ᠳᠠᠭᠤᠯᠠᠯ ᠵᠢᠷᠠ ᠶᠢᠰᠦ
ᠪᠡᠷᠬᠡ ᠴᠠᠭ ᠤᠨ ᠭᠤᠶᠤᠯᠲᠠ
ᠳ᠋ᠠᠸᠢᠳ᠋ ᠤᠨ ᠳᠠᠭᠤᠯᠠᠯ᠂ ᠨᠠᠢᠷᠠᠯ ᠳᠠᠭᠤᠤ ᠶᠢᠨ ᠤᠳᠤᠷᠢᠳᠤᠭᠠᠴᠢ ᠳᠤ᠃ 《ᠰᠠᠷᠠᠨᠠ ᠴᠡᠴᠡᠭ》 ᠤᠨ ᠠᠶᠠ ᠳᠡᠭᠡᠷᠡ᠃
1 ᠪᠤᠷᠬᠠᠨ᠂ ᠨᠠᠮᠠᠶᠢ ᠠᠪᠤᠷᠠᠭᠠᠴᠢ ᠤᠰᠤ ᠮᠢᠨᠦ ᠬᠦᠵᠦᠭᠦᠨ ᠳᠦ ᠲᠤᠯᠵᠠᠢ᠃
2 ᠪᠢ ᠵᠣᠭᠰᠣᠵᠤ ᠪᠣᠯᠣᠰᠢ ᠦᠭᠡᠢ ᠭᠦᠨ ᠨᠠᠮᠤᠭ ᠲᠤ ᠵᠢᠪᠪᠦᠯᠡ ᠭᠦᠨ ᠤᠰᠤᠨ ᠳᠤ ᠣᠷᠣᠵᠤ᠂ ᠦᠶᠡᠷ ᠲᠦ ᠠᠪᠲᠠᠯᠠ᠃
3 ᠪᠢ ᠬᠠᠰᠬᠢᠷᠤᠭᠰᠠᠭᠠᠷ ᠪᠠᠢᠭᠠᠳ ᠶᠠᠳᠠᠷᠠᠪᠠ ᠬᠣᠭᠣᠯᠠᠢ ᠮᠢᠨᠢ ᠬᠠᠲᠠᠪᠠ ᠪᠤᠷᠬᠠᠨ ᠢᠶᠠᠨ ᠬᠦᠯᠢᠶᠡᠭᠰᠡᠭᠡᠷ ᠨᠢᠳᠦ ᠮᠢᠨᠢ ᠴᠢᠯᠡᠪᠡ᠃
4 ᠨᠠᠮᠠᠶᠢ ᠰᠢᠯᠲᠠᠭᠠᠨ ᠦᠭᠡᠢ ᠪᠠᠷ ᠦᠵᠡᠨ ᠶᠠᠳᠠᠭᠴᠢᠳ ᠲᠣᠯᠣᠭᠠᠢ ᠶᠢᠨ ᠮᠢᠨᠢ ᠦᠰᠦᠨ ᠡᠴᠡ ᠴᠤ ᠣᠯᠠᠨ᠂ ᠨᠠᠮᠠᠶᠢ ᠤᠰᠠᠳᠬᠠᠬᠤ ᠭᠡᠭᠴᠢᠳ ᠪᠢᠷᠠ ᠲᠠᠢ᠂ ᠨᠠᠮᠠᠶᠢ ᠳᠠᠢᠰᠤᠩᠨᠠᠭᠴᠢᠳ ᠪᠠᠴᠢ ᠲᠠᠢ᠂ ᠪᠢ ᠬᠤᠯᠠᠭᠠᠢᠯᠠᠭᠠ ᠦᠭᠡᠢ ᠵᠦᠢᠯ ᠢᠶᠠᠨ ᠴᠤ ᠪᠤᠴᠠᠭᠠᠵᠤ ᠥᠭᠬᠦ ᠶᠣᠰᠣᠲᠠᠢ ᠪᠣᠯᠵᠤ ᠪᠠᠢᠨᠠ᠃
5 ᠪᠤᠷᠬᠠᠨ᠂ ᠮᠢᠨᠦ ᠮᠤᠩ᠋ᠬᠠᠭᠯᠠᠯ ᠢ ᠲᠠ ᠮᠡᠳᠡᠳᠡᠭ ᠮᠢᠨᠦ ᠪᠤᠷᠤᠭᠤ ᠲᠠᠨ ᠠᠴᠠ ᠨᠢᠭᠤᠭᠳᠠᠰᠢ ᠦᠭᠡᠢ᠃
6 ᠠᠤᠭᠠ ᠬᠦᠴᠦᠲᠦ ᠡᠵᠡᠨ ᠶᠣᠬᠣᠸᠠ ᠲᠠᠨ ᠳᠤ ᠨᠠᠢᠳᠠᠭᠴᠢᠳ ᠨᠠᠳᠠ ᠠᠴᠠ ᠪᠣᠯᠵᠤ ᠢᠴᠢᠭᠦᠷᠢ ᠳᠤ ᠪᠦᠦ ᠣᠷᠣᠭ ᠢᠰᠷᠧᠯ ᠤᠨ ᠪᠤᠷᠬᠠᠨ᠂ ᠲᠠᠨ ᠢ ᠬᠠᠢᠭᠴᠢᠳ ᠨᠠᠳᠠ ᠠᠴᠠ ᠪᠣᠯᠵᠤ ᠰᠢᠪᠰᠢᠭ ᠪᠦᠦ ᠪᠣᠯᠣᠭ᠃
7 ᠤᠴᠢᠷ ᠨᠢ ᠪᠢ ᠲᠠᠨ ᠤ ᠲᠥᠯᠥᠭᠡ ᠳᠣᠷᠣᠮᠵᠢᠯᠠᠭᠤᠯᠪᠠ ᠨᠢᠭᠤᠷ ᠢ ᠮᠢᠨᠢ ᠰᠢᠪᠰᠢᠭ ᠪᠦᠷᠬᠦᠪᠡ᠃
8 ᠪᠢ ᠠᠬᠠ ᠳᠡᠭᠦᠦᠰ ᠦᠨ ᠢᠶᠠᠨ ᠬᠤᠪᠢ ᠳᠤ ᠴᠠᠭᠠᠴᠢᠨ ᠪᠣᠯᠵᠤ ᠡᠬᠡ ᠶᠢᠨ ᠢᠶᠠᠨ ᠬᠥᠪᠡᠭᠦᠳ ᠲᠦ ᠭᠠᠳᠠᠨᠠ ᠶᠢᠨ ᠬᠥᠮᠦᠨ ᠪᠣᠯᠪᠠ᠃
9 ᠲᠠᠨ ᠤ ᠥᠷᠭᠥᠭᠡᠨ ᠦ ᠲᠥᠯᠥᠭᠡᠬᠢ ᠬᠠᠯᠠᠭᠤᠨ ᠰᠡᠳᠬᠢᠯ ᠨᠠᠮᠠᠶᠢ ᠵᠠᠯᠭᠢᠪᠠ ᠲᠠᠨ ᠢ ᠳᠣᠷᠣᠮᠵᠢᠯᠠᠭᠴᠢᠳ ᠤᠨ ᠳᠣᠷᠣᠮᠵᠢᠯᠠᠯ ᠨᠠᠳᠠ ᠳᠤ ᠪᠠᠭᠤᠵᠠᠢ᠃
10 ᠪᠠᠴᠠᠭ ᠪᠠᠷᠢᠨ ᠤᠬᠢᠯᠠᠬᠤ ᠳᠤ ᠮᠢᠨᠢ ᠲᠡᠳᠡ ᠨᠠᠮᠠᠶᠢ ᠳᠣᠷᠣᠮᠵᠢᠯᠠᠪᠠ᠃
11 ᠲᠠᠭᠠᠷ ᠤᠨ ᠬᠤᠪᠴᠠᠰᠤ ᠡᠮᠦᠰᠬᠦ ᠳᠦ ᠮᠢᠨᠢ ᠲᠡᠳᠡ ᠨᠠᠮᠠᠶᠢ ᠳᠣᠭᠣᠭᠢᠯᠠᠪᠠ᠃
12 ᠪᠢ ᠬᠠᠭᠠᠯᠭᠠᠨ ᠤ ᠳᠡᠷᠭᠡᠳᠡ ᠰᠠᠭᠤᠭᠴᠢᠳ ᠤᠨ ᠠᠮᠠᠨ ᠤ ᠵᠤᠭᠠ ᠪᠣᠯᠵᠤ ᠰᠣᠭᠲᠣᠭᠤᠴᠤᠳ ᠤᠨ ᠳᠠᠭᠤᠤ ᠪᠣᠯᠪᠠ᠃
13 ᠶᠣᠬᠣᠸᠠ᠂ ᠬᠠᠷᠢᠨ ᠪᠢ ᠲᠠᠨ ᠳᠤ ᠳᠠᠭᠠᠳᠬᠠᠶᠠ᠂ ᠪᠤᠷᠬᠠᠨ᠂ ᠲᠠᠭᠠᠯᠠᠮᠵᠢᠲᠤ ᠴᠠᠭ ᠲᠠᠭᠠᠨ᠂ ᠦᠯᠡᠮᠵᠢ ᠬᠠᠢᠷᠠ ᠪᠠᠷ ᠢᠶᠠᠨ᠂ ᠦᠨᠡᠨ ᠠᠪᠤᠷᠠᠯ ᠢᠶᠠᠷ ᠢᠶᠠᠨ ᠨᠠᠳᠠ ᠳᠤ ᠬᠠᠷᠢᠭᠤᠯᠤᠭᠠᠴᠢ᠃
14 ᠨᠠᠮᠤᠭ ᠠᠴᠠ ᠲᠠᠲᠠᠨ ᠭᠠᠷᠭᠠᠭᠠᠴᠢ᠂ ᠨᠠᠮᠠᠶᠢ ᠲᠡᠨᠳᠡ ᠪᠦᠦ ᠵᠢᠪᠪᠦᠭᠦᠯᠦᠭᠡᠴᠢ᠂ ᠨᠠᠮᠠᠶᠢ ᠥᠰᠲᠡᠨ ᠨᠦᠭᠦᠳ ᠡᠴᠡ ᠮᠢᠨᠢ᠂ ᠤᠰᠤᠨ ᠤ ᠭᠦᠨ ᠡᠴᠡ ᠭᠡᠲᠦᠯᠭᠡᠭᠡᠴᠢ᠃
15 ᠨᠠᠮᠠᠶᠢ ᠦᠶᠡᠷ ᠤᠰᠤᠨ ᠳᠤ ᠪᠦᠦ ᠠᠪᠲᠠᠭᠤᠯᠤᠭᠠᠴᠢ᠂ ᠭᠦᠨ ᠤᠰᠤ ᠨᠠᠮᠠᠶᠢ ᠪᠦᠦ ᠵᠠᠯᠭᠢᠭ ᠨᠦᠬᠡᠨ ᠦ ᠠᠮᠠ ᠮᠢᠨᠦ ᠳᠡᠭᠡᠷᠡ ᠪᠦᠦ ᠬᠠᠮᠬᠢᠭᠳᠠᠭ᠃
16 ᠲᠠᠨ ᠤ ᠦᠨᠡᠨ ᠬᠠᠢᠷᠠ ᠰᠠᠢᠨ᠂ ᠨᠠᠳᠠ ᠳᠤ ᠬᠠᠷᠢᠭᠤᠯᠤᠭᠠᠴᠢ᠂ ᠶᠣᠬᠣᠸᠠ᠂ ᠦᠯᠡᠮᠵᠢ ᠨᠢᠭᠦᠯᠡᠰᠦᠯ ᠢᠶᠡᠷ ᠢᠶᠠᠨ ᠨᠠᠳᠠ ᠤᠷᠤᠭᠤ ᠡᠷᠭᠢᠭᠡᠴᠢ᠂
17 ᠵᠠᠷᠤᠴᠠ ᠠᠴᠠ ᠪᠠᠨ ᠨᠢᠭᠤᠷ ᠢᠶᠠᠨ ᠪᠦᠦ ᠨᠢᠭᠤᠭᠠᠴᠢ ᠨᠠᠳᠠ ᠳᠤ ᠲᠦᠷᠭᠡᠨ ᠬᠠᠷᠢᠭᠤᠯᠤᠭᠠᠴᠢ᠂ ᠪᠢ ᠵᠣᠪᠠᠯᠠᠩ ᠳᠤᠮᠳᠠ ᠪᠠᠢᠨᠠ᠃
18 ᠳᠥᠭᠥᠨ ᠢᠷᠡᠵᠦ ᠨᠠᠮᠠᠶᠢ ᠭᠡᠲᠦᠯᠭᠡᠵᠦ᠂ ᠳᠠᠢᠰᠤᠨ ᠨᠤᠭᠤᠳ ᠠᠴᠠ ᠨᠠᠮᠠᠶᠢ ᠵᠣᠯᠢᠭᠠᠴᠢ︕
19 ᠮᠢᠨᠦ ᠠᠮᠰᠠᠭᠰᠠᠨ ᠳᠣᠷᠣᠮᠵᠢᠯᠠᠯ᠂ ᠢᠴᠢᠭᠦᠷᠢ ᠪᠣᠯᠣᠨ ᠳᠣᠭᠣᠭᠢ ᠲᠣᠬᠣᠭᠤ ᠶᠢ ᠲᠠ ᠮᠡᠳᠡᠨᠡ᠂ ᠮᠢᠨᠦ ᠪᠦᠬᠦ ᠳᠠᠢᠰᠤᠨ ᠲᠠᠨ ᠤ ᠡᠮᠦᠨᠡ ᠪᠠᠢᠨᠠ᠃
20 ᠳᠣᠷᠣᠮᠵᠢᠯᠠᠯ ᠠᠴᠠ ᠪᠣᠯᠵᠤ ᠵᠢᠷᠦᠬᠡ ᠮᠢᠨᠢ ᠡᠮᠲᠡᠷᠡᠵᠦ ᠪᠢ ᠴᠥᠬᠥᠷᠡᠭᠰᠡᠨ ᠪᠠᠢᠨᠠ᠂ ᠥᠷᠥ ᠡᠪᠡᠳᠦᠭᠴᠢ ᠶᠢ ᠬᠠᠢᠭᠰᠠᠨ ᠴᠤ ᠠᠯᠠᠭᠠ ᠲᠠᠢᠳᠬᠤᠷᠠᠭᠤᠯᠤᠭᠴᠢ ᠶᠢ ᠡᠷᠢᠭᠰᠡᠨ ᠴᠤ ᠣᠯᠳᠠᠬᠤ ᠦᠭᠡᠢ᠃
21 ᠲᠡᠳᠡ ᠬᠦᠨᠡᠰᠦᠨ ᠦ ᠣᠷᠣᠨ ᠳᠤ ᠨᠠᠳᠠ ᠳᠤ ᠰᠥᠰᠥ ᠥᠭᠪᠡ ᠴᠠᠩ᠋ᠭᠠᠬᠤ ᠳᠤ ᠮᠢᠨᠢ ᠼᠤᠤ ᠤᠤᠭᠤᠯᠭᠠᠪᠠ᠃
22 ᠲᠡᠳᠡᠨ ᠦ ᠡᠮᠦᠨᠡᠬᠢ ᠰᠢᠷᠡᠭᠡ ᠤᠷᠠᠬᠠ ᠪᠣᠯᠣᠭ ᠲᠡᠳᠡᠨ ᠦ ᠠᠮᠤᠭᠤᠯᠠᠩ ᠴᠠᠯᠮᠠ ᠪᠣᠯᠣᠭ
23 ᠨᠢᠳᠦ ᠨᠢ ᠬᠠᠷᠠᠩ᠋ᠭᠤᠢᠯᠠᠵᠤ ᠬᠠᠷᠠᠭᠠ ᠦᠭᠡᠢ ᠪᠣᠯᠣᠭ ᠨᠢᠷᠤᠭᠤ ᠨᠢ ᠦᠷᠭᠦᠯᠵᠢ ᠴᠡᠴᠡᠷᠡᠬᠦ ᠪᠣᠯᠣᠭ
24 ᠬᠢᠯᠢᠩ ᠢᠶᠠᠨ ᠲᠡᠳᠡᠨ ᠳᠡᠭᠡᠷᠡ ᠠᠰᠬᠠᠭᠠᠴᠢ ᠰᠢᠷᠦᠭᠦᠨ ᠠᠭᠤᠷ ᠲᠠᠨᠢ ᠲᠡᠳᠡᠨ ᠳᠦ ᠬᠥᠷᠥᠭ᠂
25 ᠣᠷᠣᠨ ᠭᠡᠷ ᠨᠢ ᠡᠵᠡᠭᠦᠢᠷᠡᠵᠦ ᠮᠠᠢᠬᠠᠨ ᠨᠤᠭᠤᠳ ᠲᠤᠨᠢ ᠰᠠᠭᠤᠬᠤ ᠬᠥᠮᠦᠨ ᠦᠭᠡᠢ ᠪᠣᠯᠣᠭ᠃
26 ᠲᠡᠳᠡ ᠲᠠᠨ ᠤ ᠭᠡᠰᠬᠡᠭᠰᠡᠨ ᠬᠥᠮᠦᠨ ᠢ ᠬᠠᠪᠴᠢᠪᠠ ᠲᠠᠨ ᠤ ᠰᠢᠷᠬᠠᠲᠤᠭᠤᠯᠤᠭᠰᠠᠨ ᠬᠥᠮᠦᠨ ᠦ ᠵᠣᠪᠠᠯᠠᠩ ᠤᠨ ᠲᠠᠯᠠ ᠪᠠᠷ ᠶᠠᠷᠢᠯᠴᠠᠪᠠ᠃
27 ᠶᠠᠯᠠ ᠳᠡᠭᠡᠷᠡ ᠨᠢ ᠶᠠᠯᠠ ᠨᠡᠮᠡᠭᠡᠴᠢ ᠠᠪᠤᠷᠠᠯ ᠳᠠᠭᠠᠨ ᠲᠡᠳᠡᠨ ᠢ ᠪᠦᠦ ᠣᠷᠣᠭᠤᠯᠤᠭᠠᠴᠢ᠃
28 ᠲᠡᠳᠡ ᠠᠮᠢ ᠶᠢᠨ ᠨᠣᠮ ᠠᠴᠠ ᠠᠷᠴᠢᠭᠳᠠᠭ ᠵᠥᠪᠲᠡᠨ ᠲᠡᠢ ᠬᠠᠮᠲᠤ ᠪᠦᠦ ᠪᠢᠴᠢᠭᠳᠡᠭ᠃
29 ᠬᠠᠷᠢᠨ ᠪᠢ ᠳᠣᠷᠣᠢ ᠪᠠᠢᠨᠠ᠂ ᠡᠪᠡᠳᠴᠢᠲᠡᠢ ᠪᠠᠢᠨᠠ᠂ ᠪᠤᠷᠬᠠᠨ᠂ ᠠᠪᠤᠷᠠᠯ ᠲᠠᠨᠢ ᠨᠠᠮᠠᠶᠢ ᠥᠨᠳᠥᠷ ᠲᠦ ᠡᠷᠭᠦᠬᠦ ᠪᠣᠯᠲᠤᠭᠠᠢ᠃
30 ᠪᠢ ᠪᠤᠷᠬᠠᠨ ᠤ ᠨᠡᠷᠡ ᠶᠢ ᠳᠠᠭᠤᠤ ᠪᠠᠷ ᠮᠠᠭᠲᠠᠵᠤ ᠲᠠᠯᠠᠷᠬᠠᠯ ᠢᠶᠠᠷ ᠲᠡᠭᠦᠨ ᠢ ᠳᠡᠭᠡᠳᠦᠯᠡᠨᠡ᠃
31 ᠢᠩᠭᠢᠬᠦ ᠨᠢ ᠶᠣᠬᠣᠸᠠ ᠳᠤ ᠦᠬᠡᠷ ᠡᠴᠡ ᠢᠯᠡᠭᠦᠦ ᠪᠡᠷ ᠡᠪᠡᠷ ᠲᠤᠭᠤᠷᠠᠢ ᠲᠠᠢ ᠪᠤᠬᠠᠨ ᠠᠴᠠ ᠢᠯᠡᠭᠦᠦ ᠪᠡᠷ ᠲᠠᠭᠠᠰᠢᠶᠠᠭᠳᠠᠨᠠ᠃
32 ᠳᠣᠷᠣᠢ ᠬᠥᠮᠦᠰ ᠡᠭᠦᠨ ᠢ ᠬᠠᠷᠠᠭᠠᠳ ᠪᠠᠶᠠᠷᠯᠠᠨᠠ ᠪᠤᠷᠬᠠᠨ ᠢ ᠬᠠᠢᠭᠴᠢᠳ ᠡ᠂ ᠵᠢᠷᠦᠬᠡ ᠴᠢᠨᠢ ᠰᠡᠷᠭᠦᠬᠦ ᠪᠣᠯᠲᠤᠭᠠᠢ᠃
33 ᠶᠣᠬᠣᠸᠠ ᠶᠠᠳᠠᠭᠤᠰ ᠤᠨ ᠬᠢ ᠶᠢ ᠰᠣᠨᠣᠰᠴᠤ ᠪᠠᠢᠨᠠ ᠲᠡᠷᠡ ᠣᠯᠵᠠᠯᠠᠭᠳᠠᠭᠰᠠᠨ ᠠᠷᠠᠳ ᠲᠦᠮᠡᠨ ᠢᠶᠡᠨ ᠳᠣᠣᠷᠠᠰᠢᠶᠠᠳᠠᠭ ᠦᠭᠡᠢ᠃
34 ᠲᠩᠷᠢ ᠪᠠ ᠭᠠᠵᠠᠷ ᠳᠠᠯᠠᠢ ᠪᠠ ᠲᠡᠳᠡᠭᠡᠷ ᠦᠨ ᠳᠣᠲᠣᠷᠠᠬᠢ ᠬᠥᠳᠡᠯᠵᠦ ᠪᠤᠢ ᠪᠦᠬᠦᠨ ᠲᠡᠭᠦᠨ ᠢ ᠮᠠᠭᠲᠠᠬᠤ ᠪᠣᠯᠲᠤᠭᠠᠢ᠃
35 ᠤᠴᠢᠷ ᠨᠢ ᠪᠤᠷᠬᠠᠨ ᠽᠢᠶᠣᠨ ᠢ ᠠᠪᠤᠷᠠᠵᠤ᠂ ᠶᠦᠳᠠ ᠶᠢᠨ ᠬᠣᠲᠠ ᠨᠤᠭᠤᠳ ᠢ ᠪᠣᠰᠬᠠᠨᠠ ᠠᠷᠠᠳ ᠲᠦᠮᠡᠨ ᠨᠢ ᠲᠡᠳᠡᠭᠡᠷ ᠢ ᠡᠵᠡᠮᠰᠢᠵᠦ ᠲᠡᠨᠳᠡ ᠰᠠᠭᠤᠷᠢᠰᠢᠬᠤ ᠪᠣᠯᠣᠨᠠ᠃
36 ᠵᠠᠷᠤᠴᠠ ᠨᠠᠷ ᠤᠨ ᠬᠢᠨᠢ ᠦᠷᠡ ᠤᠳᠤᠮ ᠡᠭᠦᠨ ᠢ ᠥᠪᠯᠡᠵᠦ ᠨᠡᠷᠡ ᠶᠢ ᠨᠢ ᠬᠠᠢᠷᠠᠯᠠᠭᠴᠢᠳ ᠲᠡᠨᠳᠡ ᠰᠠᠭᠤᠷᠢᠰᠢᠬᠤ ᠪᠣᠯᠣᠨᠠ᠃