ᠳᠠᠭᠤᠯᠠᠯ ᠭᠤᠴᠢᠨ ᠨᠠᠢ᠌ᠮᠠ
ᠵᠣᠪᠠᠯᠠᠩᠲᠤ ᠬᠥᠮᠦᠨ ᠦ ᠭᠡᠮᠰᠢᠯ
ᠳ᠋ᠠᠸᠢᠳ᠋ ᠤᠨ ᠳᠤᠷᠠᠰᠬᠠᠯ ᠳᠠᠭᠤᠯᠠᠯ᠃
1 ᠶᠣᠬᠣᠸᠠ᠂ ᠨᠠᠮᠠᠶᠢ ᠠᠭᠤᠷ ᠲᠠᠢ ᠪᠠᠷ ᠪᠦᠦ ᠵᠢᠮᠡᠯᠡᠭᠡᠴᠢ ᠨᠠᠮᠠᠶᠢ ᠬᠢᠯᠢᠩ ᠲᠠᠢ ᠪᠠᠷ ᠪᠦᠦ ᠭᠡᠰᠬᠡᠭᠡᠴᠢ᠃
2 ᠲᠠᠨ ᠤ ᠰᠤᠮᠤ ᠨᠠᠮᠠᠶᠢ ᠰᠦᠯᠪᠡᠪᠡ ᠲᠠᠨ ᠤ ᠨᠢᠳᠤᠷᠭᠠ ᠨᠠᠮᠠᠶᠢ ᠨᠤᠬᠤᠴᠢᠨ ᠳᠠᠷᠤᠪᠠ᠃
3 ᠲᠠᠨ ᠤ ᠬᠢᠯᠢᠩ ᠡᠴᠡ ᠪᠣᠯᠵᠤ ᠮᠢᠨᠦ ᠪᠡᠶᠡ ᠳᠦ ᠡᠷᠡᠭᠦᠯ ᠭᠠᠵᠠᠷ ᠦᠭᠡᠢ ᠮᠢᠨᠦ ᠨᠢᠭᠦᠯ ᠡᠴᠡ ᠪᠣᠯᠵᠤ ᠶᠠᠰᠤᠨ ᠳᠤ ᠮᠢᠨᠢ ᠠᠮᠠᠷᠠᠯ ᠦᠭᠡᠢ᠃
4 ᠭᠡᠮ ᠪᠤᠷᠤᠭᠤ ᠮᠢᠨᠢ ᠲᠣᠯᠣᠭᠠᠢ ᠠᠴᠠ ᠮᠢᠨᠢ ᠳᠠᠪᠠᠵᠤ ᠬᠦᠨᠳᠦ ᠠᠴᠢᠶᠠ ᠮᠡᠲᠦ ᠨᠠᠳᠠ ᠳᠤ ᠬᠦᠨᠳᠦᠳᠡᠵᠦ ᠪᠠᠢᠨᠠ᠃
5 ᠰᠢᠷᠬᠠ ᠮᠢᠨᠢ ᠢᠲᠡᠭᠡᠯᠡᠵᠦ ᠥᠮᠡᠬᠡᠢ ᠦᠨᠦᠷ ᠬᠠᠩ᠋ᠬᠤᠯᠤᠭᠤᠯᠳᠠᠭ ᠡᠨᠡ ᠪᠦᠭᠦᠳᠡ ᠮᠢᠨᠦ ᠮᠤᠩ᠋ᠬᠠᠭ ᠠᠴᠠ ᠪᠣᠯᠣᠭᠰᠠᠨ᠃
6 ᠪᠢ ᠲᠣᠩ᠋ᠭᠣᠢᠵᠤ ᠪᠦᠷᠢᠮᠦᠰᠦᠨ ᠪᠥᠬᠥᠢᠵᠡᠢ ᠪᠦᠬᠦᠯᠢ ᠡᠳᠦᠷ ᠦᠨ ᠲᠤᠷᠰᠢ ᠪᠢ ᠭᠠᠰᠢᠭᠤᠳᠠᠨ ᠶᠠᠪᠤᠨᠠ᠃
7 ᠨᠢᠷᠤᠭᠤ ᠮᠢᠨᠢ ᠬᠠᠯᠠᠭᠤ ᠰᠢᠲᠠᠵᠤ ᠪᠡᠶᠡ ᠳᠦ ᠮᠢᠨᠢ ᠡᠷᠡᠭᠦᠯ ᠭᠠᠵᠠᠷ ᠦᠭᠡᠢ᠃
8 ᠪᠢ ᠶᠠᠳᠠᠷᠠᠵᠤ ᠪᠦᠷᠢᠮᠦᠰᠦᠨ ᠪᠢᠴᠠᠷᠠᠵᠠᠢ ᠰᠡᠳᠬᠢᠯ ᠤᠨ ᠢᠶᠠᠨ ᠵᠣᠪᠠᠯᠠᠩ ᠠᠴᠠ ᠪᠣᠯᠵᠤ ᠪᠢ ᠬᠠᠰᠬᠢᠷᠳᠠᠭ᠃
9 ᠡᠵᠡᠨ᠂ ᠪᠦᠬᠦ ᠬᠦᠰᠡᠯ ᠮᠢᠨᠢ ᠲᠠᠨ ᠤ ᠡᠮᠦᠨᠡ ᠪᠠᠢᠨᠠ ᠰᠡᠭᠦᠷᠡᠰᠦ ᠠᠯᠳᠠᠬᠤ ᠮᠢᠨᠢ ᠲᠠᠨ ᠠᠴᠠ ᠨᠢᠭᠤᠴᠠᠯᠠᠭᠳᠠᠭᠠ ᠦᠭᠡᠢ᠃
10 ᠵᠢᠷᠦᠬᠡ ᠮᠢᠨᠢ ᠳᠠᠪᠴᠢᠳᠠᠵᠤ᠂ ᠴᠢᠳᠠᠯ ᠮᠢᠨᠢ ᠠᠯᠳᠠᠷᠠᠭᠰᠠᠨ ᠨᠢᠳᠦᠨ ᠦ ᠮᠢᠨᠢ ᠭᠠᠯ ᠴᠤ ᠪᠥᠬᠥᠭᠰᠡᠨ᠃
11 ᠡᠪᠡᠳᠴᠢᠨ ᠰᠢᠷᠬᠠ ᠠᠴᠠ ᠮᠢᠨᠢ ᠪᠣᠯᠵᠤ ᠬᠠᠨᠢ ᠨᠥᠬᠥᠳ ᠮᠢᠨᠢ ᠬᠥᠨᠳᠡᠢᠷᠡᠨᠡ ᠬᠠᠮᠢᠶᠠᠲᠠᠨ ᠨᠤᠭᠤᠳ ᠮᠢᠨᠢ ᠴᠤ ᠬᠣᠯᠠᠭᠤᠷ ᠵᠣᠭᠰᠣᠳᠠᠭ᠃
12 ᠠᠮᠢ ᠶᠢ ᠮᠢᠨᠢ ᠡᠷᠢᠭ᠍ᠴᠢᠳ ᠤᠷᠠᠬᠠ ᠲᠠᠯᠪᠢᠨᠠ ᠨᠠᠮᠠᠶᠢ ᠬᠣᠬᠢᠷᠠᠭᠠᠬᠤ ᠭᠡᠭᠴᠢᠳ ᠰᠦᠢᠷᠡᠯ ᠦᠨ ᠮᠢᠨᠢ ᠲᠤᠬᠠᠢ ᠶᠠᠷᠢᠯᠴᠠᠵᠤ ᠡᠳᠦᠷᠵᠢᠨ ᠵᠠᠯᠢ ᠮᠡᠬᠡ ᠰᠡᠳᠦᠨᠡ᠃
13 ᠬᠠᠷᠢᠨ ᠪᠢ ᠳᠦᠯᠡᠢ ᠬᠥᠮᠦᠨ ᠰᠢᠭ ᠦᠯᠦ ᠰᠣᠨᠣᠰᠣᠨᠠ ᠬᠡᠯᠡ ᠦᠭᠡᠢ ᠬᠥᠮᠦᠨ ᠰᠢᠭ ᠠᠮᠠ ᠪᠠᠨ ᠡᠰᠡ ᠨᠡᠭᠡᠭᠡᠨᠡ᠂
14 ᠲᠡᠢᠨ ᠬᠦ ᠪᠢ ᠰᠣᠨᠣᠰᠬᠤ ᠴᠢᠳᠠᠯ ᠦᠭᠡᠢ᠂ ᠬᠠᠷᠢᠭᠤᠯᠬᠤ ᠠᠮᠠ ᠦᠭᠡᠢ ᠬᠥᠮᠦᠨ ᠮᠡᠲᠦ ᠪᠣᠯᠣᠯᠠ᠂
15 ᠤᠴᠢᠷ ᠨᠢ᠂ ᠶᠣᠬᠣᠸᠠ᠂ ᠪᠢ ᠲᠠᠨ ᠳᠤ ᠯᠠ ᠨᠠᠢᠳᠠᠳᠠᠭ ᠮᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ᠂ ᠲᠠ ᠬᠠᠷᠢᠭᠤᠯᠬᠤ ᠪᠣᠯᠣᠨᠠ᠂
16 ᠤᠴᠢᠷ ᠨᠢ ᠪᠢ 《ᠨᠠᠳᠠ ᠠᠴᠠ ᠪᠣᠯᠵᠤ ᠲᠡᠳᠡ ᠪᠦᠦ ᠪᠠᠶᠠᠷᠯᠠᠭ ᠬᠥᠯ ᠠᠯᠳᠠᠬᠤ ᠦᠶᠡ ᠳᠦ ᠮᠢᠨᠢ ᠲᠡᠳᠡ ᠮᠢᠨᠦ ᠡᠮᠦᠨᠡ ᠪᠦᠦ ᠣᠩᠭᠢᠷᠠᠭ》 ᠭᠡᠵᠦ ᠭᠤᠶᠤᠭᠰᠠᠨ᠂
17 ᠤᠴᠢᠷ ᠨᠢ ᠪᠢ ᠪᠦᠳᠦᠷᠢᠬᠦ ᠰᠢᠬᠠᠵᠤ ᠪᠠᠢᠬᠤ ᠳᠤ ᠡᠪᠡᠳᠴᠢᠨ ᠰᠢᠨᠠᠯᠤᠯ ᠦᠷᠭᠦᠯᠵᠢ ᠮᠢᠨᠦ ᠡᠮᠦᠨᠡ ᠪᠠᠢᠳᠠᠭ᠂
18 ᠤᠴᠢᠷ ᠨᠢ ᠪᠢ ᠭᠡᠮ ᠪᠤᠷᠤᠭᠤ ᠪᠠᠨ ᠤᠯᠠᠢᠵᠤ ᠨᠢᠭᠦᠯ ᠡᠴᠡ ᠪᠣᠯᠵᠤ ᠰᠡᠳᠬᠢᠯ ᠡᠪᠡᠳᠴᠦ ᠪᠠᠢᠨᠠ᠃
19 ᠬᠠᠷᠢᠨ ᠳᠠᠢᠰᠤᠨ ᠨᠤᠭᠤᠳ ᠮᠢᠨᠢ ᠡᠷᠴᠢ ᠬᠦᠴᠦᠲᠡᠢ᠂ ᠤᠳᠬᠠ ᠤᠴᠢᠷ ᠦᠭᠡᠢ ᠪᠠᠷ ᠨᠠᠮᠠᠶᠢ ᠵᠢᠭ᠍ᠰᠢᠭ᠍ᠴᠢᠳ ᠣᠯᠠᠨ᠃
20 ᠲᠡᠳᠡ ᠠᠴᠢ ᠶᠢ ᠪᠠᠴᠢ ᠪᠠᠷ ᠬᠠᠷᠢᠭᠤᠯᠵᠤ ᠪᠠᠢᠨᠠ᠂ ᠪᠢ ᠰᠠᠢᠨ ᠢ ᠳᠠᠭᠠᠵᠤ ᠪᠠᠢᠨᠠ᠂ ᠲᠡᠳᠡ ᠨᠠᠮᠠᠶᠢ ᠳᠠᠢᠰᠤᠩᠨᠠᠵᠤ ᠪᠠᠢᠨᠠ᠂
21 ᠶᠣᠬᠣᠸᠠ᠂ ᠨᠠᠮᠠᠶᠢ ᠪᠦᠦ ᠣᠷᠬᠢᠭᠠᠴᠢ ᠪᠤᠷᠬᠠᠨ ᠮᠢᠨᠢ ᠡ᠂ ᠨᠠᠳᠠ ᠠᠴᠠ ᠪᠦᠦ ᠬᠣᠯᠠᠳᠠᠭᠠᠴᠢ᠃
22 ᠮᠢᠨᠦ ᠠᠪᠤᠷᠠᠭᠴᠢ ᠡᠵᠡᠨ ᠨᠠᠳᠠ ᠳᠤ ᠲᠤᠰᠠᠯᠠᠬᠤ ᠪᠠᠷ ᠬᠤᠷᠳᠤᠯᠠᠭᠠᠴᠢ᠃