ᠡᠬᠢᠯᠡᠯ ᠳᠥᠷᠪᠡ
ᠺᠠᠢᠨ ᠪᠠ ᠠᠪᠧᠯ
1 ᠠᠳᠠᠮ ᠡᠬᠡᠨᠡᠷ ᠬᠠᠸᠠ ᠲᠠᠢ ᠪᠠᠨ ᠡᠩᠭᠡᠷ ᠵᠥᠷᠢᠭᠦᠯᠦᠭᠰᠡᠨ ᠳᠦ᠂ ᠬᠠᠸᠠ ᠵᠢᠷᠮᠦᠰᠦᠯᠡᠨ ᠺᠠᠢᠨ ᠢ ᠲᠥᠷᠥᠭᠦᠯᠵᠦ᠄ 《ᠶᠣᠬᠣᠸᠠ ᠶᠢᠨ ᠢᠪᠡᠭᠡᠯ ᠢᠶᠡᠷ ᠪᠢ ᠬᠥᠮᠦᠨ ᠣᠯᠵᠠᠢ》 ᠭᠡᠵᠦ ᠬᠡᠯᠡᠪᠡ᠃ 2 ᠳᠠᠬᠢᠭᠠᠳ ᠲᠡᠷᠡ ᠪᠡᠷ ᠺᠠᠢᠨ ᠤ ᠳᠡᠭᠦᠦ ᠠᠪᠧᠯ ᠢ ᠲᠥᠷᠥᠭᠦᠯᠵᠡᠢ᠃ ᠲᠡᠭᠡᠭᠡᠳ ᠠᠪᠧᠯ ᠨᠢ ᠬᠣᠨᠢᠴᠢᠨ᠂ ᠺᠠᠢᠨ ᠨᠢ ᠲᠠᠷᠢᠶᠠᠴᠢᠨ ᠪᠣᠯᠵᠠᠢ᠃ 3 ᠬᠡᠰᠡᠭ ᠬᠤᠭᠤᠴᠠᠭᠠ ᠥᠩᠭᠡᠷᠡᠭᠰᠡᠨ ᠦ ᠳᠠᠷᠠᠭᠠ᠂ ᠺᠠᠢᠨ ᠭᠠᠵᠠᠷ ᠠᠴᠠ ᠠᠪᠤᠭᠰᠠᠨ ᠦᠷᠡ ᠵᠢᠮᠢᠰ ᠡᠴᠡ ᠪᠡᠨ ᠶᠣᠬᠣᠸᠠ ᠳᠤ ᠡᠷᠭᠦᠯ ᠪᠣᠯᠭᠠᠨ ᠪᠠᠷᠢᠬᠤ ᠳᠤ᠂ 4 ᠠᠪᠧᠯ ᠪᠠᠰᠠ ᠬᠣᠨᠢᠨ ᠰᠦᠷᠦᠭ ᠦᠨ ᠢᠶᠠᠨ ᠠᠩ᠋ᠬᠠᠨ ᠤ ᠲᠥᠯ ᠤᠳ ᠪᠣᠯᠣᠨ ᠥᠭᠡᠬᠦᠨ ᠡᠴᠡ ᠨᠢ ᠡᠷᠭᠦᠵᠡᠢ᠃ ᠶᠣᠬᠣᠸᠠ ᠠᠪᠧᠯ ᠪᠣᠯᠣᠨ ᠲᠡᠭᠦᠨ ᠦ ᠡᠷᠭᠦᠯ ᠢ ᠲᠠᠭᠠᠰᠢᠶᠠᠭᠠᠳ᠂ 5 ᠺᠠᠢᠨ ᠪᠣᠯᠣᠨ ᠲᠡᠭᠦᠨ ᠦ ᠡᠷᠭᠦᠯ ᠢ ᠲᠠᠭᠠᠰᠢᠶᠠᠭᠰᠠᠨ ᠦᠭᠡᠢ᠃ ᠺᠠᠢᠨ ᠶᠡᠬᠡᠳᠡ ᠠᠭᠤᠷᠯᠠᠨ ᠤᠷᠤᠭᠤ ᠴᠢᠷᠠᠢᠯᠠᠪᠠ᠃ 6 ᠶᠣᠬᠣᠸᠠ ᠺᠠᠢᠨ ᠳᠤ᠄ 《ᠴᠢ ᠶᠠᠭᠤᠨ ᠳᠤ ᠠᠭᠤᠷᠯᠠᠨᠠ ᠪᠤᠢ︖ ᠶᠠᠭᠤᠨ ᠤ ᠤᠴᠢᠷ ᠤᠷᠤᠭᠤ ᠴᠢᠷᠠᠢᠯᠠᠨᠠ ᠪᠤᠢ︖ 7 ᠬᠡᠷᠪᠡ ᠰᠠᠢᠨ ᠢ ᠦᠢᠯᠡᠳᠴᠦ ᠪᠠᠢᠭᠠ ᠪᠣᠯ ᠴᠢ ᠬᠦᠯᠢᠶᠡᠨ ᠠᠪᠤᠭᠳᠠᠬᠤ ᠶᠣᠰᠣᠲᠠᠢ ᠪᠢᠰᠢ ᠤᠤ︖ ᠬᠡᠷᠪᠡ ᠴᠢ ᠰᠠᠢᠨ ᠢ ᠬᠢᠬᠦ ᠦᠭᠡᠢ ᠪᠣᠯ ᠨᠢᠭᠦᠯ ᠡᠭᠦᠳᠡᠨ ᠳᠡᠭᠡᠷᠡ ᠴᠢᠨᠢ ᠭᠡᠲᠡᠬᠦ ᠪᠣᠯᠣᠨᠠ᠂ ᠨᠢᠭᠦᠯ ᠴᠢᠮᠠᠶᠢ ᠪᠠᠷᠢᠬᠤ ᠶᠢ ᠬᠦᠰᠡᠪᠡᠴᠦ ᠴᠢ ᠲᠡᠭᠦᠨ ᠢ ᠵᠠᠬᠢᠷᠬᠤ ᠶᠣᠰᠣᠲᠠᠢ 7 》 ᠭᠡᠪᠡ᠃
8 ᠺᠠᠢᠨ ᠳᠡᠭᠦᠦ ᠠᠪᠧᠯ ᠳᠠᠭᠠᠨ᠄ 《ᠬᠡᠭᠡᠷᠡ ᠲᠠᠯᠠ ᠳᠤ ᠭᠠᠷᠴᠠᠭᠠᠶᠠ》 ᠭᠡᠪᠡ 8 ᠃ ᠬᠡᠭᠡᠷᠡ ᠲᠠᠯᠠ ᠳᠤ ᠪᠠᠢᠬᠤ ᠳᠠᠭᠠᠨ ᠺᠠᠢᠨ ᠳᠡᠭᠦᠦ ᠠᠪᠧᠯ ᠤᠷᠤᠭᠤ ᠪᠠᠨ ᠳᠠᠭᠠᠷᠢᠵᠤ᠂ ᠲᠡᠭᠦᠨ ᠢ ᠴᠣᠬᠢᠵᠤ ᠠᠯᠠᠪᠠ᠃ 9 ᠶᠣᠬᠣᠸᠠ ᠺᠠᠢᠨ ᠠᠴᠠ᠄ 《ᠴᠢᠨᠦ ᠳᠡᠭᠦᠦ ᠠᠪᠧᠯ ᠬᠠᠮᠢᠭᠠ ᠪᠠᠢᠨᠠ ᠪᠤᠢ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ ᠲᠡᠷᠡ᠄ 《ᠪᠢ ᠮᠡᠳᠡᠬᠦ ᠦᠭᠡᠢ᠃ ᠪᠢ ᠳᠡᠭᠦᠦ ᠶᠢᠨ ᠢᠶᠠᠨ ᠬᠠᠷᠠᠭᠤᠯ ᠶᠤᠮ ᠤᠤ︖》 ᠭᠡᠪᠡ᠃ 10 ᠡᠵᠡᠨ᠄ 《ᠴᠢ ᠶᠠᠭᠤ ᠬᠢᠴᠢᠬᠡᠭᠰᠡᠨ ᠪᠤᠢ︖ ᠴᠢᠨᠦ ᠳᠡᠭᠦᠦ ᠶᠢᠨ ᠴᠢᠰᠤᠨ ᠤ ᠳᠠᠭᠤ ᠭᠠᠵᠠᠷ ᠠᠴᠠ ᠨᠠᠳᠠ ᠤᠷᠤᠭᠤ ᠬᠠᠰᠬᠢᠷᠴᠤ ᠪᠠᠢᠨᠠ᠃ 11 ᠣᠳᠣ ᠭᠠᠵᠠᠷ ᠠᠴᠠ ᠴᠢᠮᠠ ᠳᠤ ᠬᠠᠷᠢᠶᠠᠯ ᠬᠦᠷᠦᠨᠡ᠂ ᠭᠠᠵᠠᠷ ᠠᠮᠠ ᠪᠠᠨ ᠠᠩ᠋ᠭᠠᠢᠵᠤ ᠴᠢᠨᠦ ᠭᠠᠷ ᠠᠴᠠ ᠳᠡᠭᠦᠦ ᠶᠢᠨ ᠴᠢᠨᠢ ᠴᠢᠰᠤ ᠶᠢ ᠠᠪᠤᠭᠰᠠᠨ᠂ 12 ᠴᠢ ᠭᠠᠵᠠᠷ ᠬᠠᠭᠠᠯᠬᠤ ᠳᠤ ᠭᠠᠵᠠᠷ ᠴᠢᠮᠠ ᠳᠤ ᠦᠷᠡ ᠰᠢᠮᠡ ᠶᠢ ᠡᠯᠪᠡᠭ ᠢᠶᠡᠷ ᠥᠭᠬᠦ ᠪᠡᠨ ᠪᠣᠯᠢᠨᠠ᠂ ᠴᠢ ᠭᠠᠵᠠᠷ ᠳᠡᠭᠡᠷᠡ ᠬᠡᠰᠦᠨ ᠲᠡᠨᠦᠭᠦᠴᠢᠯᠡᠭᠰᠡᠭᠡᠷ ᠪᠠᠢᠬᠤ ᠪᠣᠯᠣᠨᠠ》 ᠭᠡᠪᠡ᠃ 13 ᠺᠠᠢᠨ ᠶᠣᠬᠣᠸᠠ ᠳᠤ᠄ 《ᠨᠠᠳᠠ ᠳᠤ ᠤᠨᠤᠭᠠᠭᠳᠠᠭᠰᠠᠨ ᠶᠠᠯᠠ ᠰᠢᠳᠬᠡᠯ ᠬᠦᠨᠳᠦᠳᠡᠵᠦ᠂ ᠳᠠᠭᠠᠭᠠᠬᠤ ᠬᠢᠷᠢ ᠡᠴᠡ ᠮᠢᠨᠢ ᠬᠡᠲᠦᠷᠡᠵᠡᠢ᠃ 14 ᠲᠠ ᠥᠨᠥᠳᠥᠷ ᠨᠠᠮᠠᠶᠢ ᠭᠠᠵᠠᠷ ᠤᠨ ᠬᠥᠷᠥᠰᠥᠨ ᠡᠴᠡ ᠵᠠᠢᠯᠠᠭᠤᠯᠤᠯᠠ︕ ᠪᠢ ᠲᠠᠨ ᠤ ᠣᠷᠣᠰᠢᠬᠤᠢ ᠠᠴᠠ ᠳᠠᠯᠳᠠ ᠣᠷᠣᠵᠤ ᠭᠠᠵᠠᠷ ᠢᠶᠠᠷ ᠬᠡᠰᠦᠨ ᠲᠡᠨᠦᠭᠦᠴᠢᠯᠡᠭᠴᠢ ᠪᠣᠯᠣᠨᠠ᠃ ᠨᠠᠳᠠ ᠲᠠᠢ ᠲᠠᠭᠠᠷᠠᠯᠳᠤᠭᠰᠠᠨ ᠬᠡᠨ ᠴᠤ ᠨᠠᠮᠠᠶᠢ ᠠᠯᠠᠬᠤ ᠪᠣᠯᠣᠨᠠ》 ᠭᠡᠵᠡᠢ᠃ 15 ᠶᠣᠬᠣᠸᠠ ᠲᠡᠭᠦᠨ ᠳᠦ᠄ 《ᠲᠡᠢᠮᠦ ᠪᠢᠰᠢ᠂ ᠺᠠᠢᠨ ᠢ ᠠᠯᠠᠭᠰᠠᠨ ᠬᠡᠨ ᠴᠤ ᠳᠣᠯᠣᠭᠠ ᠳᠠᠬᠢᠨ ᠬᠠᠷᠢᠭᠤ ᠰᠢᠳᠬᠡᠯ ᠬᠦᠯᠢᠶᠡᠬᠦ ᠪᠣᠯᠣᠨᠠ》 ᠭᠡᠵᠦ ᠬᠡᠯᠡᠭᠡᠳ ᠺᠠᠢᠨ ᠳᠤ ᠲᠡᠮᠳᠡᠭ ᠲᠠᠯᠪᠢᠵᠤ᠂ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠭᠰᠠᠨ ᠬᠡᠨ ᠴᠤ ᠲᠡᠭᠦᠨ ᠢ ᠬᠥᠨᠥᠭᠡᠬᠦ ᠦᠭᠡᠢ ᠪᠣᠯᠭᠠᠪᠠ᠃ 16 ᠺᠠᠢᠨ ᠶᠣᠬᠣᠸᠠ ᠶᠢᠨ ᠣᠷᠣᠰᠢᠬᠤᠢ ᠠᠴᠠ ᠶᠠᠪᠤᠵᠤ᠂ ᠡᠳᠧᠨ ᠤ ᠵᠡᠭᠦᠨ ᠲᠠᠯᠠ ᠳᠠᠬᠢ ᠨᠣᠳ᠋ 9 ᠭᠡᠳᠡᠭ ᠭᠠᠵᠠᠷ ᠲᠤ ᠰᠠᠭᠤᠷᠢᠰᠢᠪᠠ᠃
17 ᠺᠠᠢᠨ ᠡᠬᠡᠨᠡᠷ ᠲᠡᠢ ᠪᠡᠨ ᠡᠩᠭᠡᠷ ᠵᠥᠷᠢᠭᠦᠯᠦᠭᠰᠡᠨ ᠳᠦ᠂ ᠡᠬᠡᠨᠡᠷ ᠨᠢ ᠵᠢᠷᠮᠦᠰᠦᠯᠡᠵᠦ᠂ ᠡᠨᠣᠺ ᠢ ᠲᠥᠷᠥᠭᠦᠯᠪᠡ᠃ ᠺᠠᠢᠨ ᠬᠣᠲᠠ ᠪᠠᠢᠭᠤᠯᠵᠤ᠂ ᠲᠡᠭᠦᠨ ᠢ ᠪᠠᠨ ᠬᠦᠦ ᠶᠢᠨ ᠢᠶᠠᠨ ᠨᠡᠷᠡ ᠪᠡᠷ ᠡᠨᠣᠺ ᠭᠡᠵᠦ ᠨᠡᠷᠡᠯᠡᠪᠡ᠃ 18 ᠡᠨᠣᠺ ᠲᠤ ᠢᠷᠠᠳ᠋ ᠲᠥᠷᠥᠪᠡ᠂ ᠢᠷᠠᠳ᠋ ᠤᠨ ᠬᠦᠦ ᠮᠧᠾᠦ᠋ᠶᠠᠶᠧᠯ᠂ ᠮᠧᠾᠦ᠋ᠶᠠᠶᠧᠯ ᠤᠨ ᠬᠦᠦ ᠮᠧᠲ᠋ᠣᠱᠠᠶᠧᠯ᠂ ᠮᠧᠲ᠋ᠣᠱᠠᠶᠧᠯ ᠤᠨ ᠬᠦᠦ ᠯᠠᠮᠧᠺ ᠪᠢᠯᠡ᠃ 19 ᠯᠠᠮᠧᠺ ᠬᠣᠶᠠᠷ ᠡᠬᠡᠨᠡᠷ ᠠᠪᠴᠠᠢ᠃ ᠨᠢᠭᠡ ᠶᠢᠨ ᠬᠢᠨᠢ ᠨᠡᠷᠡ ᠠᠳᠠ᠂ ᠨᠥᠭᠥᠭᠡ ᠶᠢᠨ ᠬᠢᠨᠢ ᠨᠡᠷᠡ ᠽᠢᠯᠠ ᠭᠡᠳᠡᠭ᠃ 20 ᠠᠳᠠ ᠠᠴᠠ ᠶᠠᠪᠠᠯ ᠲᠥᠷᠥᠵᠡᠢ᠃ ᠲᠡᠷᠡ ᠪᠣᠯ ᠮᠠᠢᠬᠠᠨ ᠳᠤ ᠰᠠᠭᠤᠵᠤ ᠮᠠᠯ ᠬᠠᠷᠢᠭᠤᠯᠤᠭᠴᠢᠳ ᠤᠨ ᠳᠡᠭᠡᠳᠦ ᠡᠪᠦᠭᠡ ᠶᠤᠮ᠃ 21 ᠳᠡᠭᠦᠦ ᠶᠢᠨ ᠬᠢᠨᠢ ᠨᠡᠷᠡ ᠶᠢ ᠶᠦᠪᠠᠯ ᠭᠡᠳᠡᠭ᠃ ᠲᠡᠷᠡ ᠪᠣᠯ ᠪᠣᠰᠣᠭᠠ ᠶᠠᠲᠤᠭᠠᠴᠢᠳ ᠪᠠ ᠯᠢᠨᠪᠦᠴᠢᠳ ᠤᠨ ᠳᠡᠭᠡᠳᠦ ᠡᠪᠦᠭᠡ ᠶᠤᠮ᠃ 22 ᠽᠢᠯᠠ ᠠᠴᠠ ᠲᠦᠪᠠᠯ ᠺᠠᠢᠨ ᠲᠥᠷᠥᠵᠡᠢ᠃ ᠲᠡᠷᠡ ᠪᠡᠷ ᠬᠦᠷᠡᠯ᠂ ᠲᠡᠮᠦᠷ ᠢᠶᠡᠷ ᠶᠠᠩᠵᠤ ᠪᠦᠷᠢ ᠶᠢᠨ ᠪᠠᠭᠠᠵᠢ ᠬᠢᠳᠡᠭ ᠬᠥᠮᠦᠨ ᠪᠠᠢᠪᠠ᠃ ᠲᠦᠪᠠᠯ ᠺᠠᠢᠨ ᠤ ᠥᠬᠢᠨ ᠳᠡᠭᠦᠦ ᠨᠢ ᠨᠠᠮᠠ ᠶᠤᠮ᠃
23 ᠯᠠᠮᠧᠺ ᠡᠬᠡᠨᠡᠷ ᠤᠳ ᠲᠡᠭᠡᠨ᠄ 《ᠠᠳᠠ᠂ ᠽᠢᠯᠠ᠂ ᠮᠢᠨᠦ ᠦᠭᠡ ᠶᠢ ᠰᠣᠨᠣᠰ︕ ᠯᠠᠮᠧᠺ ᠤᠨ ᠡᠬᠡᠨᠡᠷ ᠤᠳ ᠡ᠂ ᠮᠢᠨᠦ ᠶᠠᠷᠢᠶᠠᠨ ᠳᠤ ᠴᠢᠬᠢ ᠪᠠᠨ ᠬᠠᠨᠳᠤᠭᠤᠯ︕ ᠨᠠᠮᠠᠶᠢ ᠰᠢᠷᠬᠠᠲᠤᠭᠤᠯᠤᠭᠰᠠᠨ ᠨᠢᠭᠡᠨ ᠢ ᠪᠢ ᠠᠯᠠᠭᠰᠠᠨ ᠨᠠᠮᠠᠶᠢ ᠵᠣᠳᠣᠭᠰᠠᠨ ᠵᠠᠯᠠᠭᠤ ᠶᠢ ᠪᠢ ᠬᠥᠨᠥᠭᠡᠭᠰᠡᠨ᠂
24 ᠺᠠᠢᠨ ᠢ ᠬᠣᠬᠢᠷᠠᠭᠠᠭᠴᠢ ᠨᠢ ᠳᠣᠯᠣᠭᠠ ᠳᠠᠬᠢᠨ ᠬᠠᠷᠢᠭᠤ ᠰᠢᠳᠬᠡᠯ ᠬᠦᠯᠢᠶᠡᠨᠡ᠂ ᠯᠠᠮᠧᠺ ᠶᠢ ᠬᠣᠬᠢᠷᠠᠭᠠᠭᠴᠢ ᠨᠢ ᠳᠠᠯᠠᠨ ᠳᠣᠯᠣᠭᠠ ᠳᠠᠬᠢᠨ ᠬᠠᠷᠢᠭᠤ ᠰᠢᠳᠬᠡᠯ ᠬᠦᠯᠢᠶᠡᠨᠡ》 ᠭᠡᠪᠡ᠃
25 ᠠᠳᠠᠮ ᠡᠬᠡᠨᠡᠷ ᠲᠡᠢ ᠪᠡᠨ ᠳᠠᠬᠢᠨ ᠡᠩᠭᠡᠷ ᠵᠥᠷᠢᠭᠦᠯᠦᠭᠰᠡᠨ ᠳᠦ᠂ ᠡᠬᠡᠨᠡᠷ ᠨᠢ ᠬᠦᠦ ᠲᠥᠷᠥᠭᠦᠯᠵᠦ 《ᠪᠤᠷᠬᠠᠨ ᠨᠠᠳᠠ ᠳᠤ ᠺᠠᠢᠨ ᠤ ᠠᠯᠠᠭᠰᠠᠨ ᠠᠪᠧᠯ ᠤᠨ ᠣᠷᠣᠨ ᠳᠤ ᠥᠭᠡᠷᠡ ᠦᠷᠡ ᠵᠠᠶᠠᠭᠠᠵᠠᠢ》 ᠭᠡᠳ ᠲᠡᠭᠦᠨ ᠢ ᠰᠧᠲ 10 ᠭᠡᠵᠦ ᠨᠡᠷᠡᠯᠡᠪᠡ᠃ 26 ᠰᠧᠲ ᠪᠠᠰᠠ ᠨᠢᠭᠡ ᠬᠦᠦ ᠲᠡᠢ ᠪᠣᠯᠵᠤ᠂ ᠲᠡᠭᠦᠨ ᠢ ᠡᠨᠣᠱ ᠭᠡᠵᠦ ᠨᠡᠷᠡᠯᠡᠪᠡ᠃ ᠲᠡᠷᠡ ᠴᠠᠭ ᠠᠴᠠ ᠡᠬᠢᠯᠡᠨ ᠬᠥᠮᠦᠰ ᠶᠣᠬᠣᠸᠠ ᠶᠢᠨ ᠨᠡᠷᠡ ᠶᠢ ᠳᠠᠭᠤᠳᠠᠬᠤ ᠪᠣᠯᠵᠠᠢ᠃