ᠡᠬᠢᠯᠡᠯ ᠬᠣᠷᠢᠨ ᠨᠠᠢ᠌ᠮᠠ
ᠶᠠᠺᠣᠪ ᠵᠢᠭᠤᠲᠠᠪᠠ
1 ᠢᠰᠠᠺ ᠶᠠᠺᠣᠪ ᠢ ᠳᠠᠭᠤᠳᠠᠭᠠᠳ᠂ ᠲᠡᠭᠦᠨ ᠢ ᠢᠷᠥᠭᠡᠨ᠂ ᠵᠠᠬᠢᠵᠤ᠄ 《ᠴᠢ ᠺᠠᠨᠠᠨᠴᠤᠳ ᠤᠨ ᠥᠬᠢᠳ ᠡᠴᠡ ᠡᠬᠡᠨᠡᠷ ᠪᠦᠦ ᠠᠪ᠃ 2 ᠬᠠᠷᠢᠨ ᠴᠢ ᠫᠠᠳᠠᠨ ᠠᠷᠠᠮ ᠳᠠᠬᠢ ᠡᠬᠡ ᠶᠢᠨ ᠢᠶᠠᠨ ᠡᠴᠢᠭᠡ ᠪᠧᠲ᠋ᠦ᠋ᠶᠧᠯ ᠤᠨ ᠭᠡᠷ ᠤᠷᠤᠭᠤ ᠶᠠᠪᠤᠵᠤ᠂ ᠲᠡᠨᠳᠡ ᠨᠠᠭᠠᠴᠤ ᠠᠪᠤ ᠯᠠᠪᠠᠨ ᠤ ᠪᠠᠨ ᠥᠬᠢᠳ ᠡᠴᠡ ᠡᠬᠡᠨᠡᠷ ᠠᠪ᠃ 3 ᠲᠡᠭᠦᠰ ᠬᠦᠴᠦᠲᠦ ᠪᠤᠷᠬᠠᠨ ᠴᠢᠮᠠᠶᠢ ᠢᠪᠡᠭᠡᠵᠦ᠂ ᠴᠢ ᠦᠷᠡᠵᠢᠨ ᠣᠯᠠᠰᠢᠷᠠᠵᠤ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠴᠢᠭᠤᠯᠭᠠᠨ ᠪᠣᠯᠬᠤ ᠪᠣᠯᠲᠤᠭᠠᠢ᠃ 4 ᠪᠠᠰᠠ ᠠᠪᠷᠠᠬᠠᠮ ᠳᠤ ᠰᠣᠶᠣᠷᠬᠠᠭᠰᠠᠨ ᠢᠷᠥᠭᠡᠯ ᠢᠶᠡᠨ ᠲᠡᠷᠡ ᠴᠢᠮᠠ ᠳᠤ ᠪᠣᠯᠣᠨ ᠦᠷᠡ ᠤᠳᠤᠮ ᠳᠤ ᠴᠢᠨᠢ ᠴᠤ ᠰᠣᠶᠣᠷᠬᠠᠬᠤ ᠲᠤᠯᠠ ᠴᠢ ᠠᠪᠷᠠᠬᠠᠮ ᠳᠤ ᠰᠣᠶᠣᠷᠬᠠᠭᠰᠠᠨ ᠭᠠᠵᠠᠷ ᠪᠤᠶᠤ ᠴᠠᠭᠠᠴᠢᠨ ᠪᠣᠯᠣᠭᠠᠳ ᠰᠠᠭᠤᠵᠤ ᠪᠠᠢᠭᠠ ᠡᠨᠡ ᠭᠠᠵᠠᠷ ᠢᠶᠠᠨ ᠡᠵᠡᠮᠰᠢᠬᠦ ᠪᠣᠯᠲᠤᠭᠠᠢ︕》 ᠭᠡᠪᠡ᠃ 5 ᠢᠰᠠᠺ ᠶᠠᠺᠣᠪ ᠢ ᠶᠠᠪᠤᠭᠤᠯᠤᠭᠰᠠᠨ ᠳᠤ᠂ ᠲᠡᠷᠡ ᠪᠡᠷ ᠫᠠᠳᠠᠨ ᠠᠷᠠᠮ ᠳᠠᠬᠢ ᠯᠠᠪᠠᠨ ᠤᠷᠤᠭᠤ ᠣᠳᠴᠠᠢ᠃ ᠯᠠᠪᠠᠨ ᠪᠣᠯ ᠠᠷᠠᠮ ᠬᠥᠮᠦᠨ ᠪᠧᠲ᠋ᠦ᠋ᠶᠧᠯ ᠤᠨ ᠬᠦᠦ ᠪᠥᠭᠡᠳ ᠶᠠᠺᠣᠪ᠂ ᠡᠰᠠᠦ᠋ ᠬᠣᠶᠠᠷ ᠤᠨ ᠡᠬᠡ ᠷᠧᠪᠧᠺᠠ ᠶᠢᠨ ᠠᠬᠠ ᠶᠤᠮ᠃
6 ᠢᠰᠠᠺ ᠶᠠᠺᠣᠪ ᠢ ᠢᠷᠥᠭᠡᠨ᠂ ᠲᠡᠭᠦᠨ ᠢ ᠫᠠᠳᠠᠨ ᠠᠷᠠᠮ ᠤᠷᠤᠭᠤ ᠶᠠᠪᠤᠭᠤᠯᠵᠤ ᠲᠡᠨᠳᠡ ᠡᠴᠡ ᠡᠬᠡᠨᠡᠷ ᠰᠣᠩ᠋ᠭᠣᠭᠤᠯᠬᠤ ᠪᠠᠷ ᠪᠠᠢᠭᠠ ᠶᠢ ᠡᠰᠡᠦ᠋ ᠮᠡᠳᠡᠵᠡᠢ᠃ ᠪᠠᠰᠠ ᠶᠠᠺᠣᠪ ᠤᠨ ᠢᠷᠥᠭᠡᠭᠳᠡᠭᠰᠡᠨ ᠪᠠ 《ᠺᠠᠨᠠᠨ ᠤ ᠥᠬᠢᠳ ᠡᠴᠡ ᠡᠬᠡᠨᠡᠷ ᠪᠦᠦ ᠠᠪ》 ᠭᠡᠵᠦ ᠵᠠᠬᠢᠭᠰᠠᠨ ᠢᠶᠠᠷ ᠨᠢ 7 ᠶᠠᠺᠣᠪ ᠡᠬᠡ ᠡᠴᠢᠭᠡ ᠬᠣᠶᠠᠷ ᠤᠨ ᠢᠶᠠᠨ ᠦᠭᠡ ᠶᠢ ᠳᠠᠭᠠᠵᠤ᠂ ᠫᠠᠳᠠᠨ ᠠᠷᠠᠮ ᠤᠷᠤᠭᠤ ᠶᠠᠪᠤᠭᠰᠠᠨ ᠪᠠ 8 ᠡᠴᠢᠭᠡ ᠢᠰᠠᠺ ᠤᠨ ᠬᠢᠨᠢ ᠨᠢᠳᠦᠨ ᠳᠦ ᠺᠠᠨᠠᠨ ᠤ ᠥᠬᠢᠳ ᠲᠠᠭᠠᠯᠠᠭᠳᠠᠬᠤ ᠦᠭᠡᠢ ᠪᠠᠢᠭᠠ ᠶᠢ ᠡᠰᠠᠦ᠋ ᠮᠡᠳᠡᠵᠡᠢ᠃ 9 ᠲᠡᠢᠮᠦ ᠳᠦ ᠡᠰᠠᠦ᠋ ᠬᠡᠳᠦᠢᠨ ᠡᠬᠡᠨᠡᠷ ᠤᠳ ᠲᠠᠢ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠠᠪᠷᠠᠬᠠᠮ ᠤᠨ ᠬᠦᠦ ᠢᠱᠮᠠᠶᠧᠯ ᠤᠷᠤᠭᠤ ᠶᠠᠪᠤᠵᠤ᠂ ᠲᠡᠭᠦᠨ ᠦ ᠥᠬᠢᠨ ᠪᠤᠶᠤ ᠨᠧᠪᠠᠢᠶᠣᠲ ᠤᠨ ᠥᠬᠢᠨ ᠳᠡᠭᠦᠦ ᠮᠠᠬᠠᠯᠠᠲ ᠢ ᠴᠤ ᠡᠬᠡᠨᠡᠷ ᠢᠶᠡᠨ ᠪᠣᠯᠭᠠᠨ ᠠᠪᠴᠠᠢ᠃
ᠶᠠᠺᠣᠪ ᠤᠨ ᠪᠧᠲ᠋ᠧᠯ ᠳᠠᠬᠢ ᠵᠡᠭᠦᠳᠦ
10 ᠶᠠᠺᠣᠪ ᠪᠧᠷ ᠱᠧᠪᠠ ᠠᠴᠠ ᠭᠠᠷᠤᠭᠠᠳ᠂ ᠾᠠᠷᠠᠨ ᠤᠷᠤᠭᠤ ᠶᠠᠪᠤᠪᠠ᠃ 11 ᠨᠢᠭᠡᠨ ᠭᠠᠵᠠᠷ ᠢᠷᠡᠬᠦ ᠳᠦ ᠨᠠᠷᠠ ᠰᠢᠩᠭᠡᠭᠰᠡᠨ ᠲᠤᠯᠠ ᠲᠡᠷᠡ ᠪᠡᠷ ᠲᠡᠨᠳᠡ ᠪᠡᠨ ᠬᠣᠨᠣᠬᠤ ᠪᠠᠷ ᠲᠡᠨᠳᠡᠬᠢ ᠶᠢᠨ ᠨᠢᠭᠡ ᠴᠢᠯᠠᠭᠤ ᠶᠢ ᠠᠪᠴᠤ᠂ ᠲᠣᠯᠣᠭᠠᠢ ᠳᠣᠣᠷᠠ ᠪᠠᠨ ᠲᠠᠯᠪᠢᠭᠠᠳ ᠤᠨᠲᠠᠵᠠᠢ᠃ 12 ᠲᠡᠷᠡ ᠪᠡᠷ ᠵᠡᠭᠦᠳᠦᠨ ᠳᠣᠲᠣᠷᠠ ᠪᠠᠨ ᠬᠠᠷᠠᠬᠤ ᠳᠤ ᠭᠠᠵᠠᠷ ᠳᠡᠭᠡᠷᠡ ᠨᠢᠭᠡᠨ ᠱᠠᠲᠤ ᠵᠣᠭᠰᠣᠵᠤ ᠪᠠᠢᠯᠠ︕ ᠣᠷᠣᠢ ᠨᠢ ᠲᠩᠷᠢ ᠳᠤ ᠲᠤᠯᠤᠭᠰᠠᠨ ᠪᠥᠭᠡᠳ ᠲᠡᠭᠦᠨ ᠢᠶᠡᠷ ᠪᠤᠷᠬᠠᠨ ᠤ ᠲᠩᠷᠢ ᠡᠯᠴᠢ ᠨᠠᠷ ᠥᠭᠰᠥᠨ ᠤᠷᠤᠭᠤᠳᠠᠨ ᠪᠠᠢᠯᠠ︕ 13 ᠳᠡᠭᠡᠷᠡ ᠨᠢ ᠶᠣᠬᠣᠸᠠ ᠵᠣᠭᠰᠣᠵᠤ ᠪᠠᠢᠪᠠ︕ ᠲᠡᠷᠡ᠄ 《ᠪᠢ ᠪᠣᠯ ᠶᠣᠬᠣᠸᠠ᠂ ᠴᠢᠨᠦ ᠡᠪᠦᠭᠡ ᠠᠪᠷᠠᠬᠠᠮ ᠤᠨ ᠪᠤᠷᠬᠠᠨ᠂ ᠮᠥᠨ ᠢᠰᠠᠺ ᠤᠨ ᠪᠤᠷᠬᠠᠨ ᠪᠠᠢᠨᠠ᠃ ᠴᠢᠨᠦ ᠬᠡᠪᠲᠡᠵᠦ ᠪᠠᠢᠭᠠ ᠡᠨᠡ ᠭᠠᠵᠠᠷ ᠢ ᠪᠢ ᠴᠢᠮᠠ ᠳᠤ ᠪᠣᠯᠣᠨ ᠴᠢᠨᠦ ᠦᠷᠡ ᠤᠳᠤᠮ ᠳᠤ ᠥᠭᠭᠥᠨᠡ᠃ 14 ᠴᠢᠨᠦ ᠦᠷᠡ ᠤᠳᠤᠮ ᠭᠠᠵᠠᠷ ᠤᠨ ᠲᠣᠭᠣᠰᠣ ᠰᠢᠭ᠋ ᠣᠯᠠᠰᠢᠷᠠᠵᠤ᠂ ᠪᠠᠷᠠᠭᠤᠨ᠂ ᠵᠡᠭᠦᠨ᠂ ᠬᠣᠢᠲᠤ᠂ ᠤᠷᠳᠤ ᠵᠦᠭ ᠲᠦ ᠲᠠᠷᠬᠠᠨ᠂ ᠴᠢ ᠪᠣᠯᠣᠨ ᠴᠢᠨᠦ ᠦᠷᠡ ᠤᠳᠤᠮ ᠤᠨ ᠠᠴᠢ ᠪᠠᠷ ᠳᠡᠯᠡᠬᠡᠢ ᠶᠢᠨ ᠪᠦᠬᠦ ᠣᠪᠣᠭ ᠢᠪᠡᠭᠡᠭᠳᠡᠬᠦ ᠪᠣᠯᠣᠨᠠ᠃ 15 ᠬᠠᠷᠠ᠂ ᠪᠢ ᠴᠢᠮᠠ ᠲᠠᠢ ᠬᠠᠮᠲᠤ ᠪᠠᠢᠭᠰᠠᠭᠠᠷ ᠴᠢᠮᠠᠶᠢ ᠬᠠᠮᠢᠭᠠ ᠶᠠᠪᠤᠭᠰᠠᠨ ᠴᠤ ᠬᠠᠮᠠᠭᠠᠯᠠᠨ᠂ ᠴᠢᠮᠠᠶᠢ ᠡᠨᠡ ᠨᠤᠲᠤᠭ ᠤᠷᠤᠭᠤ ᠪᠤᠴᠠᠭᠠᠵᠤ ᠠᠪᠴᠢᠷᠠᠨᠠ᠃ ᠪᠢ ᠴᠢᠮᠠ ᠳᠤ ᠠᠮᠠᠯᠠᠭᠰᠠᠨ ᠢᠶᠠᠨ ᠪᠡᠶᠡᠯᠡᠭᠦᠯᠬᠦ ᠬᠦᠷᠲᠡᠯᠡ ᠴᠢᠮᠠᠶᠢ ᠣᠷᠬᠢᠬᠤ ᠦᠭᠡᠢ》 ᠭᠡᠵᠦ ᠠᠢᠯᠠᠳᠴᠠᠢ᠃ 16 ᠶᠠᠺᠣᠪ ᠨᠣᠢᠷ ᠠᠴᠠ ᠪᠠᠨ ᠰᠡᠷᠢᠭᠡᠳ᠄ 《ᠶᠣᠬᠣᠸᠠ ᠦᠨᠡᠬᠡᠷ ᠡ᠊ᠨᠳᠡ ᠪᠠᠢᠨᠠ᠂ ᠬᠠᠷᠢᠨ ᠪᠢ ᠮᠡᠳᠡᠭᠰᠡᠨ ᠦᠭᠡᠢ》 ᠭᠡᠳ 17 ᠠᠶᠤᠨ ᠰᠦᠷᠳᠡᠵᠦ᠄ 《ᠡᠨᠡ ᠴᠢᠨᠢ ᠶᠠᠭᠤᠲᠠᠢ ᠠᠶᠤᠮᠰᠢᠭᠲᠠᠢ ᠭᠠᠵᠠᠷ ᠪᠤᠢ︖ ᠡᠨᠡ ᠪᠣᠯ ᠯᠠᠪ ᠪᠤᠷᠬᠠᠨ ᠤ ᠥᠷᠭᠥᠭᠡ᠂ ᠡᠨᠡ ᠪᠣᠯ ᠲᠩᠷᠢ ᠶᠢᠨ ᠬᠠᠭᠠᠯᠭᠠ ᠮᠥᠨ ᠪᠠᠢᠨᠠ》 ᠭᠡᠪᠡ᠃
18 ᠥᠷᠯᠥᠭᠡ ᠡᠷᠲᠡ ᠶᠠᠺᠣᠪ ᠳᠡᠷᠡᠯᠡᠭᠰᠡᠨ ᠴᠢᠯᠠᠭᠤ ᠪᠠᠨ ᠠᠪᠴᠤ ᠪᠠᠭᠠᠨᠠ ᠪᠣᠯᠭᠠᠨ ᠪᠣᠰᠬᠠᠵᠤ᠂ ᠳᠡᠭᠡᠷᠡ ᠨᠢ ᠲᠣᠰᠣ ᠴᠢᠳᠬᠤᠪᠠ᠃ 19 ᠲᠡᠷᠡ ᠡᠨᠡ ᠭᠠᠵᠠᠷ ᠢ ᠪᠧᠲ᠋ᠧᠯ 46 ᠭᠡᠵᠦ ᠨᠡᠷᠡᠯᠡᠵᠡᠢ᠃ ᠲᠡᠷᠡ ᠬᠣᠲᠠ ᠶᠢ ᠤᠤᠯ ᠨᠢ ᠯᠦᠽ ᠭᠡᠳᠡᠭ᠃ 20 ᠶᠠᠺᠣᠪ ᠲᠠᠩ᠋ᠭᠠᠷᠢᠭᠯᠠᠵᠤ᠄ 《ᠬᠡᠷᠪᠡ ᠪᠤᠷᠬᠠᠨ ᠨᠠᠳᠠ ᠲᠠᠢ ᠬᠠᠮᠲᠤ ᠪᠠᠢᠭᠰᠠᠭᠠᠷ ᠮᠢᠨᠦ ᠶᠠᠪᠤᠵᠤ ᠪᠤᠢ ᠡᠨᠡ ᠵᠠᠮ ᠳᠤ ᠨᠠᠮᠠᠶᠢ ᠬᠠᠮᠠᠭᠠᠯᠠᠨ᠂ ᠪᠠᠰᠠ ᠨᠠᠳᠠ ᠳᠤ ᠢᠳᠡᠬᠦ ᠬᠣᠭᠣᠯᠠ᠂ ᠡᠮᠦᠰᠬᠦ ᠬᠤᠪᠴᠠᠰᠤ ᠥᠭᠴᠦ᠂ 21 ᠨᠠᠮᠠᠶᠢ ᠡᠴᠢᠭᠡ ᠶᠢᠨ ᠮᠢᠨᠢ ᠭᠡᠷ ᠲᠦ ᠠᠮᠤᠷ ᠲᠠᠢᠪᠤᠩ ᠪᠤᠴᠠᠭᠠᠪᠠᠯ ᠶᠣᠬᠣᠸᠠ ᠲᠠ ᠮᠢᠨᠦ ᠪᠤᠷᠬᠠᠨ ᠪᠣᠯᠣᠨᠠ᠂ 22 ᠪᠠᠭᠠᠨᠠ ᠪᠣᠯᠭᠠᠨ ᠪᠣᠰᠬᠠᠭᠰᠠᠨ ᠡᠨᠡ ᠴᠢᠯᠠᠭᠤ ᠮᠢᠨᠢ ᠪᠤᠷᠬᠠᠨ ᠤ ᠥᠷᠭᠥᠭᠡ ᠪᠣᠯᠬᠤ ᠪᠥᠭᠡᠳ ᠲᠠᠨ ᠤ ᠨᠠᠳᠠ ᠳᠤ ᠥᠭᠬᠦ ᠪᠦᠬᠦᠨ ᠦ ᠠᠷᠪᠠᠨ ᠤ ᠨᠢᠭᠡ ᠶᠢ ᠪᠢ ᠦᠨᠡᠬᠡᠷ ᠲᠠᠨ ᠳᠤ ᠡᠷᠭᠦᠶᠡ》 ᠭᠡᠯᠡ᠃