ᠡᠬᠢᠯᠡᠯ ᠠᠷᠪᠠᠨ ᠨᠠᠢ᠌ᠮᠠ
ᠭᠤᠷᠪᠠᠨ ᠵᠣᠴᠢᠨ
1 ᠶᠣᠬᠣᠸᠠ ᠮᠠᠮᠷᠧ ᠶᠢᠨ ᠴᠠᠷᠠᠰᠤᠨ ᠮᠣᠳᠣᠨ ᠤ ᠬᠠᠪᠢ ᠳᠤ ᠠᠪᠷᠠᠬᠠᠮ ᠳᠤ ᠦᠵᠡᠭᠳᠡᠪᠡ᠃ ᠡᠳᠦᠷ ᠦᠨ ᠬᠠᠯᠠᠭᠤᠨ ᠳᠤ ᠠᠪᠷᠠᠬᠠᠮ ᠮᠠᠢᠬᠠᠨ ᠤ ᠪᠠᠨ ᠡᠭᠦᠳᠡᠨ ᠳᠦ ᠰᠠᠭᠤᠵᠤ ᠪᠠᠢᠭᠠᠳ᠂ 2 ᠨᠢᠳᠦ ᠡᠷᠭᠦᠨ ᠬᠠᠷᠠᠲᠠᠯᠠ ᠡᠮᠦᠨᠡ ᠨᠢ ᠭᠤᠷᠪᠠᠨ ᠬᠥᠮᠦᠨ ᠵᠣᠭᠰᠣᠵᠤ ᠪᠠᠢᠯᠠ᠃ ᠲᠡᠷᠡ ᠪᠡᠷ ᠲᠡᠳᠡᠨ ᠢ ᠬᠠᠷᠠᠩ᠋ᠭᠤᠲᠠ ᠪᠠᠨ ᠮᠠᠢᠬᠠᠨ ᠤ ᠪᠠᠨ ᠡᠭᠦᠳᠡᠨ ᠡᠴᠡ ᠭᠦᠶᠦᠵᠦ ᠬᠦᠷᠦᠭᠡᠳ᠂ ᠲᠡᠳᠡᠨ ᠢ ᠲᠣᠰᠣᠨ ᠭᠠᠵᠠᠷ ᠲᠤ ᠪᠥᠬᠥᠢᠨ ᠮᠥᠷᠭᠥᠵᠦ᠄ 3 《ᠡᠵᠡᠨᠲᠡᠨ ᠮᠢᠨᠢ ᠡ︕ ᠬᠡᠷᠪᠡ ᠪᠢ ᠲᠠᠨ ᠤ ᠮᠡᠯᠮᠡᠢ ᠳᠦ ᠲᠠᠭᠠᠯᠠᠯ ᠢ ᠣᠯᠣᠭᠰᠠᠨ ᠪᠣᠯ᠂ ᠵᠠᠷᠤᠴᠠ ᠨᠠᠮᠠᠶᠢ ᠪᠠᠨ ᠪᠢᠲᠡᠭᠡᠢ ᠣᠷᠬᠢᠨ ᠥᠩᠭᠡᠷᠡᠭᠡᠴᠢ᠃ 4 ᠪᠢ ᠵᠢᠭᠠᠬᠠᠨ ᠤᠰᠤ ᠠᠪᠴᠢᠷᠠᠭᠤᠯᠤᠶᠠ᠂ ᠲᠠ ᠨᠠᠷ ᠬᠥᠯ ᠢᠶᠡᠨ ᠤᠬᠢᠶᠠᠵᠤ᠂ ᠡᠨᠡ ᠮᠣᠳᠣᠨ ᠤ ᠳᠣᠣᠷᠠ ᠠᠮᠠᠷᠠᠭᠠᠷᠠᠢ᠃ 5 ᠪᠢ ᠪᠠᠰᠠ ᠵᠢᠭᠠᠬᠠᠨ ᠪᠣᠣᠪᠣ ᠠᠪᠴᠢᠷᠠᠶᠠ᠂ ᠲᠠ ᠨᠠᠷ ᠵᠠᠷᠤᠴᠠ ᠶᠢᠨ ᠬᠢᠨ ᠳᠠᠭᠠᠨ ᠢᠷᠡᠭᠰᠡᠨ ᠲᠤᠯᠠ ᠰᠡᠳᠬᠢᠯ ᠢᠶᠠᠨ ᠲᠡᠩᠬᠡᠷᠡᠭᠦᠯᠦᠭᠡᠳ ᠠᠶᠠᠨ ᠵᠠᠮ ᠳᠠᠭᠠᠨ ᠭᠠᠷᠤᠭᠠᠷᠠᠢ》 ᠭᠡᠰᠡᠨ ᠳᠦ᠂ ᠲᠡᠳᠡ᠄ 《ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠴᠢᠨᠢ ᠪᠣᠯᠣᠭ》 ᠭᠡᠪᠡ᠃ 6 ᠠᠪᠷᠠᠬᠠᠮ ᠮᠠᠢᠬᠠᠨ ᠳᠠᠭᠠᠨ ᠶᠠᠭᠠᠷᠠᠨ ᠣᠴᠢᠵᠤ᠂ ᠰᠠᠷᠠᠾ ᠳᠤ᠄ 《ᠲᠦᠷᠭᠡᠯᠡᠭᠡᠷᠡᠢ︕ ᠭᠤᠷᠪᠠᠨ ᠰᠧᠶᠠ 31 ᠰᠠᠢᠨ ᠭᠤᠯᠢᠷ ᠠᠪᠤᠭᠠᠳ ᠵᠢᠭᠤᠷᠠᠵᠤ᠂ ᠪᠣᠣᠪᠣ ᠬᠢᠭᠡᠷᠡᠢ》 ᠭᠡᠳ 7 ᠬᠣᠲᠠ ᠤᠷᠤᠭᠤ ᠪᠠᠨ ᠭᠦᠶᠦᠨ ᠣᠴᠢᠵᠤ᠂ ᠨᠢᠭᠡᠨ ᠲᠠᠷᠭᠤᠨ ᠰᠠᠢᠨ ᠦᠬᠡᠷ ᠪᠠᠷᠢᠵᠤ ᠠᠪᠴᠢᠷᠠᠭᠠᠳ᠂ ᠵᠠᠷᠤᠴᠠ ᠳᠠᠭᠠᠨ ᠥᠭᠭᠥᠭᠰᠡᠨ ᠳᠦ᠂ ᠵᠠᠷᠤᠴᠠ ᠨᠢ ᠶᠠᠭᠠᠷᠠᠪᠴᠢᠯᠠᠨ ᠲᠡᠭᠦᠨ ᠢᠶᠡᠷ ᠬᠣᠭᠣᠯᠠ ᠪᠡᠯᠡᠳᠬᠡᠪᠡ᠃ 8 ᠠᠪᠷᠠᠬᠠᠮ ᠡᠭᠡᠳᠡᠮ᠂ ᠰᠦ᠋ ᠪᠣᠯᠣᠨ ᠵᠠᠷᠤᠴᠠ ᠶᠢᠨ ᠢᠶᠠᠨ ᠪᠡᠯᠡᠳᠬᠡᠭᠰᠡᠨ ᠦᠬᠡᠷ ᠦᠨ ᠮᠢᠬᠠ ᠶᠢ ᠲᠡᠳᠡᠨ ᠦ ᠡᠮᠦᠨᠡ ᠠᠪᠴᠢᠷᠠᠵᠤ ᠲᠠᠯᠪᠢᠪᠠ᠃ ᠮᠣᠳᠣᠨ ᠤ ᠳᠣᠣᠷᠠ ᠲᠡᠳᠡᠨ ᠳᠦ ᠦᠢᠯᠡᠴᠢᠯᠡᠵᠦ ᠪᠠᠢᠬᠤ ᠳᠤᠨᠢ ᠲᠡᠳᠡ ᠬᠣᠭᠣᠯᠠ ᠢᠳᠡᠭᠡᠳ᠂ 9 ᠠᠪᠷᠠᠬᠠᠮ ᠠᠴᠠ᠄ 《ᠴᠢᠨᠦ ᠡᠬᠡᠨᠡᠷ ᠰᠠᠷᠠᠾ ᠬᠠᠮᠢᠭᠠ ᠪᠠᠢᠨᠠ ᠪᠤᠢ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ ᠲᠡᠷᠡ᠄ 《ᠲᠡᠨᠳᠡ᠂ ᠮᠠᠢᠬᠠᠨ ᠳᠠᠭᠠᠨ ᠪᠠᠢᠨᠠ》 ᠭᠡᠪᠡ᠃ 10 ᠨᠢᠭᠡ ᠨᠢ᠄ 《ᠳᠠᠷᠠᠭᠠ ᠵᠢᠯ ᠤᠨ ᠡᠨᠡ ᠴᠠᠭ ᠲᠤ ᠪᠢ ᠴᠢᠮᠠ ᠤᠷᠤᠭᠤ ᠯᠠᠪᠲᠠᠢ ᠡᠷᠭᠢᠵᠦ ᠢᠷᠡᠨᠡ᠂ ᠲᠡᠭᠡᠬᠦ ᠳᠦ ᠡᠬᠡᠨᠡᠷ ᠰᠠᠷᠠᠾ ᠴᠢᠨᠢ ᠬᠦᠦ ᠲᠡᠢ ᠪᠣᠯᠬᠤ ᠪᠣᠯᠣᠨᠠ︕》 ᠭᠡᠪᠡ᠃ ᠠᠷᠤ ᠳᠤᠨᠢ ᠮᠠᠢᠬᠠᠨ ᠤ ᠡᠭᠦᠳᠡᠨ ᠳᠦ ᠪᠠᠢᠭᠰᠠᠨ ᠰᠠᠷᠠᠾ ᠡᠭᠦᠨ ᠢ ᠰᠣᠨᠣᠰᠪᠠ᠃ 11 ᠠᠪᠷᠠᠬᠠᠮ᠂ ᠰᠠᠷᠠᠾ ᠬᠣᠶᠠᠷ ᠥᠨᠳᠥᠷ ᠨᠠᠰᠤᠯᠠᠨ ᠥᠲᠡᠯᠦᠭᠰᠡᠨ ᠪᠥᠭᠡᠳ ᠰᠠᠷᠠᠾ ᠬᠡᠦᠬᠡᠳ ᠭᠠᠷᠭᠠᠬᠤ ᠨᠠᠰᠤᠨ ᠠᠴᠠ ᠪᠠᠨ ᠬᠡᠳᠦᠢᠨ ᠬᠡᠲᠦᠷᠡᠵᠡᠢ᠃ 12 ᠰᠠᠷᠠᠾ ᠳᠣᠲᠣᠷᠠ ᠪᠠᠨ ᠢᠨᠢᠶᠡᠵᠦ᠄ 《ᠪᠢ ᠬᠥᠭᠰᠢᠷᠡᠵᠦ᠂ ᠨᠥᠬᠥᠷ ᠴᠤ ᠥᠲᠡᠯᠦᠭᠰᠡᠨ᠂ ᠪᠢ ᠬᠡᠷᠬᠢᠨ ᠵᠢᠷᠭᠠᠬᠤ ᠪᠢᠯᠡ︖》 ᠭᠡᠪᠡ᠃ 13 ᠶᠣᠬᠣᠸᠠ ᠠᠪᠷᠠᠬᠠᠮ ᠳᠤ᠄ 《ᠶᠠᠭᠤᠨ ᠳᠤ ᠰᠠᠷᠠᠾ ᠢᠨᠢᠶᠡᠵᠦ᠂ 〈ᠬᠥᠭᠰᠢᠷᠡᠭᠰᠡᠨ ᠪᠢ ᠶᠠᠭᠠᠬᠢᠵᠤ ᠬᠡᠦᠬᠡᠳ ᠲᠥᠷᠥᠭᠦᠯᠵᠦ ᠴᠢᠳᠠᠬᠤ ᠶᠤᠮ ᠪᠤᠢ〉 ᠭᠡᠵᠦ ᠬᠡᠯᠡᠵᠦ ᠪᠠᠢᠨᠠ︖ 14 ᠶᠣᠬᠣᠸᠠ ᠳᠤ ᠬᠡᠴᠡᠭᠦᠦ ᠶᠠᠭᠤᠮᠠ ᠪᠠᠢᠳᠠᠭ ᠭᠡᠵᠢ ᠤᠤ︖ ᠵᠢᠯ ᠤᠨ ᠳᠠᠷᠠᠭᠠ ᠡᠨᠡ ᠴᠠᠭ ᠲᠤ᠂ ᠶᠠᠭ ᠲᠣᠭᠲᠠᠭᠰᠠᠨ ᠡᠨᠡ ᠴᠠᠭ ᠲᠤ ᠪᠢ ᠴᠢᠮᠠ ᠤᠷᠤᠭᠤ ᠡᠷᠭᠢᠵᠦ ᠢᠷᠡᠨᠡ᠃ ᠲᠡᠭᠡᠬᠦ ᠳᠦ ᠰᠠᠷᠠᠾ ᠬᠦᠦ ᠲᠡᠢ ᠪᠣᠯᠬᠤ ᠪᠣᠯᠣᠨᠠ》 ᠭᠡᠬᠦ ᠳᠦ᠂ 15 ᠰᠠᠷᠠᠾ ᠠᠶᠤᠭᠰᠠᠨ ᠳᠠᠭᠠᠨ᠄ 《ᠪᠢ ᠢᠨᠢᠶᠡᠭᠡ ᠦᠭᠡᠢ》 ᠭᠡᠵᠦ ᠮᠡᠯᠵᠢᠪᠡ᠃ ᠬᠠᠷᠢᠨ ᠲᠡᠷᠡ ᠪᠡᠷ᠄ 《ᠦᠭᠡᠢ᠂ ᠴᠢ ᠢᠨᠢᠶᠡᠭᠰᠡᠨ ᠰᠢᠦ ᠳᠠ》 ᠭᠡᠵᠡᠢ᠃
ᠠᠪᠷᠠᠬᠠᠮ ᠰᠣᠳᠣᠮ ᠤᠨ ᠲᠥᠯᠥᠭᠡ ᠵᠠᠭᠤᠴᠢᠯᠠᠨ ᠭᠤᠶᠤᠪᠠ
16 ᠲᠡᠷᠡ ᠬᠥᠮᠦᠰ ᠬᠥᠳᠡᠯᠦᠨ ᠲᠡᠨᠳᠡ ᠡᠴᠡ ᠭᠠᠷᠤᠭᠰᠠᠨ ᠢᠶᠠᠨ᠂ ᠰᠣᠳᠣᠮ ᠤᠨ ᠵᠦᠭ ᠬᠠᠷᠠᠪᠠ᠃ ᠠᠪᠷᠠᠬᠠᠮ ᠴᠤ ᠲᠡᠳᠡᠨ ᠢ ᠦᠳᠡᠬᠦ ᠪᠡᠷ ᠬᠠᠮᠲᠤ ᠶᠠᠪᠤᠵᠤ ᠪᠠᠢᠯᠠ᠃ 17 ᠶᠣᠬᠣᠸᠠ᠄ 《ᠪᠢ ᠶᠠᠭᠤ ᠬᠢᠬᠦ ᠭᠡᠵᠦ ᠪᠠᠢᠭᠠ ᠪᠠᠨ ᠠᠪᠷᠠᠬᠠᠮ ᠠᠴᠠ ᠨᠢᠭᠤᠨᠠ ᠭᠡᠵᠢ ᠤᠤ︖ 18 ᠠᠪᠷᠠᠬᠠᠮ ᠦᠨᠡᠬᠡᠷ ᠠᠭᠤᠤ ᠶᠡᠬᠡ᠂ ᠬᠦᠴᠦᠷᠬᠡᠭ ᠦᠨᠳᠦᠰᠦᠲᠡᠨ ᠪᠣᠯᠣᠨᠠ᠂ ᠭᠠᠵᠠᠷ ᠤᠨ ᠪᠦᠬᠦ ᠦᠨᠳᠦᠰᠦᠲᠡᠨ ᠲᠡᠭᠦᠨ ᠢᠶᠡᠷ ᠳᠠᠮᠵᠢᠨ ᠢᠷᠥᠭᠡᠭᠳᠡᠨᠡ᠃ 19 ᠪᠢ ᠲᠡᠭᠦᠨ ᠢ ᠰᠢᠯᠢᠵᠦ ᠠᠪᠤᠭᠰᠠᠨ ᠤ ᠤᠴᠢᠷ ᠨᠢ ᠲᠡᠭᠦᠨ ᠢᠶᠡᠷ ᠬᠡᠦᠬᠡᠳ ᠤᠳ ᠲᠤᠨᠢ ᠪᠣᠯᠣᠨ ᠲᠡᠭᠦᠨ ᠡᠴᠡ ᠬᠣᠢᠰᠢᠬᠢ ᠦᠷᠡ ᠤᠳᠤᠮ ᠤᠨ ᠬᠢᠨᠢ ᠭᠡᠷ ᠪᠦᠯᠢ ᠳᠤ ᠶᠣᠬᠣᠸᠠ ᠶᠢᠨ ᠵᠠᠮ ᠢ ᠳᠠᠭᠠᠵᠤ ᠵᠥᠪ ᠪᠠ ᠰᠢᠳᠤᠷᠭᠤ ᠪᠠᠷ ᠦᠢᠯᠡᠳᠬᠦ ᠶᠢ ᠵᠢᠭᠠᠪᠤᠷᠢᠯᠠᠭᠤᠯᠬᠤ ᠶᠢᠨ ᠲᠤᠯᠠᠳᠠ ᠶᠤᠮ᠃ ᠲᠡᠭᠡᠭᠰᠡᠨ ᠢᠶᠡᠷ ᠶᠣᠬᠣᠸᠠ ᠲᠡᠭᠦᠨ ᠳᠦ ᠠᠮᠠᠯᠠᠭᠰᠠᠨ ᠢᠶᠠᠨ ᠪᠡᠶᠡᠯᠡᠭᠦᠯᠬᠦ ᠪᠣᠯᠣᠨᠠ》 ᠭᠡᠪᠡ᠃ 20 ᠲᠡᠭᠡᠭᠡᠳ ᠶᠣᠬᠣᠸᠠ᠄ 《ᠰᠣᠳᠣᠮ᠂ ᠭᠣᠮᠣᠷᠠ ᠬᠣᠶᠠᠷ ᠤᠨ ᠬᠠᠰᠬᠢᠷᠤᠭᠠᠨ ᠠᠰᠤᠷᠤ ᠶᠡᠬᠡ᠂ ᠭᠡᠮ ᠨᠢᠭᠦᠯ ᠨᠢ ᠠᠰᠤᠷᠤ ᠬᠦᠨᠳᠦ ᠪᠠᠢᠨᠠ᠃ 21 ᠪᠢ ᠣᠳᠣ ᠳᠣᠭᠣᠭᠰᠢ ᠪᠠᠭᠤᠵᠤ᠂ ᠲᠡᠳᠡᠨ ᠦ ᠬᠢᠳᠡᠭ ᠪᠦᠬᠦᠨ ᠨᠢ ᠮᠢᠨᠦ ᠰᠣᠨᠣᠷ ᠲᠤ ᠬᠦᠷᠦᠭᠰᠡᠨ ᠬᠠᠰᠬᠢᠷᠤᠭᠠᠨ ᠲᠠᠢ ᠠᠳᠠᠯᠢ ᠡᠰᠡᠬᠦ ᠶᠢ ᠦᠵᠡᠶᠡ᠂ ᠲᠡᠢᠮᠦ ᠪᠢᠰᠢ ᠪᠠᠢᠭᠰᠠᠨ ᠴᠤ ᠪᠢ ᠮᠡᠳᠡᠬᠦ ᠶᠣᠰᠣᠲᠠᠢ》 ᠭᠡᠪᠡ᠃
22 ᠨᠥᠭᠥᠭᠡ ᠬᠥᠮᠦᠰ ᠨᠢ ᠲᠡᠨᠳᠡ ᠡᠴᠡ ᠡᠷᠭᠢᠵᠦ᠂ ᠰᠣᠳᠣᠮ ᠤᠨ ᠵᠦᠭ ᠣᠳᠬᠤ ᠳᠤ᠂ ᠠᠪᠷᠠᠬᠠᠮ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠵᠣᠭᠰᠣᠭᠰᠠᠭᠠᠷ ᠬᠣᠴᠣᠷᠴᠠᠢ᠃ 23 ᠠᠪᠷᠠᠬᠠᠮ ᠲᠡᠭᠦᠨ ᠤᠷᠤᠭᠤ ᠣᠢᠷᠠᠲᠤᠨ ᠣᠴᠢᠵᠤ᠄ 《ᠲᠠ ᠵᠥᠪᠲᠦ ᠬᠥᠮᠦᠨ ᠢ ᠦᠨᠡᠬᠡᠷ ᠪᠤᠷᠤᠭᠤᠲᠤ ᠬᠥᠮᠦᠨ ᠲᠡᠢ ᠬᠠᠮᠲᠤ ᠤᠰᠠᠳᠬᠠᠬᠤ ᠤᠤ︖ 24 ᠲᠡᠷᠡ ᠬᠣᠲᠠ ᠶᠢᠨ ᠳᠣᠲᠣᠷᠠ ᠵᠥᠪᠲᠦ ᠬᠥᠮᠦᠨ ᠲᠠᠪᠢ ᠪᠠᠢᠭᠰᠠᠨ ᠴᠤ᠂ ᠲᠠ ᠵᠠᠪᠠᠯ ᠤᠰᠠᠳᠬᠠᠬᠤ ᠤᠤ︖ ᠲᠡᠷᠡ ᠬᠦ ᠲᠠᠪᠢᠨ ᠵᠥᠪᠲᠦ ᠬᠥᠮᠦᠨ ᠦ ᠲᠥᠯᠥᠭᠡ ᠲᠡᠷᠡ ᠭᠠᠵᠠᠷ ᠢ ᠥᠷᠥᠰᠢᠶᠡᠬᠦ ᠦᠭᠡᠢ ᠤᠤ︖ 25 ᠡᠢᠮᠦ ᠶᠠᠪᠤᠳᠠᠯ ᠲᠠᠨ ᠠᠴᠠ ᠬᠣᠯᠠ ᠪᠠᠢᠭ︕ ᠵᠥᠪᠲᠦ ᠬᠥᠮᠦᠨ ᠢ ᠪᠤᠷᠤᠭᠤᠲᠤ ᠬᠥᠮᠦᠨ ᠲᠡᠢ ᠬᠠᠮᠲᠤ ᠳᠤᠨᠢ ᠰᠥᠨᠥᠭᠡᠵᠦ᠂ ᠵᠥᠪᠲᠡᠨ ᠳᠦ ᠪᠤᠷᠤᠭᠤᠲᠠᠨ ᠲᠠᠢ ᠠᠳᠠᠯᠢ ᠬᠠᠨᠳᠤᠬᠤ ᠨᠢ ᠲᠠᠨ ᠠᠴᠠ ᠬᠣᠯᠠ ᠪᠠᠢᠭ︕ ᠪᠦᠬᠦ ᠭᠠᠵᠠᠷ ᠳᠡᠯᠡᠬᠡᠢ ᠶᠢ ᠰᠢᠭᠦᠭᠴᠢ ᠲᠠ ᠰᠢᠳᠤᠷᠭᠤ ᠪᠠᠷ ᠦᠢᠯᠡᠳᠬᠦ ᠦᠭᠡᠢ ᠭᠡᠵᠢ ᠤᠤ︖》 ᠭᠡᠪᠡ᠃ 26 ᠶᠣᠬᠣᠸᠠ᠄ 《ᠬᠡᠷᠪᠡ ᠪᠢ ᠰᠣᠳᠣᠮ ᠬᠣᠲᠠ ᠶᠢᠨ ᠬᠢᠨ ᠤ ᠳᠣᠲᠣᠷᠠ ᠠᠴᠠ ᠵᠥᠪᠲᠦ ᠬᠥᠮᠦᠨ ᠲᠠᠪᠢ ᠶᠢ ᠣᠯᠪᠠᠯ ᠲᠡᠳᠡᠨ ᠦ ᠲᠥᠯᠥᠭᠡ ᠲᠡᠷᠡ ᠭᠠᠵᠠᠷ ᠢ ᠪᠦᠬᠦᠯᠢ ᠳᠦᠨᠢ ᠥᠷᠥᠰᠢᠶᠡᠨᠡ》 ᠭᠡᠰᠡᠨ ᠳᠦ᠂ 27 ᠠᠪᠷᠠᠬᠠᠮ᠄ 《ᠡᠵᠡᠨ ᠮᠢᠨᠢ᠂ ᠲᠣᠭᠣᠰᠣ ᠰᠢᠷᠣᠢ ᠪᠤᠶᠤ ᠦᠨᠡᠰᠦ ᠮᠡᠲᠦ ᠥᠴᠦᠬᠡᠨ ᠪᠢ ᠲᠠᠨ ᠳᠤ ᠦᠭᠡ ᠬᠡᠯᠡᠬᠦ ᠪᠡᠷ ᠵᠢᠷᠦᠬᠡᠯᠡᠯᠡ᠃ 28 ᠲᠡᠨᠳᠡ ᠲᠠᠪᠢᠨ ᠵᠥᠪᠲᠦ ᠬᠥᠮᠦᠨ ᠡᠴᠡ ᠲᠠᠪᠤᠨ ᠬᠥᠮᠦᠨ ᠳᠤᠲᠠᠯᠠ ᠴᠤ ᠭᠡᠰᠡᠨ᠂ ᠲᠠᠪᠤ ᠳᠤᠲᠠᠭᠰᠠᠨ ᠤ ᠤᠴᠢᠷ ᠢᠶᠠᠷ ᠥᠨᠥᠬᠢ ᠬᠣᠲᠠ ᠶᠢ ᠪᠦᠬᠦᠯᠢ ᠳᠦᠨᠢ ᠤᠰᠠᠳᠬᠠᠬᠤ ᠤᠤ︖》 ᠭᠡᠰᠡᠨ ᠳᠦ᠂ ᠶᠣᠬᠣᠸᠠ᠄ 《ᠬᠡᠷᠪᠡ ᠪᠢ ᠲᠡᠨᠳᠡ ᠡᠴᠡ ᠳᠥᠴᠢᠨ ᠲᠠᠪᠤ ᠶᠢ ᠣᠯᠪᠠᠯ ᠤᠰᠠᠳᠬᠠᠬᠤ ᠦᠭᠡᠢ》 ᠭᠡᠵᠦ ᠠᠢᠯᠠᠳᠴᠠᠢ᠃ 29 ᠠᠪᠷᠠᠬᠠᠮ ᠳᠠᠬᠢᠨ᠄ 《ᠲᠡᠨᠳᠡ ᠳᠥᠴᠢ ᠣᠯᠳᠠᠪᠠᠯ︖》 ᠭᠡᠬᠦ ᠳᠦ᠂ 《ᠳᠥᠴᠢ ᠶᠢᠨ ᠲᠥᠯᠥᠭᠡ ᠤᠰᠠᠳᠬᠠᠬᠤ ᠦᠭᠡᠢ》 ᠭᠡᠪᠡ᠃ 30 ᠠᠪᠷᠠᠬᠠᠮ᠄ 《ᠡᠵᠡᠨ ᠮᠢᠨᠢ᠂ ᠲᠠ ᠪᠢᠲᠡᠭᠡᠢ ᠠᠭᠤᠷᠯᠠᠭᠠᠷᠠᠢ᠃ ᠪᠢ ᠨᠢᠭᠡ ᠦᠭᠡ ᠬᠡᠯᠡᠶᠡ᠃ ᠲᠡᠨᠳᠡ ᠡᠴᠡ ᠭᠤᠴᠢ ᠣᠯᠳᠠᠪᠠᠯ︖》 ᠭᠡᠰᠡᠨ ᠳᠦ᠂ ᠲᠡᠷᠡ ᠪᠡᠷ᠄ 《ᠲᠡᠨᠳᠡ ᠡᠴᠡ ᠭᠤᠴᠢ ᠶᠢ ᠣᠯᠪᠠᠯ ᠤᠰᠠᠳᠬᠠᠬᠤ ᠦᠭᠡᠢ》 ᠭᠡᠵᠡᠢ᠃ 31 ᠠᠪᠷᠠᠬᠠᠮ᠄ 《ᠡᠵᠡᠨ ᠮᠢᠨᠢ᠂ ᠪᠢ ᠲᠠᠨ ᠳᠤ ᠦᠭᠡ ᠬᠡᠯᠡᠬᠦ ᠪᠡᠷ ᠵᠢᠷᠦᠬᠡᠯᠡᠶᠡ᠃ ᠲᠡᠨᠳᠡ ᠡᠴᠡ ᠬᠣᠷᠢ ᠣᠯᠳᠠᠪᠠᠯ︖》 ᠭᠡᠰᠡᠨ ᠳᠦ᠂ ᠲᠡᠷᠡ ᠪᠡᠷ᠄ 《ᠬᠣᠷᠢ ᠶᠢᠨ ᠲᠥᠯᠥᠭᠡ ᠤᠰᠠᠳᠬᠠᠬᠤ ᠦᠭᠡᠢ》 ᠭᠡᠵᠡᠢ᠃ 32 ᠠᠪᠷᠠᠬᠠᠮ᠄ 《ᠡᠵᠡᠨ ᠮᠢᠨᠢ᠂ ᠲᠠ ᠪᠢᠲᠡᠭᠡᠢ ᠠᠭᠤᠷᠯᠠᠭᠠᠷᠠᠢ᠃ ᠪᠢ ᠳᠠᠬᠢᠨ ᠭᠠᠭᠴᠠᠬᠠᠨ ᠤᠳᠠᠭᠠ ᠯᠠ ᠨᠡᠮᠡᠵᠦ ᠬᠡᠯᠡᠶᠡ᠃ ᠲᠡᠨᠳᠡ ᠡᠴᠡ ᠠᠷᠪᠠ ᠣᠯᠳᠠᠪᠠᠯ︖》 ᠭᠡᠰᠡᠨ ᠳᠦ᠂ ᠲᠡᠷᠡ ᠪᠡᠷ᠄ 《ᠪᠢ ᠠᠷᠪᠠ ᠶᠢᠨ ᠲᠥᠯᠥᠭᠡ ᠤᠰᠠᠳᠬᠠᠬᠤ ᠦᠭᠡᠢ》 ᠭᠡᠵᠡᠢ᠃ 33 ᠶᠣᠬᠣᠸᠠ ᠠᠪᠷᠠᠬᠠᠮ ᠲᠠᠢ ᠶᠠᠷᠢᠵᠤ ᠳᠠᠭᠤᠰᠤᠭᠠᠳ ᠣᠳᠣᠭᠰᠠᠨ ᠪᠥᠭᠡᠳ ᠠᠪᠷᠠᠬᠠᠮ ᠴᠤ ᠥᠪᠡᠷ ᠦᠨ ᠢᠶᠠᠨ ᠭᠠᠵᠠᠷ ᠤᠷᠤᠭᠤ ᠬᠠᠷᠢᠭᠰᠠᠨ ᠪᠠᠢᠯᠠ᠃