ᠳᠠᠭᠤᠯᠠᠯ ᠵᠠᠭᠤ ᠭᠤᠴᠢᠨ ᠬᠣᠶᠠᠷ
ᠠᠷᠢᠭᠤᠨ ᠭᠠᠵᠠᠷ ᠢ ᠢᠷᠥᠭᠡᠭᠡᠴᠢ
ᠥᠭᠰᠥᠬᠦ ᠳᠠᠭᠤᠤ᠃
1 ᠶᠣᠬᠣᠸᠠ᠂ ᠳ᠋ᠠᠸᠢᠳ᠋ ᠤᠨ ᠲᠥᠯᠥᠭᠡ ᠪᠦᠬᠦ ᠵᠣᠪᠠᠯᠠᠩ ᠢ ᠨᠢ ᠰᠠᠨᠠᠭᠠᠴᠢ᠃
2 ᠲᠡᠷᠡ ᠶᠣᠬᠣᠸᠠ ᠳᠤ ᠲᠠᠩ᠋ᠭᠠᠷᠢᠭᠯᠠᠨ ᠶᠠᠺᠣᠪ ᠤᠨ ᠲᠡᠭᠦᠰ ᠬᠦᠴᠦᠲᠡᠨ ᠳᠦ ᠠᠨᠳᠠᠭᠠᠢᠯᠠᠵᠤ
3 《ᠪᠢ ᠭᠡᠷ ᠲᠡᠭᠡᠨ ᠣᠷᠣᠬᠤ ᠦᠭᠡᠢ᠂ ᠣᠷᠣ ᠳᠡᠭᠡᠷᠡ ᠪᠡᠨ ᠬᠡᠪᠲᠡᠬᠦ ᠦᠭᠡᠢ ᠪᠠᠢᠭᠰᠠᠨ ᠴᠤ
4 ᠪᠢ ᠨᠢᠳᠦ ᠪᠡᠨ ᠨᠣᠢᠷᠮᠣᠭᠯᠠᠭᠤᠯᠤᠭᠠ ᠦᠭᠡᠢ᠂ ᠵᠣᠪᠬᠢ ᠪᠠᠨ ᠦᠷᠭᠡᠯᠡᠭᠦᠯᠦᠭᠡ ᠦᠭᠡᠢ ᠪᠠᠢᠭᠰᠠᠨ ᠴᠤ᠂
5 ᠶᠣᠬᠣᠸᠠ ᠶᠢᠨ ᠣᠷᠣᠰᠢᠬᠤ ᠭᠠᠵᠠᠷ ᠢ ᠶᠠᠺᠣᠪ ᠤᠨ ᠲᠡᠭᠦᠰ ᠬᠦᠴᠦᠲᠡᠨ ᠦ ᠰᠠᠭᠤᠬᠤ ᠭᠠᠵᠠᠷ ᠢ ᠣᠯᠣᠶᠠ》 ᠭᠡᠰᠡᠨ ᠪᠢᠯᠡ᠃
6 ᠬᠠᠷᠠ᠂ ᠮᠠᠨ ᠤ ᠬᠢᠨ ᠡᠹᠷᠠᠲ ᠲᠤ ᠡᠭᠦᠨ ᠦ ᠲᠤᠬᠠᠢ ᠰᠣᠨᠣᠰᠴᠤ ᠶᠠᠭᠠᠷ ᠤᠨ ᠲᠠᠯᠠᠪᠠᠢ ᠠᠴᠠ ᠡᠭᠦᠨ ᠢ ᠣᠯᠵᠠᠢ᠂
7 ᠪᠢᠳᠡ ᠲᠡᠭᠦᠨ ᠦ ᠣᠷᠣᠰᠢᠬᠤ ᠭᠠᠵᠠᠷ ᠲᠤ ᠣᠴᠢᠵᠠᠭᠠᠶᠠ ᠲᠡᠭᠦᠨ ᠦ ᠬᠥᠯ ᠦᠨ ᠭᠢᠰᠬᠢᠭᠦᠷ ᠦᠨ ᠡᠮᠦᠨᠡ ᠮᠥᠷᠭᠥᠵᠡᠭᠡᠶᠡ᠂
8 ᠶᠣᠬᠣᠸᠠ ᠪᠣᠰᠣᠭᠠᠴᠢ᠂ ᠬᠦᠴᠦ ᠴᠢᠳᠠᠯ ᠤᠨ ᠢᠶᠠᠨ ᠠᠪᠳᠠᠷᠠ ᠲᠠᠢ ᠬᠠᠮᠲᠤ ᠠᠮᠠᠷᠠᠬᠤ ᠭᠠᠵᠠᠷ ᠲᠠᠭᠠᠨ ᠣᠷᠣᠭᠠᠴᠢ᠂
9 ᠲᠠᠨ ᠤ ᠲᠠᠬᠢᠯᠴᠢᠳ ᠵᠥᠪ ᠢᠶᠡᠷ ᠬᠤᠪᠴᠠᠰᠤᠯᠠᠵᠤ ᠲᠠᠨ ᠳᠤ ᠦᠨᠡᠨᠴᠢ ᠬᠥᠮᠦᠰ ᠪᠠᠶᠠᠷ ᠲᠠᠢ ᠪᠠᠷ ᠬᠠᠰᠬᠢᠷᠬᠤ ᠪᠣᠯᠣᠨᠠ᠂
10 ᠥᠪᠡᠷ ᠦᠨ ᠢᠶᠠᠨ ᠵᠠᠷᠤᠴᠠ ᠳ᠋ᠠᠸᠢᠳ᠋ ᠤᠨ ᠤᠯᠠᠮ ᠢᠶᠠᠷ ᠥᠪᠡᠷ ᠦᠨ ᠢᠶᠠᠨ ᠲᠣᠰᠣᠯᠠᠭᠰᠠᠨ ᠨᠢᠭᠡᠨ ᠡᠴᠡ ᠨᠢᠭᠤᠷ ᠢᠶᠠᠨ ᠪᠦᠦ ᠪᠤᠷᠤᠭᠤᠯᠠᠭᠠᠴᠢ᠂
11 ᠶᠣᠬᠣᠸᠠ ᠳ᠋ᠠᠸᠢᠳ᠋ ᠲᠤ ᠪᠤᠴᠠᠯᠲᠠ ᠦᠭᠡᠢ ᠪᠠᠲᠤ ᠲᠠᠩ᠋ᠭᠠᠷᠢᠭ ᠲᠠᠯᠪᠢᠨ᠄ 《ᠪᠢ ᠪᠡᠶᠡ ᠡᠴᠡ ᠴᠢᠨᠢ ᠭᠠᠷᠬᠤ ᠦᠷᠡ ᠬᠣᠢᠴᠢ ᠶᠢ ᠴᠢᠨᠦ ᠰᠡᠨᠲᠢ ᠳᠤ ᠰᠠᠭᠤᠯᠭᠠᠨᠠ᠂
12 ᠬᠥᠪᠡᠭᠦᠳ ᠴᠢᠨᠢ ᠮᠢᠨᠦ ᠭᠡᠷᠡ ᠶᠢ᠂ ᠮᠢᠨᠦ ᠰᠤᠷᠭᠠᠬᠤ ᠵᠠᠷᠴᠢᠮ ᠢ ᠰᠠᠬᠢᠪᠠᠯ ᠲᠡᠳᠡᠨ ᠦ ᠬᠥᠪᠡᠭᠦᠳ ᠴᠤ ᠴᠢᠨᠦ ᠰᠡᠨᠲᠢ ᠳᠤ ᠦᠶᠡ ᠶᠢᠨ ᠦᠶᠡ ᠳᠦ ᠰᠠᠭᠤᠬᠤ ᠪᠣᠯᠣᠨᠠ》 ᠭᠡᠰᠡᠨ ᠶᠤᠮ᠃
13 ᠤᠴᠢᠷ ᠨᠢ ᠶᠣᠬᠣᠸᠠ ᠽᠢᠶᠣᠨ ᠢ ᠰᠣᠩ᠋ᠭᠣᠭᠰᠠᠨ᠂ ᠲᠡᠭᠦᠨ ᠢ ᠰᠠᠭᠤᠬᠤ ᠭᠠᠵᠠᠷ ᠢᠶᠠᠨ ᠪᠣᠯᠭᠠᠬᠤ ᠶᠢ ᠬᠦᠰᠡᠨ᠄
14 《ᠡᠭᠦᠷᠢᠳᠡ ᠠᠮᠠᠷᠠᠬᠤ ᠭᠠᠵᠠᠷ ᠮᠢᠨᠢ ᠡᠨᠡ ᠡᠭᠦᠨ ᠢ ᠪᠢ ᠬᠦᠰᠡᠭᠰᠡᠨ᠂ ᠪᠢ ᠡ᠊ᠨᠳᠡ ᠰᠠᠭᠤᠨᠠ᠂
15 ᠲᠡᠭᠦᠨ ᠢ ᠪᠢ ᠡᠯᠪᠡᠭ ᠬᠦᠨᠡᠰᠦ ᠪᠡᠷ ᠢᠷᠥᠭᠡᠵᠦ ᠦᠭᠡᠭᠦᠴᠦᠳ ᠢ ᠨᠢ ᠪᠣᠣᠪᠣ ᠪᠠᠷ ᠬᠠᠩ᠋ᠭᠠᠨ
16 ᠲᠠᠬᠢᠯᠴᠢᠳ ᠢ ᠨᠢ ᠠᠪᠤᠷᠠᠯ ᠢᠶᠠᠷ ᠬᠤᠪᠴᠠᠰᠤᠯᠠᠨᠠ ᠦᠨᠡᠨᠴᠢ ᠬᠥᠮᠦᠰ ᠨᠢ ᠪᠠᠶᠠᠷ ᠲᠠᠢ ᠪᠠᠷ ᠬᠠᠰᠬᠢᠷᠤᠨ ᠳᠠᠭᠤᠯᠠᠨᠠ᠂
17 ᠡ᠊ᠨᠳᠡ ᠪᠢ ᠳ᠋ᠠᠸᠢᠳ᠋ ᠤᠨ ᠡᠪᠡᠷ ᠢ ᠤᠷᠭᠤᠭᠤᠯᠤᠨᠠ ᠪᠢ ᠲᠣᠰᠣᠯᠠᠭᠰᠠᠨ ᠨᠢᠭᠡᠨ ᠳᠡᠭᠡᠨ ᠳ᠋ᠧᠩ ᠪᠡᠯᠡᠳᠬᠡᠭᠰᠡᠨ᠂
18 ᠪᠢ ᠳᠠᠢᠰᠤᠨ ᠨᠤᠭᠤᠳ ᠢ ᠨᠢ ᠢᠴᠢᠭᠦᠷᠢ ᠪᠠᠷ ᠬᠤᠪᠴᠠᠰᠤᠯᠠᠬᠤ ᠳᠤ᠂ ᠲᠡᠭᠦᠨ ᠦ ᠲᠢᠲᠢᠮ ᠥᠪᠡᠷ ᠦᠨ ᠬᠢᠨᠢ ᠳᠡᠭᠡᠷᠡ ᠭᠢᠯᠠᠯᠵᠠᠬᠤ ᠪᠣᠯᠣᠨᠠ》 ᠭᠡᠰᠡᠨ ᠶᠤᠮ᠃