ᠡᠬᠢᠯᠡᠯ ᠠᠷᠪᠠ ᠶᠢᠰᠦ
ᠰᠣᠳᠣᠮ ᠭᠣᠮᠣᠷᠠ ᠶᠢᠨ ᠰᠥᠨᠥᠯ
1 ᠬᠣᠶᠠᠷ ᠲᠩᠷᠢ ᠡᠯᠴᠢ ᠰᠣᠳᠣᠮ ᠤᠨ ᠬᠠᠭᠠᠯᠭᠠᠨ ᠳᠤ ᠦᠳᠡᠰᠢ ᠪᠠᠷ ᠢᠷᠡᠵᠡᠢ᠃ ᠲᠡᠷᠡ ᠴᠠᠭ ᠲᠤ ᠯᠣᠲ ᠰᠣᠳᠣᠮ ᠳᠤ ᠣᠷᠣᠬᠤ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠰᠠᠭᠤᠵᠤ ᠪᠠᠢᠯᠠ᠃ ᠯᠣᠲ ᠲᠡᠳᠡᠨ ᠢ ᠬᠠᠷᠠᠭᠠᠳ ᠵᠣᠭᠰᠣᠵᠤ ᠲᠡᠳᠡᠨ ᠲᠡᠢ ᠠᠭᠤᠯᠵᠠᠭᠠᠳ᠂ ᠨᠢᠭᠤᠷ ᠢᠶᠠᠨ ᠭᠠᠵᠠᠷ ᠲᠤ ᠬᠦᠷᠭᠡᠨ ᠪᠥᠬᠥᠢᠨ ᠮᠥᠷᠭᠥᠪᠡ᠃ 2 ᠲᠡᠷᠡ ᠪᠡᠷ᠄ 《ᠡᠵᠡᠨᠲᠡᠨ ᠨᠦᠭᠦᠳ ᠮᠢᠨᠢ ᠡ︕ ᠵᠠᠮ ᠠᠴᠠ ᠪᠠᠨ ᠡᠷᠭᠢᠵᠦ ᠵᠠᠷᠤᠴᠠ ᠶᠢᠨ ᠢᠶᠠᠨ ᠭᠡᠷ ᠢᠶᠡᠷ ᠣᠷᠣᠨᠠ ᠤᠤ︖ ᠲᠠ ᠨᠠᠷ ᠬᠥᠯ ᠢᠶᠡᠨ ᠤᠬᠢᠶᠠᠵᠤ ᠬᠣᠨᠣᠭᠠᠳ᠂ ᠮᠠᠷᠭᠠᠰᠢ ᠥᠷᠯᠥᠭᠡ ᠡᠷᠲᠡ ᠪᠣᠰᠴᠤ᠂ ᠠᠶᠠᠨ ᠵᠠᠮ ᠳᠠᠭᠠᠨ ᠭᠠᠷᠴᠤ ᠪᠣᠯᠣᠨᠠ ᠰᠢᠦ》 ᠭᠡᠰᠡᠨ ᠳᠦ᠂ ᠲᠡᠳᠡ᠄ 《ᠦᠭᠡᠢ᠂ ᠪᠢᠳᠡ ᠭᠠᠳᠠᠨᠠ ᠲᠠᠯᠠᠪᠠᠢ ᠳᠤ ᠬᠣᠨᠣᠨᠠ》 ᠭᠡᠪᠡ᠃ 3 ᠯᠣᠲ ᠬᠠᠷᠢᠨ ᠲᠡᠳᠡᠨ ᠡᠴᠡ ᠬᠦᠴᠦᠯᠡᠨ ᠭᠤᠶᠤᠭᠰᠠᠨ ᠳᠤ᠂ ᠲᠡᠳᠡ ᠵᠠᠮ ᠠᠴᠠ ᠪᠠᠨ ᠡᠷᠭᠢᠨ ᠲᠡᠭᠦᠨ ᠦ ᠭᠡᠷ ᠲᠦ ᠣᠷᠣᠵᠠᠢ᠃ ᠯᠣᠲ ᠲᠡᠳᠡᠨ ᠳᠦ ᠬᠣᠭᠣᠯᠠ ᠤᠮᠳᠠ ᠪᠡᠯᠡᠳᠬᠡᠨ᠂ ᠢᠰᠭᠡᠭᠡ ᠦᠭᠡᠢ ᠲᠠᠯᠬᠠ ᠪᠠᠷᠢᠵᠤ ᠥᠭᠭᠥᠭᠰᠡᠨ ᠳᠦ ᠲᠡᠳᠡ ᠢᠳᠡᠵᠡᠭᠡᠪᠡ᠃ 4 ᠲᠡᠳᠡᠨ ᠢ ᠬᠡᠪᠲᠡᠬᠦ ᠶᠢᠨ ᠡᠮᠦᠨᠡ ᠲᠡᠷᠡ ᠬᠣᠲᠠ ᠶᠢᠨ ᠬᠢᠨ ᠪᠤᠶᠤ ᠰᠣᠳᠣᠮ ᠤᠨ ᠬᠢᠨ᠂ ᠬᠥᠭᠰᠢᠨ ᠵᠠᠯᠠᠭᠤ ᠦᠢ ᠣᠯᠠᠨ ᠢᠶᠠᠷ ᠢᠶᠠᠨ ᠳᠥᠷᠪᠡᠨ ᠵᠦᠭ ᠡᠴᠡ ᠴᠤᠭᠯᠠᠷᠠᠨ ᠪᠦᠭᠦᠳᠡᠭᠡᠷ ᠭᠡᠷ ᠢ ᠨᠢ ᠪᠦᠰᠡᠯᠡᠵᠦ᠂ 5 ᠯᠣᠲ ᠢ ᠳᠠᠭᠤᠳᠠᠨ ᠲᠡᠭᠦᠨ ᠳᠦ᠄ 《ᠡᠨᠡ ᠰᠥᠨᠢ ᠲᠠᠨ ᠤ ᠳᠤ ᠢᠷᠡᠭᠰᠡᠨ ᠬᠥᠮᠦᠰ ᠬᠠᠮᠢᠭᠠ ᠪᠠᠢᠨᠠ ᠪᠤᠢ︖ ᠲᠡᠳᠡᠨ ᠢ ᠪᠢᠳᠡᠨ ᠳᠦ ᠭᠠᠷᠭᠠᠵᠤ ᠢᠷᠡ᠂ ᠪᠢᠳᠡ ᠲᠡᠳᠡᠨ ᠲᠡᠢ ᠬᠤᠷᠢᠴᠠᠵᠠᠭᠠᠶᠠ︕》 ᠭᠡᠯᠴᠡᠪᠡ᠃ 6 ᠯᠣᠲ ᠲᠡᠳᠡ ᠨᠠᠷ ᠤᠷᠤᠭᠤ ᠭᠠᠷᠴᠤ ᠢᠷᠡᠭᠡᠳ᠂ ᠬᠠᠭᠠᠯᠭᠠ ᠪᠠᠨ ᠠᠷᠤ ᠠᠴᠠ ᠪᠠᠨ ᠬᠠᠭᠠᠵᠤ᠂ 7 ᠲᠡᠳᠡᠨ ᠡᠴᠡ ᠭᠤᠶᠤᠨ ᠢᠳᠬᠠᠵᠤ᠄ 《ᠠᠬᠠ ᠳᠡᠭᠦᠦ ᠨᠠᠷ ᠮᠢᠨᠢ ᠡ︕ ᠡᠢᠮᠦ ᠬᠣᠷᠣᠨ ᠮᠠᠭᠤ ᠵᠦᠢᠯ ᠪᠢᠲᠡᠭᠡᠢ ᠬᠢᠭᠡᠷᠡᠢ᠂ 8 ᠬᠠᠷᠠ᠂ ᠨᠠᠳᠠ ᠳᠤ ᠡᠷᠡ ᠬᠥᠮᠦᠨ ᠲᠡᠢ ᠬᠠᠪᠢᠳᠠᠭᠠ ᠦᠭᠡᠢ ᠬᠣᠶᠠᠷ ᠥᠬᠢᠨ ᠪᠤᠢ᠃ ᠪᠢ ᠲᠡᠳᠡᠨ ᠢ ᠲᠠ ᠨᠠᠷ ᠲᠤ ᠠᠪᠴᠢᠷᠠᠶᠠ᠃ ᠲᠠ ᠨᠠᠷ ᠳᠤᠷᠠᠲᠠᠢ ᠪᠠᠨ ᠲᠡᠳᠡᠨ ᠳᠦ ᠬᠢ︕ ᠬᠠᠷᠢᠨ ᠡᠨᠡ ᠬᠥᠮᠦᠰ ᠮᠠᠨ ᠤ ᠳᠡᠭᠡᠪᠦᠷ ᠳᠣᠣᠷᠠ ᠢᠷᠡᠭᠰᠡᠨ ᠤᠴᠢᠷ ᠲᠡᠳᠡᠨ ᠳᠦ ᠶᠠᠭᠤ ᠴᠤ ᠪᠢᠲᠡᠭᠡᠢ ᠬᠢ》 ᠭᠡᠬᠦ ᠳᠦ᠂ 9 ᠲᠡᠳᠡ᠄ 《ᠴᠢ ᠵᠠᠢᠯᠠ︕ ᠮᠠᠨ ᠤ ᠡ᠊ᠨᠳᠡ ᠢᠷᠡᠭᠰᠡᠨ ᠡᠨᠡ ᠴᠠᠭᠠᠴᠢ ᠮᠠᠨ ᠤ ᠰᠢᠭᠦᠭᠴᠢ ᠪᠣᠯᠬᠤ ᠨᠢ ᠡ᠂ ᠣᠳᠣ ᠪᠢᠳᠡ ᠲᠡᠳᠡᠨ ᠡᠴᠡ ᠲᠦᠷᠦᠭᠦᠨ ᠳᠦ ᠴᠢᠮᠠᠶᠢ ᠮᠡᠳᠡᠶᠡ》 ᠭᠡᠳ ᠯᠣᠲ ᠢ ᠬᠦᠴᠦ ᠪᠡᠷ ᠲᠦᠯᠬᠢᠭᠡᠳ ᠳᠥᠭᠥᠨ ᠢᠷᠡᠵᠦ᠂ ᠬᠠᠭᠠᠯᠭᠠ ᠶᠢ ᠨᠢ ᠡᠪᠳᠡᠬᠦ ᠭᠡᠵᠦ ᠪᠠᠢᠯᠠ᠃ 10 ᠨᠥᠭᠥᠭᠡ ᠵᠣᠴᠢᠳ ᠨᠢ ᠭᠠᠷ ᠢᠶᠠᠨ ᠰᠤᠩ᠋ᠭᠠᠨ᠂ ᠯᠣᠲ ᠢ ᠭᠡᠷ ᠲᠦ ᠲᠠᠲᠠᠵᠤ ᠣᠷᠣᠭᠤᠯᠤᠭᠠᠳ᠂ ᠬᠠᠭᠠᠯᠭᠠ ᠶᠢ ᠨᠢ ᠬᠠᠭᠠᠵᠤ᠂ 11 ᠬᠠᠭᠠᠯᠭᠠᠨ ᠳᠤ ᠪᠠᠢᠭᠠ ᠬᠥᠮᠦᠰ ᠢ ᠬᠥᠭᠰᠢᠨ ᠵᠠᠯᠠᠭᠤ ᠦᠭᠡᠢ ᠪᠦᠭᠦᠳᠡ ᠶᠢ ᠴᠣᠬᠢᠵᠤ᠂ ᠶᠠᠭᠤ ᠴᠤ ᠬᠠᠷᠠᠬᠤ ᠦᠭᠡᠢ ᠪᠣᠯᠭᠠᠭᠰᠠᠨ ᠳᠤ᠂ ᠲᠡᠳᠡ ᠭᠡᠷ ᠦᠨ ᠬᠠᠭᠠᠯᠭᠠ ᠶᠢ ᠣᠯᠬᠤ ᠭᠡᠭᠰᠡᠭᠡᠷ ᠵᠦᠳᠡᠷᠡᠪᠡ᠃
12 ᠨᠥᠭᠥᠭᠡ ᠵᠣᠴᠢᠳ ᠯᠣᠲ ᠲᠤ᠄ 《ᠲᠠᠨ ᠤ ᠬᠢᠨ ᠳᠤ ᠥᠭᠡᠷᠡ ᠬᠡᠨ ᠬᠡᠨ ᠪᠠᠢᠨᠠ ᠪᠤᠢ︖ ᠡᠨᠡ ᠬᠣᠲᠠ ᠳᠤ ᠪᠠᠢᠭᠠ ᠬᠦᠷᠭᠡᠳ ᠥᠬᠢᠳ᠂ ᠬᠥᠪᠡᠭᠦᠳ᠂ ᠥᠪᠡᠷ ᠦᠨ ᠭᠡᠰᠡᠨ ᠬᠡᠨ ᠢ ᠴᠤ ᠡᠨᠡ ᠭᠠᠵᠠᠷ ᠠᠴᠠ ᠳᠠᠭᠠᠭᠤᠯᠤᠨ ᠭᠠᠷᠭᠠ᠃ 13 ᠪᠢᠳᠡ ᠡᠨᠡ ᠭᠠᠵᠠᠷ ᠢ ᠤᠰᠠᠳᠬᠠᠬᠤ ᠭᠡᠵᠦ ᠪᠠᠢᠨᠠ︕ ᠡ᠊ᠨᠳᠡᠬᠢ ᠶᠢᠨ ᠬᠢᠨ ᠤ ᠴᠢᠩᠭ᠍ᠠ ᠬᠠᠰᠬᠢᠷᠤᠭᠠᠨ ᠶᠣᠬᠣᠸᠠ ᠳᠤ ᠬᠦᠷᠦᠭᠰᠡᠨ ᠲᠤᠯᠠ ᠡᠨᠡ ᠭᠠᠵᠠᠷ ᠢ ᠤᠰᠠᠳᠬᠠᠭᠤᠯᠬᠤ ᠶᠢᠨ ᠲᠤᠯᠠᠳᠠ ᠶᠣᠬᠣᠸᠠ ᠪᠢᠳᠡᠨ ᠢ ᠶᠠᠪᠤᠭᠤᠯᠤᠭᠰᠠᠨ》 ᠭᠡᠪᠡ᠃ 14 ᠯᠣᠲ ᠭᠠᠷᠴᠤ᠂ ᠥᠬᠢᠳ ᠲᠠᠢ ᠨᠢ ᠰᠦᠢ ᠲᠠᠯᠪᠢᠭᠰᠠᠨ ᠬᠦᠷᠭᠡᠳ ᠲᠡᠭᠡᠨ᠄ 《ᠬᠤᠷᠳᠤᠯᠠᠭᠠᠷᠠᠢ᠂ ᠡᠨᠡ ᠭᠠᠵᠠᠷ ᠠᠴᠠ ᠵᠠᠢᠯᠠᠬᠤ ᠬᠡᠷᠡᠭ ᠲᠡᠢ᠃ ᠶᠣᠬᠣᠸᠠ ᠡᠨᠡ ᠬᠣᠲᠠ ᠶᠢ ᠤᠰᠠᠳᠬᠠᠬᠤ ᠭᠡᠵᠦ ᠪᠠᠢᠨᠠ︕》 ᠭᠡᠰᠡᠨ ᠳᠦ ᠬᠦᠷᠭᠡᠳ ᠨᠢ ᠡᠭᠦᠨ ᠢ ᠲᠣᠭᠯᠠᠭᠠᠮ ᠭᠡᠵᠦ ᠪᠣᠳᠣᠵᠠᠢ᠃
15 ᠦᠷ ᠴᠠᠢᠬᠤ ᠦᠶᠡ ᠪᠡᠷ ᠡᠯᠴᠢ ᠨᠠᠷ ᠯᠣᠲ ᠢ ᠰᠢᠪᠠᠳᠠᠭᠤᠯᠤᠨ᠄ 《ᠬᠤᠷᠳᠤᠯᠠ︕ ᠡ᠊ᠨᠳᠡ ᠪᠠᠢᠭᠠ ᠡᠬᠡᠨᠡᠷ ᠪᠣᠯᠣᠨ ᠬᠣᠶᠠᠷ ᠥᠬᠢᠨ ᠢᠶᠠᠨ ᠠᠪᠤᠭᠠᠳ ᠶᠠᠪᠤ᠃ ᠡᠰᠡ ᠲᠡᠭᠡᠪᠡᠯ ᠲᠠ ᠨᠠᠷ ᠡᠨᠡ ᠬᠣᠲᠠ ᠶᠢᠨ ᠬᠦᠯᠢᠶᠡᠬᠦ ᠰᠢᠳᠬᠡᠯ ᠳᠤᠮᠳᠠ ᠬᠠᠮᠲᠤ ᠳᠠᠭᠠᠨ ᠰᠥᠨᠥᠬᠦ ᠪᠣᠯᠣᠨᠠ》 ᠭᠡᠵᠡᠢ᠃ 16 ᠬᠠᠷᠢᠨ ᠯᠣᠲ ᠢ ᠰᠠᠭᠠᠲᠠᠨ ᠲᠡᠨᠡᠭᠡᠯᠵᠡᠬᠦ ᠳᠦ᠂ ᠲᠡᠷᠡ ᠬᠥᠮᠦᠰ ᠲᠡᠭᠦᠨ ᠦ ᠭᠠᠷ ᠪᠣᠯᠣᠨ ᠡᠬᠡᠨᠡᠷ ᠦᠨ ᠬᠢᠨᠢ᠂ ᠪᠠᠰᠠ ᠬᠣᠶᠠᠷ ᠥᠬᠢᠨ ᠤ ᠬᠢᠨᠢ ᠭᠠᠷ ᠠᠴᠠ ᠪᠠᠷᠢᠨ ᠠᠪᠴᠤ ᠲᠡᠳᠡᠨ ᠢ ᠭᠠᠳᠠᠭᠰᠢ ᠭᠠᠷᠭᠠᠨ᠂ ᠬᠣᠲᠠ ᠶᠢᠨ ᠭᠠᠳᠠᠨᠠ ᠬᠦᠷᠭᠡᠵᠡᠢ᠃ ᠶᠣᠬᠣᠸᠠ ᠲᠡᠳᠡᠨ ᠢ ᠡᠢᠨ ᠬᠦ ᠡᠨᠡᠷᠢᠨ ᠬᠠᠢᠷᠠᠯᠠᠵᠠᠢ᠃ 17 ᠲᠡᠳᠡᠨ ᠢ ᠭᠠᠳᠠᠭᠰᠢ ᠭᠠᠷᠭᠠᠭᠠᠳ ᠨᠥᠭᠥᠭᠡ ᠬᠥᠮᠦᠰ ᠦᠨ ᠨᠢᠭᠡ ᠨᠢ᠄ 《ᠠᠮᠢ ᠶᠢᠨ ᠢᠶᠠᠨ ᠲᠥᠯᠥᠭᠡ ᠵᠢᠭᠤᠲᠠ︕ ᠡᠷᠭᠢᠵᠦ ᠪᠦᠦ ᠬᠠᠷᠠ᠂ ᠬᠡᠭᠡᠷᠡ ᠲᠠᠯᠠ ᠳᠤ ᠵᠣᠭᠰᠣᠯ ᠦᠭᠡᠢ᠂ ᠠᠭᠤᠯᠠ ᠤᠷᠤᠭᠤ ᠵᠢᠭᠤᠲᠠ︕ ᠡᠰᠡ ᠲᠡᠭᠡᠪᠡᠯ ᠰᠥᠨᠥᠭᠡᠭᠳᠡᠨᠡ》 ᠭᠡᠰᠡᠨ ᠳᠦ᠂ 18 ᠯᠣᠲ ᠲᠡᠳᠡᠨ ᠳᠦ᠄ 《ᠦᠭᠡᠢ᠂ ᠡᠵᠡᠳ ᠮᠢᠨᠢ︕ 19 ᠲᠠᠨ ᠤ ᠵᠠᠷᠤᠴᠠ ᠲᠠᠭᠠᠯᠠᠯ ᠣᠯᠣᠭᠰᠠᠨ ᠲᠤᠯᠠ ᠲᠠ ᠦᠨᠡᠨ ᠬᠠᠢᠷᠠ ᠪᠠᠨ ᠨᠠᠳᠠ ᠳᠤ ᠦᠵᠡᠭᠦᠯᠵᠦ᠂ ᠠᠮᠢ ᠭᠣᠣᠯ ᠢ ᠮᠢᠨᠢ ᠠᠪᠤᠷᠠᠭᠰᠠᠨ ᠪᠢᠯᠡ᠃ ᠪᠢ ᠬᠠᠷᠢᠨ ᠠᠭᠤᠯᠠ ᠥᠭᠡᠳᠡ ᠵᠢᠭᠤᠲᠠᠵᠤ ᠴᠢᠳᠠᠬᠤ ᠦᠭᠡᠢ ᠨᠢ᠃ ᠪᠢ ᠭᠠᠢ ᠭᠠᠮᠰᠢᠭ ᠲᠤ ᠭᠦᠢᠴᠡᠭᠳᠡᠵᠦ ᠦᠬᠦᠬᠦ ᠪᠤᠢ᠃ 20 ᠬᠠᠷᠠ︕ ᠵᠢᠭᠤᠲᠠᠬᠤ ᠳᠤ ᠬᠣᠯᠠ ᠦᠭᠡᠢ ᠵᠢᠵᠢᠭ ᠬᠣᠲᠠ ᠲᠡᠨᠳᠡ ᠪᠤᠢ᠃ ᠨᠠᠮᠠᠶᠢ ᠲᠡᠰᠢ ᠪᠠᠨ ᠤᠷᠭᠤᠭᠤᠯᠤᠭᠠᠴᠢ᠃ ᠲᠡᠷᠡ ᠨᠢ ᠵᠢᠵᠢᠭ ᠬᠣᠲᠠ ᠪᠢᠰᠢ ᠤᠤ︖ ᠪᠢ ᠠᠮᠢᠳᠤ ᠦᠯᠡᠳᠡᠬᠦ ᠪᠠᠢᠬᠠ》 ᠭᠡᠪᠡ᠃ 21 ᠲᠡᠷᠡ ᠪᠡᠷ ᠯᠣᠲ ᠲᠤ᠄ 《ᠵᠠ᠂ ᠡᠨᠡ ᠶᠠᠪᠤᠳᠠᠯ ᠳᠡᠭᠡᠷᠡ ᠴᠤ ᠪᠢ ᠬᠦᠰᠡᠯᠲᠡ ᠶᠢ ᠴᠢᠨᠢ ᠵᠥᠪᠰᠢᠶᠡᠷᠡᠵᠦ᠂ ᠴᠢᠨᠦ ᠬᠡᠯᠡᠵᠦ ᠪᠠᠢᠭᠠ ᠲᠡᠷᠡ ᠬᠣᠲᠠ ᠶᠢ ᠬᠥᠮᠥᠷᠢᠬᠦ ᠦᠭᠡᠢ᠃ 22 ᠬᠠᠷᠢᠨ ᠴᠢ ᠲᠡᠰᠢ ᠲᠦᠷᠭᠡᠨ ᠵᠢᠭᠤᠲᠠ᠃ ᠴᠢᠮᠠᠶᠢ ᠲᠡᠨᠳᠡ ᠣᠴᠢᠲᠠᠯᠠ ᠪᠢ ᠶᠠᠭᠤ ᠴᠤ ᠬᠢᠵᠦ ᠪᠣᠯᠬᠤ ᠦᠭᠡᠢ》 ᠭᠡᠪᠡ᠃ (ᠲᠡᠢᠮᠦ ᠤᠴᠢᠷ ᠠᠴᠠ ᠲᠡᠷᠡ ᠬᠣᠲᠠ ᠶᠢ ᠽᠣᠶᠠᠷ 32 ᠭᠡᠵᠦ ᠨᠡᠷᠡᠯᠡᠵᠡᠢ᠃) 23 ᠯᠣᠲ ᠽᠣᠶᠠᠷ ᠲᠤ ᠣᠷᠣᠬᠤ ᠳᠤ᠂ ᠨᠠᠷᠠ ᠭᠠᠵᠠᠷ ᠠᠴᠠ ᠳᠡᠭᠡᠭᠰᠢ ᠮᠠᠨᠳᠤᠭᠰᠠᠨ ᠪᠠᠢᠵᠠᠢ᠃
24 ᠲᠡᠭᠡᠬᠦ ᠳᠦ ᠶᠣᠬᠣᠸᠠ ᠲᠩᠷᠢ ᠡᠴᠡ ᠪᠤᠶᠤ ᠥᠪᠡᠷ ᠡᠴᠡ ᠪᠡᠨ ᠰᠣᠳᠣᠮ᠂ ᠭᠣᠮᠣᠷᠠ ᠳᠡᠭᠡᠷᠡ ᠬᠦᠬᠦᠷ ᠪᠣᠯᠣᠨ ᠭᠠᠯ ᠢ ᠪᠣᠷᠣᠭᠠᠨ ᠮᠡᠲᠦ ᠪᠠᠭᠤᠯᠭᠠᠵᠠᠢ᠃ 25 ᠡᠢᠨ ᠬᠦ ᠲᠡᠳᠡᠭᠡᠷ ᠬᠣᠲᠠ ᠶᠢ᠂ ᠬᠡᠭᠡᠷᠡ ᠲᠠᠯᠠ ᠶᠢ ᠪᠦᠬᠦᠨ ᠢ᠂ ᠪᠦᠬᠦ ᠬᠣᠲᠠ ᠶᠢᠨ ᠬᠢᠨ ᠢ᠂ ᠮᠥᠨ ᠭᠠᠵᠠᠷ ᠳᠡᠭᠡᠷᠡᠬᠢ ᠤᠷᠭᠤᠮᠠᠯ ᠢ ᠬᠥᠮᠥᠷᠢᠵᠡᠢ᠃ 26 ᠲᠡᠭᠡᠲᠡᠯᠡ ᠯᠣᠲ ᠤᠨ ᠬᠣᠢᠨᠠ ᠶᠠᠪᠤᠵᠤ ᠪᠠᠢᠭᠰᠠᠨ ᠡᠬᠡᠨᠡᠷ ᠨᠢ ᠡᠷᠭᠢᠵᠦ ᠬᠠᠷᠠᠭᠠᠳ ᠳᠠᠪᠤᠰᠤᠨ ᠪᠠᠭᠠᠨᠠ ᠪᠣᠯᠵᠠᠢ᠃
27 ᠥᠷᠯᠥᠭᠡ ᠡᠷᠲᠡ ᠠᠪᠷᠠᠬᠠᠮ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠲᠡᠷᠡ ᠭᠠᠵᠠᠷ ᠤᠷᠤᠭᠤ ᠪᠠᠨ ᠣᠴᠢᠵᠤ᠂ 28 ᠰᠣᠳᠣᠮ᠂ ᠭᠣᠮᠣᠷᠠ ᠤᠷᠤᠭᠤ᠂ ᠬᠡᠭᠡᠷᠡ ᠲᠠᠯᠠ ᠤᠷᠤᠭᠤ ᠨᠡᠢᠳᠡᠮ ᠳᠦᠨᠢ ᠬᠠᠷᠠᠬᠤ ᠳᠤ᠂ ᠵᠤᠤᠬᠠᠨ ᠠᠴᠠ ᠭᠠᠷᠴᠤ ᠪᠠᠢᠭᠠ ᠤᠲᠤᠭᠠ ᠰᠢᠭ᠋ ᠤᠲᠤᠭᠠ ᠭᠠᠵᠠᠷ ᠠᠴᠠ ᠪᠤᠷᠭᠢᠯᠵᠤ ᠪᠠᠢᠪᠠ︕
29 ᠡᠢᠨ ᠬᠦ ᠪᠤᠷᠬᠠᠨ ᠲᠠᠯᠠ ᠶᠢᠨ ᠬᠣᠲᠠ ᠨᠤᠭᠤᠳ ᠢ ᠤᠰᠠᠳᠬᠠᠬᠤ ᠳᠠᠭᠠᠨ ᠠᠪᠷᠠᠬᠠᠮ ᠢ ᠳᠤᠷᠠᠰᠤᠨ ᠰᠠᠨᠠᠵᠠᠢ᠃ ᠯᠣᠲ ᠤᠨ ᠰᠠᠭᠤᠵᠤ ᠪᠠᠢᠭᠠ ᠬᠣᠲᠠ ᠶᠢ ᠬᠥᠮᠥᠷᠢᠨ ᠰᠥᠨᠥᠭᠡᠬᠦ ᠳᠡᠭᠡᠨ ᠯᠣᠲ ᠢ ᠰᠥᠨᠥᠭᠡᠯᠲᠡ ᠡᠴᠡ ᠮᠡᠨᠳᠦ ᠭᠠᠷᠭᠠᠵᠠᠢ᠃
ᠯᠣᠲ ᠬᠢᠭᠡᠳ ᠲᠡᠭᠦᠨ ᠦ ᠥᠬᠢᠳ
30 ᠯᠣᠲ ᠽᠣᠶᠠᠷ ᠲᠤ ᠰᠠᠭᠤᠷᠢᠰᠢᠬᠤ ᠠᠴᠠ ᠠᠶᠤᠭᠰᠠᠨ ᠤᠴᠢᠷ ᠬᠣᠶᠠᠷ ᠥᠬᠢᠨ ᠤ ᠪᠠᠨ ᠬᠠᠮᠲᠤ ᠽᠣᠶᠠᠷ ᠠᠴᠠ ᠭᠠᠷᠴᠤ᠂ ᠠᠭᠤᠯᠠᠨ ᠳᠤ ᠣᠷᠣᠵᠤ ᠲᠡᠨᠳᠡ ᠰᠠᠭᠤᠷᠢᠰᠢᠪᠠ᠃ ᠲᠡᠷᠡ ᠪᠡᠷ ᠬᠣᠶᠠᠷ ᠥᠬᠢᠨ ᠲᠠᠢ ᠪᠠᠨ ᠠᠭᠤᠢ ᠳᠤ ᠰᠠᠭᠤᠵᠤ ᠪᠠᠢᠬᠤ ᠳᠤ᠂ 31 ᠨᠢᠭᠡᠨ ᠡᠳᠦᠷ ᠶᠡᠬᠡ ᠥᠬᠢᠨ ᠨᠢ ᠥᠬᠢᠨ ᠳᠡᠭᠦᠦ ᠳᠡᠭᠡᠨ᠄ 《ᠠᠪᠤ ᠮᠠᠨᠢ ᠡᠪᠦᠭᠡᠷᠡᠭᠰᠡᠨ ᠪᠥᠭᠡᠳ ᠡᠨᠡ ᠭᠠᠵᠠᠷ ᠲᠤ ᠶᠢᠷᠲᠢᠨᠴᠦ ᠶᠢᠨ ᠵᠢᠮᠡ ᠶᠣᠰᠣ ᠪᠠᠷ ᠪᠢᠳᠡᠨ ᠳᠡᠭᠡᠷᠡ ᠣᠷᠣᠬᠤ ᠡᠷᠡ ᠠᠯᠠᠭᠠ ᠪᠠᠢᠨᠠ᠃ 32 ᠵᠠ᠂ ᠪᠢᠳᠡ ᠬᠣᠶᠠᠭᠤᠯᠠ ᠠᠪᠤ ᠳᠠᠭᠠᠨ ᠳᠠᠷᠠᠰᠤ ᠤᠤᠭᠤᠯᠭᠠᠭᠠᠳ᠂ ᠲᠡᠭᠦᠨ ᠲᠡᠢ ᠤᠨᠲᠠᠵᠤ᠂ ᠠᠪᠤ ᠠᠴᠠ ᠪᠠᠨ ᠦᠷᠡ ᠤᠳᠤᠮ ᠪᠠᠨ ᠵᠠᠯᠭᠠᠭᠤᠯᠤᠶᠠ》 ᠭᠡᠪᠡ᠃ 33 ᠲᠡᠷᠡ ᠰᠥᠨᠢ ᠳᠡᠭᠡᠨ ᠲᠡᠳᠡ ᠡᠴᠢᠭᠡ ᠳᠡᠭᠡᠨ ᠳᠠᠷᠠᠰᠤ ᠤᠤᠭᠤᠯᠭᠠᠵᠤ᠂ ᠶᠡᠬᠡ ᠥᠬᠢᠨ ᠨᠢ ᠡᠴᠢᠭᠡ ᠳᠡᠭᠡᠷᠡ ᠪᠡᠨ ᠣᠴᠢᠵᠤ ᠲᠡᠭᠦᠨ ᠲᠡᠢ ᠤᠨᠲᠠᠵᠠᠢ᠃ ᠬᠠᠷᠢᠨ ᠡᠴᠢᠭᠡ ᠨᠢ ᠥᠬᠢᠨ ᠤ ᠪᠠᠨ ᠬᠡᠪᠲᠡᠵᠦ᠂ ᠪᠣᠰᠣᠭᠰᠠᠨ ᠢ ᠨᠢ ᠮᠡᠳᠡᠭᠰᠡᠨ ᠦᠭᠡᠢ᠃ 34 ᠮᠠᠷᠭᠠᠰᠢ ᠨᠢ ᠶᠡᠬᠡ ᠥᠬᠢᠨ ᠨᠢ ᠳᠡᠭᠦᠦ ᠳᠡᠭᠡᠨ᠄ 《ᠥᠩᠭᠡᠷᠡᠭᠰᠡᠨ ᠰᠥᠨᠢ ᠪᠢ ᠡᠴᠢᠭᠡ ᠲᠡᠢ ᠪᠡᠨ ᠤᠨᠲᠠᠭᠰᠠᠨ᠂ ᠥᠨᠥ ᠰᠥᠨᠢ ᠪᠢᠳᠡ ᠪᠠᠰᠠ ᠡᠴᠢᠭᠡ ᠲᠡᠭᠡᠨ ᠳᠠᠷᠠᠰᠤ ᠤᠤᠭᠤᠯᠭᠠᠶᠠ᠃ ᠲᠡᠭᠡᠭᠡᠳ ᠴᠢ ᠶᠠᠪᠤᠵᠤ ᠲᠡᠭᠦᠨ ᠲᠡᠢ ᠤᠨᠲᠠ᠂ ᠪᠢᠳᠡ ᠡᠢᠨ ᠬᠦ ᠡᠴᠢᠭᠡ ᠡᠴᠡ ᠪᠡᠨ ᠦᠷᠡ ᠤᠳᠤᠮ ᠢᠶᠠᠨ ᠵᠠᠯᠭᠠᠭᠤᠯᠤᠶᠠ》 ᠭᠡᠪᠡ᠃ 35 ᠲᠡᠷᠡ ᠰᠥᠨᠢ ᠴᠤ ᠲᠡᠳᠡ ᠡᠴᠢᠭᠡ ᠳᠡᠭᠡᠨ ᠳᠠᠷᠠᠰᠤ ᠤᠤᠭᠤᠯᠭᠠᠭᠠᠳ ᠪᠠᠭᠠ ᠥᠬᠢᠨ ᠨᠢ ᠣᠴᠢᠵᠤ᠂ ᠡᠴᠢᠭᠡ ᠲᠡᠢ ᠪᠡᠨ ᠤᠨᠲᠠᠵᠠᠢ᠃ ᠬᠠᠷᠢᠨ ᠡᠴᠢᠭᠡ ᠨᠢ ᠥᠬᠢᠨ ᠤ ᠪᠠᠨ ᠬᠡᠪᠲᠡᠵᠦ᠂ ᠪᠣᠰᠣᠭᠰᠠᠨ ᠢ ᠨᠢ ᠮᠡᠳᠡᠭᠰᠡᠨ ᠦᠭᠡᠢ᠃ 36 ᠲᠡᠢᠨ ᠬᠦ ᠯᠣᠲ ᠤᠨ ᠬᠣᠶᠠᠷ ᠥᠬᠢᠨ ᠡᠴᠢᠭᠡ ᠡᠴᠡ ᠪᠡᠨ ᠬᠡᠦᠬᠡᠳ ᠲᠡᠢ ᠪᠣᠯᠪᠠ᠃ 37 ᠶᠡᠬᠡ ᠥᠬᠢᠨ ᠨᠢ ᠬᠦᠦ ᠲᠥᠷᠥᠭᠦᠯᠵᠦ᠂ ᠬᠦᠦ ᠪᠡᠨ ᠮᠣᠶᠠᠪ 33 ᠭᠡᠵᠦ ᠨᠡᠷᠡᠯᠡᠵᠡᠢ᠃ ᠥᠨᠥ ᠶᠢᠨ ᠮᠣᠶᠠᠪᠴᠤᠳ ᠤᠨ ᠡᠪᠦᠭᠡ ᠨᠢ ᠲᠡᠷᠡ ᠪᠢᠯᠡ᠃ 38 ᠪᠠᠭᠠ ᠥᠬᠢᠨ ᠨᠢ ᠴᠤ ᠬᠦᠦ ᠲᠥᠷᠥᠭᠦᠯᠵᠦ᠂ ᠬᠦᠦ ᠪᠡᠨ ᠪᠧᠨ ᠠᠮᠢ 34 ᠭᠡᠵᠦ ᠨᠡᠷᠡᠯᠡᠪᠡ᠃ ᠥᠨᠥ ᠶᠢᠨ ᠠᠮᠣᠨᠴᠤᠳ ᠤᠨ ᠡᠪᠦᠭᠡ ᠨᠢ ᠲᠡᠷᠡ ᠪᠢᠯᠡ᠃