ᠡᠬᠢᠯᠡᠯ ᠬᠣᠷᠢᠨ ᠳᠥᠷᠪᠡ
ᠢᠰᠠᠺ ᠷᠧᠪᠧᠺᠠ ᠶᠢᠨ ᠭᠡᠷᠯᠡᠯᠲᠡ
1 ᠠᠪᠷᠠᠬᠠᠮ ᠨᠠᠰᠤ ᠥᠲᠡᠯᠦᠭᠰᠡᠨ ᠪᠥᠭᠡᠳ ᠶᠣᠬᠣᠸᠠ ᠠᠪᠷᠠᠬᠠᠮ ᠢ ᠪᠦᠬᠦᠢᠯᠡ ᠲᠠᠯᠠ ᠪᠠᠷ ᠢᠪᠡᠭᠡᠪᠡ᠃ 2 ᠠᠪᠷᠠᠬᠠᠮ ᠭᠡᠷ ᠦᠨ ᠬᠢᠨᠢ ᠪᠦᠬᠦ ᠬᠡᠷᠡᠭ ᠢ ᠬᠠᠷᠢᠭᠤᠴᠠᠳᠠᠭ ᠬᠠᠮᠤᠭ ᠤᠨ ᠠᠬᠠᠮᠠᠳ ᠵᠠᠷᠤᠴᠠ ᠳᠠᠭᠠᠨ᠄ 《ᠮᠢᠨᠦ ᠬᠥᠯ ᠦᠨ ᠬᠣᠭᠣᠷᠣᠨᠳᠣ ᠭᠠᠷ ᠢᠶᠠᠨ ᠲᠠᠯᠪᠢ᠃ 3 ᠪᠢ ᠴᠢᠮᠠᠶᠢ ᠲᠩᠷᠢ ᠶᠢᠨ ᠪᠤᠷᠬᠠᠨ᠂ ᠭᠠᠵᠠᠷ ᠤᠨ ᠪᠤᠷᠬᠠᠨ ᠪᠣᠯᠬᠤ ᠶᠣᠬᠣᠸᠠ ᠶᠢᠨ ᠨᠡᠷᠡ ᠪᠡᠷ ᠲᠠᠩ᠋ᠭᠠᠷᠢᠭᠯᠠᠭᠤᠯᠤᠶᠠ᠃ ᠴᠢ ᠮᠢᠨᠦ ᠬᠦᠦ ᠶᠢᠨ ᠡᠬᠡᠨᠡᠷ ᠪᠣᠯᠬᠤ ᠬᠥᠮᠦᠨ ᠢ ᠮᠢᠨᠦ ᠰᠠᠭᠤᠵᠤ ᠪᠠᠢᠭᠠ ᠺᠠᠨᠠᠨ ᠨᠤᠲᠤᠭ ᠠᠴᠠ ᠰᠣᠩ᠋ᠭᠣᠯ ᠦᠭᠡᠢ᠂ 4 ᠮᠢᠨᠦ ᠨᠤᠲᠤᠭ ᠲᠤ᠂ ᠲᠥᠷᠥᠯ ᠲᠥᠷᠥᠭᠰᠡᠳ ᠲᠦ ᠮᠢᠨᠢ ᠣᠴᠢᠵᠤ᠂ ᠬᠦᠦ ᠢᠰᠠᠺ ᠲᠤ ᠮᠢᠨᠢ ᠡᠬᠡᠨᠡᠷ ᠠᠪᠴᠤ ᠥᠭᠬᠦ ᠶᠢ ᠲᠠᠩ᠋ᠭᠠᠷᠢᠭᠯᠠ》 ᠭᠡᠪᠡ᠃ 5 ᠵᠠᠷᠤᠴᠠ ᠨᠢ᠄ 《ᠬᠡᠷᠪᠡ ᠲᠡᠷᠡ ᠡᠮᠡᠭᠲᠡᠢ ᠨᠠᠮᠠᠶᠢ ᠳᠠᠭᠠᠵᠤ ᠡᠨᠡ ᠨᠤᠲᠤᠭ ᠲᠤ ᠢᠷᠡᠬᠦ ᠳᠤᠷᠠ ᠦᠭᠡᠢ ᠪᠣᠯ ᠶᠠᠭᠠᠬᠢᠬᠤ ᠪᠤᠢ︖ ᠲᠡᠭᠡᠪᠡᠯ ᠪᠢ ᠲᠠᠨ ᠤ ᠬᠦᠦ ᠶᠢ ᠡᠬᠡ ᠨᠤᠲᠤᠭ ᠤᠷᠤᠭᠤ ᠴᠢᠨᠢ ᠪᠤᠴᠠᠭᠠᠵᠤ ᠠᠪᠠᠴᠢᠬᠤ ᠤᠤ︖》 ᠭᠡᠵᠦ ᠠᠰᠠᠭᠤᠵᠠᠢ᠃ 6 ᠠᠪᠷᠠᠬᠠᠮ ᠲᠡᠭᠦᠨ ᠳᠦ᠄ 《ᠠᠩ᠋ᠬᠠᠷᠤᠭᠲᠤᠨ᠂ ᠴᠢ ᠮᠢᠨᠦ ᠬᠦᠦ ᠶᠢ ᠲᠡᠨᠳᠡ ᠠᠪᠠᠴᠢᠵᠤ ᠪᠣᠯᠬᠤ ᠦᠭᠡᠢ᠃ 7 ᠨᠠᠮᠠᠶᠢ ᠡᠴᠢᠭᠡ ᠶᠢᠨ ᠮᠢᠨᠢ ᠭᠡᠷ ᠡᠴᠡ᠂ ᠲᠥᠷᠥᠭᠰᠡᠨ ᠨᠤᠲᠤᠭ ᠠᠴᠠ ᠮᠢᠨᠢ ᠠᠪᠴᠢᠷᠠᠵᠤ᠂ ᠡᠨᠡ ᠭᠠᠵᠠᠷ ᠨᠤᠲᠤᠭ ᠢ ᠮᠢᠨᠦ ᠦᠷᠡ ᠤᠳᠤᠮ ᠳᠤ ᠥᠭᠭᠥᠨᠡ ᠭᠡᠵᠦ ᠨᠠᠳᠠ ᠳᠤ ᠲᠠᠩ᠋ᠭᠠᠷᠢᠭᠯᠠᠨ ᠬᠡᠯᠡᠭᠰᠡᠨ ᠲᠩᠷᠢ ᠶᠢᠨ ᠪᠤᠷᠬᠠᠨ ᠶᠣᠬᠣᠸᠠ ᠲᠩᠷᠢ ᠡᠯᠴᠢ ᠪᠠᠨ ᠴᠢᠨᠦ ᠡᠮᠦᠨᠡ ᠶᠠᠪᠤᠭᠤᠯᠵᠤ᠂ ᠴᠢᠮᠠ ᠪᠠᠷ ᠮᠢᠨᠦ ᠬᠦᠦ ᠳᠦ ᠡᠬᠡᠨᠡᠷ ᠠᠪᠴᠢᠷᠠᠭᠤᠯᠬᠤ ᠪᠣᠯᠣᠨᠠ᠃ 8 ᠬᠡᠷᠪᠡ ᠲᠡᠷᠡ ᠡᠮᠡᠭᠲᠡᠢ ᠴᠢᠮᠠᠶᠢ ᠳᠠᠭᠠᠵᠤ ᠢᠷᠡᠬᠦ ᠳᠤᠷᠠ ᠦᠭᠡᠢ ᠪᠣᠯ᠂ ᠴᠢ ᠡᠨᠡ ᠲᠠᠩ᠋ᠭᠠᠷᠢᠭ ᠠᠴᠠ ᠮᠢᠨᠢ ᠴᠢᠯᠥᠭᠡᠯᠡᠭᠳᠡᠬᠦ ᠪᠣᠯᠣᠨᠠ᠃ ᠬᠠᠷᠢᠨ ᠴᠢ ᠬᠦᠦ ᠶᠢ ᠮᠢᠨᠢ ᠪᠢᠲᠡᠭᠡᠢ ᠲᠡᠰᠢ ᠨᠢ ᠠᠪᠠᠴᠢᠭᠠᠷᠠᠢ》 ᠭᠡᠪᠡ᠃ 9 ᠲᠡᠭᠡᠭᠡᠳ ᠵᠠᠷᠤᠴᠠ ᠡᠵᠡᠨ ᠠᠪᠷᠠᠬᠠᠮ ᠤᠨ ᠢᠶᠠᠨ ᠬᠥᠯ ᠦᠨ ᠬᠣᠭᠣᠷᠣᠨᠳᠣ ᠭᠠᠷ ᠢᠶᠠᠨ ᠲᠠᠯᠪᠢᠵᠤ᠂ ᠡᠨᠡ ᠶᠠᠪᠤᠳᠠᠯ ᠤᠨ ᠲᠠᠯᠠ ᠪᠠᠷ ᠲᠡᠭᠦᠨ ᠳᠦ ᠲᠠᠩ᠋ᠭᠠᠷᠢᠭᠯᠠᠪᠠ᠃
10 ᠲᠡᠭᠡᠭᠡᠳ ᠲᠡᠷᠡ ᠵᠠᠷᠤᠴᠠ ᠡᠵᠡᠨ ᠦ ᠪᠠᠨ ᠲᠡᠮᠡᠭᠡᠨ ᠡᠴᠡ ᠠᠷᠪᠠ ᠶᠢ ᠠᠪᠴᠤ᠂ ᠡᠵᠡᠨ ᠡᠴᠡ ᠪᠡᠨ ᠶᠠᠩᠵᠤ ᠪᠦᠷᠢ ᠶᠢᠨ ᠰᠠᠢᠨ ᠡᠳ᠋ᠯᠡᠯ ᠠᠪᠤᠭᠠᠳ᠂ ᠬᠣᠶᠠᠷ ᠮᠥᠷᠡᠨ ᠦ ᠬᠣᠭᠣᠷᠣᠨᠳᠣᠬᠢ ᠠᠷᠠᠮ ᠲᠡᠰᠢ ᠮᠣᠷᠳᠠᠨ ᠶᠠᠪᠤᠵᠤ᠂ ᠨᠠᠬᠣᠷ ᠤᠨ ᠬᠣᠲᠠ ᠳᠤ ᠬᠦᠷᠴᠡᠢ᠃ 11 ᠲᠡᠷᠡ ᠬᠣᠲᠠ ᠶᠢᠨ ᠭᠠᠳᠠᠨᠠᠬᠢ ᠬᠤᠳᠳᠤᠭ ᠤᠨ ᠳᠡᠷᠭᠡᠳᠡ ᠲᠡᠮᠡᠭᠡᠳ ᠢᠶᠡᠨ ᠬᠡᠪᠲᠡᠭᠦᠯᠬᠦ ᠳᠦ᠂ ᠦᠳᠡᠰᠢ ᠶᠢᠨ ᠦᠶᠡ᠂ ᠲᠤᠬᠠᠢᠯᠠᠪᠠᠯ ᠡᠮᠡᠭᠲᠡᠢᠴᠦᠳ ᠦᠨ ᠤᠰᠤ ᠠᠪᠬᠤ ᠪᠠᠷ ᠭᠠᠷᠳᠠᠭ ᠴᠠᠭ ᠪᠣᠯᠵᠠᠢ᠃ 12 ᠲᠡᠷᠡ ᠭᠤᠶᠤᠬᠤ ᠳᠠᠭᠠᠨ᠄ 《ᠮᠢᠨᠦ ᠡᠵᠡᠨ ᠠᠪᠷᠠᠬᠠᠮ ᠤᠨ ᠪᠤᠷᠬᠠᠨ ᠶᠣᠬᠣᠸᠠ᠂ ᠲᠠ ᠥᠨᠥᠳᠥᠷ ᠲᠡᠭᠦᠨ ᠢ ᠨᠠᠳᠠ ᠲᠠᠢ ᠠᠭᠤᠯᠵᠠᠭᠤᠯᠵᠤ ᠮᠢᠨᠦ ᠡᠵᠡᠨ ᠠᠪᠷᠠᠬᠠᠮ ᠳᠤ ᠬᠠᠢᠷᠠ ᠡᠨᠡᠷᠢᠯ ᠦᠵᠡᠭᠦᠯᠦᠨᠡ ᠤᠤ︖ 13 ᠵᠠ᠂ ᠪᠢ ᠬᠤᠳᠳᠤᠭ ᠤᠨ ᠳᠡᠷᠭᠡᠳᠡ ᠵᠣᠭᠰᠣᠶᠠ᠃ ᠬᠣᠲᠠ ᠶᠢᠨ ᠥᠬᠢᠳ ᠤᠰᠤ ᠠᠪᠬᠤ ᠪᠠᠷ ᠭᠠᠷᠬᠤ ᠳᠤ᠂ ᠪᠢ 14 ᠨᠢᠭᠡᠨ ᠥᠬᠢᠨ ᠡᠴᠡ᠄ 〈ᠸᠠᠭᠠᠷ ᠢᠶᠠᠨ ᠲᠣᠩ᠋ᠭᠣᠢᠯᠭᠠᠵᠤ᠂ ᠨᠠᠳᠠ ᠳᠤ ᠤᠰᠤᠨ ᠠᠴᠠ ᠪᠠᠨ ᠤᠤᠭᠤᠯᠭᠠᠨᠠ ᠤᠤ︖〉 ᠭᠡᠵᠦ ᠭᠤᠶᠤᠶᠠ᠃ ᠬᠡᠷᠪᠡ ᠲᠡᠷᠡ᠄ 〈ᠤᠤᠭᠤ᠂ ᠤᠤᠭᠤ᠂ ᠪᠢ ᠲᠠᠨ ᠤ ᠲᠡᠮᠡᠭᠡᠳ ᠢ ᠴᠤ ᠤᠰᠤᠯᠠᠵᠤ ᠥᠭᠭᠥᠶᠡ〉 ᠭᠡᠵᠦ ᠬᠡᠯᠡᠪᠡᠯ᠂ ᠲᠡᠷᠡ ᠡᠮᠡᠭᠲᠡᠢ ᠨᠢ ᠲᠠᠨ ᠤ ᠵᠠᠷᠤᠴᠠ ᠢᠰᠠᠺ ᠲᠠᠭᠠᠨ ᠵᠠᠶᠠᠭᠠᠭᠰᠠᠨ ᠬᠥᠮᠦᠨ ᠨᠢ ᠪᠠᠢᠭ᠂ ᠮᠢᠨᠦ ᠡᠵᠡᠨ ᠳᠦ ᠬᠠᠢᠷᠠ ᠡᠨᠡᠷᠢᠯ ᠦᠵᠡᠭᠦᠯᠦᠭᠰᠡᠨ ᠢ ᠲᠠᠨᠢ ᠡᠭᠦᠨ ᠢᠶᠡᠷ ᠪᠢ ᠮᠡᠳᠡᠨᠡ》 ᠭᠡᠪᠡ᠃
15 ᠦᠭᠡ ᠪᠡᠨ ᠬᠡᠯᠡᠵᠦ ᠳᠠᠭᠤᠰᠤᠭᠠ ᠦᠭᠡᠢ ᠪᠠᠢᠲᠠᠯᠠ ᠨᠢ ᠮᠥᠷᠥᠨ ᠳᠡᠭᠡᠷᠡ ᠪᠡᠨ ᠸᠠᠭᠠᠷ ᠲᠠᠯᠪᠢᠭᠰᠠᠨ ᠷᠧᠪᠧᠺᠠ ᠭᠠᠷᠴᠤ ᠢᠷᠡᠪᠡ᠃ ᠲᠡᠷᠡ ᠪᠣᠯ ᠠᠪᠷᠠᠬᠠᠮ ᠤᠨ ᠳᠡᠭᠦᠦ ᠨᠠᠬᠣᠷ ᠤᠨ ᠡᠬᠡᠨᠡᠷ ᠮᠢᠯᠺᠠ ᠶᠢᠨ ᠬᠦᠦ ᠪᠧᠲ᠋ᠦ᠋ᠶᠧᠯ ᠤᠨ ᠥᠬᠢᠨ ᠶᠤᠮ᠃ 16 ᠲᠡᠷᠡ ᠮᠠᠰᠢ ᠭᠣᠶᠣ ᠦᠵᠡᠰᠬᠦᠯᠡᠩ᠂ ᠡᠳᠦᠢ ᠬᠦᠷᠲᠡᠯᠡ ᠡᠷᠡ ᠬᠥᠮᠦᠨ ᠲᠡᠢ ᠣᠢᠷᠠᠲᠤᠭᠠ ᠦᠭᠡᠢ ᠣᠩ᠋ᠭᠣᠨ ᠥᠬᠢᠨ ᠪᠠᠢᠵᠠᠢ᠃ ᠲᠡᠷᠡ ᠡᠮᠡᠭᠲᠡᠢ ᠬᠤᠳᠳᠤᠭ ᠤᠷᠤᠭᠤ ᠣᠴᠢᠵᠤ᠂ ᠸᠠᠭᠠᠷ ᠢᠶᠠᠨ ᠳᠦᠭᠦᠷᠭᠡᠭᠡᠳ ᠳᠡᠭᠡᠭᠰᠢ ᠭᠠᠷᠴᠤ ᠢᠷᠡᠬᠦ ᠳᠦ᠂ 17 ᠵᠠᠷᠤᠴᠠ ᠭᠦᠶᠦᠵᠦ ᠣᠴᠢᠨ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠭᠠᠳ᠄ 《ᠴᠢ ᠨᠠᠳᠠ ᠳᠤ ᠸᠠᠭᠠᠷ ᠲᠠᠢ ᠤᠰᠤᠨ ᠠᠴᠠ ᠪᠠᠨ ᠵᠢᠭᠠᠬᠠᠨ ᠤᠤᠭᠤᠯᠭᠠᠨᠠ ᠤᠤ︖》 ᠭᠡᠰᠡᠨ ᠳᠦ᠂ 18 ᠲᠡᠷᠡ᠄ 《ᠡᠵᠡᠨᠲᠡᠨ ᠮᠢᠨᠢ᠂ ᠤᠤᠭᠤ︕》 ᠭᠡᠳ ᠳᠠᠷᠤᠢᠬᠠᠨ ᠸᠠᠭᠠᠷ ᠢᠶᠠᠨ ᠭᠠᠷ ᠳᠡᠭᠡᠷᠡ ᠪᠡᠨ ᠪᠠᠭᠤᠯᠭᠠᠵᠤ ᠤᠤᠭᠤᠯᠭᠠᠪᠠ᠃ 19 ᠲᠡᠷᠡ ᠡᠮᠡᠭᠲᠡᠢ ᠲᠡᠭᠦᠨ ᠳᠦ ᠤᠰᠤ ᠤᠤᠭᠤᠯᠭᠠᠵᠤ ᠳᠠᠭᠤᠰᠤᠭᠠᠳ᠄ 《ᠪᠢ ᠳᠠᠬᠢᠨ ᠤᠰᠤ ᠤᠳᠬᠤᠵᠤ᠂ ᠲᠠᠨ ᠤ ᠲᠡᠮᠡᠭᠡᠳ ᠢ ᠴᠤ ᠬᠠᠨᠤᠲᠠᠯᠠ ᠨᠢ ᠤᠰᠤᠯᠠᠵᠤ ᠥᠭᠭᠥᠶᠡ》 ᠭᠡᠵᠦ ᠬᠡᠯᠡᠪᠡ᠃ 20 ᠲᠡᠷᠡ ᠪᠡᠷ ᠸᠠᠭᠠᠷ ᠲᠠᠢ ᠤᠰᠤ ᠪᠠᠨ ᠣᠩ᠋ᠭᠣᠴᠠᠨ ᠳᠤ ᠲᠦᠷᠭᠡᠬᠡᠨ ᠶᠡᠭᠦᠯᠡᠭᠡᠳ᠂ ᠳᠠᠬᠢᠨ ᠤᠰᠤ ᠠᠪᠬᠤ ᠪᠠᠷ ᠬᠤᠳᠳᠤᠭ ᠤᠷᠤᠭᠤ ᠭᠦᠶᠦᠵᠦ᠂ ᠪᠦᠬᠦ ᠲᠡᠮᠡᠭᠡᠨ ᠳᠦ ᠥᠭᠬᠦ ᠪᠡᠷ ᠤᠰᠤ ᠤᠳᠬᠤᠨ ᠠᠪᠴᠢᠷᠠᠭᠰᠠᠭᠠᠷ ᠪᠠᠢᠯᠠ᠃ 21 ᠨᠥᠭᠥᠭᠡ ᠬᠥᠮᠦᠨ ᠲᠡᠭᠦᠨ ᠢ ᠳᠠᠭᠤ ᠦᠭᠡᠢ ᠰᠢᠷᠲᠡᠨ᠂ ᠶᠣᠬᠣᠸᠠ ᠲᠡᠭᠦᠨ ᠦ ᠠᠶᠠᠨ ᠵᠠᠮ ᠢ ᠥᠭᠡᠳᠡ ᠲᠠᠢ ᠪᠣᠯᠭᠠᠭᠰᠠᠨ ᠡᠰᠡᠬᠦ ᠶᠢ ᠮᠡᠳᠡᠬᠦ ᠭᠡᠵᠦ ᠪᠠᠢᠯᠠ᠃
22 ᠲᠡᠮᠡᠭᠡᠳ ᠨᠢ ᠤᠰᠤ ᠤᠤᠭᠤᠵᠤ ᠳᠠᠭᠤᠰᠤᠭᠰᠠᠨ ᠤ ᠳᠠᠷᠠᠭᠠ᠂ ᠲᠡᠷᠡ ᠬᠥᠮᠦᠨ ᠬᠠᠭᠠᠰ ᠱᠧᠺᠧᠯ 39 ᠦᠨ ᠵᠢᠩ ᠲᠠᠢ ᠠᠯᠲᠠᠨ ᠭᠠᠷᠠᠬᠠ᠂ ᠠᠷᠪᠠᠨ ᠱᠧᠺᠧᠯ 40 ᠦᠨ ᠵᠢᠩ ᠲᠠᠢ ᠬᠣᠣᠰ ᠠᠯᠲᠠᠨ ᠪᠠᠭᠤᠪᠴᠢ ᠭᠠᠷᠭᠠᠵᠤ᠄ 23 《ᠴᠢ ᠬᠡᠨ ᠦ ᠥᠬᠢᠨ ᠪᠤᠢ︖ ᠨᠠᠳᠠ ᠳᠤ ᠬᠡᠯᠡᠭᠡᠴᠢ᠃ ᠡᠴᠢᠭᠡ ᠶᠢᠨ ᠴᠢᠨᠢ ᠭᠡᠷ ᠲᠦ ᠪᠢᠳᠡᠨ ᠦ ᠬᠣᠨᠣᠭᠯᠠᠬᠤ ᠥᠷᠥᠭᠡ ᠪᠤᠢ ᠤᠤ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ 24 ᠲᠡᠷᠡ᠄ 《ᠪᠢ ᠪᠣᠯ ᠪᠧᠲ᠋ᠦ᠋ᠶᠧᠯ ᠤᠨ ᠥᠬᠢᠨ᠂ ᠡᠪᠦᠭᠡ ᠮᠠᠨᠢ ᠨᠠᠬᠣᠷ᠂ ᠡᠮᠡᠭᠡ ᠮᠢᠨᠢ ᠮᠢᠯᠺᠠ ᠭᠡᠳᠡᠭ》 ᠭᠡᠳ᠂ 25 《ᠮᠠᠨ ᠤ ᠳᠤ ᠰᠦᠷᠡᠯ᠂ ᠡᠪᠡᠰᠦ ᠲᠡᠵᠢᠭᠡᠯ ᠠᠷᠪᠢᠨ᠂ ᠮᠥᠨ ᠬᠣᠨᠣᠭᠯᠠᠬᠤ ᠥᠷᠥᠭᠡ ᠴᠤ ᠪᠤᠢ》 ᠭᠡᠪᠡ᠃ 26 ᠲᠡᠭᠡᠭᠡᠳ ᠲᠡᠷᠡ ᠬᠥᠮᠦᠨ ᠲᠣᠯᠣᠭᠠᠢ ᠪᠥᠬᠥᠢᠨ ᠶᠣᠬᠣᠸᠠ ᠳᠤ ᠬᠦᠨᠳᠦᠳᠬᠡᠨ ᠮᠥᠷᠭᠥᠭᠡᠳ᠄ 27 《ᠮᠢᠨᠦ ᠡᠵᠡᠨ ᠠᠪᠷᠠᠬᠠᠮ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠮᠠᠭᠲᠠᠭᠳᠠᠬᠤ ᠪᠣᠯᠲᠤᠭᠠᠢ᠃ ᠶᠣᠬᠣᠸᠠ ᠮᠢᠨᠦ ᠡᠵᠡᠨ ᠡᠴᠡ ᠦᠨᠡᠨ ᠬᠠᠢᠷᠠ ᠪᠠ ᠢᠲᠡᠭᠡᠮᠵᠢᠲᠦ ᠪᠠᠢᠳᠠᠯ ᠢᠶᠠᠨ ᠬᠠᠷᠠᠮᠨᠠᠭᠠ ᠦᠭᠡᠢ ᠪᠥᠭᠡᠳ ᠮᠢᠨᠦ ᠠᠶᠠᠨ ᠵᠠᠮ ᠢ ᠴᠤ ᠬᠥᠲᠥᠯᠵᠦ᠂ ᠡᠵᠡᠨ ᠦ ᠮᠢᠨᠢ ᠳᠡᠭᠦᠦ ᠶᠢᠨ ᠭᠡᠷ ᠲᠦ ᠢᠷᠡᠭᠦᠯᠦᠭᠰᠡᠨ ᠪᠠᠢᠨᠠ》 ᠭᠡᠪᠡ᠃
28 ᠲᠡᠷᠡ ᠥᠬᠢᠨ ᠭᠦᠶᠦᠨ ᠶᠠᠪᠤᠵᠤ ᠡᠵᠢ ᠶᠢᠨ ᠢᠶᠠᠨ ᠭᠡᠷ ᠪᠦᠯᠢ ᠶᠢᠨ ᠬᠢᠨ ᠳᠤ ᠡᠳᠡᠭᠡᠷ ᠦᠨ ᠲᠤᠬᠠᠢ ᠳᠤᠭᠤᠯᠭᠠᠪᠠ᠃ 29 ᠷᠧᠪᠧᠺᠠ ᠯᠠᠪᠠᠨ ᠭᠡᠳᠡᠭ ᠠᠬᠠ ᠲᠠᠢ ᠪᠠᠢᠭᠰᠠᠨ ᠪᠥᠭᠡᠳ ᠲᠡᠷᠡ ᠪᠡᠷ ᠬᠤᠳᠳᠤᠭ ᠳᠡᠭᠡᠷᠡ ᠪᠠᠢᠭᠰᠠᠨ ᠨᠥᠭᠥᠭᠡ ᠬᠥᠮᠦᠨ ᠤᠷᠤᠭᠤ ᠭᠦᠶᠦᠵᠦ ᠣᠴᠢᠯᠠ᠃ 30 ᠲᠡᠷᠡ ᠪᠡᠷ ᠥᠬᠢᠨ ᠳᠡᠭᠦᠦ ᠶᠢᠨ ᠢᠶᠠᠨ ᠬᠠᠮᠠᠷ ᠲᠤ ᠪᠠᠢᠭᠠ ᠭᠠᠷᠠᠬᠠ᠂ ᠭᠠᠷ ᠲᠤ ᠪᠠᠢᠭᠠ ᠪᠠᠭᠤᠪᠴᠢ ᠶᠢ ᠬᠠᠷᠠᠭᠠᠳ ᠪᠠᠰᠠ ᠨᠥᠭᠥᠭᠡ ᠬᠥᠮᠦᠨ ᠦ ᠳᠡᠭᠦᠦ ᠷᠧᠪᠧᠺᠠ ᠳᠤᠨᠢ ᠬᠡᠯᠡᠭᠰᠡᠨ ᠦᠭᠡ ᠶᠢ ᠰᠣᠨᠣᠰᠣᠭᠠᠳ ᠲᠡᠭᠦᠨ ᠦ ᠤᠷᠤᠭᠤ ᠣᠴᠢᠲᠠᠯᠠ ᠲᠡᠷᠡ ᠪᠡᠷ ᠬᠤᠳᠳᠤᠭ ᠤᠨ ᠬᠠᠪᠢ ᠳᠤ ᠲᠡᠮᠡᠭᠡᠨ ᠦ ᠪᠠᠨ ᠳᠡᠷᠭᠡᠳᠡ ᠵᠣᠭᠰᠣᠵᠤ ᠪᠠᠢᠵᠠᠢ᠃ 31 ᠯᠠᠪᠠᠨ᠄ 《ᠪᠤᠷᠬᠠᠨ ᠤ ᠢᠪᠡᠭᠡᠯ ᠢ ᠬᠦᠷᠲᠡᠭᠰᠡᠨ ᠬᠥᠮᠦᠨ ᠲᠠ ᠮᠠᠨ ᠤ ᠳᠤ ᠣᠴᠢᠭᠠᠷᠠᠢ᠃ ᠲᠠ ᠶᠠᠭᠤᠨ ᠳᠤ ᠭᠠᠳᠠᠨᠠ ᠵᠣᠭᠰᠣᠵᠤ ᠪᠠᠢᠨᠠ ᠪᠤᠢ︖ ᠪᠢ ᠲᠠᠨ ᠳᠤ ᠥᠷᠥᠭᠡ᠂ ᠲᠡᠮᠡᠭᠡᠳ ᠲᠦ ᠴᠢᠨᠢ ᠬᠠᠰᠢᠶᠠ ᠪᠡᠯᠡᠳᠬᠡᠭᠰᠡᠨ》 ᠭᠡᠰᠡᠨ ᠳᠦ᠂ 32 ᠨᠥᠭᠥᠭᠡ ᠬᠥᠮᠦᠨ ᠪᠠᠢᠰᠢᠩ ᠳᠤ ᠣᠷᠣᠪᠠ᠃ ᠯᠠᠪᠠᠨ ᠲᠡᠮᠡᠭᠡᠳ ᠦᠨ ᠬᠢᠨᠢ ᠠᠴᠢᠶᠠ ᠶᠢ ᠪᠠᠭᠤᠯᠭᠠᠵᠤ᠂ ᠰᠦᠷᠡᠯ᠂ ᠡᠪᠡᠰᠦ ᠲᠡᠵᠢᠭᠡᠯ ᠠᠪᠴᠢᠷᠠᠵᠤ ᠥᠭᠭᠥᠭᠡᠳ᠂ ᠲᠡᠭᠦᠨ ᠳᠦ᠂ ᠪᠠᠰᠠ ᠲᠡᠭᠦᠨ ᠲᠡᠢ ᠬᠠᠮᠲᠤ ᠢᠷᠡᠭᠰᠡᠨ ᠡᠷᠡᠴᠦᠳ ᠲᠦ ᠬᠥᠯ ᠤᠬᠢᠶᠠᠬᠤ ᠤᠰᠤ ᠠᠪᠴᠢᠷᠠᠵᠤ ᠥᠭᠴᠡᠢ᠃ 33 ᠲᠡᠭᠡᠭᠡᠳ ᠲᠡᠭᠦᠨ ᠦ ᠡᠮᠦᠨᠡ ᠬᠣᠭᠣᠯᠠ ᠤᠮᠳᠠ ᠠᠪᠴᠢᠷᠠᠵᠤ ᠲᠠᠯᠪᠢᠭᠰᠠᠨ ᠳᠤ ᠲᠡᠷᠡ ᠬᠥᠮᠦᠨ᠄ 《ᠪᠢ ᠠᠵᠢᠯ ᠬᠡᠷᠡᠭ ᠦᠨ ᠢᠶᠠᠨ ᠲᠤᠬᠠᠢ ᠶᠠᠷᠢᠬᠤ ᠠᠴᠠ ᠨᠠᠰᠢ ᠬᠣᠭᠣᠯᠠ ᠢᠳᠡᠬᠦ ᠦᠭᠡᠢ》 ᠭᠡᠰᠡᠨ ᠳᠦ᠂ ᠯᠠᠪᠠᠨ᠄ 《ᠬᠡᠯᠡᠭᠡᠷᠡᠢ︕》 ᠭᠡᠪᠡ᠃
34 ᠲᠡᠷᠡ᠄ 《ᠪᠢ ᠪᠣᠯ ᠠᠪᠷᠠᠬᠠᠮ ᠤᠨ ᠵᠠᠷᠤᠴᠠ᠃ 35 ᠶᠣᠬᠣᠸᠠ ᠮᠢᠨᠦ ᠡᠵᠡᠨ ᠢ ᠶᠡᠬᠡᠳᠡ ᠢᠪᠡᠭᠡᠵᠦ᠂ ᠲᠡᠭᠦᠨ ᠢ ᠡᠯᠪᠡᠭ ᠬᠥᠷᠥᠩᠭᠡ ᠲᠠᠢ ᠪᠣᠯᠭᠠᠨ ᠲᠡᠭᠦᠨ ᠳᠦ ᠦᠬᠡᠷ᠂ ᠬᠣᠨᠢᠨ ᠰᠦᠷᠦᠭ ᠢᠶᠡᠷ ᠦᠯᠦ ᠪᠠᠷᠠᠮ ᠠᠯᠲᠠ ᠮᠥᠩᠭᠥ᠂ ᠵᠠᠷᠤᠴᠠ ᠰᠢᠪᠡᠭᠴᠢᠳ᠂ ᠲᠡᠮᠡᠭᠡᠳ᠂ ᠡᠯᠵᠢᠭᠡᠳ ᠢ ᠴᠤ ᠥᠭᠭᠥᠭᠰᠡᠨ ᠶᠤᠮ᠃ 36 ᠡᠵᠡᠨ ᠦ ᠮᠢᠨᠢ ᠭᠡᠷᠭᠡᠢ ᠰᠠᠷᠠᠾ ᠥᠨᠳᠥᠷ ᠨᠠᠰᠤᠲᠠᠢ ᠪᠠᠢᠬᠤ ᠳᠠᠭᠠᠨ ᠮᠢᠨᠦ ᠡᠵᠡᠨ ᠳᠦ ᠬᠦᠦ ᠲᠥᠷᠥᠭᠦᠯᠵᠦ ᠥᠭᠭᠥᠭᠰᠡᠨ ᠪᠥᠭᠡᠳ ᠡᠵᠡᠨ ᠬᠦᠦ ᠳᠡᠭᠡᠨ ᠪᠠᠢᠭᠠ ᠪᠦᠬᠦᠨ ᠢᠶᠡᠨ ᠥᠭᠭᠥᠭᠰᠡᠨ ᠶᠤᠮ᠃ 37 ᠡᠵᠡᠨ ᠮᠢᠨᠢ ᠨᠠᠳᠠ ᠪᠠᠷ ᠲᠠᠩ᠋ᠭᠠᠷᠢᠭᠯᠠᠭᠤᠯᠵᠤ᠄ 〈ᠴᠢ ᠮᠢᠨᠦ ᠬᠦᠦ ᠶᠢᠨ ᠡᠬᠡᠨᠡᠷ ᠪᠣᠯᠬᠤ ᠬᠥᠮᠦᠨ ᠢ ᠮᠢᠨᠦ ᠰᠠᠭᠤᠵᠤ ᠪᠠᠢᠭᠠ ᠺᠠᠨᠠᠨ ᠨᠤᠲᠤᠭ ᠠᠴᠠ ᠪᠦᠦ ᠰᠣᠩ᠋ᠭᠣ᠂ 38 ᠬᠠᠷᠢᠨ ᠴᠢ ᠮᠢᠨᠦ ᠡᠴᠢᠭᠡ ᠶᠢᠨ ᠭᠡᠷ ᠦᠨ ᠬᠢᠨ᠂ ᠮᠠᠨ ᠤ ᠲᠥᠷᠥᠯ ᠰᠠᠳᠤᠨ ᠳᠤ ᠣᠴᠢᠵᠤ᠂ ᠲᠡᠨᠳᠡ ᠡᠴᠡ ᠬᠦᠦ ᠳᠦ ᠮᠢᠨᠢ ᠡᠬᠡᠨᠡᠷ ᠰᠣᠩ᠋ᠭᠣ〉 ᠭᠡᠰᠡᠨ ᠪᠢᠯᠡ᠃ 39 ᠪᠢ ᠡᠵᠡᠨ ᠳᠡᠭᠡᠨ᠄ 〈ᠬᠡᠷᠪᠡ ᠲᠡᠷᠡ ᠡᠮᠡᠭᠲᠡᠢ ᠨᠠᠮᠠᠶᠢ ᠳᠠᠭᠠᠵᠤ ᠢᠷᠡᠬᠦ ᠦᠭᠡᠢ ᠪᠣᠯ ᠶᠠᠭᠠᠬᠢᠬᠤ ᠪᠤᠢ︖〉 ᠭᠡᠵᠦ ᠬᠡᠯᠡᠬᠦ ᠳᠦ᠂ 40 ᠲᠡᠷᠡ ᠨᠠᠳᠠ ᠳᠤ᠄ 〈ᠪᠢ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠠᠮᠢᠳᠤᠷᠠᠵᠤ ᠢᠷᠡᠭᠰᠡᠨ᠃ ᠶᠣᠬᠣᠸᠠ ᠲᠩᠷᠢ ᠡᠯᠴᠢ ᠪᠠᠨ ᠴᠢᠮᠠ ᠲᠠᠢ ᠬᠠᠮᠲᠤ ᠶᠠᠪᠤᠭᠤᠯᠵᠤ᠂ ᠠᠶᠠᠨ ᠵᠠᠮ ᠢ ᠴᠢᠨᠢ ᠥᠭᠡᠳᠡ ᠲᠠᠢ ᠪᠣᠯᠭᠠᠬᠤ ᠲᠤᠯᠠ ᠴᠢ ᠮᠠᠨ ᠤ ᠲᠥᠷᠥᠯ ᠰᠠᠳᠤᠨ᠂ ᠮᠢᠨᠦ ᠡᠴᠢᠭᠡ ᠶᠢᠨ ᠭᠡᠷ ᠦᠨ ᠬᠢᠨ ᠡᠴᠡ ᠬᠦᠦ ᠳᠦ ᠮᠢᠨᠢ ᠡᠬᠡᠨᠡᠷ ᠠᠪᠴᠢᠷᠠᠬᠤ ᠪᠣᠯᠣᠨᠠ᠃ 41 ᠮᠠᠨ ᠤ ᠲᠥᠷᠥᠯ ᠰᠠᠳᠤᠨ ᠳᠤ ᠣᠴᠢᠬᠤ ᠳᠤ ᠴᠢᠨᠢ ᠲᠡᠳᠡ ᠴᠢᠮᠠ ᠳᠤ ᠥᠬᠢᠨ ᠢᠶᠠᠨ ᠥᠭᠬᠦ ᠦᠭᠡᠢ ᠪᠣᠯ ᠴᠢ ᠡᠨᠡ ᠲᠠᠩ᠋ᠭᠠᠷᠢᠭ ᠠᠴᠠ ᠴᠢᠯᠥᠭᠡᠯᠡᠭᠳᠡᠬᠦ ᠪᠣᠯᠣᠨᠠ᠂ ᠦᠨᠡᠬᠡᠷ ᠴᠢᠯᠥᠭᠡᠯᠡᠭᠳᠡᠬᠦ ᠪᠣᠯᠣᠨᠠ〉 ᠭᠡᠰᠡᠨ ᠶᠤᠮ᠃
42 ᠥᠨᠥᠳᠥᠷ ᠪᠢ ᠬᠤᠳᠳᠤᠭ ᠳᠡᠭᠡᠷᠡ ᠢᠷᠡᠭᠡᠳ ᠮᠢᠨᠦ ᠡᠵᠡᠨ ᠠᠪᠷᠠᠬᠠᠮ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠡ᠂ ᠲᠠᠨ ᠤ ᠲᠠᠭᠠᠯᠠᠯ ᠮᠥᠨ ᠶᠤᠮ ᠪᠣᠯ ᠠᠶᠠᠨ ᠵᠠᠮ ᠢ ᠮᠢᠨᠢ ᠥᠯᠵᠡᠢ ᠲᠡᠢ ᠪᠣᠯᠭᠠᠵᠤ ᠥᠭᠭᠥᠭᠡᠴᠢ᠃ 43 ᠣᠳᠣ ᠪᠢ ᠬᠤᠳᠳᠤᠭ ᠤᠨ ᠳᠡᠷᠭᠡᠳᠡ ᠵᠣᠭᠰᠣᠶᠠ᠃ ᠵᠠᠯᠠᠭᠤ ᠡᠮᠡᠭᠲᠡᠢ ᠤᠰᠤ ᠠᠪᠬᠤ ᠪᠠᠷ ᠢᠷᠡᠪᠡᠯ ᠪᠢ ᠲᠡᠭᠦᠨ ᠳᠦ᠄ 〈ᠴᠢ ᠸᠠᠭᠠᠷ ᠲᠠᠢ ᠤᠰᠤᠨ ᠠᠴᠠ ᠪᠠᠨ ᠨᠠᠳᠠ ᠳᠤ ᠵᠢᠭᠠᠬᠠᠨ ᠤᠤᠭᠤᠯᠭᠠᠨᠠ ᠤᠤ︖〉 ᠭᠡᠵᠦ ᠬᠡᠯᠡᠬᠦ ᠪᠠ 44 ᠲᠡᠷᠡ᠄ 〈ᠤᠤᠭᠤ᠂ ᠤᠤᠭᠤ︕ ᠪᠢ ᠪᠠᠰᠠ ᠲᠡᠮᠡᠭᠡᠳ ᠲᠦ ᠴᠢᠨᠢ ᠤᠰᠤ ᠠᠪᠴᠢᠷᠠᠶᠠ〉 ᠭᠡᠵᠦ ᠬᠡᠯᠡᠪᠡᠯ᠂ ᠲᠡᠷᠡ ᠡᠮᠡᠭᠲᠡᠢ ᠨᠢ ᠶᠣᠬᠣᠸᠠ ᠶᠢᠨ ᠮᠢᠨᠦ ᠡᠵᠡᠨ ᠦ ᠬᠦᠦ ᠳᠦ ᠵᠠᠶᠠᠭᠠᠭᠰᠠᠨ ᠬᠥᠮᠦᠨ ᠪᠣᠯᠣᠨᠠ ᠭᠡᠵᠦ 45 ᠵᠢᠷᠦᠬᠡᠨ ᠳᠣᠲᠣᠷᠠ ᠪᠠᠨ ᠳᠠᠭᠠᠳᠬᠠᠵᠤ᠂ ᠠᠷᠠᠢ ᠳᠠᠭᠤᠰᠤᠭᠠ ᠦᠭᠡᠢ ᠪᠠᠢᠲᠠᠯᠠ ᠮᠥᠷᠥᠨ ᠳᠡᠭᠡᠷᠡ ᠪᠡᠨ ᠸᠠᠭᠠᠷ ᠲᠠᠢ ᠷᠧᠪᠧᠺᠠ ᠭᠠᠷᠴᠤ ᠢᠷᠡᠭᠰᠡᠨ︕ ᠲᠡᠷᠡ ᠪᠡᠷ ᠬᠤᠳᠳᠤᠭ ᠤᠷᠤᠭᠤ ᠣᠴᠢᠵᠤ ᠤᠰᠤ ᠲᠠᠲᠠᠪᠠ᠃ 〈ᠨᠠᠳᠠ ᠳᠤ ᠤᠰᠤᠨ ᠠᠴᠠ ᠪᠠᠨ ᠤᠤᠭᠤᠯᠭᠠᠨᠠ ᠤᠤ︖〉 ᠭᠡᠵᠦ ᠲᠡᠭᠦᠨ ᠳᠦ ᠬᠡᠯᠡᠬᠦ ᠳᠦ ᠮᠢᠨᠢ᠂ 46 ᠲᠡᠷᠡ ᠸᠠᠭᠠᠷ ᠢᠶᠠᠨ ᠮᠥᠷᠥᠨ ᠡᠴᠡ ᠪᠡᠨ ᠶᠠᠭᠠᠷᠠᠨ ᠪᠠᠭᠤᠯᠭᠠᠭᠠᠳ᠂ 〈ᠤᠤᠭᠤ᠂ ᠤᠤᠭᠤ︕ ᠪᠢ ᠪᠠᠰᠠ ᠲᠡᠮᠡᠭᠡᠳ ᠢ ᠴᠢᠨᠢ ᠤᠰᠤᠯᠠᠵᠤ ᠥᠭᠭᠥᠶᠡ〉 ᠭᠡᠵᠦ ᠬᠡᠯᠡᠭᠰᠡᠨ᠃ ᠪᠢ ᠤᠤᠭᠤᠭᠰᠠᠨ ᠪᠥᠭᠡᠳ ᠲᠡᠷᠡ ᠮᠢᠨᠦ ᠲᠡᠮᠡᠭᠡᠳ ᠢ ᠴᠤ ᠤᠰᠤᠯᠠᠯᠠ᠃ 47 ᠲᠡᠭᠡᠭᠡᠳ᠄ 〈ᠴᠢ ᠬᠡᠨ ᠦ ᠥᠬᠢᠨ ᠪᠤᠢ︖〉 ᠭᠡᠵᠦ ᠠᠰᠠᠭᠤᠬᠤ ᠳᠤ ᠮᠢᠨᠢ᠂ ᠲᠡᠷᠡ᠄ 〈ᠪᠢ ᠪᠣᠯ ᠪᠧᠲ᠋ᠦ᠋ᠶᠧᠯ ᠤᠨ ᠥᠬᠢᠨ᠂ ᠡᠪᠦᠭᠡ ᠮᠢᠨᠢ ᠨᠠᠬᠣᠷ᠂ ᠡᠮᠡᠭᠡ ᠮᠢᠨᠢ ᠮᠢᠯᠺᠠ ᠭᠡᠳᠡᠭ〉 ᠭᠡᠰᠡᠨ ᠳᠦ᠂ ᠪᠢ ᠲᠡᠭᠦᠨ ᠦ ᠬᠠᠮᠠᠷ ᠲᠤ ᠭᠠᠷᠠᠬᠠ᠂ ᠭᠠᠷ ᠲᠤ ᠪᠠᠭᠤᠪᠴᠢ ᠬᠢᠵᠦ ᠥᠭᠪᠡ᠃ 48 ᠪᠢ ᠶᠣᠬᠣᠸᠠ ᠳᠤ ᠲᠣᠯᠣᠭᠠᠢ ᠮᠡᠬᠦᠢᠨ ᠬᠦᠨᠳᠦᠳᠬᠡᠨ ᠮᠥᠷᠭᠥᠭᠡᠳ᠂ ᠮᠢᠨᠦ ᠡᠵᠡᠨ ᠠᠪᠷᠠᠬᠠᠮ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠶᠢ ᠮᠠᠭᠲᠠᠭᠰᠠᠨ ᠪᠢᠯᠡ᠃ ᠶᠣᠬᠣᠸᠠ ᠨᠠᠮᠠᠶᠢ ᠦᠨᠡᠨ ᠵᠥᠪ ᠵᠠᠮ ᠢᠶᠠᠷ ᠬᠥᠲᠥᠯᠵᠦ᠂ ᠡᠵᠡᠨ ᠦ ᠮᠢᠨᠢ ᠳᠡᠭᠦᠦ ᠶᠢᠨ ᠠᠴᠢ ᠥᠬᠢᠨ ᠢ ᠬᠦᠦ ᠳᠦᠨᠢ ᠰᠣᠩ᠋ᠭᠣᠭᠤᠯᠤᠭᠰᠠᠨ ᠶᠤᠮ᠃ 49 ᠬᠡᠷᠪᠡ ᠣᠳᠣ ᠲᠠ ᠨᠠᠷ ᠮᠢᠨᠦ ᠡᠵᠡᠨ ᠳᠦ ᠦᠨᠡᠨ ᠬᠠᠢᠷᠠ ᠪᠠ ᠢᠲᠡᠭᠡᠮᠵᠢᠲᠦ ᠪᠠᠢᠳᠠᠯ ᠢᠶᠠᠷ ᠬᠠᠨᠳᠤᠶᠠ ᠭᠡᠪᠡᠯ ᠨᠠᠳᠠ ᠳᠤ ᠬᠡᠯᠡᠭᠡᠷᠡᠢ᠃ ᠲᠡᠭᠡᠬᠦ ᠦᠭᠡᠢ ᠴᠤ ᠭᠡᠰᠡᠨ ᠨᠠᠳᠠ ᠳᠤ ᠬᠡᠯᠡᠭᠡᠷᠡᠢ᠂ ᠲᠡᠭᠡᠪᠡᠯ ᠪᠢ ᠴᠤ ᠪᠠᠷᠠᠭᠤᠨ ᠲᠡᠰᠢ ᠪᠠᠨ᠂ ᠡᠰᠡᠪᠡᠯ ᠵᠡᠭᠦᠨ ᠲᠡᠰᠢ ᠪᠠᠨ ᠡᠷᠭᠢᠬᠦ ᠪᠡᠨ ᠮᠡᠳᠡᠬᠦ ᠪᠣᠯᠣᠨᠠ》 ᠭᠡᠵᠦ ᠬᠡᠯᠡᠪᠡ᠃
50 ᠯᠠᠪᠠᠨ ᠪᠧᠲ᠋ᠦ᠋ᠶᠧᠯ ᠬᠣᠶᠠᠷ ᠬᠠᠷᠢᠭᠤ ᠳᠤᠨᠢ᠄ 《ᠡᠨᠡ ᠦᠢᠯᠡ ᠶᠠᠪᠤᠳᠠᠯ ᠴᠢᠨᠢ ᠶᠣᠬᠣᠸᠠ ᠠᠴᠠ ᠭᠠᠷᠤᠭᠰᠠᠨ ᠶᠤᠮ ᠪᠠᠢᠨᠠ᠃ ᠪᠢᠳᠡ ᠰᠠᠢᠨ ᠮᠠᠭᠤ ᠶᠢᠨ ᠠᠯᠢ ᠨᠢ ᠪᠣᠯᠬᠤ ᠶᠢ ᠲᠠᠨ ᠳᠤ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ᠃ 51 ᠬᠠᠷᠠ᠂ ᠷᠧᠪᠧᠺᠠ ᠲᠠᠨ ᠤ ᠡᠮᠦᠨᠡ ᠪᠠᠢᠨᠠ᠃ ᠲᠡᠭᠦᠨ ᠢ ᠠᠪᠠᠴᠢᠵᠤ ᠪᠣᠯᠣᠨᠠ᠃ ᠶᠣᠬᠣᠸᠠ ᠶᠢᠨ ᠠᠢᠯᠠᠳᠤᠭᠰᠠᠨ ᠶᠣᠰᠣᠭᠠᠷ ᠲᠡᠷᠡ ᠲᠠᠨ ᠤ ᠡᠵᠡᠨ ᠦ ᠬᠦᠦ ᠶᠢᠨ ᠡᠬᠡᠨᠡᠷ ᠪᠣᠯᠣᠭ》 ᠭᠡᠪᠡ᠃
52 ᠠᠪᠷᠠᠬᠠᠮ ᠤᠨ ᠵᠠᠷᠤᠴᠠ ᠦᠭᠡ ᠶᠢ ᠨᠢ ᠰᠣᠨᠣᠰᠣᠭᠠᠳ ᠭᠠᠵᠠᠷ ᠲᠤ ᠪᠥᠬᠥᠢᠨ᠂ ᠶᠣᠬᠣᠸᠠ ᠳᠤ ᠮᠥᠷᠭᠥᠭᠡᠳ 53 ᠠᠯᠲᠠ ᠮᠥᠩᠭᠥᠨ ᠡᠳ᠋ᠯᠡᠯ᠂ ᠬᠤᠪᠴᠠᠰᠤ ᠬᠤᠨᠠᠷ ᠭᠠᠷᠭᠠᠨ᠂ ᠷᠧᠪᠧᠺᠠ ᠳᠤ ᠥᠭᠴᠦ᠂ ᠲᠡᠭᠦᠨ ᠦ ᠠᠬᠠ ᠪᠣᠯᠣᠨ ᠡᠵᠢ ᠳᠦᠨᠢ ᠪᠠᠰᠠ ᠦᠨᠡᠲᠦ ᠵᠦᠢᠯᠡᠰ ᠪᠠᠷᠢᠵᠠᠢ᠃ 54 ᠲᠡᠭᠡᠭᠡᠳ ᠨᠥᠭᠥᠭᠡ ᠵᠠᠷᠤᠴᠠ ᠪᠣᠯᠣᠨ ᠳᠠᠭᠠᠯᠳᠤᠭᠰᠠᠳ ᠨᠢ ᠢᠳᠡᠵᠦ ᠤᠤᠭᠤᠭᠠᠳ ᠲᠡᠨᠳᠡ ᠬᠣᠨᠣᠭᠯᠠᠭᠰᠠᠨ ᠪᠠᠢᠨᠠ᠃ ᠲᠡᠷᠡ ᠪᠡᠷ ᠥᠷᠯᠥᠭᠡ ᠪᠣᠰᠣᠭᠠᠳ᠄ 《ᠡᠵᠡᠨ ᠤᠷᠤᠭᠤ ᠮᠢᠨᠢ ᠪᠤᠴᠠᠭᠠᠵᠤ ᠶᠠᠪᠤᠭᠤᠯᠤᠭᠠᠴᠢ》 ᠭᠡᠬᠦ ᠳᠦ᠂ 55 ᠷᠧᠪᠧᠺᠠ ᠶᠢᠨ ᠠᠬᠠ᠂ ᠡᠵᠢ ᠬᠣᠶᠠᠷ᠄ 《ᠥᠬᠢᠨ ᠮᠢᠨᠢ ᠠᠷᠪᠠᠭᠠᠳ ᠬᠣᠨᠣᠭ ᠶᠤᠮ ᠤᠤ᠂ ᠬᠡᠳᠦᠨ ᠬᠣᠨᠣᠭ ᠴᠤ ᠪᠢᠳᠡᠨ ᠲᠡᠢ ᠬᠠᠮᠲᠤ ᠪᠠᠢᠵᠤ ᠪᠠᠢᠭ᠂ ᠲᠡᠭᠡᠭᠡᠳ ᠲᠠ ᠶᠠᠪᠤᠭᠠᠷᠠᠢ》 ᠭᠡᠪᠡ᠃ 56 ᠬᠠᠷᠢᠨ ᠲᠡᠷᠡ ᠬᠥᠮᠦᠨ᠄ 《ᠨᠠᠮᠠᠶᠢ ᠪᠢᠲᠡᠭᠡᠢ ᠰᠠᠭᠠᠲᠠᠭᠠᠭᠠᠷᠠᠢ᠃ ᠶᠣᠬᠣᠸᠠ ᠠᠶᠠᠨ ᠵᠠᠮ ᠢ ᠮᠢᠨᠢ ᠥᠯᠵᠡᠢ ᠲᠡᠢ ᠪᠣᠯᠭᠠᠭᠰᠠᠨ ᠶᠤᠮ᠃ ᠨᠠᠮᠠᠶᠢ ᠶᠠᠪᠤᠭᠤᠯᠤᠭᠠᠴᠢ᠂ ᠪᠢ ᠡᠵᠡᠨ ᠤᠷᠤᠭᠤ ᠪᠠᠨ ᠪᠤᠴᠠᠶᠠ》 ᠭᠡᠪᠡ᠃ 57 ᠲᠡᠳᠡ᠄ 《ᠪᠢᠳᠡ ᠥᠬᠢᠨ ᠢᠶᠠᠨ ᠳᠠᠭᠤᠳᠠᠵᠤ᠂ ᠲᠡᠭᠦᠨ ᠦ ᠠᠮᠠ ᠶᠢ ᠠᠪᠤᠶᠠ》 ᠭᠡᠳ 58 ᠷᠧᠪᠧᠺᠠ ᠶᠢ ᠳᠠᠭᠤᠳᠠᠵᠤ᠄ 《ᠴᠢ ᠡᠨᠡ ᠬᠥᠮᠦᠨ ᠲᠡᠢ ᠬᠠᠮᠲᠤ ᠶᠠᠪᠤᠬᠤ ᠤᠤ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ ᠲᠡᠷᠡ᠄ 《ᠪᠢ ᠶᠠᠪᠤᠨᠠ》 ᠭᠡᠵᠡᠢ᠃ 59 ᠲᠡᠢᠨ ᠬᠦ ᠲᠡᠳᠡ ᠥᠬᠢᠨ ᠳᠡᠭᠦᠦ ᠷᠧᠪᠧᠺᠠ ᠪᠠᠨ ᠠᠰᠠᠷᠠᠭᠴᠢ ᠡᠬᠡ ᠲᠠᠢ ᠨᠢ ᠬᠠᠮᠲᠤ᠂ ᠮᠥᠨ ᠠᠪᠷᠠᠬᠠᠮ ᠤᠨ ᠵᠠᠷᠤᠴᠠ ᠬᠢᠭᠡᠳ ᠳᠠᠭᠠᠯᠳᠤᠭᠴᠢᠳ ᠲᠠᠢ ᠨᠢ ᠬᠠᠮᠲᠤ ᠶᠠᠪᠤᠭᠤᠯᠵᠠᠢ᠃ 60 ᠲᠡᠳᠡ ᠷᠧᠪᠧᠺᠠ ᠶᠢ ᠢᠷᠥᠭᠡᠨ᠄ 《ᠥᠬᠢᠨ ᠳᠡᠭᠦᠦ ᠮᠢᠨᠢ ᠴᠢ ᠲᠦᠮᠡ ᠪᠤᠮᠠᠨ ᠬᠥᠮᠦᠨ ᠦ ᠡᠬᠡ ᠪᠣᠯᠬᠤ ᠪᠣᠯᠲᠤᠭᠠᠢ︕ ᠴᠢᠨᠦ ᠦᠷᠡ ᠤᠳᠤᠮ ᠥᠰᠲᠡᠳ ᠦᠨ ᠢᠶᠠᠨ ᠬᠣᠲᠠ ᠶᠢᠨ ᠬᠠᠭᠠᠯᠭᠠ ᠶᠢ ᠡᠵᠡᠯᠡᠬᠦ ᠪᠣᠯᠲᠤᠭᠠᠢ︕》
ᠬᠡᠮᠡᠵᠡᠢ᠃ 61 ᠷᠧᠪᠧᠺᠠ ᠰᠢᠪᠡᠭᠴᠢᠳ ᠲᠠᠢ ᠪᠠᠨ ᠬᠠᠮᠲᠤ ᠬᠥᠳᠡᠯᠦᠨ ᠲᠡᠮᠡᠭᠡ ᠤᠨᠤᠵᠤ᠂ ᠲᠡᠷᠡ ᠬᠥᠮᠦᠨ ᠢ ᠳᠠᠭᠠᠪᠠ᠃ ᠨᠥᠭᠥᠭᠡ ᠵᠠᠷᠤᠴᠠ ᠷᠧᠪᠧᠺᠠ ᠶᠢ ᠠᠪᠤᠭᠠᠳ ᠶᠠᠪᠤᠯᠠ᠃
62 ᠡᠨᠡ ᠦᠶᠡ ᠳᠦ ᠢᠰᠠᠺ ᠪᠧᠷ ᠯᠠᠬᠠᠢ ᠷᠣᠢ ᠠᠴᠠ ᠪᠤᠴᠠᠵᠤ ᠢᠷᠡᠭᠡᠳ ᠨᠧᠭᠧᠪ ᠲᠤ ᠰᠠᠭᠤᠵᠤ ᠪᠠᠢᠯᠠ᠃ 63 ᠦᠳᠡᠰᠢ ᠪᠣᠯᠵᠤ ᠪᠠᠢᠬᠤ ᠳᠤ᠂ ᠢᠰᠠᠺ ᠪᠢᠰᠢᠯᠭᠠᠯ ᠬᠢᠬᠦ ᠪᠡᠷ ᠬᠡᠭᠡᠷᠡ ᠭᠠᠷᠤᠭᠠᠳ ᠨᠢᠳᠦ ᠡᠷᠭᠦᠨ ᠬᠠᠷᠠᠲᠠᠯᠠ ᠲᠡᠮᠡᠭᠡᠨ ᠵᠢᠩ ᠠᠢᠰᠤᠢ︕ 64 ᠷᠧᠪᠧᠺᠠ ᠴᠤ ᠨᠢᠳᠦ ᠡᠷᠭᠦᠨ᠂ ᠢᠰᠠᠺ ᠢ ᠬᠠᠷᠠᠯᠠ᠃ ᠲᠡᠷᠡ ᠲᠡᠮᠡᠭᠡᠨ ᠡᠴᠡ ᠪᠡᠨ ᠪᠠᠭᠤᠵᠤ᠂ 65 ᠨᠥᠭᠥᠭᠡ ᠵᠠᠷᠤᠴᠠ ᠳᠤ᠄ 《ᠬᠡᠭᠡᠷᠡ ᠲᠠᠯᠠ ᠪᠠᠷ ᠠᠯᠬᠤᠯᠠᠵᠤ᠂ ᠪᠢᠳᠡᠨ ᠢ ᠤᠭᠲᠤᠨ ᠢᠷᠡᠵᠦ ᠪᠠᠢᠭᠠ ᠲᠡᠷᠡ ᠡᠷᠡ ᠬᠡᠨ ᠪᠤᠢ︖》 ᠭᠡᠬᠦ ᠳᠦ᠂ ᠵᠠᠷᠤᠴᠠ᠄ 《ᠲᠡᠷᠡ ᠪᠣᠯ ᠮᠢᠨᠦ ᠡᠵᠡᠨ》 ᠭᠡᠰᠡᠨ ᠳᠦ᠂ ᠷᠧᠪᠧᠺᠠ ᠨᠥᠮᠥᠷᠭᠡ ᠪᠡᠨ ᠭᠠᠷᠭᠠᠨ ᠨᠢᠭᠤᠷ ᠢᠶᠠᠨ ᠪᠦᠲᠡᠭᠡᠪᠡ᠃ 66 ᠵᠠᠷᠤᠴᠠ ᠨᠢ ᠢᠰᠠᠺ ᠲᠤ ᠬᠢᠭᠰᠡᠨ ᠪᠦᠬᠦᠨ ᠢᠶᠡᠨ ᠬᠡᠯᠡᠵᠦ ᠥᠭᠴᠡᠢ᠃ 67 ᠢᠰᠠᠺ ᠷᠧᠪᠧᠺᠠ ᠶᠢ ᠡᠬᠡ ᠰᠠᠷᠠᠾ ᠤᠨ ᠢᠶᠠᠨ ᠮᠠᠢᠬᠠᠨ ᠳᠤ ᠳᠠᠭᠠᠭᠤᠯᠤᠨ ᠣᠷᠣᠭᠠᠳ ᠲᠡᠭᠦᠨ ᠢ ᠡᠬᠡᠨᠡᠷ ᠢᠶᠡᠨ ᠪᠣᠯᠭᠠᠨ ᠠᠪᠴᠤ᠂ ᠬᠠᠢᠷᠠᠯᠠᠨ ᠳᠤᠷᠠᠯᠠᠵᠠᠢ᠃ ᠡᠬᠡ ᠡᠴᠡ ᠪᠡᠨ ᠬᠣᠢᠰᠢ ᠢᠰᠠᠺ ᠤᠨ ᠰᠡᠳᠬᠢᠯ ᠢᠩᠭᠢᠭᠡᠳ ᠲᠠᠢᠳᠬᠤᠷᠤᠭᠰᠠᠨ ᠶᠤᠮ᠃