ᠡᠬᠢᠯᠡᠯ ᠠᠷᠪᠠᠨ ᠳᠣᠯᠣᠭᠠ
ᠬᠥᠪᠴᠢᠷᠬᠡᠢ ᠬᠥᠨᠳᠡᠬᠦ ᠭᠡᠷᠡ
1 ᠠᠪᠷᠠᠮ ᠶᠡᠷᠡ ᠶᠢᠰᠦᠨ ᠨᠠᠰᠤᠲᠠᠢ ᠪᠠᠢᠬᠤ ᠳᠤ᠂ ᠶᠣᠬᠣᠸᠠ ᠠᠪᠷᠠᠮ ᠳᠤ ᠦᠵᠡᠭᠳᠡᠵᠦ᠄ 《ᠪᠢ ᠪᠣᠯ ᠲᠡᠭᠦᠰ ᠬᠦᠴᠦᠲᠦ ᠪᠤᠷᠬᠠᠨ ᠴᠢ ᠮᠢᠨᠦ ᠡᠮᠦᠨᠡ ᠶᠠᠪᠤᠵᠤ᠂ ᠥ ᠦᠭᠡᠢ ᠲᠡᠭᠦᠰ ᠪᠠᠢᠭᠲᠤᠨ᠃
2 ᠴᠢ ᠪᠢᠳᠡ ᠬᠣᠶᠠᠷ ᠤᠨ ᠬᠣᠭᠣᠷᠣᠨᠳᠣ ᠪᠢ ᠭᠡᠷᠡ ᠪᠡᠨ ᠲᠣᠭᠲᠠᠭᠠᠵᠤ ᠴᠢᠨᠦ ᠦᠷᠡ ᠤᠳᠤᠮ ᠢ ᠦᠯᠡᠮᠵᠢ ᠶᠡᠬᠡ ᠪᠡᠷ ᠣᠯᠠᠰᠢᠷᠠᠭᠤᠯᠤᠨᠠ》 ᠭᠡᠪᠡ᠃
3 ᠠᠪᠷᠠᠮ ᠨᠢᠭᠤᠷ ᠢᠶᠠᠨ ᠭᠠᠵᠠᠷ ᠲᠤ ᠬᠦᠷᠭᠡᠨ ᠪᠥᠬᠥᠢᠭᠰᠡᠨ ᠳᠦ᠂ ᠪᠤᠷᠬᠠᠨ ᠲᠡᠭᠦᠨ ᠳᠦ ᠬᠠᠨᠳᠤᠨ᠄
4 《ᠬᠠᠷᠠ᠂ ᠴᠢᠮᠠ ᠲᠠᠢ ᠪᠠᠢᠭᠤᠯᠤᠭᠰᠠᠨ ᠮᠢᠨᠦ ᠭᠡᠷᠡ᠄ ᠴᠢ ᠣᠯᠠᠨ ᠦᠨᠳᠦᠰᠦᠲᠡᠨ ᠦ ᠡᠪᠦᠭᠡ ᠪᠣᠯᠣᠨᠠ᠃
5 ᠴᠢᠮᠠᠶᠢ ᠪᠢ ᠣᠯᠠᠨ ᠦᠨᠳᠦᠰᠦᠲᠡᠨ ᠦ ᠡᠪᠦᠭᠡ ᠪᠣᠯᠭᠠᠭᠰᠠᠨ ᠤᠴᠢᠷ ᠡᠭᠦᠨ ᠡᠴᠡ ᠬᠣᠢᠰᠢ ᠴᠢᠨᠦ ᠨᠡᠷᠡ ᠠᠪᠷᠠᠮ 26 ᠪᠢᠰᠢ᠂ ᠬᠠᠷᠢᠨ ᠠᠪᠷᠠᠬᠠᠮ 27 ᠭᠡᠭᠳᠡᠬᠦ ᠪᠣᠯᠣᠨᠠ᠃
6 ᠪᠢ ᠴᠢᠮᠠᠶᠢ ᠦᠯᠡᠮᠵᠢ ᠶᠡᠬᠡ ᠦᠷᠡᠵᠢᠭᠦᠯᠦᠨ᠂ ᠴᠢᠮᠠ ᠠᠴᠠ ᠣᠯᠠᠨ ᠦᠨᠳᠦᠰᠦᠲᠡᠨ ᠢ ᠡᠭᠦᠰᠭᠡᠨᠡ᠃ ᠴᠢᠮᠠ ᠠᠴᠠ ᠬᠠᠭᠠᠳ ᠴᠤ ᠭᠠᠷᠬᠤ ᠪᠣᠯᠣᠨᠠ᠃ 7 ᠪᠢ ᠴᠢᠮᠠ ᠳᠤ ᠪᠣᠯᠣᠨ ᠴᠢᠮᠠ ᠠᠴᠠ ᠬᠣᠢᠰᠢᠬᠢ ᠦᠷᠡ ᠤᠳᠤᠮ ᠳᠤ ᠴᠢᠨᠢ ᠪᠤᠷᠬᠠᠨ ᠨᠢ ᠪᠣᠯᠬᠤ ᠶᠢᠨ ᠲᠤᠯᠠᠳᠠ ᠥᠪᠡᠷ ᠦᠨ ᠢᠶᠠᠨ ᠭᠡᠷᠡ ᠶᠢ ᠴᠢ ᠪᠣᠯᠣᠨ ᠴᠢᠮᠠ ᠠᠴᠠ ᠬᠣᠢᠰᠢᠬᠢ ᠦᠷᠡ ᠤᠳᠤᠮ ᠲᠠᠢ ᠴᠢᠨᠢ᠂ ᠬᠠᠮᠤᠭ ᠦᠶᠡ ᠶᠢᠨ ᠬᠢᠨ ᠲᠠᠢ ᠴᠢᠨᠢ ᠮᠥᠩᠬᠡ ᠶᠢᠨ ᠭᠡᠷᠡ ᠪᠣᠯᠭᠠᠨ ᠲᠣᠭᠲᠠᠭᠠᠨᠠ᠃ 8 ᠴᠠᠭᠠᠴᠢᠨ ᠪᠣᠯᠵᠤ ᠴᠢᠨᠦ ᠠᠮᠢᠳᠤᠷᠠᠨ ᠰᠠᠭᠤᠭᠠ ᠡᠨᠡ ᠭᠠᠵᠠᠷ ᠨᠤᠲᠤᠭ ᠪᠤᠶᠤ ᠺᠠᠨᠠᠨ ᠤ ᠪᠦᠬᠦ ᠭᠠᠵᠠᠷ ᠨᠤᠲᠤᠭ ᠢ ᠪᠢ ᠴᠢᠮᠠ ᠳᠤ ᠪᠣᠯᠣᠨ ᠴᠢᠨᠦ ᠦᠷᠡ ᠤᠳᠤᠮ ᠤᠨ ᠬᠢᠨ ᠳᠤ ᠮᠥᠩᠬᠡ ᠶᠢᠨ ᠥᠮᠴᠢ ᠪᠣᠯᠭᠠᠨ ᠥᠭᠭᠥᠭᠡᠳ ᠲᠡᠳᠡᠨ ᠦ ᠪᠤᠷᠬᠠᠨ ᠨᠢ ᠪᠣᠯᠣᠨᠠ》 ᠭᠡᠪᠡ᠃
9 ᠲᠡᠭᠡᠭᠡᠳ ᠪᠤᠷᠬᠠᠨ ᠠᠪᠷᠠᠬᠠᠮ ᠳᠤ᠄ 《ᠬᠠᠷᠢᠨ ᠴᠢ ᠮᠢᠨᠦ ᠭᠡᠷᠡ ᠶᠢ ᠰᠠᠬᠢᠭ᠂ ᠴᠢᠨᠦ ᠦᠷᠡ ᠤᠳᠤᠮ ᠴᠤ ᠠᠳᠠᠯᠢᠬᠠᠨ ᠰᠠᠬᠢᠭ︕ 10 ᠡᠷᠡ ᠬᠦᠢᠰᠦᠲᠡᠨ ᠪᠣᠯᠭᠠᠨ ᠨᠢ ᠬᠥᠪᠴᠢᠷᠬᠡᠢ ᠬᠥᠨᠳᠡᠬᠦ ᠶᠣᠰᠣᠲᠠᠢ᠃ ᠴᠢ ᠪᠣᠯᠣᠨ ᠴᠢᠮᠠ ᠠᠴᠠ ᠬᠣᠢᠰᠢᠬᠢ ᠦᠷᠡ ᠤᠳᠤᠮ ᠤᠨ ᠴᠢᠨᠢ ᠰᠠᠬᠢᠬᠤ ᠶᠣᠰᠣᠲᠠᠢ ᠮᠢᠨᠦ ᠭᠡᠷᠡ ᠪᠣᠯ ᠡᠨᠡ᠃ 11 ᠲᠠ ᠨᠠᠷ ᠬᠥᠪᠴᠢᠷᠬᠡᠢ ᠶᠢᠨ ᠠᠷᠠᠰᠤ ᠪᠠᠨ ᠣᠭᠲᠣᠯᠣᠭᠤᠯᠤᠭᠲᠤᠨ᠃ ᠡᠨᠡ ᠨᠢ ᠲᠠ ᠨᠠᠷ ᠪᠣᠯᠣᠨ ᠮᠢᠨᠦ ᠬᠣᠭᠣᠷᠣᠨᠳᠣ ᠪᠠᠢᠭᠤᠯᠤᠭᠰᠠᠨ ᠭᠡᠷᠡ ᠶᠢᠨ ᠲᠡᠮᠳᠡᠭ ᠪᠣᠯᠣᠨᠠ᠃ 12 ᠦᠶᠡ ᠶᠢᠨ ᠦᠶᠡ ᠳᠦ᠂ ᠲᠠ ᠨᠠᠷ ᠤᠨ ᠨᠠᠢ᠌ᠮᠠᠨ ᠬᠣᠨᠣᠭ ᠲᠠᠢ ᠬᠥᠪᠡᠭᠦᠳ ᠪᠦᠭᠦᠳᠡᠭᠡᠷ ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠬᠦ ᠶᠣᠰᠣᠲᠠᠢ᠂ ᠲᠠᠨ ᠤ ᠭᠡᠷ ᠲᠦ ᠲᠥᠷᠥᠭᠰᠡᠨ ᠬᠡᠦᠬᠡᠳ ᠴᠤ ᠭᠡᠰᠡᠨ᠂ ᠬᠠᠷᠢ ᠶᠢᠨ ᠬᠥᠮᠦᠨ ᠡᠴᠡ ᠮᠥᠩᠭᠥ ᠪᠡᠷ ᠠᠪᠤᠭᠰᠠᠨ ᠲᠠ ᠨᠠᠷ ᠤᠨ ᠦᠷᠡ ᠪᠢᠰᠢ ᠬᠡᠦᠬᠡᠳ ᠴᠤ ᠭᠡᠰᠡᠨ ᠢᠯᠭᠠᠭᠠ ᠦᠭᠡᠢ᠃ 13 ᠲᠠᠨ ᠤ ᠭᠡᠷ ᠲᠦ ᠲᠥᠷᠥᠭᠰᠡᠨ ᠨᠢ ᠴᠤ᠂ ᠮᠥᠩᠭᠥ ᠪᠡᠷ ᠠᠪᠤᠭᠰᠠᠨ ᠨᠢ ᠴᠤ ᠬᠥᠪᠴᠢᠷᠬᠡᠢ ᠪᠡᠨ ᠬᠥᠨᠳᠡᠭᠦᠯᠬᠦ ᠶᠣᠰᠣᠲᠠᠢ᠃ ᠮᠢᠨᠦ ᠭᠡᠷᠡ ᠲᠠ ᠨᠠᠷ ᠤᠨ ᠮᠢᠬᠠᠨ ᠪᠡᠶᠡ ᠳᠦ ᠪᠠᠢᠭᠰᠠᠭᠠᠷ ᠪᠠᠢᠵᠤ ᠮᠥᠩᠬᠡ ᠶᠢᠨ ᠭᠡᠷᠡ ᠪᠣᠯᠬᠤ ᠪᠣᠯᠣᠨᠠ᠃ 14 ᠬᠥᠪᠴᠢᠷᠬᠡᠢ ᠪᠡᠨ ᠬᠥᠨᠳᠡᠭᠦᠯᠦᠭᠡ ᠦᠭᠡᠢ ᠪᠤᠶᠤ ᠬᠥᠪᠴᠢᠷᠬᠡᠢ ᠶᠢᠨ ᠠᠷᠠᠰᠤ ᠪᠠᠨ ᠣᠭᠲᠣᠯᠣᠭᠤᠯᠤᠭᠠ ᠦᠭᠡᠢ ᠡᠷᠡ ᠬᠦᠢᠰᠦᠲᠡᠨ ᠪᠣᠯᠭᠠᠨ ᠠᠷᠠᠳ ᠲᠦᠮᠡᠨ ᠡᠴᠡ ᠪᠡᠨ ᠲᠠᠰᠤᠯᠤᠭᠳᠠᠬᠤ ᠪᠣᠯᠣᠨᠠ᠃ ᠲᠡᠷᠡ ᠬᠥᠮᠦᠨ ᠮᠢᠨᠦ ᠭᠡᠷᠡ ᠶᠢ ᠵᠥᠷᠢᠴᠡᠭᠰᠡᠨ》 ᠭᠡᠪᠡ᠃
15 ᠪᠤᠷᠬᠠᠨ ᠠᠪᠷᠠᠬᠠᠮ ᠳᠤ᠄ 《ᠴᠢᠨᠦ ᠡᠬᠡᠨᠡᠷ ᠰᠠᠷᠠᠢ ᠶᠢᠨ ᠬᠤᠪᠢ ᠳᠤ᠂ ᠴᠢ ᠰᠠᠷᠠᠢ 28 ᠭᠡᠵᠦ ᠳᠠᠭᠤᠳᠠᠬᠤ ᠪᠠᠨ ᠪᠣᠯᠢᠵᠤ᠂ ᠰᠠᠷᠠᠾ 29 ᠭᠡᠵᠦ ᠨᠡᠷᠡᠯᠡᠭᠡᠷᠡᠢ᠃ 16 ᠪᠢ ᠲᠡᠭᠦᠨ ᠢ ᠢᠪᠡᠭᠡᠵᠦ᠂ ᠲᠡᠭᠦᠨ ᠢᠶᠡᠷ ᠴᠢᠮᠠ ᠳᠤ ᠬᠦᠦ ᠥᠭᠭᠥᠨᠡ᠃ ᠪᠢ ᠲᠡᠭᠦᠨ ᠢ ᠢᠪᠡᠭᠡᠵᠦ᠂ ᠲᠡᠷᠡ ᠪᠡᠷ ᠣᠯᠠᠨ ᠦᠨᠳᠦᠰᠦᠲᠡᠨ ᠦ ᠡᠬᠡ ᠪᠣᠯᠣᠨᠠ᠂ ᠤᠯᠤᠰ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠬᠠᠭᠠᠳ ᠲᠡᠭᠦᠨ ᠡᠴᠡ ᠡᠭᠦᠰᠦᠨᠡ》 ᠭᠡᠵᠡᠢ᠃ 17 ᠲᠡᠭᠡᠬᠦ ᠳᠦ ᠠᠪᠷᠠᠬᠠᠮ ᠨᠢᠭᠤᠷ ᠢᠶᠠᠨ ᠭᠠᠵᠠᠷ ᠬᠦᠷᠭᠡᠭᠰᠡᠭᠡᠷ ᠢᠨᠢᠶᠡᠵᠦ᠄ 《ᠵᠠᠭᠤᠨ ᠨᠠᠰᠤᠲᠠᠢ ᠬᠥᠮᠦᠨ ᠳᠦ ᠬᠦᠦ ᠲᠥᠷᠥᠨᠡ ᠭᠡᠵᠢ ᠤᠤ︖ ᠰᠠᠷᠠᠾ ᠶᠡᠷᠡᠨ ᠨᠠᠰᠤᠲᠠᠢ ᠠᠲᠠᠯᠠ ᠪᠠᠨ ᠬᠦᠦ ᠲᠥᠷᠥᠭᠦᠯᠦᠨᠡ ᠭᠡᠵᠢ ᠤᠤ︖》 ᠭᠡᠵᠦ ᠰᠡᠳᠬᠢᠯ ᠳᠣᠲᠣᠷᠠ ᠪᠠᠨ ᠪᠣᠳᠣᠵᠠᠢ᠃ 18 ᠠᠪᠷᠠᠬᠠᠮ ᠪᠤᠷᠬᠠᠨ ᠳᠤ ᠬᠠᠨᠳᠤᠵᠤ᠄ 《ᠢᠱᠮᠠᠶᠧᠯ ᠬᠠᠷᠢᠨ ᠲᠠᠨ ᠤ ᠡᠮᠦᠨᠡ ᠠᠮᠢᠳᠤᠷᠠᠬᠤ ᠪᠣᠯᠲᠤᠭᠠᠢ》 ᠭᠡᠵᠦ ᠬᠡᠯᠡᠭᠰᠡᠨ ᠳᠦ᠂ 19 ᠪᠤᠷᠬᠠᠨ᠄ 《ᠦᠭᠡᠢ ᠡ᠂ ᠴᠢᠨᠦ ᠡᠬᠡᠨᠡᠷ ᠰᠠᠷᠠᠾ ᠴᠢᠮᠠ ᠳᠤ ᠬᠦᠦ ᠲᠥᠷᠥᠭᠦᠯᠵᠦ ᠥᠭᠭᠥᠨᠡ᠃ ᠴᠢ ᠲᠡᠭᠦᠨ ᠢ ᠢᠰᠠᠺ 30 ᠭᠡᠵᠦ ᠨᠡᠷᠡᠯᠡᠨᠡ᠃ ᠲᠡᠭᠦᠨ ᠦ ᠦᠷᠡ ᠤᠳᠤᠮ ᠳᠤ ᠴᠤ ᠮᠥᠩᠬᠡ ᠶᠢᠨ ᠬᠦᠴᠦᠨ ᠲᠡᠢ ᠪᠣᠯᠬᠤ ᠭᠡᠷᠡ ᠶᠢ ᠪᠢ ᠲᠡᠭᠦᠨ ᠲᠡᠢ ᠪᠠᠢᠭᠤᠯᠤᠨᠠ᠃ 20 ᠢᠱᠮᠠᠶᠧᠯ ᠤᠨ ᠲᠤᠬᠠᠢ ᠳᠤ ᠴᠤ᠂ ᠪᠢ ᠴᠢᠨᠦ ᠬᠢ ᠶᠢ ᠰᠣᠨᠣᠰᠣᠯᠠ᠃ ᠪᠢ ᠦᠨᠡᠬᠡᠷ ᠢᠪᠡᠭᠡᠵᠦ᠂ ᠲᠡᠭᠦᠨ ᠢ ᠦᠷᠡᠵᠢᠭᠦᠯᠦᠨ ᠦᠯᠡᠮᠵᠢ ᠶᠡᠬᠡ ᠪᠡᠷ ᠣᠯᠠᠰᠢᠷᠠᠭᠤᠯᠤᠨᠠ᠃ ᠲᠡᠷᠡ ᠪᠡᠷ ᠠᠷᠪᠠᠨ ᠬᠣᠶᠠᠷ ᠨᠣᠶᠠᠨ ᠲᠥᠷᠥᠭᠦᠯᠵᠦ᠂ ᠪᠢ ᠲᠡᠭᠦᠨ ᠢ ᠶᠡᠬᠡ ᠦᠨᠳᠦᠰᠦᠲᠡᠨ ᠪᠣᠯᠭᠠᠨᠠ᠃ 21 ᠭᠡᠪᠡᠴᠦ ᠪᠢ ᠥᠪᠡᠷ ᠦᠨ ᠢᠶᠠᠨ ᠭᠡᠷᠡ ᠶᠢ ᠢᠰᠠᠺ ᠲᠠᠢ ᠯᠠ ᠪᠠᠢᠭᠤᠯᠤᠨᠠ᠃ ᠲᠡᠭᠦᠨ ᠢ ᠰᠠᠷᠠᠾ ᠢᠷᠡᠬᠦ ᠵᠢᠯ ᠤᠨ ᠡᠳᠦᠢ ᠳᠦ ᠴᠢᠮᠠ ᠳᠤ ᠲᠥᠷᠥᠭᠦᠯᠵᠦ ᠥᠭᠭᠥᠨᠡ》 ᠭᠡᠪᠡ᠃ 22 ᠲᠡᠭᠡᠭᠡᠳ ᠪᠤᠷᠬᠠᠨ ᠠᠪᠷᠠᠬᠠᠮ ᠳᠤ ᠠᠢᠯᠠᠳᠤᠭᠰᠠᠨ ᠶᠠᠷᠢᠶᠠ ᠪᠠᠨ ᠳᠠᠭᠤᠰᠬᠠᠵᠤ᠂ ᠲᠡᠭᠦᠨ ᠡᠴᠡ ᠰᠠᠯᠤᠨ᠂ ᠳᠡᠭᠡᠭᠰᠢ ᠣᠳᠪᠠ᠃
23 ᠶᠠᠭ ᠲᠡᠷᠡ ᠡᠳᠦᠷ ᠲᠡᠭᠡᠨ ᠠᠪᠷᠠᠬᠠᠮ ᠪᠤᠷᠬᠠᠨ ᠤ ᠥᠪᠡᠷ ᠲᠤᠨᠢ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠢᠱᠮᠠᠶᠧᠯ ᠬᠦᠦ ᠪᠡᠨ ᠪᠣᠯᠣᠨ ᠭᠡᠷ ᠲᠡᠭᠡᠨ ᠲᠥᠷᠥᠭᠰᠡᠨ᠂ ᠡᠰᠡᠪᠡᠯ ᠮᠥᠩᠭᠥ ᠪᠡᠷ ᠠᠪᠤᠭᠰᠠᠨ ᠪᠦᠬᠦ ᠵᠠᠷᠤᠴᠠ ᠪᠤᠶᠤ ᠭᠡᠷ ᠦᠨ ᠢᠶᠠᠨ ᠪᠦᠬᠦ ᠡᠷᠡ ᠬᠦᠢᠰᠦᠲᠡᠨ ᠦ ᠬᠥᠪᠴᠢᠷᠬᠡᠢ ᠶᠢᠨ ᠠᠷᠠᠰᠤ ᠶᠢ ᠣᠭᠲᠣᠯᠣᠭᠤᠯᠵᠠᠢ᠃ 24 ᠠᠪᠷᠠᠬᠠᠮ ᠬᠥᠪᠴᠢᠷᠬᠡᠢ ᠶᠢᠨ ᠠᠷᠠᠰᠤ ᠪᠠᠨ ᠣᠭᠲᠣᠯᠣᠭᠤᠯᠬᠤ ᠳᠠᠭᠠᠨ ᠶᠡᠷᠡ ᠶᠢᠰᠦᠨ ᠨᠠᠰᠤᠲᠠᠢ᠂ 25 ᠲᠡᠭᠦᠨ ᠦ ᠬᠦᠦ ᠢᠱᠮᠠᠶᠧᠯ ᠬᠥᠪᠴᠢᠷᠬᠡᠢ ᠶᠢᠨ ᠠᠷᠠᠰᠤ ᠪᠠᠨ ᠣᠭᠲᠣᠯᠣᠭᠤᠯᠬᠤ ᠳᠠᠭᠠᠨ ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠲᠠᠢ ᠪᠠᠢᠵᠠᠢ᠃ 26 ᠡᠢᠨ ᠬᠦ ᠠᠪᠷᠠᠬᠠᠮ ᠬᠢᠭᠡᠳ ᠲᠡᠭᠦᠨ ᠦ ᠬᠦᠦ ᠢᠱᠮᠠᠶᠧᠯ ᠲᠡᠷᠡ ᠡᠳᠦᠷ ᠳᠡᠭᠡᠨ ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠵᠡᠢ᠃ 27 ᠲᠡᠭᠦᠨ ᠦ ᠭᠡᠷ ᠦᠨ ᠠᠯᠢᠪᠠ ᠡᠷᠡ ᠬᠦᠢᠰᠦᠲᠡᠨ ᠪᠤᠶᠤ ᠲᠡᠭᠦᠨ ᠦ ᠭᠡᠷ ᠲᠦ ᠲᠥᠷᠥᠭᠰᠡᠨ ᠵᠠᠷᠤᠴᠠ ᠨᠠᠷ ᠬᠢᠭᠡᠳ ᠬᠠᠷᠢ ᠶᠢᠨ ᠬᠥᠮᠦᠨ ᠡᠴᠡ ᠮᠥᠩᠭᠥ ᠪᠡᠷ ᠠᠪᠤᠭᠰᠠᠨ ᠵᠠᠷᠤᠴᠠ ᠨᠠᠷ ᠪᠦᠭᠦᠳᠡᠭᠡᠷ ᠢᠶᠡᠨ ᠲᠡᠭᠦᠨ ᠲᠡᠢ ᠬᠠᠮᠲᠤ ᠬᠥᠪᠴᠢᠷᠬᠡᠢ ᠪᠡᠨ ᠬᠥᠨᠳᠡᠭᠦᠯᠵᠡᠢ᠃