ᠡᠬᠢᠯᠡᠯ ᠳᠥᠴᠢᠨ ᠳᠣᠯᠣᠭᠠ
1 ᠶᠣᠰᠧᠹ ᠹᠠᠷᠠᠣ᠋ ᠳᠤ ᠣᠴᠢᠭᠠᠳ ᠲᠡᠭᠦᠨ ᠳᠦ᠄ 《ᠮᠢᠨᠦ ᠡᠴᠢᠭᠡ ᠴᠤ᠂ ᠠᠬᠠ ᠨᠠᠷ ᠮᠠᠨᠢ ᠴᠤ ᠮᠠᠯ ᠰᠦᠷᠦᠭ᠂ ᠬᠠᠮᠤᠭ ᠡᠳ᠋ ᠬᠥᠷᠥᠩᠭᠡ ᠪᠡᠨ ᠠᠪᠴᠤ᠂ ᠺᠠᠨᠠᠨ ᠠᠴᠠ ᠢᠷᠡᠭᠡᠳ ᠣᠳᠣ ᠭᠣᠱᠧᠨ ᠨᠤᠲᠤᠭ ᠲᠤ ᠪᠠᠢᠨᠠ︕》 ᠭᠡᠵᠦ ᠬᠡᠯᠡᠭᠡᠳ᠂ 2 ᠠᠬᠠ ᠨᠠᠷ ᠠᠴᠠ ᠪᠠᠨ ᠲᠠᠪᠤᠨ ᠬᠥᠮᠦᠨ ᠢ ᠠᠪᠴᠤ᠂ ᠹᠠᠷᠠᠣ᠋ ᠳᠤ ᠪᠠᠷᠠᠭᠠᠯᠬᠠᠭᠤᠯᠵᠠᠢ᠃ 3 ᠹᠠᠷᠠᠣ᠋ ᠲᠡᠭᠦᠨ ᠦ ᠠᠬᠠ ᠨᠠᠷ ᠠᠴᠠ᠄ 《ᠲᠠ ᠨᠠᠷ ᠶᠠᠭᠤ ᠬᠢᠳᠡᠭ ᠤᠯᠤᠰ ᠪᠤᠢ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ ᠲᠡᠳᠡ᠄ 《ᠲᠠᠨ ᠤ ᠵᠠᠷᠤᠴᠠ ᠪᠢᠳᠡ ᠡᠪᠦᠭᠡ ᠳᠡᠭᠡᠳᠦᠰ ᠲᠡᠢ ᠪᠡᠨ ᠠᠳᠠᠯᠢᠬᠠᠨ ᠬᠣᠨᠢᠴᠢᠳ》 ᠭᠡᠪᠡ᠃ 4 ᠲᠡᠳᠡ ᠪᠠᠰᠠ ᠹᠠᠷᠠᠣ᠋ ᠳᠤ᠄ 《ᠮᠠᠨ ᠤ ᠬᠢᠨ ᠲᠠᠨ ᠤ ᠡ᠊ᠨᠳᠡ ᠲᠦᠷ ᠰᠠᠭᠤᠬᠤ ᠪᠠᠷ ᠢᠷᠡᠯᠡ᠃ ᠺᠠᠨᠠᠨ ᠨᠤᠲᠤᠭ ᠲᠤ ᠪᠣᠯᠣᠭᠰᠠᠨ ᠬᠦᠨᠳᠦ ᠬᠡᠴᠡᠭᠦᠦ ᠭᠠᠩ ᠭᠠᠴᠢᠭ ᠢᠶᠠᠷ ᠲᠠᠨ ᠤ ᠵᠠᠷᠤᠴᠠ ᠪᠢᠳᠡᠨ ᠦ ᠮᠠᠯ ᠰᠦᠷᠦᠭ ᠪᠡᠯᠴᠢᠭᠡᠷ ᠦᠭᠡᠢ ᠪᠣᠯᠣᠯᠠ᠃ ᠣᠳᠣ ᠲᠠᠨ ᠠᠴᠠ ᠭᠤᠶᠤᠶᠠ᠃ ᠵᠠᠷᠤᠴᠠ ᠪᠢᠳᠡᠨ ᠦ ᠪᠠᠨ ᠭᠣᠱᠧᠨ ᠨᠤᠲᠤᠭ ᠲᠤ ᠰᠠᠭᠤᠬᠤ ᠶᠢ ᠵᠥᠪᠰᠢᠶᠡᠷᠡᠭᠡᠴᠢ》 ᠭᠡᠵᠦ ᠬᠡᠯᠡᠪᠡ᠃ 5 ᠹᠠᠷᠠᠣ᠋ ᠶᠣᠰᠧᠹ ᠲᠤ᠄ 《ᠲᠠᠨ ᠤ ᠡᠴᠢᠭᠡ ᠪᠣᠯᠣᠨ ᠠᠬᠠ ᠨᠠᠷ ᠴᠢᠨᠢ ᠲᠠᠨ ᠤᠷᠤᠭᠤ ᠬᠦᠷᠴᠦ ᠢᠷᠡᠭᠰᠡᠨ ᠪᠠᠢᠨᠠ᠃ 6 ᠶᠧᠵᠢᠫᠲ ᠤᠨ ᠭᠠᠵᠠᠷ ᠨᠤᠲᠤᠭ ᠲᠠᠨ ᠤ ᠡᠮᠦᠨᠡ ᠪᠠᠢᠨᠠ᠃ ᠲᠠ ᠡᠴᠢᠭᠡ ᠪᠣᠯᠣᠨ ᠠᠬᠠ ᠨᠠᠷ ᠢᠶᠠᠨ ᠡᠨᠡ ᠨᠤᠲᠤᠭ ᠤᠨ ᠬᠠᠮᠤᠭ ᠤᠨ ᠰᠠᠢᠨ ᠭᠠᠵᠠᠷ ᠲᠤ ᠰᠠᠭᠤᠯᠭᠠ᠃ ᠲᠡᠳᠡ ᠭᠣᠱᠧᠨ ᠨᠤᠲᠤᠭ ᠲᠤ ᠰᠠᠭᠤᠭ᠃ ᠬᠡᠷᠪᠡ ᠲᠡᠳᠡᠨ ᠦ ᠳᠤᠮᠳᠠ ᠴᠢᠳᠠᠪᠤᠷᠢ ᠲᠠᠢ ᠰᠠᠢᠨ ᠬᠥᠮᠦᠰ ᠪᠠᠢᠪᠠᠯ᠂ ᠮᠢᠨᠦ ᠮᠠᠯ ᠰᠦᠷᠦᠭ ᠢ ᠲᠡᠳᠡᠨ ᠢᠶᠡᠷ ᠬᠠᠷᠢᠭᠤᠴᠠᠭᠤᠯ》 ᠭᠡᠪᠡ᠃
7 ᠶᠣᠰᠧᠹ ᠡᠴᠢᠭᠡ ᠶᠠᠺᠣᠪ ᠢᠶᠠᠨ ᠳᠠᠭᠠᠭᠤᠯᠵᠤ ᠢᠷᠡᠭᠡᠳ᠂ ᠹᠠᠷᠠᠣ᠋ ᠳᠤ ᠪᠠᠷᠠᠭᠠᠯᠬᠠᠭᠤᠯᠤᠭᠰᠠᠨ ᠪᠠᠢᠨᠠ᠃ ᠶᠠᠺᠣᠪ ᠹᠠᠷᠠᠣ᠋ ᠶᠢ ᠢᠷᠥᠭᠡᠪᠡ᠃ 8 ᠹᠠᠷᠠᠣ᠋ ᠶᠠᠺᠣᠪ ᠠᠴᠠ᠄ 《ᠲᠠᠨ ᠤ ᠨᠠᠰᠤᠨ ᠰᠡᠭᠦᠳᠡᠷ ᠬᠡᠳᠦ ᠪᠤᠢ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ 9 ᠶᠠᠺᠣᠪ ᠹᠠᠷᠠᠣ᠋ ᠳᠤ᠄ 《ᠪᠢ ᠴᠠᠭᠠᠴᠢᠯᠠᠨ ᠶᠠᠪᠤᠭᠰᠠᠭᠠᠷ ᠵᠠᠭᠤᠨ ᠭᠤᠴᠢᠨ ᠵᠢᠯ ᠪᠣᠯᠵᠤ ᠪᠠᠢᠨᠠ᠃ ᠠᠮᠢᠳᠤᠷᠠᠯ ᠤᠨ ᠮᠠᠨᠢ ᠣᠨ ᠵᠢᠯ ᠤᠷᠲᠤ ᠪᠢᠰᠢ ᠪᠣᠯᠪᠠᠴᠤ ᠬᠡᠴᠡᠭᠦᠦ ᠪᠠᠢᠯᠠ᠃ ᠬᠠᠷᠢᠨ ᠡᠴᠢᠭᠡ ᠡᠪᠦᠭᠡᠳ ᠦᠨ ᠮᠢᠨᠢ ᠴᠠᠭᠠᠴᠢᠯᠠᠨ ᠠᠮᠢᠳᠤᠷᠠᠭᠰᠠᠨ ᠣᠨ ᠵᠢᠯ ᠤᠳ ᠲᠤᠨᠢ ᠠᠷᠠᠢ ᠬᠦᠷᠦᠭᠡ ᠦᠭᠡᠢ ᠪᠠᠢᠨᠠ》 ᠭᠡᠪᠡ᠃ 10 ᠶᠠᠺᠣᠪ ᠹᠠᠷᠠᠣ᠋ ᠶᠢ ᠢᠷᠥᠭᠡᠭᠰᠡᠨ ᠦ ᠳᠠᠷᠠᠭᠠ ᠲᠡᠨᠳᠡ ᠡᠴᠡ ᠭᠠᠷᠴᠤ ᠣᠳᠪᠠ᠃ 11 ᠶᠣᠰᠧᠹ ᠹᠠᠷᠠᠣ᠋ ᠶᠢᠨ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠡᠴᠢᠭᠡ ᠪᠣᠯᠣᠨ ᠠᠬᠠ ᠨᠠᠷ ᠢᠶᠠᠨ ᠶᠧᠵᠢᠫᠲ ᠲᠤ ᠰᠠᠭᠤᠯᠭᠠᠵᠤ᠂ ᠲᠡᠨᠳᠡᠬᠢ ᠬᠠᠮᠤᠭ ᠤᠨ ᠰᠠᠢᠨ ᠭᠠᠵᠠᠷ ᠪᠣᠯᠬᠤ ᠷᠠᠮᠧᠰᠧᠰ ᠨᠤᠲᠤᠭ ᠢ ᠲᠡᠳᠡᠨ ᠳᠦ ᠥᠮᠴᠢ ᠪᠣᠯᠭᠠᠨ ᠥᠭᠭᠥᠭᠰᠡᠨ ᠢᠶᠡᠷ ᠪᠠᠷᠠᠬᠤ ᠦᠭᠡᠢ᠂ 12 ᠥᠪᠡᠷ ᠦᠨ ᠢᠶᠠᠨ ᠡᠴᠢᠭᠡ᠂ ᠠᠬᠠ ᠨᠠᠷ ᠬᠢᠭᠡᠳ ᠡᠴᠢᠭᠡ ᠶᠢᠨ ᠢᠶᠠᠨ ᠪᠦᠬᠦ ᠭᠡᠷ ᠪᠦᠯᠢ᠂ ᠬᠡᠦᠬᠡᠳ ᠤᠳ ᠲᠤ ᠬᠥᠮᠦᠨ ᠦ ᠲᠣᠭᠠ ᠪᠠᠷ ᠨᠢ ᠬᠦᠨᠡᠰᠦ ᠥᠭᠴᠦ ᠲᠡᠳᠬᠦᠭᠰᠡᠨ ᠪᠠᠢᠪᠠ᠃
ᠥᠯᠥᠰᠬᠥᠯᠡᠩ ᠢ ᠳᠤᠭᠤᠯᠤᠭᠰᠠᠨ ᠨᠢ
13 ᠥᠯᠥᠰᠬᠥᠯᠡᠩ ᠭᠠᠴᠢᠭ ᠠᠴᠠ ᠪᠣᠯᠵᠤ ᠭᠠᠵᠠᠷ ᠳᠠᠶᠠᠭᠠᠷ ᠬᠣᠭᠣᠯᠠ ᠬᠦᠨᠡᠰᠦ ᠲᠠᠰᠤᠷᠠᠭᠰᠠᠨ ᠳᠤ᠂ ᠶᠧᠵᠢᠫᠲ ᠪᠣᠯᠣᠨ ᠺᠠᠨᠠᠨ ᠨᠤᠲᠤᠭ ᠴᠤ ᠥᠯᠥᠰᠬᠥᠯᠡᠩ ᠡᠴᠡ ᠪᠣᠯᠵᠤ ᠦᠭᠡᠶᠢᠷᠡᠨ ᠲᠤᠢᠯᠳᠠᠵᠠᠢ᠃ 14 ᠶᠣᠰᠧᠹ ᠠᠮᠤ ᠬᠦᠨᠡᠰᠦ ᠬᠤᠳᠠᠯᠳᠤᠭᠠᠳ᠂ ᠶᠧᠵᠢᠫᠲ ᠪᠣᠯᠣᠨ ᠺᠠᠨᠠᠨ ᠨᠤᠲᠤᠭ ᠠᠴᠠ ᠣᠯᠳᠠᠬᠤ ᠪᠦᠬᠦ ᠮᠥᠩᠭᠥ ᠶᠢ ᠬᠤᠷᠢᠶᠠᠵᠤ᠂ ᠹᠠᠷᠠᠣ᠋ ᠶᠢᠨ ᠣᠷᠳᠣᠨ ᠳᠤ ᠠᠪᠴᠢᠷᠠᠭᠰᠠᠨ ᠪᠠᠢᠯᠠ᠃ 15 ᠶᠧᠵᠢᠫᠲ ᠪᠣᠯᠣᠨ ᠺᠠᠨᠠᠨ ᠨᠤᠲᠤᠭ ᠤᠨ ᠬᠢᠨ ᠤ ᠮᠥᠩᠭᠥ ᠳᠠᠭᠤᠰᠬᠤ ᠳᠤ᠂ ᠶᠧᠵᠢᠫᠲ᠋ᠴᠦᠳ ᠪᠦᠭᠦᠳᠡᠭᠡᠷ ᠢᠶᠡᠨ ᠶᠣᠰᠧᠹ ᠲᠤ ᠢᠷᠡᠵᠦ᠄ 《ᠪᠢᠳᠡᠨ ᠦ ᠮᠥᠩᠭᠥ ᠳᠠᠭᠤᠰᠤᠭᠰᠠᠨ︕ ᠬᠠᠷᠢᠨ ᠪᠢᠳᠡᠨ ᠳᠦ ᠬᠣᠭᠣᠯᠠ ᠬᠦᠨᠡᠰᠦ ᠥᠭᠭᠥᠭᠡᠴᠢ᠃ ᠪᠢᠳᠡ ᠶᠠᠭᠠᠬᠢᠭᠠᠳ ᠲᠠᠨ ᠤ ᠡᠮᠦᠨᠡ ᠦᠬᠦᠬᠦ ᠶᠣᠰᠣᠲᠠᠢ ᠶᠤᠮ ᠪᠤᠢ︖》 ᠭᠡᠰᠡᠨ ᠳᠦ᠂ 16 ᠶᠣᠰᠧᠹ᠄ 《ᠮᠥᠩᠭᠥ ᠴᠢᠨᠢ ᠳᠠᠭᠤᠰᠤᠭᠰᠠᠨ ᠪᠣᠯ ᠮᠠᠯ ᠢᠶᠠᠨ ᠠᠪᠴᠢᠷᠠᠵᠤ ᠥᠭ᠂ ᠪᠢ ᠣᠷᠣᠨ ᠳᠤᠨᠢ ᠬᠦᠨᠡᠰᠦ ᠥᠭᠭᠥᠶᠡ》 ᠭᠡᠵᠡᠢ᠃ 17 ᠲᠡᠢᠮᠦ ᠡᠴᠡ ᠲᠡᠳᠡ ᠮᠠᠯ ᠰᠦᠷᠦᠭ ᠢᠶᠡᠨ ᠶᠣᠰᠧᠹ ᠲᠤ ᠠᠪᠴᠢᠷᠠᠵᠤ ᠥᠭᠴᠡᠢ᠃ ᠶᠣᠰᠧᠹ ᠲᠡᠳᠡᠨ ᠦ ᠠᠪᠴᠢᠷᠠᠭᠰᠠᠨ ᠠᠳᠤᠭᠤ᠂ ᠬᠣᠨᠢ᠂ ᠢᠮᠠᠭᠠ᠂ ᠦᠬᠡᠷ ᠪᠣᠯᠣᠨ ᠡᠯᠵᠢᠭᠡ ᠶᠢ ᠠᠪᠤᠭᠠᠳ ᠬᠣᠭᠣᠯᠠ ᠬᠦᠨᠡᠰᠦ ᠥᠭᠭᠥᠭᠰᠡᠨ ᠪᠠᠢᠯᠠ᠃ ᠶᠣᠰᠧᠹ ᠲᠡᠷᠡ ᠵᠢᠯ ᠢᠩᠭᠢᠵᠦ ᠮᠠᠯ ᠠᠪᠤᠭᠠᠳ ᠬᠦᠨᠡᠰᠦ ᠥᠭᠴᠦ ᠲᠡᠳᠡᠨ ᠢ ᠬᠠᠩ᠋ᠭᠠᠪᠠ᠃ 18 ᠲᠡᠷᠡ ᠵᠢᠯ ᠥᠩᠭᠡᠷᠡᠵᠦ᠂ ᠳᠠᠷᠠᠭᠠᠴᠢ ᠶᠢᠨ ᠵᠢᠯ ᠨᠢ ᠪᠣᠯᠬᠤ ᠳᠤ ᠬᠥᠮᠦᠰ ᠶᠣᠰᠧᠹ ᠲᠤ ᠳᠠᠬᠢᠨ ᠢᠷᠡᠵᠦ᠄ 《ᠡᠵᠡᠨᠲᠡᠨ ᠲᠠᠨ ᠳᠤ ᠪᠢᠳᠡ ᠨᠢᠭᠤᠯ ᠦᠭᠡᠢ ᠬᠡᠯᠡᠶᠡ᠂ ᠪᠢᠳᠡᠨ ᠦ ᠮᠥᠩᠭᠥ ᠳᠠᠭᠤᠰᠤᠭᠰᠠᠨ᠃ ᠪᠢᠳᠡᠨ ᠦ ᠮᠠᠯ ᠰᠦᠷᠦᠭ ᠡᠵᠡᠨᠲᠡᠨ ᠲᠠᠨ ᠤ ᠬᠢ ᠪᠣᠯᠣᠭᠰᠠᠨ᠃ ᠡᠵᠡᠨᠲᠡᠨ ᠲᠠᠨ ᠤ ᠡᠮᠦᠨᠡ ᠥᠪᠡᠷᠰᠡᠳ ᠦᠨ ᠮᠢᠬᠠᠨ ᠪᠡᠶᠡ ᠪᠣᠯᠣᠨ ᠭᠠᠵᠠᠷ ᠰᠢᠷᠣᠢ ᠠᠴᠠ ᠪᠠᠨ ᠥᠭᠡᠷᠡ ᠦᠯᠡᠳᠡᠭᠰᠡᠨ ᠵᠦᠢᠯ ᠪᠢᠳᠡᠨ ᠳᠦ ᠠᠯᠠᠭᠠ᠃ 19 ᠪᠢᠳᠡ ᠴᠤ᠂ ᠮᠠᠨ ᠤ ᠭᠠᠵᠠᠷ ᠰᠢᠷᠣᠢ ᠴᠤ ᠶᠠᠭᠠᠬᠢᠭᠠᠳ ᠲᠠᠨ ᠤ ᠡᠮᠦᠨᠡ ᠤᠰᠠᠳᠬᠤ ᠶᠣᠰᠣᠲᠠᠢ ᠶᠤᠮ ᠪᠤᠢ︖ ᠬᠣᠭᠣᠯᠠ ᠬᠦᠨᠡᠰᠦ ᠥᠭᠴᠦ ᠭᠠᠵᠠᠷ ᠰᠢᠷᠣᠢ ᠲᠠᠢ ᠮᠠᠨᠢ ᠬᠠᠮᠲᠤ ᠪᠢᠳᠡᠨ ᠢ ᠬᠤᠳᠠᠯᠳᠤᠨ ᠠᠪᠤᠭᠠᠷᠠᠢ᠃ ᠪᠢᠳᠡ ᠭᠠᠵᠠᠷ ᠰᠢᠷᠣᠢ ᠲᠠᠢ ᠪᠠᠨ ᠬᠠᠮᠲᠤ ᠹᠠᠷᠠᠣ᠋ ᠶᠢᠨ ᠵᠠᠷᠤᠴᠠ ᠪᠣᠯᠵᠠᠭᠠᠶᠠ᠃ ᠪᠢᠳᠡᠨ ᠳᠦ ᠲᠠᠷᠢᠶᠠᠨ ᠦᠷᠡ ᠥᠭᠭᠥᠭᠡᠴᠢ᠃ ᠲᠡᠭᠡᠪᠡᠯ ᠪᠢᠳᠡ ᠦᠬᠦᠬᠦ ᠦᠭᠡᠢ ᠠᠮᠢᠳᠤ ᠦᠯᠡᠳᠡᠬᠦ ᠪᠥᠭᠡᠳ ᠭᠠᠵᠠᠷ ᠨᠤᠲᠤᠭ ᠮᠠᠨᠢ ᠴᠤ ᠡᠵᠡᠭᠦᠢ ᠵᠡᠯᠢᠭᠦᠳ ᠪᠣᠯᠬᠤ ᠦᠭᠡᠢ》 ᠭᠡᠪᠡ᠃
20 ᠡᠢᠨ ᠬᠦ ᠶᠣᠰᠧᠹ ᠶᠧᠵᠢᠫᠲ ᠤᠨ ᠪᠦᠬᠦ ᠭᠠᠵᠠᠷ ᠰᠢᠷᠣᠢ ᠶᠢ ᠬᠤᠳᠠᠯᠳᠤᠨ ᠠᠪᠤᠭᠠᠳ ᠹᠠᠷᠠᠣ᠋ ᠳᠤ ᠥᠭᠭᠥᠭᠰᠡᠨ ᠪᠠᠢᠨᠠ᠃ ᠬᠦᠨᠳᠦ ᠬᠡᠴᠡᠭᠦᠦ ᠥᠯᠥᠰᠬᠥᠯᠡᠩ ᠭᠠᠴᠢᠭ ᠪᠣᠯᠣᠭᠰᠠᠨ ᠢᠶᠠᠷ ᠶᠧᠵᠢᠫᠲ ᠤᠨ ᠬᠥᠮᠦᠨ ᠪᠣᠯᠭᠠᠨ ᠥᠪᠡᠷ ᠦᠨ ᠢᠶᠠᠨ ᠭᠠᠵᠠᠷ ᠰᠢᠷᠣᠢ ᠶᠢ ᠬᠤᠳᠠᠯᠳᠤᠬᠤ ᠳᠤ᠂ ᠲᠡᠷᠡ ᠭᠠᠵᠠᠷ ᠨᠢ ᠹᠠᠷᠠᠣ᠋ ᠶᠢᠨ ᠬᠢ ᠪᠣᠯᠵᠤ᠂ 21 ᠶᠧᠵᠢᠫᠲ ᠨᠤᠲᠤᠭ ᠤᠨ ᠨᠢᠭᠡ ᠵᠠᠬᠠ ᠠᠴᠠ ᠨᠥᠭᠥᠭᠡ ᠵᠠᠬᠠ ᠬᠦᠷᠲᠡᠯᠡᠬᠢ ᠠᠷᠠᠳ ᠣᠯᠠᠨ ᠲᠡᠭᠦᠨ ᠳᠦ ᠵᠠᠷᠤᠴᠠᠯᠠᠭᠳᠠᠬᠤ ᠪᠣᠯᠵᠠᠢ᠃ 22 ᠬᠠᠷᠢᠨ ᠶᠣᠰᠧᠹ ᠲᠠᠬᠢᠯᠴᠢᠳ ᠤᠨ ᠭᠠᠵᠠᠷ ᠰᠢᠷᠣᠢ ᠶᠢ ᠠᠷᠠᠯᠵᠢᠭᠰᠠᠨ ᠦᠭᠡᠢ᠃ ᠲᠠᠬᠢᠯᠴᠢᠳ ᠹᠠᠷᠠᠣ᠋ ᠡᠴᠡ ᠲᠣᠭᠲᠠᠭᠰᠠᠨ ᠣᠷᠣᠯᠭᠠ ᠣᠯᠵᠤ᠂ ᠹᠠᠷᠠᠣ᠋ ᠡᠴᠡ ᠲᠣᠭᠲᠠᠭᠰᠠᠨ ᠬᠦᠨᠡᠰᠦ ᠠᠪᠤᠭᠠᠳ ᠢᠳᠡᠳᠡᠭ ᠤᠴᠢᠷ ᠠᠴᠠ ᠲᠡᠳᠡ ᠭᠠᠵᠠᠷ ᠰᠢᠷᠣᠢ ᠪᠠᠨ ᠬᠤᠳᠠᠯᠳᠤᠬᠤ ᠬᠡᠷᠡᠭ ᠦᠭᠡᠢ ᠪᠠᠢᠯᠠ᠃ 23 ᠶᠣᠰᠧᠹ ᠠᠷᠠᠳ ᠲᠦᠮᠡᠨ ᠳᠦ᠄ 《ᠵᠠ ᠥᠨᠥᠳᠥᠷ ᠲᠠ ᠨᠠᠷ ᠢ ᠪᠣᠯᠣᠨ ᠲᠠ ᠨᠠᠷ ᠤᠨ ᠭᠠᠵᠠᠷ ᠰᠢᠷᠣᠢ ᠶᠢ ᠠᠪᠤᠭᠠᠳ ᠹᠠᠷᠠᠣ᠋ ᠳᠤ ᠥᠭᠭᠥᠭᠰᠡᠨ ᠰᠢᠦ᠃ ᠲᠠ ᠨᠠᠷ ᠣᠳᠣ ᠦᠷᠡ ᠠᠪᠴᠤ ᠭᠠᠵᠠᠷ ᠰᠢᠷᠣᠢ ᠳᠠᠭᠠᠨ ᠲᠠᠷᠢᠶᠠᠯᠠᠵᠠᠭᠠ᠃ 24 ᠤᠷᠭᠤᠴᠠ ᠪᠠᠨ ᠬᠤᠷᠢᠶᠠᠬᠤ ᠳᠠᠭᠠᠨ ᠲᠠᠪᠤᠨ ᠤ ᠨᠢᠭᠡ ᠶᠢ ᠨᠢ ᠹᠠᠷᠠᠣ᠋ ᠳᠤ ᠥᠭᠬᠦ ᠶᠣᠰᠣᠲᠠᠢ᠂ ᠦᠯᠡᠳᠡᠭᠰᠡᠨ ᠳᠥᠷᠪᠡᠨ ᠬᠤᠪᠢ ᠨᠢ ᠥᠪᠡᠷᠰᠡᠳ ᠦᠨ ᠬᠢ ᠴᠢᠨᠢ ᠪᠣᠯᠣᠨᠠ᠂ ᠡᠭᠦᠨ ᠢ ᠲᠠᠯᠠᠪᠠᠢ ᠳᠤ ᠲᠠᠷᠢᠬᠤ ᠪᠠ ᠥᠪᠡᠷᠰᠡᠳ ᠦᠨ ᠢᠶᠠᠨ ᠬᠣᠭᠣᠯᠠ ᠬᠦᠨᠡᠰᠦ ᠪᠣᠯᠭᠠᠨ ᠭᠡᠷ ᠦᠨ ᠬᠢᠨ ᠪᠣᠯᠣᠨ ᠦᠷᠡ ᠬᠡᠦᠬᠡᠳ ᠤᠳ ᠢᠶᠠᠨ ᠲᠡᠵᠢᠭᠡᠭᠡᠷᠡᠢ》 ᠭᠡᠰᠡᠨ ᠳᠦ᠂ 25 ᠲᠡᠳᠡ᠄ 《ᠲᠠ ᠪᠢᠳᠡᠨ ᠦ ᠠᠮᠢ ᠶᠢ ᠠᠪᠤᠷᠠᠯᠠ᠃ ᠲᠡᠢᠮᠦ ᠡᠴᠡ ᠪᠢᠳᠡ ᠡᠵᠡᠨᠲᠡᠨ ᠲᠠᠨ ᠤ ᠲᠠᠭᠠᠯᠠᠯ ᠢ ᠣᠯᠣᠭᠰᠠᠨ ᠪᠣᠯᠬᠣᠷ ᠹᠠᠷᠠᠣ᠋ ᠶᠢᠨ ᠵᠠᠷᠤᠴᠠ ᠪᠣᠯᠬᠤ ᠶᠢ ᠮᠠᠨᠢ ᠴᠤ ᠵᠥᠪᠰᠢᠶᠡᠷᠡᠭᠡᠴᠢ》 ᠭᠡᠯᠡ᠃ 26 ᠡᠢᠨ ᠬᠦ ᠶᠧᠵᠢᠫᠲ ᠤᠨ ᠭᠠᠵᠠᠷ ᠰᠢᠷᠣᠢ ᠶᠢᠨ ᠲᠤᠬᠠᠢ ᠬᠠᠤᠯᠢ᠂ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠬᠤᠷᠢᠶᠠᠯᠲᠠ ᠶᠢᠨ ᠢᠶᠠᠨ ᠲᠠᠪᠤᠨ ᠤ ᠨᠢᠭᠡ ᠶᠢ ᠹᠠᠷᠠᠣ᠋ ᠳᠤ ᠥᠭᠬᠦ ᠬᠠᠤᠯᠢ ᠶᠢ ᠲᠣᠭᠲᠠᠭᠠᠭᠰᠠᠨ ᠪᠥᠭᠡᠳ ᠲᠡᠷᠡ ᠬᠠᠤᠯᠢ ᠨᠢ ᠥᠨᠥᠳᠥᠷ ᠬᠦᠷᠲᠡᠯᠡ ᠬᠦᠴᠦᠨ ᠲᠡᠢ ᠠᠵᠢ᠃ ᠵᠥᠪᠬᠡᠨ ᠲᠠᠬᠢᠯᠴᠢᠳ ᠤᠨ ᠭᠠᠵᠠᠷ ᠯᠠ ᠹᠠᠷᠠᠣ᠋ ᠳᠤ ᠬᠠᠷᠢᠶᠠᠯᠠᠭᠳᠠᠭᠠ ᠦᠭᠡᠢ᠃
27 ᠢᠰᠷᠧᠯᠴᠦᠳ ᠶᠧᠵᠢᠫᠲ ᠤᠨ ᠭᠣᠱᠧᠨ ᠨᠤᠲᠤᠭ ᠲᠤ ᠰᠠᠭᠤᠷᠢᠰᠢᠵᠤ ᠥᠮᠴᠢ ᠪᠠᠨ ᠡᠵᠡᠮᠰᠢᠨ᠂ ᠦᠯᠡᠮᠵᠢ ᠶᠡᠬᠡ ᠦᠷᠡᠵᠢᠨ ᠣᠯᠠᠰᠢᠷᠠᠵᠠᠢ᠃ 28 ᠶᠠᠺᠣᠪ ᠶᠧᠵᠢᠫᠲ ᠤᠨ ᠨᠤᠲᠤᠭ ᠲᠤ ᠠᠷᠪᠠᠨ ᠳᠣᠯᠣᠭᠠᠨ ᠵᠢᠯ ᠠᠮᠢᠳᠤᠷᠠᠪᠠ᠃ ᠲᠡᠭᠦᠨ ᠦ ᠠᠮᠢ ᠠᠮᠢᠳᠤᠷᠠᠯ ᠤᠨ ᠴᠠᠭ ᠬᠤᠭᠤᠴᠠᠭᠠ ᠵᠠᠭᠤ ᠳᠥᠴᠢᠨ ᠳᠣᠯᠣᠭᠠᠨ ᠵᠢᠯ ᠪᠠᠢᠭᠰᠠᠨ᠃
29 ᠢᠰᠷᠧᠯ ᠨᠠᠰᠤ ᠪᠠᠷᠠᠬᠤ ᠡᠳᠦᠷ ᠢᠶᠡᠨ ᠣᠢᠷᠠᠲᠤᠬᠤ ᠳᠤ᠂ ᠬᠦᠦ ᠶᠣᠰᠧᠹ ᠢᠶᠠᠨ ᠳᠠᠭᠤᠳᠠᠵᠤ᠂ ᠲᠡᠭᠦᠨ ᠳᠦ᠄ 《ᠬᠡᠷᠪᠡ ᠴᠢ ᠦᠨᠡᠬᠡᠷ ᠨᠠᠳᠠ ᠳᠤ ᠬᠠᠢᠷᠠᠲᠠᠢ ᠪᠣᠯ ᠪᠢ ᠴᠢᠮᠠ ᠠᠴᠠ ᠭᠤᠶᠤᠶᠠ᠂ ᠴᠢ ᠭᠠᠷ ᠢᠶᠠᠨ ᠬᠥᠯ ᠦᠨ ᠮᠢᠨᠢ ᠬᠣᠭᠣᠷᠣᠨᠳᠣ ᠲᠠᠯᠪᠢᠵᠤ᠂ ᠦᠨᠡᠨ ᠬᠠᠢᠷᠠ ᠪᠠᠷ ᠨᠠᠳᠠ ᠳᠤ ᠲᠠᠩ᠋ᠭᠠᠷᠢᠭᠯᠠᠨ᠂ ᠨᠠᠮᠠᠶᠢ ᠶᠧᠵᠢᠫᠲ ᠲᠤ ᠣᠷᠣᠰᠢᠭᠤᠯᠬᠤ ᠦᠭᠡᠢ ᠭᠡᠵᠦ ᠠᠮᠠᠯᠠᠨᠠ ᠤᠤ︖ 30 ᠡᠪᠦᠭᠡ ᠳᠡᠭᠡᠳᠦᠰ ᠲᠡᠢ ᠪᠡᠨ ᠬᠠᠮᠲᠤ ᠨᠣᠢᠷᠰᠣᠬᠤ ᠴᠠᠭ ᠲᠤ ᠮᠢᠨᠢ ᠴᠢ ᠨᠠᠮᠠᠶᠢ ᠶᠧᠵᠢᠫᠲ ᠡᠴᠡ ᠠᠪᠠᠴᠢᠵᠤ᠂ ᠲᠡᠳᠡᠨ ᠢ ᠨᠤᠲᠤᠭᠯᠠᠭᠤᠯᠤᠭᠰᠠᠨ ᠭᠠᠵᠠᠷ ᠲᠤ ᠣᠷᠣᠰᠢᠭᠤᠯᠤᠭᠠᠷᠠᠢ︕》 ᠭᠡᠬᠦ ᠳᠦ᠂ ᠶᠣᠰᠧᠹ᠄ 《ᠲᠠᠨ ᠤ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠬᠢᠨᠡ》 ᠭᠡᠪᠡ᠃ 31 ᠶᠠᠺᠣᠪ᠄ 《ᠨᠠᠳᠠ ᠳᠤ ᠲᠠᠩ᠋ᠭᠠᠷᠢᠭᠯᠠ》 ᠭᠡᠰᠡᠨ ᠳᠦ᠂ ᠶᠣᠰᠧᠹ ᠲᠡᠭᠦᠨ ᠳᠦ ᠲᠠᠩ᠋ᠭᠠᠷᠢᠭᠯᠠᠯᠠ᠂ ᠢᠰᠷᠧᠯ ᠲᠠᠶᠠᠭ ᠤᠨ ᠢᠶᠠᠨ ᠲᠣᠯᠣᠭᠠᠢ ᠶᠢ ᠲᠦᠰᠢᠨ ᠮᠥᠷᠭᠥᠪᠡ 78 ᠃