ᠡᠬᠢᠯᠡᠯ ᠳᠥᠴᠢᠨ ᠳᠥᠷᠪᠡ
ᠶᠣᠰᠧᠹ ᠤᠨ ᠮᠥᠩᠭᠥᠨ ᠠᠶᠠᠭᠠ
1 ᠶᠣᠰᠧᠹ ᠭᠡᠷ ᠦᠨ ᠳᠠᠭᠠᠭᠠᠮᠠᠯ ᠳᠠᠭᠠᠨ᠄ 《ᠲᠡᠳᠡᠨ ᠦ ᠤᠭᠤᠲᠠ ᠶᠢ ᠳᠠᠭᠠᠭᠠᠴᠠ ᠶᠢᠨ ᠬᠢᠨᠢ ᠬᠢᠷᠢ ᠪᠠᠷ ᠠᠮᠤ ᠬᠦᠨᠡᠰᠦ ᠪᠡᠷ ᠳᠦᠭᠦᠷᠭᠡᠵᠦ᠂ ᠬᠥᠮᠦᠨ ᠪᠦᠷᠢ ᠶᠢᠨ ᠲᠥᠯᠥᠭᠰᠡᠨ ᠮᠥᠩᠭᠥ ᠶᠢ ᠤᠭᠤᠲᠠᠨ ᠤ ᠬᠢᠨᠢ ᠠᠮᠠᠰᠠᠷ ᠲᠤ ᠪᠤᠴᠠᠭᠠᠵᠤ ᠬᠢ᠃ 2 ᠪᠠᠰᠠ ᠮᠢᠨᠦ ᠠᠶᠠᠭᠠ᠂ ᠨᠥᠭᠥᠭᠡ ᠮᠥᠩᠭᠥᠨ ᠠᠶᠠᠭᠠ ᠶᠢ ᠬᠠᠮᠤᠭ ᠤᠨ ᠵᠠᠯᠠᠭᠤ ᠶᠢᠨ ᠬᠢᠨᠢ ᠤᠭᠤᠲᠠᠨ ᠤ ᠬᠢᠨᠢ ᠠᠮᠠᠰᠠᠷ ᠲᠤ ᠬᠦᠨᠡᠰᠦᠨ ᠦ ᠮᠥᠩᠭᠥ ᠲᠠᠢ ᠨᠢ ᠬᠠᠮᠲᠤ ᠬᠢ》 ᠭᠡᠵᠦ ᠲᠤᠰᠢᠶᠠᠪᠠ᠃ ᠲᠡᠷᠡ ᠪᠡᠷ ᠶᠣᠰᠧᠹ ᠤᠨ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠪᠦᠭᠦᠳᠡ ᠶᠢ ᠬᠢᠵᠦ᠂ 3 ᠦᠷ ᠭᠡᠭᠡᠷᠡᠬᠦ ᠳᠦ ᠲᠡᠳᠡᠨ ᠢ ᠡᠯᠵᠢᠭᠡ ᠨᠦᠭᠦᠳ ᠲᠠᠢ ᠨᠢ ᠬᠠᠮᠲᠤ ᠶᠠᠪᠤᠭᠤᠯᠵᠠᠢ᠃ 4 ᠲᠡᠳᠡ ᠬᠣᠲᠠ ᠠᠴᠠ ᠭᠠᠷᠤᠭᠠᠳ ᠬᠣᠯᠠᠳᠠᠭᠠ ᠦᠭᠡᠢ ᠪᠠᠢᠬᠤ ᠳᠤ᠂ ᠶᠣᠰᠧᠹ ᠳᠠᠭᠠᠭᠠᠮᠠᠯ ᠳᠠᠭᠠᠨ ᠵᠠᠬᠢᠨ᠄ 《ᠨᠥᠭᠥᠭᠡ ᠬᠥᠮᠦᠰ ᠦᠨ ᠬᠣᠢᠨᠠ ᠠᠴᠠ ᠳᠠᠷᠤᠢᠬᠠᠨ ᠮᠥᠷᠳᠡᠨ ᠭᠦᠢᠴᠡᠵᠦ ᠲᠡᠳᠡᠨ ᠳᠦ᠄ 〈ᠲᠠ ᠨᠠᠷ ᠶᠠᠭᠤᠨ ᠳᠤ ᠠᠴᠢ ᠶᠢ ᠪᠠᠴᠢ ᠪᠠᠷ ᠬᠠᠷᠢᠭᠤᠯᠤᠨᠠ ᠪᠤᠢ︖ 5 ᠡᠨᠡ ᠴᠢᠨᠢ ᠮᠢᠨᠦ ᠡᠵᠡᠨ ᠦ ᠤᠤᠭᠤᠳᠠᠭ᠂ ᠮᠥᠨ ᠮᠡᠷᠭᠡᠯᠡᠬᠦ ᠳᠡᠭᠡᠨ ᠳᠠᠩᠳᠠ ᠪᠠᠨ ᠬᠡᠷᠡᠭᠯᠡᠳᠡᠭ ᠲᠡᠷᠡ ᠠᠶᠠᠭᠠ ᠪᠢᠰᠢ ᠤᠤ︖ ᠢᠩᠭᠢᠭᠰᠡᠨ ᠢᠶᠡᠷ ᠴᠢ ᠮᠠᠭᠤ ᠶᠠᠭᠤᠮᠠ ᠬᠢᠯᠡ〉 ᠭᠡᠵᠦ ᠬᠡᠯᠡ》 ᠭᠡᠪᠡ᠃
6 ᠳᠠᠭᠠᠭᠠᠮᠠᠯ ᠲᠡᠳᠡᠨ ᠢ ᠭᠦᠢᠴᠡᠨ ᠣᠴᠢᠵᠤ᠂ ᠲᠡᠷᠡ ᠶᠣᠰᠣᠭᠠᠷ ᠬᠡᠯᠡᠭᠰᠡᠨ ᠳᠦ᠂ 7 ᠲᠡᠳᠡ᠄ 《ᠡᠵᠡᠨᠲᠡᠨ ᠮᠢᠨᠢ︕ ᠲᠠ ᠶᠠᠭᠠᠬᠢᠭᠠᠳ ᠡᠢᠮᠦ ᠦᠭᠡ ᠬᠡᠯᠡᠵᠦ ᠪᠠᠢᠨᠠ ᠪᠤᠢ︖ ᠲᠠᠨ ᠤ ᠵᠠᠷᠤᠴᠠ ᠪᠢᠳᠡ ᠬᠡᠵᠢᠶᠡ ᠴᠤ ᠡᠢᠮᠦᠷᠬᠦ ᠵᠦᠢᠯ ᠢ ᠬᠢᠬᠦ ᠦᠭᠡᠢ ᠳᠠ᠃ 8 ᠪᠢᠳᠡ ᠤᠭᠤᠲᠠᠨ ᠳᠣᠲᠣᠷᠠ ᠪᠠᠢᠭᠰᠠᠨ ᠮᠥᠩᠭᠥ ᠶᠢ ᠴᠤ ᠲᠠᠨ ᠳᠤ ᠪᠤᠴᠠᠭᠠᠬᠤ ᠪᠠᠷ ᠺᠠᠨᠠᠨ ᠨᠤᠲᠤᠭ ᠠᠴᠠ ᠠᠪᠴᠢᠷᠠᠭᠰᠠᠨ ᠪᠠᠢᠬᠤ ᠳᠤ᠂ ᠲᠠᠨ ᠤ ᠡᠵᠡᠨ ᠦ ᠭᠡᠷ ᠡᠴᠡ ᠠᠯᠲᠠ ᠮᠥᠩᠭᠥ ᠬᠤᠯᠠᠭᠠᠢᠯᠠᠨᠠ ᠭᠡᠵᠢ ᠤᠤ︖ 9 ᠲᠡᠷᠡ ᠶᠠᠭᠤᠮᠠ ᠲᠠᠨ ᠤ ᠵᠠᠷᠤᠴᠠ ᠪᠢᠳᠡᠨ ᠦ ᠬᠡᠨ ᠡᠴᠡ ᠨᠢ ᠣᠯᠳᠠᠪᠡᠯ ᠲᠡᠷᠡ ᠦᠬᠦᠬᠦ ᠶᠣᠰᠣᠲᠠᠢ᠃ ᠪᠢᠳᠡ ᠴᠤ ᠡᠵᠡᠨ ᠦ ᠪᠠᠨ ᠪᠣᠭᠣᠯ ᠪᠣᠯᠣᠨᠠ》 ᠭᠡᠵᠡᠢ᠃ 10 ᠳᠠᠭᠠᠭᠠᠮᠠᠯ᠄ 《ᠰᠠᠢᠨ ᠪᠠᠢᠨᠠ᠂ ᠲᠠ ᠨᠠᠷ ᠤᠨ ᠬᠡᠯᠡᠭᠰᠡᠨ ᠢᠶᠡᠷ ᠪᠣᠯᠣᠭ᠃ ᠬᠠᠷᠢᠨ ᠬᠡᠨ ᠡᠴᠡ ᠲᠡᠷᠡ ᠶᠠᠭᠤᠮᠠ ᠣᠯᠳᠠᠪᠠᠯ ᠲᠡᠷᠡ ᠯᠠ ᠮᠢᠨᠦ ᠪᠣᠭᠣᠯ ᠪᠣᠯᠵᠤ᠂ ᠪᠤᠰᠤᠳ ᠨᠢ ᠶᠠᠯᠠ ᠦᠭᠡᠢ ᠪᠣᠯᠣᠨᠠ》 ᠭᠡᠬᠦ ᠳᠦ᠂ 11 ᠲᠡᠳᠡ ᠳᠠᠷᠤᠢᠬᠠᠨ ᠲᠤᠰ ᠲᠤᠰ ᠤᠨ ᠢᠶᠠᠨ ᠤᠭᠤᠲᠠ ᠶᠢ ᠭᠠᠵᠠᠷ ᠲᠤ ᠪᠠᠭᠤᠯᠭᠠᠵᠤ᠂ ᠬᠥᠮᠦᠨ ᠪᠦᠷᠢ ᠤᠭᠤᠲᠠ ᠪᠠᠨ ᠨᠡᠭᠡᠭᠡᠵᠦ ᠥᠭᠪᠡ᠃ 12 ᠳᠠᠭᠠᠭᠠᠮᠠᠯ ᠬᠠᠮᠤᠭ ᠤᠨ ᠠᠬᠠᠮᠠᠳ ᠠᠴᠠ ᠨᠢ ᠡᠬᠢᠯᠡᠭᠡᠳ ᠬᠠᠮᠤᠭ ᠤᠨ ᠵᠠᠯᠠᠭᠤ ᠳᠤᠨᠢ ᠬᠦᠷᠲᠡᠯᠡ ᠨᠡᠩᠵᠢᠭᠰᠡᠨ ᠳᠦ᠂ ᠨᠥᠭᠥᠭᠡ ᠠᠶᠠᠭᠠ ᠪᠢᠨᠶᠠᠮᠢᠨ ᠤ ᠤᠭᠤᠲᠠᠨ ᠠᠴᠠ ᠣᠯᠳᠠᠵᠠᠢ᠃ 13 ᠲᠡᠳᠡ ᠬᠤᠪᠴᠠᠰᠤ ᠪᠠᠨ ᠤᠷᠠᠵᠠᠭᠠᠵᠤ᠂ ᠬᠥᠮᠦᠨ ᠪᠦᠷᠢ ᠡᠯᠵᠢᠭᠡ ᠪᠡᠨ ᠠᠴᠢᠶᠠᠯᠠᠵᠤ᠂ ᠬᠣᠲᠠ ᠤᠷᠤᠭᠤ ᠪᠤᠴᠠᠵᠠᠭᠠᠪᠠ᠃
14 ᠶᠦᠳᠠ ᠪᠣᠯᠣᠨ ᠲᠡᠭᠦᠨ ᠦ ᠠᠬᠠ ᠳᠡᠭᠦᠦ ᠨᠠᠷ ᠶᠣᠰᠧᠹ ᠤᠨ ᠭᠡᠷ ᠲᠦ ᠢᠷᠡᠬᠦ ᠳᠦ᠂ ᠲᠡᠷᠡ ᠭᠡᠷ ᠲᠡᠭᠡᠨ ᠪᠠᠢᠵᠤ ᠪᠠᠢᠯᠠ᠃ ᠲᠡᠳᠡ ᠶᠣᠰᠧᠹ ᠤᠨ ᠡᠮᠦᠨᠡ ᠭᠠᠵᠠᠷ ᠲᠤ ᠪᠥᠬᠥᠢᠵᠡᠭᠡᠵᠡᠢ᠃ 15 ᠶᠣᠰᠧᠹ ᠲᠡᠳᠡᠨ ᠳᠦ᠄ 《ᠲᠠ ᠨᠠᠷ ᠶᠠᠭᠤᠨ ᠳᠤ ᠡᠢᠮᠦ ᠬᠡᠷᠡᠭ ᠬᠢᠪᠡ︖ ᠨᠠᠳᠠ ᠮᠡᠲᠦ ᠬᠥᠮᠦᠨ ᠮᠡᠷᠭᠡ ᠲᠥᠯᠭᠡ ᠲᠠᠯᠪᠢᠳᠠᠭ ᠭᠡᠳᠡᠭ ᠢ ᠲᠠ ᠨᠠᠷ ᠮᠡᠳᠡᠬᠦ ᠦᠭᠡᠢ ᠤᠤ︖》 ᠭᠡᠪᠡ᠃ 16 ᠶᠦᠳᠠ᠄ 《ᠪᠢᠳᠡ ᠡᠵᠡᠨ ᠳᠡᠭᠡᠨ ᠶᠠᠭᠤ ᠴᠤ ᠭᠡᠵᠦ ᠬᠡᠯᠡᠬᠦ ᠪᠢᠯᠡ᠃ ᠪᠢᠳᠡ ᠶᠠᠭᠤ ᠭᠡᠵᠦ ᠲᠠᠢᠯᠪᠤᠷᠢᠯᠠᠵᠤ᠂ ᠦᠨᠡᠨᠴᠢ ᠰᠢᠳᠤᠷᠭᠤ ᠪᠠᠨ ᠶᠠᠭᠠᠬᠢᠵᠤ ᠪᠠᠲᠤᠯᠠᠬᠤ ᠪᠤᠢ︖ ᠪᠤᠷᠬᠠᠨ ᠥᠪᠡᠷ ᠢᠶᠡᠨ ᠲᠠᠨ ᠤ ᠵᠠᠷᠤᠴᠠ ᠨᠠᠷ ᠤᠨ ᠭᠡᠮ ᠪᠤᠷᠤᠭᠤ ᠶᠢ ᠣᠯᠣᠭᠰᠠᠨ ᠶᠤᠮ ᠪᠠᠢᠨᠠ᠃ ᠪᠢᠳᠡ ᠪᠦᠭᠦᠳᠡᠭᠡᠷ ᠢᠶᠡᠨ ᠭᠠᠷ ᠠᠴᠠ ᠨᠢ ᠠᠶᠠᠭᠠ ᠣᠯᠳᠠᠭᠰᠠᠨ ᠲᠡᠷᠡ ᠬᠦᠦ ᠲᠠᠢ ᠬᠠᠮᠲᠤ ᠡᠵᠡᠨ ᠲᠠᠨ ᠤ ᠪᠣᠭᠣᠯ ᠪᠣᠯᠣᠶᠠ》 ᠭᠡᠪᠡ᠃ 17 ᠬᠠᠷᠢᠨ ᠶᠣᠰᠧᠹ᠄ 《ᠲᠡᠭᠡᠬᠦ ᠨᠢ ᠨᠠᠳᠠ ᠠᠴᠠ ᠬᠣᠯᠠ ᠪᠠᠢᠭ᠃ ᠭᠠᠷ ᠠᠴᠠ ᠨᠢ ᠠᠶᠠᠭᠠ ᠣᠯᠳᠠᠭᠰᠠᠨ ᠲᠡᠷᠡ ᠬᠥᠮᠦᠨ ᠯᠠ ᠮᠢᠨᠦ ᠪᠣᠭᠣᠯ ᠪᠣᠯᠣᠨᠠ᠃ ᠬᠠᠷᠢᠨ ᠲᠠ ᠨᠠᠷ ᠡᠴᠢᠭᠡ ᠤᠷᠤᠭᠤ ᠪᠠᠨ ᠠᠮᠤᠷ ᠲᠠᠢᠪᠤᠩ ᠪᠤᠴᠠᠵᠠᠭᠠ》 ᠭᠡᠪᠡ᠃
18 ᠶᠦᠳᠠ ᠲᠡᠭᠦᠨ ᠳᠦ ᠣᠢᠷᠠᠲᠤᠨ ᠣᠴᠢᠵᠤ ᠬᠡᠯᠡᠭᠰᠡᠨ ᠨᠢ᠄ 《ᠡᠵᠡᠨᠲᠡᠨ ᠮᠢᠨᠢ ᠡ︕ ᠵᠠᠷᠤᠴᠠ ᠲᠠᠨᠢ ᠡᠵᠡᠨ ᠦ ᠪᠠᠨ ᠰᠣᠨᠣᠷ ᠲᠤ ᠨᠢᠭᠡ ᠦᠭᠡ ᠬᠡᠯᠡᠶᠡ᠃ ᠲᠠ ᠪᠣᠯᠭᠣᠭᠠᠨᠠ ᠤᠤ︖ ᠲᠠ ᠪᠣᠯ ᠹᠠᠷᠠᠣ᠋ ᠲᠠᠢ ᠠᠳᠠᠯᠢ ᠪᠢᠯᠡ᠃ ᠲᠠᠨ ᠤ ᠠᠭᠤᠷ ᠬᠢᠯᠢᠩ ᠵᠠᠷᠤᠴᠠ ᠳᠡᠭᠡᠷᠡ ᠪᠡᠨ ᠪᠦᠦ ᠪᠠᠳᠠᠷᠠᠭ᠃ 19 ᠡᠵᠡᠨᠲᠡᠨ ᠮᠢᠨᠢ᠂ ᠵᠠᠷᠤᠴᠠ ᠨᠠᠷ ᠠᠴᠠ ᠪᠠᠨ᠄ 〈ᠡᠴᠢᠭᠡ ᠲᠠᠢ ᠤᠤ᠂ ᠳᠡᠭᠦᠦ ᠲᠠᠢ ᠤᠤ︖〉 ᠭᠡᠵᠦ ᠠᠰᠠᠭᠤᠬᠤ ᠳᠤ ᠲᠠᠨᠢ ᠪᠢᠳᠡ᠄ 20 〈ᠥᠨᠳᠥᠷ ᠨᠠᠰᠤᠲᠠᠢ ᠡᠴᠢᠭᠡ ᠪᠤᠢ᠃ ᠪᠠᠰᠠ ᠲᠡᠭᠦᠨ ᠦ ᠮᠠᠨᠢ ᠥᠨᠳᠥᠷ ᠨᠠᠰᠤᠨ ᠳᠤᠨᠢ ᠭᠠᠷᠤᠭᠰᠠᠨ ᠨᠢᠭᠡ ᠵᠢᠭᠠᠬᠠᠨ ᠬᠦᠦ ᠴᠤ ᠪᠤᠢ᠂ ᠲᠡᠭᠦᠨ ᠦ ᠠᠬᠠ ᠨᠠᠰᠤ ᠪᠠᠷᠠᠭᠰᠠᠨ ᠪᠥᠭᠡᠳ ᠲᠡᠷᠡ ᠡᠬᠡ ᠡᠴᠡ ᠪᠡᠨ ᠭᠠᠭᠴᠠᠭᠠᠷ ᠢᠶᠠᠨ ᠦᠯᠡᠳᠡᠭᠰᠡᠨ ᠤᠴᠢᠷ ᠠᠴᠠ ᠡᠴᠢᠭᠡ ᠨᠢ ᠲᠡᠭᠦᠨ ᠳᠦ ᠬᠠᠢᠷᠠᠲᠠᠢ〉 ᠭᠡᠵᠦ ᠡᠵᠡᠨ ᠳᠡᠭᠡᠨ ᠬᠡᠯᠡᠭᠰᠡᠨ ᠪᠢᠯᠡ᠃ 21 ᠲᠠ ᠵᠠᠷᠤᠴᠠ ᠪᠢᠳᠡᠨ ᠳᠦ᠄ 〈ᠲᠡᠭᠦᠨ ᠢ ᠪᠠᠨ ᠨᠠᠳᠠ ᠤᠷᠤᠭᠤ ᠠᠪᠤᠭᠠᠳ ᠢᠷᠡ︕ ᠪᠢ ᠲᠡᠭᠦᠨ ᠢ ᠴᠢᠨᠢ ᠨᠢᠳᠦ ᠪᠡᠷ ᠢᠶᠠᠨ ᠦᠵᠡᠶᠡ〉 ᠭᠡᠵᠦ ᠬᠡᠯᠡᠭᠰᠡᠨ ᠰᠢᠦ ᠳᠠ᠃ 22 ᠲᠡᠭᠡᠬᠦ ᠳᠦ ᠪᠢᠳᠡ ᠡᠵᠡᠨ ᠳᠡᠭᠡᠨ᠄ 〈ᠲᠡᠷᠡ ᠬᠦᠦ ᠡᠴᠢᠭᠡ ᠪᠡᠨ ᠣᠷᠬᠢᠵᠤ ᠪᠣᠯᠬᠤ ᠦᠭᠡᠢ᠃ ᠬᠡᠷᠪᠡ ᠲᠡᠷᠡ ᠡᠴᠢᠭᠡ ᠪᠡᠨ ᠣᠷᠬᠢᠪᠠᠯ ᠡᠴᠢᠭᠡ ᠨᠢ ᠨᠠᠰᠤ ᠪᠠᠷᠠᠬᠤ ᠪᠣᠯᠣᠨᠠ〉 ᠭᠡᠵᠦ ᠬᠡᠯᠡᠭᠰᠡᠨ ᠶᠤᠮ᠃ 23 ᠲᠡᠭᠡᠬᠦ ᠳᠦ ᠲᠠ ᠵᠠᠷᠤᠴᠠ ᠨᠠᠷ ᠲᠠᠭᠠᠨ᠄ 〈ᠣᠳᠬᠣᠨ ᠳᠡᠭᠦᠦ ᠴᠢᠨᠢ ᠬᠠᠮᠲᠤ ᠢᠷᠡᠬᠦ ᠦᠭᠡᠢ ᠪᠣᠯ ᠲᠠ ᠨᠠᠷ ᠮᠢᠨᠦ ᠨᠢᠭᠤᠷ ᠢ ᠳᠠᠬᠢᠨ ᠬᠠᠷᠠᠬᠤ ᠦᠭᠡᠢ〉 ᠭᠡᠰᠡᠨ ᠪᠢᠯᠡ᠃ 24 ᠲᠡᠭᠡᠭᠡᠳ ᠪᠢᠳᠡ ᠲᠠᠨ ᠤ ᠵᠠᠷᠤᠴᠠ ᠪᠣᠯᠬᠤ ᠡᠴᠢᠭᠡ ᠳᠡᠭᠡᠨ ᠪᠤᠴᠠᠵᠤ ᠣᠴᠢᠭᠠᠳ᠂ ᠡᠵᠡᠨ ᠲᠠᠨ ᠤ ᠦᠭᠡ ᠶᠢ ᠲᠡᠭᠦᠨ ᠳᠦ ᠬᠡᠯᠡᠭᠰᠡᠨ᠃ 25 ᠡᠴᠢᠭᠡ ᠮᠠᠨᠢ᠄ 〈ᠳᠠᠬᠢᠨ ᠣᠴᠢᠵᠤ ᠪᠢᠳᠡᠨ ᠳᠦ ᠵᠢᠭᠠᠬᠠᠨ ᠠᠮᠤ ᠬᠦᠨᠡᠰᠦ ᠠᠪᠤᠭᠠᠳ ᠢᠷᠡ〉 ᠭᠡᠬᠦ ᠪᠡᠷ ᠨᠢ᠂ 26 ᠪᠢᠳᠡ᠄ 〈ᠣᠴᠢᠬᠤ ᠬᠡᠷᠡᠭ ᠦᠭᠡᠢ᠂ ᠣᠳᠬᠣᠨ ᠳᠡᠭᠦᠦ ᠮᠠᠨᠢ ᠪᠢᠳᠡᠨ ᠲᠡᠢ ᠬᠠᠮᠲᠤ ᠶᠠᠪᠤᠪᠠᠯ ᠪᠢᠳᠡ ᠶᠠᠪᠤᠨᠠ᠃ ᠣᠳᠬᠣᠨ ᠳᠡᠭᠦᠦ ᠮᠠᠨᠢ ᠪᠢᠳᠡᠨ ᠲᠡᠢ ᠬᠠᠮᠲᠤ ᠶᠠᠪᠤᠬᠤ ᠦᠭᠡᠢ ᠪᠣᠯ ᠲᠡᠷᠡ ᠬᠥᠮᠦᠨ ᠦ ᠨᠢᠭᠤᠷ ᠢ ᠪᠢᠳᠡ ᠬᠠᠷᠠᠵᠤ ᠴᠢᠳᠠᠬᠤ ᠦᠭᠡᠢ〉 ᠭᠡᠰᠡᠨ ᠪᠣᠯᠪᠠᠴᠤ 27 ᠲᠠᠨ ᠤ ᠵᠠᠷᠤᠴᠠ ᠪᠢᠳᠡᠨ ᠦ ᠡᠴᠢᠭᠡ ᠪᠢᠳᠡᠨ ᠳᠦ᠄ 〈ᠡᠨᠡ ᠬᠦᠦ ᠶᠢᠨ ᠡᠵᠢ ᠨᠠᠳᠠ ᠳᠤ ᠬᠣᠶᠠᠷ ᠬᠦᠦ ᠲᠥᠷᠥᠭᠦᠯᠵᠦ ᠥᠭᠭᠥᠭᠰᠡᠨ ᠢ ᠲᠠ ᠨᠠᠷ ᠮᠡᠳᠡᠨᠡ᠃ 28 ᠨᠢᠭᠡ ᠨᠢ ᠨᠠᠳᠠ ᠠᠴᠠ ᠶᠠᠪᠤᠴᠢᠬᠠᠭᠰᠠᠨ᠃ ᠲᠡᠷᠡ ᠪᠡᠷ ᠯᠠᠪ ᠲᠠᠰᠤᠳᠠᠭᠤᠯᠤᠭᠰᠠᠨ᠂ ᠲᠡᠭᠦᠨ ᠡᠴᠡ ᠬᠣᠢᠰᠢ ᠪᠢ ᠲᠡᠭᠦᠨ ᠢ ᠬᠠᠷᠠᠭᠠ ᠦᠭᠡᠢ᠃ 29 ᠬᠡᠷᠪᠡ ᠲᠠ ᠨᠠᠷ ᠡᠨᠡ ᠨᠢᠭᠡ ᠶᠢ ᠨᠢ ᠴᠤ ᠨᠠᠳᠠ ᠠᠴᠠ ᠠᠪᠴᠤ ᠶᠠᠪᠤᠭᠠᠳ ᠲᠡᠭᠦᠨ ᠳᠦ ᠮᠢᠨᠢ ᠭᠠᠢ ᠲᠣᠬᠢᠶᠠᠯᠳᠤᠪᠠᠯ ᠪᠤᠭᠤᠷᠤᠯ ᠲᠣᠯᠣᠭᠠᠢ ᠮᠢᠨᠢ ᠲᠠ ᠨᠠᠷ ᠠᠴᠠ ᠪᠣᠯᠵᠤ ᠤᠢ ᠭᠠᠰᠢᠭᠤ ᠲᠠᠢ ᠪᠠᠷ ᠦᠬᠦᠭᠰᠡᠳ ᠦᠨ ᠣᠷᠣᠨ ᠳᠤ ᠪᠠᠭᠤᠵᠤ ᠣᠴᠢᠬᠤ ᠪᠣᠯᠣᠨᠠ〉 ᠭᠡᠪᠡ᠃ 30 ᠲᠡᠭᠦᠨ ᠦ ᠠᠮᠢ ᠬᠦᠦ ᠶᠢᠨ ᠢᠶᠠᠨ ᠠᠮᠢ ᠲᠠᠢ ᠡᠢᠨ ᠬᠦ ᠬᠣᠯᠪᠣᠭᠠ ᠲᠠᠢ ᠪᠠᠢᠳᠠᠭ ᠶᠤᠮ᠃ ᠣᠳᠣ ᠪᠢ ᠲᠠᠨ ᠤ ᠵᠠᠷᠤᠴᠠ ᠪᠣᠯᠬᠤ ᠡᠴᠢᠭᠡ ᠳᠡᠭᠡᠨ ᠪᠤᠴᠠᠵᠤ ᠣᠴᠢᠬᠤ ᠳᠤ᠂ ᠡᠨᠡ ᠬᠦᠦ ᠪᠢᠳᠡᠨ ᠲᠡᠢ ᠬᠠᠮᠲᠤ ᠪᠠᠢᠬᠤ ᠦᠭᠡᠢ ᠪᠣᠯ 31 ᠡᠴᠢᠭᠡ ᠮᠠᠨᠢ ᠬᠦᠦ ᠪᠡᠨ ᠪᠠᠢᠬᠤ ᠦᠭᠡᠢ ᠶᠢ ᠦᠵᠡᠭᠡᠳ ᠨᠠᠰᠤ ᠪᠠᠷᠠᠬᠤ ᠪᠣᠯᠣᠨᠠ᠃ ᠲᠡᠭᠡᠪᠡᠯ ᠲᠠᠨ ᠤ ᠵᠠᠷᠤᠴᠠ ᠪᠢᠳᠡᠨ ᠡᠴᠡ ᠪᠣᠯᠵᠤ ᠲᠠᠨ ᠤ ᠵᠠᠷᠤᠴᠠ ᠪᠣᠯᠬᠤ ᠡᠴᠢᠭᠡ ᠶᠢᠨ ᠮᠠᠨᠢ ᠪᠤᠭᠤᠷᠤᠯ ᠲᠣᠯᠣᠭᠠᠢ ᠤᠢ ᠭᠠᠰᠢᠭᠤ ᠲᠠᠢ ᠪᠠᠷ ᠦᠬᠦᠭᠰᠡᠳ ᠦᠨ ᠣᠷᠣᠨ ᠳᠤ ᠪᠠᠭᠤᠵᠤ ᠣᠴᠢᠬᠤ ᠪᠣᠯᠣᠨᠠ᠃ 32 ᠲᠠᠨ ᠤ ᠵᠠᠷᠤᠴᠠ ᠪᠢ ᠡᠴᠢᠭᠡ ᠳᠡᠭᠡᠨ ᠡᠨᠡ ᠬᠦᠦ ᠶᠢᠨ ᠲᠥᠯᠥᠭᠡ ᠪᠠᠲᠤᠯᠠᠨ ᠳᠠᠭᠠᠭᠠᠵᠤ᠂ ᠬᠡᠷᠪᠡ ᠪᠢ ᠲᠡᠭᠦᠨ ᠢ ᠪᠤᠴᠠᠭᠠᠵᠤ ᠠᠪᠴᠢᠷᠠᠬᠤ ᠦᠭᠡᠢ ᠪᠣᠯ ᠪᠢ ᠥᠪᠡᠷ ᠢᠶᠡᠨ ᠨᠠᠰᠤᠨ ᠲᠤᠷᠰᠢᠳᠠ ᠡᠴᠢᠭᠡ ᠶᠢᠨ ᠢᠶᠠᠨ ᠡᠮᠦᠨᠡ ᠭᠡᠮᠲᠡᠨ ᠪᠣᠯᠣᠨᠠ〉 ᠭᠡᠵᠦ ᠬᠡᠯᠡᠭᠰᠡᠨ ᠪᠢᠯᠡ᠃ 33 ᠣᠳᠣ ᠲᠠᠨ ᠠᠴᠠ ᠭᠤᠶᠤᠶᠠ᠂ ᠵᠠᠷᠤᠴᠠ ᠨᠠᠮᠠᠶᠢ ᠡᠨᠡ ᠬᠦᠦ ᠶᠢᠨ ᠣᠷᠣᠨ ᠳᠤ ᠡᠵᠡᠨᠲᠡᠨ ᠦ ᠪᠣᠭᠣᠯ ᠪᠣᠯᠭᠠᠨ ᠦᠯᠡᠳᠡᠭᠡᠵᠦ᠂ ᠲᠡᠭᠦᠨ ᠢ ᠠᠬᠠ ᠨᠠᠷ ᠲᠠᠢ ᠨᠢ ᠬᠠᠮᠲᠤ ᠶᠠᠪᠤᠭᠤᠯᠤᠭᠠᠴᠢ᠂ 34 ᠲᠡᠷᠡ ᠬᠦᠦ ᠨᠠᠳᠠ ᠲᠠᠢ ᠬᠠᠮᠲᠤ ᠪᠠᠢᠬᠤ ᠦᠭᠡᠢ ᠪᠠᠷ ᠪᠢ ᠡᠴᠢᠭᠡ ᠳᠡᠭᠡᠨ ᠬᠡᠷᠬᠢᠨ ᠣᠴᠢᠬᠤ ᠪᠤᠢ︖ ᠡᠴᠢᠭᠡ ᠳᠦ ᠮᠢᠨᠢ ᠤᠴᠠᠷᠠᠬᠤ ᠭᠠᠢ ᠵᠣᠪᠠᠯᠠᠩ ᠢ ᠪᠢ ᠶᠠᠭᠠᠬᠢᠨ ᠬᠠᠷᠠᠬᠤ ᠪᠤᠢ︖》 ᠭᠡᠪᠡ᠃