ᠳᠠᠭᠤᠯᠠᠯ ᠳᠠᠯᠠᠨ ᠳᠥᠷᠪᠡ
ᠭᠠᠮᠰᠢᠭ ᠤᠨ ᠳᠤᠮᠳᠠᠬᠢ ᠠᠷᠠᠳ ᠲᠦᠮᠡᠨ ᠦ ᠲᠥᠯᠥᠭᠡ ᠭᠤᠶᠤᠪᠠ
ᠠᠰᠠᠹ ᠤᠨ ᠰᠤᠷᠭᠠᠯᠲᠤ ᠳᠠᠭᠤᠯᠠᠯ᠃
1 ᠪᠤᠷᠬᠠᠨ᠂ ᠶᠠᠭᠠᠬᠢᠭᠠᠳ ᠲᠠ ᠪᠢᠳᠡᠨ ᠢ ᠡᠭᠦᠷᠢᠳᠡ ᠣᠭᠣᠷᠪᠠ︖ ᠶᠠᠭᠠᠬᠢᠭᠠᠳ ᠲᠠᠨ ᠤ ᠠᠭᠤᠷ ᠪᠡᠯᠴᠢᠭᠡᠷ ᠦᠨ ᠢᠶᠠᠨ ᠬᠣᠨᠢᠨ ᠰᠦᠷᠦᠭ ᠦᠨ ᠡᠰᠡᠷᠭᠦ ᠰᠢᠲᠠᠨᠠ ᠪᠤᠢ︖
2 ᠡᠷᠲᠡ ᠦᠶᠡ ᠡᠴᠡ ᠣᠯᠣᠭᠠᠳ ᠵᠣᠯᠢᠨ ᠠᠪᠴᠤ ᠥᠪᠡᠷ ᠦᠨ ᠢᠶᠠᠨ ᠥᠮᠴᠢ ᠪᠣᠯᠭᠠᠭᠰᠠᠨ ᠥᠪᠡᠷ ᠦᠨ ᠢᠶᠠᠨ ᠴᠢᠭᠤᠯᠭᠠᠨ ᠪᠣᠯᠬᠤ ᠪᠢᠳᠡᠨ ᠦ ᠣᠪᠣᠭ ᠢ ᠥᠪᠡᠷ ᠦᠨ ᠢᠶᠠᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠡᠨᠡ ᠽᠢᠶᠣᠨ ᠠᠭᠤᠯᠠ ᠶᠢ ᠲᠠ ᠰᠠᠨᠠᠭᠠᠴᠢ᠃
3 ᠡᠭᠦᠷᠢᠳᠡ ᠶᠢᠨ ᠪᠠᠯᠭᠠᠰᠤ ᠤᠷᠤᠭᠤ ᠠᠯᠬᠤᠮ ᠢᠶᠠᠨ ᠴᠢᠭᠯᠡᠭᠦᠯᠦᠭᠡᠴᠢ ᠠᠷᠢᠭᠤᠨ ᠭᠠᠵᠠᠷ ᠤᠨ ᠳᠣᠲᠣᠷᠠᠬᠢ ᠪᠦᠬᠦᠨ ᠢ ᠳᠠᠢᠰᠤᠨ ᠪᠤᠰᠠᠨᠢᠭᠤᠯᠤᠭᠰᠠᠨ᠂
4 ᠲᠠᠨ ᠤ ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠤᠨ ᠳᠤᠮᠳᠠ ᠲᠠᠨ ᠤ ᠥᠰᠲᠡᠨ ᠨᠦᠭᠦᠳ ᠤᠤᠬᠠᠢᠯᠠᠵᠤ ᠥᠪᠡᠷᠰᠡᠳ ᠦᠨ ᠢᠶᠠᠨ ᠲᠤᠭ ᠢ ᠲᠡᠮᠳᠡᠭ ᠪᠣᠯᠭᠠᠨ ᠪᠣᠰᠬᠠᠪᠠ᠂
5 ᠲᠡᠳᠡ ᠣᠢ ᠮᠣᠳᠣ ᠲᠠᠢ ᠭᠠᠵᠠᠷ ᠲᠤ ᠰᠦᠬᠡ ᠪᠡᠨ ᠳᠠᠯᠠᠢᠬᠤ ᠬᠥᠮᠦᠨ ᠮᠡᠲᠦ
6 ᠰᠦᠬᠡ᠂ ᠠᠯᠤᠬᠠ ᠪᠠᠷ ᠰᠡᠢᠯᠪᠦᠷᠢ ᠪᠦᠭᠦᠳᠡ ᠶᠢ ᠨᠢ ᠰᠦᠢᠷᠡᠭᠦᠯᠦᠭᠰᠡᠨ᠂
7 ᠲᠠᠨ ᠤ ᠠᠷᠢᠭᠤᠨ ᠭᠠᠵᠠᠷ ᠲᠤ ᠭᠠᠯ ᠲᠠᠯᠪᠢᠵᠤ ᠲᠠᠨ ᠤ ᠨᠡᠷᠡ ᠶᠢᠨ ᠣᠷᠣᠰᠢᠬᠤ ᠭᠠᠵᠠᠷ ᠢ ᠪᠤᠵᠠᠷᠯᠠᠭᠰᠠᠨ᠂
8 《ᠲᠡᠳᠡᠭᠡᠷ ᠢ ᠪᠦᠷᠢᠨ ᠤᠰᠠᠳᠬᠠᠵᠠᠭᠠᠶᠠ》 ᠭᠡᠵᠦ ᠰᠢᠢᠳᠦᠭᠡᠳ ᠨᠤᠲᠤᠭ ᠳᠠᠶᠠᠭᠠᠷ ᠬᠢ ᠪᠤᠷᠬᠠᠨ ᠢ ᠳᠡᠭᠡᠳᠦᠯᠡᠬᠦ ᠭᠠᠵᠠᠷ ᠢ ᠪᠦᠭᠦᠳᠡ ᠶᠢ ᠰᠢᠲᠠᠭᠠᠭᠰᠠᠨ᠃
9 ᠪᠢᠳᠡᠨ ᠳᠦ ᠲᠡᠮᠳᠡᠭ ᠤᠳ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠠᠢᠨᠠ ᠡᠰᠢ ᠦᠵᠡᠭᠦᠯᠦᠭᠴᠢ ᠴᠤ ᠠᠯᠠᠭᠠ ᠬᠡᠳᠦᠢ ᠤᠳᠠᠬᠤ ᠶᠢ ᠮᠡᠳᠡᠬᠦ ᠬᠥᠮᠦᠨ ᠴᠤ ᠪᠢᠳᠡᠨ ᠦ ᠳᠤᠮᠳᠠ ᠦᠭᠡᠢ᠂
10 ᠪᠤᠷᠬᠠᠨ᠂ ᠳᠠᠢᠰᠤᠨ ᠬᠡᠳᠦᠢ ᠪᠣᠯᠲᠠᠯᠠ ᠳᠣᠷᠣᠮᠵᠢᠯᠠᠬᠤ ᠶᠣᠰᠣᠲᠠᠢ ᠶᠤᠮ ᠪᠤᠢ︖ ᠥᠰᠲᠡᠨ ᠲᠠᠨ ᠤ ᠨᠡᠷᠡ ᠶᠢ ᠮᠥᠩᠬᠡᠳᠡ ᠭᠤᠲᠤᠭᠠᠬᠤ ᠶᠣᠰᠣᠲᠠᠢ ᠭᠡᠵᠢ ᠤᠤ︖
11 ᠶᠠᠭᠤᠨ ᠳᠤ ᠲᠠ ᠮᠤᠲᠤᠷ ᠢᠶᠠᠨ᠂ ᠪᠠᠷᠠᠭᠤᠨ ᠮᠤᠲᠤᠷ ᠢᠶᠠᠨ ᠲᠠᠲᠠᠨᠠ ᠪᠤᠢ︖ ᠡᠪᠦᠷ ᠡᠴᠡ ᠪᠡᠨ ᠭᠠᠷᠭᠠᠵᠤ᠂ ᠲᠡᠳᠡᠨ ᠢ ᠤᠰᠠᠳᠬᠠᠭᠠᠴᠢ︕
12 ᠡᠷᠲᠡᠨ ᠡᠴᠡ ᠪᠤᠷᠬᠠᠨ᠂ ᠮᠢᠨᠦ ᠬᠠᠭᠠᠨ ᠶᠢᠷᠲᠢᠨᠴᠦ ᠳᠦ ᠠᠪᠤᠷᠠᠯ ᠢ ᠪᠡᠶᠡᠯᠡᠭᠦᠯᠵᠦ ᠪᠠᠢᠭᠰᠠᠨ᠃
13 ᠲᠠ ᠥᠪᠡᠷ ᠦᠨ ᠢᠶᠠᠨ ᠬᠦᠴᠦ ᠪᠡᠷ ᠳᠠᠯᠠᠢ ᠶᠢ ᠬᠤᠪᠢᠶᠠᠵᠤ ᠤᠰᠤᠨ ᠳᠡᠭᠡᠷᠡᠬᠢ ᠠᠪᠤᠷᠭᠤ ᠠᠮᠢᠲᠠᠳ ᠤᠨ ᠲᠣᠯᠣᠭᠠᠢ ᠶᠢ ᠪᠢᠴᠠᠯᠤᠭᠰᠠᠨ ᠪᠢᠯᠡ᠃
14 ᠲᠠ ᠲᠡᠷᠡ ᠳᠠᠯᠠᠢ ᠶᠢᠨ ᠮᠠᠩ᠋ᠭᠤᠰ ᠤᠨ ᠲᠣᠯᠣᠭᠠᠢ ᠶᠢ ᠨᠢᠴᠠᠯᠵᠤ ᠲᠡᠭᠦᠨ ᠢ ᠴᠥᠯ ᠦᠨ ᠠᠮᠢᠲᠠᠳ ᠲᠤ ᠬᠦᠨᠡᠰᠦ ᠪᠣᠯᠭᠠᠨ ᠥᠭᠭᠥᠭᠰᠡᠨ᠃
15 ᠲᠠ ᠪᠤᠯᠠᠭ ᠱᠠᠩᠳᠠ ᠶᠢ ᠣᠷᠭᠢᠯᠤᠭᠤᠯᠵᠤ ᠪᠠᠢᠩ᠋ᠭᠤ ᠤᠷᠤᠰᠳᠠᠭ ᠭᠣᠣᠯ ᠢ ᠰᠢᠷᠭᠢᠭᠡᠭᠰᠡᠨ᠃
16 ᠡᠳᠦᠷ ᠴᠤ ᠲᠠᠨ ᠤ ᠬᠢ᠂ ᠰᠥᠨᠢ ᠴᠤ ᠲᠠᠨ ᠤ ᠬᠢ᠂ ᠲᠠ ᠭᠡᠷᠡᠯ ᠪᠠ ᠨᠠᠷᠠ ᠶᠢ ᠡᠭᠦᠰᠭᠡᠭᠰᠡᠨ᠃
17 ᠲᠠ ᠭᠠᠵᠠᠷ ᠤᠨ ᠪᠦᠬᠦ ᠬᠢᠯᠢ ᠶᠢ ᠲᠣᠭᠲᠠᠭᠠᠭᠰᠠᠨ ᠲᠠ ᠵᠤᠨ ᠬᠢᠭᠡᠳ ᠡᠪᠦᠯ ᠢ ᠪᠤᠢ ᠪᠣᠯᠭᠠᠭᠰᠠᠨ᠃
18 ᠶᠣᠬᠣᠸᠠ᠂ ᠳᠠᠢᠰᠤᠨ ᠬᠡᠷᠬᠢᠨ ᠳᠣᠭᠣᠭᠢᠯᠠᠳᠠᠭ ᠢ ᠪᠦᠳᠦᠭᠦᠯᠢᠭ ᠲᠡᠷᠡ ᠦᠨᠳᠦᠰᠦᠲᠡᠨ ᠲᠠᠨ ᠤ ᠠᠯᠳᠠᠷ ᠢ ᠬᠡᠷᠬᠢᠨ ᠳᠣᠷᠣᠮᠵᠢᠯᠠᠳᠠᠭ ᠢ ᠰᠠᠨᠠᠭᠠᠴᠢ᠃
19 ᠲᠠᠭᠲᠠᠭᠠᠨ ᠤ ᠪᠠᠨ ᠠᠮᠢ ᠶᠢ ᠵᠡᠷᠯᠢᠭ ᠠᠮᠢᠲᠠᠳ ᠲᠤ ᠪᠦᠦ ᠲᠤᠰᠢᠶᠠᠭᠠᠴᠢ ᠳᠠᠷᠤᠭᠳᠠᠭᠰᠠᠨ ᠠᠷᠠᠳ ᠤᠨ ᠢᠶᠠᠨ ᠠᠮᠢ ᠶᠢ ᠬᠡᠵᠢᠶᠡ ᠴᠤ ᠪᠦᠦ ᠮᠠᠷᠲᠠᠭᠠᠴᠢ᠃
20 ᠭᠡᠷᠡ ᠪᠡᠨ ᠡᠷᠭᠢᠨ ᠰᠠᠨᠠᠭᠠᠴᠢ ᠨᠤᠲᠤᠭ ᠤᠨ ᠬᠠᠷᠠᠩ᠋ᠭᠤᠢ ᠭᠠᠵᠠᠷ ᠲᠤ ᠬᠠᠷᠭᠢᠰ ᠤᠨ ᠣᠷᠣᠮᠵᠢ ᠳᠦᠭᠦᠷᠡᠩ ᠪᠠᠢᠨᠠ᠂
21 ᠵᠣᠪᠠᠭᠴᠢᠳ ᠪᠦᠦ ᠢᠴᠢᠭᠦᠷᠢᠲᠡᠢ ᠪᠠᠷ ᠪᠤᠴᠠᠭ ᠵᠤᠲᠠᠷᠠᠭᠤ ᠶᠠᠳᠠᠭᠤᠴᠤᠳ ᠲᠠᠨ ᠤ ᠨᠡᠷᠡ ᠶᠢ ᠮᠠᠭᠲᠠᠭ᠃
22 ᠪᠤᠷᠬᠠᠨ ᠪᠣᠰᠴᠤ᠂ ᠥᠪᠡᠷ ᠦᠨ ᠢᠶᠠᠨ ᠵᠠᠷᠭᠤ ᠶᠢ ᠥᠮᠥᠭᠯᠡᠭᠡᠴᠢ ᠪᠣᠯᠬᠢᠴᠤᠳ ᠡᠳᠦᠷᠵᠢᠨ ᠲᠠᠨ ᠢ ᠬᠡᠷᠬᠢᠨ ᠳᠣᠷᠣᠮᠵᠢᠯᠠᠳᠠᠭ ᠢ ᠰᠠᠨᠠᠭᠠᠴᠢ
23 ᠥᠰᠲᠡᠨ ᠨᠦᠭᠦᠳ ᠦᠨ ᠦᠢᠮᠡᠭᠡᠨ ᠢ ᠪᠦᠦ ᠮᠠᠷᠲᠠᠭᠠᠴᠢ ᠲᠠᠨ ᠤ ᠡᠰᠡᠷᠭᠦ ᠪᠣᠰᠣᠭᠴᠢᠳ ᠤᠨ ᠱᠤᠤᠭᠢᠶᠠᠨ ᠨᠡᠮᠡᠭᠳᠡᠭᠰᠡᠭᠡᠷ ᠪᠠᠢᠨᠠ᠃