ᠡᠬᠢᠯᠡᠯ ᠬᠣᠷᠢᠨ ᠬᠣᠶᠠᠷ
ᠠᠪᠷᠠᠬᠠᠮ ᠰᠣᠷᠢᠭᠳᠠᠪᠠ
1 ᠡᠳᠡᠭᠡᠷ ᠶᠠᠪᠤᠳᠠᠯ ᠤᠨ ᠳᠠᠷᠠᠭᠠ ᠪᠤᠷᠬᠠᠨ ᠠᠪᠷᠠᠬᠠᠮ ᠢ ᠰᠣᠷᠢᠵᠠᠢ᠃ ᠲᠡᠷᠡ᠄ 《ᠠᠪᠷᠠᠬᠠᠮ ᠡ︕》 ᠭᠡᠰᠡᠨ ᠳᠦ᠂ ᠠᠪᠷᠠᠬᠠᠮ᠄ 《ᠪᠢ ᠡ᠊ᠨᠳᠡ ᠪᠠᠢᠨᠠ︕》 ᠭᠡᠯᠡ᠃ 2 ᠪᠤᠷᠬᠠᠨ᠄ 《ᠴᠢ ᠬᠦᠦ ᠪᠡᠨ᠂ ᠴᠣᠷ ᠤᠨ ᠭᠠᠭᠴᠠ ᠬᠠᠢᠷᠠᠲᠠᠢ ᠢᠰᠠᠺ ᠢᠶᠠᠨ ᠠᠪᠤᠭᠠᠳ ᠮᠣᠷᠢᠶᠠ ᠨᠤᠲᠤᠭ ᠤᠷᠤᠭᠤ ᠶᠠᠪᠤ᠃ ᠲᠡᠨᠳᠡ ᠮᠢᠨᠦ ᠵᠢᠭᠠᠵᠤ ᠥᠭᠬᠦ ᠨᠢᠭᠡᠨ ᠠᠭᠤᠯᠠᠨ ᠳᠡᠭᠡᠷᠡ ᠲᠡᠭᠦᠨ ᠢ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠪᠣᠯᠭᠠᠨ ᠡᠷᠭᠦᠭᠡᠷᠡᠢ》 ᠭᠡᠪᠡ᠃ 3 ᠠᠪᠷᠠᠬᠠᠮ ᠥᠷᠯᠥᠭᠡ ᠡᠷᠲᠡᠯᠡᠨ ᠪᠣᠰᠣᠭᠠᠳ ᠡᠯᠵᠢᠭᠡ ᠪᠡᠨ ᠡᠮᠡᠭᠡᠯᠯᠡᠵᠦ᠂ ᠬᠣᠶᠠᠷ ᠵᠠᠷᠤᠴᠠ ᠵᠠᠯᠠᠭᠤ ᠶᠢ ᠬᠦᠦ ᠢᠰᠠᠺ ᠤᠨ ᠢᠶᠠᠨ ᠬᠠᠮᠲᠤ ᠳᠠᠭᠤᠳᠠᠨ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠤᠨ ᠮᠣᠳᠣ ᠶᠢ ᠣᠭᠲᠣᠯᠣᠨ ᠪᠡᠯᠡᠳᠬᠡᠵᠦ᠂ ᠪᠤᠷᠬᠠᠨ ᠤ ᠥᠪᠡᠷ ᠲᠤᠨᠢ ᠠᠢᠯᠠᠳᠤᠭᠰᠠᠨ ᠲᠡᠷᠡ ᠭᠠᠵᠠᠷ ᠤᠷᠤᠭᠤ ᠶᠠᠪᠤᠭᠰᠠᠨ ᠪᠠᠢᠨᠠ᠃ 4 ᠭᠤᠷᠪᠠᠳᠠᠬᠢ ᠡᠳᠦᠷ ᠨᠢ ᠠᠪᠷᠠᠬᠠᠮ ᠨᠢᠳᠦ ᠡᠷᠭᠦᠨ ᠦᠵᠡᠬᠦ ᠳᠦ᠂ ᠲᠡᠷᠡ ᠨᠤᠲᠤᠭ ᠠᠯᠤᠰ ᠲᠤ ᠬᠠᠷᠠᠭᠳᠠᠪᠠ᠃ 5 ᠲᠡᠭᠡᠭᠡᠳ ᠠᠪᠷᠠᠬᠠᠮ ᠵᠠᠷᠤᠴᠠ ᠨᠠᠷ ᠲᠠᠭᠠᠨ᠄ 《ᠲᠠ ᠬᠣᠶᠠᠷ ᠡᠯᠵᠢᠭᠡ ᠲᠠᠢ ᠪᠠᠨ ᠡ᠊ᠨᠳᠡ ᠬᠦᠯᠢᠶᠡᠵᠦ ᠪᠠᠢ᠃ ᠬᠦᠦ ᠪᠢᠳᠡ ᠬᠣᠶᠠᠷ ᠲᠡᠰᠢ ᠪᠠᠨ ᠣᠴᠢᠵᠤ ᠮᠥᠷᠭᠥᠭᠡᠳ ᠲᠠ ᠨᠠᠷ ᠤᠷᠤᠭᠤ ᠡᠷᠭᠢᠵᠦ ᠢᠷᠡᠨᠡ》 ᠭᠡᠪᠡ᠃ 6 ᠠᠪᠷᠠᠬᠠᠮ ᠬᠦᠦ ᠢᠰᠠᠺ ᠲᠠᠭᠠᠨ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠤᠨ ᠮᠣᠳᠣ ᠶᠢ ᠡᠭᠦᠷᠦᠭᠦᠯᠵᠦ᠂ ᠥᠪᠡᠷ ᠢᠶᠡᠨ ᠴᠠᠬᠢᠭᠤᠷ ᠴᠢᠯᠠᠭᠤ᠂ ᠬᠢᠲᠤᠭᠠ ᠬᠣᠶᠠᠷ ᠢᠶᠠᠨ ᠭᠠᠷ ᠲᠠᠭᠠᠨ ᠪᠠᠷᠢᠭᠠᠳ ᠬᠣᠶᠠᠭᠤᠯᠠ ᠬᠠᠮᠲᠤ ᠶᠠᠪᠤᠵᠠᠢ᠃ 7 ᠢᠰᠠᠺ ᠡᠴᠢᠭᠡ ᠠᠪᠷᠠᠬᠠᠮ ᠳᠠᠭᠠᠨ ᠬᠠᠨᠳᠤᠨ᠄ 《ᠠᠪᠤ ᠮᠢᠨᠢ ᠡ︕》 ᠭᠡᠬᠦ ᠳᠦ᠂ ᠲᠡᠷᠡ᠄ 《ᠬᠦᠦ ᠮᠢᠨᠢ᠂ ᠪᠢ ᠡ᠊ᠨᠳᠡ ᠪᠠᠢᠨᠠ》 ᠭᠡᠪᠡ᠃ ᠢᠰᠠᠺ᠄ 《ᠬᠠᠷᠠ᠂ ᠭᠠᠯ ᠪᠠ ᠲᠦᠯᠡᠭᠡ ᠡ᠊ᠨᠳᠡ ᠪᠠᠢᠨᠠ︕ ᠬᠠᠷᠢᠨ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠤᠨ ᠬᠤᠷᠠᠭᠠ ᠬᠠᠮᠢᠭᠠ ᠪᠠᠢᠨᠠ ᠪᠤᠢ︖》 ᠭᠡᠬᠦ ᠳᠦ᠂ 8 ᠠᠪᠷᠠᠬᠠᠮ᠄ 《ᠪᠤᠷᠬᠠᠨ ᠥᠪᠡᠷ ᠢᠶᠡᠨ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠤᠨ ᠬᠤᠷᠠᠭᠠ ᠶᠢ ᠬᠠᠩ᠋ᠭᠠᠨᠠ 37 ᠂ ᠬᠦᠦ ᠮᠢᠨᠢ》 ᠭᠡᠯᠡ᠃ ᠢᠩᠭᠢᠭᠡᠳ ᠲᠡᠷᠡ ᠬᠣᠶᠠᠭᠤᠯᠠ ᠴᠢᠨᠠᠭᠰᠢ ᠶᠠᠪᠤᠵᠠᠢ᠃
9 ᠲᠡᠳᠡ ᠪᠤᠷᠬᠠᠨ ᠤ ᠠᠢᠯᠠᠳᠤᠭᠰᠠᠨ ᠲᠡᠷᠡ ᠭᠠᠵᠠᠷ ᠲᠤ ᠬᠦᠷᠴᠦ ᠢᠷᠡᠯᠡ᠃ ᠠᠪᠷᠠᠬᠠᠮ ᠲᠡᠨᠳᠡ ᠲᠠᠬᠢᠯ ᠤᠨ ᠰᠢᠷᠡᠭᠡ ᠪᠣᠰᠬᠠᠨ ᠮᠣᠳᠣ ᠥᠷᠥᠵᠦ ᠲᠠᠯᠪᠢᠭᠠᠳ ᠬᠦᠦ ᠢᠰᠠᠺ ᠢᠶᠠᠨ ᠬᠦᠯᠢᠵᠦ᠂ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠮᠣᠳᠣᠨ ᠳᠡᠭᠡᠷᠡ ᠲᠠᠯᠪᠢᠪᠠ᠃ 10 ᠠᠪᠷᠠᠬᠠᠮ ᠭᠠᠷ ᠢᠶᠠᠨ ᠰᠤᠩ᠋ᠭᠠᠨ᠂ ᠬᠦᠦ ᠪᠡᠨ ᠨᠢᠲᠤᠯᠬᠤ ᠪᠠᠷ ᠬᠢᠲᠤᠭᠠ ᠪᠠᠨ ᠠᠪᠤᠪᠠ᠃ 11 ᠲᠡᠭᠡᠲᠡᠯᠡ ᠶᠣᠬᠣᠸᠠ ᠶᠢᠨ ᠡᠯᠴᠢ ᠲᠩᠷᠢ ᠡᠴᠡ᠄ 《ᠠᠪᠷᠠᠬᠠᠮ ᠡ᠂ ᠠᠪᠷᠠᠬᠠᠮ ᠡ︕》 ᠭᠡᠵᠦ ᠳᠠᠭᠤᠳᠠᠵᠠᠢ᠃ ᠠᠪᠷᠠᠬᠠᠮ᠄ 《ᠪᠢ ᠡ᠊ᠨᠳᠡ ᠪᠠᠢᠨᠠ︕》 ᠭᠡᠬᠦ ᠳᠦ᠂ 12 ᠲᠩᠷᠢ ᠡᠯᠴᠢ᠄ 《ᠬᠥᠪᠡᠭᠦᠨ ᠳᠡᠭᠡᠨ ᠪᠦᠦ ᠭᠠᠷ ᠬᠦᠷ︕ ᠲᠡᠭᠦᠨ ᠳᠦ ᠶᠠᠮᠠᠷ ᠴᠤ ᠬᠣᠣᠷ ᠪᠦᠦ ᠬᠦᠷᠭᠡ︕ ᠴᠢᠮᠠᠶᠢ ᠪᠤᠷᠬᠠᠨ ᠠᠴᠠ ᠡᠮᠢᠶᠡᠳᠡᠭ ᠬᠥᠮᠦᠨ ᠭᠡᠭᠴᠢ ᠶᠢ ᠣᠳᠣ ᠪᠢ ᠮᠡᠳᠡᠯᠡ᠃ ᠴᠢ ᠬᠦᠦ ᠪᠡᠨ᠂ ᠴᠣᠷ ᠤᠨ ᠭᠠᠭᠴᠠ ᠬᠦᠦ ᠪᠡᠨ ᠴᠤ ᠨᠠᠳᠠ ᠠᠴᠠ ᠬᠠᠷᠠᠮᠯᠠᠭᠠ ᠦᠭᠡᠢ︕》 ᠭᠡᠪᠡ᠃ 13 ᠠᠪᠷᠠᠬᠠᠮ ᠨᠢᠳᠦ ᠡᠷᠭᠦᠨ ᠦᠵᠡᠬᠦ ᠳᠦ᠂ ᠨᠢᠭᠡᠨ ᠬᠤᠴᠠ ᠥᠳᠬᠡᠨ ᠪᠤᠲᠠᠨ ᠳᠤ ᠡᠪᠡᠷ ᠢᠶᠡᠷ ᠢᠶᠠᠨ ᠲᠡᠭᠡᠭᠯᠡᠭᠰᠡᠨ ᠪᠠᠢᠵᠠᠢ︕ ᠠᠪᠷᠠᠬᠠᠮ ᠣᠴᠢᠵᠤ᠂ ᠲᠡᠷᠡ ᠬᠤᠴᠠ ᠶᠢ ᠪᠠᠷᠢᠵᠤ ᠠᠪᠤᠭᠠᠳ ᠲᠡᠭᠦᠨ ᠢ ᠬᠦᠦ ᠶᠢᠨ ᠢᠶᠠᠨ ᠣᠷᠣᠨ ᠳᠤ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠪᠣᠯᠭᠠᠨ ᠡᠷᠭᠦᠪᠡ᠃ 14 ᠠᠪᠷᠠᠬᠠᠮ ᠲᠡᠷᠡ ᠭᠠᠵᠠᠷ ᠢ᠄ 《ᠶᠣᠬᠣᠸᠠ ᠬᠠᠩ᠋ᠭᠠᠨᠠ》 ᠭᠡᠵᠦ ᠨᠡᠷᠡᠯᠡᠭᠰᠡᠨ ᠤᠴᠢᠷ ᠬᠥᠮᠦᠰ ᠣᠳᠣ ᠪᠣᠯᠲᠠᠯᠠ 《ᠶᠣᠬᠣᠸᠠ ᠶᠢᠨ ᠠᠭᠤᠯᠠᠨ ᠳᠤ ᠬᠠᠩ᠋ᠭᠠᠭᠳᠠᠨᠠ》 ᠭᠡᠵᠦ ᠬᠡᠯᠡᠳᠡᠭ ᠪᠣᠯᠵᠠᠢ᠃
15 ᠶᠣᠬᠣᠸᠠ ᠶᠢᠨ ᠡᠯᠴᠢ ᠲᠩᠷᠢ ᠡᠴᠡ ᠠᠪᠷᠠᠬᠠᠮ ᠢ ᠬᠣᠶᠠᠳᠠᠬᠢ ᠤᠳᠠᠭᠠ ᠪᠠᠨ ᠳᠠᠭᠤᠳᠠᠵᠤ᠂ 16 《ᠶᠣᠬᠣᠸᠠ ᠲᠤᠩ᠋ᠬᠠᠭᠯᠠᠵᠤ ᠪᠠᠢᠨᠠ᠄ 〈ᠬᠦᠦ ᠪᠡᠨ᠂ ᠴᠣᠷ ᠤᠨ ᠭᠠᠭᠴᠠ ᠬᠦᠦ ᠪᠡᠨ ᠴᠤ ᠬᠠᠷᠠᠮᠯᠠᠭᠠ ᠦᠭᠡᠢ᠂ ᠡᠢᠨ ᠬᠦ ᠦᠢᠯᠡᠳᠦᠭᠰᠡᠨ ᠦ ᠴᠢᠨᠢ ᠤᠴᠢᠷ ᠪᠢ ᠥᠪᠡᠷ ᠦᠨ ᠢᠶᠠᠨ ᠨᠡᠷᠡ ᠪᠡᠷ ᠲᠠᠩ᠋ᠭᠠᠷᠢᠭᠯᠠᠶᠠ᠃ 17 ᠪᠢ ᠴᠢᠮᠠᠶᠢ ᠢᠪᠡᠭᠡᠨ ᠢᠪᠡᠭᠡᠵᠦ᠂ ᠦᠷᠡ ᠤᠳᠤᠮ ᠢ ᠴᠢᠨᠢ ᠲᠩᠷᠢ ᠶᠢᠨ ᠣᠳᠣᠳ᠂ ᠳᠠᠯᠠᠢ ᠶᠢᠨ ᠬᠥᠪᠡᠭᠡ ᠶᠢᠨ ᠡᠯᠡᠰᠦ ᠮᠡᠲᠦ ᠣᠯᠠᠰᠢᠷᠠᠭᠤᠯᠤᠨ ᠣᠯᠠᠰᠢᠷᠠᠭᠤᠯᠤᠨᠠ᠂ ᠴᠢᠨᠦ ᠦᠷᠡ ᠤᠳᠤᠮ ᠳᠠᠢᠰᠤᠨ ᠨᠤᠭᠤᠳ ᠤᠨ ᠢᠶᠠᠨ ᠡᠭᠦᠳᠡ ᠬᠠᠭᠠᠯᠭᠠ ᠶᠢ ᠡᠵᠡᠮᠰᠢᠬᠦ ᠪᠣᠯᠣᠨᠠ᠃ 18 ᠴᠢ ᠮᠢᠨᠦ ᠦᠭᠡ ᠶᠢ ᠳᠠᠭᠠᠭᠰᠠᠨ ᠤᠴᠢᠷ ᠠᠴᠠ ᠴᠢᠨᠦ ᠦᠷᠡ ᠤᠳᠤᠮ ᠢᠶᠠᠷ ᠳᠠᠮᠵᠢᠨ ᠭᠠᠵᠠᠷ ᠤᠨ ᠪᠦᠬᠦ ᠦᠨᠳᠦᠰᠦᠲᠡᠨ ᠢᠪᠡᠭᠡᠭᠳᠡᠨᠡ〉》 ᠭᠡᠪᠡ᠃ 19 ᠠᠪᠷᠠᠬᠠᠮ ᠵᠠᠷᠤᠴᠠ ᠨᠠᠷ ᠳᠡᠭᠡᠷᠡ ᠪᠡᠨ ᠡᠷᠭᠢᠨ ᠢᠷᠡᠭᠡᠳ ᠬᠠᠮᠲᠤ ᠳᠠᠭᠠᠨ ᠮᠣᠷᠳᠠᠵᠤ᠂ ᠪᠧᠷ ᠱᠧᠪᠠ ᠳᠤ ᠬᠦᠷᠪᠡ᠃ ᠢᠩᠭᠢᠭᠡᠳ ᠠᠪᠷᠠᠬᠠᠮ ᠪᠧᠷ ᠱᠧᠪᠠ ᠳᠤ ᠨᠤᠲᠤᠭᠰᠢᠭᠰᠠᠨ ᠪᠠᠢᠨᠠ᠃
ᠨᠠᠬᠣᠷ ᠤᠨ ᠬᠥᠪᠡᠭᠦᠳ
20 ᠡᠳᠡᠭᠡᠷ ᠦᠨ ᠳᠠᠷᠠᠭᠠ ᠨᠢᠭᠡ ᠨᠢ ᠠᠪᠷᠠᠬᠠᠮ ᠳᠤ᠄ 《ᠮᠢᠯᠺᠠ ᠪᠠᠰᠠ ᠲᠠᠨ ᠤ ᠳᠡᠭᠦᠦ ᠨᠠᠬᠣᠷ ᠲᠤ ᠬᠥᠪᠡᠭᠦᠳ ᠲᠥᠷᠥᠭᠦᠯᠵᠦ ᠥᠭᠴᠡᠢ》 ᠭᠡᠵᠦ ᠮᠡᠳᠡᠭᠦᠯᠪᠡ᠃ 21 ᠬᠥᠪᠡᠭᠦᠳ ᠦᠨ ᠤᠤᠭᠠᠨ ᠨᠢ ᠦᠽ᠂ ᠤᠳᠠᠭᠠᠬᠢ ᠨᠢ ᠪᠦᠽ᠂ ᠺᠧᠮᠦ᠋ᠶᠧᠯ (ᠠᠷᠠᠮ ᠤᠨ ᠡᠴᠢᠭᠡ) 22 ᠪᠠᠰᠠ ᠺᠧᠰᠧᠳ᠋᠂ ᠬᠠᠽᠣ᠋᠂ ᠫᠢᠯᠳᠠᠱ᠂ ᠶᠢᠳ᠋ᠯᠠᠹ᠂ ᠪᠧᠲ᠋ᠦ᠋ᠶᠧᠯ ᠪᠢᠯᠡ᠃ 23 ᠪᠧᠲ᠋ᠦ᠋ᠶᠧᠯ ᠳᠤ ᠷᠧᠪᠧᠺᠠ ᠲᠥᠷᠥᠵᠡᠢ᠃ ᠮᠢᠯᠺᠠ ᠠᠪᠷᠠᠬᠠᠮ ᠤᠨ ᠳᠡᠭᠦᠦ ᠨᠠᠬᠣᠷ ᠲᠤ ᠡᠨᠡ ᠨᠠᠢ᠌ᠮᠠ ᠶᠢ ᠲᠥᠷᠥᠭᠦᠯᠵᠦ ᠥᠭᠴᠡᠢ᠃ 24 ᠨᠠᠬᠣᠷ ᠲᠤ ᠷᠧᠣᠮᠠ ᠭᠡᠳᠡᠭ ᠲᠠᠲᠠᠪᠤᠷᠢ ᠡᠮᠡ ᠴᠤ ᠪᠠᠢᠯᠠ᠃ ᠲᠡᠭᠦᠨ ᠡᠴᠡ ᠲᠧᠪᠠ᠂ ᠭᠠᠬᠠᠮ᠂ ᠲᠠᠬᠠᠱ᠂ ᠮᠠᠺᠠ ᠨᠠᠷ ᠲᠥᠷᠥᠪᠡ᠃