ᠡᠬᠢᠯᠡᠯ ᠭᠤᠴᠢᠨ ᠬᠣᠶᠠᠷ
ᠶᠠᠺᠣᠪ ᠡᠰᠠᠦ᠋ ᠲᠠᠢ ᠠᠭᠤᠯᠵᠠᠬᠤ ᠪᠠᠷ ᠪᠡᠯᠡᠳᠬᠡᠪᠡ
1 ᠶᠠᠺᠣᠪ ᠠᠶᠠᠨ ᠵᠠᠮ ᠳᠠᠭᠠᠨ ᠶᠠᠪᠤᠵᠤ ᠪᠠᠢᠲᠠᠯᠠ᠂ ᠪᠤᠷᠬᠠᠨ ᠤ ᠲᠩᠷᠢ ᠡᠯᠴᠢᠳ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠪᠠ᠃ 2 ᠶᠠᠺᠣᠪ ᠲᠡᠳᠡᠨ ᠢ ᠬᠠᠷᠠᠮᠠᠭᠴᠠ ᠪᠠᠨ᠄ 《ᠡᠨᠡ ᠪᠣᠯ ᠪᠤᠷᠬᠠᠨ ᠤ ᠬᠤᠸᠠᠷᠠᠨ 61 ᠪᠠᠢᠨᠠ》 ᠭᠡᠳ᠂ ᠲᠡᠷᠡ ᠭᠠᠵᠠᠷ ᠢ 《ᠮᠠᠬᠠᠨᠠᠢᠮ》 ᠭᠡᠵᠦ ᠨᠡᠷᠡᠯᠡᠪᠡ᠃
3 ᠶᠠᠺᠣᠪ ᠰᠧᠷ ᠨᠤᠲᠤᠭ ᠤᠨ ᠡᠳᠣᠮ ᠤᠨ ᠲᠠᠯᠠ ᠳᠤ ᠪᠠᠢᠭᠠ ᠠᠬᠠ ᠡᠰᠠᠦ᠋ ᠤᠷᠤᠭᠤ ᠪᠠᠨ ᠤᠷᠢᠳᠠᠪᠠᠷ ᠡᠯᠴᠢᠳ ᠶᠠᠪᠤᠭᠤᠯᠬᠤ ᠳᠠᠭᠠᠨ᠂ 4 ᠲᠡᠳᠡᠨ ᠳᠦ ᠵᠠᠬᠢᠨ᠄ 《ᠮᠢᠨᠦ ᠡᠵᠡᠨ ᠡᠰᠠᠦ᠋ ᠳᠤ᠄ 〈ᠲᠠᠨ ᠤ ᠵᠠᠷᠤᠴᠠ ᠶᠠᠺᠣᠪ ᠢᠩᠭᠢᠵᠦ ᠬᠡᠯᠡᠭᠦᠯᠦᠯᠡ᠄ ᠪᠢ ᠯᠠᠪᠠᠨ ᠤ ᠳᠤ ᠥᠨᠥ ᠬᠦᠷᠲᠡᠯᠡ ᠰᠠᠭᠤᠯᠠ᠃ 5 ᠡᠳᠦᠭᠡ ᠨᠠᠳᠠ ᠳᠤ ᠦᠬᠡᠷ᠂ ᠡᠯᠵᠢᠭᠡ᠂ ᠬᠣᠨᠢᠨ ᠰᠦᠷᠦᠭ᠂ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠵᠠᠷᠤᠴᠠ ᠨᠠᠷ ᠪᠠᠢᠨᠠ᠃ ᠪᠢ ᠲᠠᠨ ᠤ ᠮᠡᠯᠮᠡᠢ ᠳᠦ ᠲᠠᠭᠠᠯᠠᠯ ᠢ ᠣᠯᠬᠤ ᠶᠢᠨ ᠲᠤᠯᠠᠳᠠ ᠡᠨᠡ ᠬᠡᠯᠡ ᠶᠢ ᠬᠦᠷᠭᠡᠭᠦᠯᠵᠦ ᠪᠠᠢᠨᠠ〉 ᠭᠡᠭᠡᠷᠡᠢ》 ᠭᠡᠪᠡ᠃
6 ᠡᠯᠴᠢᠳ ᠶᠠᠺᠣᠪ ᠲᠤ ᠪᠤᠴᠠᠵᠤ ᠢᠷᠡᠭᠡᠳ᠄ 《ᠪᠢᠳᠡ ᠲᠠᠨ ᠤ ᠠᠬᠠ ᠡᠰᠠᠦ᠋ ᠳᠤ ᠬᠦᠷᠴᠦ ᠣᠴᠢᠭᠰᠠᠨ᠂ ᠣᠳᠣ ᠲᠡᠷᠡ ᠲᠠᠨ ᠲᠠᠢ ᠠᠭᠤᠯᠵᠠᠬᠤ ᠪᠠᠷ ᠳᠥᠷᠪᠡᠨ ᠵᠠᠭᠤᠨ ᠬᠥᠮᠦᠨ ᠳᠠᠭᠠᠭᠤᠯᠤᠨ ᠢᠷᠡᠵᠦ ᠪᠠᠢᠨᠠ》 ᠭᠡᠵᠡᠢ᠃ 7 ᠶᠠᠺᠣᠪ ᠶᠡᠬᠡᠳᠡ ᠠᠶᠤᠨ ᠪᠠᠴᠢᠮᠳᠠᠭᠠᠳ᠂ ᠬᠠᠮᠲᠤ ᠪᠠᠢᠭᠠ ᠬᠥᠮᠦᠰ ᠬᠢᠭᠡᠳ ᠬᠣᠨᠢ᠂ ᠦᠬᠡᠷ᠂ ᠲᠡᠮᠡᠭᠡᠳ ᠢᠶᠡᠨ ᠬᠣᠶᠠᠷ ᠡᠩᠨᠡᠭᠡ ᠪᠣᠯᠭᠠᠨ ᠬᠤᠪᠢᠶᠠᠯᠠ᠃ 8 《ᠬᠡᠷᠪᠡ ᠡᠰᠠᠦ᠋ ᠢᠷᠡᠭᠡᠳ ᠨᠢᠭᠡ ᠡᠩᠨᠡᠭᠡ ᠶᠢ ᠨᠢ ᠴᠣᠬᠢᠪᠠᠯ᠂ ᠦᠯᠡᠳᠡᠭᠰᠡᠨ ᠡᠩᠨᠡᠭᠡ ᠨᠢ ᠬᠡᠯᠲᠦᠷᠢᠬᠦ ᠪᠣᠯᠣᠨᠠ》 ᠭᠡᠵᠦ ᠲᠡᠷᠡ ᠪᠣᠳᠣᠵᠠᠢ᠃
9 ᠲᠡᠭᠡᠭᠡᠳ ᠶᠠᠺᠣᠪ᠄ 《ᠮᠢᠨᠦ ᠡᠪᠦᠭᠡ ᠠᠪᠷᠠᠬᠠᠮ ᠤᠨ ᠪᠤᠷᠬᠠᠨ᠂ ᠮᠢᠨᠦ ᠡᠴᠢᠭᠡ ᠢᠰᠠᠺ ᠤᠨ ᠪᠤᠷᠬᠠᠨ᠂ ᠶᠣᠬᠣᠸᠠ ᠮᠢᠨᠢ︕ ᠲᠠ ᠨᠠᠳᠠ ᠳᠤ᠄ 〈ᠲᠥᠷᠥᠭᠰᠡᠨ ᠨᠤᠲᠤᠭ᠂ ᠲᠥᠷᠥᠯ ᠰᠠᠳᠤᠨ ᠤᠷᠤᠭᠤ ᠪᠠᠨ ᠪᠤᠴᠠ᠂ ᠪᠢ ᠴᠢᠮᠠ ᠳᠤ ᠰᠠᠢᠨ ᠰᠠᠢᠬᠠᠨ ᠢ ᠬᠦᠷᠲᠡᠭᠡᠨᠡ〉 ᠭᠡᠵᠦ ᠬᠡᠯᠡᠭᠰᠡᠨ᠃ 10 ᠲᠠ ᠨᠠᠳᠠ ᠳᠤ ᠪᠦᠬᠦ ᠬᠠᠢᠷᠠ ᠡᠨᠡᠷᠢᠯ᠂ ᠪᠦᠬᠦ ᠢᠲᠡᠭᠡᠮᠵᠢᠲᠦ ᠪᠠᠢᠳᠠᠯ ᠢᠶᠠᠨ ᠦᠵᠡᠭᠦᠯᠦᠭᠰᠡᠨ᠂ ᠥᠴᠦᠬᠡᠨ ᠵᠠᠷᠤᠴᠠ ᠨᠠᠳᠠ ᠳᠤ ᠡᠳᠡᠭᠡᠷ ᠢ ᠬᠦᠷᠲᠡᠬᠦ ᠬᠢᠷᠢ ᠭᠡᠮ ᠠᠯᠠᠭᠠ᠃ ᠪᠢ ᠡᠨᠡ ᠶᠣᠷᠳᠠᠨ ᠭᠣᠣᠯ ᠢ ᠠᠩᠬᠠ ᠭᠠᠲᠤᠯᠬᠤ ᠳᠤ ᠭᠠᠷ ᠲᠤ ᠮᠢᠨᠢ ᠭᠠᠭᠴᠠᠬᠠᠨ ᠲᠠᠶᠠᠭ ᠪᠠᠢᠭᠰᠠᠨ᠂ ᠪᠢ ᠣᠳᠣ ᠬᠣᠶᠠᠷ ᠡᠩᠨᠡᠭᠡ ᠲᠠᠢ ᠪᠣᠯᠵᠠᠢ᠃ 11 ᠣᠳᠣ ᠨᠠᠮᠠᠶᠢ ᠠᠬᠠ ᠡᠰᠡᠦ᠋ ᠶᠢᠨ ᠮᠢᠨᠢ ᠭᠠᠷ ᠠᠴᠠ ᠠᠪᠤᠷᠠᠨᠠ ᠤᠤ︖ ᠲᠡᠷᠡ ᠬᠦᠷᠴᠦ ᠢᠷᠡᠭᠡᠳ ᠨᠠᠮᠠᠶᠢ ᠪᠣᠯᠣᠨ ᠡᠬᠡᠨᠡᠷ ᠬᠡᠦᠬᠡᠳ ᠤᠳ ᠢ ᠮᠢᠨᠢ ᠴᠣᠬᠢᠬᠤ ᠠᠴᠠ ᠪᠢ ᠠᠶᠤᠵᠤ ᠪᠠᠢᠨᠠ᠃ 12 ᠨᠠᠳᠠ ᠳᠤ ᠰᠠᠢᠨ ᠰᠠᠢᠬᠠᠨ ᠢ ᠬᠦᠷᠲᠡᠭᠡᠵᠦ ᠦᠷᠡ ᠤᠳᠤᠮ ᠢ ᠮᠢᠨᠢ ᠳᠠᠯᠠᠢ ᠶᠢᠨ ᠲᠣᠭᠠ ᠲᠣᠮᠰᠢ ᠦᠭᠡᠢ ᠡᠯᠡᠰᠦ ᠮᠡᠲᠦ ᠣᠯᠠᠨ ᠪᠣᠯᠭᠠᠨᠠ ᠭᠡᠵᠦ ᠲᠠ ᠬᠡᠯᠡᠭᠰᠡᠨ》 ᠭᠡᠪᠡ᠃
13 ᠶᠠᠺᠣᠪ ᠲᠡᠷᠡ ᠰᠥᠨᠢ ᠳᠡᠭᠡᠨ ᠲᠡᠨᠳᠡ ᠪᠡᠨ ᠬᠣᠨᠣᠵᠤ᠂ ᠠᠬᠠ ᠡᠰᠠᠦ᠋ ᠳᠡᠭᠡᠨ ᠵᠣᠷᠢᠭᠤᠯᠤᠨ ᠡᠳ᠋ ᠬᠥᠷᠥᠩᠭᠡ ᠡᠴᠡ ᠪᠡᠨ ᠪᠡᠯᠡᠭ ᠰᠣᠩ᠋ᠭᠣᠵᠠᠢ᠃ 14 ᠲᠤᠬᠠᠢᠯᠠᠪᠠᠯ ᠬᠣᠶᠠᠷ ᠵᠠᠭᠤᠨ ᠡᠮᠡ ᠢᠮᠠᠭᠠ᠂ ᠬᠣᠷᠢᠨ ᠤᠬᠤᠨᠠ᠂ ᠬᠣᠶᠠᠷ ᠵᠠᠭᠤᠨ ᠡᠮᠡ ᠬᠣᠨᠢ᠂ ᠬᠣᠷᠢᠨ ᠬᠤᠴᠠ᠂ 15 ᠭᠤᠴᠢᠨ ᠪᠣᠲᠣᠭᠣ ᠲᠠᠢ ᠢᠩᠭᠡ᠂ ᠳᠥᠴᠢᠨ ᠦᠨᠢᠶᠡ ᠪᠣᠯᠣᠨ ᠠᠷᠪᠠᠨ ᠦᠬᠡᠷ᠂ ᠬᠣᠷᠢᠨ ᠡᠷᠡ ᠡᠯᠵᠢᠭᠡ᠂ ᠠᠷᠪᠠᠨ ᠡᠮᠡ ᠡᠯᠵᠢᠭᠡ ᠪᠡᠯᠡᠳᠬᠡᠪᠡ᠃ 16 ᠲᠡᠳᠡᠭᠡᠷ ᠢ ᠬᠡᠰᠡᠭ ᠬᠡᠰᠡᠭ ᠢᠶᠡᠷ ᠨᠢ ᠵᠠᠷᠤᠴᠠ ᠨᠠᠷ ᠤᠨ ᠢᠶᠠᠨ ᠭᠠᠷ ᠲᠤ ᠲᠤᠰᠢᠶᠠᠵᠤ᠂ ᠵᠠᠷᠤᠴᠠ ᠨᠠᠷ ᠲᠠᠭᠠᠨ᠄ 《ᠲᠠ ᠨᠠᠷ ᠨᠠᠳᠠ ᠠᠴᠠ ᠲᠦᠷᠦᠭᠦᠯᠡᠨ ᠭᠠᠲᠤᠯᠵᠤ᠂ ᠬᠡᠰᠡᠭ ᠪᠦᠷᠢ ᠶᠢᠨ ᠬᠣᠭᠣᠷᠣᠨᠳᠣ ᠵᠠᠢ ᠪᠠᠷᠢᠵᠤ ᠶᠠᠪᠤ》 ᠭᠡᠵᠡᠢ᠃ 17 ᠲᠡᠷᠡ ᠪᠡᠷ ᠲᠦᠷᠦᠭᠦᠨ ᠳᠦᠨᠢ ᠶᠠᠪᠤᠭᠠ ᠵᠠᠷᠤᠴᠠ ᠳᠠᠭᠠᠨ ᠵᠠᠬᠢᠵᠤ᠄ 《ᠮᠢᠨᠦ ᠠᠬᠠ ᠡᠰᠠᠦ᠋ ᠴᠢᠮᠠ ᠲᠠᠢ ᠠᠭᠤᠯᠵᠠᠬᠤ ᠳᠠᠭᠠᠨ᠄ 〈ᠴᠢ ᠬᠡᠨ ᠦ ᠬᠥᠮᠦᠨ ᠪᠤᠢ︖ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠵᠤ ᠪᠠᠢᠨᠠ ᠪᠤᠢ︖ ᠴᠢᠨᠦ ᠡᠮᠦᠨᠡ ᠶᠠᠪᠤᠭᠠ ᠡᠳᠡᠭᠡᠷ ᠮᠠᠯ ᠰᠦᠷᠦᠭ ᠬᠡᠨ ᠦ ᠬᠢ ᠪᠤᠢ︖〉 ᠭᠡᠵᠦ ᠠᠰᠠᠭᠤᠪᠠᠯ᠂ 18 〈ᠡᠳᠡᠭᠡᠷ ᠪᠣᠯ ᠲᠠᠨ ᠤ ᠵᠠᠷᠤᠴᠠ ᠶᠠᠺᠣᠪ ᠤᠨ ᠬᠢ᠃ ᠡᠳᠡᠭᠡᠷ ᠢ ᠲᠡᠷᠡ ᠮᠠᠨ ᠤ ᠡᠵᠡᠨ ᠡᠰᠠᠦ᠋ ᠳᠡᠭᠡᠨ ᠪᠡᠯᠡᠭ ᠪᠣᠯᠭᠠᠨ ᠶᠠᠪᠤᠭᠤᠯᠤᠭᠰᠠᠨ ᠶᠤᠮ᠃ ᠶᠠᠺᠣᠪ ᠥᠪᠡᠷ ᠢᠶᠡᠨ ᠪᠠᠰᠠ ᠪᠢᠳᠡᠨ ᠦ ᠠᠷᠤ ᠠᠴᠠ ᠢᠷᠡᠵᠦ ᠪᠠᠢᠨᠠ〉 ᠭᠡᠵᠦ ᠬᠡᠯᠡ》 ᠭᠡᠪᠡ᠃ 19 ᠲᠡᠷᠡ ᠪᠠᠰᠠ ᠬᠣᠶᠠᠳᠠᠬᠢ᠂ ᠭᠤᠷᠪᠠᠳᠠᠬᠢ ᠬᠡᠰᠡᠭ ᠪᠣᠯᠣᠨ ᠪᠤᠰᠤᠳ ᠬᠡᠰᠡᠭ ᠪᠦᠷᠢ ᠶᠢ ᠲᠠᠭᠤᠵᠤ ᠶᠠᠪᠤᠭᠠ ᠬᠥᠮᠦᠰ ᠲᠦ᠄ 《ᠲᠠ ᠨᠠᠷ ᠴᠤ ᠡᠰᠠᠦ᠋ ᠲᠠᠢ ᠠᠭᠤᠯᠵᠠᠬᠤ ᠳᠠᠭᠠᠨ ᠡᠳᠡᠭᠡᠷ ᠦᠭᠡ ᠶᠢ ᠬᠡᠯᠡᠭᠡᠷᠡᠢ᠃ 20 ᠲᠡᠭᠡᠬᠦ ᠳᠡᠭᠡᠨ 〈ᠲᠠᠨ ᠤ ᠵᠠᠷᠤᠴᠠ ᠶᠠᠺᠣᠪ ᠪᠢᠳᠡᠨ ᠦ ᠠᠷᠤ ᠠᠴᠠ ᠢᠷᠡᠵᠦ ᠪᠠᠢᠨᠠ〉 ᠭᠡᠵᠦ ᠵᠠᠪᠠᠯ ᠬᠡᠯᠡᠭᠡᠷᠡᠢ》 ᠭᠡᠪᠡ᠃ ᠶᠠᠺᠣᠪ ᠳᠣᠲᠣᠷᠠ ᠪᠠᠨ᠄ 《ᠲᠦᠷᠦᠭᠦᠨ ᠳᠦ ᠶᠠᠪᠤᠭᠤᠯᠤᠭᠰᠠᠨ ᠪᠡᠯᠡᠭ ᠢᠶᠡᠷ ᠢᠶᠠᠨ ᠲᠡᠭᠦᠨ ᠢ ᠲᠠᠢᠳᠬᠤᠷᠠᠭᠤᠯᠤᠶᠠ᠃ ᠲᠡᠭᠡᠪᠡᠯ ᠪᠢ ᠳᠠᠷᠠᠭᠠ ᠨᠢ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠬᠤ ᠳᠤ᠂ ᠲᠡᠷᠡ ᠨᠠᠮᠠᠶᠢ ᠬᠦᠯᠢᠶᠡᠨ ᠠᠪᠬᠤ ᠪᠠᠢᠬᠠ》 ᠭᠡᠵᠦ ᠪᠣᠳᠣᠵᠠᠢ᠃ 21 ᠲᠡᠭᠡᠭᠡᠳ ᠶᠠᠺᠣᠪ ᠪᠡᠯᠡᠭ ᠢᠶᠡᠨ ᠥᠪᠡᠷ ᠡᠴᠡ ᠪᠡᠨ ᠲᠦᠷᠦᠭᠦᠯᠡᠵᠦ ᠶᠠᠪᠤᠭᠤᠯᠤᠭᠠᠳ᠂ ᠥᠪᠡᠷ ᠢᠶᠡᠨ ᠲᠡᠷᠡ ᠰᠥᠨᠢ ᠮᠠᠢᠬᠠᠨ ᠳᠠᠭᠠᠨ ᠦᠯᠡᠳᠡᠪᠡ᠃
ᠶᠠᠺᠣᠪ ᠪᠤᠷᠬᠠᠨ ᠲᠠᠢ ᠪᠠᠷᠢᠯᠳᠤᠪᠠ
22 ᠶᠠᠺᠣᠪ ᠰᠥᠨᠢ ᠪᠣᠰᠴᠤ ᠬᠣᠶᠠᠷ ᠡᠬᠡᠨᠡᠷ᠂ ᠬᠣᠶᠠᠷ ᠰᠢᠪᠡᠭᠴᠢᠨ᠂ ᠠᠷᠪᠠᠨ ᠨᠢᠭᠡᠨ ᠬᠥᠪᠡᠭᠦᠨ ᠢᠶᠡᠨ ᠶᠠᠪᠣᠺ ᠣᠯᠣᠮ ᠢᠶᠠᠷ ᠭᠣᠣᠯ ᠭᠠᠲᠤᠯᠭᠠᠵᠠᠢ᠃ 23 ᠲᠡᠳᠡᠨ ᠢ ᠭᠣᠣᠯ ᠭᠠᠷᠭᠠᠭᠰᠠᠨ ᠤ ᠳᠠᠷᠠᠭᠠ ᠪᠦᠬᠦ ᠡᠳ᠋ ᠬᠥᠷᠥᠩᠭᠡ ᠪᠡᠨ ᠴᠤ ᠭᠠᠲᠤᠯᠭᠠᠭᠠᠳ 24 ᠶᠠᠺᠣᠪ ᠭᠠᠭᠴᠠᠭᠠᠷ ᠢᠶᠠᠨ ᠦᠯᠡᠳᠡᠪᠡ᠃ ᠲᠡᠭᠡᠬᠦ ᠳᠦ ᠨᠢᠭᠡᠨ ᠬᠥᠮᠦᠨ ᠢᠷᠡᠵᠦ ᠶᠠᠺᠣᠪ ᠲᠠᠢ ᠦᠷ ᠴᠠᠢᠲᠠᠯᠠ ᠪᠠᠷᠢᠯᠳᠤᠭᠰᠠᠨ ᠪᠠᠢᠨᠠ᠃ 25 ᠲᠡᠷᠡ ᠶᠠᠺᠣᠪ ᠢ ᠳᠡᠢᠯᠵᠦ ᠴᠢᠳᠠᠬᠤ ᠦᠭᠡᠢ ᠪᠡᠨ ᠦᠵᠡᠭᠡᠳ ᠲᠦᠩᠬᠦ ᠶᠢ ᠨᠢ ᠴᠣᠬᠢᠪᠠ᠃ ᠲᠡᠢᠨ ᠬᠦ ᠶᠠᠺᠣᠪ ᠲᠡᠷᠡ ᠬᠥᠮᠦᠨ ᠲᠡᠢ ᠪᠠᠷᠢᠯᠳᠤᠵᠤ ᠪᠠᠢᠬᠤ ᠳᠤ ᠲᠦᠩᠬᠦ ᠨᠢ ᠮᠤᠯᠲᠤᠷᠠᠵᠠᠢ᠃ 26 ᠲᠡᠷᠡ ᠬᠥᠮᠦᠨ᠄ 《ᠨᠠᠮᠠᠶᠢ ᠶᠠᠪᠤᠭᠤᠯ᠂ ᠦᠷ ᠴᠠᠢᠵᠤ ᠪᠠᠢᠨᠠ︕》 ᠭᠡᠰᠡᠨ ᠳᠦ᠂ ᠶᠠᠺᠣᠪ᠄ 《ᠨᠠᠮᠠᠶᠢ ᠢᠷᠥᠭᠡᠬᠦ ᠡᠴᠡ ᠲᠠᠨᠢ ᠨᠠᠰᠢ ᠪᠢ ᠲᠠᠨ ᠢ ᠶᠠᠪᠤᠭᠤᠯᠬᠤ ᠦᠭᠡᠢ》 ᠭᠡᠵᠡᠢ᠃ 27 ᠲᠡᠷᠡ ᠬᠥᠮᠦᠨ᠄ 《ᠴᠢᠨᠦ ᠨᠡᠷᠡ ᠬᠡᠨ ᠪᠤᠢ︖》 ᠭᠡᠬᠦ ᠳᠦ᠂ ᠲᠡᠷᠡ᠄ 《ᠶᠠᠺᠣᠪ》 ᠭᠡᠯᠡ᠃ 28 ᠲᠡᠷᠡ ᠬᠥᠮᠦᠨ᠄ 《ᠴᠢ ᠪᠤᠷᠬᠠᠨ ᠪᠣᠯᠣᠨ ᠬᠥᠮᠦᠰ ᠲᠡᠢ ᠲᠡᠮᠡᠴᠡᠯᠳᠦᠵᠦ ᠳᠡᠢᠯᠦᠭᠰᠡᠨ ᠶᠤᠮ᠃ ᠡᠭᠦᠨ ᠡᠴᠡ ᠬᠣᠢᠰᠢ ᠨᠡᠷᠡ ᠴᠢᠨᠢ ᠶᠠᠺᠣᠪ ᠪᠢᠰᠢ᠂ ᠢᠰᠷᠧᠯ 62 ᠭᠡᠭᠳᠡᠬᠦ ᠪᠣᠯᠣᠨᠠ》 ᠭᠡᠪᠡ᠃ 29 ᠶᠠᠺᠣᠪ᠄ 《ᠲᠠ ᠨᠡᠷᠡ ᠠᠯᠳᠠᠷ ᠢᠶᠠᠨ ᠬᠡᠯᠡᠭᠡᠴᠢ》 ᠭᠡᠵᠦ ᠭᠤᠶᠤᠭᠰᠠᠨ ᠳᠤ᠂ ᠲᠡᠷᠡ ᠬᠥᠮᠦᠨ᠄ 《ᠴᠢ ᠮᠢᠨᠦ ᠨᠡᠷᠡ ᠶᠢ ᠠᠰᠠᠭᠤᠭᠠᠳ ᠶᠠᠭᠠᠬᠢᠬᠤ ᠶᠤᠮ ᠪᠤᠢ︖》 ᠭᠡᠵᠦ ᠬᠡᠯᠡᠭᠡᠳ ᠲᠡᠨᠳᠡ ᠶᠠᠺᠣᠪ ᠢ ᠢᠷᠥᠭᠡᠭᠰᠡᠨ ᠪᠠᠢᠨᠠ᠃ 30 ᠶᠠᠺᠣᠪ᠄ 《ᠪᠢ ᠪᠤᠷᠬᠠᠨ ᠲᠠᠢ ᠨᠢᠭᠤᠷ ᠲᠤᠯᠤᠨ ᠠᠭᠤᠯᠵᠠᠭᠰᠠᠨ ᠪᠣᠯᠪᠠᠴᠤ ᠠᠮᠢ ᠮᠡᠨᠳᠦ ᠦᠯᠡᠳᠡᠯᠡ》 ᠭᠡᠳ ᠲᠡᠷᠡ ᠭᠠᠵᠠᠷ ᠢ ᠫᠧᠨᠢᠶᠧᠯ 63 ᠭᠡᠵᠦ ᠨᠡᠷᠡᠯᠡᠪᠡ᠃ 31 ᠶᠠᠺᠣᠪ ᠫᠧᠨᠢᠶᠧᠯ ᠢᠶᠠᠷ ᠥᠩᠭᠡᠷᠡᠵᠦ ᠪᠠᠢᠬᠤ ᠳᠤ ᠨᠠᠷᠠ ᠲᠡᠭᠦᠨ ᠦ ᠳᠡᠭᠡᠷᠡ ᠮᠠᠨᠳᠤᠵᠠᠢ᠃ ᠲᠡᠷᠡ ᠪᠡᠷ ᠲᠦᠩᠬᠦ ᠶᠢᠨ ᠶᠠᠰᠤᠨ ᠠᠴᠠ ᠪᠠᠨ ᠪᠣᠯᠵᠤ ᠳᠣᠭᠣᠯᠵᠤ ᠪᠠᠢᠯᠠ᠃ 32 ᠶᠠᠺᠣᠪ ᠤᠨ ᠲᠦᠩᠬᠦ ᠶᠢᠨ ᠰᠢᠷᠪᠥᠰᠥ ᠴᠣᠬᠢᠭᠳᠠᠭᠰᠠᠨ ᠢᠶᠠᠷ᠂ ᠢᠰᠷᠧᠯᠴᠦᠳ ᠡᠳᠦᠭᠡ ᠲᠦᠩᠬᠦ ᠶᠢᠨ ᠰᠢᠷᠪᠥᠰᠥ ᠢᠳᠡᠳᠡᠭ ᠦᠭᠡᠢ ᠶᠤᠮ᠃