ᠡᠬᠢᠯᠡᠯ ᠠᠷᠪᠠᠨ ᠬᠣᠶᠠᠷ
ᠪᠤᠷᠬᠠᠨ ᠠᠪᠷᠠᠮ ᠢ ᠳᠠᠭᠤᠳᠠᠪᠠ
1 ᠶᠣᠬᠣᠸᠠ ᠠᠪᠷᠠᠮ ᠳᠤ ᠠᠢᠯᠠᠳᠤᠭᠰᠠᠨ ᠨᠢ᠄ 《ᠴᠢ ᠥᠪᠡᠷ ᠦᠨ ᠢᠶᠠᠨ ᠭᠠᠵᠠᠷ ᠨᠤᠲᠤᠭ ᠥᠪᠡᠷ ᠦᠨ ᠢᠶᠠᠨ ᠲᠥᠷᠥᠯ ᠰᠠᠳᠤᠨ ᠪᠠ ᠡᠴᠢᠭᠡ ᠶᠢᠨ ᠢᠶᠠᠨ ᠭᠡᠷ ᠢ ᠣᠷᠬᠢᠵᠤ ᠮᠢᠨᠦ ᠴᠢᠮᠠ ᠳᠤ ᠬᠠᠷᠠᠭᠤᠯᠬᠤ ᠭᠠᠵᠠᠷ ᠤᠷᠤᠭᠤ ᠶᠠᠪᠤ᠃
2 ᠴᠢᠮᠠ ᠠᠴᠠ ᠪᠢ ᠠᠭᠤᠤ ᠦᠨᠳᠦᠰᠦᠲᠡᠨ ᠢ ᠡᠭᠦᠰᠭᠡᠵᠦ ᠴᠢᠮᠠᠶᠢ ᠪᠢ ᠢᠷᠥᠭᠡᠵᠦ ᠴᠢᠨᠦ ᠨᠡᠷᠡ ᠶᠢ ᠠᠭᠤᠤ ᠪᠣᠯᠭᠠᠨᠠ ᠡᠢᠨ ᠬᠦ ᠴᠢ ᠢᠷᠥᠭᠡᠯ ᠪᠣᠯᠣᠭᠲᠤᠨ 20 ᠃
3 ᠴᠢᠮᠠᠶᠢ ᠢᠷᠥᠭᠡᠭᠴᠢᠳ ᠢ ᠪᠢ ᠢᠷᠥᠭᠡᠵᠦ ᠴᠢᠮᠠᠶᠢ ᠬᠠᠷᠢᠶᠠᠭᠴᠢ ᠶᠢ ᠪᠢ ᠬᠠᠷᠢᠶᠠᠨᠠ ᠭᠠᠵᠠᠷ ᠤᠨ ᠪᠦᠬᠦ ᠦᠨᠳᠦᠰᠦᠲᠡᠨ ᠴᠢᠮᠠ ᠪᠠᠷ ᠳᠠᠮᠵᠢᠨ ᠢᠷᠥᠭᠡᠭᠳᠡᠨᠡ》 ᠭᠡᠪᠡ᠃
4 ᠡᠢᠮᠦ ᠡᠴᠡ ᠠᠪᠷᠠᠮ ᠶᠣᠬᠣᠸᠠ ᠶᠢᠨ ᠥᠪᠡᠷ ᠲᠤᠨᠢ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠶᠠᠪᠤᠵᠠᠢ᠃ ᠯᠣᠲ ᠴᠤ ᠬᠠᠮᠲᠤ ᠶᠠᠪᠤᠪᠠ᠃ ᠠᠪᠷᠠᠮ ᠾᠠᠷᠠᠨ ᠠᠴᠠ ᠭᠠᠷᠬᠤ ᠳᠠᠭᠠᠨ ᠳᠠᠯᠠᠨ ᠲᠠᠪᠤᠨ ᠨᠠᠰᠤᠲᠠᠢ ᠪᠠᠢᠯᠠ᠃ 5 ᠠᠪᠷᠠᠮ ᠡᠬᠡᠨᠡᠷ ᠰᠠᠷᠠᠢ᠂ ᠠᠴᠢ ᠬᠦᠦ ᠯᠣᠲ ᠬᠢᠭᠡᠳ ᠾᠠᠷᠠᠨ ᠳᠤ ᠴᠤᠭᠯᠠᠭᠤᠯᠤᠭᠰᠠᠨ ᠬᠠᠮᠤᠭ ᠬᠥᠷᠥᠩᠭᠡ᠂ ᠣᠯᠵᠤ ᠠᠪᠤᠭᠰᠠᠨ ᠬᠥᠮᠦᠰ ᠢᠶᠡᠨ ᠳᠠᠭᠠᠭᠤᠯᠤᠨ ᠲᠡᠨᠳᠡ ᠡᠴᠡ ᠭᠠᠷᠴᠤ ᠺᠠᠨᠠᠨ ᠨᠤᠲᠤᠭ ᠢ ᠵᠣᠷᠢᠨ ᠠᠶᠠᠯᠠᠭᠰᠠᠭᠠᠷ ᠺᠠᠨᠠᠨ ᠨᠤᠲᠤᠭ ᠲᠤ ᠣᠷᠣᠵᠤ ᠢᠷᠡᠪᠡ᠃ 6 ᠠᠪᠷᠠᠮ ᠲᠡᠷᠡ ᠭᠠᠵᠠᠷ ᠢ ᠲᠤᠭᠤᠯᠤᠨ᠂ ᠱᠧᠺᠧᠮ ᠳᠠᠬᠢ ᠮᠣᠷᠧ ᠶᠢᠨ ᠴᠠᠷᠠᠰᠤᠨ ᠮᠣᠳᠣᠨ ᠳᠤ ᠬᠦᠷᠪᠡ᠃ ᠲᠡᠷᠡ ᠦᠶᠡ ᠳᠦ ᠲᠡᠨᠳᠡ ᠺᠠᠨᠠᠨᠴᠤᠳ ᠪᠠᠢᠵᠠᠢ᠃ 7 ᠶᠣᠬᠣᠸᠠ ᠠᠪᠷᠠᠮ ᠳᠤ ᠦᠵᠡᠭᠳᠡᠨ᠄ 《ᠪᠢ ᠴᠢᠨᠦ ᠦᠷᠡ ᠤᠳᠤᠮ ᠳᠤ ᠡᠨᠡ ᠨᠤᠲᠤᠭ ᠢ ᠥᠭᠭᠥᠨᠡ》 ᠭᠡᠵᠦ ᠠᠢᠯᠠᠳᠪᠠ᠃ ᠠᠪᠷᠠᠮ ᠥᠪᠡᠷ ᠲᠤᠨᠢ ᠦᠵᠡᠭᠳᠡᠭᠰᠡᠨ ᠶᠣᠬᠣᠸᠠ ᠳᠤ ᠵᠣᠷᠢᠭᠤᠯᠤᠨ ᠲᠡᠨᠳᠡ ᠲᠠᠬᠢᠯ ᠤᠨ ᠰᠢᠷᠡᠭᠡ ᠪᠣᠰᠬᠠᠵᠠᠢ᠃ 8 ᠠᠪᠷᠠᠮ ᠲᠡᠨᠳᠡ ᠡᠴᠡ ᠴᠠᠭᠠᠰᠢᠯᠠᠨ ᠪᠧᠲ᠋ᠧᠯ ᠤᠨ ᠵᠡᠭᠦᠨ ᠲᠠᠯᠠ ᠶᠢᠨ ᠠᠭᠤᠯᠠᠨ ᠳᠤ ᠬᠦᠷᠴᠦ ᠮᠠᠢᠬᠠᠨ ᠢᠶᠠᠨ ᠪᠣᠰᠬᠠᠭᠰᠠᠨ ᠪᠠᠢᠯᠠ᠃ ᠥᠷᠥᠨᠡ ᠲᠠᠯᠠ ᠨᠢ ᠪᠧᠲ᠋ᠧᠯ᠂ ᠳᠣᠷᠣᠨᠠ ᠲᠠᠯᠠ ᠨᠢ ᠠᠢ ᠪᠠᠢᠪᠠ᠃ ᠲᠡᠷᠡ ᠲᠡᠨᠳᠡ ᠶᠣᠬᠣᠸᠠ ᠳᠤ ᠵᠣᠷᠢᠭᠤᠯᠤᠨ ᠲᠠᠬᠢᠯ ᠤᠨ ᠰᠢᠷᠡᠭᠡ ᠪᠣᠰᠬᠠᠵᠤ᠂ ᠶᠣᠬᠣᠸᠠ ᠶᠢᠨ ᠨᠡᠷᠡ ᠶᠢ ᠳᠠᠭᠤᠳᠠᠪᠠ᠃ 9 ᠲᠡᠭᠡᠭᠡᠳ ᠠᠪᠷᠠᠮ ᠴᠠᠭᠠᠰᠢᠯᠠᠨ ᠨᠧᠭᠧᠪ 21 ᠲᠡᠰᠢ ᠨᠡᠭᠦᠭᠰᠡᠭᠡᠷ ᠪᠠᠢᠯᠠ᠃
ᠠᠪᠷᠠᠮ ᠶᠧᠵᠢᠫᠲ ᠲᠤ ᠣᠴᠢᠪᠠ
10 ᠬᠠᠷᠢᠨ ᠲᠡᠷᠡ ᠨᠤᠲᠤᠭ ᠲᠤ ᠭᠠᠩ ᠭᠠᠴᠢᠭ ᠪᠣᠯᠵᠠᠢ᠃ ᠲᠡᠷᠡ ᠨᠤᠲᠤᠭ ᠶᠡᠬᠡ ᠭᠠᠩᠳᠠᠭᠰᠠᠨ ᠪᠣᠯᠬᠣᠷ ᠠᠪᠷᠠᠮ ᠶᠧᠵᠢᠫᠲ ᠲᠤ ᠲᠦᠷ ᠰᠠᠭᠤᠬᠤ ᠪᠠᠷ ᠤᠷᠤᠭᠤᠳᠠᠨ ᠶᠠᠪᠤᠪᠠ᠃ 11 ᠶᠧᠵᠢᠫᠲ ᠲᠤ ᠣᠢᠷᠠᠲᠤᠵᠤ ᠣᠴᠢᠬᠤ ᠦᠶᠡ ᠳᠡᠭᠡᠨ ᠠᠪᠷᠠᠮ ᠡᠬᠡᠨᠡᠷ ᠰᠠᠷᠠᠢ ᠳᠠᠭᠠᠨ᠄ 《ᠬᠠᠷᠠ᠂ ᠴᠢ ᠪᠣᠯ ᠦᠨᠡᠬᠡᠷ ᠭᠤᠸᠠ ᠦᠵᠡᠰᠬᠦᠯᠡᠩ ᠪᠦᠰᠡᠭᠦᠢ ᠭᠡᠳᠡᠭ ᠢ ᠪᠢ ᠮᠡᠳᠡᠨᠡ᠃ 12 ᠲᠡᠢᠮᠦ ᠡᠴᠡ ᠶᠧᠵᠢᠫᠲ᠋ᠴᠦᠳ ᠴᠢᠮᠠᠶᠢ ᠦᠵᠡᠪᠡᠯ 〈ᠡᠨᠡ ᠴᠢᠨᠢ ᠲᠡᠷᠡ ᠬᠥᠮᠦᠨ ᠦ ᠡᠬᠡᠨᠡᠷ ᠪᠠᠢᠨᠠ︕〉 ᠭᠡᠳ ᠨᠠᠮᠠᠶᠢ ᠠᠯᠠᠵᠤ᠂ ᠴᠢᠮᠠᠶᠢ ᠠᠮᠢᠳᠤ ᠦᠯᠡᠳᠡᠭᠡᠬᠦ ᠪᠤᠢ᠃ 13 ᠴᠢ ᠥᠪᠡᠷ ᠢ ᠪᠠᠨ ᠮᠢᠨᠦ ᠥᠬᠢᠨ ᠳᠡᠭᠦᠦ ᠭᠡᠵᠦ ᠬᠡᠯᠡᠭᠡᠷᠡᠢ᠃ ᠲᠡᠭᠡᠪᠡᠯ ᠲᠡᠳᠡ ᠴᠢᠨᠦ ᠤᠴᠢᠷ ᠢᠶᠠᠷ ᠨᠠᠳᠠ ᠳᠤ ᠰᠠᠢᠨ ᠬᠠᠨᠳᠤᠨ᠂ ᠪᠢ ᠴᠢᠨᠦ ᠠᠴᠢ ᠪᠠᠷ ᠠᠮᠢᠳᠤ ᠰᠡᠷᠡᠭᠦᠨ ᠪᠠᠢᠬᠤ ᠪᠣᠯᠣᠨᠠ》 ᠭᠡᠵᠡᠢ᠃ 14 ᠠᠪᠷᠠᠮ ᠶᠧᠵᠢᠫᠲ ᠲᠤ ᠣᠷᠣᠬᠤ ᠳᠤ᠂ ᠶᠧᠵᠢᠫᠲ᠋ᠴᠦᠳ ᠲᠡᠷᠡ ᠪᠦᠰᠡᠭᠦᠢ ᠶᠢᠨ ᠦᠨᠡᠬᠡᠷ ᠦᠵᠡᠰᠬᠦᠯᠡᠩ ᠲᠡᠢ ᠪᠠᠢᠭᠠ ᠶᠢ ᠬᠠᠷᠠᠪᠠ᠃ 15 ᠹᠠᠷᠠᠣ᠋ ᠶᠢᠨ ᠲᠦᠰᠢᠮᠡᠳ ᠴᠤ ᠲᠡᠭᠦᠨ ᠢ ᠬᠠᠷᠠᠭᠠᠳ ᠹᠠᠷᠠᠣ᠋ ᠳᠤ ᠮᠠᠭᠲᠠᠵᠠᠢ᠃ ᠲᠡᠭᠡᠭᠡᠳ ᠲᠡᠷᠡ ᠪᠦᠰᠡᠭᠦᠢ ᠹᠠᠷᠠᠣ᠋ ᠶᠢᠨ ᠣᠷᠳᠣᠨ ᠳᠤ ᠬᠦᠷᠭᠡᠭᠳᠡᠵᠡᠢ᠃ 16 ᠹᠠᠷᠠᠣ᠋ ᠲᠡᠷᠡ ᠪᠦᠰᠡᠭᠦᠢ ᠶᠢᠨ ᠤᠴᠢᠷ ᠢᠶᠠᠷ ᠠᠪᠷᠠᠮ ᠳᠤ ᠰᠠᠢᠨ ᠬᠠᠨᠳᠤᠨ᠂ ᠪᠣᠭ ᠮᠠᠯ᠂ ᠦᠬᠡᠷ᠂ ᠡᠷᠡ ᠡᠮᠡ ᠡᠯᠵᠢᠭᠡ ᠨᠦᠭᠦᠳ᠂ ᠪᠣᠭᠣᠯ ᠰᠢᠪᠡᠭᠴᠢᠳ ᠬᠢᠭᠡᠳ ᠲᠡᠮᠡᠭᠡᠳ ᠥᠭᠴᠡᠢ᠃
17 ᠬᠠᠷᠢᠨ ᠠᠪᠷᠠᠮ ᠤᠨ ᠡᠬᠡᠨᠡᠷ ᠰᠠᠷᠠᠢ ᠶᠢᠨ ᠤᠯᠠᠮ ᠢᠶᠠᠷ ᠶᠣᠬᠣᠸᠠ ᠹᠠᠷᠠᠣ᠋ ᠬᠢᠭᠡᠳ ᠲᠡᠭᠦᠨ ᠦ ᠭᠡᠷ ᠪᠦᠯᠢ ᠶᠢᠨ ᠬᠢᠨ ᠢ ᠬᠦᠨᠳᠦ ᠡᠪᠡᠳᠴᠢᠨ ᠵᠣᠪᠠᠯᠠᠩ ᠢᠶᠠᠷ ᠴᠣᠬᠢᠪᠠ᠃ 18 ᠹᠠᠷᠠᠣ᠋ ᠠᠪᠷᠠᠮ ᠢ ᠳᠠᠭᠤᠳᠠᠵᠤ᠄ 《ᠨᠠᠳᠠ ᠳᠤ ᠶᠠᠭᠤ ᠬᠢᠵᠦ ᠪᠠᠢᠭᠠ ᠴᠢᠨᠢ ᠡᠨᠡ ᠪᠤᠢ︖ ᠴᠢ ᠶᠠᠭᠤᠨ ᠳᠤ ᠲᠡᠭᠦᠨ ᠢ ᠡᠬᠡᠨᠡᠷ ᠢᠶᠡᠨ ᠭᠡᠵᠦ ᠨᠠᠳᠠ ᠳᠤ ᠬᠡᠯᠡᠭᠰᠡᠨ ᠦᠭᠡᠢ ᠪᠤᠢ︖ 19 ᠴᠢ ᠶᠠᠭᠤᠨ ᠳᠤ᠄ 〈ᠲᠡᠷᠡ ᠮᠢᠨᠦ ᠥᠬᠢᠨ ᠳᠡᠭᠦᠦ〉 ᠭᠡᠵᠦ ᠬᠡᠯᠡᠭᠰᠡᠨ ᠶᠤᠮ ᠪᠤᠢ︖ ᠲᠡᠭᠡᠭᠰᠡᠨ ᠢᠶᠡᠷ ᠪᠢ ᠲᠡᠭᠦᠨ ᠢ ᠡᠬᠡᠨᠡᠷ ᠢᠶᠡᠨ ᠪᠣᠯᠭᠠᠬᠤ ᠪᠠᠷ ᠠᠪᠴᠢᠷᠠᠭᠰᠠᠨ᠃ ᠬᠠᠷᠠ᠂ ᠡᠬᠡᠨᠡᠷ ᠴᠢᠨᠢ ᠡᠨᠡ ᠪᠠᠢᠨᠠ᠂ ᠣᠳᠣ ᠲᠡᠭᠦᠨ ᠢ ᠪᠠᠨ ᠠᠪᠤᠭᠠᠳ ᠶᠠᠪᠤ》 ᠭᠡᠪᠡ᠃ 20 ᠹᠠᠷᠠᠣ᠋ ᠬᠥᠮᠦᠰ ᠲᠡᠭᠡᠨ ᠲᠤᠰᠢᠶᠠᠭᠰᠠᠨ ᠳᠤ᠂ ᠲᠡᠳᠡ ᠠᠪᠷᠠᠮ ᠪᠣᠯᠣᠨ ᠡᠬᠡᠨᠡᠷ ᠢ ᠨᠢ ᠬᠠᠮᠤᠭ ᠡᠳ᠋ ᠶᠠᠭᠤᠮᠠᠰ ᠲᠠᠢ ᠨᠢ ᠶᠠᠪᠤᠭᠤᠯᠪᠠ᠃