠷᠠᠣ᠋ ᠳᠤ ᠥᠭᠬᠦ ᠪᠡᠷ ᠵᠢᠩᠨᠡᠭᠰᠡᠨ ᠶᠠᠩᠵᠤ ᠪᠦᠷᠢ ᠶᠢᠨ ᠢᠳᠡᠭᠡ ᠪᠠᠢᠨᠠ᠃ ᠭᠡᠲᠡᠯᠡ ᠰᠢᠪᠠᠭᠤᠳ ᠮᠢᠨᠦ ᠲᠣᠯᠣᠭᠠᠢ ᠳᠡᠭᠡᠷᠡᠬᠢ ᠰᠠᠭᠰᠤᠨ ᠠᠴᠠ ᠲᠡᠭᠦᠨ ᠢ ᠠᠪᠴᠤ ᠢᠳᠡᠵᠦ ᠪᠠᠢᠯᠠ》 ᠭᠡᠰᠡᠨ ᠳᠦ᠂ 18 ᠶᠣᠰᠧᠹ᠄ 《ᠲᠡᠭᠦᠨ ᠦ ᠲᠠᠢᠯᠤᠯ ᠭᠡᠪᠡᠯ᠂ ᠭᠤᠷᠪᠠᠨ ᠰᠠᠭᠰᠤ ᠨᠢ ᠭᠤᠷᠪᠠᠨ ᠡᠳᠦᠷ ᠶᠤᠮ᠃ 19 ᠭᠤᠷᠪᠠᠨ ᠡᠳᠦᠷ ᠦᠨ ᠳᠣᠲᠣᠷᠠ ᠹᠠᠷᠠᠣ᠋ ᠲᠣᠯᠣᠭᠠᠢ ᠶᠢ ᠴᠢᠨᠢ ᠠᠪᠴᠤ᠂ ᠲᠠᠨ ᠢ ᠮᠣᠳᠣᠨ ᠳᠤ ᠡᠯᠭᠦᠬᠦ ᠪᠥᠭᠡᠳ ᠰᠢᠪᠠᠭᠤᠳ ᠮᠢᠬᠠ ᠶᠢ ᠴᠢᠨᠢ ᠢᠳᠡᠬᠦ ᠪᠣᠯᠣᠨᠠ》 ᠭᠡᠪᠡ᠃
20 ᠭᠤᠷᠪᠠᠳᠠᠬᠢ ᠡᠳᠦᠷ ᠨᠢ ᠹᠠᠷᠠᠣ᠋ ᠶᠢᠨ ᠲᠥᠷᠥᠭᠰᠡᠨ ᠡᠳᠦᠷ ᠪᠠᠢᠪᠠ᠃ ᠹᠠᠷᠠᠣ᠋ ᠪᠦᠬᠦ ᠲᠦᠰᠢᠮᠡᠳ ᠦᠨ ᠢᠶᠠᠨ ᠲᠥᠯᠥᠭᠡ ᠨᠠᠢᠷ ᠬᠢᠵᠦ᠂ ᠲᠡᠳᠡ ᠨᠠᠷ ᠤᠨ ᠡᠮᠦᠨᠡ ᠠᠬᠠᠯᠠᠬᠤ ᠰᠥᠩ ᠪᠠᠷᠢᠭᠴᠢ᠂ ᠠᠬᠠᠯᠠᠬᠤ ᠪᠣᠣᠪᠣᠴᠢᠨ ᠬᠣᠶᠠᠷ ᠢᠶᠠᠨ ᠱᠣᠷᠣᠩ ᠠᠴᠠ ᠭᠠᠷᠭᠠᠵᠠᠢ 73 ᠃ 21 ᠹᠠᠷᠠᠣ᠋ ᠠᠬᠠᠯᠠᠬᠤ ᠰᠥᠩᠴᠢ ᠶᠢ ᠬᠠᠭᠤᠴᠢᠨ ᠠᠯᠪᠠᠨ ᠳᠤᠨᠢ ᠳᠠᠬᠢᠨ ᠣᠷᠣᠭᠤᠯᠤᠭᠰᠠᠨ ᠪᠥᠭᠡᠳ ᠠᠬᠠᠯᠠᠬᠤ ᠰᠥᠩ ᠪᠠᠷᠢᠭᠴᠢ ᠹᠠᠷᠠᠣ᠋ ᠶᠢᠨ ᠭᠠᠷ ᠲᠤ ᠬᠤᠨᠳᠠᠭᠠ ᠶᠢ ᠨᠢ ᠪᠠᠷᠢᠭᠤᠯᠵᠤ ᠥᠭᠴᠡᠢ᠃ 22 ᠬᠠᠷᠢᠨ ᠹᠠᠷᠠᠣ᠋ ᠠᠬᠠᠯᠠᠬᠤ ᠪᠣᠣᠪᠣᠴᠢᠨ ᠢ ᠳᠡᠭᠦᠵᠢᠯᠡᠵᠦ ᠠᠯᠠᠵᠠᠢ᠃ ᠡᠢᠨ ᠬᠦ ᠶᠣᠰᠧᠹ ᠤᠨ ᠲᠠᠢᠯᠤᠭᠰᠠᠨ ᠶᠣᠰᠣᠭᠠᠷ ᠪᠣᠯᠣᠭᠰᠠᠨ ᠪᠣᠯᠪᠠᠴᠤ 23 ᠠᠬᠠᠯᠠᠬᠤ ᠰᠥᠩ ᠪᠠᠷᠢᠭᠴᠢ ᠶᠣᠰᠧᠹ ᠢ ᠡᠷᠭᠢᠨ ᠰᠠᠨᠠᠭᠰᠠᠨ ᠦᠭᠡᠢ᠂ ᠲᠠᠭ ᠮᠠᠷᠲᠠᠪᠠ᠃