ᠳᠠᠭᠤᠯᠠᠯ ᠬᠣᠶᠠᠷ
ᠪᠤᠷᠬᠠᠨ ᠤ ᠡᠷᠭᠦᠮᠵᠢᠯᠡᠭᠰᠡᠨ ᠬᠠᠭᠠᠨ
1 ᠶᠠᠭᠤᠨ ᠳᠤ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠢᠮᠡᠵᠦ᠂ ᠶᠠᠰᠤᠲᠠᠨ ᠨᠤᠭᠤᠳ ᠬᠣᠭᠣᠰᠣᠨ ᠢ ᠰᠡᠳᠦᠨᠡ ᠪᠤᠢ︖
2 ᠭᠠᠵᠠᠷ ᠤᠨ ᠬᠠᠭᠠᠳ ᠪᠣᠰᠴᠠᠭᠠᠵᠤ ᠨᠣᠶᠠᠳ ᠬᠠᠮᠲᠤᠷᠠᠨ ᠵᠥᠪᠯᠡᠯᠳᠦᠵᠦ ᠶᠣᠬᠣᠸᠠ ᠪᠠ ᠲᠡᠭᠦᠨ ᠦ ᠲᠣᠰᠣᠯᠠᠭᠳᠠᠭᠰᠠᠨ ᠨᠢᠭᠡᠨ ᠢ ᠡᠰᠡᠷᠭᠦᠴᠡᠨ
3 《ᠲᠡᠭᠦᠨ ᠦ ᠭᠢᠨᠵᠢ ᠶᠢ ᠲᠠᠰᠤᠯᠵᠠᠭᠠᠶᠠ ᠲᠡᠭᠦᠨ ᠦ ᠳᠥᠩᠭᠡ ᠶᠢ ᠬᠠᠶᠠᠵᠠᠭᠠᠶᠠ︕》 ᠭᠡᠯᠴᠡᠨᠡ᠃
4 ᠲᠩᠷᠢ ᠳᠤ ᠵᠠᠯᠠᠷᠠᠭᠴᠢ ᠢᠨᠢᠶᠡᠨᠡ ᠶᠣᠬᠣᠸᠠ ᠲᠡᠳᠡᠨ ᠢ ᠡᠯᠡᠭᠯᠡᠨᠡ᠃
5 ᠲᠡᠭᠡᠲᠡᠯᠡ ᠶᠣᠬᠣᠸᠠ ᠠᠭᠤᠷ ᠲᠠᠢ ᠪᠠᠷ ᠠᠢᠯᠠᠳᠤᠨ ᠬᠢᠯᠢᠩ ᠢᠶᠠᠷ ᠢᠶᠠᠨ ᠲᠡᠳᠡᠨ ᠢ ᠠᠶᠤᠯᠭᠠᠵᠤ᠄
6 《ᠬᠠᠷᠢᠨ ᠪᠢ ᠠᠷᠢᠭᠤᠨ ᠠᠭᠤᠯᠠ ᠽᠢᠶᠣᠨ ᠳᠠᠭᠠᠨ ᠬᠠᠭᠠᠨ ᠢᠶᠠᠨ ᠡᠷᠭᠦᠮᠵᠢᠯᠡᠯᠡ》 ᠭᠡᠨᠡ᠃
7 ᠪᠢ ᠶᠣᠬᠣᠸᠠ ᠶᠢᠨ ᠵᠠᠷᠯᠢᠭ ᠢ ᠲᠤᠩ᠋ᠬᠠᠭᠯᠠᠨᠠ᠄ 《ᠲᠡᠷᠡ ᠨᠠᠳᠠ ᠳᠤ᠄ 〈ᠴᠢ ᠪᠣᠯ ᠮᠢᠨᠦ ᠬᠦᠦ ᠥᠨᠥᠳᠥᠷ ᠪᠢ ᠴᠢᠮᠠ ᠶᠢ ᠲᠥᠷᠥᠭᠦᠯᠦᠭᠰᠡᠨ᠃
8 ᠴᠢ ᠨᠠᠳᠠ ᠠᠴᠠ ᠭᠤᠶᠤ︕ ᠪᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠢ ᠴᠢᠨᠦ ᠥᠪ ᠪᠣᠯᠭᠠᠨᠠ ᠳᠡᠯᠡᠬᠡᠢ ᠶᠢᠨ ᠬᠢᠵᠠᠭᠠᠷ ᠴᠤ ᠴᠢᠨᠦ ᠥᠮᠴᠢ ᠪᠣᠯᠣᠨᠠ
9 ᠲᠡᠳᠡᠨ ᠢ ᠴᠢ ᠲᠡᠮᠦᠷ ᠲᠠᠶᠠᠭ ᠢᠶᠠᠷ ᠪᠠᠯᠪᠠᠴᠢᠵᠤ ᠸᠠᠭᠠᠷᠴᠢᠨ ᠤ ᠸᠠᠭᠠᠷ ᠮᠡᠲᠦ ᠬᠡᠮᠬᠡᠯᠦᠨᠡ〉 ᠭᠡᠰᠡᠨ᠃》
10 ᠬᠠᠭᠠᠳ ᠡ᠂ ᠣᠳᠣ ᠤᠬᠠᠭᠠᠷᠠᠯ ᠢ ᠣᠯ ᠭᠠᠵᠠᠷ ᠤᠨ ᠵᠠᠬᠢᠷᠤᠭᠴᠢᠳ ᠡ᠂ ᠭᠡᠰᠬᠡᠯᠲᠡ ᠶᠢ ᠠᠪ᠂
11 ᠶᠣᠬᠣᠸᠠ ᠠᠴᠠ ᠡᠮᠢᠶᠡᠨ ᠪᠠᠢᠵᠤ ᠦᠢᠯᠡᠴᠢᠯᠡ ᠰᠦᠷᠳᠡᠨ ᠪᠠᠢᠵᠤ ᠪᠠᠶᠠᠰ᠃
12 ᠬᠦᠦ ᠶᠢ ᠦᠨᠦᠰ᠂ ᠡᠰᠡ ᠲᠡᠭᠡᠪᠡᠯ ᠲᠡᠷᠡ ᠠᠭᠤᠷᠯᠠᠬᠤ ᠪᠤᠢ᠂ ᠲᠡᠭᠦᠨ ᠦ ᠠᠭᠤᠷ ᠭᠡᠨᠡᠳᠲᠡ ᠠᠰᠠᠬᠤ ᠳᠤ ᠴᠢ ᠵᠠᠮ ᠳᠠᠭᠠᠨ ᠰᠥᠨᠥᠬᠦ ᠪᠣᠯᠣᠨᠠ ᠬᠠᠷᠢᠨ ᠲᠡᠭᠦᠨ ᠦ ᠳᠣᠲᠣᠷᠠ ᠬᠣᠷᠭᠣᠳᠠᠬᠤ ᠪᠦᠬᠦᠨ ᠪᠤᠶᠠᠨ ᠲᠠᠢ︕