ᠳᠠᠭᠤᠯᠠᠯ ᠲᠠᠪᠢ
ᠵᠥᠪ ᠡᠷᠭᠦᠯ
ᠠᠰᠠᠹ ᠤᠨ ᠳᠠᠭᠤᠯᠠᠯ᠃
1 ᠪᠤᠷᠬᠠᠳ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠨᠠᠷᠠ ᠮᠠᠨᠳᠤᠬᠤ ᠠᠴᠠ ᠵᠢᠷᠭᠠᠬᠤ ᠬᠦᠷᠲᠡᠯᠡ ᠭᠠᠵᠠᠷ ᠤᠨ ᠰᠠᠭᠤᠭᠠᠯᠢᠴᠢᠳ ᠢ ᠳᠠᠭᠤᠳᠠᠪᠠ᠃
2 ᠦᠵᠡᠰᠬᠦᠯᠡᠩ ᠲᠡᠭᠦᠰ ᠽᠢᠶᠣᠨ ᠠᠴᠠ ᠪᠤᠷᠬᠠᠨ ᠭᠡᠷᠡᠯ ᠢᠶᠡᠨ ᠰᠠᠴᠤᠷᠠᠭᠤᠯᠤᠯᠠ᠂
3 ᠪᠢᠳᠡᠨ ᠦ ᠪᠤᠷᠬᠠᠨ ᠢᠷᠡᠨᠡ᠂ ᠬᠠᠷᠢᠨ ᠳᠠᠭᠤ ᠦᠭᠡᠢ ᠢᠷᠡᠬᠦ ᠪᠢᠰᠢ᠂ ᠡᠮᠦᠨᠡ ᠲᠠᠯᠠ ᠳᠠᠭᠠᠨ ᠵᠠᠯᠭᠢᠭᠴᠢ ᠭᠠᠯ ᠲᠠᠢ ᠡᠷᠭᠢᠨ ᠲᠣᠭᠣᠷᠢᠨ ᠳᠠᠭᠠᠨ ᠬᠦᠴᠦᠲᠦ ᠰᠢᠭᠤᠷᠭᠠ ᠲᠠᠢ᠂
4 ᠲᠡᠷᠡ ᠠᠷᠠᠳ ᠲᠦᠮᠡᠨ ᠢᠶᠡᠨ ᠰᠢᠭᠦᠬᠦ ᠪᠡᠷ ᠳᠡᠭᠡᠷᠡ ᠲᠩᠷᠢ ᠪᠣᠯᠣᠨ ᠳᠡᠯᠡᠬᠡᠢ ᠶᠢ ᠳᠠᠭᠤᠳᠠᠵᠤ᠄
5 《ᠨᠠᠳᠠ ᠲᠠᠢ ᠲᠠᠬᠢᠯ ᠢᠶᠠᠷ ᠭᠡᠷᠡ ᠪᠠᠢᠭᠤᠯᠤᠭᠰᠠᠨ ᠦᠨᠡᠨᠴᠢ ᠬᠥᠮᠦᠰ ᠢ ᠮᠢᠨᠢ ᠨᠠᠳᠠ ᠤᠷᠤᠭᠤ ᠴᠤᠭᠯᠠᠭᠤᠯ》 ᠭᠡᠨᠡ᠃
6 ᠪᠤᠷᠬᠠᠨ ᠥᠪᠡᠷ ᠢᠶᠡᠨ ᠰᠢᠭᠦᠭᠴᠢ ᠪᠣᠯᠪᠠ ᠲᠩᠷᠢ ᠵᠥᠪᠲᠦ ᠶᠣᠰᠣ ᠶᠢ ᠨᠢ ᠵᠠᠷᠯᠠᠯᠠ᠃
ᠰᠧᠯᠠ
7 《ᠠᠷᠠᠳ ᠲᠦᠮᠡᠨ ᠮᠢᠨᠢ᠂ ᠰᠣᠨᠣᠰᠣᠭᠲᠤᠨ᠂ ᠪᠢ ᠶᠠᠷᠢᠶᠠ᠃ ᠢᠰᠷᠧᠯ ᠡ᠂ ᠪᠢ ᠴᠢᠨᠦ ᠡᠰᠡᠷᠭᠦ ᠭᠡᠷᠡᠴᠢᠯᠡᠶᠡ ᠪᠢ ᠪᠣᠯ ᠪᠤᠷᠬᠠᠨ᠂ ᠴᠢᠨᠦ ᠪᠤᠷᠬᠠᠨ᠃
8 ᠲᠠᠬᠢᠯ ᠤᠨ ᠴᠢᠨᠢ ᠲᠠᠯᠠ ᠪᠠᠷ ᠪᠢ ᠴᠢᠮᠠᠶᠢ ᠵᠢᠮᠡᠯᠡᠬᠦ ᠦᠭᠡᠢ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠤᠳ ᠴᠢᠨᠢ ᠦᠷᠭᠦᠯᠵᠢ ᠮᠢᠨᠦ ᠡᠮᠦᠨᠡ ᠪᠤᠢ᠃
9 ᠪᠢ ᠭᠡᠷ ᠡᠴᠡ ᠴᠢᠨᠢ ᠪᠤᠬᠠ ᠶᠢ ᠬᠠᠰᠢᠶᠠᠨ ᠠᠴᠠ ᠴᠢᠨᠢ ᠤᠬᠤᠨᠠ ᠶᠢ ᠠᠪᠬᠤ ᠦᠭᠡᠢ᠃
10 ᠤᠴᠢᠷ ᠨᠢ ᠣᠢ ᠶᠢᠨ ᠠᠮᠢᠲᠠᠨ ᠪᠦᠭᠦᠳᠡ᠂ ᠮᠢᠩ᠋ᠭᠠᠨ ᠲᠣᠯᠣᠭᠠᠳ ᠤᠨ ᠮᠠᠯ ᠰᠦᠷᠦᠭ ᠮᠢᠨᠦᠬᠢ ᠶᠤᠮ᠃
11 ᠠᠭᠤᠯᠠ ᠶᠢᠨ ᠰᠢᠪᠠᠭᠤ ᠪᠣᠯᠭᠠᠨ ᠢ ᠪᠢ ᠲᠠᠨᠢᠨᠠ᠂ ᠬᠡᠭᠡᠷᠡ ᠲᠠᠯᠠ ᠳᠤ ᠬᠥᠳᠡᠯᠳᠡᠭ ᠪᠦᠬᠦᠨ ᠮᠢᠨᠦᠬᠢ ᠶᠤᠮ᠃
12 ᠥᠯᠥᠰᠥᠭᠰᠡᠨ ᠴᠤ ᠪᠢ ᠴᠢᠮᠠ ᠳᠤ ᠬᠡᠯᠡᠬᠦ ᠦᠭᠡᠢ᠂ ᠳᠡᠯᠡᠬᠡᠢ ᠬᠢᠭᠡᠳ ᠲᠡᠭᠦᠨ ᠢ ᠳᠦᠭᠦᠷᠭᠡᠳᠡᠭ ᠪᠦᠬᠦᠨ ᠮᠢᠨᠦᠬᠢ ᠶᠤᠮ᠃
13 ᠪᠢ ᠪᠤᠬᠠ ᠶᠢᠨ ᠮᠢᠬᠠ ᠶᠢ ᠢᠳᠡᠵᠦ ᠤᠬᠤᠨᠠ ᠶᠢᠨ ᠴᠢᠰᠤ ᠶᠢ ᠤᠤᠭᠤᠨᠠ ᠭᠡᠵᠢ ᠤᠤ︖
14 ᠪᠤᠷᠬᠠᠨ ᠳᠤ ᠲᠠᠯᠠᠷᠬᠠᠯ ᠤᠨ ᠲᠠᠬᠢᠯ ᠢ ᠡᠷᠭᠦ᠂ ᠬᠠᠮᠤᠭ ᠤᠨ ᠳᠡᠭᠡᠳᠦ ᠨᠢᠭᠡᠨ ᠳᠦ ᠲᠠᠩ᠋ᠭᠠᠷᠢᠭᠯᠠᠭᠰᠠᠨ ᠢᠶᠠᠨ ᠪᠡᠶᠡᠯᠡᠭᠦᠯ᠃
15 ᠪᠡᠷᠬᠡ ᠡᠳᠦᠷ ᠲᠦ ᠨᠠᠮᠠᠶᠢ ᠳᠠᠭᠤᠳᠠ᠂ ᠪᠢ ᠴᠢᠮᠠᠶᠢ ᠭᠡᠲᠦᠯᠭᠡᠵᠦ ᠴᠢ ᠨᠠᠮᠠᠶᠢ ᠠᠯᠳᠠᠷᠰᠢᠭᠤᠯᠬᠤ ᠪᠣᠯᠣᠨᠠ᠃》
16 ᠬᠠᠷᠢᠨ ᠪᠤᠷᠬᠠᠨ ᠪᠤᠷᠤᠭᠤᠲᠠᠨ ᠳᠤ ᠠᠢᠯᠠᠳᠬᠤ ᠳᠠᠭᠠᠨ᠄ 《ᠴᠢ ᠶᠠᠮᠠᠷ ᠡᠷᠬᠡ ᠪᠡᠷ ᠮᠢᠨᠦ ᠵᠠᠷᠯᠢᠭ ᠢ ᠲᠠᠢᠯᠪᠤᠷᠢᠯᠠᠵᠤ ᠭᠡᠷᠡ ᠶᠢ ᠮᠢᠨᠢ ᠠᠮᠠᠨ ᠳᠠᠭᠠᠨ ᠠᠪᠴᠤ ᠶᠠᠪᠤᠨᠠ ᠪᠤᠢ︖
17 ᠦᠨᠡᠨ ᠳᠡᠭᠡᠨ ᠴᠢ ᠵᠢᠭᠠᠪᠤᠷᠢ ᠶᠢ ᠮᠢᠨᠢ ᠵᠢᠭ᠍ᠰᠢᠨ ᠦᠭᠡᠰ ᠢ ᠮᠢᠨᠢ ᠠᠷᠤᠨᠰᠢ ᠪᠠᠨ ᠬᠠᠶᠠᠳᠠᠭ᠂
18 ᠬᠤᠯᠠᠭᠠᠢᠴᠢ ᠶᠢ ᠬᠠᠷᠠᠪᠠᠯ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠶᠠᠰᠴᠤ ᠵᠠᠪᠬᠠᠢᠷᠠᠭᠴᠢᠳ ᠲᠠᠢ ᠬᠠᠨᠢᠰᠳᠠᠭ᠂
19 ᠠᠮᠠ ᠪᠠᠨ ᠮᠠᠭᠤ ᠳᠤ ᠲᠤᠰᠢᠶᠠᠵᠤ ᠬᠡᠯᠡ ᠪᠡᠷ ᠢᠶᠠᠨ ᠮᠡᠬᠡ ᠵᠣᠬᠢᠶᠠᠳᠠᠭ᠃
20 ᠴᠢ ᠠᠬᠠ ᠳᠡᠭᠦᠦᠰ ᠢᠶᠡᠨ ᠮᠠᠭᠤᠯᠠᠬᠤ ᠪᠠᠷ ᠰᠠᠭᠤᠵᠤ ᠡᠬᠡ ᠶᠢᠨ ᠢᠶᠠᠨ ᠬᠦᠦ ᠶᠢ ᠭᠦᠳᠬᠡᠳᠡᠭ᠃
21 ᠡᠳᠡᠭᠡᠷ ᠢ ᠬᠢᠬᠦ ᠳᠦ ᠴᠢᠨᠢ ᠪᠢ ᠳᠠᠭᠤ ᠦᠭᠡᠢ ᠪᠠᠢᠨᠠ ᠭᠡᠵᠦ ᠴᠢ ᠨᠠᠮᠠᠶᠢ ᠥᠪᠡᠷ ᠲᠡᠢ ᠪᠡᠨ ᠠᠳᠠᠯᠢ ᠪᠣᠳᠣᠵᠠᠢ᠂ ᠡᠳᠦᠭᠡ ᠪᠢ ᠴᠢᠮᠠᠶᠢ ᠵᠢᠮᠡᠯᠡᠨᠡ ᠥᠪᠡᠷ ᠦᠨ ᠴᠢᠨᠢ ᠡᠮᠦᠨᠡ ᠴᠢᠮᠠᠶᠢ ᠪᠤᠷᠤᠭᠤᠳᠬᠠᠨᠠ᠃
22 ᠪᠤᠷᠬᠠᠨ ᠢ ᠮᠠᠷᠲᠠᠭᠰᠠᠨ ᠲᠠ ᠨᠠᠷ᠂ ᠤᠬᠠᠭᠠᠷᠠᠭᠲᠤᠨ ᠡᠰᠡ ᠪᠥᠭᠡᠰᠦ ᠪᠢ ᠲᠠᠰᠤᠳᠠᠨᠠ᠂ ᠭᠡᠲᠦᠯᠭᠡᠭᠴᠢ ᠨᠢ ᠠᠯᠠᠭᠠ ᠪᠠᠢᠬᠤ ᠪᠣᠯᠣᠨᠠ᠃
23 ᠲᠠᠯᠠᠷᠬᠠᠯ ᠤᠨ ᠲᠠᠬᠢᠯ ᠢ ᠡᠷᠭᠦᠭᠴᠢ ᠨᠢ ᠨᠠᠮᠠᠶᠢ ᠠᠯᠳᠠᠷᠰᠢᠭᠤᠯᠤᠨᠠ ᠵᠠᠮᠨᠠᠯ ᠢᠶᠠᠨ ᠵᠠᠰᠠᠭᠴᠢ ᠬᠥᠮᠦᠨ ᠳᠦ ᠪᠢ ᠪᠤᠷᠬᠠᠨ ᠤ ᠠᠪᠤᠷᠠᠯ ᠢ ᠦᠵᠡᠭᠦᠯᠦᠨᠡ᠃》