ᠳᠠᠭᠤᠯᠠᠯ ᠶᠡᠷᠡᠨ ᠳᠥᠷᠪᠡ
ᠰᠢᠳᠤᠷᠭᠤ ᠰᠢᠭᠦᠭᠴᠢ
1 ᠥᠰᠢᠶᠡ ᠠᠪᠤᠭᠴᠢ ᠪᠤᠷᠬᠠᠨ᠂ ᠥᠰᠢᠶᠡ ᠠᠪᠤᠭᠴᠢ ᠪᠤᠷᠬᠠᠨ ᠶᠣᠬᠣᠸᠠ ᠭᠡᠷᠡᠯᠲᠦᠭᠡᠴᠢ︕
2 ᠪᠣᠰᠣᠭᠠᠴᠢ᠂ ᠳᠡᠯᠡᠬᠡᠢ ᠶᠢ ᠰᠢᠭᠦᠭᠴᠢ ᠡ ᠪᠠᠷᠳᠠᠮᠨᠠᠭᠴᠢᠳ ᠲᠤ ᠬᠠᠷᠢᠭᠤ ᠶᠢ ᠨᠢ ᠥᠭᠭᠥᠭᠡᠴᠢ᠃
3 ᠪᠤᠷᠤᠭᠤᠲᠠᠳ ᠬᠡᠳᠦᠢ ᠪᠣᠯᠲᠠᠯᠠ ᠪᠤᠷᠤᠭᠤᠲᠠᠳ ᠬᠡᠳᠦᠢ ᠪᠣᠯᠲᠠᠯᠠ ᠪᠠᠶᠠᠰᠴᠤ ᠪᠠᠢᠬᠤ ᠶᠣᠰᠣᠲᠠᠢ ᠪᠤᠢ︖ ᠶᠣᠬᠣᠸᠠ
4 ᠲᠡᠳᠡ ᠠᠭᠰᠤᠮᠨᠠᠨ ᠣᠩᠭᠢᠷᠠᠭᠠ ᠦᠭᠡ ᠤᠷᠤᠰᠬᠠᠵᠤ ᠪᠠᠢᠨᠠ ᠪᠤᠵᠠᠷ ᠢ ᠦᠢᠯᠡᠳᠦᠭᠴᠢᠳ ᠪᠦᠭᠦᠳᠡ ᠮᠠᠵᠤᠤᠯᠠᠵᠤ ᠪᠠᠢᠨᠠ᠃
5 ᠶᠣᠬᠣᠸᠠ᠂ ᠲᠡᠳᠡ ᠲᠠᠨ ᠤ ᠠᠷᠠᠳ ᠲᠦᠮᠡᠨ ᠢ ᠲᠠᠯᠬᠢᠯᠠᠨ ᠲᠠᠨ ᠤ ᠥᠮᠴᠢ ᠶᠢ ᠳᠠᠷᠤᠯᠠᠵᠤ ᠪᠠᠢᠨᠠ᠃
6 ᠲᠡᠳᠡ ᠪᠡᠯᠪᠡᠰᠦᠨ ᠡᠮᠡᠭᠲᠡᠢ ᠬᠢᠭᠡᠳ ᠴᠠᠭᠠᠴᠢᠨ ᠢ ᠠᠯᠠᠵᠤ ᠥᠨᠥᠴᠢᠨ ᠢ ᠬᠣᠷᠣᠭᠠᠨ
7 《ᠶᠣᠬᠣᠸᠠ ᠬᠠᠷᠠᠬᠤ ᠦᠭᠡᠢ ᠶᠠᠺᠣᠪ ᠤᠨ ᠪᠤᠷᠬᠠᠨ ᠠᠩ᠋ᠬᠠᠷᠬᠤ ᠦᠭᠡᠢ》 ᠭᠡᠳᠡᠭ᠂
8 ᠠᠷᠠᠳ ᠲᠦᠮᠡᠨ ᠦ ᠳᠤᠮᠳᠠᠬᠢ ᠮᠡᠳᠡᠷᠡᠮᠵᠢ ᠦᠭᠡᠢ ᠬᠥᠮᠦᠰ ᠡ᠂ ᠤᠬᠠᠭᠠᠷᠠᠵᠠᠭᠠ᠂ ᠮᠤᠩ᠋ᠬᠠᠭ ᠤᠳ ᠡ᠂ ᠲᠠ ᠨᠠᠷ ᠬᠡᠵᠢᠶᠡ ᠮᠡᠷᠭᠡᠨ ᠪᠣᠯᠬᠤ ᠶᠤᠮ ᠪᠤᠢ︖
9 ᠴᠢᠬᠢ ᠶᠢ ᠪᠠᠢᠷᠢᠰᠢᠭᠤᠯᠤᠭᠴᠢ ᠰᠣᠨᠣᠰᠬᠤ ᠦᠭᠡᠢ ᠭᠡᠵᠢ ᠤᠤ︖ ᠨᠢᠳᠦ ᠶᠢ ᠪᠦᠲᠦᠭᠡᠭᠴᠢ ᠬᠠᠷᠠᠬᠤ ᠦᠭᠡᠢ ᠭᠡᠵᠢ ᠤᠤ︖
10 ᠦᠨᠳᠦᠰᠦᠲᠡᠨ ᠨᠦᠭᠦᠳ ᠢ ᠭᠡᠰᠬᠡᠭᠴᠢ ᠵᠢᠮᠡᠯᠡᠬᠦ ᠦᠭᠡᠢ ᠭᠡᠵᠢ ᠤᠤ︖ ᠮᠡᠳᠡᠯᠭᠡ ᠶᠢ ᠬᠥᠮᠦᠨ ᠳᠦ ᠰᠤᠷᠭᠠᠭᠴᠢ ᠨᠢ ᠲᠡᠷᠡ ᠶᠤᠮ᠃
11 ᠬᠥᠮᠦᠨ ᠦ ᠪᠣᠳᠣᠯ ᠢ ᠮᠡᠳᠡᠳᠡᠭ ᠶᠣᠬᠣᠸᠠ ᠲᠡᠳᠡᠭᠡᠷ ᠨᠢ ᠬᠣᠭᠣᠰᠣᠨ ᠭᠡᠳᠡᠭ ᠢ ᠮᠡᠳᠡᠨᠡ᠃
12 ᠶᠣᠬᠣᠸᠠ ᠲᠠᠨ ᠢᠶᠠᠷ ᠭᠡᠰᠬᠡᠭᠳᠡᠭᠰᠡᠨ ᠲᠠᠨ ᠤ ᠬᠠᠤᠯᠢ ᠪᠠᠷ ᠰᠤᠷᠭᠠᠭᠳᠠᠭᠰᠠᠨ ᠬᠥᠮᠦᠨ ᠪᠤᠶᠠᠨ ᠲᠠᠢ︕
13 ᠲᠠ ᠪᠡᠷᠬᠡ ᠡᠳᠦᠷ ᠤᠳ ᠠᠴᠠ ᠲᠡᠭᠦᠨ ᠢ ᠬᠠᠮᠠᠭᠠᠯᠠᠵᠤ ᠪᠤᠷᠤᠭᠤᠲᠠᠳ ᠤᠨ ᠨᠦᠬᠡ ᠤᠬᠤᠭᠳᠠᠬᠤ ᠬᠦᠷᠲᠡᠯᠡ ᠲᠡᠭᠦᠨ ᠢ ᠠᠮᠠᠷᠠᠭᠠᠨᠠ᠃
14 ᠶᠣᠬᠣᠸᠠ ᠥᠪᠡᠷ ᠦᠨ ᠢᠶᠠᠨ ᠠᠷᠠᠳ ᠲᠦᠮᠡᠨ ᠢ ᠬᠠᠶᠠᠬᠤ ᠦᠭᠡᠢ ᠥᠪᠡᠷ ᠦᠨ ᠢᠶᠠᠨ ᠥᠮᠴᠢ ᠶᠢ ᠣᠷᠬᠢᠬᠤ ᠦᠭᠡᠢ︕
15 ᠰᠢᠭᠦᠯᠲᠡ ᠳᠠᠬᠢᠨ ᠰᠢᠳᠤᠷᠭᠤ ᠪᠣᠯᠵᠤ ᠴᠢᠭ᠍ᠴᠢ ᠰᠡᠳᠬᠢᠯᠲᠡᠨ ᠪᠦᠭᠦᠳᠡ ᠲᠡᠭᠦᠨ ᠢ ᠳᠠᠭᠠᠬᠤ ᠪᠣᠯᠣᠨᠠ︕
16 ᠬᠡᠨ ᠮᠢᠨᠦ ᠡᠮᠦᠨᠡ ᠡᠴᠡ ᠪᠤᠷᠤᠭᠤᠲᠠᠳ ᠤᠨ ᠡᠰᠡᠷᠭᠦ ᠪᠣᠰᠬᠤ ᠪᠤᠢ︖ ᠬᠡᠨ ᠮᠢᠨᠦ ᠡᠮᠦᠨᠡ ᠡᠴᠡ ᠪᠤᠵᠠᠷ ᠢ ᠦᠢᠯᠡᠳᠦᠭᠴᠢᠳ ᠤᠨ ᠡᠰᠡᠷᠭᠦ ᠵᠣᠭᠰᠣᠬᠤ ᠪᠤᠢ︖
17 ᠬᠡᠷᠪᠡ ᠶᠣᠬᠣᠸᠠ ᠨᠠᠳᠠ ᠳᠤ ᠲᠤᠰᠠᠯᠠᠭᠠ ᠦᠭᠡᠢ ᠪᠣᠯ ᠰᠦᠨᠡᠰᠦ ᠮᠢᠨᠢ ᠬᠡᠳᠦᠢᠨᠡᠢ ᠠᠨᠢᠷ ᠦᠭᠡᠢ ᠶᠢᠨ ᠳᠤᠮᠳᠠ ᠣᠷᠣᠰᠢᠬᠤ ᠪᠠᠢᠭᠰᠠᠨ᠃
18 ᠪᠢ 《ᠬᠥᠯ ᠮᠢᠨᠢ ᠬᠠᠯᠲᠤᠷᠢᠬᠤ ᠨᠢ》 ᠭᠡᠪᠡᠯ ᠶᠣᠬᠣᠸᠠ ᠲᠠᠨ ᠤ ᠦᠨᠡᠨ ᠬᠠᠢᠷᠠ ᠨᠠᠮᠠᠶᠢ ᠲᠦᠰᠢᠳᠡᠭ᠃
19 ᠰᠡᠳᠬᠢᠯ ᠤᠨ ᠮᠢᠨᠢ ᠵᠣᠪᠠᠭᠤᠷᠢ ᠶᠡᠬᠡᠰᠪᠡᠯ ᠲᠠᠨ ᠤ ᠲᠠᠢᠪᠤᠰᠢᠷᠠᠯ ᠨᠠᠮᠠᠶᠢ ᠪᠠᠶᠠᠷᠯᠠᠭᠤᠯᠳᠠᠭ᠃
20 ᠲᠣᠭᠲᠠᠭᠠᠯ ᠢᠶᠠᠷ ᠢᠶᠠᠨ ᠮᠠᠭᠤ ᠶᠢ ᠰᠡᠳᠦᠳᠡᠭ ᠵᠠᠪᠬᠠᠢᠷᠠᠭᠰᠠᠨ ᠰᠠᠭᠤᠳᠠᠯ ᠲᠠᠨ ᠲᠠᠢ ᠨᠡᠢᠯᠡᠨᠡ ᠭᠡᠵᠢ ᠤᠤ︖
21 ᠲᠡᠳᠡ ᠪᠦᠯᠦᠭᠯᠡᠨ ᠵᠥᠪᠲᠡᠨ ᠦ ᠠᠮᠢ ᠶᠢ ᠬᠠᠢᠵᠤ᠂ ᠭᠡᠮ ᠦᠭᠡᠢ ᠬᠥᠮᠦᠨ ᠳᠦ ᠦᠬᠦᠯ ᠦᠨ ᠶᠠᠯᠠ ᠤᠨᠤᠭᠠᠬᠤ ᠭᠡᠨᠡ᠃
22 ᠬᠠᠷᠢᠨ ᠶᠣᠬᠣᠸᠠ ᠪᠣᠯ ᠮᠢᠨᠦ ᠴᠠᠢᠵᠠ ᠮᠢᠨᠦ ᠪᠤᠷᠬᠠᠨ ᠪᠣᠯ ᠮᠢᠨᠦ ᠬᠣᠷᠭᠣᠳᠠᠬᠤ ᠬᠠᠳᠠ ᠶᠤᠮ᠃
23 ᠲᠡᠷᠡ ᠲᠡᠳᠡᠨ ᠦ ᠭᠡᠮ ᠨᠢᠭᠦᠯ ᠢ ᠥᠪᠡᠷᠰᠡᠳ ᠳᠡᠭᠡᠷᠡ ᠨᠢ ᠡᠷᠭᠢᠭᠦᠯᠵᠦ ᠬᠣᠷᠣᠨ ᠮᠠᠭᠤ ᠪᠠᠷ ᠨᠢ ᠲᠡᠳᠡᠨ ᠢ ᠤᠰᠠᠳᠬᠠᠨᠠ ᠪᠢᠳᠡᠨ ᠦ ᠪᠤᠷᠬᠠᠨ ᠶᠣᠬᠣᠸᠠ ᠲᠡᠳᠡᠨ ᠢ ᠤᠰᠠᠳᠬᠠᠨᠠ᠃