ᠡᠬᠢᠯᠡᠯ ᠨᠠᠢ᠌ᠮᠠ
ᠶᠡᠬᠡ ᠦᠶᠡᠷ ᠨᠠᠮᠵᠢᠪᠠ
1 ᠪᠤᠷᠬᠠᠨ ᠨᠣᠶᠠ ᠪᠣᠯᠣᠨ ᠲᠡᠭᠦᠨ ᠲᠡᠢ ᠬᠠᠮᠲᠤ ᠣᠩ᠋ᠭᠣᠴᠠᠨ ᠳᠤ ᠪᠠᠢᠭᠠ ᠪᠦᠬᠦ ᠠᠮᠢᠲᠠᠨ ᠪᠠ ᠮᠠᠯ ᠠᠳᠤᠭᠤᠰᠤ ᠶᠢ ᠰᠠᠨᠠᠵᠤ᠂ ᠭᠠᠵᠠᠷ ᠳᠡᠯᠡᠬᠡᠢ ᠳᠡᠭᠡᠷᠡ ᠰᠠᠯᠬᠢ ᠰᠠᠯᠬᠢᠯᠠᠭᠤᠯᠤᠭᠰᠠᠨ ᠳᠤ᠂ ᠤᠰᠤ ᠲᠠᠲᠠᠷᠠᠭᠰᠠᠨ ᠪᠠᠢᠨᠠ᠃ 2 ᠭᠦᠨ ᠦ ᠪᠤᠯᠠᠭ ᠤᠳ ᠬᠢᠭᠡᠳ ᠲᠩᠷᠢ ᠶᠢᠨ ᠴᠣᠩ᠋ᠬᠣ ᠨᠤᠭᠤᠳ ᠬᠠᠭᠠᠭᠳᠠᠵᠤ ᠲᠩᠷᠢ ᠡᠴᠡ ᠣᠷᠣᠵᠤ ᠪᠠᠢᠭᠰᠠᠨ ᠪᠣᠷᠣᠭᠠᠨ ᠵᠣᠭᠰᠣᠯᠠ᠃ 3 ᠤᠰᠤ ᠭᠠᠵᠠᠷ ᠳᠡᠯᠡᠬᠡᠢ ᠡᠴᠡ ᠲᠠᠲᠠᠷᠠᠨ ᠲᠠᠲᠠᠷᠠᠭᠰᠠᠭᠠᠷ ᠪᠠᠭᠠᠰᠤᠭᠰᠠᠨ ᠳᠤ᠂ ᠵᠠᠭᠤ ᠲᠠᠪᠢᠨ ᠬᠣᠨᠣᠭ ᠥᠩᠭᠡᠷᠡᠵᠦ 4 ᠳᠣᠯᠣᠳᠤᠭᠠᠷ ᠰᠠᠷᠠ ᠶᠢᠨ ᠠᠷᠪᠠᠨ ᠳᠣᠯᠣᠭᠠᠨ ᠤ ᠡᠳᠦᠷ ᠣᠩ᠋ᠭᠣᠴᠠ ᠠᠷᠠᠷᠠᠲ ᠠᠭᠤᠯᠠᠨ ᠳᠡᠭᠡᠷᠡ ᠲᠣᠭᠲᠠᠪᠠ᠃ 5 ᠤᠰᠤ ᠠᠷᠪᠠᠳᠤᠭᠠᠷ ᠰᠠᠷᠠ ᠪᠣᠯᠲᠠᠯᠠ ᠲᠠᠲᠠᠷᠠᠨ ᠲᠠᠲᠠᠷᠠᠭᠰᠠᠭᠠᠷ ᠠᠷᠪᠠᠳᠤᠭᠠᠷ ᠰᠠᠷᠠ ᠶᠢᠨ ᠨᠢᠭᠡᠨ ᠦ ᠡᠳᠦᠷ ᠠᠭᠤᠯᠠᠰ ᠤᠨ ᠣᠷᠭᠢᠯ ᠬᠠᠷᠠᠭᠳᠠᠵᠠᠢ᠃
6 ᠳᠥᠴᠢ ᠬᠣᠨᠣᠭ ᠤᠨ ᠳᠠᠷᠠᠭᠠ᠂ ᠨᠣᠶᠠ ᠥᠪᠡᠷ ᠦᠨ ᠢᠶᠠᠨ ᠬᠢᠭᠰᠡᠨ ᠣᠩ᠋ᠭᠣᠴᠠᠨ ᠤ ᠭᠡᠭᠡᠪᠴᠢ ᠶᠢ ᠨᠡᠭᠡᠭᠡᠵᠦ 7 ᠨᠢᠭᠡᠨ ᠬᠡᠷᠢᠶᠡ ᠶᠢ ᠶᠠᠪᠤᠭᠤᠯᠪᠠ᠃ ᠲᠡᠷᠡ ᠬᠡᠷᠢᠶᠡ ᠭᠠᠵᠠᠷ ᠳᠡᠭᠡᠷᠡ ᠡᠴᠡ ᠤᠰᠤ ᠰᠢᠷᠭᠢᠲᠡᠯᠡ ᠨᠠᠰᠢ ᠴᠠᠰᠢ ᠨᠢᠰᠦᠭᠰᠡᠭᠡᠷ ᠪᠠᠢᠵᠠᠢ᠃ 8 ᠲᠡᠷᠡ ᠪᠡᠷ ᠭᠠᠵᠠᠷ ᠤᠨ ᠬᠥᠷᠥᠰᠥᠨ ᠡᠴᠡ ᠤᠰᠤ ᠲᠠᠲᠠᠷᠠᠭᠰᠠᠨ ᠡᠰᠡᠬᠦ ᠶᠢ ᠮᠡᠳᠡᠬᠦ ᠶᠢᠨ ᠲᠤᠯᠠᠳᠠ ᠪᠠᠰᠠ ᠨᠢᠭᠡᠨ ᠲᠠᠭᠲᠠᠭᠠ ᠶᠢ ᠶᠠᠪᠤᠭᠤᠯᠤᠭᠰᠠᠨ ᠪᠣᠯᠪᠠᠴᠤ 9 ᠲᠡᠷᠡ ᠲᠠᠭᠲᠠᠭᠠ ᠬᠥᠯ ᠲᠠᠯᠪᠢᠵᠤ ᠠᠮᠠᠷᠠᠬᠤ ᠭᠠᠵᠠᠷ ᠣᠯᠣᠭᠠ ᠦᠭᠡᠢ ᠪᠣᠯᠬᠣᠷ ᠣᠩ᠋ᠭᠣᠴᠠᠨ ᠳᠠᠭᠠᠨ ᠪᠤᠴᠠᠵᠤ ᠢᠷᠡᠪᠡ᠃ ᠭᠠᠵᠠᠷ ᠤᠨ ᠭᠠᠳᠠᠷᠭᠤ ᠪᠦᠬᠦᠯᠢ ᠪᠠᠷ ᠢᠶᠠᠨ ᠤᠰᠤ ᠲᠠᠢ ᠠᠵᠢ᠃ ᠨᠣᠶᠠ ᠭᠠᠷ ᠢᠶᠠᠨ ᠰᠤᠩ᠋ᠭᠠᠨ ᠲᠡᠭᠦᠨ ᠢ ᠲᠤᠰᠴᠤ ᠠᠪᠤᠭᠠᠳ ᠣᠩ᠋ᠭᠣᠴᠠᠨ ᠳᠠᠭᠠᠨ ᠣᠷᠣᠭᠤᠯᠵᠠᠢ᠃ 10 ᠲᠡᠷᠡ ᠪᠠᠰᠠ ᠳᠣᠯᠣᠭᠠ ᠬᠣᠨᠣᠭ ᠬᠦᠯᠢᠶᠡᠭᠡᠳ ᠨᠥᠭᠥᠭᠡ ᠲᠠᠭᠲᠠᠭᠠ ᠶᠢ ᠣᠩ᠋ᠭᠣᠴᠠ ᠠᠴᠠ ᠳᠠᠬᠢᠨ ᠶᠠᠪᠤᠭᠤᠯᠤᠭᠰᠠᠨ ᠳᠤ᠂ 11 ᠦᠳᠡᠰᠢ ᠨᠢ ᠲᠠᠭᠲᠠᠭᠠ ᠲᠡᠭᠦᠨ ᠳᠡᠭᠡᠷᠡ ᠪᠤᠴᠠᠵᠤ ᠢᠷᠡᠪᠡ᠃ ᠠᠮᠠᠨ ᠳᠠᠭᠠᠨ ᠴᠢᠳᠦᠨ ᠮᠣᠳᠣᠨ ᠤ ᠰᠢᠨᠡᠬᠡᠨ ᠨᠠᠬᠢᠶᠠ ᠵᠠᠭᠤᠭᠰᠠᠨ ᠪᠠᠢᠵᠠᠢ︕ ᠡᠢᠨ ᠬᠦ ᠨᠣᠶᠠ ᠭᠠᠵᠠᠷ ᠤᠨ ᠤᠰᠤ ᠲᠠᠲᠠᠷᠠᠭᠰᠠᠨ ᠢ ᠮᠡᠳᠡᠪᠡ᠃ 12 ᠨᠣᠶᠠ ᠳᠠᠬᠢᠨ ᠳᠣᠯᠣᠭᠠ ᠬᠣᠨᠣᠭ ᠬᠦᠯᠢᠶᠡᠭᠡᠳ ᠨᠥᠭᠥᠭᠡ ᠲᠠᠭᠲᠠᠭᠠ ᠶᠢ ᠶᠠᠪᠤᠭᠤᠯᠤᠭᠰᠠᠨ ᠳᠤ᠂ ᠠᠬᠢᠭᠠᠳ ᠪᠤᠴᠠᠵᠤ ᠢᠷᠡᠭᠰᠡᠨ ᠦᠭᠡᠢ᠃
13 ᠨᠣᠶᠠ ᠵᠢᠷᠭᠤᠭᠠᠨ ᠵᠠᠭᠤ ᠨᠢᠭᠡ ᠨᠠᠰᠤᠲᠠᠢ ᠪᠣᠯᠵᠠᠢ᠃ ᠲᠡᠷᠡ ᠵᠢᠯ ᠤᠨ ᠡᠬᠢ᠂ ᠲᠤᠬᠠᠢᠯᠠᠪᠠᠯ ᠨᠢᠭᠡᠳᠦᠭᠡᠷ ᠰᠠᠷᠠ ᠶᠢᠨ ᠨᠢᠭᠡᠨ ᠳᠦ ᠭᠠᠵᠠᠷ ᠤᠨ ᠭᠠᠳᠠᠷᠭᠤ ᠳᠡᠭᠡᠷᠡᠬᠢ ᠤᠰᠤ ᠰᠢᠷᠭᠢᠭᠰᠡᠨ ᠪᠠᠢᠪᠠ᠃ ᠨᠣᠶᠠ ᠣᠩ᠋ᠭᠣᠴᠠᠨ ᠤ ᠪᠠᠨ ᠣᠷᠣᠢ ᠶᠢ ᠰᠡᠬᠦᠭᠡᠳ ᠬᠠᠷᠠᠬᠤ ᠳᠤ᠂ ᠭᠠᠵᠠᠷ ᠤᠨ ᠭᠠᠳᠠᠷᠭᠤ ᠦᠨᠡᠬᠡᠷ ᠬᠠᠭᠤᠷᠠᠢ ᠪᠣᠯᠣᠭᠰᠠᠨ ᠪᠠᠢᠯᠠ᠃ 14 ᠬᠣᠶᠠᠳᠤᠭᠠᠷ ᠰᠠᠷᠠ ᠶᠢᠨ ᠬᠣᠷᠢᠨ ᠳᠣᠯᠣᠭᠠᠨ ᠳᠤ ᠭᠠᠵᠠᠷ ᠪᠦᠷᠢᠮᠦᠰᠦᠨ ᠬᠠᠲᠠᠭᠰᠠᠨ ᠪᠠᠢᠪᠠ᠃ 15 ᠪᠤᠷᠬᠠᠨ ᠨᠣᠶᠠ ᠳᠤ᠄ 16 《ᠴᠢ ᠣᠳᠣ ᠡᠬᠡᠨᠡᠷ᠂ ᠬᠥᠪᠡᠭᠦᠳ᠂ ᠪᠡᠷᠢᠶᠡᠳ ᠲᠡᠢ ᠪᠡᠨ ᠬᠠᠮᠲᠤ ᠣᠩ᠋ᠭᠣᠴᠠᠨ ᠠᠴᠠ ᠪᠠᠨ ᠭᠠᠷ᠃ 17 ᠮᠥᠨ ᠵᠢᠭᠦᠷᠲᠡᠨ ᠰᠢᠪᠠᠭᠤᠳ᠂ ᠮᠠᠯ ᠠᠳᠤᠭᠤᠰᠤ᠂ ᠭᠠᠵᠠᠷ ᠢᠶᠠᠷ ᠮᠥᠯᠬᠥᠭᠴᠢᠳ ᠪᠦᠭᠦᠳᠡ᠂ ᠲᠤᠬᠠᠢᠯᠠᠪᠠᠯ ᠥᠪᠡᠷ ᠲᠡᠢ ᠪᠡᠨ ᠬᠠᠮᠲᠤ ᠪᠠᠢᠭᠠ ᠮᠢᠬᠠᠨ ᠪᠡᠶᠡᠲᠦ ᠪᠦᠬᠦ ᠠᠮᠢᠲᠠᠨ ᠢ ᠭᠠᠷᠭᠠᠭᠲᠤᠨ᠃ ᠲᠡᠳᠡ ᠦᠷᠡᠵᠢᠨ ᠣᠯᠠᠰᠢᠷᠠᠵᠤ ᠭᠠᠵᠠᠷ ᠳᠡᠯᠡᠬᠡᠢ ᠶᠢ ᠪᠢᠯᠬᠠᠭᠤᠯᠬᠤ ᠪᠣᠯᠣᠨᠠ︕》 ᠭᠡᠪᠡ᠃ 18 ᠡᠢᠨ ᠬᠦ ᠨᠣᠶᠠ ᠬᠥᠪᠡᠭᠦᠳ᠂ ᠡᠬᠡᠨᠡᠷ᠂ ᠪᠡᠷᠢᠶᠡᠳ ᠲᠡᠢ ᠪᠡᠨ ᠬᠠᠮᠲᠤ ᠭᠠᠷᠴᠤ ᠢᠷᠡᠵᠡᠢ᠃ 19 ᠮᠥᠨ ᠪᠦᠬᠦ ᠠᠮᠢᠲᠠᠨ᠂ ᠪᠦᠬᠦ ᠮᠥᠯᠬᠥᠭᠴᠢ᠂ ᠪᠦᠬᠦ ᠵᠢᠭᠦᠷᠲᠡᠨ ᠬᠢᠭᠡᠳ ᠭᠠᠵᠠᠷ ᠳᠡᠭᠡᠷᠡ ᠬᠥᠳᠡᠯᠦᠭᠴᠢ ᠪᠦᠭᠦᠳᠡ ᠲᠥᠷᠥᠯ ᠲᠥᠷᠥᠯ ᠢᠶᠡᠷ ᠢᠶᠠᠨ ᠣᠩ᠋ᠭᠣᠴᠠᠨ ᠠᠴᠠ ᠭᠠᠷᠴᠠᠢ᠃
20 ᠨᠣᠶᠠ ᠶᠣᠬᠣᠸᠠ ᠳᠤ ᠵᠣᠷᠢᠭᠤᠯᠤᠨ ᠲᠠᠬᠢᠯ ᠤᠨ ᠰᠢᠷᠡᠭᠡ ᠪᠣᠰᠬᠠᠵᠤ᠂ ᠪᠦᠬᠦ ᠴᠡᠪᠡᠷ ᠠᠮᠢᠲᠠᠨ᠂ ᠪᠦᠬᠦ ᠴᠡᠪᠡᠷ ᠵᠢᠭᠦᠷᠲᠡᠨ ᠡᠴᠡ ᠰᠢᠯᠢᠵᠦ ᠠᠪᠤᠭᠠᠳ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠡᠷᠭᠦᠪᠡ᠃ 21 ᠶᠣᠬᠣᠸᠠ ᠲᠠᠭᠠᠯᠠᠮᠵᠢᠲᠤ ᠦᠨᠦᠷ ᠢ ᠲᠠᠭᠠᠰᠢᠶᠠᠨ ᠰᠣᠶᠣᠷᠬᠠᠵᠤ᠂ ᠵᠢᠷᠦᠬᠡᠨ ᠳᠡᠭᠡᠨ᠄ 《ᠬᠥᠮᠦᠨ ᠦ ᠪᠣᠳᠣᠯ ᠰᠠᠨᠠᠭᠠ ᠬᠠᠷᠠ ᠪᠠᠭᠠ ᠠᠴᠠ ᠪᠠᠨ ᠬᠣᠷᠣᠨ ᠮᠠᠭᠤ ᠪᠣᠯᠪᠠᠴᠤ ᠬᠥᠮᠦᠨ ᠦ ᠤᠯᠠᠮ ᠢᠶᠠᠷ ᠭᠠᠵᠠᠷ ᠢ ᠪᠢ ᠳᠠᠬᠢᠵᠤ ᠬᠠᠷᠢᠶᠠᠬᠤ ᠦᠭᠡᠢ᠃ ᠪᠢ ᠤᠷᠢᠳᠤ ᠶᠢᠨ ᠬᠢ ᠰᠢᠭ᠋ ᠢᠶᠠᠨ ᠬᠠᠮᠤᠭ ᠠᠮᠢᠲᠠᠨ ᠢ ᠳᠠᠬᠢᠵᠤ ᠰᠥᠨᠥᠭᠡᠬᠦ ᠦᠭᠡᠢ᠃
22 ᠭᠠᠵᠠᠷ ᠳᠡᠯᠡᠬᠡᠢ ᠣᠷᠣᠰᠢᠨ ᠪᠠᠢᠬᠤ ᠶᠤᠮ ᠪᠣᠯ ᠲᠠᠷᠢᠬᠤ ᠪᠠ ᠬᠤᠷᠢᠶᠠᠬᠤ ᠬᠦᠢᠲᠡᠨ ᠪᠠ ᠬᠠᠯᠠᠭᠤᠨ ᠵᠤᠨ ᠪᠠ ᠡᠪᠦᠯ ᠡᠳᠦᠷ ᠪᠠ ᠰᠥᠨᠢ ᠵᠣᠭᠰᠣᠬᠤ ᠦᠭᠡᠢ ᠪᠠᠢᠬᠤ ᠪᠣᠯᠣᠨᠠ》 ᠭᠡᠵᠦ ᠠᠢᠯᠠᠳᠴᠠᠢ᠃