ᠡᠬᠢᠯᠡᠯ ᠳᠥᠴᠢᠨ ᠲᠠᠪᠤ
ᠶᠣᠰᠧᠹ ᠥᠪᠡᠷ ᠢ ᠪᠠᠨ ᠲᠠᠨᠢᠭᠤᠯᠪᠠ
1 ᠶᠣᠰᠧᠹ ᠬᠠᠵᠠᠭᠤ ᠳᠠᠭᠠᠨ ᠵᠣᠭᠰᠣᠵᠤ ᠪᠠᠢᠭᠠ ᠪᠦᠬᠦ ᠵᠠᠷᠤᠴᠠ ᠶᠢᠨ ᠢᠶᠠᠨ ᠡᠮᠦᠨᠡ ᠰᠡᠳᠬᠢᠯ ᠢᠶᠠᠨ ᠪᠠᠷᠢᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠣᠭᠠᠳ᠄ 《ᠪᠦᠭᠦᠳᠡᠭᠡᠷ ᠢᠶᠡᠨ ᠨᠠᠳᠠ ᠠᠴᠠ ᠵᠠᠢᠯᠠ︕》 ᠭᠡᠵᠦ ᠬᠠᠰᠬᠢᠷᠴᠠᠢ᠃ ᠡᠢᠮᠦ ᠡᠴᠡ ᠶᠣᠰᠧᠹ ᠠᠬᠠ ᠳᠡᠭᠦᠦ ᠨᠠᠷ ᠲᠡᠭᠡᠨ ᠥᠪᠡᠷ ᠢ ᠪᠠᠨ ᠲᠠᠨᠢᠭᠤᠯᠬᠤ ᠳᠤ᠂ ᠲᠡᠭᠦᠨ ᠦ ᠬᠠᠮᠲᠤ ᠥᠭᠡᠷᠡ ᠬᠥᠮᠦᠨ ᠪᠠᠢᠭᠰᠠᠨ ᠦᠭᠡᠢ᠃ 2 ᠶᠣᠰᠧᠹ ᠴᠢᠩᠭ᠍ᠠ ᠪᠠᠷ ᠤᠬᠢᠯᠠᠪᠠ᠃ ᠡᠭᠦᠨ ᠢ ᠶᠧᠵᠢᠫᠲ᠋ᠴᠦᠳ ᠰᠣᠨᠣᠰᠣᠭᠰᠠᠨ ᠪᠥᠭᠡᠳ ᠹᠠᠷᠠᠣ᠋ ᠶᠢᠨ ᠣᠷᠳᠣᠨ ᠤ ᠬᠢᠨ ᠴᠤ ᠰᠣᠨᠣᠰᠴᠠᠢ᠃ 3 ᠶᠣᠰᠧᠹ ᠠᠬᠠ ᠳᠡᠭᠦᠦ ᠨᠠᠷ ᠲᠡᠭᠡᠨ᠄ 《ᠪᠢ ᠶᠣᠰᠧᠹ ᠪᠠᠢᠨᠠ᠃ ᠠᠪᠤ ᠮᠢᠨᠢ ᠣᠳᠣ ᠬᠦᠷᠲᠡᠯᠡ ᠠᠮᠢᠳᠤ ᠰᠡᠷᠡᠭᠦᠨ ᠪᠠᠢᠨᠠ ᠤᠤ︖》 ᠭᠡᠰᠡᠨ ᠳᠦ᠂ ᠠᠬᠠ ᠳᠡᠭᠦᠦ ᠨᠠᠷ ᠨᠢ ᠲᠡᠭᠦᠨ ᠡᠴᠡ ᠠᠶᠤᠵᠤ ᠵᠢᠷᠦᠬᠡᠰᠢᠶᠡᠭᠰᠡᠨ ᠡᠴᠡ ᠪᠣᠯᠣᠭᠠᠳ ᠬᠠᠷᠢᠭᠤᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃
4 ᠶᠣᠰᠧᠹ ᠠᠬᠠ ᠨᠠᠷ ᠲᠠᠭᠠᠨ᠄ 《ᠨᠠᠳᠠ ᠤᠷᠤᠭᠤ ᠣᠢᠷᠠᠲᠤᠵᠠᠭᠠᠨᠠ ᠤᠤ︖》 ᠭᠡᠰᠡᠨ ᠢᠶᠡᠨ ᠲᠡᠳᠡ ᠣᠢᠷᠠᠲᠤᠨ ᠣᠴᠢᠬᠤ ᠳᠤ᠂ ᠲᠡᠷᠡ᠄ 《ᠪᠢ ᠪᠣᠯ ᠶᠣᠰᠧᠹ᠂ ᠲᠠ ᠨᠠᠷ ᠤᠨ ᠶᠧᠵᠢᠫᠲ ᠤᠷᠤᠭᠤ ᠬᠤᠳᠠᠯᠳᠤᠭᠰᠠᠨ ᠲᠡᠷᠡ ᠳᠡᠭᠦᠦ ᠴᠢᠨᠢ ᠪᠠᠢᠨᠠ᠃ 5 ᠲᠠ ᠨᠠᠷ ᠨᠠᠮᠠᠶᠢ ᠨᠠᠰᠢ ᠬᠤᠳᠠᠯᠳᠤᠭᠰᠠᠨ ᠳᠠᠭᠠᠨ ᠪᠦᠦ ᠰᠠᠨᠠᠭᠠ ᠵᠣᠪᠠ᠂ ᠥᠪᠡᠷᠰᠡᠳ ᠢ ᠪᠠᠨ ᠪᠦᠦ ᠵᠢᠮᠡᠯᠡ᠃ ᠪᠤᠷᠬᠠᠨ ᠲᠠ ᠨᠠᠷ ᠠᠴᠠ ᠡᠮᠦᠨᠡ ᠨᠠᠮᠠᠶᠢ ᠢᠯᠡᠭᠡᠭᠰᠡᠨ ᠨᠢ ᠠᠮᠢ ᠠᠪᠤᠷᠠᠬᠤ ᠶᠢᠨ ᠲᠤᠯᠠᠳᠠ ᠶᠤᠮ᠃ 6 ᠭᠠᠵᠠᠷ ᠨᠤᠲᠤᠭ ᠳᠠᠶᠠᠭᠠᠷ ᠥᠯᠥᠰᠬᠥᠯᠡᠩ ᠲᠣᠬᠢᠶᠠᠯᠳᠤᠭᠠᠳ ᠬᠣᠶᠠᠷ ᠵᠢᠯ ᠪᠣᠯᠣᠯᠠ᠃ ᠣᠳᠣ ᠪᠠᠰᠠ ᠲᠠᠪᠤᠨ ᠵᠢᠯ ᠦᠷᠭᠦᠯᠵᠢᠯᠡᠨ ᠭᠠᠵᠠᠷ ᠬᠠᠭᠠᠯᠵᠤ ᠴᠢᠳᠠᠬᠤ ᠦᠭᠡᠢ᠂ ᠤᠷᠭᠤᠴᠠ ᠬᠤᠷᠢᠶᠠᠵᠤ ᠴᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠬᠤ ᠪᠣᠯᠣᠨᠠ᠃ 7 ᠪᠤᠷᠬᠠᠨ ᠲᠠ ᠨᠠᠷ ᠢ ᠭᠠᠵᠠᠷ ᠳᠡᠭᠡᠷᠡ ᠦᠯᠡᠳᠡᠭᠡᠵᠦ᠂ ᠶᠡᠬᠡ ᠠᠪᠤᠷᠠᠯ ᠢᠶᠠᠷ ᠢᠶᠠᠨ ᠲᠠ ᠨᠠᠷ ᠲᠤ ᠠᠮᠢ ᠥᠭᠬᠦ ᠶᠢᠨ ᠲᠤᠯᠠᠳᠠ ᠲᠠ ᠨᠠᠷ ᠠᠴᠠ ᠡᠮᠦᠨᠡ ᠨᠠᠮᠠᠶᠢ ᠢᠯᠡᠭᠡᠵᠡᠢ᠃ 8 ᠲᠡᠢᠮᠦ ᠡ᠂ ᠲᠠ ᠨᠠᠷ ᠪᠢᠰᠢ᠂ ᠬᠠᠷᠢᠨ ᠪᠤᠷᠬᠠᠨ ᠨᠠᠮᠠᠶᠢ ᠡ᠊ᠨᠳᠡ ᠢᠯᠡᠭᠡᠭᠰᠡᠨ ᠶᠤᠮ᠃ ᠲᠡᠭᠡᠭᠡᠳ ᠪᠤᠷᠬᠠᠨ ᠨᠠᠮᠠᠶᠢ ᠹᠠᠷᠠᠣ᠋ ᠶᠢᠨ ᠡᠴᠢᠭᠡ᠂ ᠲᠡᠭᠦᠨ ᠦ ᠪᠦᠬᠦ ᠭᠡᠷ ᠦᠨ ᠡᠵᠡᠨ᠂ ᠶᠧᠵᠢᠫᠲ ᠤᠨ ᠪᠦᠬᠦ ᠨᠤᠲᠤᠭ ᠤᠨ ᠵᠠᠬᠢᠷᠤᠭᠴᠢ ᠪᠣᠯᠭᠠᠭᠰᠠᠨ᠃ 9 ᠲᠠ ᠨᠠᠷ ᠠᠪᠤ ᠳᠡᠭᠡᠷᠡ ᠮᠢᠨᠢ ᠳᠠᠷᠤᠢᠬᠠᠨ ᠣᠴᠢᠵᠤ᠂ ᠲᠡᠭᠦᠨ ᠳᠦ ᠲᠠᠨ ᠤ ᠬᠦᠦ ᠶᠣᠰᠧᠹ ᠢᠩᠭᠢᠵᠦ ᠬᠡᠯᠡᠪᠡ᠄ 〈ᠪᠤᠷᠬᠠᠨ ᠲᠠᠨ ᠤ ᠬᠦᠦ ᠶᠣᠰᠧᠹ ᠢ ᠪᠦᠬᠦ ᠶᠧᠵᠢᠫᠲ ᠤᠨ ᠡᠵᠡᠨ ᠪᠣᠯᠭᠠᠵᠠᠢ᠃ ᠲᠠ ᠨᠠᠳᠠ ᠤᠷᠤᠭᠤ ᠰᠠᠭᠠᠲᠠᠯ ᠦᠭᠡᠢ ᠢᠷᠡᠭᠡᠷᠡᠢ᠃ 10 ᠲᠠ ᠭᠣᠱᠧᠨ ᠨᠤᠲᠤᠭ ᠲᠤ ᠰᠠᠭᠤᠷᠢᠰᠢᠵᠤ ᠦᠷᠡ ᠬᠡᠦᠬᠡᠳ᠂ ᠠᠴᠢ ᠵᠢᠭᠡ ᠨᠠᠷ᠂ ᠮᠠᠯ ᠰᠦᠷᠦᠭ᠂ ᠪᠦᠬᠦ ᠡᠳ᠋ ᠬᠥᠷᠥᠩᠭᠡ ᠶᠢᠨ ᠢᠶᠠᠨ ᠬᠠᠮᠲᠤ ᠨᠠᠳᠠ ᠲᠠᠢ ᠣᠢᠷᠠᠬᠠᠨ ᠠᠮᠢᠳᠤᠷᠠᠭᠠᠷᠠᠢ᠃ 11 ᠪᠢ ᠲᠠᠨ ᠢ ᠡ᠊ᠨᠳᠡ ᠲᠡᠳᠬᠦᠶᠡ᠃ ᠡᠭᠦᠨ ᠡᠴᠡ ᠬᠣᠢᠰᠢ ᠥᠯᠥᠰᠬᠥᠯᠡᠩ ᠭᠠᠴᠢᠭ ᠳᠠᠬᠢᠨ ᠲᠠᠪᠤᠨ ᠵᠢᠯ ᠦᠷᠭᠦᠯᠵᠢᠯᠡᠬᠦ ᠤᠴᠢᠷ ᠲᠠ ᠪᠣᠯᠣᠨ ᠲᠠᠨ ᠤ ᠭᠡᠷ ᠦᠨ ᠬᠢᠨ᠂ ᠲᠠᠨ ᠤ ᠪᠦᠬᠦ ᠬᠠᠷᠢᠶᠠᠲᠤ ᠨᠠᠷ ᠶᠠᠳᠠᠭᠤᠷᠠᠵᠤ ᠬᠣᠭᠣᠰᠣᠷᠠᠬᠤ ᠪᠣᠯᠣᠭᠤᠵᠠᠢ〉 ᠭᠡᠭᠡᠷᠡᠢ᠃ 12 ᠵᠠ ᠣᠳᠣ ᠲᠠ ᠨᠠᠷ ᠴᠤ᠂ ᠮᠢᠨᠦ ᠳᠡᠭᠦᠦ ᠪᠢᠨᠶᠠᠮᠢᠨ ᠴᠤ ᠥᠪᠡᠷᠰᠡᠳ ᠦᠨ ᠢᠶᠠᠨ ᠨᠢᠳᠦ ᠪᠡᠷ ᠬᠠᠷᠠᠵᠤ ᠪᠠᠢᠨᠠ᠃ ᠦᠨᠡᠬᠡᠷ ᠪᠢ ᠥᠪᠡᠷ ᠢᠶᠡᠨ ᠲᠠ ᠨᠠᠷ ᠲᠤ ᠶᠠᠷᠢᠵᠤ ᠪᠠᠢᠨᠠ᠃ 13 ᠶᠧᠵᠢᠫᠲ ᠲᠤ ᠣᠯᠣᠭᠰᠠᠨ ᠮᠢᠨᠦ ᠪᠦᠬᠦ ᠠᠯᠳᠠᠷ ᠬᠦᠨᠳᠦ ᠶᠢᠨ ᠲᠤᠬᠠᠢ ᠪᠣᠯᠣᠨ ᠡ᠊ᠨᠳᠡ ᠦᠵᠡᠵᠦ ᠬᠠᠷᠠᠭᠰᠠᠨ ᠪᠦᠬᠦᠨ ᠢᠶᠡᠨ ᠡᠴᠢᠭᠡ ᠳᠦ ᠮᠢᠨᠢ ᠬᠡᠯᠡᠭᠡᠷᠡᠢ᠃ ᠲᠡᠭᠡᠭᠡᠳ ᠠᠪᠤ ᠶᠢ ᠮᠢᠨᠢ ᠡ᠊ᠨᠳᠡ ᠳᠠᠷᠤᠢᠬᠠᠨ ᠠᠪᠴᠢᠷᠠ》 ᠭᠡᠵᠡᠢ᠃ 14 ᠲᠡᠷᠡ ᠳᠡᠭᠦᠦ ᠪᠢᠨᠶᠠᠮᠢᠨ ᠤ ᠪᠠᠨ ᠬᠦᠵᠦᠭᠦᠦ ᠪᠡᠷ ᠲᠡᠪᠡᠷᠢᠨ ᠤᠬᠢᠯᠠᠬᠤ ᠳᠤ᠂ ᠪᠢᠨᠶᠠᠮᠢᠨ ᠴᠤ ᠲᠡᠭᠦᠨ ᠦ ᠬᠦᠵᠦᠭᠦᠦ ᠪᠡᠷ ᠲᠡᠪᠡᠷᠢᠨ ᠤᠬᠢᠯᠠᠪᠠ᠃ 15 ᠶᠣᠰᠧᠹ ᠪᠠᠰᠠ ᠠᠬᠠ ᠨᠠᠷ ᠢᠶᠠᠨ ᠨᠢᠭᠡ ᠨᠢᠭᠡ ᠪᠡᠷ ᠦᠨᠦᠰᠦᠭᠡᠳ᠂ ᠲᠡᠪᠡᠷᠢᠵᠦ ᠤᠬᠢᠯᠠᠪᠠ᠃ ᠲᠡᠭᠡᠭᠡᠳ ᠯᠠ ᠠᠬᠠ ᠨᠠᠷ ᠨᠢ ᠲᠡᠭᠦᠨ ᠲᠡᠢ ᠶᠠᠷᠢᠯᠴᠠᠵᠤ ᠡᠬᠢᠯᠡᠪᠡ᠃
16 ᠶᠣᠰᠧᠹ ᠤᠨ ᠠᠬᠠ ᠨᠠᠷ ᠤᠨ ᠢᠷᠡᠭᠰᠡᠨ ᠰᠤᠷᠠᠭ ᠹᠠᠷᠠᠣ᠋ ᠶᠢᠨ ᠣᠷᠳᠣᠨ ᠳᠤ ᠰᠣᠨᠣᠰᠳᠠᠬᠤ ᠳᠤ᠂ ᠹᠠᠷᠠᠣ᠋ ᠴᠤ᠂ ᠲᠡᠭᠦᠨ ᠦ ᠲᠦᠰᠢᠮᠡᠳ ᠴᠤ ᠪᠠᠶᠠᠷᠯᠠᠵᠠᠭᠠᠪᠠ᠃ 17 ᠹᠠᠷᠠᠣ᠋ ᠶᠣᠰᠧᠹ ᠲᠤ᠄ 《ᠠᠬᠠ ᠳᠡᠭᠦᠦ ᠨᠠᠷ ᠲᠡᠭᠡᠨ ᠬᠡᠯᠡ᠃ ᠡᠭᠦᠨ ᠢ ᠦᠢᠯᠡᠳᠴᠡᠭᠡ᠂ ᠲᠠ ᠨᠠᠷ ᠮᠠᠯ ᠤᠨᠤᠭᠠ ᠪᠠᠨ ᠠᠴᠢᠶᠠᠯᠠᠨ ᠬᠥᠳᠡᠯᠵᠦ᠂ ᠺᠠᠨᠠᠨ ᠨᠤᠲᠤᠭ ᠲᠠᠭᠠᠨ ᠣᠴᠢᠭᠠᠳ 18 ᠡᠴᠢᠭᠡ ᠪᠣᠯᠣᠨ ᠭᠡᠷ ᠣᠷᠣᠨ ᠤ ᠬᠢᠨ ᠢᠶᠠᠨ ᠳᠠᠭᠠᠭᠤᠯᠤᠨ ᠨᠠᠳᠠ ᠤᠷᠤᠭᠤ ᠢᠷᠡ᠃ ᠪᠢ ᠲᠠ ᠨᠠᠷ ᠲᠤ ᠶᠧᠵᠢᠫᠲ ᠤᠨ ᠬᠠᠮᠤᠭ ᠤᠨ ᠰᠠᠢᠨ ᠭᠠᠵᠠᠷ ᠢ ᠥᠭᠭᠥᠨᠡ᠃ ᠲᠠ ᠨᠠᠷ ᠲᠡᠷᠡ ᠨᠤᠲᠤᠭ ᠤᠨ ᠣᠬᠢ ᠶᠢ ᠢᠳᠡᠬᠦ ᠪᠣᠯᠣᠨᠠ᠃ 19 ᠲᠠ᠄ 〈ᠲᠠ ᠨᠠᠷ ᠡᠢᠨ ᠬᠦ ᠦᠢᠯᠡᠳ᠂ ᠡᠬᠡᠨᠡᠷ ᠬᠡᠦᠬᠡᠳ ᠤᠳ ᠢᠶᠠᠨ ᠰᠠᠭᠤᠯᠭᠠᠬᠤ ᠬᠥᠰᠬᠡ ᠲᠡᠷᠭᠡ ᠨᠦᠭᠦᠳ ᠢ ᠶᠧᠵᠢᠫᠲ ᠡᠴᠡ ᠠᠪ᠂ ᠠᠪᠤ ᠶᠢ ᠴᠤ ᠰᠠᠭᠤᠯᠭᠠᠭᠠᠳ ᠢᠷᠡᠭᠡᠷᠡᠢ᠃ 20 ᠶᠧᠵᠢᠫᠲ ᠨᠤᠲᠤᠭ ᠤᠨ ᠬᠠᠮᠤᠭ ᠤᠨ ᠰᠠᠢᠨ ᠰᠠᠢᠬᠠᠨ ᠨᠢ ᠲᠠ ᠨᠠᠷ ᠤᠨ ᠬᠢ᠂ ᠲᠠ ᠨᠠᠷ ᠡᠳ᠋ ᠬᠥᠷᠥᠩᠭᠡ ᠳᠡᠭᠡᠨ ᠰᠠᠨᠠᠭᠠ ᠪᠣᠯᠬᠤ ᠬᠡᠷᠡᠭ ᠦᠭᠡᠢ〉 ᠭᠡᠵᠦ ᠵᠠᠬᠢᠭᠠᠷᠠᠢ︕》 ᠭᠡᠪᠡ᠃
21 ᠢᠰᠷᠧᠯ ᠤᠨ ᠬᠥᠪᠡᠭᠦᠳ ᠲᠡᠭᠦᠨ ᠦ ᠦᠭᠡ ᠶᠢ ᠳᠠᠭᠠᠵᠠᠢ᠃ ᠶᠣᠰᠧᠹ ᠹᠠᠷᠠᠣ᠋ ᠶᠢᠨ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠲᠡᠳᠡᠨ ᠳᠦ ᠬᠥᠰᠬᠡ ᠲᠡᠷᠭᠡ ᠨᠦᠭᠦᠳ ᠥᠭᠭᠥᠭᠰᠡᠨ ᠪᠥᠭᠡᠳ ᠵᠠᠮ ᠤᠨ ᠬᠦᠨᠡᠰᠦ ᠴᠤ ᠥᠭᠴᠦ᠂ 22 ᠬᠥᠮᠦᠨ ᠪᠦᠷᠢ ᠳᠤ ᠨᠢᠵᠡᠭᠡᠳ ᠰᠢᠨᠡ ᠬᠤᠪᠴᠠᠰᠤ ᠥᠭᠭᠥᠭᠰᠡᠨ ᠪᠠᠢᠨᠠ᠃ ᠬᠠᠷᠢᠨ ᠪᠢᠨᠶᠠᠮᠢᠨ ᠳᠤ ᠲᠡᠷᠡ ᠭᠤᠷᠪᠠᠨ ᠵᠠᠭᠤᠨ ᠱᠧᠺᠧᠯ 76 ᠮᠥᠩᠭᠥ᠂ ᠲᠠᠪᠤᠨ ᠵᠠᠬᠠ ᠬᠤᠪᠴᠠᠰᠤ ᠥᠭᠴᠡᠢ᠃ 23 ᠡᠴᠢᠭᠡ ᠲᠡᠭᠡᠨ ᠴᠤ ᠲᠡᠷᠡ ᠶᠧᠵᠢᠫᠲ ᠤᠨ ᠬᠠᠮᠤᠭ ᠤᠨ ᠰᠠᠢᠨ ᠡᠳ᠋ ᠪᠠᠷᠠᠭᠠ ᠠᠴᠢᠭᠰᠠᠨ ᠠᠷᠪᠠᠨ ᠡᠯᠵᠢᠭᠡ ᠬᠢᠭᠡᠳ ᠲᠡᠭᠦᠨ ᠦ ᠢᠷᠡᠬᠦ ᠵᠠᠮ ᠳᠤ ᠢᠳᠡᠬᠦ ᠠᠮᠤ ᠬᠦᠨᠡᠰᠦ᠂ ᠪᠣᠣᠪᠣ ᠪᠣᠯᠣᠨ ᠢᠳᠡᠭᠡᠨ ᠠᠴᠢᠭᠰᠠᠨ ᠥᠭᠡᠷᠡ ᠠᠷᠪᠠᠨ ᠡᠮᠡ ᠡᠯᠵᠢᠭᠡ ᠢᠯᠡᠭᠡᠵᠡᠢ᠃ 24 ᠲᠡᠷᠡ ᠠᠬᠠ ᠨᠠᠷ ᠢᠶᠠᠨ ᠦᠳᠡᠨ ᠭᠠᠷᠭᠠᠬᠤ ᠳᠠᠭᠠᠨ᠄ 《ᠵᠠᠮ ᠳᠠᠭᠠᠨ ᠪᠢᠲᠡᠭᠡᠢ ᠰᠠᠨᠠᠭᠠ ᠵᠣᠪᠠ 77 》 ᠭᠡᠵᠦ ᠬᠡᠯᠡᠪᠡ᠃
25 ᠡᠢᠨ ᠬᠦ ᠲᠡᠳᠡ ᠶᠧᠵᠢᠫᠲ ᠡᠴᠡ ᠭᠠᠷᠴᠤ᠂ ᠺᠠᠨᠠᠨ ᠨᠤᠲᠤᠭ ᠲᠤ ᠬᠦᠷᠴᠦ ᠡᠴᠢᠭᠡ ᠶᠠᠺᠣᠪ ᠤᠨ ᠳᠠᠭᠠᠨ ᠢᠷᠡᠵᠡᠢ᠃ 26 ᠲᠡᠳᠡ ᠡᠴᠢᠭᠡ ᠳᠡᠭᠡᠨ᠄ 《ᠶᠣᠰᠧᠹ ᠣᠳᠣ ᠴᠤ ᠠᠮᠢᠳᠤ ᠪᠠᠢᠨᠠ᠃ ᠲᠡᠷᠡ ᠶᠧᠵᠢᠫᠲ ᠤᠨ ᠪᠦᠬᠦ ᠨᠤᠲᠤᠭ ᠤᠨ ᠵᠠᠬᠢᠷᠤᠭᠴᠢ ᠪᠣᠯᠣᠭᠰᠠᠨ ᠰᠢᠦ︕》 ᠭᠡᠰᠡᠨ ᠳᠦ᠂ ᠶᠠᠺᠣᠪ ᠭᠠᠢᠬᠠᠨ ᠮᠡᠯᠡᠷᠡᠵᠦ᠂ ᠲᠡᠳᠡᠨ ᠳᠦ ᠢᠲᠡᠭᠡᠭᠰᠡᠨ ᠦᠭᠡᠢ᠃ 27 ᠡᠢᠮᠦ ᠡᠴᠡ ᠲᠡᠳᠡ ᠶᠣᠰᠧᠹ ᠤᠨ ᠥᠪᠡᠷᠰᠡᠳ ᠲᠤᠨᠢ ᠬᠡᠯᠡᠭᠰᠡᠨ ᠪᠦᠬᠦ ᠦᠭᠡ ᠶᠢ ᠲᠡᠭᠦᠨ ᠳᠦ ᠬᠡᠯᠡᠵᠦ ᠥᠭᠪᠡ᠃ ᠲᠡᠷᠡ ᠥᠪᠡᠷ ᠢ ᠨᠢ ᠰᠠᠭᠤᠯᠭᠠᠵᠤ ᠠᠪᠠᠴᠢᠬᠤ ᠪᠠᠷ ᠢᠯᠡᠭᠡᠭᠰᠡᠨ ᠬᠥᠰᠬᠡ ᠲᠡᠷᠭᠡ ᠨᠦᠭᠦᠳ ᠢ ᠬᠠᠷᠠᠯᠠ᠃ ᠲᠡᠭᠡᠭᠡᠳ ᠡᠴᠢᠭᠡ ᠶᠠᠺᠣᠪ ᠤᠨ ᠬᠢᠨᠢ ᠰᠦᠨᠡᠰᠦ ᠰᠡᠷᠭᠦᠭᠰᠡᠨ ᠪᠠᠢᠯᠠ᠃ 28 ᠢᠰᠷᠧᠯ᠄ 《ᠵᠠ ᠵᠠ᠂ ᠮᠢᠨᠦ ᠬᠦᠦ ᠶᠣᠰᠧᠹ ᠣᠳᠣ ᠠᠮᠢᠳᠤ ᠪᠠᠢᠭᠠ ᠶᠤᠮ ᠪᠠᠢᠨᠠ᠃ ᠪᠢ ᠦᠬᠦᠬᠦ ᠡᠴᠡ ᠪᠡᠨ ᠡᠮᠦᠨᠡ ᠣᠴᠢᠵᠤ ᠲᠡᠭᠦᠨ ᠢ ᠦᠵᠡᠶᠡ》 ᠭᠡᠵᠡᠢ᠃