ᠳᠠᠭᠤᠯᠠᠯ ᠬᠣᠷᠢᠨ ᠬᠣᠶᠠᠷ
ᠵᠥᠪᠲᠡᠨ ᠳᠦ ᠢᠷᠡᠬᠦ ᠵᠣᠪᠠᠯᠠᠩ ᠪᠠ ᠵᠥᠪᠲᠥᠭᠡᠯ
ᠳ᠋ᠠᠸᠢᠳ᠋ ᠤᠨ ᠳᠠᠭᠤᠯᠠᠯ᠂ ᠨᠠᠢᠷᠠᠯ ᠳᠠᠭᠤᠤ ᠶᠢᠨ ᠤᠳᠤᠷᠢᠳᠤᠭᠠᠴᠢ ᠳᠤ᠂ 《ᠦᠷ ᠦᠨ ᠰᠣᠭᠣ》 ᠶᠢᠨ ᠠᠶᠠ ᠳᠡᠭᠡᠷᠡ᠃
1 ᠪᠤᠷᠬᠠᠨ ᠮᠢᠨᠢ᠂ ᠪᠤᠷᠬᠠᠨ ᠮᠢᠨᠢ᠂ ᠶᠠᠭᠤᠨ ᠳᠤ ᠲᠠ ᠨᠠᠮᠠᠶᠢ ᠣᠷᠬᠢᠪᠠ︖ ᠶᠠᠭᠤᠨ ᠳᠤ ᠨᠠᠮᠠᠶᠢ ᠠᠪᠤᠷᠠᠯ ᠦᠭᠡᠢ ᠬᠣᠯᠠ ᠪᠠᠢᠵᠤ᠂ ᠶᠣᠣᠯᠠᠬᠤ ᠳᠠᠭᠤ ᠠᠴᠠ ᠮᠢᠨᠢ ᠬᠣᠯᠠ ᠪᠠᠢᠨᠠ ᠪᠤᠢ︖
2 ᠪᠤᠷᠬᠠᠨ ᠮᠢᠨᠢ ᠡ᠂ ᠪᠢ ᠡᠳᠦᠷ ᠢᠶᠡᠷ ᠬᠠᠰᠬᠢᠷᠳᠠᠭ ᠪᠣᠯᠪᠠᠴᠤ ᠲᠠᠨ ᠤ ᠬᠠᠷᠢᠭᠤ ᠠᠯᠠᠭᠠ ᠰᠥᠨᠢ ᠪᠠᠷ ᠬᠠᠰᠬᠢᠷᠳᠠᠭ ᠪᠣᠯᠪᠠᠴᠤ ᠨᠠᠳᠠ ᠳᠤ ᠠᠮᠠᠷᠠᠯ ᠪᠠᠢᠬᠤ ᠦᠭᠡᠢ᠂
3 ᠬᠠᠷᠢᠨ ᠲᠠ ᠪᠣᠯ ᠠᠷᠢᠭᠤᠨ ᠢᠰᠷᠧᠯ ᠤᠨ ᠮᠠᠭᠲᠠᠭᠠᠯ ᠳᠡᠭᠡᠷᠡ ᠵᠠᠯᠠᠷᠠᠭᠴᠢ ᠶᠤᠮ᠂
4 ᠡᠴᠢᠭᠡ ᠡᠪᠦᠭᠡᠳ ᠮᠢᠨᠢ ᠲᠠᠨ ᠳᠤ ᠢᠲᠡᠭᠡᠭᠰᠡᠨ ᠲᠡᠳᠡ ᠢᠲᠡᠭᠡᠭᠰᠡᠨ ᠢᠶᠡᠷ ᠲᠠ ᠠᠪᠤᠷᠠᠭᠰᠠᠨ᠃
5 ᠲᠠᠨ ᠤᠷᠤᠭᠤ ᠬᠠᠰᠬᠢᠷᠤᠭᠰᠠᠨ ᠢᠶᠠᠷ ᠲᠡᠳᠡ ᠠᠪᠤᠷᠠᠭᠳᠠᠭᠰᠠᠨ ᠲᠠᠨ ᠳᠤ ᠢᠲᠡᠭᠡᠭᠰᠡᠨ ᠢᠶᠡᠷ ᠲᠡᠳᠡ ᠢᠴᠢᠭᠦᠷᠢ ᠳᠤ ᠤᠨᠠᠭᠰᠠᠨ ᠦᠭᠡᠢ᠃
6 ᠬᠠᠷᠢᠨ ᠪᠢ ᠪᠣᠯ ᠥᠲᠥ᠂ ᠬᠥᠮᠦᠨ ᠪᠢᠰᠢ︕ ᠪᠢ ᠬᠥᠮᠦᠨ ᠦ ᠡᠯᠡᠭ᠂ ᠣᠯᠠᠨ ᠤ ᠳᠣᠭᠣᠭᠢ ᠪᠣᠯᠵᠠᠢ᠃
7 ᠬᠠᠷᠠᠳᠠᠭ ᠪᠦᠬᠦᠨ ᠨᠠᠮᠠᠶᠢ ᠳᠣᠷᠣᠮᠵᠢᠯᠠᠳᠠᠭ ᠣᠷᠣᠭᠤᠯ ᠢᠶᠠᠨ ᠢᠷᠪᠠᠢᠵᠤ ᠲᠣᠯᠣᠭᠠᠢ ᠰᠡᠭᠰᠦᠷᠦᠨ
8 《ᠲᠡᠷᠡ ᠶᠣᠬᠣᠸᠠ ᠳᠤ ᠢᠲᠡᠭᠡᠳᠡᠭ᠂ ᠲᠡᠷᠡ ᠲᠡᠭᠦᠨ ᠢ ᠠᠪᠤᠷᠠᠭ︕ ᠲᠠᠭᠠᠯᠠᠳᠠᠭ ᠨᠢᠭᠡᠨ ᠢᠶᠡᠨ ᠲᠡᠷᠡ ᠴᠢᠯᠥᠭᠡᠯᠡᠭ︕》 ᠭᠡᠨᠡ᠃
9 ᠭᠡᠪᠡᠴᠦ ᠨᠠᠮᠠᠶᠢ ᠡᠬᠡ ᠶᠢᠨ ᠬᠡᠪᠡᠯᠢ ᠡᠴᠡ ᠭᠠᠷᠭᠠᠭᠰᠠᠨ ᠨᠢ ᠲᠠ ᠪᠢᠯᠡ᠂ ᠡᠬᠡ ᠶᠢᠨ ᠢᠶᠠᠨ ᠬᠥᠬᠥᠨ ᠳᠡᠭᠡᠷᠡ ᠪᠠᠢᠬᠤ ᠳᠤ ᠮᠢᠨᠢ ᠲᠠ ᠨᠠᠮᠠᠶᠢ ᠢᠲᠡᠭᠡᠭᠦᠯᠦᠭᠰᠡᠨ᠃
10 ᠪᠢ ᠲᠥᠷᠥᠬᠦ ᠡᠴᠡ ᠪᠡᠨ ᠲᠠᠨ ᠳᠤ ᠳᠠᠭᠠᠳᠬᠠᠭᠳᠠᠭᠰᠠᠨ ᠡᠬᠡ ᠶᠢᠨ ᠢᠶᠠᠨ ᠬᠡᠪᠡᠯᠢ ᠳᠤ ᠪᠠᠢᠬᠤ ᠦᠶᠡ ᠡᠴᠡ ᠮᠢᠨᠢ ᠲᠠ ᠮᠢᠨᠦ ᠪᠤᠷᠬᠠᠨ ᠪᠠᠢᠭᠰᠠᠨ᠃
11 ᠨᠠᠳᠠ ᠠᠴᠠ ᠪᠦᠦ ᠬᠣᠯᠠᠳᠠᠭᠠᠴᠢ ᠵᠣᠪᠠᠯᠠᠩ ᠣᠢᠷᠠᠬᠠᠨ ᠪᠠᠢᠨᠠ ᠲᠤᠰᠠᠯᠠᠬᠤ ᠬᠥᠮᠦᠨ ᠠᠯᠠᠭᠠ᠂
12 ᠣᠯᠠᠨ ᠦᠬᠡᠷ ᠨᠠᠮᠠᠶᠢ ᠬᠦᠷᠢᠶᠡᠯᠡᠪᠡ ᠪᠠᠱᠠᠨ ᠤ ᠬᠦᠴᠦᠲᠦ ᠪᠤᠬᠠ ᠨᠠᠮᠠᠶᠢ ᠪᠦᠰᠡᠯᠡᠪᠡ᠃
13 ᠠᠷᠰᠯᠠᠨ ᠬᠠᠤ ᠲᠠᠲᠠᠬᠤ ᠪᠠᠷ ᠠᠷᠬᠢᠷᠠᠨ ᠪᠠᠢᠭᠠ ᠰᠢᠭ᠋ ᠨᠠᠳᠠ ᠤᠷᠤᠭᠤ ᠲᠡᠳᠡ ᠠᠮᠠ ᠪᠠᠨ ᠲᠣᠮᠣ ᠠᠩ᠋ᠭᠠᠢᠯᠭᠠᠵᠤ ᠪᠠᠢᠨᠠ᠂
14 ᠠᠮᠢ ᠮᠢᠨᠢ ᠤᠰᠤ ᠰᠢᠭ᠋ ᠠᠰᠬᠠᠭᠳᠠᠪᠠ ᠪᠦᠬᠦ ᠶᠠᠰᠤ ᠮᠢᠨᠢ ᠮᠤᠯᠲᠤᠷᠠᠪᠠ ᠵᠢᠷᠦᠬᠡ ᠮᠢᠨᠢ ᠯᠠ ᠶᠢᠨ ᠲᠣᠰᠣ ᠠᠳᠠᠯᠢ ᠬᠡᠩᠬᠦᠳᠡᠭ ᠳᠣᠲᠣᠷᠠ ᠮᠢᠨᠢ ᠬᠠᠢᠯᠪᠠ᠃
15 ᠬᠦᠴᠦ ᠮᠢᠨᠢ ᠱᠠᠵᠠᠩ ᠤᠨ ᠬᠡᠯᠲᠡᠷᠬᠡᠢ ᠰᠢᠭ ᠬᠠᠲᠠᠵᠤ ᠬᠡᠯᠡ ᠮᠢᠨᠢ ᠡᠷᠡᠦ ᠳᠡᠭᠡᠨ ᠨᠠᠭᠠᠯᠳᠤᠪᠠ ᠲᠠ ᠨᠠᠮᠠᠶᠢ ᠦᠬᠦᠯ ᠦᠨ ᠰᠢᠷᠣᠢ ᠳᠤ ᠲᠠᠯᠪᠢᠵᠠᠢ᠃
16 ᠨᠠᠮᠠᠶᠢ ᠨᠣᠬᠠᠳ ᠬᠦᠷᠢᠶᠡᠯᠡᠵᠦ ᠪᠦᠯᠦᠭ ᠮᠠᠭᠤ ᠬᠥᠮᠦᠰ ᠪᠦᠰᠡᠯᠡᠵᠦ ᠭᠠᠷ᠂ ᠬᠥᠯ ᠢ ᠮᠢᠨᠢ ᠨᠡᠪᠲᠡ ᠬᠠᠳᠬᠤᠪᠠ᠂
17 ᠪᠢ ᠬᠠᠮᠤᠭ ᠶᠠᠰᠤ ᠪᠠᠨ ᠲᠣᠭᠠᠯᠠᠵᠤ ᠴᠢᠳᠠᠨᠠ᠂ ᠲᠡᠳᠡ ᠨᠠᠳᠠ ᠤᠷᠤᠭᠤ ᠭᠥᠯᠢᠷᠡᠨ ᠰᠢᠷᠲᠡᠨᠡ᠂
18 ᠭᠠᠳᠠᠭᠤᠷ ᠬᠤᠪᠴᠠᠰᠤ ᠶᠢ ᠮᠢᠨᠢ ᠬᠤᠪᠢᠶᠠᠨ ᠠᠪᠴᠤ ᠳᠣᠲᠣᠷ ᠬᠤᠪᠴᠠᠰᠤᠨ ᠤ ᠮᠢᠨᠢ ᠲᠥᠯᠥᠭᠡ ᠰᠢᠪᠠᠭᠠᠳᠠᠨᠠ᠃
19 ᠥ ᠶᠣᠬᠣᠸᠠ᠂ ᠲᠠ ᠪᠦᠦ ᠬᠣᠯᠠᠳᠠᠭᠠᠴᠢ ᠮᠢᠨᠦ ᠬᠦᠴᠦ ᠪᠣᠯᠳᠠᠭ ᠲᠠ ᠨᠠᠳᠠ ᠳᠤ ᠲᠤᠰᠠᠯᠠᠬᠤ ᠪᠠᠷ ᠬᠤᠷᠳᠤᠯᠠᠭᠠᠴᠢ᠂
20 ᠠᠮᠢ ᠶᠢ ᠮᠢᠨᠢ ᠢᠯᠳᠦᠨ ᠡᠴᠡ ᠴᠣᠷ ᠤᠨ ᠭᠠᠭᠴᠠ ᠶᠢ ᠮᠢᠨᠢ ᠨᠣᠬᠠᠢ ᠶᠢᠨ ᠰᠠᠪᠠᠷ ᠠᠴᠠ ᠴᠢᠯᠥᠭᠡᠯᠡᠭᠡᠴᠢ᠂
21 ᠨᠠᠮᠠᠶᠢ ᠠᠷᠰᠯᠠᠨ ᠤ ᠠᠮᠠᠨ ᠠᠴᠠ ᠵᠡᠷᠯᠢᠭ ᠦᠬᠡᠷ ᠦᠨ ᠡᠪᠡᠷ ᠡᠴᠡ ᠠᠪᠤᠷᠠᠭᠠᠴᠢ︕ ᠲᠠ ᠨᠠᠳᠠ ᠳᠤ ᠬᠠᠷᠢᠭᠤᠯᠵᠠᠢ︕
22 ᠪᠢ ᠲᠠᠨ ᠤ ᠨᠡᠷᠡ ᠶᠢ ᠠᠬᠠ ᠳᠡᠭᠦᠦᠰ ᠲᠡᠭᠡᠨ ᠲᠤᠩ᠋ᠬᠠᠭᠯᠠᠨᠠ᠂ ᠲᠠᠨ ᠢ ᠴᠢᠭᠤᠯᠭᠠᠨ ᠤ ᠳᠤᠮᠳᠠ ᠮᠠᠭᠲᠠᠨᠠ
23 ᠶᠣᠬᠣᠸᠠ ᠠᠴᠠ ᠡᠮᠢᠶᠡᠭᠴᠢᠳ ᠡ᠂ ᠲᠡᠭᠦᠨ ᠢ ᠮᠠᠭᠲᠠ ᠶᠠᠺᠣᠪ ᠤᠨ ᠦᠷᠡ ᠤᠳᠤᠮ ᠲᠠ ᠪᠦᠭᠦᠳᠡ ᠲᠡᠭᠦᠨ ᠢ ᠠᠯᠳᠠᠷᠰᠢᠭᠤᠯ ᠢᠰᠷᠧᠯ ᠤᠨ ᠦᠷᠡ ᠤᠳᠤᠮ ᠪᠣᠯᠬᠤ ᠲᠠ ᠪᠦᠭᠦᠳᠡ ᠲᠡᠭᠦᠨ ᠡᠴᠡ ᠡᠮᠢᠶᠡ᠃
24 ᠤᠴᠢᠷ ᠨᠢ ᠵᠣᠪᠠᠭᠴᠢ ᠶᠢᠨ ᠵᠣᠪᠠᠯᠠᠩ ᠢ ᠲᠡᠷᠡ ᠵᠢᠪᠡᠭᠦᠴᠡᠭᠡ ᠦᠭᠡᠢ᠂ ᠵᠢᠭᠰᠢᠭᠡ ᠦᠭᠡᠢ ᠨᠢᠭᠤᠷ ᠢᠶᠠᠨ ᠲᠡᠭᠦᠨ ᠡᠴᠡ ᠨᠢᠭᠤᠭᠠ ᠦᠭᠡᠢ ᠥᠪᠡᠷ ᠤᠷᠤᠭᠤ ᠨᠢ ᠬᠠᠰᠬᠢᠷᠬᠤ ᠳᠤ᠂ ᠲᠡᠷᠡ ᠰᠣᠨᠣᠰᠣᠭᠰᠠᠨ ᠶᠤᠮ᠃
25 ᠶᠡᠬᠡ ᠴᠢᠭᠤᠯᠭᠠᠨ ᠤ ᠳᠤᠮᠳᠠ ᠡᠷᠭᠦᠬᠦ ᠮᠠᠭᠲᠠᠭᠠᠯ ᠮᠢᠨᠢ ᠲᠠᠨ ᠠᠴᠠ ᠢᠷᠡᠭᠰᠡᠨ ᠲᠠᠨ ᠠᠴᠠ ᠡᠮᠢᠶᠡᠭᠴᠢᠳ ᠤᠨ ᠡᠮᠦᠨᠡ ᠪᠢ ᠲᠠᠩ᠋ᠭᠠᠷᠢᠭ ᠢᠶᠠᠨ ᠪᠡᠶᠡᠯᠡᠭᠦᠯᠦᠨᠡ᠃
26 ᠶᠠᠳᠠᠭᠤᠴᠤᠳ ᠢᠳᠡᠵᠦ᠂ ᠴᠠᠳᠤᠨᠠ ᠶᠣᠬᠣᠸᠠ ᠶᠢ ᠬᠠᠢᠭᠴᠢᠳ ᠲᠡᠭᠦᠨ ᠢ ᠮᠠᠭᠲᠠᠨᠠ᠂ ᠲᠠ ᠨᠠᠷ ᠤᠨ ᠰᠡᠳᠬᠢᠯ ᠢᠮᠠᠭᠲᠠ ᠬᠠᠩ᠋ᠭᠠᠯᠤᠭᠤᠨ ᠪᠠᠢᠬᠤ ᠪᠣᠯᠲᠤᠭᠠᠢ︕
27 ᠳᠡᠯᠡᠬᠡᠢ ᠶᠢᠨ ᠪᠦᠬᠦ ᠬᠢᠵᠠᠭᠠᠷ ᠶᠣᠬᠣᠸᠠ ᠶᠢ ᠰᠠᠨᠠᠵᠤ᠂ ᠲᠡᠭᠦᠨ ᠤᠷᠤᠭᠤ ᠡᠷᠭᠢᠭ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠪᠦᠬᠦ ᠪᠦᠯᠢ ᠲᠠᠨ ᠤ ᠡᠮᠦᠨᠡ ᠮᠥᠷᠭᠥᠭ᠃
28 ᠤᠴᠢᠷ ᠨᠢ ᠬᠠᠭᠠᠨᠴᠢᠯᠠᠯ ᠪᠣᠯ ᠶᠣᠬᠣᠸᠠ ᠶᠢᠨ ᠬᠢ ᠤᠯᠤᠰ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠵᠠᠬᠢᠷᠤᠭᠴᠢ ᠨᠢ ᠲᠡᠷᠡ᠃
29 ᠳᠡᠯᠡᠬᠡᠢ ᠶᠢᠨ ᠪᠠᠶᠠᠴᠤᠳ ᠪᠦᠭᠦᠳᠡᠭᠡᠷ ᠢᠶᠡᠨ ᠢᠳᠡᠵᠦ᠂ ᠪᠠᠰᠠ ᠮᠥᠷᠭᠥᠭ ᠠᠮᠢ ᠪᠠᠨ ᠬᠠᠮᠠᠭᠠᠯᠠᠬᠤ ᠴᠢᠳᠠᠯ ᠦᠭᠡᠢ ᠰᠢᠷᠣᠢ ᠤᠷᠤᠭᠤ ᠤᠷᠤᠭᠤᠳᠠᠬᠤ ᠪᠦᠭᠦᠳᠡ ᠲᠡᠭᠦᠨ ᠦ ᠡᠮᠦᠨᠡ ᠰᠥᠭᠥᠳᠥᠭ᠃
30 ᠦᠷᠡ ᠤᠳᠤᠮ ᠮᠢᠨᠢ ᠲᠡᠭᠦᠨ ᠳᠦ ᠦᠢᠯᠡᠴᠢᠯᠡᠵᠦ ᠢᠷᠡᠬᠦ ᠦᠶᠡ ᠶᠢᠨ ᠬᠢᠨ ᠳᠡᠭᠡᠨ ᠶᠣᠬᠣᠸᠠ ᠶᠢᠨ ᠲᠤᠬᠠᠢ ᠶᠠᠷᠢᠭ᠂
31 ᠲᠡᠭᠦᠨ ᠦ ᠦᠢᠯᠡᠳᠦᠭᠰᠡᠨ ᠢ᠂ ᠲᠡᠭᠦᠨ ᠦ ᠵᠥᠪ ᠢ ᠲᠥᠷᠥᠭᠡ ᠦᠭᠡᠢ ᠲᠡᠷᠡ ᠬᠥᠮᠦᠰ ᠲᠦ ᠲᠡᠳᠡ ᠢᠷᠡᠵᠦ ᠲᠤᠩ᠋ᠬᠠᠭᠯᠠᠭ᠃