ᠡᠬᠢᠯᠡᠯ ᠬᠣᠷᠢᠨ ᠵᠢᠷᠭᠤᠭᠠ
ᠢᠰᠠᠺ ᠪᠠ ᠠᠪᠢᠮᠧᠯᠧᠺ
1 ᠠᠪᠷᠠᠬᠠᠮ ᠤᠨ ᠦᠶᠡ ᠳᠦ ᠠᠩᠬᠠ ᠥᠯᠥᠰᠬᠥᠯᠡᠩ ᠪᠣᠯᠣᠭᠰᠠᠨ ᠲᠡᠷᠡ ᠭᠠᠵᠠᠷ ᠲᠤ ᠳᠠᠬᠢᠨ ᠥᠯᠥᠰᠬᠥᠯᠡᠩ ᠪᠣᠯᠣᠭᠰᠠᠨ ᠳᠤ᠂ ᠢᠰᠠᠺ ᠹᠢᠯᠢᠰᠲ ᠤᠨ ᠬᠠᠭᠠᠨ ᠠᠪᠢᠮᠧᠯᠧᠺ ᠤᠨ ᠰᠠᠭᠤᠳᠠᠭ ᠭᠧᠷᠠᠷ ᠤᠷᠤᠭᠤ ᠣᠳᠪᠠ᠃ 2 ᠲᠡᠨᠳᠡ ᠶᠣᠬᠣᠸᠠ ᠢᠰᠠᠺ ᠲᠤ ᠦᠵᠡᠭᠳᠡᠵᠦ᠄ 《ᠴᠢ ᠶᠧᠵᠢᠫᠲ ᠤᠷᠤᠭᠤ ᠪᠦᠦ ᠶᠠᠪᠤ᠂ ᠬᠠᠷᠢᠨ ᠮᠢᠨᠦ ᠴᠢᠮᠠ ᠳᠤ ᠬᠡᠯᠡᠬᠦ ᠭᠠᠵᠠᠷ ᠲᠤ ᠰᠠᠭᠤ᠃ 3 ᠴᠢ ᠡᠨᠡ ᠭᠠᠵᠠᠷ ᠲᠤ ᠦᠯᠡᠳᠡᠪᠡᠯ ᠪᠢ ᠴᠢᠮᠠ ᠲᠠᠢ ᠬᠠᠮᠲᠤ ᠪᠠᠢᠭᠰᠠᠭᠠᠷ ᠴᠢᠮᠠᠶᠢ ᠢᠪᠡᠭᠡᠨ᠂ ᠡᠨᠡ ᠪᠦᠬᠦ ᠭᠠᠵᠠᠷ ᠢ ᠴᠢᠮᠠ ᠳᠤ ᠪᠣᠯᠣᠨ ᠴᠢᠨᠦ ᠦᠷᠡ ᠤᠳᠤᠮ ᠳᠤ ᠥᠭᠭᠥᠨᠡ᠃ ᠪᠢ ᠴᠢᠨᠦ ᠡᠴᠢᠭᠡ ᠠᠪᠷᠠᠬᠠᠮ ᠳᠤ ᠲᠠᠯᠪᠢᠭᠰᠠᠨ ᠲᠠᠩ᠋ᠭᠠᠷᠢᠭ ᠢᠶᠠᠨ ᠪᠡᠶᠡᠯᠡᠭᠦᠯᠦᠨ᠂ 4 ᠦᠷᠡ ᠬᠡᠦᠬᠡᠳ ᠢ ᠴᠢᠨᠢ ᠲᠩᠷᠢ ᠶᠢᠨ ᠣᠳᠣ ᠮᠡᠲᠦ ᠣᠯᠠᠰᠢᠷᠠᠭᠤᠯᠤᠶᠠ᠂ ᠡᠨᠡ ᠪᠦᠬᠦ ᠭᠠᠵᠠᠷ ᠢ ᠦᠷᠡ ᠤᠳᠤᠮ ᠳᠤ ᠴᠢᠨᠢ ᠥᠭᠭᠥᠨᠡ᠂ ᠴᠢᠨᠦ ᠦᠷᠡ ᠤᠳᠤᠮ ᠢᠶᠠᠷ ᠳᠠᠮᠵᠢᠨ ᠭᠠᠵᠠᠷ ᠤᠨ ᠪᠦᠬᠦ ᠦᠨᠳᠦᠰᠦᠲᠡᠨ ᠢᠪᠡᠭᠡᠭᠳᠡᠨᠡ᠃ 5 ᠤᠴᠢᠷ ᠨᠢ ᠠᠪᠷᠠᠬᠠᠮ ᠮᠢᠨᠦ ᠦᠭᠡ ᠶᠢ ᠳᠠᠭᠠᠵᠤ᠂ ᠮᠢᠨᠦ ᠵᠢᠷᠤᠮ᠂ ᠮᠢᠨᠦ ᠲᠤᠰᠢᠶᠠᠯ᠂ ᠮᠢᠨᠦ ᠵᠠᠷᠯᠢᠭ ᠪᠣᠯᠣᠨ ᠮᠢᠨᠦ ᠬᠠᠤᠯᠢ ᠶᠢ ᠰᠠᠬᠢᠭᠰᠠᠨ ᠶᠤᠮ》 ᠭᠡᠪᠡ᠃
6 ᠲᠡᠢᠨ ᠬᠦ ᠢᠰᠠᠺ ᠭᠧᠷᠠᠷ ᠲᠤ ᠰᠠᠭᠤᠷᠢᠰᠢᠪᠠ᠃ 7 ᠲᠡᠷᠡ ᠨᠤᠲᠤᠭ ᠤᠨ ᠡᠷᠡᠴᠦᠳ ᠡᠬᠡᠨᠡᠷ ᠦᠨ ᠬᠢᠨᠢ ᠲᠠᠯᠠ ᠪᠠᠷ ᠠᠰᠠᠭᠤᠭᠰᠠᠨ ᠳᠤ᠂ ᠲᠡᠷᠡ ᠠᠶᠤᠵᠤ᠄ 《ᠡᠨᠡ ᠪᠣᠯ ᠮᠢᠨᠦ ᠥᠬᠢᠨ ᠳᠡᠭᠦᠦ》 ᠭᠡᠵᠡᠢ᠃ 《ᠷᠧᠪᠧᠺᠠ ᠭᠤᠸᠠ ᠦᠵᠡᠰᠬᠦᠯᠡᠩ ᠪᠣᠯᠬᠣᠷ ᠡᠨᠡ ᠪᠣᠯ ᠮᠢᠨᠦ ᠡᠬᠡᠨᠡᠷ ᠭᠡᠵᠦ ᠬᠡᠯᠡᠪᠡᠯ ᠡᠨᠡ ᠨᠤᠲᠤᠭ ᠤᠨ ᠬᠢᠨ ᠲᠡᠭᠦᠨ ᠡᠴᠡ ᠪᠣᠯᠵᠤ ᠨᠠᠮᠠᠶᠢ ᠠᠯᠠᠴᠢᠬᠠᠬᠤ ᠪᠣᠯᠣᠭᠤᠵᠠᠢ》 ᠭᠡᠵᠦ ᠲᠡᠷᠡ ᠪᠣᠳᠣᠵᠠᠢ᠃ 8 ᠢᠰᠠᠺ ᠲᠡᠨᠳᠡ ᠰᠠᠭᠤᠭᠠᠳ ᠤᠳᠠᠵᠠᠢ᠃ ᠨᠢᠭᠡᠨ ᠡᠳᠦᠷ ᠹᠢᠯᠢᠰᠲ ᠤᠨ ᠬᠠᠭᠠᠨ ᠠᠪᠢᠮᠧᠯᠧᠺ ᠴᠣᠩ᠋ᠬᠣ ᠪᠠᠷ ᠢᠶᠠᠨ ᠬᠠᠷᠠᠵᠤ ᠪᠠᠢᠬᠤ ᠳᠠᠭᠠᠨ ᠢᠰᠠᠺ ᠤᠨ ᠡᠬᠡᠨᠡᠷ ᠷᠧᠪᠧᠺᠠ ᠪᠠᠨ ᠡᠩᠬᠦᠷᠡᠢᠯᠡᠵᠦ ᠪᠠᠢᠬᠤ ᠶᠢ ᠦᠵᠡᠵᠡᠢ᠃ 9 ᠠᠪᠢᠮᠧᠯᠧᠺ ᠢᠰᠠᠺ ᠢ ᠳᠠᠭᠤᠳᠠᠨ᠄ 《ᠲᠡᠷᠡ ᠦᠨᠡᠬᠡᠷ ᠴᠢᠨᠦ ᠡᠬᠡᠨᠡᠷ ᠮᠥᠨ ᠠᠲᠠᠯᠠ ᠴᠢ ᠶᠠᠭᠤᠨ ᠳᠤ ᠲᠡᠭᠦᠨ ᠢ ᠮᠢᠨᠦ ᠥᠬᠢᠨ ᠳᠡᠭᠦᠦ ᠭᠡᠵᠦ ᠬᠡᠯᠡᠭᠰᠡᠨ ᠪᠤᠢ︖》 ᠭᠡᠰᠡᠨ ᠳᠦ᠂ ᠢᠰᠠᠺ᠄ 《ᠲᠡᠭᠦᠨ ᠡᠴᠡ ᠪᠣᠯᠣᠭᠠᠳ ᠪᠢ ᠬᠥᠨᠥᠭᠡᠭᠳᠡᠬᠦ ᠪᠣᠯᠣᠭᠤᠵᠠᠢ ᠭᠡᠵᠦ ᠪᠣᠳᠣᠭᠰᠠᠨ ᠶᠤᠮ》 ᠭᠡᠪᠡ᠃ 10 ᠠᠪᠢᠮᠧᠯᠧᠺ᠄ 《ᠪᠢᠳᠡᠨ ᠳᠦ ᠶᠠᠭᠤ ᠬᠢᠵᠦ ᠪᠠᠢᠭᠠ ᠴᠢᠨᠢ ᠡᠨᠡ ᠪᠤᠢ︖ ᠵᠣᠯ ᠲᠠᠢ ᠯᠠ ᠮᠠᠨ ᠤ ᠬᠥᠮᠦᠰ ᠦᠨ ᠨᠢᠭᠡ ᠨᠢ ᠡᠬᠡᠨᠡᠷ ᠲᠡᠢ ᠴᠢᠨᠢ ᠬᠡᠪᠲᠡᠭᠡ ᠦᠭᠡᠢ᠃ ᠴᠢᠮᠠ ᠠᠴᠠ ᠪᠣᠯᠵᠤ ᠪᠢᠳᠡ ᠭᠡᠮ ᠳᠦ ᠣᠷᠣᠬᠤ ᠰᠢᠬᠠᠯᠠ》 ᠭᠡᠪᠡ᠃ 11 ᠲᠡᠭᠡᠭᠡᠳ ᠠᠪᠢᠮᠧᠯᠧᠺ᠄ 《ᠡᠨᠡ ᠬᠥᠮᠦᠨ ᠳᠦ ᠪᠤᠶᠤ ᠲᠡᠭᠦᠨ ᠦ ᠡᠬᠡᠨᠡᠷ ᠲᠦ ᠭᠠᠷ ᠬᠦᠷᠬᠦ ᠬᠥᠮᠦᠨ ᠵᠠᠪᠠᠯ ᠦᠬᠦᠬᠦ ᠪᠣᠯᠣᠨᠠ》 ᠭᠡᠵᠦ ᠪᠦᠬᠦ ᠠᠷᠠᠳ ᠣᠯᠠᠨ ᠳᠠᠭᠠᠨ ᠲᠤᠰᠢᠶᠠᠵᠠᠢ᠃
12 ᠢᠰᠠᠺ ᠲᠡᠷᠡ ᠭᠠᠵᠠᠷ ᠲᠤ ᠲᠠᠷᠢᠶᠠ ᠲᠠᠷᠢᠵᠤ᠂ ᠲᠡᠷᠡ ᠵᠢᠯ ᠳᠡᠭᠡᠨ ᠵᠠᠭᠤ ᠳᠠᠬᠢᠨ ᠶᠡᠬᠡ ᠤᠷᠭᠤᠴᠠ ᠬᠤᠷᠢᠶᠠᠵᠠᠢ᠃ ᠶᠣᠬᠣᠸᠠ ᠲᠡᠭᠦᠨ ᠢ ᠢᠪᠡᠭᠡᠭᠰᠡᠨ ᠶᠤᠮ᠃ 13 ᠲᠡᠷᠡ ᠪᠡᠷ ᠪᠠᠶᠠᠵᠢᠨ ᠴᠢᠨᠡᠭᠡᠯᠢᠭᠵᠢᠭᠰᠡᠭᠡᠷ ᠬᠣᠵᠢᠮ ᠨᠢ ᠠᠰᠤᠷᠤ ᠶᠡᠬᠡ ᠬᠥᠷᠥᠩᠭᠡ ᠲᠠᠢ ᠪᠣᠯᠵᠠᠢ᠃ 14 ᠲᠡᠭᠦᠨ ᠦ ᠬᠣᠨᠢᠨ ᠰᠦᠷᠦᠭ᠂ ᠦᠬᠡᠷ ᠦᠨ ᠰᠦᠷᠦᠭ᠂ ᠵᠠᠷᠤᠴᠠ ᠨᠠᠷ ᠥᠨᠢᠷ ᠣᠯᠠᠨ ᠪᠣᠯᠬᠣᠷ ᠹᠢᠯᠢᠰᠲ᠋ᠴᠦᠳ ᠲᠡᠭᠦᠨ ᠳᠦ ᠠᠲᠠᠭᠠᠷᠬᠠᠵᠤ᠂ 15 ᠲᠡᠭᠦᠨ ᠦ ᠡᠴᠢᠭᠡ ᠠᠪᠷᠠᠬᠠᠮ ᠤᠨ ᠡᠳᠦᠷ ᠤᠳ ᠲᠤ ᠵᠠᠷᠤᠴᠠ ᠨᠠᠷ ᠤᠨ ᠬᠢᠨᠢ ᠤᠬᠤᠵᠤ ᠭᠠᠷᠭᠠᠭᠰᠠᠨ ᠪᠦᠬᠦ ᠬᠤᠳᠳᠤᠭ ᠢ ᠪᠢᠲᠡᠭᠦᠯᠡᠵᠦ ᠰᠢᠷᠣᠢ ᠪᠠᠷ ᠳᠦᠭᠦᠷᠭᠡᠵᠡᠢ᠃ 16 ᠲᠡᠭᠡᠭᠡᠳ ᠠᠪᠢᠮᠧᠯᠧᠺ ᠢᠰᠠᠺ ᠲᠤ᠄ 《ᠴᠢ ᠮᠠᠨ ᠤ ᠡ᠊ᠨᠳᠡ ᠡᠴᠡ ᠶᠠᠪᠤ᠂ ᠴᠢ ᠮᠠᠨ ᠤ ᠬᠢᠨ ᠡᠴᠡ ᠪᠦᠷ ᠬᠦᠴᠦᠲᠡᠢ ᠪᠣᠯᠣᠭᠰᠠᠨ》 ᠭᠡᠪᠡ᠃
17 ᠢᠰᠠᠺ ᠲᠡᠨᠳᠡ ᠡᠴᠡ ᠬᠥᠳᠡᠯᠦᠨ ᠶᠠᠪᠤᠵᠤ ᠭᠧᠷᠠᠷ ᠤᠨ ᠬᠥᠨᠳᠡᠢ ᠳᠦ ᠮᠠᠢᠬᠠᠨ ᠢᠶᠠᠨ ᠪᠠᠷᠢᠵᠤ᠂ ᠲᠡᠨᠳᠡ ᠰᠠᠭᠤᠷᠢᠰᠢᠭᠠᠳ 18 ᠡᠴᠢᠭᠡ ᠠᠪᠷᠠᠬᠠᠮ ᠤᠨ ᠬᠢᠨᠢ ᠡᠳᠦᠷ ᠤᠳ ᠲᠤ ᠤᠬᠤᠭᠰᠠᠨ ᠬᠤᠳᠳᠤᠭ ᠤᠳ ᠢ ᠳᠠᠬᠢᠨ ᠤᠬᠤᠵᠤ ᠭᠠᠷᠭᠠᠵᠠᠢ᠃ ᠤᠴᠢᠷ ᠨᠢ ᠠᠪᠷᠠᠬᠠᠮ ᠥᠭᠡᠳᠡ ᠪᠣᠯᠣᠭᠰᠠᠨ ᠤ ᠳᠠᠷᠠᠭᠠ᠂ ᠲᠡᠳᠡᠭᠡᠷ ᠢ ᠨᠢ ᠹᠢᠯᠢᠰᠲ᠋ᠴᠦᠳ ᠪᠤᠯᠠᠵᠤ ᠪᠢᠲᠡᠭᠦᠯᠦᠭᠰᠡᠨ ᠪᠠᠢᠪᠠ᠃ ᠢᠰᠠᠺ ᠲᠡᠳᠡᠭᠡᠷ ᠢ ᠡᠴᠢᠭᠡ ᠶᠢᠨ ᠢᠶᠠᠨ ᠥᠭᠭᠥᠭᠰᠡᠨ ᠨᠡᠷᠡ ᠪᠡᠷ ᠨᠡᠷᠡᠯᠡᠪᠡ᠃ 19 ᠭᠡᠪᠡᠴᠦ ᠢᠰᠠᠺ ᠤᠨ ᠵᠠᠷᠤᠴᠠ ᠨᠠᠷ ᠭᠧᠷᠠᠷ ᠤᠨ ᠬᠥᠨᠳᠡᠢ ᠳᠦ ᠭᠠᠵᠠᠷ ᠤᠬᠤᠵᠤ᠂ ᠤᠨᠳᠤᠷᠤᠭᠠ ᠰᠠᠢᠲᠠᠢ ᠬᠤᠳᠳᠤᠭ ᠣᠯᠬᠤ ᠳᠤ᠂ 20 ᠭᠧᠷᠠᠷ ᠤᠨ ᠮᠠᠯᠴᠢᠳ᠄ 《ᠡᠨᠡ ᠤᠰᠤ ᠴᠢᠨᠢ ᠮᠠᠨ ᠤ ᠬᠢ》 ᠭᠡᠳ ᠢᠰᠠᠺ ᠤᠨ ᠮᠠᠯᠴᠢᠳ ᠲᠠᠢ ᠮᠠᠷᠭᠤᠯᠳᠤᠵᠠᠢ᠃ ᠲᠡᠳᠡ ᠨᠠᠷ ᠥᠪᠡᠷ ᠲᠡᠢ ᠨᠢ ᠮᠠᠷᠭᠤᠯᠳᠤᠭᠰᠠᠨ ᠤ ᠤᠴᠢᠷ ᠢᠰᠠᠺ ᠤᠤᠯ ᠬᠤᠳᠳᠤᠭ ᠢ 《ᠡᠰᠧᠺ》 ᠭᠡᠵᠦ ᠨᠡᠷᠡᠯᠡᠪᠡ᠃ 21 ᠵᠠᠷᠤᠴᠠ ᠨᠠᠷ ᠨᠢ ᠥᠭᠡᠷᠡ ᠨᠢᠭᠡ ᠬᠤᠳᠳᠤᠭ ᠤᠬᠤᠭᠰᠠᠨ ᠳᠤ᠂ ᠪᠠᠰᠠ ᠳᠠᠬᠢᠨ ᠮᠠᠷᠭᠤᠯᠳᠤᠵᠠᠢ᠃ ᠢᠰᠠᠺ ᠲᠡᠭᠦᠨ ᠢ 《ᠰᠢᠲ᠋ᠨᠠ 42 》 ᠭᠡᠵᠦ ᠨᠡᠷᠡᠯᠡᠵᠡᠢ᠃ 22 ᠲᠡᠷᠡ ᠲᠡᠨᠳᠡ ᠡᠴᠡ ᠨᠡᠭᠦᠵᠦ᠂ ᠪᠠᠰᠠ ᠨᠢᠭᠡ ᠬᠤᠳᠳᠤᠭ ᠤᠬᠤᠭᠰᠠᠨ ᠳᠤ᠂ ᠳᠠᠬᠢᠨ ᠮᠠᠷᠭᠤᠭᠠᠨ ᠭᠠᠷᠤᠭᠰᠠᠨ ᠦᠭᠡᠢ᠃ ᠢᠰᠠᠺ ᠲᠡᠭᠦᠨ ᠢ 《ᠷᠧᠬᠣᠪᠣᠲ 43 》 ᠭᠡᠵᠦ ᠨᠡᠷᠡᠯᠡᠭᠡᠳ᠄ 《ᠣᠳᠣ ᠶᠣᠬᠣᠸᠠ ᠮᠠᠨ ᠤ ᠬᠢᠨ ᠳᠤ ᠠᠭᠤᠳᠠᠮ ᠲᠠᠯᠠ ᠰᠣᠶᠣᠷᠬᠠᠵᠠᠢ᠂ ᠪᠢᠳᠡ ᠡ᠊ᠨᠳᠡ ᠥᠨᠢᠷ ᠪᠠᠶᠠᠨ ᠪᠣᠯᠣᠨᠠ》 ᠭᠡᠪᠡ᠃
23 ᠢᠰᠠᠺ ᠲᠡᠨᠳᠡ ᠡᠴᠡ ᠪᠧᠷ ᠱᠧᠪᠠ ᠤᠷᠤᠭᠤ ᠶᠠᠪᠤᠪᠠ᠃ 24 ᠲᠡᠷᠡ ᠰᠥᠨᠢ ᠶᠣᠬᠣᠸᠠ ᠲᠡᠭᠦᠨ ᠳᠦ ᠦᠵᠡᠭᠳᠡᠵᠦ᠄ 《ᠪᠢ ᠪᠣᠯ ᠴᠢᠨᠦ ᠡᠴᠢᠭᠡ ᠠᠪᠷᠠᠬᠠᠮ ᠤᠨ ᠪᠤᠷᠬᠠᠨ᠂ ᠪᠦᠦ ᠠᠶᠤ᠂ ᠪᠢ ᠴᠢᠮᠠ ᠲᠠᠢ ᠬᠠᠮᠲᠤ ᠪᠠᠢᠨᠠ᠂ ᠪᠢ ᠵᠠᠷᠤᠴᠠ ᠠᠪᠷᠠᠬᠠᠮ ᠤᠨ ᠢᠶᠠᠨ ᠲᠥᠯᠥᠭᠡ ᠴᠢᠮᠠᠶᠢ ᠢᠪᠡᠭᠡᠵᠦ ᠦᠷᠡ ᠤᠳᠤᠮ ᠢ ᠴᠢᠨᠢ ᠣᠯᠠᠰᠢᠷᠠᠭᠤᠯᠤᠨᠠ》
ᠭᠡᠪᠡ᠃ 25 ᠢᠰᠠᠺ ᠲᠡᠨᠳᠡ ᠲᠠᠬᠢᠯ ᠤᠨ ᠰᠢᠷᠡᠭᠡ ᠪᠣᠰᠬᠠᠵᠤ᠂ ᠶᠣᠬᠣᠸᠠ ᠶᠢᠨ ᠨᠡᠷᠡ ᠶᠢ ᠳᠠᠭᠤᠳᠠᠭᠠᠳ ᠮᠠᠢᠬᠠᠨ ᠢᠶᠠᠨ ᠪᠠᠷᠢᠪᠠ᠃ ᠵᠠᠷᠤᠴᠠ ᠨᠠᠷ ᠨᠢ ᠲᠡᠷᠡ ᠭᠠᠵᠠᠷ ᠲᠤ ᠴᠤ ᠬᠤᠳᠳᠤᠭ ᠤᠬᠤᠵᠠᠢ᠃
26 ᠲᠡᠭᠡᠲᠡᠯᠡ ᠠᠪᠢᠮᠧᠯᠧᠺ ᠥᠪᠡᠷ ᠦᠨ ᠰᠢᠳᠠᠷ ᠠᠾᠦ᠋ᠽᠠᠲ᠂ ᠴᠡᠷᠢᠭ ᠤᠨ ᠵᠠᠩᠵᠤᠨ ᠹᠢᠺᠣᠯ ᠨᠠᠷ ᠤᠨ ᠢᠶᠠᠨ ᠬᠠᠮᠲᠤ ᠭᠧᠷᠠᠷ ᠠᠴᠠ ᠢᠰᠠᠺ ᠳᠡᠭᠡᠷᠡ ᠢᠷᠡᠪᠡ᠃ 27 ᠢᠰᠠᠺ ᠲᠡᠳᠡᠨ ᠳᠦ᠄ 《ᠲᠠ ᠨᠠᠷ ᠶᠠᠭᠤᠨ ᠳᠤ ᠨᠠᠳᠠ ᠤᠷᠤᠭᠤ ᠬᠦᠷᠴᠦ ᠢᠷᠡᠪᠡ︖ ᠲᠠ ᠨᠠᠷ ᠨᠠᠮᠠᠶᠢ ᠦᠵᠡᠨ ᠶᠠᠳᠠᠵᠤ᠂ ᠥᠪᠡᠷᠰᠡᠳ ᠡᠴᠡ ᠪᠡᠨ ᠬᠥᠭᠡᠭᠡᠨ ᠶᠠᠪᠤᠭᠤᠯᠤᠭᠰᠠᠨ ᠪᠢᠵᠡ ᠳᠠ︖》 ᠭᠡᠰᠡᠨ ᠳᠦ᠂ 28 ᠲᠡᠳᠡ᠄ 《ᠶᠣᠬᠣᠸᠠ ᠴᠢᠮᠠ ᠲᠠᠢ ᠬᠠᠮᠲᠤ ᠪᠠᠢᠭᠠ ᠶᠢ ᠪᠢᠳᠡ ᠯᠠᠪ ᠬᠠᠷᠠᠭᠰᠠᠨ ᠤᠴᠢᠷ ᠪᠢᠳᠡᠨ ᠦ ᠬᠣᠭᠣᠷᠣᠨᠳᠣ ᠪᠤᠶᠤ ᠲᠠ ᠪᠢᠳᠡᠨ ᠦ ᠬᠣᠭᠣᠷᠣᠨᠳᠣ ᠲᠠᠩ᠋ᠭᠠᠷᠢᠭ ᠤᠨ ᠭᠡᠷᠡ ᠪᠠᠢᠬᠤ ᠶᠣᠰᠣᠲᠠᠢ ᠭᠡᠵᠦ ᠪᠣᠳᠣᠪᠠ᠂ ᠣᠳᠣ ᠪᠢᠳᠡ ᠴᠢᠮᠠ ᠲᠠᠢ ᠭᠡᠷᠡ ᠪᠠᠢᠭᠤᠯᠤᠶᠠ᠃ 29 ᠪᠢᠳᠡ ᠴᠢᠮᠠ ᠳᠤ ᠭᠠᠷ ᠬᠦᠷᠦᠯ ᠦᠭᠡᠢ᠂ ᠰᠠᠢᠨ ᠬᠠᠨᠳᠤᠵᠤ᠂ ᠴᠢᠮᠠᠶᠢ ᠠᠮᠤᠷ ᠲᠠᠢᠪᠤᠩ ᠶᠠᠪᠤᠭᠤᠯᠤᠭᠰᠠᠨ ᠤ ᠠᠳᠠᠯᠢ ᠴᠢ ᠪᠢᠳᠡᠨ ᠳᠦ ᠬᠣᠣᠷ ᠬᠥᠨᠥᠭᠡᠯ ᠪᠦᠦ ᠬᠢ᠃ ᠡᠨᠡ ᠤᠳᠠᠭᠠ ᠶᠣᠬᠣᠸᠠ ᠳᠤ ᠢᠪᠡᠭᠡᠭᠳᠡᠭᠰᠡᠨ ᠬᠥᠮᠦᠨ ᠨᠢ ᠴᠢ ᠶᠤᠮ》 ᠭᠡᠵᠡᠢ᠃ 30 ᠢᠰᠠᠺ ᠲᠡᠳᠡᠨ ᠳᠦ ᠳᠠᠢᠯᠠᠯᠭᠠ ᠪᠡᠯᠡᠳᠬᠡᠭᠰᠡᠨ ᠳᠦ᠂ ᠲᠡᠳᠡ ᠢᠳᠡᠵᠦ ᠤᠤᠭᠤᠵᠠᠭᠠᠪᠠ᠃ 31 ᠲᠡᠭᠡᠭᠡᠳ ᠲᠡᠳᠡ ᠥᠷᠯᠥᠭᠡ ᠡᠷᠲᠡᠯᠡᠨ ᠪᠣᠰᠴᠤ᠂ ᠪᠡᠶᠡ ᠪᠡᠶᠡ ᠳᠡᠭᠡᠨ ᠲᠠᠩ᠋ᠭᠠᠷᠢᠭᠯᠠᠭᠪᠠ᠃ ᠡᠭᠦᠨ ᠦ ᠳᠠᠷᠠᠭᠠ ᠢᠰᠠᠺ ᠲᠡᠳᠡᠨ ᠢ ᠶᠠᠪᠤᠭᠤᠯᠵᠤ᠂ ᠲᠡᠳᠡ ᠠᠮᠤᠷ ᠲᠠᠢᠪᠤᠩ ᠣᠳᠴᠠᠢ᠃ 32 ᠲᠡᠭᠡᠲᠡᠯᠡ ᠲᠡᠷᠡ ᠡᠳᠦᠷ ᠢᠰᠠᠺ ᠤᠨ ᠵᠠᠷᠤᠴᠠ ᠨᠠᠷ ᠢᠷᠡᠵᠦ ᠲᠡᠭᠦᠨ ᠳᠦ᠄ 《ᠪᠢᠳᠡ ᠤᠰᠤ ᠣᠯᠣᠯᠠ︕》 ᠭᠡᠵᠦ ᠤᠬᠤᠭᠰᠠᠨ ᠬᠤᠳᠳᠤᠭ ᠤᠨ ᠢᠶᠠᠨ ᠲᠤᠬᠠᠢ ᠳᠤᠭᠤᠯᠭᠠᠪᠠ᠃
33 ᠢᠰᠠᠺ ᠲᠡᠷᠡ ᠬᠤᠳᠳᠤᠭ ᠢ ᠱᠧᠪᠠ 44 ᠭᠡᠵᠦ ᠨᠡᠷᠡᠯᠡᠪᠡ᠃ ᠡᠭᠦᠨ ᠡᠴᠡ ᠪᠣᠯᠵᠤ ᠲᠡᠷᠡ ᠬᠣᠲᠠ ᠶᠢᠨ ᠨᠡᠷᠡ ᠶᠢ ᠣᠳᠣ ᠬᠦᠷᠲᠡᠯᠡ ᠪᠧᠷ ᠱᠧᠪᠠ 45 ᠭᠡᠭᠰᠡᠭᠡᠷ ᠪᠢᠯᠡ᠃ 34 ᠡᠰᠠᠦ᠋ ᠳᠥᠴᠢᠨ ᠨᠠᠰᠤᠲᠠᠢ ᠪᠠᠢᠬᠤ ᠳᠠᠭᠠᠨ ᠾᠢᠲ ᠬᠥᠮᠦᠨ ᠪᠧᠷᠢ ᠶᠢᠨ ᠥᠬᠢᠨ ᠶᠦᠳᠢᠲ ᠬᠢᠭᠡᠳ ᠾᠢᠲ ᠬᠥᠮᠦᠨ ᠡᠯᠣᠨ ᠤ ᠥᠬᠢᠨ ᠪᠠᠰᠧᠮᠠᠲ ᠬᠣᠶᠠᠷ ᠢ ᠡᠬᠡᠨᠡᠷ ᠪᠣᠯᠭᠠᠨ ᠠᠪᠴᠠᠢ᠃ 35 ᠲᠡᠳᠡᠭᠡᠷ ᠡᠮᠡᠭᠲᠡᠢ ᠢᠰᠠᠺ᠂ ᠷᠧᠪᠧᠺᠠ ᠬᠣᠶᠠᠷ ᠲᠤ ᠰᠡᠳᠬᠢᠯ ᠤᠨ ᠵᠣᠪᠠᠯᠠᠩ ᠪᠣᠯᠵᠠᠢ᠃