ᠡᠬᠢᠯᠡᠯ ᠲᠠᠪᠢ
1 ᠶᠣᠰᠧᠹ ᠡᠴᠢᠭᠡ ᠶᠢᠨ ᠢᠶᠠᠨ ᠨᠢᠭᠤᠷ ᠤᠨ ᠡᠮᠦᠨᠡ ᠰᠥᠭᠥᠳᠥᠨ ᠤᠬᠢᠯᠠᠵᠤ᠂ ᠲᠡᠭᠦᠨ ᠢ ᠦᠨᠦᠰᠪᠡ᠃ 2 ᠶᠣᠰᠧᠹ ᠡᠴᠢᠭᠡ ᠶᠢᠨ ᠢᠶᠠᠨ ᠪᠡᠶᠡ ᠳᠦ ᠭᠦᠭᠦᠯ ᠬᠢᠯᠭᠡᠬᠦ ᠪᠡᠷ ᠦᠢᠯᠡᠴᠢᠯᠡᠭᠴᠢ ᠡᠮᠴᠢ ᠨᠠᠷ ᠲᠡᠭᠡᠨ ᠲᠤᠰᠢᠶᠠᠭᠰᠠᠨ ᠳᠤ᠂ ᠡᠮᠴᠢ ᠨᠠᠷ ᠨᠢ ᠢᠰᠷᠧᠯ ᠤᠨ ᠪᠡᠶᠡ ᠳᠦ ᠭᠦᠭᠦᠯ ᠬᠢᠪᠡ᠃ 3 ᠡᠭᠦᠨ ᠦ ᠲᠥᠯᠥᠭᠡ ᠳᠥᠴᠢ ᠬᠣᠨᠣᠭ ᠵᠠᠷᠤᠴᠠᠭᠤᠯᠵᠠᠢ᠃ ᠡᠨᠡ ᠨᠢ ᠭᠦᠭᠦᠯ ᠬᠢᠬᠦ ᠳᠦ ᠱᠠᠭᠠᠷᠳᠠᠭᠳᠠᠬᠤ ᠬᠤᠭᠤᠴᠠᠭᠠ ᠶᠤᠮ᠃ ᠶᠧᠵᠢᠫᠲ᠋ᠴᠦᠳ ᠲᠡᠭᠦᠨ ᠦ ᠬᠣᠢᠨᠠ ᠠᠴᠠ ᠳᠠᠯᠠᠨ ᠬᠣᠨᠣᠭ ᠭᠠᠰᠢᠭᠤᠳᠠᠭᠰᠠᠨ ᠪᠠᠢᠪᠠ᠃
4 ᠭᠠᠰᠢᠭᠤᠳᠠᠯ ᠤᠨ ᠬᠤᠭᠤᠴᠠᠭᠠ ᠥᠩᠭᠡᠷᠡᠮᠡᠭᠴᠡ ᠶᠣᠰᠧᠹ ᠹᠠᠷᠠᠣ᠋ ᠶᠢᠨ ᠣᠷᠳᠣᠨ ᠤ ᠬᠢᠨ ᠳᠤ ᠳᠤᠭᠤᠯᠭᠠᠵᠤ᠄ 《ᠬᠡᠷᠪᠡ ᠪᠢ ᠲᠠ ᠨᠠᠷ ᠤᠨ ᠲᠠᠭᠠᠯᠠᠯ ᠢ ᠣᠯᠣᠭᠰᠠᠨ ᠪᠣᠯ ᠲᠠ ᠨᠠᠷ ᠹᠠᠷᠠᠣ᠋ ᠳᠤ ᠰᠣᠨᠣᠷᠳᠠᠭᠤᠯᠵᠤ ᠥᠭᠭᠥᠨᠡ ᠤᠤ︖ 5 ᠡᠴᠢᠭᠡ ᠮᠢᠨᠢ ᠨᠠᠳᠠ ᠪᠠᠷ ᠲᠠᠩ᠋ᠭᠠᠷᠢᠭᠯᠠᠭᠤᠯᠤᠨ ᠬᠡᠯᠡᠬᠦ ᠳᠡᠭᠡᠨ᠄ 〈ᠬᠠᠷᠠ᠂ ᠦᠬᠦᠬᠦ ᠴᠠᠭ ᠮᠢᠨᠢ ᠪᠣᠯᠣᠯᠠ᠃ ᠨᠠᠮᠠᠶᠢ ᠺᠠᠨᠠᠨ ᠨᠤᠲᠤᠭ ᠲᠤ ᠥᠪᠡᠷ ᠲᠡᠭᠡᠨ ᠤᠬᠤᠵᠤ ᠪᠡᠯᠡᠳᠬᠡᠭᠰᠡᠨ ᠣᠷᠣᠰᠢᠭᠤᠯᠭᠠ ᠶᠢᠨ ᠭᠠᠵᠠᠷ ᠲᠤ ᠮᠢᠨᠢ ᠣᠷᠣᠰᠢᠭᠤᠯᠤᠭᠠᠷᠠᠢ︕〉 ᠭᠡᠰᠡᠨ ᠪᠢᠯᠡ᠃ ᠲᠡᠢᠮᠦ ᠡᠴᠡ ᠲᠡᠨᠳᠡ ᠣᠴᠢᠵᠤ ᠡᠴᠢᠭᠡ ᠪᠡᠨ ᠨᠤᠲᠤᠭᠯᠠᠭᠤᠯᠤᠭᠠᠳ ᠡᠷᠭᠢᠵᠦ ᠢᠷᠡᠬᠦ ᠶᠢ ᠮᠢᠨᠢ ᠪᠣᠯᠭᠣᠭᠠᠨᠠ ᠤᠤ︖》 ᠭᠡᠰᠡᠨ ᠳᠦ᠂ 6 ᠹᠠᠷᠠᠣ᠋᠄ 《ᠴᠢ ᠲᠡᠨᠳᠡ ᠣᠴᠢᠵᠤ᠂ ᠲᠠᠩ᠋ᠭᠠᠷᠢᠭᠯᠠᠭᠰᠠᠨ ᠶᠣᠰᠣᠭᠠᠷ ᠢᠶᠠᠨ ᠡᠴᠢᠭᠡ ᠪᠡᠨ ᠣᠷᠣᠰᠢᠭᠤᠯ》 ᠭᠡᠪᠡ᠃
7 ᠡᠢᠨ ᠬᠦ ᠶᠣᠰᠧᠹ ᠡᠴᠢᠭᠡ ᠪᠡᠨ ᠣᠷᠣᠰᠢᠭᠤᠯᠬᠤ ᠪᠠᠷ ᠶᠠᠪᠤᠵᠠᠢ᠃ ᠲᠡᠭᠦᠨ ᠲᠡᠢ ᠬᠠᠮᠲᠤ ᠹᠠᠷᠠᠣ᠋ ᠶᠢᠨ ᠲᠦᠰᠢᠮᠡᠯ ᠤᠳ᠂ ᠲᠡᠭᠦᠨ ᠦ ᠣᠷᠳᠣᠨ ᠤ ᠠᠬᠠᠯᠠᠭᠴᠢᠳ᠂ ᠶᠧᠵᠢᠫᠲ ᠤᠨ ᠠᠬᠠᠯᠠᠭᠴᠢᠳ᠂ 8 ᠮᠥᠨ ᠶᠣᠰᠧᠹ ᠤᠨ ᠪᠦᠬᠦ ᠭᠡᠷ ᠦᠨ ᠬᠢᠨ᠂ ᠲᠡᠭᠦᠨ ᠦ ᠠᠬᠠ ᠳᠡᠭᠦᠦ ᠨᠠᠷ᠂ ᠲᠡᠭᠦᠨ ᠦ ᠡᠴᠢᠭᠡ ᠶᠢᠨ ᠭᠡᠷ ᠪᠦᠯᠢ ᠶᠢᠨ ᠬᠢᠨ ᠴᠥᠮ ᠢᠶᠡᠷ ᠢᠶᠠᠨ ᠶᠠᠪᠤᠵᠠᠢ᠃ ᠵᠥᠪᠬᠡᠨ ᠲᠡᠳᠡᠨ ᠦ ᠬᠡᠦᠬᠡᠳ ᠪᠠᠭᠠᠴᠤᠳ ᠪᠣᠯᠣᠨ ᠮᠠᠯ ᠰᠦᠷᠦᠭ ᠨᠢ ᠭᠣᠱᠧᠨ ᠳᠤ ᠦᠯᠡᠳᠡᠵᠡᠢ᠃ 9 ᠡᠭᠦᠨ ᠡᠴᠡ ᠭᠠᠳᠠᠨᠠ᠂ ᠵᠡᠪᠰᠡᠭᠲᠦ ᠲᠡᠷᠭᠡ᠂ ᠮᠣᠷᠢᠲᠠᠨ ᠪᠠᠰᠠ ᠶᠣᠰᠧᠹ ᠲᠠᠢ ᠬᠠᠮᠲᠤ ᠣᠴᠢᠪᠠ᠃ ᠲᠡᠳᠡ ᠪᠦᠭᠦᠳᠡᠭᠡᠷ ᠠᠰᠤᠷᠤ ᠶᠡᠬᠡ ᠡᠩᠨᠡᠭᠡ ᠪᠣᠯᠵᠠᠢ᠃ 10 ᠲᠡᠳᠡ ᠶᠣᠷᠳᠠᠨ ᠭᠣᠣᠯ ᠤᠨ ᠨᠥᠭᠥᠭᠡ ᠬᠥᠪᠡᠭᠡᠨ ᠳᠦ ᠪᠠᠢᠭᠠ ᠠᠲ᠋ᠠᠳ᠋ ᠤᠨ ᠦᠲᠦᠷᠮᠡ ᠳᠡᠭᠡᠷᠡ ᠬᠦᠷᠴᠦ ᠢᠷᠡᠭᠡᠳ ᠲᠡᠨᠳᠡ ᠴᠢᠩᠭ᠍ᠠ ᠪᠠᠷ ᠤᠬᠢᠯᠠᠯᠳᠤᠨ᠂ ᠭᠦᠨ ᠢᠶᠡᠷ ᠡᠮᠭᠡᠨᠢᠵᠡᠭᠡᠭᠰᠡᠨ ᠪᠠᠢᠨᠠ᠃ ᠶᠣᠰᠧᠹ ᠲᠡᠨᠳᠡ ᠡᠴᠢᠭᠡ ᠶᠢᠨ ᠢᠶᠠᠨ ᠬᠣᠢᠨᠠ ᠠᠴᠠ ᠳᠣᠯᠣᠭᠠᠨ ᠬᠣᠨᠣᠭ ᠭᠠᠰᠢᠭᠤᠳᠠᠵᠠᠢ᠃ 11 ᠲᠡᠨᠳᠡ ᠣᠷᠣᠰᠢᠨ ᠰᠠᠭᠤᠭᠴᠢ ᠺᠠᠨᠠᠨᠴᠤᠳ ᠠᠲ᠋ᠠᠳ᠋ ᠤᠨ ᠦᠲᠦᠷᠮᠡ ᠳᠡᠭᠡᠷᠡ ᠪᠣᠯᠣᠭᠰᠠᠨ ᠭᠠᠰᠢᠭᠤᠳᠠᠯ ᠢ ᠬᠠᠷᠠᠭᠠᠳ᠄ 《ᠶᠧᠵᠢᠫᠲ᠋ᠴᠦᠳ ᠦᠨ ᠮᠠᠰᠢ ᠲᠣᠮᠣ ᠭᠠᠰᠢᠭᠤᠳᠠᠯ ᠪᠣᠯᠵᠤ ᠪᠠᠢᠨᠠ》 ᠭᠡᠵᠦ ᠶᠠᠷᠢᠯᠴᠠᠵᠠᠭᠠᠪᠠ᠃ ᠡᠨᠡ ᠤᠴᠢᠷ ᠢᠶᠠᠷ ᠶᠣᠷᠳᠠᠨ ᠭᠣᠣᠯ ᠤᠨ ᠨᠥᠭᠥᠭᠡ ᠡᠷᠭᠢ ᠶᠢᠨ ᠲᠡᠷᠡ ᠭᠠᠵᠠᠷ ᠢ ᠠᠪᠧᠯ ᠮᠢᠽᠷᠠᠢᠮ 87 ᠭᠡᠵᠦ ᠨᠡᠷᠡᠯᠡᠬᠦ ᠪᠣᠯᠵᠠᠢ᠃ 12 ᠬᠥᠪᠡᠭᠦᠳ ᠨᠢ ᠡᠢᠨ ᠬᠦ ᠲᠡᠭᠦᠨ ᠦ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠭᠦᠢᠴᠡᠳᠬᠡᠵᠡᠢ᠃ 13 ᠬᠥᠪᠡᠭᠦᠳ ᠨᠢ ᠲᠡᠭᠦᠨ ᠢ ᠺᠠᠨᠠᠨ ᠨᠤᠲᠤᠭ ᠤᠷᠤᠭᠤ ᠠᠪᠴᠢᠷᠠᠭᠠᠳ᠂ ᠮᠠᠮᠷᠧ ᠶᠢᠨ ᠬᠠᠵᠠᠭᠤ ᠳᠠᠬᠢ ᠮᠠᠺᠫᠧᠯᠠ ᠶᠢᠨ ᠲᠠᠯᠠᠪᠠᠢ ᠳᠤ ᠪᠠᠢᠭᠠ ᠠᠭᠤᠢ ᠳᠤ ᠣᠷᠣᠰᠢᠭᠤᠯᠪᠠ᠃ ᠠᠪᠷᠠᠬᠠᠮ ᠲᠡᠷᠡ ᠠᠭᠤᠢ ᠶᠢ ᠣᠷᠣᠰᠢᠭᠤᠯᠭᠠ ᠶᠢᠨ ᠭᠠᠵᠠᠷ ᠪᠣᠯᠭᠠᠬᠤ ᠪᠠᠷ ᠾᠢᠲ᠋ᠴᠦᠳ ᠦᠨ ᠡᠹᠷᠣᠨ ᠠᠴᠠ ᠲᠠᠯᠠᠪᠠᠢ ᠲᠠᠢ ᠨᠢ ᠬᠠᠮᠲᠤ ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ ᠪᠠᠢᠪᠠ᠃ 14 ᠶᠣᠰᠧᠹ ᠡᠴᠢᠭᠡ ᠪᠡᠨ ᠣᠷᠣᠰᠢᠭᠤᠯᠤᠭᠰᠠᠨ ᠤ ᠳᠠᠷᠠᠭᠠ ᠠᠬᠠ ᠳᠡᠭᠦᠦ ᠨᠠᠷ ᠲᠠᠢ ᠪᠠᠨ ᠬᠠᠮᠲᠤ᠂ ᠪᠠᠰᠠ ᠡᠴᠢᠭᠡ ᠶᠢ ᠨᠢ ᠣᠷᠣᠰᠢᠭᠤᠯᠬᠤ ᠪᠠᠷ ᠶᠠᠪᠤᠭᠰᠠᠨ ᠪᠤᠰᠤᠳ ᠪᠦᠬᠦ ᠬᠥᠮᠦᠨ ᠦ ᠬᠠᠮᠲᠤ ᠶᠧᠵᠢᠫᠲ ᠲᠡᠭᠡᠨ ᠪᠤᠴᠠᠨ ᠢᠷᠡᠵᠡᠢ᠃
ᠶᠣᠰᠧᠹ ᠠᠬᠠ ᠨᠠᠷ ᠢᠶᠠᠨ ᠲᠠᠢᠪᠤᠰᠢᠷᠠᠭᠤᠯᠪᠠ
15 ᠶᠣᠰᠧᠹ ᠤᠨ ᠠᠬᠠ ᠳᠡᠭᠦᠦ ᠨᠠᠷ ᠡᠴᠢᠭᠡ ᠶᠢᠨ ᠢᠶᠠᠨ ᠨᠠᠰᠤ ᠪᠠᠷᠠᠭᠰᠠᠨ ᠢ ᠦᠵᠡᠭᠡᠳ ᠬᠣᠭᠣᠷᠣᠨᠳᠣ ᠪᠠᠨ᠄ 《ᠬᠡᠷᠪᠡ ᠶᠣᠰᠧᠹ ᠪᠢᠳᠡᠨ ᠳᠦ ᠥᠰᠢᠶᠡ ᠪᠣᠳᠣᠵᠤ᠂ ᠪᠢᠳᠡᠨ ᠦ ᠥᠪᠡᠷ ᠲᠤᠨᠢ ᠬᠢᠭᠰᠡᠨ ᠪᠦᠬᠦ ᠭᠡᠮ ᠪᠤᠷᠤᠭᠤ ᠶᠢ ᠪᠢᠳᠡᠨ ᠳᠦ ᠵᠠᠪᠠᠯ ᠡᠷᠭᠢᠭᠦᠯᠵᠦ ᠬᠢᠬᠦ ᠭᠡᠪᠡᠯ ᠶᠠᠭᠠᠬᠢᠬᠤ ᠪᠤᠢ︖》 ᠭᠡᠯᠴᠡᠪᠡ᠃ 16 ᠲᠡᠳᠡ ᠶᠣᠰᠧᠹ ᠲᠤ ᠬᠡᠯᠡ ᠳᠠᠮᠵᠢᠭᠤᠯᠵᠤ᠄ 《ᠡᠴᠢᠭᠡ ᠴᠢᠨᠢ ᠨᠠᠰᠤ ᠪᠠᠷᠠᠬᠤ ᠠᠴᠠ ᠪᠠᠨ ᠡᠮᠦᠨᠡ 17 〈ᠥᠪᠡᠷ ᠲᠦ ᠴᠢᠨᠢ ᠬᠣᠷᠣᠨ ᠮᠠᠭᠤ ᠶᠢ ᠬᠢᠭᠰᠡᠨ ᠠᠬᠠ ᠨᠠᠷ ᠤᠨ ᠢᠶᠠᠨ ᠭᠡᠮ ᠨᠢᠭᠦᠯ ᠢ ᠴᠢ ᠣᠳᠣ ᠠᠭᠤᠴᠢᠯᠠᠭᠠᠷᠠᠢ ᠭᠡᠵᠦ ᠲᠠᠨ ᠳᠤ ᠬᠡᠯᠡᠬᠦ ᠶᠢ ᠵᠠᠬᠢᠭᠰᠠᠨ ᠶᠤᠮ〉᠂ ᠡᠢᠮᠦ ᠡᠴᠡ ᠲᠠ ᠡᠴᠢᠭᠡ ᠶᠢᠨ ᠢᠶᠠᠨ ᠪᠤᠷᠬᠠᠨ ᠤ ᠵᠠᠷᠤᠴᠠ ᠪᠢᠳᠡᠨ ᠦ ᠭᠡᠮ ᠪᠤᠷᠤᠭᠤ ᠶᠢ ᠣᠳᠣ ᠠᠭᠤᠴᠢᠯᠠᠨᠠ ᠤᠤ︖》 ᠭᠡᠰᠡᠨ ᠳᠦ᠂ ᠲᠡᠳᠡᠨ ᠦ ᠦᠭᠡ ᠶᠢ ᠰᠣᠨᠣᠰᠣᠭᠰᠠᠨ ᠶᠣᠰᠧᠹ ᠤᠬᠢᠯᠠᠪᠠ᠃ 18 ᠠᠬᠠ ᠨᠠᠷ ᠨᠢ ᠢᠷᠡᠵᠦ ᠲᠡᠭᠦᠨ ᠦ ᠡᠮᠦᠨᠡ ᠰᠥᠭᠥᠳᠥᠨ᠄ 《ᠪᠢᠳᠡ ᠨᠠᠷ ᠲᠠᠨ ᠤ ᠪᠣᠭᠣᠯ ᠰᠢᠦ》 ᠭᠡᠰᠡᠨ ᠳᠦ᠂ 19 ᠶᠣᠰᠧᠹ ᠲᠡᠳᠡᠨ ᠳᠦ᠄ 《ᠪᠢᠲᠡᠭᠡᠢ ᠠᠶᠤᠵᠠᠭᠠ᠃ ᠪᠢ ᠶᠠᠭᠠᠬᠢᠨ ᠪᠤᠷᠬᠠᠨ ᠢ ᠣᠷᠣᠯᠠᠨᠠ ᠪᠤᠢ︖ 20 ᠲᠠ ᠨᠠᠷ ᠨᠠᠳᠠ ᠳᠤ ᠮᠠᠭᠤ ᠶᠢ ᠦᠢᠯᠡᠳᠬᠦ ᠪᠡᠷ ᠲᠥᠯᠥᠪᠯᠡᠭᠰᠡᠨ ᠪᠣᠯᠪᠠᠴᠤ ᠪᠤᠷᠬᠠᠨ ᠡᠭᠦᠨ ᠢᠶᠡᠷ ᠰᠠᠢᠨ ᠢ ᠦᠢᠯᠡᠳᠬᠦ ᠪᠡᠷ ᠲᠥᠯᠥᠪᠯᠡᠵᠦ ᠥᠨᠥᠳᠥᠷ ᠦᠨ ᠬᠢ ᠰᠢᠭ ᠦᠢ ᠣᠯᠠᠨ ᠬᠥᠮᠦᠨ ᠦ ᠠᠮᠢ ᠶᠢ ᠠᠪᠤᠷᠠᠭᠰᠠᠨ ᠶᠤᠮ᠃ 21 ᠲᠠ ᠨᠠᠷ ᠣᠳᠣ ᠪᠢᠲᠡᠭᠡᠢ ᠠᠶᠤᠵᠠᠭᠠ᠃ ᠪᠢ ᠥᠪᠡᠷ ᠢᠶᠡᠨ ᠲᠠ ᠨᠠᠷ ᠢ ᠪᠣᠯᠣᠨ ᠬᠡᠦᠬᠡᠳ ᠤᠳ ᠢ ᠴᠢᠨᠢ ᠲᠡᠳᠬᠦᠨᠡ》 ᠭᠡᠵᠦ ᠲᠡᠳᠡᠨ ᠦ ᠰᠡᠳᠬᠢᠯ ᠢ ᠲᠠᠢᠪᠤᠰᠢᠷᠠᠭᠤᠯᠬᠤ ᠦᠭᠡ ᠶᠠᠷᠢᠭᠰᠠᠨ ᠪᠠᠢᠯᠠ᠃
ᠶᠣᠰᠧᠹ ᠥᠭᠡᠳᠡ ᠪᠣᠯᠪᠠ
22 ᠡᠢᠨ ᠬᠦ ᠶᠣᠰᠧᠹ ᠡᠴᠢᠭᠡ ᠶᠢᠨ ᠢᠶᠠᠨ ᠭᠡᠷ ᠪᠦᠯᠢ ᠶᠢᠨ ᠬᠢᠨ ᠲᠠᠢ ᠬᠠᠮᠲᠤ ᠶᠧᠵᠢᠫᠲ ᠲᠤ ᠠᠮᠢᠳᠤᠷᠠᠨ ᠰᠠᠭᠤᠪᠠ᠃ ᠲᠡᠷᠡ ᠵᠠᠭᠤ ᠠᠷᠪᠠᠨ ᠵᠢᠯ ᠠᠮᠢᠳᠤᠷᠠᠵᠤ᠂ 23 ᠡᠹᠷᠠᠢᠮ ᠤᠨ ᠬᠥᠪᠡᠭᠦᠳ ᠦᠨ ᠭᠤᠷᠪᠠᠨ ᠦᠶᠡ ᠶᠢ ᠦᠵᠡᠭᠰᠡᠨ ᠪᠥᠭᠡᠳ ᠮᠠᠨᠠᠰᠧ ᠶᠢᠨ ᠬᠦᠦ ᠮᠠᠺᠢᠷ ᠤᠨ ᠬᠥᠪᠡᠭᠦᠳ ᠲᠥᠷᠥᠬᠦ ᠳᠦ᠂ ᠲᠡᠳᠡᠨ ᠢ ᠠᠪᠴᠤ ᠡᠪᠦᠷ ᠳᠡᠭᠡᠷᠡ ᠪᠡᠨ ᠥᠰᠭᠡᠵᠡᠢ᠃
24 ᠶᠣᠰᠧᠹ ᠠᠬᠠ ᠳᠡᠭᠦᠦ ᠨᠠᠷ ᠲᠡᠭᠡᠨ᠄ 《ᠦᠬᠦᠬᠦ ᠴᠠᠭ ᠮᠢᠨᠢ ᠪᠣᠯᠣᠯᠠ᠂ ᠭᠡᠪᠡᠴᠦ ᠪᠤᠷᠬᠠᠨ ᠲᠠ ᠨᠠᠷ ᠲᠤ ᠲᠤᠰᠠᠯᠠᠬᠤ ᠪᠠᠷ ᠯᠠᠪᠲᠠᠢ ᠢᠷᠡᠨᠡ᠂ ᠲᠠ ᠨᠠᠷ ᠢ ᠡᠨᠡ ᠭᠠᠵᠠᠷ ᠠᠴᠠ ᠭᠠᠷᠭᠠᠭᠠᠳ ᠠᠪᠷᠠᠬᠠᠮ᠂ ᠢᠰᠠᠺ᠂ ᠶᠠᠺᠣᠪ ᠲᠤ ᠠᠮᠠᠯᠠᠭᠰᠠᠨ ᠲᠡᠷᠡ ᠭᠠᠵᠠᠷ ᠤᠷᠤᠭᠤ ᠠᠪᠠᠴᠢᠨᠠ》 ᠭᠡᠪᠡ᠃ 25 ᠶᠣᠰᠧᠹ ᠪᠠᠰᠠ᠄ 《ᠪᠤᠷᠬᠠᠨ ᠲᠠ ᠨᠠᠷ ᠲᠤ ᠲᠤᠰᠠᠯᠠᠬᠤ ᠪᠠᠷ ᠯᠠᠪᠲᠠᠢ ᠢᠷᠡᠨᠡ᠃ ᠲᠡᠭᠡᠬᠦ ᠳᠦ ᠲᠠ ᠨᠠᠷ ᠮᠢᠨᠦ ᠶᠠᠰᠤ ᠶᠢ ᠡ᠊ᠨᠳᠡ ᠡᠴᠡ ᠠᠪᠠᠴᠢᠭᠠᠷᠠᠢ》 ᠭᠡᠵᠦ ᠬᠡᠯᠡᠭᠡᠳ ᠢᠰᠷᠧᠯ ᠤᠨ ᠬᠥᠪᠡᠭᠦᠳ ᠢᠶᠡᠷ ᠲᠠᠩ᠋ᠭᠠᠷᠢᠭᠯᠠᠭᠤᠯᠪᠠ᠃ 26 ᠲᠡᠭᠡᠭᠡᠳ ᠶᠣᠰᠧᠹ ᠵᠠᠭᠤ ᠠᠷᠪᠠᠨ ᠨᠠᠰᠤᠲᠠᠢ ᠪᠠᠢᠬᠤ ᠳᠠᠭᠠᠨ ᠥᠭᠡᠳᠡ ᠪᠣᠯᠪᠠ᠃ ᠬᠥᠮᠦᠰ ᠶᠧᠵᠢᠫᠲ ᠲᠤ ᠲᠡᠭᠦᠨ ᠦ ᠪᠡᠶᠡ ᠳᠣᠲᠣᠷᠠ ᠭᠦᠭᠦᠯ ᠬᠢᠵᠦ ᠠᠪᠰᠠᠯᠠᠭᠰᠠᠨ ᠪᠠᠢᠪᠠ᠃