ᠳᠠᠭᠤᠯᠠᠯ ᠵᠠᠭᠤ ᠭᠤᠴᠢ ᠶᠢᠰᠦ
ᠪᠦᠭᠦᠳᠡ ᠶᠢ ᠮᠡᠳᠡᠭᠴᠢ ᠪᠤᠷᠬᠠᠨ
ᠳ᠋ᠠᠸᠢᠳ᠋ ᠤᠨ ᠳᠠᠭᠤᠯᠠᠯ᠂ ᠨᠠᠢᠷᠠᠯ ᠳᠠᠭᠤᠤ ᠶᠢᠨ ᠤᠳᠤᠷᠢᠳᠤᠭᠠᠴᠢ ᠳᠤ᠃
1 ᠶᠣᠬᠣᠸᠠ᠂ ᠲᠠ ᠨᠠᠮᠠᠶᠢ ᠰᠢᠯᠭᠠᠵᠤ ᠦᠵᠡᠭᠰᠡᠨ᠂ ᠲᠠ ᠨᠠᠮᠠᠶᠢ ᠮᠡᠳᠡᠳᠡᠭ
2 ᠰᠠᠭᠤᠵᠤ ᠪᠣᠰᠬᠤ ᠶᠢ ᠮᠢᠨᠢ ᠲᠠ ᠮᠡᠳᠡᠳᠡᠭ ᠰᠠᠨᠠᠭᠠ ᠶᠢ ᠮᠢᠨᠢ ᠠᠯᠤᠰ ᠠᠴᠠ ᠴᠤ ᠣᠢᠯᠠᠭᠠᠳᠠᠭ
3 ᠬᠥᠳᠡᠯᠬᠦ ᠶᠢ ᠮᠢᠨᠢ ᠴᠤ᠂ ᠬᠡᠪᠲᠡᠬᠦ ᠶᠢ ᠮᠢᠨᠢ ᠴᠤ ᠲᠠ ᠨᠢᠭᠲᠠᠯᠠᠳᠠᠭ ᠶᠠᠪᠤᠳᠠᠯ ᠪᠣᠯᠭᠠᠨ ᠳᠤ ᠮᠢᠨᠢ ᠲᠠ ᠳᠠᠳᠤᠭᠰᠠᠨ ᠪᠠᠢᠳᠠᠭ
4 ᠬᠠᠷᠠ᠂ ᠦᠭᠡ ᠬᠡᠯᠡ ᠳᠡᠭᠡᠷᠡ ᠮᠢᠨᠢ ᠪᠠᠢᠬᠤ ᠳᠤ ᠶᠣᠬᠣᠸᠠ ᠲᠠ ᠪᠦᠭᠦᠳᠡ ᠶᠢ ᠮᠡᠳᠡᠳᠡᠭ
5 ᠲᠠ ᠨᠠᠮᠠᠶᠢ ᠠᠷᠤ ᠡᠮᠦᠨᠡᠭᠦᠷ ᠮᠢᠨᠢ ᠬᠦᠷᠢᠶᠡᠯᠡᠵᠦ ᠮᠢᠨᠦ ᠳᠡᠭᠡᠷᠡ ᠮᠤᠲᠤᠷ ᠢᠶᠠᠨ ᠲᠠᠯᠪᠢᠭᠰᠠᠨ ᠪᠠᠢᠳᠠᠭ᠃
6 ᠡᠢᠮᠦ ᠮᠡᠳᠡᠯᠭᠡ ᠨᠢ ᠨᠠᠳᠠ ᠳᠤ ᠭᠠᠢᠬᠠᠮᠰᠢᠭᠲᠠᠢ᠂ ᠮᠢᠨᠦ ᠬᠦᠷᠴᠦ ᠴᠢᠳᠠᠰᠢ ᠦᠭᠡᠢ ᠥᠨᠳᠥᠷ ᠶᠤᠮ᠃
7 ᠲᠠᠨ ᠤ ᠰᠦᠨᠡᠰᠦᠨ ᠡᠴᠡ ᠪᠢ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠬᠤ ᠪᠤᠢ︖ ᠲᠠᠨ ᠤ ᠣᠷᠣᠰᠢᠬᠤᠢ ᠠᠴᠠ ᠪᠢ ᠬᠠᠮᠢᠭᠠᠰᠢ ᠪᠠᠨ ᠳᠤᠲᠠᠭᠠᠬᠤ ᠪᠤᠢ︖
8 ᠲᠩᠷᠢ ᠳᠤ ᠭᠠᠷᠤᠭᠰᠠᠨ ᠴᠤ ᠲᠠ ᠲᠡᠨᠳᠡ᠂ ᠦᠬᠦᠭᠰᠡᠳ ᠦᠨ ᠣᠷᠣᠨ ᠳᠤ ᠣᠷᠣ ᠪᠠᠨ ᠵᠠᠰᠠᠭᠰᠠᠨ ᠴᠤ ᠲᠠ ᠲᠡᠨᠳᠡ ᠪᠠᠢᠳᠠᠭ᠂
9 ᠦᠷ ᠦᠨ ᠭᠡᠭᠡ ᠪᠡᠷ ᠵᠢᠭᠦᠷ ᠪᠣᠯᠭᠠᠨ ᠳᠠᠯᠠᠢ ᠶᠢᠨ ᠠᠳᠠᠭ ᠲᠤ ᠰᠠᠭᠤᠭᠰᠠᠨ ᠴᠤ
10 ᠲᠠᠨ ᠤ ᠮᠤᠲᠤᠷ ᠲᠡᠨᠳᠡ ᠴᠤ ᠨᠠᠮᠠᠶᠢ ᠬᠥᠲᠥᠯᠥᠨᠡ ᠲᠠᠨ ᠤ ᠪᠠᠷᠠᠭᠤᠨ ᠮᠤᠲᠤᠷ ᠨᠠᠮᠠᠶᠢ ᠴᠢᠩᠭ᠍ᠠ ᠪᠠᠷᠢᠨᠠ᠂
11 ᠬᠡᠳᠦᠢᠪᠡᠷ ᠪᠢ 《ᠲᠠᠰ ᠬᠠᠷᠠᠩ᠋ᠭᠤᠢ ᠨᠠᠮᠠᠶᠢ ᠨᠥᠮᠥᠷᠥᠭ ᠲᠣᠭᠣᠷᠢᠭᠰᠠᠨ ᠭᠡᠭᠡ ᠮᠢᠨᠢ ᠰᠥᠨᠢ ᠪᠣᠯᠣᠭ》 ᠭᠡᠰᠡᠨ ᠴᠤ᠂
12 ᠲᠠᠨ ᠤ ᠡᠮᠦᠨᠡ ᠬᠠᠷᠠᠩ᠋ᠭᠤᠢ ᠨᠢ ᠴᠤ ᠬᠠᠷᠠᠩ᠋ᠭᠤᠢ ᠪᠢᠰᠢ ᠰᠥᠨᠢ ᠨᠢ ᠴᠤ ᠡᠳᠦᠷ ᠮᠡᠲᠦ ᠭᠡᠭᠡ ᠲᠠᠢ᠂ ᠭᠡᠷᠡᠯ ᠬᠠᠷᠠᠩ᠋ᠭᠤᠢ ᠨᠢ ᠠᠳᠠᠯᠢᠬᠠᠨ ᠶᠤᠮ᠃
13 ᠲᠠ ᠳᠣᠲᠣᠭᠠᠳᠤ ᠡᠷᠬᠡᠲᠡᠨ ᠢ ᠮᠢᠨᠢ ᠬᠡᠯᠪᠡᠷᠢᠵᠢᠭᠦᠯᠪᠡ ᠡᠬᠡ ᠶᠢᠨ ᠮᠢᠨᠢ ᠬᠡᠪᠡᠯᠢ ᠳᠤ ᠨᠠᠮᠠᠶᠢ ᠤᠷᠠᠯᠠᠪᠠ᠂
14 ᠰᠦᠷᠳᠡᠮᠡᠷ᠂ ᠭᠠᠢᠬᠠᠮᠰᠢᠭᠲᠠᠢ ᠪᠦᠲᠦᠭᠡᠭᠳᠡᠭᠰᠡᠨ ᠳᠡᠭᠡᠨ ᠪᠢ ᠲᠠᠨ ᠳᠤ ᠲᠠᠯᠠᠷᠬᠠᠨᠠ ᠲᠠᠨ ᠤ ᠦᠢᠯᠡᠰ ᠭᠠᠢᠬᠠᠯᠲᠠᠢ ᠭᠡᠳᠡᠭ ᠢ ᠮᠢᠨᠦ ᠰᠦᠨᠡᠰᠦ ᠰᠠᠢᠨ ᠮᠡᠳᠡᠨᠡ᠂
15 ᠨᠢᠭᠤᠴᠠᠬᠠᠨ ᠪᠦᠲᠦᠭᠡᠭᠳᠡᠬᠦ ᠳᠦ ᠮᠢᠨᠢ ᠭᠠᠵᠠᠷ ᠤᠨ ᠭᠦᠨ ᠳᠦ ᠤᠷᠠᠨ ᠢᠶᠠᠷ ᠪᠦᠷᠢᠯᠳᠦᠬᠦ ᠳᠦ ᠮᠢᠨᠢ ᠳᠦᠷᠰᠦ ᠮᠢᠨᠢ ᠲᠠᠨ ᠠᠴᠠ ᠳᠠᠯᠳᠠᠯᠠᠭᠳᠠᠭᠠ ᠦᠭᠡᠢ᠂
16 ᠲᠠᠨ ᠤ ᠮᠡᠯᠮᠡᠢ ᠬᠦᠪᠦᠷᠡᠯ ᠢ ᠮᠢᠨᠢ ᠦᠵᠡᠵᠡᠢ᠂ ᠨᠠᠳᠠ ᠳᠤ ᠨᠣᠭᠳᠠᠭᠰᠠᠨ ᠡᠳᠦᠷ ᠤᠳ ᠤᠨ ᠨᠢᠭᠡᠨ ᠨᠢ ᠴᠤ ᠪᠤᠢ ᠪᠣᠯᠣᠭᠠ ᠦᠭᠡᠢ ᠪᠠᠢᠬᠤ ᠳᠤ᠂ ᠪᠦᠭᠦᠳᠡ ᠲᠠᠨ ᠤ ᠨᠣᠮ ᠳᠤ ᠪᠢᠴᠢᠭᠳᠡᠵᠡᠢ᠂
17 ᠪᠤᠷᠬᠠᠨ᠂ ᠲᠠᠨ ᠤ ᠪᠣᠳᠣᠯ ᠤᠳ ᠨᠠᠳᠠ ᠳᠤ ᠶᠠᠭᠤᠲᠠᠢ ᠨᠠᠨᠳᠢᠨ 29 ᠪᠤᠢ︕ ᠲᠣᠭᠠ ᠨᠢ ᠶᠠᠭᠤᠲᠠᠢ ᠣᠯᠠᠨ ᠪᠤᠢ︕
18 ᠲᠣᠭᠠᠯᠠᠶᠠ ᠭᠡᠰᠡᠨ ᠴᠤ ᠡᠯᠡᠰᠦᠨ ᠡᠴᠡ ᠣᠯᠠᠨ ᠪᠢᠯᠡ᠂ ᠰᠡᠷᠢᠬᠦ ᠳᠡᠭᠡᠨ ᠴᠤ ᠪᠢ ᠲᠠᠨ ᠲᠠᠢ ᠬᠠᠮᠲᠤ ᠪᠠᠢᠨᠠ᠃
19 ᠪᠤᠷᠬᠠᠨ ᠲᠠ ᠪᠤᠷᠤᠭᠤᠲᠠᠨ ᠢ ᠰᠥᠨᠥᠭᠡᠬᠦ ᠴᠤ ᠪᠣᠯᠣᠭᠠᠰᠠᠢ᠂ ᠴᠢᠰᠤ ᠤᠷᠤᠰᠬᠠᠭᠴᠢᠳ ᠡ᠂ ᠨᠠᠳᠠ ᠠᠴᠠ ᠵᠠᠢᠯᠠ᠃
20 ᠲᠡᠳᠡ ᠲᠠᠨ ᠢ ᠮᠠᠭᠤᠯᠠᠵᠤ ᠪᠠᠢᠨᠠ ᠲᠠᠨ ᠤ ᠳᠠᠢᠰᠤᠨ ᠨᠤᠭᠤᠳ ᠲᠠᠨ ᠤ ᠨᠡᠷᠡ ᠶᠢ ᠳᠡᠮᠡᠢ ᠳᠤᠷᠠᠳᠤᠳᠠᠭ᠂
21 ᠶᠣᠬᠣᠸᠠ ᠲᠠᠨ ᠢ ᠵᠢᠭ᠍ᠰᠢᠭ᠍ᠴᠢᠳ ᠢ ᠪᠢ ᠵᠢᠭᠰᠢᠬᠦ ᠦᠭᠡᠢ ᠭᠡᠵᠢ ᠤᠤ︖ ᠲᠠᠨ ᠤ ᠡᠰᠡᠷᠭᠦ ᠪᠣᠰᠣᠭᠴᠢᠳ ᠢ ᠪᠢ ᠵᠢᠪᠡᠭᠦᠴᠡᠬᠦ ᠦᠭᠡᠢ ᠭᠡᠵᠢ ᠤᠤ︖
22 ᠪᠢ ᠲᠡᠳᠡᠨ ᠢ ᠲᠤᠢᠯᠪᠤᠷᠢᠲᠠᠢ ᠪᠠᠷ ᠵᠢᠭ᠍ᠰᠢᠨ ᠵᠢᠭ᠍ᠰᠢᠳᠡᠭ᠂ ᠲᠡᠳᠡᠨ ᠢ ᠳᠠᠢᠰᠤᠨ ᠢᠶᠠᠨ ᠭᠡᠵᠦ ᠲᠣᠭᠠᠴᠠᠨᠠ᠃
23 ᠪᠤᠷᠬᠠᠨ᠂ ᠨᠠᠮᠠᠶᠢ ᠰᠢᠯᠭᠠᠭᠠᠴᠢ᠂ ᠰᠠᠨᠠᠭᠠ ᠶᠢ ᠮᠢᠨᠢ ᠮᠡᠳᠡᠭᠡᠴᠢ ᠨᠠᠮᠠᠶᠢ ᠨᠢᠭᠲᠠᠯᠠᠵᠤ᠂ ᠪᠣᠳᠣᠯ ᠤᠳ ᠢ ᠮᠢᠨᠢ ᠮᠡᠳᠡᠭᠡᠴᠢ
24 ᠮᠢᠨᠦ ᠳᠣᠲᠣᠷᠠ ᠮᠠᠭᠤ ᠶᠠᠪᠤᠳᠠᠯ ᠪᠤᠢ ᠡᠰᠡᠬᠦ ᠶᠢ ᠦᠵᠡᠵᠦ ᠮᠥᠩᠬᠡ ᠶᠢᠨ ᠵᠠᠮ ᠢᠶᠠᠷ ᠨᠠᠮᠠᠶᠢ ᠤᠳᠤᠷᠢᠳᠤᠭᠠᠴᠢ᠃